Tauhi Mateaki kia Kalaisi ko e Tuʻí

“Naʻe tuku kiate ia ha hau, mo ha langilangi, mo ha pule, koeʻuhi ke tauhi kiate ia ʻe he ngaahi kakai, matakali, mo faʻahinga lea kehekehe.”—TANIELA 7:14.

1, 2. ʻOku anga-fēfē ʻetau ʻiloʻi naʻe ʻikai ke maʻu ʻe Kalaisi ia ʻa e mafai kotoa ki he Puleʻangá ʻi he 33 T.S.?

KO HAI ia ha taki ʻe lava ke ne tukuange ʻene moʻuí maʻa hono kakaí pea toe moʻui mai pē ʻo pule ko e tuʻí? Ko hai ia ha tuʻi naʻe lava ʻo moʻui ʻi he māmaní, ʻo ueʻi ʻa hono kakaí ke nau falala mo mateaki kiate ia, pea pule mai leva ia mei hēvani? Ko e tokotaha pē te ne lava ʻo fai ʻení, pea mo e toe meʻa lahi angé, ko Sīsū Kalaisi. (Luke 1:​32, 33) ʻI he Penitekosi ʻo e 33 T.S., ʻi he hili ʻa e mate, toetuʻu mo e ʻalu hake ʻa Kalaisi ki hēvaní, naʻe ʻai ia ʻe he ʻOtuá “ke ʻulu ki he Siasi ʻi he meʻa kotoa pe.” (Efeso 1:​20-22; Ngāue 2:​32-36) Naʻe kamata leva ai ke pule ʻa Kalaisi ka ʻi he tuʻunga fakangatangata pē. Ko e muʻaki faʻahinga naʻá ne puleʻí ko e kau Kalisitiane pani ʻe he laumālié, ʻa kinautolu naʻe faʻuʻaki ʻa e ʻIsileli fakalaumālié, ʻa e “Isileli oe Otua.”—Kaletia 6:​16, PM; Kolose 1:13.

² ʻI he meimei taʻu ʻe 30 hili ʻa e Penitekosi ʻi he 33 T.S., naʻe fakapapauʻi ai ʻe Paula ʻo pehē naʻe teʻeki ai ke maʻu ʻe Kalaisi ia ʻa e mafai kotoa ki he Puleʻangá, ka “naʻa ne nofo hifo mei he toʻomataʻu ʻo e ʻOtua; pea talunga ia mo ʻene nofoʻaki tali kaeʻoua ke ngaohi hono ngaahi fili ko hono tuʻunga vaʻe.” (Hepelu 10:​12, 13) Kae kehe, ʻi he ofi ki he ngataʻanga ʻo e ʻuluaki senituli T.S., naʻe tomuʻa mātā ai ʻe he ʻapositolo matuʻotuʻa ko Sioné ʻi ha vīsone ʻa hono fokotuʻu ʻa Kalaisi Sīsū ko e Tuʻi ia ʻo e Puleʻanga foʻou fakahēvaní ʻe he Hau Fakalevelevá, ʻa Sihova. (Fakahā 11:15; 12:​1-5) ʻI heʻetau vakai ki ai ʻi he taimi ní, ʻe lava ke tau fakamanatu ʻa e fakamoʻoni papau ʻokú ne fakapapauʻi mai naʻe kamata pule ʻa Kalaisi ʻi hēvani ʻi he tuʻunga ko e Tuʻi faka-Mīsaiá ʻi he 1914.a

 3. (a) Talu mei he 1914 kuo kau atu ai ki he ongoongo lelei ʻo e Puleʻangá ʻa e foʻi tafaʻaki foʻou ko e hā? (e) Ko e hā ʻa e ongo fehuʻi ʻe lava ke tau ʻeke hifo kiate kitautolú?

