Naʻa Nau Fai ʻa e Finangalo ʻo Sihová

Ko ha ʻAʻahi ʻA Ia Naʻe Fakapaleʻi Lahi

KO E fononga mei Sipa ki Selusalemá kuo pau pē naʻe fakaongosia ki he kuiní. Naʻe anga ia ki he moʻui tuʻumālié. Ka ko eni ia, ʻokú ne fāifononga ia ʻi he vave ʻo ha kāmeli ʻi ha fononga kilomita ʻe 2,400, ko hono konga lahi ʻi ha loto toafa vela. Fakatatau ki ha fakafuofua ʻe taha, ko ʻene fonongá naʻe fiemaʻu ki ai ʻa e ʻaho nai ʻe 75 ke fakakakato ai, pea ko e vāʻihala pē ia ʻe tahá!a

Ko e hā naʻe tuku ai ʻe he kuini koloaʻia ko ení ʻa hono ʻapi fakafiemālié ʻi Sipa peá ne fakahoko ha fononga faingataʻa peheé?

Ko ha Līpooti Fakatoʻoaloto

Naʻe haʻu ʻa e kuini ʻo Sipá ki Selusalema hili ʻa ʻene “fanongo . . . ki he ongoongo ʻo Solomone ʻi he huafa ʻo Sihova.” (1 Tuʻi 10:1) ʻOku ʻikai ha fakamatala ia ki he meʻa tofu pē ko ia ne fanongo ai ʻa e kuiní. Kae kehe, ʻoku tau ʻiloʻi, naʻe tāpuakiʻi ʻe Sihova ʻa Solomone ʻaki ʻa e poto, koloa, mo e lāngilangi kehe ange. (2 Kalonikali 1:​11, 12) Naʻe anga-fēfē ʻa e hoko ʻo ʻiloʻi eni ʻe he kuiní? Koeʻuhi ko Sipá ko ha senitā ia ʻo e fefakatauʻakí, mahalo pē naʻá ne fanongo ʻi he ongoongo ʻo Solomoné mei he kau fakatau ne nau ʻaʻahi ki hono fonuá. Ko e niʻihi ʻo e faʻahingá ni naʻa nau ʻi ʻOfeia nai, ko ha fonua ʻa ia naʻe fai ai ʻe Solomone ʻene ngaahi ngāue fakapisinisi lahi.​—1 Tuʻi 9:​26-​28.

Kae kehe, naʻe aʻu ʻa e kuiní ki Selusalema “mo ʻene fuʻu aʻahi lahi ʻaupito, ko e fanga kameli naʻe uta meʻa namu kakala, mo e koula lahi ʻaupito, mo e makakoloa.” (1 Tuʻi 10:2a) ʻOku pehē ʻe he niʻihi ko e “fuʻu aʻahi lahi ʻaupito” naʻe kau ki ai ha kautau fakafeʻao. ʻOku mahinongofua eni, ʻi he fakakaukau atu ko e kuiní ko ha taha māʻolunga mālohi ia pea naʻá ne fononga mo e ngaahi koloa mahuʻinga ʻoku fakafuofua hono mahuʻingá ki he tola ʻe laui hongofulu miliona.b

Kae kehe, fakatokangaʻi, naʻe fanongo ʻa e kuiní ʻi he ongoongo ʻo Solomone “ʻi he huafa ʻo Sihova.” Ko ia, naʻe ʻikai ko ha fononga fakapisinisi eni. ʻOku fakamoʻoniʻi, naʻe haʻu tefito ʻa e kuiní ke fanongo ki he poto ʻo Solomoné​—mahalo ke ako ai foki ha meʻa fekauʻaki mo hono ʻOtuá, ʻa Sihova. Koeʻuhi ʻoku hangehangē naʻá ne tupu meia Semi pe ko Hami, ʻa ia ko e ongo lotu kia Sihova, mahalo pē naʻá ne fieʻilo fekauʻaki mo e lotu ʻa ʻene fanga kuí.

Ngaahi Fehuʻi Fihi, Ngaahi Tali Fakafiemālie

ʻI heʻene fetaulaki mo Solomoné, naʻe kamata ke siviʻi ia ʻe he kuiní ʻaki ʻa e “ngaahi fehuʻi fihi.” (1 Tuʻi 10:1, NW) Ko e foʻi lea faka-Hepelū naʻe ngāueʻaki hení ʻe lava ke liliu ia ko e “ngaahi tupuʻa.” Ka ʻoku ʻikai ke ʻuhinga ia hení naʻe fakakau ʻe he kuiní ʻa Solomone ki ha ngaahi vaʻinga noaʻia. ʻOku mahuʻingá, he ʻi he Sāme 49:​4, ko e foʻi lea faka-Hepelū tatau ʻoku ngāueʻaki ke fakamatalaʻi ʻa e ngaahi fehuʻi mahuʻinga fekauʻaki mo e angahalá, maté, mo e huhuʻí. ʻOku hangehangē leva, naʻe lāulea ʻa e kuini ʻo Sipá mo Solomone ki ha ngaahi tuʻunga-lea loloto ʻa ia naʻe siviʻi ai ʻa e loloto ʻo hono potó. ʻOku pehē ʻe he Tohitapú naʻá ne “feongo mo ia ʻi he ngaahi meʻa kehekehe naʻe feʻao mo hono loto.” Ko Solomone leva, naʻá ne “fakamatala . . . ki ai ʻa e meʻa kotoa pe naʻa ne ʻeke: naʻe ʻikai ha meʻa ʻe puli ki he tuʻi, ʻo ʻikai te ne mafakaha ki ai.”​—1 Tuʻi 10:​2e, 3.

