Ko E Hopo Fakamā Taha Kuo Faifai Ange Pea Fakahokó

ʻOKU siʻi kapau naʻe ʻi ai ha ngaahi hopo ʻi he kuonga muʻá ʻe ʻiloa tatau mo ia. Ko e fakamatala Fakatohitapu kehekehe ʻe fā, ʻoku ui ko e Kōsipelí, ʻoku fakaikiiki ai ʻa hono puke, fakamāuʻi, mo hono fakapoongi ʻo Sīsū Kalaisí. Ko e hā ʻoku totonu ai ke ke mahuʻingaʻia aí? Koeʻuhí naʻe tala ʻe Sīsū ki hono kau muimuí ke nau fakamanatu ʻa ʻene pekiá, ʻa ia ʻoku hakeakiʻi ai e mahuʻinga ʻo e hopo naʻe taki atu ki aí; koeʻuhí ʻoku totonu ke tau ʻiloʻi pe naʻe moʻoni e ngaahi tukuakiʻi ne fai kia Sīsuú; pea koeʻuhi ko e feilaulau naʻe fai loto-lelei ʻe Sīsū ʻi hono foaki ʻene moʻuí ʻoku mātuʻaki mahuʻinga ia kia kitautolu pea ki hotau kahaʻú.—Luke 22:19; Sione 6:40.

ʻI he taimi ʻo e hopoʻi ʻo Sīsuú, naʻe puleʻi ai ʻa Pālesitaine ʻe Loma. Naʻe fakaʻatā ʻe he kau Lomá e mafai fakalotu fakalotofonua faka-Siú ke ne fakahoko ʻa e fakamaau ʻi he haʻohaʻonga ʻo e kau Siú ʻo fakatatau ki heʻenau laó tonu ka ʻoku ngalingali ne ʻikai ʻoange kia kinautolu ʻa e mafai fakalao ke nau fakapoongi e kau faihiá. Ko ia naʻe puke ai ʻa Sīsū ʻe he ngaahi fili fakalotu ʻi he kau Siú ka naʻe fakapoongi ia ʻe he kau Lomá. Ko ʻene malangá naʻe mātuʻaki fakamaaʻi ai e fokotuʻutuʻu fakalotu ʻo e ʻaho ko iá ʻo fakapapauʻi ai ʻe hono kau muimuí kuo pau ke mate ʻa Sīsū. Neongo ia, naʻa nau loto ke ʻai ke hā fakalao ʻa hono fakapōngí. Ko hano ʻanalaiso ʻenau feinga ke fakahoko ʻa e taumuʻa ko iá naʻe ueʻi ai ha palōfesa lao ke ne fakamatalaʻi ʻa e meʻá fakalūkufua “ko e faihia kovi taha kuo ʻiloa ʻi he hisitōlia ʻo e ngaahi hopó.”a

Hokohoko Atu ʻa e ʻIkai Fai ki he Laó

Ko e Lao naʻe ʻoange ʻe Mōsese ki ʻIsilelí kuo ui “ko e sisitemi lao fakamaama taha kuo faifai ange pea fakahāʻí.” Kae kehe, ʻi he ʻaho ʻo Sīsuú, ko e kau lāpai hehema ke laoʻi e meʻa kotoa peé naʻa nau toe tānaki ki ai ha toe fokotuʻunga tuʻutuʻuni lahi ange taʻefakatohitapu, ʻa ia ko e lahi aí ne hiki ia ki mui ʻi he Talamatá. (Sio ki he puha “Ngaahi Lao Faka-Siu ʻi he ʻUluaki Ngaahi Senitulí,” ʻi he peesi 28.) Naʻe anga-fēfē ʻa e feʻungamālie ʻo e hopoʻi ʻo Sīsuú mo e tuʻunga Fakatohitapu mo taʻefakatohitapu ko ení?