³ ʻIo, talu mei he 1914 kuo kau atu ai ki he ongoongo lelei ʻo e Puleʻangá ha foʻi tafaʻaki fakatoʻoaloto foʻou. Kuo pule longomoʻui ʻa Kalaisi ʻi he tuʻunga ko e Tuʻi ia ʻo e Puleʻanga fakahēvani ʻa e ʻOtuá, neongo ʻokú ne pule ‘ʻi he lotolotonga ʻo hono ngaahi filí.’ (Sāme 110:​1, 2; Mātiu 24:14; Fakahā 12:​7-12) ʻIkai ngata aí, takatakai he māmaní, ʻoku tali loto-vēkeveke ai ʻe hono kakai mateakí ʻa hono tuʻunga-mafaí ʻaki ʻenau kau atu ki ha polokalama ako Tohi Tapu fakamāmanilahi ʻa ia ʻoku ʻikai ha meʻa ia ʻi he hisitōlia e faʻahinga ʻo e tangatá ʻe tatau mo ia. (Taniela 7:​13, 14; Mātiu 28:18) Ko e kau Kalisitiane pani ʻe he laumālié, ʻa e “fanau ʻo e Puleʻanga,” ʻoku nau ngāue ko e kau ‘fakafofonga kinautolu ʻo Kalaisi.’ ʻOku poupou mateaki kiate kinautolu ha fuʻu kakai lakalakaimonū ʻo e “fanga sipi kehe” ʻa Kalaisí, ʻa ia ʻoku nau ngāue ko e kau talafekau ʻo e Puleʻanga ʻo e ʻOtuá. (Mātiu 13:38; 2 Kolinito 5:20; Sione 10:16) Kae kehe, ʻoku fiemaʻu ke tau sivisiviʻi fakatāutaha kitautolu pe ʻoku tau tali moʻoni koā ʻa e tuʻunga-mafai ʻo Kalaisí. ʻOku tau kei mateaki ai pē kiate ia? ʻE lava fēfē ke tau mateaki ki ha Tuʻi ʻoku pule ia ʻi hēvani? Neongo ia, fēfē ke tau ʻuluaki lāulea angé ki he ngaahi ʻuhinga ʻoku tau mateaki ai kia Kalaisí.

Ko ha Tuʻi ʻOkú Ne Ueʻi ʻa e Mateakí

 4. ʻI he ngāue ʻa Sīsū ʻi he māmaní, ko e hā naʻá ne fakahoko ʻi hono tuʻunga ko e Tuʻi ki he kahaʻú?

⁴ ʻOku fakatuʻunga ʻetau mateaki kia Kalaisí ʻi heʻetau houngaʻia ʻi he meʻa naʻá ne faí pea pehē foki ki hono ngaahi ʻulungāanga tuʻu-ki-muʻá. (1 Pita 1:8) ʻI he ʻi māmani ʻa Sīsuú ʻi hono tuʻunga ko e Tuʻi ki he kahaʻú, naʻá ne fakahāhā ai ʻi ha tuʻunga fakangatangata ʻa e meʻa te ne fai fakamāmanilahi ʻi he taimi te ne hoko ai ʻo pule ko e Tuʻi ʻi he taimi kotofa ʻa e ʻOtuá. Naʻá ne fafanga ʻa e kau fiekaiá. Naʻá ne fakamoʻui ʻa e kau puké, kuí, kau faingataʻaʻia fakasinó, tulí pea mo e noá. Naʻe aʻu ʻo ne fokotuʻu mai ha niʻihi naʻe mate. (Mātiu 15:​30, 31; Luke 7:​11-16; Sione 6:​5-13) ʻIkai ngata aí, ko hono ʻiloʻi ko ia ʻa e moʻui ʻa Sīsū ʻi he māmaní, kae tautefito ki heʻene ʻofa feilaulauʻi-kitá, ʻokú ne ʻai ai kitautolu ke tau lava ʻo ʻiloʻi ʻa e ngaahi ʻulungāanga te ne fakahāhā he taimi te ne hoko ai ʻi he kahaʻú ko e Tokotaha-Pule ki he foʻi māmaní. (Maake 1:​40-45) ʻI he fekauʻaki mo ʻení, naʻe pehē ʻe Napoleone Ponapate: “Ko au mo ʻAlekisānita, Sisa, Salimeini ne mau fokotuʻu ha ngaahi ʻemipaea, ka naʻa mau fokotuʻu ʻemau ngaahi ngāue kāfakafá ʻo makatuʻunga ʻi he hā? Makatuʻunga he fakamālohí. Ko Sīsū Kalaisi ʻiate ia pē naʻá ne fokotuʻu ʻa hono puleʻangá ʻi he ʻofa, pea ʻi he ʻahó ni ʻe loto-lelei ai ʻa e kau tangata ʻe laui miliona ke nau mate maʻa Sīsū.”

