Tomuʻa Tala ʻa e Mīsaiá

ʻI HONO ʻiloʻi ʻa e meʻa ne tohi ʻe ʻAisea mo e kau palōfita kehé ʻo fekauʻaki mo e Mīsaiá, ne fuoloa ai e ʻamanaki ʻa e puleʻanga Siú ki heʻene aʻu maí. Ko hono moʻoní, ʻi he taimi ʻo Sīsuú, naʻe “amanaki” ai ʻa e kau Siu tokolahi ki he tuʻunuku ʻo e hā ʻa e Mīsaiá. (Luke 3:15, PM) ʻOku taau ke tokangaʻi, ʻoku kau ʻi he kikite ʻa e Tohi Tapú ʻa e ngaahi fakaikiiki fakaofo fekauʻaki mo e moʻui ʻa e Mīsaiá. ʻOku ʻikai ha tangata ʻe lava ke ne tomuʻa tala ʻa e ngaahi meʻa ko iá pe fokotuʻutuʻu ʻa e meʻa ʻe hoko kia Sīsuú.

Fakaikiiki ʻo e Meʻa Fekauʻaki mo e ʻAloʻi ʻo e Mīsaiá. Ne tomuʻa tala ʻe ʻAisea ko e Mīsaiá, pe Kalaisí, ʻe ʻaloʻi ia ʻe ha tāupoʻou. Hili hono fakamatalaʻi ʻa e ngaahi tuʻunga fakaemana ʻo e ʻaloʻi ʻo Sīsuú, naʻe tohi ʻe he ʻapositolo ko Mātiú: “Naʻe fai ʻeni kotoa pe, koeʻuhi ke fakamoʻoni ki he meʻa ne folofolaʻaki ʻe he ʻEiki ʻi he palofita, ʻo pehe, Vakai, ʻe feitama ʻa e tāupoʻou, pea te ne ʻaloʻi ha tama.” (Mātiu 1:22, 23; Aisea 7:14) Naʻe tomuʻa tala ʻe ʻAisea ko Kalaisí ʻe hoko ko e hako ʻo Tēvita ʻo ne lave hangatonu kia Sese, ko e tamai ʻa Tēvitá. Ko e moʻoni naʻe haʻu tonu ʻa Sīsū meia Tēvita. (Mātiu 1:6, 16; Luke 3:23, 31, 32) Ko ia ai, ki muʻa ʻi he ʻaloʻi ʻo Sīsuú, naʻe tala ai ʻe he ʻāngelo ko Kepalelí ki he faʻē ʻa Sīsuú, ʻa Mele: “ʻE foaki kiate ia ʻe he ʻEiki ko e ʻOtua ʻa e taloni ʻo ʻene kui ko Tevita.”—Luke 1:32, 33; Aisea 11:1-5, 10; Loma 15:12.

Fakaikiiki ʻo e Moʻui ʻa e Mīsaiá. ʻI he sinakoke ʻi Nasaletí, naʻe lau leʻo-lahi ai ʻa e tokotaha lahi ko Sīsuú mei he kikite ʻa ʻAiseá, ʻo kau ai ʻa e ngaahi leá ni: “Ko e Laumālie ʻo e ʻEiki ʻoku ʻiate au; he naʻa ne pani au ke u ʻalu mo e ongoongolelei ki he masiva.” ʻI hono ngāueʻaki kiate ia tonu ʻa e kikité, naʻe pehē ʻe Sīsū: “Ko e ʻaho ni kuo fakamoʻoni ʻa e potu folofola ni ʻi hoʻomou fanongo.” (Luke 4:17-21; Aisea 61:1, 2) Naʻe toe tomuʻa tala ʻe ʻAisea ʻa e anga-lelei, anga-malū, mo e tōʻongafai fakanānā ʻa Sīsū ki he faʻahinga naʻe fiemaʻu ke fakamoʻui kinautolú. ʻOku tohi ʻe Mātiu: “Pea muimui ki ai ha toko lahi, pea ne fakamoʻui ʻakinautolu kotoa pe; pea ne naʻinaʻi ki ai, ke ʻoua te nau fakaeʻa ia. Koeʻuhi ke fakamoʻoni ʻa e meʻa naʻe folofolaʻaki ʻia Aisea ko e palofita, ʻo pehe, . . . ‘ʻE ʻikai te ne fakakikihi, ʻumaʻā ha lea lahi; . . . Ko e kofe kuo foa ʻe ʻikai te ne laiki.’”—Mātiu 8:16, 17; 12:10-21; Aisea 42:1-4; 53:4, 5.