Ko e tupu ʻa hono puke ʻo Sīsuú mei ha fakamoʻoni felotoi ʻa ha ongo fakamoʻoni ʻe toko ua ʻi ha ʻao ʻo ha fakamaauʻanga ʻo fekauʻaki mo ha hia papau? Ke fakalao ʻa hono puké, naʻe totonu ke pehē. ʻI Pālesitaine ʻi he ʻuluaki senitulí, ko ha Siu naʻe tui kuo maumauʻi ha lao naʻá ne ʻomai ʻene tukuakiʻí ki he fakamaauʻangá lolotonga e taimi hopó. Naʻe ʻikai lava ke kamata fai ha tukuakiʻi ʻe he ngaahi fakamaauʻangá ka naʻa nau fakatotoloʻi pē ʻa e tukuakiʻi naʻe ʻomai kia kinautolú. Ko e ongo talatalaakí pē ʻa e ongo fakamoʻoni ki ha hia naʻe tukuakiʻi. Naʻe kamata ʻa e hopó ʻi he taimi naʻe felotoi ai ʻo ʻikai siʻi hifo he ongo fakamoʻoni ʻe toko ua ki he ngāue tatau. Ko ʻena fakamoʻoní ne fakalao ai ʻa e tukuakiʻí, ʻa ia naʻe taki atu ai ki hano puke ʻo e tokotahá. Ko e fakamoʻoni pē ʻa ha toko tahá naʻe ʻikai fakaʻatā ia. (Teutalonome 19:15) Kae kehe, ʻi he keisi ʻa Sīsuú, ko e kau maʻu mafai Siú naʻa nau kumi pē ki ha ‘founga ola lelei’ ke tāmateʻi ai ia. Ne ʻave ia ʻo tauhi fakalao ʻi he taimi naʻe malanga hake ai ‘ha foʻi faingamālie lelei’—ʻi he poʻulí pea ʻi he ‘ʻikai ʻi ai ha fuʻu kakaí.’—Luke 22:2, 5, 6, 53, NW.

ʻI he taimi ʻo hono puke ʻo Sīsuú, naʻe ʻikai ha tukuakiʻi ʻe fai kiate ia. Ko e kau taulaʻeikí mo e Sanetalimí, ʻa e fakamaauʻanga māʻolunga faka-Siú, ne kamata ke nau kumi ha kau fakamoʻoni ʻi he toki hili pē hono tauhi fakalao iá. (Mātiu 26:59) Naʻe ʻikai lava ke nau maʻu ha ongo fakamoʻoni naʻá na felotoi. Neongo ia, naʻe ʻikai ko ha ngāue ia ʻa e fakamaauʻangá ke nau kumi ha kau fakamoʻoni. Pea “ke hopoʻi ha tangata, tautefito ke tautea mate ia, ʻo ʻikai fakahaaʻi pau ki muʻa ʻa e hia ʻa ia ʻoku hopoʻi ai iá, ʻoku vakai moʻoni ki ai ko ha meʻa fakalilifu,” ko e lau ia ʻa e loea pea ko e faʻu-tohi ko A. Taylor Innes.

Ko e fuʻu kakai ne nau tauhi fakalao ʻa Sīsuú naʻa nau ʻave ia ki he fale ʻo e Taulaʻeiki Lahi ki muʻa ko ʻĀnasí, ʻa ia naʻá ne kamata fakafehuʻi ia. (Luke 22:54; Sione 18:12, 13) Naʻe tukunoaʻi ʻe he ngaahi meʻa naʻe fai ʻe ʻĀnasí ʻa e tuʻutuʻuni naʻe pehē ai ko e tukuakiʻi ki he tautea maté naʻe pau ke fakamāuʻi ʻaho ia, ʻo ʻikai ʻi he poʻulí. ʻIkai ngata aí, ko ha kumi pē ʻo e moʻoní naʻe totonu ke fai ia ʻi ha fakamaauʻanga ʻoku ʻatā, ʻo ʻikai tātāpuni e ngaahi matapaá. ʻI he lāuʻilo ki he taʻefakalao ʻa e fakafehuʻi naʻe fai ʻe ʻĀnasí, naʻe tali ange ʻe Sīsū: “Ko e hā ʻoku ke fehuʻi ai kiate au? fehuʻi pē kiate kinautolu kuo fanongo kiate au, pe ko e hā ʻeku lea naʻe fai kiate kinautolu: ʻe, ʻoku lāuʻilo ʻe kinautolu ni ʻa e ngaahi meʻa kuo u leaʻaki.” (Sione 18:21) Naʻe totonu ke fakafehuʻi ʻe ʻĀnasi ʻa e kau fakamoʻoní, ʻo ʻikai ko e fakaʻiloá. Ko e fakamatala ʻa Sīsuú naʻe mei ueʻi nai ai ha fakamaau faitotonu ke ne fakaʻapaʻapaʻi ʻa e founga totonú, ka naʻe ʻikai mahuʻingaʻia ʻa ʻĀnasi ia he fakamaau totonú.

