Ko e Kai Efiafi ʻa e ʻEikí​—Ko e Tuʻo Fiha ʻOku Totonu ke Fakamanatu Ai?

KO E Kilisimasí, ko e Toe Tuʻú, mo e ngaahi ʻaho ʻo e “kau sangato.” Kuo fakamanatu ʻe he ngaahi siasi ʻo Puleʻanga-Haʻa-Kalisitiané ʻa e ngaahi ʻaho mālōlō fakalotu lahi mo e ngaahi kātoanga. Ka ʻokú ke ʻilo pe ko e ngaahi fakamanatu nai ʻe fiha naʻe tuʻutuʻuni ʻe Sīsū Kalaisi ki hono kau muimuí ke nau tauhí? Ko e tali ki aí, Ko e taha pē! Naʻe ʻikai fakamafaiʻi ʻe he Toko Taha naʻá ne fokotuʻu ʻa e Lotu faka-Kalisitiané ʻa e ngaahi kātoanga kehé.

Kapau naʻe fokotuʻu ʻe Sīsū ha kātoanga ʻe taha pē, ʻoku mahino ʻoku fuʻu mahuʻinga ʻaupito ia. ʻOku totonu ke tauhi ia ʻe he kau Kalisitiané ʻi he founga tatau tofu pē mo ia naʻe tuʻutuʻuni ʻe Sīsuú. Ko e hā ʻa e meʻa taʻe hano tatau ko ʻeni ke tauhí?

Ko e Kātoanga Pē ʻe Taha

Naʻe kamata ʻa e ouau ko ʻení ʻe Sīsū ʻi he ʻaho naʻá ne pekia aí. Naʻá ne fakamanatu mo ʻene kau ʻaposetoló ʻa e kātoanga ʻa e kau Siú ko e Laka-atu. Pea naʻá ne ʻoatu ʻa e mā taʻe lēvani ʻo e Laka-atú kiate kinautolu, ʻo ne pehē: “Ko hoku sino ʻeni, ʻa ia ʻoku foaki koeʻuhi ko kimoutolu.” Peá ne hoko atu, ʻo ʻoatu ʻe Sīsū ha ipu uaine, ʻo ne pehē: “Ko e ipu ni ko e fuakava foʻou ia ʻoku faiʻaki hoku toto, ʻa ia ʻoku lilingi koeʻuhi ko kimoutolu.” Naʻá ne toe pehē foki: “Mou fai pehe mōku fakamanatu.” (Luke 22:​19, 20; 1 Kolinitō 11:​24-26) Ko e ouau ko ʻení ʻoku ui ia ko e Kai Efiafi ʻa e ʻEikí, pe ko e Fakamanatu. Ko e meʻa pē ʻeni ʻe taha naʻe tuʻutuʻuni ʻe Sīsū ki hono kau muimuí ke nau tauhí.

ʻOku taukaveʻi ʻe he ngaahi siasi lahi ʻoku nau fai ʻeni fakataha mo ʻenau ngaahi kātoanga kehe kotoa pē, ka ko e lahi taha ʻo e ngaahi siasí ʻoku nau fakamanatu ia ʻo kehekehe mei he founga naʻe tuʻutuʻuni ʻe Sīsuú. Mahalo ko e faikehekehe lahi taha ʻoku taau ke tokangaʻí ko e lahi ʻo hono fai ʻo e kātoanga ko ení. ʻOku fai ia ʻe he ngaahi siasi ʻe niʻihi ʻo fakamāhina, fakauike, pea naʻa mo e fakaʻaho pē. Ko e taumuʻa ʻeni ʻa Sīsuú ʻi heʻene tala ange ki hono kau muimuí: “Mou fai pehe mōku fakamanatu”? ʻOku pehē ʻi he The New English Bible: “Fai ʻeni ko ha fakamanatu kiate au.” (1 Kolinitō 11:​24, 25) ʻOku fai tuʻo fiha ha fakamanatu pe ha ʻaho fakamanatu? ʻOku faʻa tuʻo taha pē ʻi he taʻu.

