“Teʻeki ha Tangata ʻe Lea Hange ko Ia”

“Pea nau fakamoʻoni ki ai kotoa pē; ʻo nau ofo ʻi he ngaahi lea mālie naʻe tō mei hono fofonga.”​—LUKE 4:​22.

1, 2. (a) Ko e hā naʻe foki halaʻatā ai ʻa e kau ʻōfisa naʻe fekauʻi atu ke nau puke ʻa Sīsuú? (e) Ko e hā ʻokú ne fakahaaʻi naʻe ʻikai ko e kau ʻōfisá pē ʻa e faʻahinga naʻe maongo ki ai ʻa e faiako ʻa Sīsuú?

NAʻE ʻikai fakahoko ʻe he kau ʻōfisá ʻenau ngāue ne vaheʻi angé. Naʻe fekauʻi atu kinautolu ke nau puke ʻa Sīsū Kalaisi, ka naʻa nau foki halaʻatā. Naʻe fiemaʻu ʻe he kau taulaʻeiki lahí mo e kau Fālesí ha fakamatala: “Ko e hā kuo ʻikai ai te mou taki mai ia?” Ko hono moʻoní, ko e hā ne ʻikai ke puke ai ʻe he kau ʻōfisá ha tangata ʻa ia ʻe ʻikai te ne fai ha talitekeʻi fakaesinó? Naʻe fakamatala ʻa e kau ʻōfisá: “Teʻeki ha tangata ʻe lea hange ko ia.” Naʻe maongo ʻaupito kia kinautolu ʻa e faiako ʻa Sīsuú ʻo ʻikai ai te nau loto ke ʻave ʻa e tangata anga-fakamelino ko ení ke tauhi fakalao.a​—Sione 7:​32, 45, 46.

² Ko e kau ʻōfisa ko iá ne ʻikai ko kinautolu pē ʻa e faʻahinga naʻe maongo ki ai ʻa e faiako ʻa Sīsuú. ʻOku tala mai ʻe he Tohitapú kia kitautolu naʻe ʻaukolo mai ʻa e fuʻu kakaí koeʻuhi pē ke fanongo ki heʻene malangá. Ko e kakai ʻi hono kolo tupuʻangá naʻa nau ofo “ʻi he ngaahi lea mālie naʻe tō mei hono fofonga.” (Luke 4:22) Laka hake he tuʻo tahá naʻá ne malanga ai mei ha vaka ki he fuʻu kakai naʻa nau fakatahataha ʻi he matātahi ʻo e Tahi Kālelí. (Maake 3:9; 4:1; Luke 5:​1-3) ʻI he taimi ʻe taha, naʻe nofo ai mo ia “ha fuʻu kakai” ʻi ha ngaahi ʻaho, naʻa mo ʻenau nofo taʻekai.​—Maake 8:​1, 2.

 3. Ko e hā ʻa e ʻuhinga tefito naʻe hoko ai ʻa Sīsū ko ha faiako tuʻu-ki-muʻá?

³ Ko e hā naʻá ne ʻai ʻa Sīsū ke hoko ko ha faiako tuʻu-ki-muʻá? Ko e ʻofá ʻa e ʻuhinga tefitó.b Naʻe ʻofa ʻa Sīsū ʻi he ngaahi moʻoni naʻá ne fakahāʻí, pea naʻá ne ʻofa ʻi he kakai naʻá ne akoʻí. Ka naʻe toe maʻu ʻe Sīsū ha malava anga-kehe ʻi hono ngāueʻaki ʻa e ngaahi founga fakafaiakó. ʻI he ngaahi kupu ako ʻoku hā ʻi he ʻīsiu ko ení, te tau lāulea ai ki he niʻihi ʻo e ngaahi founga ola lelei naʻá ne ngāueʻakí mo e founga ʻe lava ke tau faʻifaʻitaki ai ki aí.

Faingofua mo Mahino

4, 5. (a) Ko e hā naʻe ngāueʻaki ai ʻe Sīsū ʻa e lea mahino ʻi heʻene faiakó, pea ko e hā ʻoku taau ke fakatokangaʻi fekauʻaki mo e moʻoniʻi meʻa ko ia ʻo ʻene fai peheé? (e) ʻOku anga-fēfē ʻa e hoko ʻa e Malanga he Moʻungá ko ha fakatātā ia ʻo e tuʻunga faingofua ʻo e faiako ʻa Sīsuú?

