Sīsū Ko ʻEne Moʻuí mo ʻEne Ngāue Fakafaifekaú

Naʻe Ofi ʻa e Laka-Atu Fakaʻosi ʻa Sīsuú

ʻI HE ofi ʻosi atu ʻa e Tūsite ʻo Nīsani 11, naʻe ʻosi ai ʻa e faiako ʻa Sīsū ki he kau ʻaposetoló ʻi he Moʻunga ko ʻOlivé. Ko ha ʻaho femoʻuekina ē mo fakaongosia naʻe toki ʻosi atú! Naʻa nau foki nai ki Pētani ke nau nofo ai ʻi he pō ko ení, naʻá ne tala ai ki heʻene kau ʻaposetoló: “ʻOku mou ʻilo ʻoku toe ha ʻaho ʻe ua pea hoko ʻa e Pasova, pea ʻe tukuange ai ʻa e Fanautama ʻa tangata ke kalusefai.”

ʻOku hā mahino ko e ʻaho hono hokó, ko e Pulelulu, ko Nīsani 12, naʻe mālōlō pē ʻa Sīsū mo ʻene kau ʻaposetoló. ʻI he ʻaho ki muʻá, naʻá ne valokiʻi fakahāhā ai ʻa e kau taki lotú, peá ne ʻiloʻi ai naʻa nau kumi ia ke tāmateʻi. Ko ia ʻi he Pulelulú naʻe ʻikai te ne fakahāhā holo ia, koeʻuhi he naʻe ʻikai te ne fiemaʻu ke uesia ʻe ha meʻa ʻa ʻenau fakamanatu ʻa e Laka-atú mo ʻene kau ʻaposetoló ʻi he efiafi hono hokó.

Lolotonga ení, naʻe fakatahataha ʻi he lotoʻā ʻo e taulaʻeiki lahi ko Kaiafasí ʻa e kau taulaʻeikí mo e kau mātuʻa ʻo e kakaí. ʻI heʻenau loto-mamahi ʻi he ʻohofi naʻe fai ʻe Sīsū ʻi he ʻaho ki muʻa atú, naʻa nau fai ha ngaahi palani ke puke ia ʻaki ha founga kākā pea tāmateʻi ia. Kae kehe naʻa nau hanganaki pehē: “ʻOua ʻe fai lolotonga ʻa e katoanga, naʻa ai ha maveuveu ʻi he kakai.” Naʻa nau ilifia ki he kakai ʻa ia naʻa nau saiʻia ʻia Sīsuú.

ʻI he lolotonga ʻa e faʻufaʻu fono fulikivanu ʻa e kau taki lotú ke tāmateʻi ʻa Sīsuú, naʻe ʻaʻahi mai ha tokotaha kiate kinautolu. Naʻa nau ʻohovale, he ko e tokotaha ia ʻo e kau ʻaposetolo tonu ʻa Sīsuú, ko Siutasi ʻIsikaliote, ʻa e tokotaha naʻe ʻai ki ai ʻe Sētane ʻa e fakakaukau ke lavakiʻi hono ʻEikí! Ko ha toki fiefia lahi ē kiate kinautolu ʻi hono ʻeke atu ʻe Siutasí: “Ko e ha te mou fie ʻomi kau lavakiʻi ia kiate kimoutolu?” Naʻa nau loto-taha fiefia ke totongi kiate ia ha ngaahi konga siliva ʻe 30, ko e totongi ia ʻo ha tamaioʻeiki ʻo fakatatau ki he fuakava ʻo e Lao ʻa Mōsesé. Kamata mei ai, mo e fekumi ʻa Siutasi ki ha faingamālie lelei ke lavakiʻi ai ʻa Sīsū kiate kinautolu ʻo ʻikai ke ʻi ai ha kakai tokolahi ai.