Ko e tali ʻa Sīsuú naʻe hoko ʻo paaʻi ai ia ʻe ha ʻōfisa—naʻe ʻikai ko e fakamālohi pē ia naʻá ne kātekina ʻi he pō ko iá. (Luke 22:63; Sione 18:22) Ko e lao naʻe hiki ʻi he tohi Nomipa vahe 35 ʻi he Tohi Tapú, fekauʻaki mo e ngaahi kolo hūfangá, ʻoku fakahaaʻi ai ko e fakaʻiloá naʻe pau ke maluʻi ia mei hono ngaohikoviá kae ʻoua kuo fakamoʻoniʻi ʻokú ne halaia. Naʻe totonu ke fai ha maluʻi pehē kia Sīsū.

Ko e faʻahinga ne nau puke ʻa Sīsuú ne nau taki ia he taimi ko ení ki he ʻapi ʻo e Taulaʻeiki Lahi ko Kaiafasí, ʻa ia naʻe hoko atu ai e hopo taʻefakalao ʻi he taimi poʻulí. (Luke 22:54; Sione 18:24) ʻI aí, ʻi he fakafetau ki he tefitoʻi moʻoni kotoa pē ʻo e fakamaau totonú, naʻe feinga ʻa e kau taulaʻeikí ke maʻu ha “fakamooni loi kia Jisu, kae tamateʻi ia,” ka naʻe ʻikai felotoi ha fakamoʻoni ʻe ua ʻo kau ki he meʻa naʻe leaʻaki ʻe Sīsuú. (Mātiu 26:59, PM; Maake 14:56-59) Ko ia naʻe feinga ai e taulaʻeiki lahí ke ʻai ʻa Sīsū ke ne fakatonuhiaʻi pē ʻe ia ia. “ʻOku ʻikai haʻo momoʻi tali?” ko ʻene ʻeké ia. Ko e hā ʻa e “meʻa ʻoku talatalaakiʻi ai koe ʻe he tuʻunga meʻa ni?” (Maake 14:60) Ko e founga ko ení naʻe ʻikai ʻaupito ala tali. “Ko hono fakafehuʻi ʻo e fakaʻiloá, ʻo maʻu ha fakahalaia ʻi heʻene talí, ko [hano] maumauʻi ia ʻo e fakamaau totonu fakalaó,” ko e fakamatala ia ʻa Innes, naʻe lave ki ai ki muʻá.

Ne faifai pē ʻo puke ʻe he fakatahá ha fakamatala naʻe fai ʻe Sīsū. ʻI he tali ki he fehuʻi: “Ko koe koe Kalaisi, koe Alo oe Monuia?” Naʻe tali ʻa Sīsū: “Ko au ia: bea te mou mamata ki he Foha oe tagata oku nofo ia i he nima toomatau oe mafimafi, bea mo ene haʻu moe gaahi ao oe lagi.” Naʻe fakaʻuhingaʻi ʻe he kau taulaʻeikí ʻa e meʻá ni ko e lea-fieʻotua, pea naʻa “nau loto taha kotoabe e totonu ke mate.”—Maake 14:61-64, PM.b

