“Ko Hoku Puleʻangá ʻOku ʻIkai ko ha Konga Ia ʻo e Māmani ko Ení”
“Ko e meʻa eni kuó u haʻu ai ki he māmaní, ke u faifakamoʻoni ki he moʻoní.”—SIONE 18:37.
1, 2. (a) ʻOku anga-fēfē ʻa e ʻalu ke toe māvahevahe ange ʻa e māmaní? (e) Ko e hā ʻa e ngaahi fehuʻi te tau tali ʻi he kupu ko ení?
“MEI heʻeku kei siʻí, ko e fakamaau taʻetotonu pē naʻá ku vakai ki aí,” ko e lau ia ʻa ha tuofefine ʻi he fakatonga ʻo ʻIulopé fekauʻaki mo hono kuohilí. “Ko ia naʻá ku talitekeʻi ʻa e fokotuʻutuʻu fakapolitikale ʻi hoku fonuá, peá u poupou ki he meʻa naʻe vakai ki ai ʻa e tokolahi ko e ngaahi fakakaukau mātuʻaki mahuʻinga. Ko hono moʻoní, naʻá ku hoko ʻi he ngaahi taʻu lahi ko e kaumeʻa ʻo ha tangata tautoitoi.” Ko ha tokoua ʻi he fakatonga ʻo ʻAfiliká ʻokú ne fakamatala ki he ʻuhinga naʻá ne faʻa anga-fakamālohi aí: “Naʻá ku tui ko hoku matakalí naʻe lelei ange ia ʻi he ngaahi matakali kehé kotoa, pea naʻá ku kau ki ha faʻahi fakapolitikale. Naʻe akoʻi kimautolu ke mau tāmateʻi ʻaki ʻa e tao ʻa homau kau fakafepakí—naʻa mo e faʻahinga ʻi homau matakalí tonu ʻa ē naʻa nau poupou ki he ngaahi faʻahi fakapolitikale kehé.” ʻOku fakahaaʻi ʻe ha tuofefine ʻi ʻIulope lotoloto: “Naʻá ku maʻu ʻa e tomuʻa fehiʻá, peá u fehiʻa ʻi ha taha pē mei ha fonua kehe pe kau ki ha lotu kehe mei heʻeku lotú.”
2 ʻI he ʻahó ni, ʻoku ʻalu ke toe tokolahi ange ʻa e kakai ʻoku nau maʻu ʻa e fakakaukau hangē ko ia naʻe maʻu ki muʻa ʻe he toko tolu ko iá. ʻOku ngāueʻaki ʻe he ngaahi kulupu fakapolitikale lahi ʻa e fakamālohí ke maʻu ai ʻa e tauʻatāiná. ʻOku angamaheniʻaki ʻa e fakakikihi ʻa e kakaí fekauʻaki mo e ngaahi meʻa fakapolitikalé. Pea ʻi he ngaahi fonua lahi, ʻoku ngaohikoviʻi ai ʻe he kakaí ʻa e kau mulí ʻo toe lahi ange. Hangē pē ko ia naʻe tomuʻa tala ʻe he Tohi Tapú, ʻoku “lotolotokehe” ʻa e kakaí lolotonga ʻa e ngaahi ʻaho fakaʻosi ko ení. (2 Tīm. 3:1, 3) ʻE lava fēfē ke hanganaki fāʻūtaha ʻa e kau Kalisitiané ʻi he ʻalu ke toe māvahevahe ange ʻa e māmaní? ʻE lava ke tau ako ʻa e meʻa lahi mei he faʻifaʻitakiʻanga ʻa Sīsuú. Ko e kakai ʻi hono taimí naʻe fakamavahevaheʻi foki kinautolu ʻe he ngaahi fakakaukau mālohi fakapolitikalé. ʻI he kupu ko ení, te tau maʻu ai ʻa e tali ki he fehuʻi ʻe tolu: Ko e hā naʻe fakafisi ai ʻa Sīsū ke kau ki ha kulupu fakapolitikalé? Naʻe anga-fēfē hono fakahaaʻi ʻe Sīsū kuo pau ke ʻoua ʻe kau ʻa e kakai ʻa e ʻOtuá ki ha faʻahi ʻi he ngaahi ʻīsiu fakapolitikalé? Pea naʻe anga-fēfē hono akoʻi mai ʻe Sīsū ke ʻoua ʻaupito te tau fakamālohí?