⁴ ʻOku ʻikai ngalikehe ki he kakai ako leleí ke nau ngāueʻaki ʻa e lea ʻa ia ʻoku ʻikai lava ke mahinoʻi ʻe heʻenau kau fanongó. Ka ʻo kapau ʻoku ʻikai te tau ʻai ke mahinoʻi kitautolu ʻe he niʻihi kehé, ʻe lava fēfē ke nau maʻu ʻaonga mei heʻetau ʻiló? ʻI he tuʻunga ko ha faiakó, naʻe ʻikai ʻaupito ke talanoa ʻa Sīsū ke ʻikai lava ʻo mahinoʻi ia ʻe he niʻihi kehé. Fakaʻuta atu ki he ʻotu lea naʻe mei lava ke ne ngāueʻakí. Ka, neongo ʻa ʻene ʻilo kāfakafá, naʻá ne fakakaukau fekauʻaki mo ʻene kau fanongó, ʻo ʻikai kiate ia. Naʻá ne ʻiloʻi ko e tokolahi ʻo kinautolú naʻa nau ‘taʻe kolisi, pea taʻe maʻu tuʻunga.’ (Ngāue 4:13) Ke aʻu kia kinautolú, naʻá ne ngāueʻaki ʻa e lea naʻe lava ke mahinoʻi ʻe he kakai peheé. Naʻe faingofua nai ʻa e ngaahi foʻi leá, ka ko e ngaahi moʻoni naʻa nau fakahāʻí naʻe loloto.

⁵ Ko e fakatātaá, fakakaukau angé ki he Malanga he Moʻungá, ʻoku hiki ʻi he Mātiu 5:3–​7:​27. Naʻe feʻunga nai mo e miniti pē ʻe 20 hono fakahoko ʻe Sīsū ʻa e malanga ko iá. Neongo ia, ko ʻene ngaahi akonakí ʻoku loloto, ʻo aʻu ki he tefito tonu ʻo e ngaahi meʻa hangē ko e tonó, vete malí mo e tuli ki he meʻa fakamatelié. (Mātiu 5:​27-​32; 6:​19-​34) Kae kehe, ʻoku ʻikai ko e ngaahi fakamatala fihi ia pe tōtuʻa. Ko hono moʻoní, ʻoku tātātaha ha foʻi lea naʻa mo ha kiʻi leka ʻe ʻikai moʻoni lava ke ne mahinoʻi! ʻOku hā mahino ʻi heʻene ʻosí, ko e fuʻu kakaí​—ngalingali naʻe kau ai ʻa e kau ngoue, kau tauhi-sipi, mo e kau toutai tokolahi​—‘naʻa nau ofo i he ene akonakí.’—Mātiu 7:​28, PM.

 6. ʻOmai ha fakatātā ʻo e anga hono leaʻaki ʻe Sīsū ʻa e ngaahi lea naʻe faingofua kae mohu ʻuhingá.

⁶ ʻI hono faʻa ngāueʻaki ʻa e kupuʻi lea, mahino mo nounoú, naʻe leaʻaki ʻe Sīsū ʻa e ngaahi lea naʻe faingofua kae mohu ʻuhinga. ʻI he kuonga ki muʻa ʻi hono pulusi ʻo e ngaahi tohí, naʻá ne ʻai ke maongo taʻealamangalo ʻa ʻene pōpoakí ʻi he ʻatamai mo e loto ʻo ʻene kau fanongó. Fakatokangaʻi ange ʻa e ngaahi fakatātā ʻe niʻihi: “ʻOku ʻikai ke lava ʻe ha taha ke ne ʻeikiʻaki ha ʻeiki ʻe toko ua: . . . ʻOku ʻikai te mou lava ke eikiʻaki ʻa e ʻOtua mo Koloa fakatouʻosi.” “Oua naa mou fakamāu, telia naa fakamāua akimoutolu.” “Te mou ilo akinautolu i ho nau gaahi fua.” “Ko e tangata faitoʻo ʻoku ʻikai maʻa e malohi, ka maʻa e mahaki.” “ʻIlonga kinautolu ʻoku ala ki he heletā te nau mate heletā.” “ʻAnge kia Sisa ʻa e ngaahi meʻa ʻa Sisa, pea ki he ʻOtua ʻa e ngaahi meʻa ʻa e ʻOtua.” “ʻOku te monuʻia lahi ʻi he fai ha foaki atu, ʻi heʻete maʻu ha foaki mai.”c (Mātiu 6:​24; 7:​1, 20, PM; Mātiu 9:​12; 26:52; Maake 12:17; Ngāue 20:35) Aʻu mai ki he ʻahó ni, ko e meimei taʻu ia ʻe 2,000 hili hono leaʻaki ʻe Sīsuú, ko e ngaahi lea mālohi peheé ʻoku manatuʻi ngofua.