 5. Ko e hā naʻe fakamānako ai ʻa e ʻulungāanga ʻo Sīsuú?

⁵ Koeʻuhi naʻe anga-malū mo loto-fakatōkilalo ʻa Sīsū, ko e faʻahinga ko ia naʻa nau mafasia ʻi he ngaahi tengé mo e kavengá naʻe fakaivifoʻouʻi kinautolu ʻe heʻene ngaahi akonaki fakatupu langa haké mo ʻene anga-leleí. (Mātiu 11:​28-30) Naʻe lata ʻa e fānaú kiate ia. Naʻe loto-vēkeveke ʻa e kau tangata anga-fakatōkilalo mo ʻiloʻiló ke hoko ko ʻene kau ākongá. (Mātiu 4:​18-22; Maake 10:​13-16) Koeʻuhi ko ʻene tōʻonga fakaʻatuʻi mo anga-fakaʻapaʻapá naʻá ne maʻu ai ʻa e mateaki ʻa e kau fefine manavahē-ʻOtua tokolahi, ʻa ia ko honau tokolahi naʻa nau ngāueʻaki honau taimí, iví mo ʻenau ngaahi koloa fakamatelié ke tokangaʻi ia ʻi heʻene ngāue fakamalangá.—Luke 8:​1-3.

 6. Ko e hā ʻa e ngaahi ongoʻi ʻofa loloto naʻe hā ʻia Sīsū ʻi he taimi naʻe mate ai ʻa Lāsalosí?

⁶ Naʻe hā ʻa e niʻihi ʻo e ngaahi ongoʻi ʻofa loloto taha ʻa Kalaisí ʻi he taimi naʻe mate ai ʻa hono kaumeʻa ʻofeina ko Lāsalosí. Naʻe maongo loloto kiate ia ʻa e mamahi ʻa Mele mo Māʻatá ʻo ne toʻe ai ʻi hono laumālié, peá ne “tagi.” Naʻá ne “mamahi,” ʻa ia naʻe ʻai ia ʻe heʻene fuʻu loto-mamahí ke ne hohaʻatuʻu, neongo naʻá ne ʻosi ʻiloʻi ʻe taimi nounou pē mei ai te ne fokotuʻu hake ʻa Lāsalosi. Ko ia, ʻi hono ueʻi ia ʻe he ʻofá mo e manavaʻofá, naʻe ngāueʻaki ai ʻe Sīsū ʻa e mafai naʻe ʻoange kiate ia ʻe he ʻOtuá ʻo ne fokotuʻu hake ʻaki ʻa Lāsalosi.—Sione 11:​11-15, 33-35, 38-44, PM.

 7. Ko e hā ʻoku tuha ai mo Sīsū ke tau mateaki ki aí? (Sio foki ki he puha ʻi he peesi 31.)

⁷ ʻOku tau ofo ʻi he ʻofa mālohi ʻa Sīsū ki he meʻa naʻe totonú mo ʻene fehiʻa ki he mālualoí mo e fulikivanú. Naʻe tuʻo ua ʻene ngāue loto-toʻa ke fakamaʻa ʻa e temipalé mei he kau fefakatauʻaki mānumanú. (Mātiu 21:​12, 13; Sione 2:​14-17) ʻIkai ko ia pē, ʻi hono tuʻunga ko e tangata ʻi he foʻi māmaní, naʻá ne hokosia ai ʻa e ngaahi faʻahinga kotoa ʻo e faingataʻá, ʻo ne ʻiloʻi fakafoʻituitui ai ʻa e ngaahi tenge mo e ngaahi palopalema ʻoku tau fehangahangai mo iá. (Hepelu 5:​7-9) Naʻe toe ʻiloʻi foki ʻe Sīsū ʻa e anga ʻo e ongoʻi ʻa ha taha ʻoku fehiʻanekinaʻi mo ngaohia taʻefaitotonu. (Sione 5:​15-18; 11:​53, 54; 18:38–19:16) Ke fakahoko ʻa e finangalo ʻo ʻene Tamaí mo tokonaki ʻa e moʻui taʻengatá ki he faʻahinga te ne pule mai ki aí, naʻe faai atu pē ʻo ne moʻulaloa loto-toʻa ke ne mate ʻi ha founga fakamamahi. (Sione 3:16) ʻIkai ʻoku ueʻi koe ʻe he ngaahi ʻulungāanga pehē ʻo Kalaisí ke ke hokohoko tauhi mateaki ai pē kiate ia? (Hepelu 13:8; Fakahā 5:​6-10) Ka ko e hā ʻoku fiemaʻu ke fai kae hoko ai ko e faʻahinga ʻoku pule mai ki ai ʻa e Tuʻi ko Kalaisí?