NAʻE POUPOU ʻA SĪSŪ KI HE FAʻAHINGA NAʻA NAU FIEMAʻU ʻA E TAUʻATĀINÁ?
3, 4. (a) ʻI he taimi ʻo Sīsuú, ko e hā naʻe fiemaʻu ʻe he kau Siu tokolahi? (e) Naʻe anga-fēfē hono uesia ʻa e kau ākonga ʻa Sīsuú ʻi he fakakaukau ko iá?
3 Ko e kau Siu tokolahi ʻa ē naʻe malanga ki ai ʻa Sīsuú ko hono moʻoní naʻa nau fiemaʻu ke nau tauʻatāina mei he kau Lomá. Ko e kau Sēloti Siú, ʻa ia ko ha kulupu fakapolitikale taʻemapuleʻi tōtuʻa, naʻa nau fai ʻa e meʻa kotoa naʻa nau malavá ke ʻai ke toe mālohi ange ʻa e fakakaukau ko ení. Ko e tokolahi ʻo e kau Sēlotí naʻa nau muimui ʻi ha tangata ko Siutasi ko e Kālelí, ʻa ia naʻe moʻui ʻi he taimi nai ʻo Sīsuú. Ko Siutasí ko ha mīsaia loi ia, ʻa ia naʻá ne takihalaʻi ʻa e tokolahi. Ko e faihisitōlia Siu ko Siosifasí naʻá ne pehē naʻe fakaʻaiʻai ʻe Siutasi ʻa e kau Siú ke nau fakafepaki ki Loma pea ui ʻa e faʻahinga ko ē naʻa nau loto ke totongi tukuhau ki he kau Lomá ko e “kau vaipalo.” Naʻe iku ʻo tāmateʻi ʻe he kau Lomá ʻa Siutasi. (Ngā. 5:37) Naʻe aʻu ʻo anga-fakamālohi ʻa e kau Sēloti ʻe niʻihi ke lavaʻi ʻenau ngaahi taumuʻá.
4 Ko e tokolahi taha ʻo e kau Siú naʻa nau tatali vēkeveke ki he hoko mai ʻa e Mīsaiá. Naʻa nau fakakaukau ʻe fakatauʻatāinaʻi kinautolu ʻe he Mīsaiá mei he kau Lomá pea te ne ʻai ʻa ʻIsileli ke toe hoko ko ha puleʻanga lahi. (Luke 2:38; 3:15) Naʻe tui ʻa e tokolahi ʻe fokotuʻu ʻe he Mīsaiá ha puleʻanga ʻi he māmaní ʻi ʻIsileli. ʻI he hoko ʻa e meʻa ko iá, ko e kau Siu kotoa naʻe nofo ʻi he ngaahi feituʻu kehekehe takatakai ʻi he māmaní naʻa nau toe foki ki ʻIsileli. Naʻa mo Sione Papitaiso naʻá ne ʻeke ʻi he taimi ʻe taha kia Sīsū: “Ko koe ʻa e Tokotaha naʻe pehē ʻe haʻú, pe te mau ʻamanekina ha taha kehe?” (Māt. 11:2, 3) Mahalo pē naʻe fifili ʻa Sione pe ʻe haʻu ha tokotaha kehe ia ke fakatauʻatāinaʻi ʻa e kau Siú. Ki mui ai, naʻe fetaulaki ai ha ongo ākonga mo Sīsū ʻi he hala ki ʻEmeasí ʻi he hili ʻene toetuʻú. Naʻá na pehē naʻá na ʻamanaki ko Sīsū ʻa e tokotaha te ne fakatauʻatāinaʻi ʻa ʻIsilelí. (Lau ʻa e Luke 24:21.) Taimi nounou mei ai, naʻe ʻeke ʻe he kau ʻapositoló kia Sīsū: “ʻEiki, te ke toe fakafoki mai ʻa e Puleʻangá ki ʻIsileli he taimí ni?”—Ngā. 1:6.
5. (a) Ko e hā naʻe fiemaʻu ai ʻe he kakai Kālelí ke hoko ʻa Sīsū ko honau tuʻí? (e) Naʻe anga-fēfē hono fakatonutonu ʻe Sīsū ʻenau fakakaukaú?