Ngāueʻaki ʻa e Ngaahi Fehuʻí

 7. Ko e hā naʻe ʻeke ai ʻe Sīsū ʻa e ngaahi fehuʻí?

⁷ Naʻe ngāue lahi ʻaki ʻe Sīsū ʻa e ngaahi fehuʻí. Naʻá ne faʻa fai ia naʻa mo e taimi naʻe mei siʻi ange ai ʻa e fakamole taimí ʻi hano tala pē ki heʻene kau fanongó ʻa e poiní. Ko e hā leva naʻá ne ʻeke ai ʻa e ngaahi fehuʻí? Naʻá ne ngāueʻaki ʻi he taimi ki he taimi ʻa e ngaahi fehuʻi fakatupu-ʻilo ke fakaeʻa ʻa e ngaahi taumuʻa ʻa hono kau fakafepakí, ʻo fakasīlongoʻi ai kinautolu. (Mātiu 12:​24-​30; 21:​23-​27; 22:​41-​46) Kae kehe, ʻi he ngaahi tuʻunga lahi, naʻe vaheʻi ʻe Sīsū ʻa e taimi ke ʻeke ai ʻa e ngaahi fehuʻi koeʻuhi ke fakahaaʻi ʻa e ngaahi moʻoní, ke ʻai ʻene kau fanongó ke nau fakahāhā ʻa e meʻa naʻe ʻi honau lotó, pea ke ueʻi mo akoʻi ʻa e fakakaukau ʻa ʻene kau ākongá. Tau sivisiviʻi angé ʻa e fakatātā ʻe ua, naʻe fekauʻaki fakatouʻosi mo e ʻapositolo ko Pitá.

8, 9. Naʻe anga-fēfē hono ngāueʻaki ʻe Sīsū ʻa e ngaahi fehuʻí ke tokoniʻi ʻa Pita ke ne hoko ki he fakamulituku totonú ʻi he meʻa fekauʻaki mo hono totongi ʻa e tukuhau temipalé?

⁸ ʻUluakí, fakamanatuʻi ʻa e taimi naʻe ʻeke ai ʻe he kau tānaki tukuhaú kia Pita pe naʻe totongi ʻe Sīsū ʻa e tukuhau temipalé.d Ko Pitá, ʻi heʻene loto-ʻoho ʻi he taimi lahi, naʻá ne tali ange, “Ko é.” Kae kehe, ʻi ha taimi nounou ki mui ai, naʻe fakaʻuhinga kiate ia ʻa Sīsū: “Saimone, ko e ha hoʻo poa? ko e ngāhi tuʻi ʻo mamani ʻoku nau tanaki tute mo e tukuhau meia hai? mei he faleʻalo, pe mei he kakai kehe? Pea tali ʻe ia, Mei he kakai kehe pe. Pea lea ʻa Sisu ki ai, ʻAua, pea ta ʻoku ʻataʻatā ʻa e faleʻalo.” (Mātiu 17:​24-27) Ko e poini ʻo e ngaahi fehuʻi ʻa Sīsuú naʻe totonu ke ʻosi hā mahino ia kia Pita. Ko e hā hono ʻuhingá?

⁹ ʻI he ʻaho ʻo Sīsuú, naʻe ʻiloa ai ʻa e ʻatā mei he tukuhaú ʻa e ngaahi faleʻalo ʻo e haʻa tuʻí. Ko ia ai, ʻi he tuʻunga ko e ʻAlo-tofu-pē-taha-ne-fakatupu ʻo e Tuʻi fakahēvaní ʻa ia naʻe fai ki ai ʻa e lotu ʻi he temipalé, naʻe ʻikai totonu ke fiemaʻu ʻa Sīsū ke ne totongi ʻa e tukuhaú. Fakatokangaʻi ʻi he ʻikai ke tala ange pē kia Pita ʻa e tali tonú, naʻe ngāue ola lelei ʻaki kae fakaalaala ʻe Sīsū ʻa e ngaahi fehuʻí ke tokoniʻi ʻa Pita ke ne aʻu ki he fakamulituku totonú​—pea tokoniʻi nai ke sio ki he fiemaʻu ke ne fakakaukau lelei ange ki muʻa ke leá.

10, 11. Naʻe anga-fēfē ʻa e tali ʻa Sīsū ʻi he taimi naʻe tuʻusi ai ʻe Pita ʻa e telinga ʻo ha tangata ʻi he pō Pāsova ʻo e 33 T.S., pea ʻoku anga-fēfē hono fakahaaʻi ʻe he meʻá ni naʻe mahinoʻi ʻe Sīsū ʻa e mahuʻinga ʻo e ngaahi fehuʻí?