Naʻe kamata ʻa e Nīsani 13 ʻi he tō ʻa e laʻaá ʻi he efiafi Pulelulú. Naʻe aʻu mai ʻa Sīsū mei Sielikō ʻi he Falaité, ko ia ko e pō ʻeni hono onó pea ko e pō fakaʻosi ia ʻo ʻene ʻi Pētaní. ʻI he ʻaho hono hokó, ko e Tuʻapulelulú, naʻe fiemaʻu ai ʻa e ngaahi teuteu fakaʻosi ke fai ki he Laka-atú, ʻa ia ʻe kamata ia ʻi he tō ʻa e laʻaá, ʻa ia ʻe tāmateʻi ai ʻa e lami ki he Laka-atú ʻo tunu kakato pē. Te nau kātoangaʻi ʻi fē ʻa e Laka-atú, pea ko hai te ne fai ʻa e ngaahi teuteú?

Naʻe teʻeki ai ke ʻoange ʻe Sīsū ʻa e ngaahi fakaikiiki ko iá, mahalo ko hano taʻofi ia ke ʻoua naʻa tala ʻe Siutasi ki he houʻeiki taulaʻeikí pea nau puke nai ʻa Sīsū ʻi he lolotonga ʻo e kātoanga ʻo e Laka-atú. Ka ʻi he taimi ko ʻení, ngalingali ko e hoʻatā efiafi ia ʻo e Tuʻapulelulú, naʻe fekau atu ʻe Sīsū ʻa Pita mo Sione mei Pētani, ʻo pehē: “ʻAlu ʻo teuteu maʻatautolu ʻa e pasova, ke tau kai ia.”

Naʻá na ʻeke: “Ko e potu fe ʻoku ke loto ke ma teuteu ai?”

Naʻe fakamatala atu ʻe Sīsū: “Ko eni, ʻi hoʻomo hū ki he kolo, te mo fetaulaki mo ha tangata ʻoku fua ha hina vai; mo muimui ki ai ʻo aʻu ki he fale ʻoku ne ʻalu ki ai. Pea te mo lea ki he matāpule ʻo e fale, ʻOku pehē mai ʻe he Tangataʻeiki, Pe ko e fē ʻa e loki ke u kai ai ʻa e pasova mo ʻeku kau ako? Pea ko e tangata ko ia te ne fakaha kiate kimoua ha fuʻu falekai ʻi ʻolunga, kuo ʻosi faliki: mo hanga ʻo teuteu ʻi he potu ko ia.”

ʻOku hā ngalingali ko e tokotaha naʻe ʻoʻona ʻa e ʻapí ko ha ākonga ia ʻa Sīsū ʻa ia naʻá ne ʻamanekina ʻa e kole ʻa Sīsū ke ngāueʻaki ʻa e falé ki he kātoanga makehe ko ʻení. Kae kehe ʻi he aʻu ʻa Pita mo Sione ki Selusalemá, naʻá na ʻilo ʻa e meʻa hono kotoa pē ʻo hangē pē ko ia naʻe tomuʻa tala ʻe Sīsuú. Ko ia naʻá na teuteu ʻa e lamí pea mo e ngaahi fokotuʻutuʻu kehe kotoa pē naʻe fiemaʻu ke lato ai ʻa e fiemaʻu ʻa e toko 13 ʻe kau ki he kātoanga Laka-atú, ko Sīsū mo ʻene kau ʻaposetolo ʻe toko 12. Mātiu 26:​1-5, 14-19; Maʻake 14:​1, 2, 10-16; Luke 22:​1-13; ʻEkisoto 21:32.

◆ ʻOku hā mahino ko e hā ʻa e meʻa naʻe fai ʻe Sīsū ʻi he ʻaho Pulelulú, pea ko e hā hono ʻuhingá?

◆ Ko e hā ʻa e fakataha naʻe fai ʻi he ʻapi ʻo e taulaʻeiki lahí, pea ko e hā ʻa e taumuʻa ʻo e ʻaʻahi ʻa Siutasi ki he kau taki lotú?

◆ Ko hai naʻe fekau atu ʻe Sīsū ki Selusalema ʻi he Tuʻapulelulú, pea ko e hā ʻa e taumuʻá?

◆ Ko e hā naʻe ʻilo ʻe kinaua naʻe fekau atú ʻa ia naʻe toe hā mei ai ʻa e mafai fakaemana ʻa Sīsuú?