5 Naʻe ʻamanekina ʻe he kau Siú ʻe fakaleleiʻi ʻe he Mīsaiá ʻenau ngaahi palopalemá. ʻOku ngalingali ko e ʻuhinga ia naʻe fiemaʻu ai ʻe he kakai ʻo Kālelí ke hoko ʻa Sīsū ko honau tuʻí. ʻOku pau pē naʻa nau fakakaukau te ne hoko ko e taki lelei tahá. Ko ha tokotaha malanga lelei ʻaupito ia, naʻe lava ke ne fakamoʻui ʻa e kau puké, pea naʻe aʻu ʻo lava ke ne tokonaki ha meʻakai maʻá e faʻahinga naʻe fiekaiá. Hili hono fafangaʻi ʻe Sīsū ʻa e kau tangata nai ʻe toko 5,000, naʻe ofoofo ai ʻa e kakaí. Naʻe ʻiloʻi ʻe Sīsū ʻa e meʻa naʻa nau loto ke faí. ʻOku pehē ʻe he Tohi Tapú: “ʻI he ʻilo ʻe Sīsū naʻe teu ke nau haʻu ʻo puke ia ke fakanofo ko ha tuʻí, naʻá ne toe mavahe toko taha pē ki he moʻungá.” (Sione 6:10-15) ʻI he ʻaho hono hokó, ʻoku ngalingali naʻe nonga hifo ai ʻa e kakaí. Naʻe fakamatalaʻi ange leva ʻe Sīsū kiate kinautolu naʻe ʻikai te ne haʻú ke tokonaki mai ʻenau ngaahi fiemaʻu fakamatelié ka ke akoʻi kinautolu fekauʻaki mo e Puleʻanga ʻo e ʻOtuá. Naʻá ne tala ange kiate kinautolu: “Mou ngāue, ʻo ʻikai maʻá e meʻakai ʻoku ʻauhá, ka maʻá e meʻakai ʻoku tolonga atu ki he moʻui taʻengatá.”—Sione 6:25-27.
6. Naʻe anga-fēfē hono ʻai ʻe Sīsū ke mahino naʻe ʻikai te ne fiemaʻu ha mafai fakapolitikale ʻi he māmaní? (Sio ki he ʻuluaki fakatātā ʻi he kupú ni.)
6 Taimi nounou ki muʻa ʻi heʻene pekiá, naʻe ʻiloʻi ai ʻe Sīsū naʻe tui ʻa e niʻihi ʻo hono kau muimuí te ne kamata pule ko e tuʻi ʻi Selusalema. Naʻe fai ange ʻe Sīsū kiate kinautolu ʻa e talanoa fakatātā fekauʻaki mo e miná ke tokoniʻi kinautolu ke nau mahinoʻi heʻikai ke hoko ʻa e meʻá ni. Ko e talanoa fakatātā ko iá naʻe fekauʻaki ia mo ha “tangata ko ha tupuʻi-ʻeiki,” ko Sīsū, ʻa ia naʻe pau ke ne fononga ki ha feituʻu ʻi ha taimi fuoloa. (Luke 19:11-13, 15) Naʻe tala mahino foki ʻe Sīsū ki he ʻōfisa Loma ko Ponitō Pailató ʻoku ʻikai te ne kau ki ha faʻahi ʻi he ngaahi meʻa fakapolitikale ʻa e māmaní. Naʻe ʻeke ʻe Pailato kia Sīsū: “Ko koe ʻa e Tuʻi ʻo e Kau Siú?” (Sione 18:33) Naʻe ilifia nai ʻa Pailato naʻa ʻai ʻe Sīsū ke angatuʻu ʻa e kakaí ki he kau Lomá. Ka naʻe tali ange ʻe Sīsū: “Ko hoku Puleʻangá ʻoku ʻikai ko ha konga ia ʻo e māmani ko ení.” (Sione 18:36) Naʻe fakafisi ʻa Sīsū ke kau ʻi he ngaahi meʻa fakapolitikalé, koeʻuhí ko hono Puleʻangá ʻe ʻi hēvani ia. Naʻá ne pehē ko ʻene ngāue ʻi he māmaní ko e “faifakamoʻoni ki he moʻoní.”—Lau ʻa e Sione 18:37.
ʻOkú ke tokangataha ki he ngaahi palopalema ʻi he māmaní pe ko e Puleʻanga ʻo e ʻOtuá? (Sio ki he palakalafi 7)
7. Ko e hā ʻe faingataʻa nai ai ke fakaʻehiʻehi mei he poupou ki he ngaahi kulupu fakapolitikalé naʻa mo e ʻi hotau lotó?