¹⁰ Ko e fakatātā hono uá naʻe kau ki ai ha meʻa naʻe hoko ʻi he pō Pāsova ʻo e 33 T.S. ʻi he taimi naʻe haʻu ai ha fuʻu kakai ke puke ʻa Sīsuú. Naʻe ʻeke ange ʻe he kau ākongá kia Sīsū pe ʻoku totonu ke nau faitau ke maluʻi ia. (Luke 22:49) ʻI he ʻikai tatali ki ha talí, naʻe tuʻusi ʻe Pita ʻa e telinga ʻo ha tangata ʻaki ha heletā (neongo naʻe fakataumuʻa nai ʻa Pita ke fakahoko ha maumau lahi ange). Naʻe tōʻongaʻaki ʻe Pita ha founga naʻe kehe mei he loto ʻo hono ʻeikí, he naʻe mateuteu kakato ʻa Sīsū ki hano puke ia. Naʻe anga-fēfē ʻa e tali ʻa Sīsuú? ʻI he anga-kātaki ai peé, naʻá ne ʻeke ange kia Pita ʻa e foʻi fehuʻi ʻe tolu: “Ko e pehē koā ke ʻoua naʻa ku inu ʻa e ipu kuo tuku mai ʻe he Tamai”? “ʻOku ke pehe koā ʻoku faingataʻa kiate au ke kole ʻeni ki heʻeku ʻEiki, ka ne ʻomi ha kongakau angelo ʻe hongofulu ma ua, pe lahi hake, ke tapa kiate au? Kae fakamoʻoni fefe ai ʻa e ngāhi folofola, ʻa ia ʻoku fakaha kuo pau ke hoko ʻo pehe?”​—Sione 18:11; Mātiu 26:​52-​54.

¹¹ Fakakaukauloto ʻi ha mōmeniti ki he fakamatala ko iá. Ko Sīsū, ʻi hono takatakaiʻi ʻe ha fuʻu kakai ʻitá, naʻá ne ʻiloʻi naʻe tuʻunuku ʻa ʻene pekiá pea ko hono fakaʻataʻatā ʻa e huafa ʻo ʻene Tamaí pea mo e fakamoʻui ʻo e fāmili fakaetangatá naʻe fakatuʻunga ia ʻiate ia. Neongo ia, naʻá ne ngāueʻaki ʻa e taimi totonu ʻi he taimi tofu pē ko iá ke ʻai ke maongo ʻa e ngaahi moʻoni mahuʻingá ki he ʻatamai ʻo Pitá ʻaki ʻa e ngaahi fehuʻí. ʻIkai ʻoku hā mahino naʻe mahinoʻi ʻe Sīsū ʻa e mahuʻinga ʻo e ngaahi fehuʻí?

Haipepolī Maeʻeeʻa

12, 13. (a) Ko e hā ʻa e haipepolií? (e) Naʻe anga-fēfē hono ngāueʻaki ʻe Sīsū ʻa e haipepolií ke fakamamafaʻi ʻaki ʻa e fakavalevale ʻo hono fakaangaʻi ʻa e fanga kiʻi fehālaaki ʻa hotau fanga tokouá?

¹² ʻI heʻene ngāue fakafaifekaú, naʻe faʻa ngāueʻaki ai ʻe Sīsū ha founga faiako ola lelei ʻe taha​—ko e haipepolī. Ko ha fakalahiʻi ʻosi fakakaukauʻi eni ki he taumuʻa ʻo e fakamamafaʻi. ʻI he haipepolií, naʻe fakatupu ai ʻe Sīsū ha ngaahi ʻīmisi ʻi he ʻatamaí naʻe faingataʻa ke ngalo. Tau vakai angé ki ha ngaahi fakatātā ʻe niʻihi.