Manatuʻi foki, naʻe kamata ʻe Sīsū ʻa e ouau ko ʻení peá ne pekia ʻi he ʻaho 14 ʻo Nīsaní ʻo fakatatau ki he tohi māhina ʻa e kau Siú.a Ko e ʻaho ia ʻo e Laka-atú, ko ha kātoanga naʻe fakamanatu ai ki he kau Siú ʻa e fuʻu fakahaofi lahi naʻa nau hokosia ʻi ʻIsipite ʻi he senituli hono 16 K.M. ʻI he taimi ko iá, ko e feilaulau ʻaki ʻo ha lami naʻe iku ki he fakamoʻui ai ʻa e ʻuluaki fānau ʻa e kau Siú, kae tāmateʻi ʻe he ʻangelo ʻa Sihová ʻa e ʻuluaki fānau kotoa pē ʻa e kau ʻIsipité.​—ʻEkisoto 12:​21, 24-27.

ʻOku lava fēfē ke tokoni ʻa e meʻa ko ʻení ke tau maʻu ai ʻa e mahinó? Naʻe tohi ʻe he ʻaposetolo Kalisitiane ko Paulá: “He kuo feia foki hotau pasova [“Laka-atu,” NW], ko Kalaisi.” (1 Kolinitō 5:7) Ko e pekia ʻa Sīsuú ko e feilaulau ʻo e Laka-atu lahi ange, ʻo fakaʻatā ai ki he kakaí ʻa e faingamālie ki ha fakamoʻui ʻoku lahi ange ia. Ko ia ai, ki he kau Kalisitiané, ko e Fakamanatu ʻo e pekia ʻa Kalaisí kuó ne fetongi ʻe ia ʻa e Laka-atu ʻa e kau Siú.​—Sione 3:16.

Ko e Laka-atú ko e meʻa naʻe fai fakataʻu pē ia. Ko ia, ʻoku ʻuhinga totonu ʻa hono fai fakataʻu pē mo e Fakamanatú. Ko e Laka-atú​—ko e ʻaho ia naʻe pekia ai ʻa Sīsuú​—naʻe hoko maʻu ai pē ia ʻi he ʻaho hono 14 ʻo e māhina ʻa e kau Siú ko Nīsani. Ko ia, ʻoku totonu ke fakamanatu ʻa e pekia ʻa Kalaisí ʻo tuʻo taha pē ia ʻi he taʻu pea fai ia ʻi he ʻaho ʻi he tohi māhiná ʻoku fehoanaki mālie mo Nīsani 14. ʻI he 1995 ko e ʻaho ko iá ko e ʻaho Falaite, ʻo ʻEpeleli 14, ʻi he ʻosi ʻa e tō ʻa e laʻaá. Ka, ko e hā ʻoku ʻikai ke ʻai ai ʻeni ʻe he ngaahi siasi ʻo Puleʻanga-Haʻa-Kalisitiané ko ha ʻaho ke tauhi makehe? Ko ha vakai fuonounou ki he hisitōliá te ne tali ʻa e fehuʻi ko iá.

Naʻe ʻi he Tuʻunga Fakatuʻutāmaki ʻa e Angafai ʻa e Kau ʻAposetoló

ʻOku ʻikai ha toe veiveiua, ʻi he lolotonga ʻo e ʻuluaki senituli T.S., ko kinautolu naʻe tataki ʻe he kau ʻaposetolo ʻa Sīsuú naʻa nau kātoangaʻi ʻa e Kai Efiafi ʻa e ʻEikí ʻo tatau tofu pē mo ia naʻe tuʻutuʻuni ʻe Sīsuú. Kae kehe, ʻi he lolotonga ʻa e senituli hono uá, naʻe kamata ʻa e niʻihi ia ke liliu ʻa e taimi ki hono fakamanatú. Naʻa nau fai ʻa e Fakamanatú ʻi he ʻuluaki ʻaho ʻo e uike (kuo ui ʻi he taimí ni ko e ʻaho Sāpaté), kae ʻikai ko e ʻaho ʻoku fehoanaki mālie mo Nīsani 14. Ko e hā naʻe fai ai ʻa e meʻa ko iá?