Ngaahi Fiemaʻu Ka Ke Hoko Ai ʻo Pule Mai ki Ai ʻa Kalaisí

 8. Ko e hā ʻoku fiemaʻu mei he faʻahinga ʻoku pule mai ki ai ʻa Kalaisí?

⁸ Fakakaukau atu ki he fakahoa ko ʻení: Ke hoko ko ha tokotaha nofofonua ʻi ha fonua kehe ʻoku faʻa fiemaʻu ki ai ke ne aʻusia ʻa e ngaahi tefitoʻi fiemaʻu pau. Mahalo ʻe fiemaʻu ki he kau feinga nofofonuá ke nau ʻulungāanga lelei pea mo ʻi ha tuʻunga pau ʻo e moʻui leleí. ʻI he tuʻunga meimei tatau, ko e faʻahinga ʻoku pule mai ki ai ʻa Kalaisí ʻoku fiemaʻu ia ke nau tauhi maʻu ʻa e ngaahi tuʻunga māʻolunga fakaʻulungāanga pea mo e moʻui lelei fakalaumālie.—1 Kolinito 6:​9-11; Kaletia 5:​19-23.

 9. ʻE lava fēfē ke tau fakahāhā ʻoku tau mateaki kia Kalaisi?

⁹ ʻOku toe fiemaʻu totonu foki ʻe Sīsū Kalaisi ʻa hono kakaí ke nau mateaki ange kiate ia mo hono Puleʻangá. ʻOku nau fakahāhā ʻa e mateaki peheé ʻaki ʻenau moʻui ʻo fakatatau ki he meʻa naʻá ne akoʻi ʻi he taimi naʻá ne ʻi māmani ai ʻi hono tuʻunga ko e Tuʻi ki he kahaʻú. Hangē ko ʻení, ʻoku nau fakamuʻomuʻa ʻa e ngaahi meʻa ʻo e Puleʻanga ʻo e ʻOtuá mo e finangalo ʻo e ʻOtuá ʻi he tuli ki he ngaahi meʻa fakamatelié. (Mātiu 6:​31-34) ʻOku nau toe feinga fakamātoato foki ke tapua atu ʻa e ʻulungāanga hangē ko Kalaisí, ʻo aʻu ki he taimi ʻoku nau tofanga ai ʻi he ngaahi tuʻunga faingataʻá. (1 Pita 2:​21-23) ʻIkai ngata aí, ʻoku muimui ʻa e faʻahinga ʻoku pule mai ki ai ʻa Kalaisí ki heʻene faʻifaʻitakiʻangá ʻaki ʻenau tamuʻomuʻa ʻi he failelei ki he niʻihi kehé.—Mātiu 7:12; Sione 13:​3-17.

10. ʻE lava fēfē ke fakahāhā ʻa e mateaki kia Kalaisí ʻi he (a) fāmilí mo e (e) fakatahaʻangá?