Fakaikiiki ʻo e Mamahi ʻa e Mīsaiá. Naʻe kikiteʻi ʻe ʻAisea ʻo pehē ko e Mīsaiá heʻikai tali ia ʻe he tokolahi taha ʻi ʻIsilelí ka ʻi hono kehé te ne hoko “ko e maka tukiaʻanga” kia kinautolu. (1 Pita 2:6-8; Aisea 8:14, 15) Pea ko e moʻoni, neongo ʻa e ngaahi mana lahi ʻa Sīsuú, ko e kakaí “naʻe ʻikai te nau tui pikitai kiate ia: koeʻuhiā ke fakamoʻoni ki he folofola ʻa e palofita ko Aisea, ʻa ia naʻe pehē ʻene lea, ʻEiki, ko hai kuo ne tui ki heʻemau ongoongo?” (Sione 12:37, 38; Aisea 53:1) Naʻe tānaki atu ki he taʻetui ʻa e kau Siú ʻa e tui manakoa, kae fehālaaki, ko e Mīsaiá te ne toʻo vave ʻa e pule ʻa e puleʻanga Lomá pea fakafoki mai ha puleʻanga tauʻatāina ʻi he laine ʻo Tēvitá ki he māmaní. Koeʻuhi ne mamahi ʻa Sīsū peá ne pekia, ko e tokolahi taha ʻo e kau Siú naʻe ʻikai te nau tali ia ko e Mīsaiá. Ka ko hono moʻoní, naʻe tomuʻa tala ʻe ʻAisea ko e Mīsaiá te ne hokosia ʻa e mamahi ki muʻa ke ne hoko ko e Tuʻí.

ʻI he tohi Aiseá, ʻoku lea fakaekikite ai ʻa e Mīsaiá: “Naʻa ku tuku hoku tuʻa ki he kau ta, . . . naʻe ʻikai te u fufū hoku mata mei he fakama fuape mo e ʻanuhia.” ʻOku līpooti ʻe Mātiu ʻa e meʻa naʻe hoko ʻi he taimi naʻe fakamāuʻi ai ʻa Sīsuú: “Pea nau toki ʻanuhi hono fofonga, pea nau tukiʻi ia; pea sipiʻi ia ʻe ha niʻihi.” (Aisea 50:6; Mātiu 26:67) “Ka ka tuku pe ia ke fai hono fakavaivaiʻi, ʻo ʻikai te ne mafaʻa hono fofonga,” ko e tohi ia ʻe ʻAiseá. Ko ia, ʻi he taimi naʻe fehuʻi ai ʻa Pailato kia Sīsū fekauʻaki mo e ngaahi tukuakiʻi naʻe fai ʻe he kau Siú, ko Sīsuú “naʻe ʻikai te ne toe tali ange ha momoʻi lea ʻe taha; ko ia naʻe ofo ʻaupito ʻa e Kovana.”—Aisea 53:7; Mātiu 27:12-14; Ngāue 8:28, 32-35.