¹³ ʻI he Malanga he Moʻungá, ʻi he taimi naʻe fakamamafaʻi ai ʻa e fiemaʻu ke ‘oua ʻe fakamāu’ ʻa e niʻihi kehé, naʻe pehē ʻe Sīsū: “Koeha oku ke tokaga ai ki he malamalaʻi akau oku i he mata o ho kaiga, ka oku ikai te ke tokaga ki he fuu akau oku i ho mata oou?” (Mātiu 7:​1-3, PM) ʻE lava ke ke sioloto atu ki he meʻa naʻe hokó? Ko e tokotaha ʻoku hehema ke fai ha ngaahi fakaangá ʻokú ne fokotuʻu atu ke toʻo ha malamalaʻi ʻakau mei he “mata” ʻo hono tokouá. ʻE taukaveʻi nai ʻe he tokotaha fakaangá ʻoku ʻikai lava ʻa hono tokouá ke sio lelei feʻunga ki he ngaahi meʻá koeʻuhi ke fai ai ha ngaahi fakamaau lelei. Ka ko e malava tonu ʻa e tokotaha fakaangá ke fakamāú ʻoku maumauʻi ia ʻe ha “fuu akau”​—ko ha kupuʻi ʻakau pe pimi ʻe ngāueʻaki nai ke ne fataki ha ʻato. Ko ha founga fakangalongataʻa moʻoni ia ke fakamamafaʻi ʻaki ʻa e fakavalevale ke fakaangaʻi ʻa e fanga kiʻi fehālaaki ʻa hotau fanga tokouá lolotonga ia ʻoku tau maʻu nai ʻe kitautolu ʻa e ngaahi fehālaaki lalahi!

14. Ko e hā naʻe hoko ai ʻa e ngaahi lea ʻa Sīsū fekauʻaki mo hono sivi ʻa e namú kae folofua ʻa e kāmelí ko ha haipepolī mātuʻaki mālohí?

¹⁴ ʻI he taimi ʻe taha, naʻe fakahalaiaʻi ai ʻe Sīsū ʻa e kau Fālesí ko e ‘koto takimuʻa kui! ʻoku nau sivi mei heʻenau inú ʻa e namú, kae folofua ʻa e kamelí.’ (Mātiu 23:24) Ko hano ngāue mātuʻaki mālohi ʻaki eni ʻo e haipepolií. Ko e hā hono ʻuhingá? Ko e faikehekehe ʻi he vahaʻa ʻo ha kiʻi namu valevale mo ha kāmelí, ʻa ia ko e taha ia ʻi he fanga manu lalahi taha naʻe ʻiloʻi ʻe he kau fanongo ʻa Sīsuú naʻe fakaueʻiloto. ʻOku fakafuofua ʻe fiemaʻu ʻa e namu ʻe 70 miliona ke tatau hono mamafá mo ha kāmeli lahi feʻunga! Pehē foki, naʻe ʻiloʻi ʻe Sīsū naʻe sivi ʻe he kau Fālesí ʻenau uainé ʻi ha konga tupenu manifinifi. Ko e kau pipiki ko ia ki he tuʻutuʻuní naʻa nau fai ia koeʻuhi ke fakaʻehiʻehi ai mei hano folo ha namu pea hoko ai ʻo taʻemaʻa fakaeouau. Neongo ia, naʻa nau folofua fakaefakatātā ʻa e kāmelí, ʻa ia naʻe toe taʻemaʻa pē mo ia. (Livitiko 11:​4, 21-​24) Naʻe mahino lelei ʻa e poini ʻa Sīsuú. Naʻe fai lelei ʻa e kau Fālesí ki he ngaahi fiemaʻu siʻisiʻi taha ʻa e Laó, ka naʻa nau liʻaki ʻa e ngaahi meʻa mamafa angé “ʻa e fakamāu totonu, mo e fai mesi, mo e lototō.” (Mātiu 23:23) He mahino lelei moʻoni ko hono fakaeʻa kinautolu ʻe Sīsū ʻi honau tuʻungá!

15. Ko e hā ʻa e ngaahi lēsoni naʻe akoʻi ʻe Sīsū ʻaki hono ngāueʻaki ʻa e haipepolií?

¹⁵ Naʻe faʻa ngāueʻaki ʻe Sīsū, ʻi he kotoa ʻo ʻene ngāue fakafaifekaú ʻa e haipepolií. Fakakaukau angé ki ha ngaahi fakatātā ʻe niʻihi. Ko e “tui, ʻo tatau mo ha foʻi tengaʻi musita [valevale] hono lahi” ʻa ia ʻe lava ke ne hiki ha moʻunga​—naʻe ʻikai faingataʻa ke maʻu ʻe Sīsū ha founga ola lelei ke fakamamafaʻi ʻaki naʻa mo ha kiʻi tui valevale ʻe lava ke ne fakahoko ʻa e meʻa lahi. (Mātiu 17:20) Ko ha fuʻu kāmeli ʻoku feinga ke fakaʻefihi ʻi ha avaʻi hui ʻo ha foʻi hui tuitui​—he lelei moʻoni ko hono fakatātaaʻi ʻe he meʻa ko iá ʻa e faingataʻa ʻoku fehangahangai mo ha tokotaha koloaʻia ʻa ia ʻoku feinga ke tauhi ki he ʻOtuá lolotonga ia ʻene piki ki ha founga moʻui tuli ki he meʻa fakamatelié! (Mātiu 19:24) ʻIkai ʻokú ke ofo ʻi he ngaahi lea fakaefakatātā maeʻeeʻa lelei ʻa Sīsuú mo ʻene malava ke maʻu ʻa e ola lelei lahi ʻaki ʻa e ngaahi foʻi lea siʻisiʻí?