¹⁰ ʻOku toe fakahāhā ʻe he kau muimui ʻo Sīsuú ʻa e mateaki kiate iá ʻaki ʻenau tapua atu hono ngaahi ʻulungāangá ʻi he fāmilí. Hangē ko ʻení, ʻoku fakahāhā ʻe he ngaahi husepānití ʻa ʻenau mateaki ki honau Tuʻi fakahēvaní ʻaki ʻenau faʻifaʻitaki kia Kalaisi ʻi he anga ʻo ʻenau tōʻongafai ki honau ngaahi uaifí mo e fānaú. (Efeso 5:​25, 28-30; 6:4; 1 Pita 3:7) ʻOku fakahāhā ʻe he ngaahi uaifí ʻenau mateaki kia Kalaisí ʻaki ʻenau ʻulungāanga maʻá, ‘angavaivaí mo e angamaluú.’ (1 Pita 3:​1-4; Efeso 5:​22-24) ʻOku mateaki kia Kalaisi ʻa e fānaú ʻi he taimi ʻoku nau faʻifaʻitaki ai kiate ia ʻo talangofuá. ʻI he kei talavou ʻa Sīsuú, naʻá ne anganofo maʻu pē ki heʻene ongo mātuʻá, neongo ko kinauá naʻá na taʻehaohaoa. (Luke 2:​51, 52; Efeso 6:1) Ko e faʻahinga ʻoku pule mai ki ai ʻa Kalaisí ʻoku nau feinga mateaki ke faʻifaʻitaki kiate ia ʻaki ʻenau fakahāhā ʻa e feongoʻiʻaki, ʻo maʻu ʻa e feʻofaʻaki fakatokouá pea mo e manavaʻofa ongongofuá. ʻOku nau feinga ke hangē ko Kalaisí, ʻo fakakaukau fakatōkilalo, ʻo ʻikai “totongi ʻa e kovi ʻaki ʻa e kovi, pe ko e leakovi ʻaki ʻa e leakovi.”—1 Pita 3:​8, 9; 1 Kolinito 10:34 (1Ko 11:​1, PM).

Faʻahinga ʻOku Talangofua ki Heʻene Laó

11. ʻOku anganofo ʻa e faʻahinga ʻoku pule mai ki ai ʻa Kalaisí ki he ongo lao fē?

¹¹ ʻI he hangē pē ko e talangofua ʻa ha kau feinga nofofonua ki he lao ʻo e fonua ko iá, ʻoku anganofo ʻa e faʻahinga ʻoku pule mai ki ai ʻa Kalaisí ki he “lao ʻa Kalaisi” ʻaki ʻenau moʻui ʻo fehoanaki mo e kotoa ʻo e meʻa naʻá ne akoʻi mo fekauʻí. (Kaletia 6:2) ʻI hono tefitó, ʻoku nau moʻui mateaki ʻaki ʻa e “lao fakatuʻi” ko e ʻofá. (Semisi 2:8) ʻOku kau ki he ongo lao ko ʻení ʻa e hā?

12, 13. ʻOku anga-fēfē ʻetau anganofo mateaki ki he ‘lao ʻa Kalaisí’?

¹² Ko e faʻahinga ʻoku pule mai ki ai ʻa Kalaisí ʻoku nau taʻehaohaoa pea ʻoku ʻi ai mo ʻenau ngaahi fehālaaki. (Loma 3:23) Ko ia ai, ʻoku fiemaʻu ia ke nau hokohoko atu hono fakatupulekina ʻa e “feʻofaʻaki fakalotu ʻoku taʻeloi” ke hoko ai ʻo “fai ʻofa ʻa e taha ki he taha, ʻo fai mei he loto.” (1 Pita 1:22) “Ka ai ha taha ʻoku ne koviʻia ʻi ha taha ʻi ha meʻa,” ʻoku ngāueʻaki mateaki leva ʻe he kau Kalisitiané ʻa e lao ʻa Kalaisí ʻaki ʻenau “fekatakiʻaki pe mo fefakamolemoleʻaki.” ʻOku tokoniʻi kinautolu ʻe he talangofua ki he lao ko iá ke nau hokohoko sio fakalaka atu ai pē ʻi he taʻehaohaoá pea feinga ke hoko ʻo feʻofaʻaki. ʻIkai ʻokú ke houngaʻia ʻi he feohi mo e faʻahinga ʻoku nau teungaʻaki ʻa e ‘fakamaʻu ʻo e haohaoá,’ ʻa e ʻofá, ʻi heʻenau anganofo mateaki ki hotau Tuʻi ʻofá?—Kolose 3:​13, 14.