Fakaikiiki ʻo e Pekia ʻa Mīsaiá. Naʻe hokohoko atu ʻa e fakahoko ʻo e kikite ʻa ʻAiseá ʻi he pekia ʻa Sīsuú pea naʻa mo e hili iá. Naʻe tomuʻa tala ʻe ʻAisea: “Nae tuutuuni hono tanuaga moe kakai agahala, bea fakataha moe maʻumea i he ene bekia.” (Aisea 53:9, PM) Naʻe lava fēfē ke fakahoko ʻa e kikite hā ngali tuʻu fehangahangai ko ení? ʻI he taimi ne pekia ai ʻa Sīsuú, naʻe tutuki ia ʻi he vahaʻa ʻo e ongo kaihaʻa. (Mātiu 27:38) Ka ki mui ai, ko e koloaʻia ko Siosefa ʻAlemateá naʻá ne tuku e sino ʻo Sīsuú ki hono fonualoto foʻou ne tā mei he maká. (Mātiu 27:57-60) Fakaʻosí, naʻe fakahoko ʻi he pekia ʻa Sīsuú ʻa e taha ʻo e ngaahi meʻa mahuʻinga taha ʻi he kikite ʻa ʻAiseá. ʻI he lau ki he Mīsaiá, ʻoku pehē ʻe ʻAisea: “ʻE ngaohi ke angatonu ha tokolahi ʻe heʻeku Sevaniti faitotonu; pea te ne fafa ʻenau ngaahi hia.” Ko e moʻoni, ko e pekia ʻa Sīsuú naʻe tokonaki mai ai ʻa e huhuʻí koeʻuhi ke lava ʻo toʻo ai ʻa e kavenga ʻo e angahalá mei he kakai faitōnunga kotoa pē.—Aisea 53:8, 11; Loma 4:25.

Ngaahi Kikite ʻOku Pau ke Fakahoko

Ke fakamoʻoniʻi Fakatohitapu ʻa e tokotaha ko e Mīsaiá, ko e kau ʻapositoló mo Sīsū tonu naʻa nau toutou hiki lea mei he kikite ʻa ʻAiseá ʻo lahi ange ia ʻi ha toe tohi kehe ʻi he Tohi Tapú. Kae kehe, ko e tohi Aiseá naʻe ʻikai ko ia pē naʻá ne tomuʻa tala ʻa e kahaʻú. Ko e ngaahi kikite lahi kehe ʻi he Tohi Tapu Faka-Hepeluú ʻoku toe fakahoko ia ʻia Sīsū, ko hono Puleʻangá, mo e ngaahi meʻa lelei ʻe fakahoko ʻe he Puleʻangá ʻi he kahaʻú.a (Ngāue 28:23; Fakahā 19:10) ʻOku pau fēfē ke fakahoko ʻa e kikité ni? Naʻe tala ʻe Sīsū ki heʻene kau fanongo Siú: “ʻOua te mou mahalo kuo u haʻu ke tamateʻi ʻa e Lao, pe ko e Tohi Palofita [ʻa ia, ko e Ngaahi Konga Tohi Tapu Faka-Hepeluú]: naʻe ʻikai te u haʻu ke tamateʻi, ka ke fakakakato. He ko au ē, ʻoku ou tala atu, Lolotonga ʻoku teʻeki mole ʻa e langi mo māmani, ʻe ʻikai mole mei he Lao ha mataʻitohi ʻe taha, pe ko ha foʻi kohi, kaeʻoua ke fai hono kotoa.”—Mātiu 5:17, 18.

Naʻe toe fakahaaʻi ʻe Sīsū ʻa e fakahoko ʻo e ngaahi kikite ʻi he Tohi Tapú ʻi he ngaahi meʻa naʻe hoko takatakai ʻiate iá pea ʻi he ngaahi meʻa ka hoko maí. (Taniela 9:27; Mātiu 15:7-9; 24:15) ʻIkai ko ia pē, ko Sīsū mo ʻene kau ākongá tonu naʻa nau tomuʻa tala ʻa e ngaahi meʻa ʻe hoko hili honau taimí, ʻo kau ai e ngaahi meʻa lahi kuo tau sio ʻoku hoko he ʻaho ní. Ko e kupu hoko maí ʻe lāulea ai ki he ngaahi meʻá ni mo e ngaahi kikite Fakatohitapu kehe, ʻoku kei toe ke fakahoko ʻi he kahaʻú.

[Fakamatala ʻi lalo]

[Fakatātā ʻi he peesi 4]

Ko e “tāupoʻou . . . te ne ʻaloʻi ha tama”

[Fakatātā ʻi he peesi 5]

“Naʻe ʻikai te u fufū hoku mata mei he fakama fuape”