ʻUhinga Totonu Taʻealafakahalaʻi

16. Naʻe ngāueʻaki maʻu pē ʻe Sīsū ʻa hono mafai fakaʻatamai māsilá ʻi he founga fē?

¹⁶ ʻAki hono ʻatamai haohaoá, naʻe mataotao ʻaupito ʻa Sīsū ʻi he fakaʻuhinga totonu mo e kakaí. Neongo ia, naʻe ʻikai ʻaupito te ne ngāuehalaʻaki ʻa e malava ko ení. ʻI heʻene faiakó, naʻá ne ngāueʻaki maʻu pē hono mafai fakaʻatamai māsilá ke pouaki ʻaki ʻa e moʻoní. ʻI he taimi ʻe niʻihi, naʻá ne ngāueʻaki ai ʻa e ʻuhinga totonu mālohí ke fakahalaʻi ʻaki ʻa e ngaahi tukuakiʻi loi ʻa hono kau fakafepaki fakalotú. ʻI he ngaahi tuʻunga lahi, naʻá ne ngāueʻaki ʻa e fakaʻuhinga totonú koeʻuhi ke akoʻi ai ki heʻene kau ākongá ha ngaahi lēsoni mahuʻinga. Tau sio angé ki he malava pōtoʻi ʻa Sīsū ke ngāueʻaki ʻa e ʻuhinga totonú.

17, 18. Ko e hā ʻa e ʻuhinga totonu mālohi naʻe ngāueʻaki ʻe Sīsū ke fakahalaʻi ʻaki ha tukuakiʻi loi ʻa e kau Fālesí?

¹⁷ Fakakaukau angé ki he taimi naʻe fakamoʻui ai ʻe Sīsū ha tangata naʻe uluisino ai ha tēmeniō ʻa ia naʻe kui pea ʻikai lava ke lea. ʻI he fanongo fekauʻaki mo iá, naʻe pehē ʻe he kau Fālesí: “ʻOku ʻikai fai ʻe he siana ni ʻene kapusi tevolo kae ʻia Pelisipupe [Sētane] pe, ko e ʻeiki ʻo e kau tevolo.” Fakatokangaʻi naʻe fakahaaʻi ʻe he kau Fālesí naʻe fiemaʻu ha mālohi mahulu hake ʻi he tangatá ke kapusi ʻaki ʻa e kau tēmeniō ʻa Sētané. Kae kehe, ke taʻofi ʻa e kakaí mei heʻenau tui kia Sīsuú, naʻa nau tuku ʻa hono mālohí kia Sētane. ʻI hono fakahaaʻi ne ʻikai te nau fakakaukau fakaʻāuliliki ki heʻenau fakaʻuhingá ke aʻu ki hono fakamulituku totonú, naʻe tali ange ʻe Sīsū: “ʻIlonga ha puleʻanga ʻoku mavahevahe mo fetuʻusi, ʻe lusa: pea ʻilonga ha kolo pe ha ʻapi ʻoku mavahevahe mo fetuʻusi, ʻe ʻikai tuʻu: pea kapau ʻoku kapusi ʻe Setane ʻa Setane, ta ʻoku vahevahe ia, ʻo fetuʻusi mo ia: pea tuʻu fēfē hono puleʻanga?” (Mātiu 12:​22-26) Ko hono moʻoní, naʻe pehē ʻe Sīsū: ‘Kapau ko au ia, ʻo hangē ko hoʻomou laú, ko ha fakafofonga ʻo Sētane, ʻo veteki ʻa e meʻa naʻe fai ʻe Sētané, tā ʻoku ngāue ʻa Sētane ʻo fakafepakiʻi ʻa ʻene ngaahi meʻa ʻaʻaná pea ʻe vave ʻa ʻene hingá.’ Ko ha foʻi ʻuhinga totonu mālohi ia, ʻikai ko ia?