¹³ ʻIkai ko ia pē, naʻe fakamatalaʻi ʻe Sīsū ko e ʻofa naʻá ne fokotuʻú naʻe mahulu atu ia ʻi he feʻofaʻaki anga-maheni pē ko ia ʻoku fakahāhā ʻe he kakaí. (Sione 13:​34, 35) Kapau ʻoku tau ʻofa pē he faʻahinga ʻoku nau ʻofa maí, ʻe ʻikai ai ke tau fai ʻe kitautolu ia ha meʻa ʻoku “hulu atu.” ʻI he tuʻunga ko iá ʻe ʻikai leva ai ke kakato ʻetau ʻofá. Naʻe ekinaki mai ʻa Sīsū ke tau faʻifaʻitaki ki he ʻofa ʻa ʻene Tamaí ʻaki hono fakahāhā ʻa e ʻofa makatuʻunga ʻi he tefitoʻi moʻoní ʻo aʻu ki hotau ngaahi filí ʻa ia ʻoku nau fehiʻa mo fakatangaʻi kitautolú. (Mātiu 5:​46-48) ʻOku toe ueʻi foki ʻe he ʻofa ko ʻení ʻa e kakai ʻo e Puleʻanga ʻo e ʻOtuá ke nau kītaki mateaki ʻi heʻenau ngāue tefitó. Ko e hā ʻa e ngāue ko iá?

Ko Hono ʻAhiʻahiʻi ʻo e Mateakí

14. Ko e hā ʻoku mātuʻaki mahuʻinga ai ʻa e ngāue fakamalangá?

¹⁴ ʻOku fai ʻe he kakai ʻo e Puleʻanga ʻo e ʻOtuá ʻi he taimí ni ʻa e ngāue mahuʻinga ko hono “fakababau atu ae buleaga oe Otua.” (Ngāue 28:​23, PM) ʻOku mātuʻaki mahuʻinga ʻa hono fai iá koeʻuhí he ko e Puleʻanga Faka-Mīsaiá te ne fakatonuhiaʻi ʻa e tuʻunga-hau fakaleveleva ʻo Sihová. (1 Kolinito 15:​24-28) ʻI he taimi ʻoku tau malangaʻi ai ʻa e ongoongo leleí, ʻoku maʻu ai ʻe he kau fanongó ʻa e faingamālie ke nau hoko ko e faʻahinga ʻoku pule mai ki ai ʻa e Puleʻanga ʻo e ʻOtuá. ʻIkai ngata aí, ko e anga ʻo e tali ʻa e kakaí ki he pōpoakí, ʻoku hoko ia ko ha tuʻunga ʻa ia ʻe lava ʻe Kalaisi ko e Tuʻí ʻo fakamaauʻiʻaki ʻa e faʻahinga ʻo e tangatá. (Mātiu 24:14; 2 Tesalonaika 1:​6-10) Ko ia ai, ko ha founga tefito ʻa ia te tau fakahāhā ai ʻa e mateaki kia Kalaisí ko e talangofua ki heʻene fekau ke talanoa ki he niʻihi kehé ʻo fekauʻaki mo e Puleʻangá.—Mātiu 28:​18-20.

15. Ko e hā ʻoku ʻahiʻahiʻi ai ʻa e mateaki ʻa e kau Kalisitiané?

¹⁵ Ko e moʻoni, ʻoku fakafepakiʻi ʻe Sētane ʻa e ngāue fakamalangá ʻi ha faʻahinga founga pē te ne lava ʻo faiʻaki, pea ʻoku ʻikai tali ʻe he kau taki fakaetangatá ia ʻa e tuʻunga-mafai ʻo Kalaisi naʻe ʻoange ʻe he ʻOtuá. (Sāme 2:​1-3, 6-8) Ko ia naʻe fakatokanga ai ʻa Sīsū ki heʻene kau akó: “ʻOku ʻikai ha tamaioʻeiki ʻe lahi ʻi heʻene ʻeiki. Kapau kuo nau fakatangaʻi au, te nau fakatangaʻi ʻa kimoutolu foki.” (Sione 15:20) ʻI heʻene peheé, ʻoku kau ai ʻa e kau muimui ʻo Kalaisí ʻi he tau fakalaumālie ʻa ia ʻoku ʻahiʻahiʻi ai ʻenau mateakí.—2 Kolinito 10:​3-5; Efeso 6:​10-12.

16. ʻOku anga-fēfē hono ʻoange ʻe he faʻahinga ʻoku pule mai ki ai ʻa e Puleʻanga ʻo e ʻOtuá “ki he ʻOtua ʻa e ngaahi meʻa ʻa e ʻOtua”?