7 Naʻe mahinoʻi ʻe Sīsū ʻa hono vāhenga-ngāué. ʻI heʻetau mahinoʻi ʻa hotau vāhenga-ngāué, te tau fakaʻehiʻehi ai mei he poupou ki ha kulupu fakapolitikale pē, naʻa mo e poupou ʻi hotau lotó. ʻOku ʻikai maʻu pē ke faingofua eni. ʻOku pehē ʻe he ʻovasia fefonongaʻaki ʻe taha ko e kakai ʻi hono feituʻú ʻoku nau hoko ʻo toe faikehe ange. ʻOku nau pōlepole ʻaupito fekauʻaki mo honau fonuá pea tui naʻe mei lelei ange ʻenau moʻuí kapau naʻe pule kiate kinautolu ʻa honau kakaí tonu. ʻOkú ne toe pehē: “Ko e meʻa ke fakamālōʻiaʻí, ko hono maluʻi ʻe he fanga tokouá ʻa ʻenau fāʻūtaha faka-Kalisitiané ʻaki ʻenau tokangataha ki hono malangaʻi ʻa e ongoongo lelei ʻo e Puleʻangá. ʻOku nau hanga ki he ʻOtuá ke ne fakaleleiʻi ʻa e fakamaau taʻetotonú mo e ngaahi palopalema kehe ʻoku tau fehangahangai mo iá.”
NAʻE ANGA-FĒFĒ ʻA E HANGANAKI TUʻU-ʻATĀ ʻA SĪSŪ ʻI HE NGAAHI ʻĪSIU FAKAPOLITIKALÉ?
8. Ko e hā ʻa e fakamaau taʻetotonu naʻe faingataʻaʻia ai ʻa e kau Siu tokolahi ʻi he taimi ʻo Sīsuú?
8 ʻI he sio ʻa e kakaí ki he hoko ʻa e ngaahi fakamaau taʻetotonu takatakai ʻiate kinautolú, ʻoku nau faʻa hoko ʻo kau lahi ange ai ʻi he ngaahi meʻa fakapolitikalé. ʻI he taimi ʻo Sīsuú, naʻe hoko ʻa e totongi tukuhaú ko ha ʻīsiu ia naʻá ne fakatupunga ʻa e kakai tokolahi ke nau fakafaʻafaʻahi ʻi he ngaahi meʻa fakapolitikalé. Ko hono moʻoní, naʻe angatuʻu ʻa Siutasi ko e Kālelí ki Loma koeʻuhí ko hono lēsisita ʻe he kau Lomá ʻa e kakaí ke fakapapauʻi te nau totongi tukuhaú. Pea naʻe lahi ʻa e ngaahi tukuhau ke totongí, hangē ko hono tukuhauʻi ʻa e koloá, kelekelé, mo e ngaahi falé. Pehē foki, naʻe kākā ʻaupito ʻa e kau tānaki tukuhaú, ʻa ia naʻe ʻai ai ke toe kovi ange ʻa e palopalemá. Naʻa nau totongiʻi he taimi ʻe niʻihi ʻa e kau ʻōfisa fakapuleʻangá ke maʻu ha lakanga pea ngāueʻaki leva honau mafaí ke maʻu ai ha paʻanga lahi. Ko Sākeasi, ʻa e pule tānaki tukuhau ʻi Sielikoó, naʻá ne hoko ʻo koloaʻia koeʻuhi naʻá ne ʻai ke totongi ʻe he kakaí ha paʻanga lahi.—Luke 19:2, 8.
9, 10. (a) Naʻe anga-fēfē ʻa e feinga ʻa e ngaahi fili ʻo Sīsuú ke ʻai ia ke ne kau ʻi ha ʻīsiu fakapolitikale? (e) Ko e hā ʻoku tau ako mei he tali ʻa Sīsuú? (Sio ki he ʻuluaki fakatātā ʻi he kupú ni.)