Naʻe mātuʻaki maongo ki he kuini ʻo Sipá ʻa e poto ʻo Solomoné pea mo e tuʻumālie ʻo hono puleʻangá ʻo “lele [ai] hono laumalie.” (1 Tuʻi 10:​4, 5) Ki he niʻihi ʻoku ʻuhinga ʻa e kupuʻi lea ko ení naʻe “fakatau mānava” ʻa e kuiní. ʻOku aʻu ʻo pehē ʻe ha mataotao ʻe taha naʻá ne pongia! Ko e hā pē ne hokó, naʻe ofo ʻa e kuiní ʻi he meʻa naʻá ne mātā mo fanongoá. Naʻá ne pehē ʻoku monūʻia ʻa e kau sevāniti ʻa Solomoné ʻi he malava ke nau fanongo ki he poto ʻo e tuʻí ni, peá ne fakafetaʻi kia Sihova ki hono fakanofo ʻo Solomone ki he taloní. Naʻá ne foaki ange leva ʻa e ngaahi meʻaʻofa mahuʻinga ki he tuʻí, ko e koulá ʻataʻatā pē ko hono fakakātoá, ʻi he ngaahi fakafuofua ʻi onopōní, ko e US$40,000,000 nai. Ko Solomone foki naʻá ne foaki ange ʻa e ngaahi meʻaʻofa, ʻo ʻoange ki he kuiní “ʻa e meʻa kotoa naʻa ne holi ki ai, ʻa ia pe naʻa ne kolea.”c​—1 Tuʻi 10:​6-​13.

Lēsoni Kiate Kitautolú

Naʻe ngāueʻaki ʻe Sīsū ʻa e kuini ʻo Sipá ko ha faʻifaʻitakiʻanga tefito ia ki he kau sikalaipé mo e kau Fālesí. “ʻE tutuʻu ʻi he fakamāu ʻa e Kuini ʻo e Feituʻu Tonga, pea mo e toʻutangata ni, pea te ne fakahalaia ia,” ko ʻene tala ange ia kiate kinautolú, “he naʻa ne haʻu mei he ngataʻanga ʻo māmani ke fanongo ki he poto ʻo Solomone: kae vakai ʻoku ʻi heni ha meʻa ʻoku lahi ʻia Solomone.” (Mātiu 12:42) ʻIo, naʻe fakahaaʻi ʻe he kuini ʻo Sipá ʻa e houngaʻia lahi ki he poto ʻoku foaki fakaʻotuá. Kapau naʻá ne fononga ʻi ha kilomita ʻe 2,400 ke fanongo kia Solomone, ko e moʻoni, naʻe totonu ke fanongo tokanga ʻa e kau sikalaipé mo e kau Fālesí kia Sīsū, ʻa ia naʻe ʻi ai tonu ʻi muʻa ʻiate kinautolú.

Ko kitautolu he ʻaho ní ʻoku lava ke tau fakahaaʻi ʻa e houngaʻia loloto ki he Solomone Lahi Angé, ʻa Sīsū Kalaisi. Anga-fēfē? Ko e founga ʻe taha ko e muimui ʻi heʻene fakahinohino ke ‘ngaohi ʻa e ngāhi kakai kotoa pe ko e kau akó.’ (Mātiu 28:19) Ko e toe founga ʻe tahá ko e fakakaukau lelei ki he faʻifaʻitakiʻanga ʻa Sīsuú mo ʻene fakakaukaú pea toki faʻifaʻitaki leva ki he ngaahi meʻá ni.​—Filipai 2:5; Hepelu 12:​2, 3.

Ko e moʻoni, ko e muimui ʻi he faʻifaʻitakiʻanga ʻa e Solomone Lahi Angé ʻe fiemaʻu ki ai ʻa e feinga mei heʻetau tafaʻakí. Neongo ia, ʻe fakapaleʻi lahi kitautolu. Ko e moʻoni, ʻoku talaʻofa ʻa Sihova ki heʻene kakaí kapau te nau fakahāhā ha laumālie feilaulauʻi-kita, te ne ‘tangaki maʻanautolu ʻa e ngaahi katupa ʻo e langí, ʻo vakili ʻa e tapuakí kiate kinautolu, kaeʻoua ke ʻikai hao.’​—Malakai 3:​10.

[Fakamatala ʻi lalo]