¹⁶ Neongo ʻoku kei mateaki ai pē ʻa e faʻahinga ʻoku pule mai ki ai ʻa e Puleʻanga ʻo e ʻOtuá ki honau Tuʻi taʻehāmaí, ʻoku nau kei fakaʻapaʻapa pē ki he ngaahi mafai fakaetangatá. (Taitusi 3:​1, 2) Naʻe pehē ʻe Sīsū: “ʻAnge kia Sisa ʻa e ngaahi meʻa ʻa Sisa, pea ki he ʻOtua ʻa e ngaahi meʻa ʻa e ʻOtua.” (Maake 12:​13-17) Ko ia ai, ʻoku talangofua ʻa e faʻahinga ʻoku pule mai ki ai ʻa Kalaisí ki he ngaahi lao fakapuleʻanga ʻa ē ʻoku ʻikai fepaki mo e ngaahi lao ʻa e ʻOtuá. (Loma 13:​1-7) Kae kehe, ʻi he taimi naʻe taʻetokaʻi ai ʻe he fakamaauʻanga māʻolunga faka-Siú ʻa e ngaahi lao ʻa e ʻOtuá ʻi heʻenau tuʻutuʻuniʻi ʻa e kau ākonga ʻa Sīsuú ke tuku ʻenau malangá, naʻa nau lea loto-toʻa ai ʻi he anga-fakaʻapaʻapa ʻo pehē kuo pau ia kiate kinautolu ke nau “fai ki he pule ʻa e ʻOtua ʻi he pule ʻa e tangata.”—Ngāue 1:8; 5:​27-32.

17. Ko e hā te tau lava ai ʻo fehangahangai loto-toʻa mo e ngaahi ʻahiʻahiʻi ʻo e mateakí?

¹⁷ Ko e moʻoni, ʻoku fiemaʻu ki he faʻahinga ʻoku pule mai ki ai ʻa Kalaisí ʻa e loto-toʻa lahi ke nau kei mateaki ai pē ki honau Tuʻí ʻi he fehangahangai mo e fakatangá. Neongo ia, naʻe pehē ʻe Sīsū: “Monūʻiaā ka ko kimoutolu, ʻo ka manukia kimoutolu, mo fakatangaʻi, mo lohiʻekina ʻi he kovi kehekehe, koeʻuhi ko au. Mou fiefia mo hakailangitau: he lahi hoʻomou totongi ʻi Hevani.” (Mātiu 5:​11, 12) Ko e muʻaki kau muimui ʻo Kalaisí naʻa nau hokosia moʻoni ʻa e ngaahi lea ko iá. Neongo naʻe haha kinautolu ʻi heʻenau hokohoko atu hono malangaʻi ʻa e Puleʻangá, naʻa nau fiefia kinautolu “koeʻuhi kuo lau kinautolu ʻoku nau tāu ke ngaohikoviʻi koeʻuhi ko e huafa. Pea ko e ʻaho kotoa pē, ʻi he Temipale pea ʻi ʻapi, naʻe ʻikai tuku ʻenau ako mo malangaʻaki ʻa Sisu, ko e Misaia ia.” (Ngāue 5:​41, 42) ʻOkú ke taau koe ke fakaongoongoleleiʻi ʻi hoʻo fakahāhā ko ia ʻa e laumālie mateaki tatau ʻi hoʻo kītaki ʻi he ngaahi tuʻunga faingataʻá, puké, mate ʻa ha taha ʻofeina, pe fakafepakí.—Loma 5:​3-5; Hepelu 13:6.

18. Ko e hā ʻoku hā mei he lea ʻa Sīsū kia Ponitō Pailató?

¹⁸ ʻI he teʻeki ai ke hoko ʻa Sīsū ko e Tuʻí, naʻá ne fakamatalaʻi ange ki he Kōvana Loma ko Ponitō Pailató: “Ko hoku puleʻanga ʻoku ʻikai ʻo e maama ko eni: ka ne ʻo e maama ko eni ʻa hoku puleʻanga, pehē ʻe tau haʻaku kau ʻofisa ke taʻofi hoku tukuange ki haʻa Siu: ka ko eni, ko hoku puleʻanga ʻoku ʻikai ʻo ʻeni.” (Sione 18:36) Ko ia ai, ko e faʻahinga ʻoku pule mai ki ai ʻa e Puleʻanga fakahēvaní, ʻoku ʻikai te nau toʻo meʻatau ki ha taha pē pe fakafaʻafaʻahi ʻi ha faʻahinga fepaki fakaetangata pē. ʻI he mateaki ki he “ʻEiki ʻo e Melino,” ʻoku nau kei tuʻu-ʻatā fakaʻaufuli ai pē mei he ngaahi tuʻunga fakafaʻafaʻahi ʻo e māmaní.—Aisea 2:​2-4; 9:​6, 7 (Ai 9:​5, 6, PM).