¹⁸ Naʻe toe fakaʻuhinga leva ʻa Sīsū ʻo lahi ange ʻi he meʻá ni. Naʻá ne lāuʻilo ko e niʻihi mei he kau mēmipa tonu ʻo e kau Fālesí naʻa nau kapusi ʻa e kau tēmenioó. Ko ia ai, naʻá ne ʻeke ha foʻi fehuʻi faingofua kae fakatupu lōmekina: “Kapau ʻoku ou fai ʻeku kapusi tevolo ʻia Pelisipupe, pea ʻoku fai ʻia hai ʻe hoʻomou kau tama [pe kau ākongá]?” (Mātiu 12:27) Ko e fakaʻuhinga ʻa Sīsuú, ʻi ha ʻuhinga naʻe peheni: ‘Kapau, ko hono moʻoní, ʻoku ou kapusi ʻa e kau tēmenioó ʻi he mālohi ʻo Sētané, tā ko hoʻomou kau ākongá tonu kuo pau pē ʻoku nau ngāue ʻi he malumalu ʻo e mafai tatau ko ení.’ Ko e hā ʻe lava ke leaʻaki ʻe he kau Fālesí? ʻE ʻikai ʻaupito te nau fakahaaʻi naʻe ngāue ʻa ʻenau kau ākongá ʻi he malumalu ʻo e mafai ʻo Sētané. ʻI he ʻuhinga totonu taʻealafakahalaʻí, naʻe ʻai ai ʻe Sīsū ʻenau tukuakiʻi iá ke hā taʻeʻuhinga totonu.

19, 20. (a) Ko e hā ʻa e founga pau naʻe ngāueʻaki ai ʻe Sīsū ʻa e ʻuhinga totonú? (e) Naʻe anga-fēfē hono ngāueʻaki ʻe Sīsū ha founga fakaʻuhinga “huanoa,” ʻi heʻene tali ki he kole ʻa ʻene kau ākongá ke akoʻi kinautolu ki he founga ke lotu aí?

¹⁹ Tānaki atu ki hono ngāueʻaki ʻa e ʻuhinga totonú ke fakasīlongoʻi ʻaki hono kau fakafepakí, naʻe toe ngāueʻaki ʻe Sīsū ʻa e ngaahi fakaʻuhinga totonu mo fakalotoʻi ke akoʻi ʻaki ʻa e ngaahi moʻoni pau mo fakalotomāfana fekauʻaki mo Sihová. ʻI he taimi lahi, naʻá ne ngāueʻaki ʻa e meʻa ʻe ui nai ko ha tuʻunga fakaʻuhinga ‘huanoa,’ ʻi hono tokoniʻi ʻa ʻene kau fanongó ke nau laka ki muʻa mei ha foʻi moʻoni anga-maheni ki ha tuipau lahi ange. Tau sivisiviʻi angé ha fakatātā pē ʻe ua.

²⁰ ʻI he tali ki he kole ʻa ʻene kau ākongá ke akoʻi kinautolu ki he founga ke lotu aí, naʻe fakamatala ʻa Sīsū ki he talanoa fakatātā fekauʻaki mo ha tangata ʻa ia ko ʻene kole “taʻemangoi” naʻe faifai pē ʻo fakalotoʻi ai ha kaumeʻa taʻeloto ke ne ʻoange ʻa e meʻa naʻá ne kolé. Naʻe toe fakamatalaʻi ʻe Sīsū ʻa e loto-lelei ʻa e ngaahi mātuʻá “ke foaki meʻaʻofa lelei” ki heʻenau fānaú. Naʻá ne fakaʻosiʻaki leva: “Kapau ʻoku mou ʻilo ke foaki meʻaʻofa lelei ki hoʻomou fanau, neongo ko e faʻahinga kovi kimoutolu: huanoa ʻa e tamai ʻi he langi ʻene foaki ʻa e Laumālie Māʻoniʻoni kiate kinautolu ʻoku kole kiate ia.” (Luke 11:​1-13, fakaʻītali ʻamautolu.) Ko e poini naʻe fakahaaʻi ʻe Sīsuú ʻoku makatuʻunga ia, ʻikai ʻi he tuʻunga tataú, ka ʻi he faikehekehé. Kapau ʻe faifai pea lava ʻo fakalotoʻi ha kaumeʻa taʻeloto ke ne fakatōliʻa ʻa e fiemaʻu ʻa hono kaungāʻapí, pea kapau ʻoku tokanga ʻa e ngaahi mātuʻa taʻehaohaoa fakaetangatá ki he ngaahi fiemaʻu ʻa ʻenau fānaú, huanoa hake ai ʻa e lahi ʻo hono tuku mai ʻe heʻetau Tamai fakahēvani ʻofá ʻa e laumālie māʻoniʻoní ki heʻene kau sevāniti mateaki ʻoku nau haʻu anga-fakatōkilalo kiate ia ʻi he lotú!

21, 22. (a) Ko e hā ʻa e fakaʻuhinga naʻe ngāueʻaki ʻe Sīsū ʻi heʻene fai ʻa e akonaki ki he feangainga mo e loto-moʻua fekauʻaki mo e ngaahi meʻa fakamatelié? (e) Hili hono fakamanatu ʻo e niʻihi ʻo e ngaahi founga faiako ʻa Sīsuú, ko e hā ʻa e fakamulituku kuo tau aʻu ki aí?

²¹ Naʻe ngāueʻaki ʻe Sīsū ha fakaʻuhinga meimei tatau ʻi heʻene fai ʻa e akonaki ʻi he feangainga mo e loto-moʻua fekauʻaki mo e ngaahi meʻa fakamatelié. Naʻá ne pehē: “Mou vakai ʻa e fanga lēveni: he ʻoku nau tūtūʻi pe tuʻusi, pe ai hanau loki pe feleoko? ka ʻoku fafanga kinautolu ʻe he ʻOtua: hono ʻikai [‘huanoa ʻa e,’ NW] mahuʻinga noa pe kimoutolu ʻi he fanga manupuna! Vakai ʻa e ngaahi lile, pē kuo fefe ʻenau tupu: he ʻoku nau fiuʻa ngāue, pe ʻoku nau filo? . . . Pea kapau ʻoku kofu fakatafuʻufuʻu pehē ʻe he ʻOtua ʻa e mohuku, ʻa ia ʻoku ʻi he kelekele he ʻaho ni, kae tafu ʻaki ʻa e hovani ʻapongipongi; huanoa ʻa kimoutolu, ʻa e kau tuivaivai!” (Luke 12:​24, 27, 28, fakaʻītali ʻamautolu.) ʻIo, kapau ʻoku tokangaʻi ʻe Sihova ʻa e fanga manupuná mo e ngaahi matalaʻiʻakaú, huanoa hake ai hono lahi hake ʻa ʻene tokanga ki heʻene kau sevānití! Ko e fakaʻuhinga fakaalaala kae mālohi peheé ʻoku ʻikai ha veiveiua ʻa ʻene laveʻi ʻa e loto ʻo e kau fanongo ʻa Sīsuú.

²² Hili hono fakamanatu ha niʻihi ʻo e ngaahi founga faiako ʻa Sīsuú, te tau malavangofua ai ke fakaʻosiʻaki ko e kau ʻōfisa ko ia naʻe ʻikai malava ke nau puke iá naʻe ʻikai ʻaupito ko haʻanau fakamatala fakalahi ʻi heʻenau pehē: “Teʻeki ha tangata ʻe lea hange ko ia.” Ka ko e founga faiako ʻa ia ʻoku ʻiloa taha nai ai ʻa Sīsuú ko hono ngāueʻaki ʻa e ngaahi talanoa fakatātaá, pe ngaahi pealapelí. Ko e hā naʻá ne ngāueʻaki ai ʻa e founga ko ení? Pea ko e hā naʻá ne ʻai ʻa ʻene ngaahi talanoa fakatātaá ke mātuʻaki ola leleí? Ko e ongo fehuʻi ko ení ʻe lāulea ki ai ʻi he kupu hoko maí.

[Fakamatala ʻi lalo]

ʻOkú Ke Manatuʻi?

• Ko e hā ʻa e ngaahi fakatātā ʻoku fakahaaʻi ai naʻe faiako ʻa Sīsū ʻaki ʻa e tuʻunga faingofua mo mahinó?

• Ko e hā naʻe ngāueʻaki ai ʻe Sīsū ʻa e ngaahi fehuʻí ʻi heʻene faiakó?

• Ko e hā ʻa e haipepolī, pea naʻe anga-fēfē hono ngāueʻaki ʻe Sīsū ʻa e founga fakafaiako ko ení?

• Naʻe anga-fēfē hono ngāueʻaki ʻe Sīsū ʻa e fakaʻuhinga totonú ke akoʻiʻaki ki heʻene kau ākongá ʻa e ngaahi moʻoni fakalotomāfana fekauʻaki mo Sihová?

[Fakatātā ʻi he peesi 9]

Naʻe ngāueʻaki ʻe Sīsū ʻa e lea mahino ʻa ia naʻe lava ke mahinoʻi ʻe he kakai taʻemaʻu tuʻungá

[Fakatātā ʻi he peesi 10]

Ko e kau Fālesí naʻa nau ‘sivi ʻa e namú kae folofua ʻa e kamelí’