Fakatatau ki he Lao ʻa Mōsesé, ko e ngaahi hopó naʻe pau ke fai ia ʻi he feituʻu kakaí. (Teutalonome 16:18; Lute 4:1) Ko e meʻá ni, ʻi he tafaʻaki ʻe tahá, ko ha hopo fakapulipuli ia. Naʻe ʻikai feinga ai ha taha pe fakaʻatā ha taha ke lea lelei fekauʻaki mo Sīsū. Naʻe ʻikai fai ai hano sivisiviʻi ʻo e moʻoni fakalao ʻo e taukaveʻi ʻe Sīsū ʻokú ne maʻu e tuʻunga faka-Mīsaiá. Naʻe ʻikai ha faingamālie ʻo Sīsū ke ne ui mai haʻane kau fakamoʻoni ki hano taukapoʻi. Naʻe ʻikai ha pāloti ʻi ha tuʻunga maau he lotolotonga ʻo e kau fakamāú ki he halaiá pe ko e tonuhiá.

ʻI he ʻAo ʻo Pailató

Koeʻuhi ʻoku hā ngalingali ne ʻikai ha mafai ʻo e kau Siú ke nau fakapoongi ʻa Sīsū, naʻa nau ʻave ia kia Ponitō Pailato, ko e kōvana Lomá. Ko e ʻuluaki fehuʻi eni ʻa Pailató: “Ko e ha ʻa e talatalaaki ʻoku mou haʻu mo kimoutolu ki he tangata ni?” ʻI hono ʻiloʻi ko ʻenau tukuakiʻi loi ki he lea-fieʻotuá naʻe ʻikai mahuʻinga kia Pailató, ne feinga ʻa e kau Siú ke ʻai ʻa Pailato ke ne fakahalaiaʻi ʻa Sīsū ʻo ʻikai te ne fakatotoloʻi. “Ka ne ʻikai ko e siana fai kovi ia, talaʻehai te mau tukuange kiate koe,” ko ʻenau leá ia. (Sione 18:29, 30) Naʻe talitekeʻi ʻe Pailato ʻa e fakaʻuhinga ko ení, ʻo fakamālohiʻi ai e kau Siú ke nau fai ha tukuakiʻi foʻou: “Naʻa mau ʻilo ʻa e siana ni ʻoku ne veuveuki homau kakai, mo ne taʻofi ʻa e fai tukuhau kia Sisa, mo ne pehe ko Kingi Kalaisi ia.” (Luke 23:2) Ko ia ko e tukuakiʻi ko ē ki he lea-fieʻotuá ne liliuʻi kākā ia he taimi ko ení ki he talisone.

Ko hono tukuakiʻi ki he “taʻofi ʻa e fai tukuhau” naʻe loi, pea naʻe ʻiloʻi ia ʻe he kau talatalaakí. Naʻe akoʻi ʻe Sīsū ʻa e meʻa fehangahangaí tofu pē. (Mātiu 22:15-22) Ki he tukuakiʻi ko ia naʻe ʻai ia ʻe Sīsū ko ha tuʻí, naʻe vave ʻa e ʻiloʻi ai ʻe Pailato ko e tangata ʻi hono ʻaó naʻe ʻikai te ne hoko ko ha fakamanamana ki Loma. “ʻOku ʻikai te u momoʻi ʻilo ha hia ʻa e tangata ni,” ko ʻene fakahāʻí ia. (Sione 18:38) Ne hokohoko atu ʻa e tui ʻa Pailato ki he meʻa ko iá ʻi he kotoa ʻo e hopó.

Ne ʻuluaki feinga ʻa Pailato ke tukuange ʻa Sīsū ʻaki ʻene fakaʻatā ke ne maʻu ʻaonga mei he tōʻonga fakafonua ʻo hono tukuange ʻo ha pōpula ʻi he Pāsová. Neongo ia, ne iku ʻo tukuange ʻe Pailato ʻa Palāpasa, ʻa ia naʻá ne halaia ʻi he feinga angatuʻu mo e fakapō.—Luke 23:18, 19; Sione 18:39, 40.

Ko e feinga hono hoko ʻa e kōvana Lomá ke tukuange ʻa Sīsuú ko ha fakangaloku ia ki he loto ʻo e kakaí. Naʻá ne fekau ke kauʻi-maea ʻa Sīsū, fakatui ai e kofu kulokula, ʻai ki ai ʻa e kalauni talatala, haha, pea manukiʻi. Naʻá ne toe fakahaaʻi ne tonuhia ʻa Sīsū. ʻOku hangē ia ne pehē ʻe Pailato: ‘ʻIkai kuo feʻunga e meʻá ni kau taulaʻeiki?’ Mahalo pē naʻá ne ʻamanaki ko e sio ki hono fakamamahiʻi ʻo ha tangata ʻaki ha uipi faka-Lomá ʻe lato ai ʻenau holi sāuní pe langaʻi ai haʻanau ongoʻi manavaʻofa. (Luke 23:22) Neongo iá, naʻe ʻikai.

“Naʻe feinga ʻa Pailato ke tuku ange [ʻa Sīsū]: ka ka toutou kalanga pe ʻe haʻa Siū, ʻo pehē, Kapau te ke tuku ange ʻa e siana ni, ta ʻoku ʻikai ko e takanga ko e ʻo Sisa: ʻilonga ʻa ia ʻoku ne lau ko e tuʻi ia ʻoku ne lea pauʻu kia Sisa.” (Sione 19:12) Ko e Sisa ʻo e taimi ko iá ko Taipiliō, ko ha ʻemipola ne ʻiloa ʻi heʻene fakapoongi ha taha pē naʻá ne fakakaukau ʻoku taʻemateaki—naʻa mo e kau ʻōfisa māʻolungá. Ne ʻosi fakaʻitaʻi ʻe Pailato ʻa e kau Siú, ko ia naʻe ʻikai lava ke ne ʻai ia ki ha tuʻunga fakatuʻutāmaki ʻi ha toe lahi ange ʻa e fetēlení, taʻelau ki ai hano tukuakiʻi ia ki he taʻemateaki. Ko e lea ʻa e fuʻu kakaí naʻe iku ia ki ha fakamanamana fakapulipuli—ko e totongi fakamālohi—pea naʻe manavasiʻi ai ʻa Pailato. Naʻá ne taʻefaitotonu ʻi he tengé ʻo ne ʻai ai ʻa Sīsū, ko ha tangata tonuhia, ke tutuki.—Sione 19:16.

Ko Hano Vakaiʻi ʻo e Fakamoʻoní

Kuo ʻanalaiso ʻe he kau faiongoongo fakalao tokolahi ʻa e fakamatala Kōsipeli ki hono hopoʻi ʻo Sīsuú. Kuo nau fakamulitukuʻaki ko ha meʻa taʻetotonu ia, ko hano mioʻi ia ʻo e fakamaau totonú. “Ko hano kamata ha hopo pehē pea ʻosi ʻo fakahaaʻi fakaʻofisiale e tauteá, ʻi he vahaʻa ʻo e tuʻuapoó mo e pongipongí, naʻe kehe ʻaupito ia mei he faʻunga mo e tuʻutuʻuni ʻo e lao faka-Hepeluú pea pehē ki he ngaahi tefitoʻi moʻoni ʻo e fakamaau totonú,” ko e tohi ia ʻa ha loea ʻe taha. ʻOku pehē ʻe ha palōfesa ʻi he laó: “Ko e foungá kotoa ne hūhū ai ʻa e tuʻunga taʻefakalao mafatukituki mo taʻetotonu ʻo iku ai ki he tuʻutuʻuni fakaefakamaau ʻo ha fakapō.”

Naʻe tonuhia ʻa Sīsū. Neongo ia, naʻá ne ʻiloʻi ko ʻene pekiá naʻe fiemaʻu ia ki he fakamoʻui ʻo e faʻahinga talangofua ʻo e tangatá. (Mātiu 20:28) Naʻe lahi fau ʻene ʻofa ki he fakamaau totonú ʻo ne fakamoʻulaloa ai ki he fakamaau taʻetotonu mataʻāʻā taha kuo faifai ange pea fakahokó. Naʻá ne fai ia maʻá e kau angahala hangē ko kitautolú. Ko e meʻá ni ʻoku ʻikai ʻaupito totonu ke ngalo ʻia kitautolu.

[Fakamatala ʻi lalo]

[Puha/Fakatātā ʻi he peesi 28]

Ngaahi Lao Faka-Siu ʻi he ʻUluaki Ngaahi Senitulí

Ko e talatukufakaholo tala ngutu faka-Siú, naʻe hiki ia ʻi he ʻuluaki ngaahi senitulí T.S. ka ʻoku ʻi ai e tui ʻoku fuʻu motuʻa ʻaupito, ʻo kau ai ʻa e ngaahi tuʻutuʻuni ko ení:

▪ ʻI he ngaahi keisi mafatukitukí, ne ʻuluaki fai e fanongo ki he ngaahi fakaʻuhinga ki hano fakatonuhiaʻi

▪ Naʻe pau ke feinga lahi ʻa e kau fakamāú ke fakahaofi ʻa e fakaʻiloá

▪ Naʻe lava ke fakaʻuhinga ʻa e kau fakamāú maʻá e fakaʻiloá kae ʻikai fakafepakiʻi ia

▪ Naʻe fai e fakatokanga ki he kau fakamoʻoní fekauʻaki mo e mafatukituki ʻa honau fatongiá

▪ Naʻe vakaiʻi mavahe ʻa e kau fakamoʻoní, ʻo ʻikai ʻi he ʻi ai ha toe fakamoʻoni kehe

▪ Ko e fakamoʻoní naʻe pau ke tatau ia ʻi he ngaahi poini tefitó kotoa—ʻa e ʻahó, feituʻu, taimi ʻi he ʻaho naʻe fai aí, mo e hā fua

▪ Ko e ngaahi tukuakiʻi mafatukitukí naʻe pau ke hopoʻi ia ʻi he taimi ʻahó pea ʻosi ʻi he taimi ʻahó

▪ Ko e ngaahi keisi mafatukitukí naʻe ʻikai lava ke lāulea ki ai ʻi he efiafi ki muʻa ʻi ha ʻaho Sāpate pe ko ha kātoanga

▪ Ko e ngaahi keisi mafatukitukí naʻe lava ke kamata mo ngata ia ʻi he ʻaho tatau kapau naʻe lelei e tuʻutuʻuni ʻa e kau sulá ki he fakaʻiloá; kapau naʻe ʻikai lelei, naʻe lava ke toki fakaʻosi pē ʻa e hopó ʻi he ʻaho hono hokó, ʻi he taimi ʻe fanongonongo ai e tuʻutuʻuni ʻa e kau sulá pea hilifaki ai ʻa e tauteá

▪ Ko e ngaahi keisi mafatukitukí naʻe hopoʻi ia ʻo ʻikai siʻi hifo he kau fakamaau ʻe toko 23

▪ Naʻe taufetongi ʻa e kau fakamāú ʻi he pāloti ke fakatonuhiaʻi pe ke fakahalaiaʻi, ʻo kamata ʻi he tokotaha siʻisiʻi tahá; naʻe lēkooti ʻe he kau sikalaipé ʻa e lea ʻa e faʻahinga ko ia naʻa nau loto ke fakatonuhiaʻí mo e faʻahinga ko ia naʻa nau loto ke fakahalaiaʻí

▪ Ko e tonuhiá naʻe fakapapauʻi ia ʻi ha tokolahi ʻaki pē ha toko taha, ka ko e halaiá ʻi ha tokolahi ʻaki pē ha toko ua; kapau ko e pālotí naʻe pau ki ha halaia ʻo tokolahi ʻaki pē ha toko taha, naʻe tānaki atu ki ai ha ongo fakamaau ʻo fakatatau ki he fiemaʻú kae ʻoua kuo aʻu ki ha tuʻutuʻuni ʻoku fakalaó

▪ ʻI ha tuʻutuʻuni fakahalaia ʻa e kau sulá ʻo ʻikai fakaʻuhinga ha fakamaau ʻe taha maʻá e fakaʻiloá naʻe taʻefakalao; ko ha loto-taha ʻi he tuʻutuʻuni fakahalaia ʻa e kau sulá naʻe vakai ki ai ko hano “fakahaaʻi ia ʻo ha faʻufaʻufono”

Ngaahi Tuʻunga Taʻefakalao ʻi he Hopoʻi ʻo Sīsuú

▪ Naʻe ʻikai ʻomai ʻi he fakamaauʻangá ha ngaahi fakaʻuhinga pe ko ha kau fakamoʻoni ki hano fakatonuhia

▪ Naʻe ʻikai ha taha he kau fakamāú naʻe feinga ke taukapoʻi ʻa Sīsū; ko kinautolú ko hono ngaahi fili

▪ Naʻe kumi ʻe he kau taulaʻeikí ʻa e kau fakamoʻoni loi ke nau fakahalaiaʻi ʻa Sīsū ke ne mate

▪ Naʻe fai poʻuli ʻa e hopó ʻo tātāpuni ʻa e ngaahi matapaá

▪ Naʻe kamata mo ʻosi ʻa e hopó ʻi he ʻaho ʻe taha, ko e efiafi ki muʻa ʻi ha kātoanga

▪ Naʻe ʻikai ha fakaʻilo pe talatalaakiʻi ki muʻa ʻi hono puke ʻo Sīsuú

▪ Ko e taukaveʻi ʻe Sīsū ʻa hono tuʻunga faka-Mīsaiá, naʻe pehē ai naʻá ne “lea-fieʻotua,” naʻe ʻikai ke vakaiʻi

▪ Ko e talatalaakiʻí naʻe liliu ia ʻi he taimi naʻe ʻomai ai ʻa e keisí ki he ʻao ʻo Pailató

▪ Naʻe loi ʻa e ngaahi tukuakiʻí

▪ Naʻe ʻiloʻi ʻe Pailato naʻe tonuhia ʻa Sīsū kae kei ʻai pē ke fakapoongi ia

[Puha ʻi he peesi 30]

Fai ʻe he Kau Fakamoʻoní ha Tali ki he Totó

Naʻe fai ʻe he ngaahi fakamaauʻanga Siú ʻa e fakatokanga ko eni fekauʻaki mo e mahuʻinga ʻo e moʻuí ki he kau fakamoʻoni ʻi he ngaahi keisi mafatukitukí ki muʻa ke nau fai ha fakamoʻoní:

“Mahalo pē ko hoʻomou taumuʻá ke fai ha fakamoʻoni makatuʻunga ʻi ha fakamahamahalo, fanongo talanoa, pe ko e meʻa kuo tala ʻe ha fakamoʻoni ʻe taha ki ha taha; pe ʻoku mou fakakaukau nai, ‘Naʻa mau fanongo ai mei ha tokotaha alafalalaʻanga.’ Pe ʻoku ʻikai nai te mou ʻilo ʻi he hili iá te mau fakafehuʻi kimoutolu ʻaki ʻa e ngaahi tesi feʻungamālie ʻo e fehuʻi fakafihi mo e sivi. ʻOku totonu ke mou ʻilo ko e ngaahi lao ʻokú ne puleʻi ha hopo ʻi he ngaahi keisi fakapisinisí ʻoku kehe ia mei he ngaahi lao ʻokú ne puleʻi ha hopo ʻi he ngaahi keisi mafatukitukí. ʻI he tuʻunga ʻo ha hopo ʻi he ngaahi keisi fakapisinisí, ʻoku totongi ai ʻe ha taha ha paʻanga pea lava ʻo fakamolemoleʻi ia. ʻI he ngaahi keisi mafatukitukí ko e toto ʻo e [fakaʻiloá] mo e toto ʻo e faʻahinga kotoa ko ia naʻe pau ke fanauʻi meiate ia [ʻa ia ne fakahalaiaʻi he founga halá] ʻe hilifaki ia kiate ia [ʻoku fakamoʻoni loí] ʻo aʻu ki he pāʻangangalu.”​—Talamata faka-Pāpilone, Sanetalimi, 37a.

Kapau naʻe fakahalaiaʻi ʻa e fakaʻiloá, ko e kau fakamoʻoní naʻe pau ke nau fakahoko ʻa e tauteá.​—Livitiko 24:14; Teutalonome 17:6, 7.