Ngaahi Pale Tuʻuloa Maʻá e Faʻahinga Mateakí

19. Ko e hā ʻe lava ai ʻe he faʻahinga ʻoku pule mai ki ai ʻa Kalaisí ʻo hanga loto-falala atu ki he kahaʻú?

¹⁹ Ko e faʻahinga mateaki ʻoku pule mai ki ai ʻa e “Tuʻi ʻo e ngaahi tuʻi,” ʻa Kalaisí, ʻoku nau hanga ki he kahaʻú ʻaki ʻa e loto-falala. ʻOku nau fakatuʻamelie vēkeveke ki he tuʻunuku mai ʻa e fakahāhā ʻa hono tuʻunga-mafai faka-Tuʻi fakahēvaní. (Fakahā 19:​11–20:3; Mātiu 24:30) Ko e toenga ʻo e faʻahinga mateaki pani ʻe he laumālié, ʻa e “fanau ʻo e Puleʻanga,” ʻoku nau fakatuʻotuʻa atu ki honau tofiʻa mahuʻinga ko e hoko ko e ngaahi tuʻi fakataha mo Kalaisi ʻi hēvani. (Mātiu 13:38; Luke 12:32) ʻOku tatali loto-vēkeveke ʻa e “fanga sipi kehe” mateaki ʻa Kalaisí ki heʻene talaki fakahāhā ʻa ʻene hōifua kiate kinautolú: “Omi kimoutolu, ʻa e faʻahinga kuo fakamonuʻia ʻe heʻeku Tamai, ʻo mou hoko ki he [feituʻu Palataisi fakamāmani ʻo e] puleʻanga kuo toka teuteu moʻomoutolu talu e tanu pou ʻo mamani.” (Sione 10:16; Mātiu 25:34) Ko ia ai, ʻofa ke fakapapauʻi ʻe he faʻahinga kotoa ʻoku pule mai ki ai ʻa e Puleʻanga ʻo e ʻOtuá ke nau hokohoko atu ʻa e tauhi mateaki kia Kalaisi ko e Tuʻí.

[Fakamatala ʻi lalo]

ʻE Lava Ke Ke Fakamatalaʻi?

• Ko e hā ʻoku tuha ai mo Kalaisi ke tau mateaki kiate iá?

• ʻOku anga-fēfē hono fakahāhā ʻe he faʻahinga ʻoku pule mai ki ai ʻa Kalaisí ʻa ʻenau mateaki kiate iá?

• Ko e hā ʻoku tau loto ai ke tau mateaki kia Kalaisi ko e Tuʻí?

[Puha ʻi he peesi 31]

NGAAHI TOE ʻULUNGĀANGA TUʻU-KI-MUʻA ʻO KALAISI

Taʻefilifilimānako—Sione 4:​7-30.

Manavaʻofa—Mātiu 9:​35-38; 12:​18-21; Maake 6:​30-34.

ʻOfa feilaulauʻi-kita—Sione 13:1; 15:​12-15.

Mateaki—Mātiu 4:​1-11; 28:20; Maake 11:​15-18.

Kaungāongoʻi—Maake 7:​32-35; Luke 7:​11-15; Hepelu 4:​15, 16.

Anga-fakaʻatuʻi—Mātiu 15:​21-28.

[Fakatātā ʻi he peesi 29]

ʻI heʻetau fakahāhā ʻa e feʻofaʻakí, ʻoku tau anganofo mateaki ai ki he “lao ʻa Kalaisi”

[Fakatātā ʻi he peesi 31]

ʻOku ueʻi koe ʻe he ngaahi ʻulungāanga ʻo Kalaisí ke ke tauhi mateaki ai kiate ia?