9 Naʻe feinga ʻa e ngaahi fili ʻo Sīsuú ke ʻai ia ke ne kau ʻi he ʻīsiu ʻo hono tālangaʻi ʻa e totongi tukuhaú. Naʻa nau fehuʻi kiate ia fekauʻaki mo e “tukuhau,” ʻa ia ko e tēnali ʻe taha naʻe pau ke totongi ʻe he kotoa ʻo e kau Siú. (Lau ʻa e Mātiu 22:16-18.) Naʻe mātuʻaki fehiʻa ʻa e kau Siú ʻi he tukuhau ko ení he naʻe fakamanatu ange ai ʻa hono puleʻi kinautolu ʻe he puleʻanga Lomá. Ko e “faʻahi ʻa Hēlotá,” ʻa ia, ko e faʻahinga naʻa nau poupou ki he ngaahi fakakaukau fakapolitikale ʻa Hēlotá, naʻa nau ʻamanaki ʻe pehē ʻe Sīsū ʻoku totonu ke ʻoua te nau totongi tukuhau, ʻa ia ʻe lava ke nau tukuakiʻi ai ia ko ha fili ʻo e ʻEmipaea Lomá. Ka ʻo kapau ʻe pehē ʻe Sīsū kuo pau ke nau totongi tukuhau, ʻe tuku nai ai ʻa e muimui ʻa e kakaí ʻiate iá. Ko ia, ko e hā naʻe fai ʻe Sīsuú?
10 Naʻe tokanga lahi ʻa Sīsū ke ne hanganaki tuʻu-ʻatā ʻi he ʻīsiu ko ení. Naʻá ne pehē: “Ko ia, ʻoange kia Sisa ʻa e ngaahi meʻa ʻa Sisá, ka ki he ʻOtuá ʻa e ngaahi meʻa ʻa e ʻOtuá.” (Māt. 22:21) Naʻe ʻiloʻi ʻe Sīsū naʻe kākā ʻa e kau tānaki tukuhau tokolahi, ka naʻe ʻikai te ne tokangataha ki he meʻa ko iá. ʻI hono kehé, naʻá ne tokangataha ki he fakaleleiʻanga moʻoni ʻo e ngaahi palopalema ʻa e faʻahinga ʻo e tangatá, ʻa e Puleʻanga ʻo e ʻOtuá. Naʻe fokotuʻu ʻe Sīsū ha faʻifaʻitakiʻanga kiate kitautolu. ʻOku ʻikai totonu ke tau fakafaʻafaʻahi ʻi ha ʻīsiu fakapolitikale pē, tatau ai pē pe ʻoku hā ngali totonu mo lelei ʻa e faʻahi ʻe tahá pea hā ngali hala mo taʻefaitotonu ʻa e faʻahi ʻe tahá. ʻOku tokangataha ʻa e kau Kalisitiané ki he Puleʻanga ʻo e ʻOtuá mo e meʻa ʻoku pehē ʻe he ʻOtuá ʻoku totonú. ʻI he ʻuhinga ko iá, ʻoku ʻikai ke tau maʻu ha ngaahi fakakaukau mālohi fekauʻaki mo e ngaahi fakamaau taʻetotonú pe lea fakafepaki ki ai.—Māt. 6:33.
11. ʻE lava fēfē ke tau tokoniʻi ʻa e niʻihi kehé ke nau maʻu ʻa e fakamaau totonu moʻoní?
11 Kuo lavameʻa ʻa e tokolahi ʻo e Kau Fakamoʻoni ʻa Sihová ʻi hono toʻo ʻa e ngaahi fakakaukau mālohi fakapolitikale naʻa nau maʻu ki muʻá. Ko e fakatātaá, ki muʻa ke ako ʻe ha tuofefine ʻi Pilitānia Lahi ʻa e moʻoní, naʻá ne toʻo kalasi ʻi he ako fakasōsialé ʻi ha ʻunivēsiti peá ne fakatupulekina ha ngaahi fakakaukau tōtuʻa fakapolitikale. ʻOkú ne pehē: “Naʻá ku loto ke poupou ki he ngaahi totonu ʻa e kakai ʻuliʻulí, koeʻuhí naʻa mau faingataʻaʻia ʻi he fakamaau taʻetotonu lahi fau. Neongo naʻá ku poto ʻo mālohi ʻi he ngaahi fakakikihí, naʻá ku kei ongoʻi feifeitamaki pē. Naʻe ʻikai te u ʻiloʻi ko e ngaahi tupuʻanga ʻo e fakamaau taʻetotonu fakamatakalí kuo pau ke taʻakifuʻu ia mei he loto ʻo e kakaí. Kae kehe, ʻi he kamata ke u ako Tohi Tapú, naʻá ku ʻiloʻi ai kuo pau ke u kamata mei hoku lotó tonu.” Pea ko ha tuofefine pālangi naʻá ne tokoniʻi ia ke liliu ʻa e anga ʻo ʻene ongoʻi ʻi hono lotó. ʻOkú ne toe pehē: “ʻOku ou ngāue he taimí ni ko ha tāimuʻa tuʻumaʻu ʻi ha fakatahaʻanga lea fakanoa, pea ʻoku ou ako ke kakapa atu ki he kakai kotoa pē.”
“FAKAFOKI HOʻO HELETAÁ KI HONO ʻAIʻANGÁ”
12. Ko e hā ʻa e faʻahinga “lēvani” naʻe tala ʻe Sīsū ki heʻene kau ākongá ke nau fakaʻehiʻehi mei aí?
12 ʻI he taimi ʻo Sīsuú, naʻe faʻa poupou ai ʻa e kau taki lotú ki he ngaahi kulupu fakapolitikalé. Ko e fakatātaá, ko e tohi Daily Life in Palestine at the Time of Christ ʻoku pehē ai naʻe vahevahe ʻa e kau Siú ki he ngaahi kulupu fakalotu naʻe meimei tatau mo e ngaahi faʻahi fakapolitikalé. Ko ia naʻe fakatokanga ai ʻa Sīsū ki heʻene kau ākongá: “Hanganaki ʻā homou matá; vakavakai telia ʻa e lēvani ʻa e kau Fālesí mo e lēvani ʻa Hēlotá.” (Mk. 8:15) ʻI he lave ʻa Sīsū kia Hēlotá, ʻoku ngalingali naʻá ne ʻuhingá ki he faʻahi ʻa ia ko e kau muimui ʻo Hēlotá. Ko e kulupu ʻe tahá, ʻa e kau Fālesí, naʻa nau fiemaʻu ke tauʻatāina ʻa e kau Siú mei he ʻEmipaea Lomá. Fakatatau ki he fakamatala ʻa Mātiú, naʻe toe fakatokanga foki ʻa Sīsū ki heʻene kau ākongá fekauʻaki mo e kau Sātusí. Naʻe loto ʻa e kau Sātusí ke hokohoko atu ʻa e pule ʻa Lomá koeʻuhí naʻe fakaʻatā ai heni kinautolu ke nau maʻu ʻa e ngaahi tuʻunga mafai lahi. Naʻe fakatokanga ʻa Sīsū ki heʻene kau ākongá ke nau fakaʻehiʻehi mei he “lēvani,” pe ngaahi akonaki, ʻa e kulupu ʻe tolu ko ení. (Māt. 16:6, 12) Pea ʻoku fakatupu tokangá he naʻe fai ʻe Sīsū ʻa e fakatokanga ko ení ʻi he hili pē ʻa e loto ʻa e kakaí ke fakanofo ia ko e tuʻí.
13, 14. (a) Naʻe anga-fēfē ʻa e iku ʻa ha ʻīsiu fakapolitikale mo fakalotu ki he fakamālohi mo e fakamaau taʻetotonu? (e) Ko e hā ʻoku ʻikai ʻaupito totonu ai ke hoko ʻo fakamālohi, naʻa mo e taimi ʻoku fai mai ai ha fakafeangai taʻetotonu kiate kitautolú? (Sio ki he ʻuluaki fakatātā ʻi he kupú ni.)
13 ʻI he fakafaʻafaʻahi ʻa e ngaahi lotú ʻi he ngaahi ʻīsiu fakapolitikalé, ʻoku faʻa iku ai ki he fakamālohi. Naʻe akoʻi ʻe Sīsū ʻene kau ākongá ke nau hanganaki tuʻu-ʻatā fakaʻaufuli. Ko e ʻuhinga ia ʻe taha naʻe loto ai ʻa e houʻeiki taulaʻeikí mo e kau Fālesí ke tāmateʻi ʻa Sīsuú. Naʻa nau manavasiʻi naʻa fanongo ʻa e kakaí kiate ia pea tuku ʻenau muimui ʻiate kinautolú. Kapau ʻe hoko ia, ʻe mole ai honau mafai fakalotú mo fakapolitikalé. Naʻa nau pehē: “Kapau te tau tukunoaʻi peheni pē ia, te nau tui kotoa kiate ia, pea ʻe haʻu ʻa e kau Lomá ʻo ʻave fakatouʻosi hotau feituʻú mo hotau puleʻangá.” (Sione 11:48) Ko ia naʻe fokotuʻutuʻu ai ʻe he Taulaʻeiki Lahi ko Kaiafasí ha palani ke tāmateʻi ʻa Sīsū.—Sione 11:49-53; 18:14.
14 Naʻe tatali ʻa Kaiafasi kae ʻoua kuo poʻuli pea toki fekauʻi atu ha kau sōtia ke nau puke ʻa Sīsū. Ka naʻe ʻilo ʻa Sīsū ki he palani ke tāmateʻi iá. Ko ia ʻi he lolotonga ʻene kai fakaʻosi mo ʻene kau ʻapositoló, naʻá ne tala ange ke nau ʻomai ha ngaahi heletā. Naʻe feʻunga pē ha heletā ʻe ua ke akoʻi ai kiate kinautolu ha lēsoni mahuʻinga. (Luke 22:36-38) Ki mui ange ʻi he pō ko iá, naʻe omi ai ha fuʻu kakai ke puke ʻa Sīsū, pea naʻe ʻita lahi ʻa Pita ʻi he fakamaau taʻetotonú ʻo ne unuhi hake ai ha heletā ʻo ʻohofi ʻaki ʻa e taha ʻo e kau tangatá. (Sione 18:10) Ka naʻe tala ʻe Sīsū kia Pita: “Fakafoki hoʻo heletaá ki hono ʻaiʻangá, he ko kinautolu kotoa ʻoku nau toʻo ʻa e heletaá te nau ʻauha ʻi he heletaá.” (Māt. 26:52, 53) Ko e hā ʻa e lēsoni mālohi naʻe akoʻi ʻe Sīsū ki heʻene kau ākongá? Kuo pau ke ʻoua naʻa nau hoko ko ha konga ʻo e māmaní. Ko e meʻa eni naʻe lotu ʻa Sīsū fekauʻaki mo ia ki muʻa ange ʻi he pō ko iá. (Lau ʻa e Sione 17:16.) Ko e ʻOtuá pē taha ʻokú ne maʻu ʻa e totonu ke ne tauʻi ʻa e fakamaau taʻetotonú.
15, 16. (a) Kuo anga-fēfē hono tokoniʻi ʻe he Folofola ʻa e ʻOtuá ʻa e kau Kalisitiané ke nau fakaʻehiʻehi mei he vākoví? (e) Ko e hā ʻa e faikehekehe ʻoku ʻiloʻi ʻe Sihova ʻi heʻene vakai mai ki he māmaní ʻi he ʻaho ní?
15 Ko e tuofefine ʻi he fakatonga ʻo ʻIulopé naʻe lave ki ai ki muʻá naʻá ne ako ʻa e lēsoni tatau. ʻOkú ne pehē: “‘Kuó u ʻiloʻi ko e fakamālohí ʻoku ʻikai ke ʻomi ai ha fakamaau totonu. Naʻá ku ʻiloʻi ko e faʻahinga naʻe hanga ki he fakamālohí naʻe faʻa iku ʻo nau mate. Pea kuo hoko ai ʻa e tokolahi kehe ʻo loto-kona. ʻOku ou fiefia lahi ʻi he ako mei he Tohi Tapú ko e ʻOtuá pē taha ʻe lava ke ne ʻomai ʻa e fakamaau totonu moʻoní ki he māmaní. Ko e pōpoaki ia kuó u malangaʻí, ʻi he taʻu ʻe 25 fakamuimuí.” Ko e tokoua ʻi he fakatonga ʻo ʻAfiliká kuó ne fetongi ʻene taó ʻaki ʻa e “heletā ʻo e laumālié,” ko e Folofola ʻa e ʻOtuá. (ʻEf. 6:17) ʻOkú ne malangaʻi he taimí ni ha pōpoaki ʻo e melino ki he kakai kotoa pē, tatau ai pē pe ko fē ʻa e matakali ʻoku nau haʻu mei aí. Pea ʻi he hili ʻa e hoko ʻa e tuofefine ʻi ʻIulope lotolotó ko e taha ʻo e Kau Fakamoʻoni ʻa Sihová, naʻá ne mali mo ha tokoua mei ha kulupu fakamatakali naʻá ne fehiