“Tala Mai pe Hoko Fakakū ʻa e Ngaahi Meʻa ko Ia?”

“Ko au ʻoku ou tala meʻa foʻou: teʻeki ke nau fisi hake ʻoku ou tuku ke mou fanongo ki ai.”​—ʻAISEA 42:9.

 1, 2. (a) Ko e hā ʻa e meʻa naʻe ʻeke ʻe he kau ʻaposetolo ʻa Sīsuú ʻo kau ki he kahaʻú? (e) ʻI he founga fē kuo fakahoko ai ʻa e tali ʻa Sīsū ʻo kau ki ha fakaʻilonga faʻu fetuiakí?

ʻOKU haʻu ʻa e ngaahi meʻa ʻoku akoʻi mei he ʻOtuá meia Sihova ko e ʻOtuá, ʻa ia ʻokú ne “tala mei he kamataʻanga ʻa e meʻa ʻe hoko ʻamui.” (ʻAisea 46:10) ʻOku hangē ko ia naʻe fakahā ʻe he kupu ki muʻá, naʻe kumi ʻa e kau ʻaposetoló ki he faʻahinga akonaki pehē meia Sīsū, ʻo nau ʻeke kiate ia: “Tala mai pe hoko fakakū ʻa e ngaahi meʻa ko ia, pea ko e ha ʻa e fakaʻilonga ʻo ka ene hono fakaʻosi kotoa.”​—Maʻake 13:4.

² ʻI hono talí, naʻe fakamatalaʻi ʻe Sīsū ha “fakaʻilonga” faʻu fetuiaki ko e ngaahi meʻa ia naʻa nau fakahā naʻe mei ʻosi ʻa e fokotuʻutuʻu faka-Siú. Naʻe fakahoko ʻa e meʻá ni ʻi he fakaʻauha ʻo Selūsalema ʻi he 70 T.S. Ka naʻe pau ke ʻi ai ʻa e fakahoko lahi ange ʻo e kikite ʻa Sīsuú ʻa ia ʻe hoko ia ʻi he hili ha ngaahi taʻu lahi mei he meʻá ni. ʻI he ngata ʻi he 1914 ʻa e “ngaahi kuonga ʻo e Senitaile,” naʻe teu leva ke hā ha fakaʻilonga ʻi he tuʻunga kāfakafa, ʻo ne fakahāhā ai ʻe vavé ni ʻa hono fakangata ʻo e ngaahi meʻa ʻo e fokotuʻutuʻu anga-fulikivanu lolotonga ní ʻi he “mamahi lahi.”a (Luke 21:24) Ko e laui miliona ʻoku kei moʻui he taimí ni ʻe lava ke nau fakamoʻoniʻi kuo fakahoko ʻa e fakaʻilonga ko ení ʻi he ongo tau ʻa māmaní pea mo e ngaahi meʻa mahuʻinga kehe ʻo e senituli hono 20 ni. Ko e ngaahi meʻá ni ʻoku nau toe fakaʻilongaʻi ʻa hono fakahoko tefito ʻo e kikite ʻa Sīsuú, pea naʻe fakatātaaʻi ʻa e ngaahi meʻa ʻoku hoko ʻi onopooní ʻe he ngaahi meʻa naʻe hoko ʻi he vahaʻa taimi ko e taʻu 33 ki he 70 T.S.

 3. ʻI he lave ki ha toe fakaʻilonga ʻe taha, ko e hā ʻa e ngaahi meʻa lahi ange naʻe kikiteʻi ʻe Sīsuú?

³ ʻI he hili ʻa e lave ʻa Luke ki he ngaahi kuonga ʻo e Senitailé, ko e ngaahi fakamatala huʻufataha mo ia ʻi he Mātiu, Maʻake, mo Luké ʻoku nau fakamatalaʻi ʻa e ngaahi meʻa lahi ange ʻa ia ʻoku kau ki ai ha fakaʻilonga ʻo tānaki atu ki he “fakaʻilonga” faʻu fetuiaki ʻo e “fakaʻosiʻosi ʻo e ngaahi meʻa ʻoku tuʻú ni.” (Mātiu 24:​3, NW) (ʻI he peesi 25, ʻoku fakaʻilongaʻi ai ʻa e konga ko eni ʻo e fakamatalá ʻaki ʻa e laine ʻe ua.) ʻOku pehē ʻe Mātiu: “Pea hili leva ʻa e mamahi ʻo e taimi ko ia ʻe fakapoʻuli ʻa e laʻa, pea ʻe tuku ʻe he mahina ʻene huhulu, pea ʻe ngangana ʻa e ngāhi fetuʻu mei langi, pea ʻe ngatōtō ʻa e ngāhi malohinga ʻo e ngāhi langi: pea ʻe toki ha ʻi he langi ʻa e fakaʻilonga ʻo e Fanautama ʻa Tangata: pea ʻe toki lauʻaitu ʻa e ngāhi matakali ʻo mamani, pea te nau sio ki he Fanautama ʻa Tangata ʻoku hoko mai, ʻoku ne heka ki he ngāhi ʻao ʻo e langi pea haʻu mo ia ʻa e fakangeingei mo e nāunau lahi. Pea te ne fekau atu ʻene kau angelo ke ifi ʻa e talupite lahi; pea te nau tanaki ʻene kakai fili mei he matangi ʻe fa, mei he ngataʻanga ʻe taha ʻo e ngāhi langi ʻo aʻu ki hono ngataʻanga ʻe taha.”​—Mātiu 24:​29-31.

Mamahi pea mo e Ngaahi Meʻa Taha Kehe Atu ʻOku Hā ʻi he Langí

 4. Ko e hā ʻa e ongo fehuʻi ʻoku mālanga hake ʻo kau ki he ngaahi meʻa taha kehe atu ʻoku hā ʻi he langí naʻe lave ki ai ʻa Sīsuú?

⁴ ʻE fakahoko fakakū ʻa e ngaahi meʻá ni? ʻOku lave ʻa e fakamatala ʻi he ngaahi Kōsipeli ʻe tolú kātoa ki he meʻa ʻe lava ke tau ui ko e ngaahi meʻa taha kehe atu ʻoku hā ʻi he langí​—ko e fakapoʻuli ʻa e laʻaá mo e māhiná pea mo e ngangana ʻa e ngaahi fetuʻú. Naʻe pehē ʻe Sīsū ʻe hoko eni hili ʻa e “mamahi.” Naʻe ʻuhinga ʻa Sīsū ki he mamahi naʻe hoko hono tumutumú ʻi he 70 T.S., pe ko ʻene lave ʻo kau ki he mamahi lahi ʻa ia ʻoku kei toka mei muʻa ʻi he kahaʻu ʻi onopooní?​—Mātiu 24:29; Maʻake 13:24.

 5. Ko e hā ʻa e tui naʻe maʻu ki muʻa ʻo kau ki he mamahi ʻi onopooní?

⁵ Kuo mātuʻaki fie ʻilo ʻa e kakai ʻa e ʻOtuá ʻo kau ki he “mamahi lahi,” talu mei he ngata ʻa e ngaahi kuonga ʻo e Senitailé ʻi he 1914. (Fakahā 7:14) ʻI he ngaahi taʻu lahi naʻa nau fakakaukau ko e mamahi lahi ʻi onopooní ko hono konga kamatá, ko e taimi ʻo e Tau I ʻa Māmaní, pea naʻe toki hoko ha vahaʻa taimi naʻe tuku ai ia pea hoko atu ai ki he konga fakaʻosí, ko e “tau ʻo e ʻaho lahi ʻo e ʻOtua Aoniu.” Kapau naʻe pehē, ko e hā ʻa e meʻa ʻe hoko ʻi he ngaahi hongofuluʻi taʻu ʻi he vahaʻa taimi ʻo e “fakaʻosiʻosi ʻo e fokotuʻutuʻu”?​—Fakahā 16:14; Mātiu 13:39; 24:​3, NW; 28:20.

 6. Ko e hā naʻe fakakaukau ki ai ko e fakahoko ia ʻo e kikite ʻa Sīsū ʻo kau ki he ngaahi meʻa taha kehe atu ʻoku hā ʻi he langí?

⁶ Naʻe ʻi ai ʻa e fakakaukau ʻe hā ai ʻi he vahaʻa taimi ko ʻení ʻa e fakaʻilonga faʻu fetuiaki, kau ai mo e ngāue fakamalanga ʻoku fai ʻe he kakai ʻa e ʻOtuá kuo fakatahatahaʻi. Naʻe toe hā ngalingali ʻe ʻamanekina ʻe hoko ʻa e ngaahi meʻa taha kehe atu ʻoku hā ʻi he langí ʻa ia naʻe kikiteʻí ʻi he hili ʻa e konga kamata ʻi he 1914-18. (Mātiu 24:29; Maʻake 13:​24, 25; Luke 21:25) Naʻe fakahanga ʻa e tokangá ki he ngaahi meʻa moʻoni ʻi he langí​—ʻa e ngaahi meʻa fai fetuʻutaki ʻi he vavaá, ngaahi lōketi, ko e peau huelo mei he vavaá pe huelo gamma, pea mo e tūʻuta pe feituʻu ngāue ʻi he māhiná.

 7. Ko e hā ʻa hono fakaleleiʻi ʻo e mahino ʻo kau ki he mamahi lahí kuo tau maʻu?

⁷ Kae kehe, ko e The Watchtower ʻo Sānuali 15, 1970, naʻá ne toe vakaiʻi ʻa e kikite ʻa Sīsuú, pea tautautefito ʻo fekauʻaki mo e mamahi lahi ʻoku teu hoko maí. Naʻe fakahā ai ʻo pehē, koeʻuhi ko e meʻa naʻe hoko ʻi he ʻuluaki senitulí, naʻe ʻikai malava ai ke ʻi ai ha konga kamata ʻi he 1914-18 ʻo e mamahi lahi ʻi onopooní, pea toki hoko ha vahaʻa taimi naʻe tuku ai ia pea ki mui mai ke toe hoko atu ʻa e mamahi lahí. Naʻe fakaʻosi ʻaki ʻa e makasiní ʻo ne pehē: “Ko e ‘mamahi lahi’ ʻa ia ʻe ʻikai ʻaupito toe ʻi aí ʻoku kei ʻi he kahaʻú, he ʻe fakaʻauha ʻe ia ʻa e ʻemipaea ʻo e lotu loí ʻi māmani lahi (kau ai mo e Puleʻanga-Haʻa-Kalisitiané) pea ʻe hoko atu ai ki he ‘tau ʻo e ʻaho lahi ʻo e ʻOtua Aoniú’ ʻi ʻĀmaketone.”

 8. ʻI hono maʻu ʻa e mahino kuo fakaleleiʻi ʻo kau ki he mamahi ʻi onopooní, naʻe fakamatalaʻi fēfē ʻa e Mātiu 24:29?

⁸ Ka ʻoku pehē ʻi he Mātiu 24:29 ʻoku hoko ʻa e ngaahi meʻa taha kehe atu ʻoku hā ʻi he langí ʻi he “hili leva ʻa e mamahi.” (Fakaʻītali ʻamautolu.) ʻOku malava fēfē ke hoko ʻo pehē? Naʻe fokotuʻu atu ʻi he The Watchtower ʻo Mē 1, 1975, ʻo pehē ʻoku ʻuhinga ʻa e “mamahi” ko eni ʻi he veesí ni ki he mamahi naʻe hoko ʻi he 70 T.S. Ka, ʻe lava fēfē ke pehē ko e ngaahi meʻa taha kehe atu ʻoku hā ʻi he langí ʻi hotau kuongá ni naʻa nau hoko ʻi he “hili leva” ha meʻa naʻe hoko ʻi he 70 T.S.? Naʻe fakamatalaʻi ʻo pehē ʻe taimi nounou pē ʻi he vakai ʻa e ʻOtuá ʻa e ngaahi senituli ʻi he vahaʻa taimi ko ení. (Loma 16:20; 2 Pita 3:8) Kae kehe, ʻi hono fai ha vakai loloto ange ki he kikité ni, pea tautefito ki he Mātiu 24:​29-31, ʻokú ne fakahā ʻa e fakamatala kehe. ʻOku fakahaaʻi ʻe he meʻá ni ko e maamá “oku ajili be ene ulo o aʻu ki he haohaoa oe aho.” (Palōvepi 4:​18, PM)b ʻAi ke tau fakakaukau atu ki he ʻuhinga ʻoku feʻunga mālie ai ʻa e fakamatala foʻoú ni pe fakamatala kuo liliú.

 9. Ko e hā ʻa e fakamatala ʻi he Konga Tohi Tapu faka-Hepeluú ʻoku meimei tatau mo e ngaahi lea ʻa Sīsū ʻo kau ki he ngaahi meʻa ʻe hoko ʻi he langí?

⁹ Naʻe fakahā ʻe Sīsū ki he toko fā ʻo ʻene kau ʻaposetoló ʻa e kikite ʻo kau ki he ‘fakapoʻuli ʻa e laʻaá, ko hono tuku ʻe he māhiná ʻene huhulú, pea mo e ngangana ʻa e ngaahi fetuʻú.’ ʻI honau tuʻunga ko e kau Siú, naʻa nau ʻiloʻi ko e faʻahinga lea pehē ʻoku ʻi he Konga Tohi Tapu faka-Hepeluú, ʻo hangē ko Sēfanaia 1:15 (PM), ʻa ia ʻoku ui ai ʻa e taimi fakamaau ʻa e ʻOtuá “koe aho oe maveuveu, moe fakaauha, koe aho oe bouli, moe fakaboubouli, koe aho oe gaahi ao, moe bouli matolu.” Naʻe toe fakamatalaʻi ʻe he kau palōfita Hepelū kehekehe ʻa e fakapoʻuli ʻa e laʻaá, ʻikai ke huhulu ʻa e māhiná, pea mo e ʻikai ke fakahoko mai ʻe he ngaahi fetuʻú ʻa e maamá. ʻE lava ke ke maʻu ʻa e ngaahi lea peheé ʻi he ngaahi pōpoaki mei he ʻOtuá ki Pāpilone, ʻĪtomi, ʻIsipite pea mo e puleʻanga ko ʻIsileli ʻi he tokelaú.​—ʻAisea 13:​9, 10; 34:​4, 5; Selemaia 4:28; ʻIsikeli 32:​2, 6-8; ʻĒmosi 5:20; 8:​2, 9.

10, 11. (a) Ko e hā ʻa e meʻa naʻe kikiteʻi ʻe Sioeli ʻo kau ki he ngaahi meʻa ʻi langí? (e) Ko e hā ʻa e ngaahi tafaʻaki ʻo e kikite ʻa Sioelí naʻe fakahoko ʻi he 33 T.S., pea ko e hā ʻa e ngaahi tafaʻaki naʻe ʻikai ke fakahoko ai?

¹⁰ ʻI he fanongo ʻa Pita mo e toko tolu kehé ki he meʻa naʻe leaʻaki ʻe Sīsuú, naʻa nau manatuʻi nai ʻa e kikite ʻa Sioeli ʻi he Sioeli 2:​28-31 mo e 3:15: “Te u lilingi hoku Laumalie ki he kakano kotoa; pea ʻe fai palofisai ʻe homou ngaahi foha mo homou ngaahi ʻofefine, . . . Pea te u ʻai ʻa e ngaahi meʻa fakaofo ʻi he langi pea ʻi mamani, ko e toto, mo e afi, mo e ngaahi pou kohu. ʻE liliu ʻa e laʻa ʻo poʻuli, mo e mahina ʻo toto, ʻi he tei hoko ʻa e ʻAho ʻo Sihova, ʻa e ʻaho lahi mo fakalilifu.” “Kuo fakapoʻuli ʻa e laʻa mo e mahina, pea kuo tuku ʻe he ngaahi fetuʻu ʻenau ulo.”

¹¹ ʻOku hangē ko ia ʻoku fakamatalaʻi ʻi he Ngāue 2:​1-4 mo e 14-21, ʻi he Penitekosi 33 T.S., naʻe lilingi hifo ai ʻe he ʻOtuá ʻa e laumālie māʻoniʻoní ki he kau ākonga ʻe toko 120, ko e kau tangata mo e kau fefine fakatouʻosi. Naʻe ʻai ai ʻe he ʻaposetolo ko Pitá ke ʻilo ai ko e meʻa eni naʻe kikiteʻi ʻe Sioelí. Kae fēfē ʻa e ngaahi lea ʻa Sioeli ʻo fekauʻaki mo e ‘liliu ʻa e laʻā ʻo poʻuli, mo e māhiná ʻo toto mo hono tuku ʻe he ngaahi fetuʻú ʻenau uló’? ʻOku ʻikai ha meʻa ke ne fakahā naʻe fakahoko ʻa e meʻá ni ʻi he 33 T.S. pe ʻi he lolotonga ʻo e vahaʻa taimi ko e taʻu ʻe 30 tupu ʻo e fakaʻosiʻosi ʻo e fokotuʻutuʻu faka-Siú.

12, 13. ʻI he founga fē naʻe fakahoko ai ʻa e ngaahi meʻa taha kehe atu ʻoku hā ʻi he langí ʻa ia naʻe kikiteʻi ʻe Sioelí?

¹² ʻOku hā mahino naʻe fekauʻaki lahi ange ʻa e konga ki mui ko ia ʻo e kikite ʻa Sioelí ki he “hoko ʻa e ʻAho ʻo Sihova, ʻa e ʻaho lahi mo fakalilifu”—ko e fakaʻauha ʻo Selūsalemá. Naʻe pehē ʻe he The Watchtower ʻo Nōvema 15, 1966, ʻo kau ki he mamahi naʻe hoko ki Selūsalema ʻi he 70 T.S.: “ʻOku pau naʻe hoko ia ko e ‘ʻaho ʻo Sihová’ ʻi he meʻa fekauʻaki mo Selūsalema mo ʻene fānaú. Pea ʻi he fekauʻaki mo e ʻaho ko iá naʻe lahi ʻa e “toto, mo e afi, mo e ngaahi pou kohu,” ʻo ʻikai ke fakamāmaʻi ʻe he laʻaá ʻa e poʻuli ʻo e koló he lolotonga ʻa e ʻahó, pea ʻi he fekauʻaki mo e māhiná ʻoku fakahoko mai ai ki he fakakaukaú ʻa e toto naʻe lilingí, kae ʻikai ko e maama fakamelino ʻi he poʻulí.”c

¹³ ʻIo, hangē ko e ngaahi kikite kehe naʻa tau fakatokangaʻí, naʻe fakahoko ʻa e ngaahi meʻa taha kehe atu ʻoku hā ʻi he langí ʻa ia naʻe kikiteʻi ʻe Sioelí ʻi hono fakahoko ʻe Sihova ʻa e fakamaaú. Ko e fakapoʻuli ʻa e laʻaá, māhiná mo e ngaahi fetuʻú naʻe hoko ia ʻi he haʻu ʻa e kau fakahoko fakaʻauhá ki Selūsalemá, ka naʻe ʻikai ke hoko ia ʻi he vahaʻa taimi fakakātoa ʻo e fakaʻosiʻosi ʻo e fokotuʻutuʻu faka-Siú. Ko ia ai, ko e fakakaukau lelei ke tau ʻamanekina ʻe ʻi ai ha fakahoko lahi ange ʻo e konga ko eni ʻo e kikite ʻa Sioelí ʻi he taimi ʻe kamata ke hoko ai ʻa hono fakaʻauha ʻe he ʻOtuá ʻa e ngaahi meʻa ʻo e fokotuʻutuʻu lolotonga ní.

Ko e Mamahi Fē Ki Muʻa pea Hoko ʻa e Ngaahi Meʻa Taha Kehe Atu ʻOku Hā ʻi he Langí?

14, 15. Ko e hā ʻa e kaunga ʻo e kikite ʻa Sioelí ki heʻetau mahino ʻo kau ki he Mātiu 24:29?

¹⁴ Ko hono fakahoko ʻa e kikite ʻa Sioelí (ʻo fetāiaki mo e ngaahi kikite kehe ʻoku nau ngāueʻaki ʻa e ngaahi lea meimei tataú) ʻokú ne tokoniʻi kitautolu ke maʻu ʻa e mahino ki he ngaahi lea ʻi he Mātiu 24:29. ʻOku hā mahino, ko e meʻa naʻe leaʻaki ʻe Sīsū ʻo kau ki he ‘fakapoʻuli ʻa e laʻaá, ko hono tuku ʻe he māhiná ʻene huhulú, pea mo e ngangana ʻa e ngaahi fetuʻú’ ʻoku ʻikai ko ʻene lave ki he ngaahi meʻa ʻo hangē ko e ngaahi lōketi ʻalu vavaá, ko e tau ʻa e lōketí ki he māhiná mo e ngaahi alā meʻa pehē, ʻa ia kuo hoko ʻi he laui hongofuluʻi taʻu ʻi he fakaʻosiʻosi ʻo e tuʻu lolotonga ní. ʻIkai. Naʻe lave ʻa Sīsū ki he ngaahi meʻa ʻoku fekauʻaki mo e “ʻAho ʻo Sihova, ʻa e ʻaho lahi mo fakalilifu,” ʻa e fakaʻauha ʻoku toe ke hoko maí.

¹⁵ ʻOku kaunga ʻa e meʻá ni ki heʻetau maʻu ʻa e mahino ʻo kau ki he anga ʻo e hoko ʻa e ngaahi meʻa taha kehe atu ʻoku hā ʻi he langí ʻi he “hili leva ʻa e mamahi.” (Fakaʻītali ʻamautolu.) Naʻe ʻikai ko e lave eni ʻa Sīsuú ki he mamahi naʻe tumutumuʻaki ʻi he 70 T.S. Ka, ko ʻene lave ki he kamata ʻo e mamahi lahi ʻe tofanga ai ʻa e fokotuʻutuʻu fakamāmani ʻi he kahaʻu mamaʻo mei he taimi ko iá, ko e mamahi ia ʻe tumutumuʻaki ʻa ʻene “ʻi ai” naʻe talaʻofá. (Mātiu 24:3, NW) ʻOku kei toka mei muʻa ʻa e mamahi ko iá.

16. Ko e mamahi fē naʻe lave ki ai ʻa e Maʻake 13:​24, pea ko e hā ʻoku pehē aí?

¹⁶ Kae fēfē ʻa e ngaahi lea ʻi he Maʻake 13:24: “Ka ʻi he taimi ko ia, hili ʻa e mamahi ko ia, ʻe fakapoʻuli ʻa e laʻā, pea ʻe tuku ʻe he māhina ʻene huhulu”? ʻI he veesí ni, ko e foʻi lea “ko ia” ʻokú ne liliu lea ʻa e foʻi lea faka-Kalisi ko e e·keiʹnos, ko e fetonginauna ʻokú ne fakahā ha meʻa ʻoku ʻi he kahaʻu mamaʻo ʻaupito mei he taimi ko iá. ʻE lava ke ngāueʻaki ʻa e e·keiʹnos ʻo kau ki ha meʻa naʻe hoko ʻi he kuo hili fuoloá (pe ko ha meʻa naʻe lave ki ai ki muʻa) pe ngāueʻaki ia ʻo kau ki ha meʻa ʻi he kahaʻu mamaʻo atú. (Mātiu 3:1; 7:22; 10:19; 24:38; Maʻake 13:​11, 17, 32; 14:25; Luke 10:12; 2 Tesalonaika 1:​10) Ko ia ai, ʻi he lave ʻi he Maʻake 13:24 ki he “mamahi ko ia,” naʻe ʻikai ko e lave ki he mamahi naʻe langaʻi ʻe he kau Lomá, ka ko e lave ki he ngāue māfimafi ʻa Sihová ʻi he ngataʻanga ʻo e fokotuʻutuʻu lolotonga ní. (Fakaʻītali ʻamautolu.)

17, 18. Ko e hā ʻa e fakamaama ʻoku maʻu mei he Fakahaá ʻo kau ki he fakahokohoko ʻo e mamahi lahí?

¹⁷ ʻOku feʻunga mālie mo fakamoʻoniʻi ʻe he Fkh vahe 17 ki he 19 ʻi he tohi Fakahaá ʻa e mahino ko eni kuo fakatonutonu fekauʻaki mo e Mātiu 24:​29-31, Maʻake 13:​24-27, mo e Luke 21:​25-28. ʻI he founga fē? ʻOku fakahaaʻi ʻe he ngaahi Kōsipelí ʻe ʻikai ke kamata pē pea ngata leva ʻa e mamahi ko ení. ʻI he hili ʻa e kamata ʻa e mamahi lahí, ʻe kei moʻui ha niʻihi talangataʻa ʻi he faʻahinga ʻo e tangatá ke nau sio ki he “fakaʻilonga ʻo e Fanautama ʻa Tangata” pea fai ha meʻa, ʻa ia ko e lauʻaitu, pea hangē ko ia ʻoku fakahā ʻi he Luke 21:​26, “ʻe to ʻa e mănava ʻo e kakai ko ʻenau ilifia, mo e fakatuʻatāmaki ki he ngaahi meʻa ʻoku hoko hifo ki māmani.” ʻE hoko ʻa e ilifia fuʻu hulu ko iá ko e tupu mei heʻenau sio ki he “fakaʻilonga” ʻa ia ʻokú ne fakahā ʻoku tuʻutuʻunuku mai honau fakaʻauhá.

¹⁸ ʻOku fakahā ʻe he fakamatala ʻi he tohi Fakahaá ʻe kamata ʻa e mamahi lahi ʻi he kahaʻú ʻi hono ʻohofi ʻe he ngaahi “nifo” fakakautau ʻo e “manu fekai” fakavahaʻa-puleʻangá ʻa e “fuʻu feʻauaki”, ko Pāpilone ko e Lahí.d (Fakahā 17:​1, 10-16) Ka ʻe kei ʻi ai ʻa e kakai tokolahi, koeʻuhi ʻe tangi ʻa e ngaahi tuʻi, kau mesianiti, kau ʻeikivaka mo e niʻihi kehe ʻi hono fakangata ʻa e lotu loí. ʻOku ʻikai ha toe veiveiua ʻe ʻilo ʻe he tokolahi ko e meʻa hono hokó ko hono fakamāuʻi kinautolu.​—Fakahā 18:​9-19.

Ko e Hā ʻa e Meʻa ʻOku Teu ke Hokó?

19. Ko e hā ʻa e meʻa ʻe lava ke tau ʻamanekina ʻe hoko ʻi he kamata ʻa e mamahi lahí?

¹⁹ Ko e fakamatala ʻi he ngaahi Kōsipeli ʻa Mātiu, Maʻake mo Luké fakataha mo e fakamatala ʻi he Fakahā vahe 17 ki he 19 ʻoku nau fakahā ha fakamaama lahi ʻo kau ki he meʻa ʻe vavé ni ke hokó. ʻI he taimi kuo kotofa ʻe he ʻOtuá, ʻe kamata ʻaki ʻa e mamahi lahí ʻa e ʻohofi ʻe fai ki he ʻemipaea ʻo e lotu loi ʻi māmani lahí (ko Pāpilone ko e Lahí). ʻE tautefito ʻa e mālohi ange ʻa e ʻohofí ki he Puleʻanga-Haʻa-Kalisitiané, ʻa ia ʻoku fehoanaki ia mo Selūsalema taʻe anga-tonú. ʻI he “hili leva” ʻa e konga ko eni ʻo e mamahí, “ʻe ai ha ngaahi fakaʻilonga ʻi he laʻa, mo e māhina, mo e ngaahi fetuʻu; pea ʻi māmani ʻe mamahi [teʻeki ke ʻi ai hano tatau] ʻa e ngaahi kakai.”​—Mātiu 24:29; Luke 21:25.

20. Ko e hā ʻa e ngaahi meʻa taha kehe atu ʻoku hā ʻi he langí ʻe lava ke tau ʻamanekina ʻe hoko?

²⁰ ʻI he ʻuhinga fē ʻe ‘fakapoʻuli ʻa e laʻaá, ʻe tuku ʻe he māhiná ʻene huhulú, ʻe ngangana ʻa e ngaahi fetuʻú mei he langí, pea ʻe ngatōtō ʻa e ngaahi mālohinga ʻo e ngaahi langí’? ʻOku ʻikai ha toe veiveiua, ʻi he konga ki muʻa ʻo e mamahi lahí, ko e ngaahi maamaʻanga lahí​—ko e kau faifekau tuʻu-ki-muʻa ʻo e māmani fakalotú—ʻe fakaeʻa ʻenau koví pea ʻe fakaʻauha kinautolu ʻe he “nifo ʻe hongofulu” ʻoku lave ki ai ʻi he Fakahā 17:16. ʻE ngatōtō foki nai ʻa e kau maʻu mafai fakapolitikalé. ʻE toe hoko nai ha ngaahi meʻa fakailifia ʻi he ngaahi langi moʻoní? ʻOku ngalingali ʻe hoko ha meʻa pehē, pea ʻe fakamanavahē lahi ange ia ʻi he ngaahi meʻa naʻe fakamatalaʻi ʻe Siosefusi naʻe hoko ʻi he ofi ki he ngataʻanga ʻo e fokotuʻutuʻu faka-Siú. ʻOku tau ʻilo lelei, ʻi he kuonga muʻá naʻe fakahāhā ʻe he ʻOtuá ʻa hono mālohí ʻo ne ʻai ke hoko ʻa e ngaahi meʻa fakatupu ʻauha peheé, pea ʻe toe lava ke ne fai pehē foki.​—ʻEkisoto 10:​21-23; Siōsiua 10:​12-14; Fakamaau 5:20; Luke 23:​44, 45.

21. ʻI he founga fē ʻe hoko ai ha “fakaʻilonga” ʻi he kahaʻú?

²¹ ʻOku ngāueʻaki leva ʻe he kau tohi Kōsipeli ʻe toko tolú kātoa ʻa e foʻi lea toʹte (toki) ke nau fakahoko mai ʻa e meʻa hono hokó. “Pea ʻe toki ha ʻi he langi ʻa e fakaʻilonga ʻo e Fanautama ʻa Tangata.” (Mātiu 24:​30, fakaʻītali ʻamautolu; Maʻake 13:26; Luke 21:27) Talu mei he Tau I ʻa Māmaní, kuo fakatokangaʻi ʻe he kau ākonga moʻoni ʻa Sīsuú ʻa e fakaʻilonga faʻu fetuiaki ʻo ʻene ʻi ai taʻe hā maí, ka kuo ʻikai ke fakatokangaʻi ia ʻe he kakai tokolahi tahá. Ka ʻoku lave ʻi he Mātiu 24:30 ki he hā mai ʻa ha toe “fakaʻilonga” ʻe taha ʻi he kahaʻú, ko e fakaʻilonga ʻo e “Fanautama ʻa Tangata,” pea ʻe fakamālohiʻi ʻa e ngaahi puleʻangá kotoa ke nau fakatokangaʻi ʻa e fakaʻilonga ko iá. ʻI he hoko mai ʻa Sīsū mo e ngaahi ʻaó, ʻa ia ko e tuʻunga taʻe hā mai, ko e kakai ʻi māmani lahi ʻoku nau fakafepakí ʻe fie maʻu ke nau ʻiloʻi ʻa e “hoko mai” (faka-Kalisi, er·khoʹme·non) ko iá koeʻuhi ko e fakahāhā mahulu hake ia ʻi he ivi totonu ʻo natulá ʻo ʻene mālohi fakatuʻí.​—Fakahā 1:7.

22. Ko e hā ʻa e meʻa ʻe hokó tupu mei hono mātā “ʻa e fakaʻilonga” ʻoku lave ki ai ʻi he Mātiu 24:30?

²² ʻOku toe ngāueʻaki ʻe he Mātiu 24:30 ʻa e foʻi lea ko e toʹte ke fakahā ʻa e meʻa hono hokó. ʻE toki lauʻaitu ʻa e ngaahi puleʻangá, ʻi heʻenau ʻiloʻi ʻa e ikuʻanga ʻo e tuʻunga ʻoku nau ʻi aí, ʻo nau ʻiloʻi nai ʻoku ofi ʻaupito ʻa honau fakaʻauhá. Ko e faikehekehe lahi ē mo e meʻa ʻe hoko ki he kau sevāniti ʻa e ʻOtuá, he ʻe lava ke tau hiki hake hotau ʻulú, ʻo tau ʻiloʻi ʻoku ofi ai hotau huhuʻí! (Luke 21:28) ʻOku toe lave ʻa e Fakahā 19:​1-6 ki he fiefia ʻa e kau lotu moʻoni ʻi hēvaní mo e māmaní ʻi hono fakangata ʻa e fuʻu feʻauakí.

23. (a) Ko e hā ʻa e meʻa ʻe fai ʻe Sīsū ʻo fekauʻaki mo e kakai filí? (e) Ko e hā ʻe lava ke tau leaʻaki ʻo kau ki hono ʻave ʻa e toenga ʻo e kau paní ki hēvaní?

²³ ʻOku hokohoko atu ʻa e kikite ʻa Sīsuú ʻo ne pehē ʻi he Maʻake 13:27: “Pea te ne toki [toʹte] fekau atu ʻene kau angelo, pea te nau tānaki ʻa e kakai fili mei he matangi ʻe fa, mei he ngataʻanga ʻo māmani ʻo aʻu ki he ngataʻanga ʻo e langi.” ʻOku fakahanga heni ʻe Sīsū ʻa e tokangá ki he toenga ʻo e “kakai fili” ʻe toko 144,000 ʻoku kei moʻui ʻi he māmaní. ʻI he konga ki muʻa ʻo e fakaʻosiʻosi ʻo e ngaahi meʻa ʻo e fokotuʻutuʻu ko ení, naʻe fakafāʻūtaha fakateokalati ʻa e kau ākonga ko eni ʻa Sīsuú kuo paní. Kae kehe, fakatatau ki he fakahokohoko ʻoku hā aí, ʻoku fakamatalaʻi ʻi he Maʻake 13:27 mo e Mātiu 24:31 ha toe meʻa kehe. ʻE “ifi ʻa e talupite lahi” pea ʻe tānaki ʻa e toenga ʻo e “kakai fili” mei he tapa kotoa pē ʻo māmaní. ʻE tānaki fēfē kinautolu? ʻOku ʻikai ha toe veiveiua, ʻe “silaʻi” mo fakahā mahino ʻe Sihova ʻa kinautolu ko e konga ʻo e “kakai kuo ui mo fili mo lototō.” Pea ʻi he taimi kuo kotofa ʻe he ʻOtuá, ʻe fakatahaʻi kinautolu ki hēvani ke hoko ko e ngaahi tuʻi mo e kau taulaʻeiki.e ʻE fakahoko ʻe he meʻá ni ʻa e fiefia kiate kinautolu pea mo honau takanga anga-tonú, ko e “fuʻu kakai lahi,” ʻa ia ʻe toe fakaʻilongaʻi ʻa kinautolu, kae malava ke nau “haʻu mei he mamahi lahi” pea maʻu ʻa e ngaahi tāpuaki ʻi he māmani ko e palataisi.​—Mātiu 24:22; Fakahā 7:​3, 4, 9-17; 17:​14; 20:6; ʻIsikeli 9:​4, 6.

24. Ko e hā ʻa e fakahokohoko ʻo e ngaahi meʻa ʻe hokó ʻoku hā ʻi he Mātiu 24:​29-31?

²⁴ ʻI he pehē ʻe he kau ʻaposetoló, “Tala mai . . . ,” naʻe kau ki he tali naʻe fai ʻe Sīsuú ha meʻa lahi ange ia ʻi heʻenau malava ke makupusí. Ka, ʻi he lotolotonga ʻo ʻenau moʻuí, naʻa nau fiefia ke sio ki he ʻuluaki fakahoko ʻo ʻene kikité. Kuo fakahanga ʻa ʻetau ako ki he tali naʻe fai ʻe Sīsuú ki he konga ʻo ʻene kikité ʻe fakahoko ʻi he kahaʻu vavé ni maí. (Mātiu 24:​29-31; Maʻake 13:​24-27; Luke 21:​25-28) ʻOku tau ʻosi sio he taimí ni ʻoku ofí ni mai ʻa hotau huhuʻí. ʻE lava ke tau fakatuʻamelie atu ki he kamata ʻo e mamahi lahí, pea ʻe toki hoko ʻa e fakaʻilonga ʻo e Fanautama ʻa tangatá, pea ʻe toki tānaki ʻe he ʻOtuá ʻa e kakai filí. Ko hono fakaʻosí, ko hotau Tuʻi mo Toko Taha Taú, ko Sīsū kuo fakanofo ke tuʻí, te ne “ikuna” ʻi he tuʻunga ko e Toko Taha Tāmate ʻa Sihova ʻi ʻĀmaketoné. (Fakahā 6:2) Ko e ʻaho ko ia ʻo Sihová, ʻa e taimi te ne fai sauni aí, ʻe hoko ia ko e konga fakaʻosi molumalu ʻo e fakaʻosiʻosi ʻo e ngaahi meʻa ʻoku tuʻu ní, ʻa ia kuó ne fakaʻilongaʻi ʻa e ʻaho ʻo e ʻEiki ko Sīsuú talu mei he 1914 ʻo faai mai.

25. ʻE lava fēfē ke tau kau ʻi hono fakahoko ʻi he kahaʻú ʻo e Luke 21:28?

²⁵ ʻOfa ke ke hokohoko atu ʻa hoʻo maʻu ʻa e ʻaonga mei he ngaahi meʻa ʻoku akoʻi mei he ʻOtuá, kae malava ke ke fai ha meʻa ʻi he fekauʻaki mo hono fakahoko ʻi he kahaʻú ʻo e ngaahi lea ʻa Sīsuú: “Pea ʻi he kamata hoko ʻa e ngaahi meʻa ko ia, mou hiki homou ʻulu, ʻo hanga hake; he ʻoku ofi ai homou huhuʻi.” (Luke 21:28) Ko ha kahaʻu lelei ē ʻoku toka mei muʻá na ki he kakai filí mo e fuʻu kakai lahí ʻi hono fakamāʻoniʻoniʻi ʻe Sihova ʻa hono huafa toputapú!

[Fakamatala ʻi lalo]

ʻOkú Ke Manatuʻi?

◻ ʻI he founga fē naʻe fakahoko ai ʻi he ʻuluaki senitulí ʻa e ngaahi tafaʻaki ʻe niʻihi ʻo e Sioeli 2:​28-31 pea mo e 3:15?

◻ Ko e hā ʻa e mamahi ʻoku lave ki ai ʻi he Mātiu 24:​29, pea ko e hā ʻoku tau fakaʻosi ʻaki ai ʻo tali pehē?

◻ Ko e hā ʻa e ngaahi meʻa taha kehe atu ʻoku hā ʻi he langí ʻoku lave ki ai ʻi he Mātiu 24:​29, pea ʻi he founga fē ʻoku malava ai ke hoko ʻa e meʻá ni ʻi he hili leva ʻa e mamahí?

◻ ʻI he founga fē ʻe fakahoko ai ʻa e Luke 21:​26, 28 ʻi he kahaʻú?

[Fakatātā ʻi he peesi 28, 29]

Feituʻu ʻo e temipalé

[Maʻuʻanga ʻo e Tā]

Pictorial Archive (Near Eastern History) Est.