Naʻe kamata ʻa e lau ʻaho ʻa e kau Siú ʻo fakafuofua ki he ono efiafí ʻo lele mei ai kae ʻoua ke aʻu ki he taimi tatau pē ʻi he ʻaho hono hoko maí. Naʻe pekia ʻa Sīsū ʻi Nīsani 14, ʻo e 33 T.S., ʻa ia naʻe kamata ia mei he efiafi Tuʻapulelulu ʻo aʻu ki he efiafi Falaite. Naʻe toe fokotuʻu ia mei he maté ʻi he ʻaho hono tolú, ko e pongipongia ia ʻi he pongipongi Sāpaté. Naʻe loto ʻa e niʻihi ia ke fakamanatu ʻa e pekia ʻa Sīsuú ʻi ha ʻaho pau ʻo e uiké ʻi he taʻu taki taha, kae ʻikai ko e ʻaho ko ia naʻe fehoanaki mālie mo Nīsani 14. Naʻa nau toe maʻu foki ʻa e anga ʻo e fakakaukau ʻoku mahuʻinga lahi ange ʻa e ʻaho ʻo e toe tuʻu ʻa Sīsuú ʻi he ʻaho ʻo ʻene pekiá. Ko ia, naʻa nau fili ai ʻa e ʻaho Sāpaté.

Naʻe fekau ʻe Sīsū ia ke fakamanatu ʻa ʻene pekiá, kae ʻikai ko ʻene toe tuʻu mei he maté. Pea koeʻuhi ko e Laka-atu ʻa e kau Siú ʻoku hoko ia ʻi he ʻaho kehekehe ʻi he taʻu taki taha ʻo fakatatau ki he tohi māhina ʻa Kelekolió ʻa ia ʻoku tau ngāueʻakí, ʻoku totonu ke pehē pē mo e Fakamanatú. Ko ia ko e tokolahi naʻa nau fai pē ki he ʻuluaki fokotuʻutuʻú mo tauhi pē ʻa e Kai Efiafi ʻa e ʻEikí ʻi Nīsani 14 ʻi he taʻu taki taha. ʻI he faai mai pē ʻa e taimí naʻe ui ai kinautolu ko e Quartodecimans, ʻoku ʻuhinga ki he “faʻahinga ʻoku muimui ki he ʻaho taha faá.”

Naʻe fakatokangaʻi ʻe he kau poto mataotao ia ʻe niʻihi ko e “faʻahinga ʻoku muimui ki he ʻaho taha faá” naʻa nau muimui kinautolu ia ki he muʻaki sīpinga ʻa e kau ʻaposetoló. Naʻe pehē ʻe ha toko taha tohi-hisitōlia ʻe taha: “ʻI he fekauʻaki mo e ʻaho ke fai ai ʻa e Pasikaá [ʻa ia ko e Kai Efiafi ʻa e ʻEikí], naʻe tatau hono tauhi ʻe he ngaahi siasi ʻo e faʻahinga ʻoku muimui ki he ʻaho taha faá ʻi ʻĒsia Minú pea mo ia naʻe fai ʻi he siasi ʻi Selūsalemá. ʻI he senituli hono uá naʻe fai ʻe he ngaahi siasi ko ʻení ʻi he Pasikaá ʻi he ʻaho 14 ʻo Nīsaní ʻa ʻenau fakamanatu ʻa e huhuʻi naʻe fakahoko mai ʻi he pekia ʻa Kalaisí.”​—Studia Patristica, Voliume V, 1962, peesi 8.

Tupu Hake ha Fakakikihi

Neongo naʻe muimui ʻa e tokolahi ia ʻi ʻĒsia Minu ʻi he meʻa naʻe fai ʻe he kau ʻaposetoló, naʻe vaheʻi ʻa e ʻaho Sāpaté ia ʻi Loma ke fai ai ʻa e ouau fakamanatú. Fakafuofua ki he taʻu 155 T.S., ko ha fakafofonga ʻo e ngaahi fakatahaʻanga ʻi ʻĒsia Minú, ko Polikapi mei Simaná, naʻá ne ʻaʻahi ki Loma ke fai ha fetalanoaʻaki ki he meʻa ko ʻení mo e ngaahi palōpalema kehe. Ko e meʻa pango ia, he naʻe ʻikai ke ʻi ai ha felotoi ki he meʻa ko ʻení.

Naʻe tohi ʻe ʻIleneusi mei Lyons ʻi heʻene tohi ʻo pehē: “Naʻe ʻikai ke lava ʻe ʻAnisetusi [mei Lomá] ke fakalotoʻi ʻa Polikapi ke ʻoua te ne tauhi ʻa e meʻa naʻá ne tauhi maʻu pē mo Sione ko e ākonga ʻa hotau ʻEikí mo e kau ʻaposetolo kehe ʻa ia naʻá ne feohi mo kinautolú; pea naʻe ʻikai ke lava ʻe Polikapi ke fakalotoʻi ʻa ʻAnisetusi ke tauhi ʻa e meʻá ni, he naʻe pehē ʻe ʻAnisetusi ʻoku totonu ke ne pipiki ki he angafai ʻa e kau mātuʻa naʻe muʻomuʻa ʻiate iá.” (Eusebius, Tohi 5, vahe 24) Fakatokangaʻi ʻoku pehē naʻe makatuʻunga ʻa e tuʻunga ʻa Polikapí ʻi he mafai ʻo e kau ʻaposetoló, ka naʻe falala ʻa ʻAnisetusi ki he angafai ʻa e kau mātuʻa ki muʻa ʻi Loma.

Naʻe mālohi ʻaupito ʻa e fakakikihi ko ʻení ʻi he fakaofi ke ʻosi ʻa e senituli hono ua T.S. ʻOku fakafuofua ki he 190 T.S., naʻe fili ai ha toko taha ko Vikitō ko e pīsope ʻo Lomá. Naʻá ne tui ʻoku totonu ke tauhi ʻa e Kai Efiafi ʻa e ʻEikí ʻi he ʻaho Sāpaté, pea naʻá ne kumi ke maʻu ʻa e poupou mei he kau taki tokolahi taha ʻe malavá. Naʻe fakaʻaiʻai ʻe Vikitō ʻa e ngaahi fakatahaʻanga ʻi ʻĒsia Minú ke nau liliu ki he fokotuʻutuʻu ko e ʻaho Sāpaté.

Naʻe fai ha tali ʻa Polikalati mei ʻEfesoó koeʻuhi ko kinautolu ʻi ʻĒsia Minú ʻo ne fakafisi ke tukulolo ki he fakaʻaiʻai ko ʻení. Naʻá ne pehē: “ʻOku mau tauhi ʻa e ʻahó ʻo ʻikai ke toe liliu ia, ʻo ʻikai tānaki atu, pe toʻo mai ha meʻa.” Pea naʻá ne tohi fakahokohoko ʻa e kau maʻu mafai tokolahi, kau ki ai mo e ʻaposetolo ko Sioné. Naʻá ne fakahā mālohi ʻene fakakaukaú ʻo ne pehē: “Ko e faʻahinga ko ʻení kotoa naʻa nau tauhi ʻa e ʻaho taha faá ki he Pasikaá ʻo fakatatau ki he Kōsipelí, ʻo ʻikai toe afe mei ai ʻi ha faʻahinga founga.” Naʻe toe tānaki atu ki ai ʻe Polikalati: “ʻIate au, ngaahi tokoua, . . . ʻoku ʻikai te u ilifia ʻi he ngaahi fakamanamaná. Koeʻuhi he ko e kau ʻaposetoló naʻa nau pehē, ʻOku totonu pe ke fai ki he pule ʻa e ʻOtua ʻi he pule ʻa e tangata.”​—Eusebius, Tohi 5, vahe 24.

Naʻe ʻikai ke fiemālie ʻa Vikitō ki he tali ko ʻení. Naʻe pehē ʻe ha tohi fakahisitōlia ʻe taha naʻe hanga ʻe Vikitō ʻo “tuʻusi atu ʻa e ngaahi Siasi kotoa pē ʻi ʻĒsia Minú, pea naʻá ne ʻoatu ʻa e ngaahi tohi ke tufaki ki he ngaahi Siasi kotoa pē naʻa nau kau mo iá, ke ʻoua te nau toe feohi mo e ngaahi siasi ʻi ʻĒsia Minú.” Kae kehe, “naʻe ʻikai ke tali lelei ʻa e meʻa ko eni naʻá ne fai ʻi he anga-ʻaʻafú ʻe he kau tangata poto mo fakamātoato kotoa pē ʻi heʻene faʻahí pē, pea ko e niʻihi ʻo kinautolu naʻa nau tohi fakahangatonu kiate ia, ʻo faleʻi ia . . . ke tauhi maʻu ʻa e anga-ʻofa, fāʻūtaha, mo e melino.”​—Ko e Antiquities of the Christian Church ʻa Bingham, Tohi 20, vahe 5.

Kuo Hoko ʻa e Tafoki mei he Moʻoní ko e Konga ʻo e Nofo ʻa e Kakaí

Neongo ʻa e ngaahi lea fakafepaki peheé, naʻe fakautuutu ai pē ʻa e mavahe ʻa e kau Kalisitiane ʻi ʻĒsia Minú ʻi he fekauʻaki mo e taimi ke fai ai ʻa e Kai Efiafi ʻa e ʻEikí. Naʻe hū māmālie ʻa e ngaahi liliú ʻi he ngaahi feituʻu kehe. Ko e niʻihi ia naʻa nau tauhi ʻa e vahaʻa taimi kotoa mei he ʻaho 14 ʻo Nīsaní ʻo aʻu ki he Sāpate hono hoko maí. Naʻe lahi ange hono fai ʻe he niʻihi kehe ia ʻa e Kai Efiafi ʻa e ʻEikí​—ʻi he uike taki taha ʻi he ʻaho Sāpaté.

ʻI he 314 T.S. naʻe feinga ʻa e Kosilio ʻi Arles (Falanisē) ke fakamālohiʻi ke fai ʻa e fokotuʻutuʻu ʻa e kau Lomá pea mo lōmia hono fai ha meʻa kehe mei ai. Naʻe fakafisi pē ʻa e toenga ia ʻo e faʻahinga naʻe muimui ki he ʻaho taha faá. ʻI he 325 T.S. naʻe fokotuʻutuʻu ai ʻe he ʻemipola pangani ko Konisitanitainé ke fai ha sinoti ʻa e ngaahi siasi kehekehé, ko e Kosilio ʻi Nisea, koeʻuhi ke fakapapauʻi ʻa e meʻa ko ʻení mo e ngaahi meʻa kehe naʻa nau fakamavahevaheʻi ʻa e faʻahinga naʻa nau pehē ko e kau Kalisitiane kinautolu ʻi hono ʻemipaeá. Naʻe ʻoatu ai ha tuʻutuʻuni ʻo fakahinohinoʻi ʻa kinautolu hono kotoa pē ʻi ʻĒsia Minú ke nau muimui ki he meʻa naʻe ngāueʻaki ʻi Lomá.

Ko e meʻa fakatupu tokanga ke fakatokangaʻi ʻa e taha ʻo e ngaahi fakaʻuhinga tefito ki hono tuku ʻa hono fai ʻo e Fakamanatu ʻo e pekia ʻa Kalaisí ʻo fakatatau ki he ʻaho ʻi he tohi māhina ʻa e kau Siú. A History of the Christian Councils, naʻe fai ʻe K. J. Hefele, naʻe pehē ai: “Naʻe fakahā naʻe mātuʻaki taʻe feʻunga ki he meʻá ni, ko e kātoanga toputapu taha ʻi he ngaahi kātoangá kotoa, ke muimui ki he angafai (ko e fakafuofua fakafika) ʻa e kau Siú, ʻa ia naʻe fakamā ʻa ʻenau kau ki he hia fakaʻulia lahi taha, pea ko honau ʻatamaí naʻe fakakuihi.” (Voliume 1, peesi 322) Naʻe vakai ki ha tuʻunga pehē ko ha “‘anganofo fakahāea’ ki he Sinakoké ʻa ia naʻá ne fakahohaʻasi ʻa e kau taki ʻo e Siasí,” ko e lau ia ʻa J. Juster, naʻe hā ʻi he Studia Patristica, Voliume IV, 1961, peesi 412.

Ko e fehiʻa ʻeni ki he kau Siú! Ko kinautolu naʻa nau fai ʻa e Fakamanatu ʻo e pekia ʻa Sīsuú ke fehoanaki mālie mo e ʻaho ko ia naʻá ne pekia aí naʻe lau kinautolu ko e kau poupou ki he lotu faka-Siú. Kuo ngalo foki ko Sīsū ko ha Siu ia pea ko ia naʻá ne ʻai ʻa e ʻaho ko iá ke mahuʻinga ʻaki hono foaki atu ai ʻa ʻene moʻuí koeʻuhi ko e faʻahinga ʻo e tangatá. Pea talu mei ai, ko e faʻahinga naʻe muimui ki he ʻaho taha faá, naʻe fakahalaʻi ʻo pehē ko e kau tui ki he tokāteline hala mo e faʻahinga ʻoku nau fakatupu ʻa e mavahe mei he siasí pea naʻe fakatangaʻi kinautolu. Naʻe tuʻutuʻuni ʻe he Kosilio ʻi ʻAniteoke ʻi he 341 T.S. ke tuʻusi atu kinautolu. Ka neongo ia, naʻe kei tokolahi pē ʻa e faʻahinga ia ko ʻení ʻi he 400 T.S., pea naʻe kīvoi pē ʻa e niʻihi talu mei ai.

Talu mei he ngaahi ʻaho ko iá, kuo ʻikai ke foki ʻa e Puleʻanga-Haʻa-Kalisitiané ki he muʻaki fokotuʻutuʻu naʻe fai ʻe Sīsuú. Naʻe fakahā ko e moʻoni ʻe he Palōfesa ko William Bright: “ʻI he ʻai ha ʻaho makehé, ko e Falaite Leleí, ke fai ai ha fakamanatu ʻo e mamahi mo e pekia ʻa Kalaisí, naʻe fuʻu tōmui ke fakangatangata pē ki he Falaite Leleí ʻa e ngaahi meʻa ʻa ia naʻe fakafekauʻaki ʻe Sā Paula mo e mate fakaefeilaulaú: naʻe ngāueʻaki ʻa e ngaahi meʻá ni ki he kātoanga ʻo e Toe Tuʻú tonu, pea naʻe fokotuʻu ʻi he lea faka-Kalisi mo faka-Latina fakamamalu ʻo Puleʻanga-Haʻa-Kalisitiané ʻa e ngaahi fakakaukau fakapuputuʻu.”​—The Age of the Fathers, Voliume 1, peesi 102.

Fēfē ʻa e ʻAhó Ni?

Te ke ʻeke nai, ‘ʻI he ʻosi atu ʻa e ngaahi taʻu kotoa ko ʻení, ʻoku kei mahuʻinga nai ʻa e taimi ʻoku fai ai ʻa e Fakamanatú?’ ʻIo, ʻoku mahuʻinga ia. Ko e ngaahi liliú naʻe fai ia ʻe he kau tangata ʻatamai-mālohi ʻi heʻenau feinga ke maʻu ha mafai. Naʻe muimui pē ʻa e kakaí ia ki heʻenau ngaahi fakakaukau ʻanautolu pē kae ʻikai ke talangofua kia Sīsū Kalaisi. Naʻe fakahoko moʻoni ʻa e meʻa naʻe fai fakatokanga ki ai ʻe he ʻaposetolo ko Paulá: “He ʻoku ou ʻilo, ʻo ka hili ʻeku hokosi, ʻe hu atu [ki he kau Kalisitiané] ha fanga ulofi anga malohi, ʻa ia ʻe ʻikai te nau mamae ki he fanga sipi. ʻIo, naʻa mo kimoutolu ʻe tupu mei ai ha kau tangata ʻoku leaʻaki ʻa e ngaahi meʻa ʻoku ʻalu kehe, ke tohoaki ʻaki ʻa e kau ako ke muimui kiate kinautolu.”​—Ngāue 20:​29, 30.

Ko e meʻa mahuʻinga taha hení ko e talangofua. Naʻe fokotuʻu ʻe Sīsū ke tauhi ʻe he kau Kalisitiané ʻa e meʻa pē ʻe taha. ʻOku fakamahino maʻalaʻala mai ʻe he Tohi Tapú ʻa e taimi mo e founga ke fai ai iá. Ko ia, ko hai leva ʻokú ne maʻu ʻa e totonu ke ne liliu ʻa e meʻa ko iá? Naʻe fakatangaʻi mo tuʻusi atu ʻa e kau muʻaki muimui ki he ʻaho taha faá ka naʻe ʻikai te nau fakangaloku ʻi he meʻa ko ʻení.

Ko e meʻa fakatupu tokanga nai kiate koe ke ke ʻilo ʻoku kei ʻi ai pē ʻa e kau Kalisitiane ʻi māmani ʻoku nau tokaʻi ʻa e meʻa naʻe loto ki ai ʻa Sīsuú pea ʻoku nau tauhi pē ʻa e Fakamanatu ʻo ʻene pekiá ʻi he ʻaho ko ia naʻá ne fokotuʻu aí. ʻI he taʻu kahaʻú, ʻe fakatahataha kotoa ʻa e Kau Fakamoʻoni ʻa Sihová ʻi honau ngaahi Kingdom Hall ʻi māmani lahí ʻi he ʻosi ʻa e 6:00 efiafí, ʻi he Falaite, ʻo ʻEpeleli 14​—ʻa ia ʻoku kamata hono lau mei ai ʻa e ʻaho hono 14 ʻo Nīsaní. Pea te nau fai leva ʻa e meʻa tatau tofu pē mo ia naʻe pehē ʻe Sīsū ʻoku totonu ke fai ʻi he taimi mohu ʻuhinga lahi taha ko ʻení. Fēfē ke ke fakamanatu ʻa e Kai Efiafi ʻa e ʻEikí fakataha mo kinautolu? Ko hoʻo ʻi ai ʻi he taimi ko iá, te ke toe fakahā ai ʻa hoʻo tokaʻi ʻa e meʻa naʻe loto ʻa Sīsū Kalaisi ke faí.

[Fakmatala ʻi lalo]

[Puha ʻi he peesi 6]

“KO E HUHUʻI MAʻONGOʻONGA KO IÁ”

Ko e feilaulau huhuʻi ʻa Sīsū Kalaisí ʻoku mahuʻinga lahi ange ia ʻi ha tokāteline pē. Naʻe pehē ʻe Sīsū ʻo kau kiate ia tonu: “He ko e Fanautama ʻa Tangata foki naʻe ʻikai te ne haʻu ke maʻu sevāniti, ka ke sevāniti pe ʻe ia, pea ke tuku ʻene moʻui ke huhuʻi ʻaki ha tokolahi, heʻene fetongi kinautolu.” (Maʻake 10:45) Naʻá ne toe fakamatala foki: “He naʻe ʻofa pehe ʻa e ʻOtua ki māmāni [ko e faʻahinga ʻo e tangatá], ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) ʻOku tokonaki mai ʻe he huhuʻí ki he kau maté ʻa e faingamālie ko ha toe tuʻu mei he maté pea mo e ʻamanaki ko e moʻui taʻe ngata.​—Sione 5:​28, 29.

ʻOku fai ha fakamanatu ki he pekia mātuʻaki mahuʻinga ʻaupito ʻa Sīsū Kalaisí ʻi hono fakamanatu ʻo e Kai Efiafi ʻa e ʻEikí. ʻOku lavaʻi ʻe heʻene feilaulaú ʻa e ngaahi meʻa lahi ʻaupito! Ko ha fefine ʻe taha naʻe tauhi hake ia ʻe ha ongo mātuʻa naʻá na talangofua ki he ʻOtuá pea kuó ne ʻaʻeva ʻi he moʻoni ʻa e ʻOtuá ʻi he ngaahi hongofuluʻi taʻu lahi, naʻá ne fakahāhā ʻa ʻene houngaʻiá ʻi he ngaahi lea ko ʻení:

“ʻOku mau fakatuʻamelie ki he Fakamanatú. ʻOku hoko ʻo toe makehe ange ia ʻi he taʻu taki taha. ʻOku ou manatuʻi ʻa ʻeku tuʻu ʻi he fale kuo fai ai ʻa e teuteu ʻo e kau mate ke tanú pea mo e malanga putú ʻi he taʻu ʻe 20 kuo maliu atú, ʻo sio pē ki he meʻa-fakaʻeiki ʻo siʻeku tamaí pea u ongoʻi moʻoni ʻa e houngaʻia mei hoku lotó ki he huhuʻí. Ki muʻa ʻatu naʻe hoko pē ʻa e meʻá ni ia ko ha meʻa pē ke ʻilo ki ai. ʻIo, naʻá ku ʻilo ʻa e ngaahi konga Tohi Tapu kotoa pea mo e anga ʻo hono fakamatalaʻí! Ka ʻi heʻeku toki ongoʻi moʻoni ʻa e tuʻunga ʻo e maté naʻe toki hopo fiefia ai ʻa hoku lotó ʻi he meʻa ʻe fakahoko maʻatautolú ʻo fakafou mai ʻi he huhuʻi maʻongoʻonga ko iá.”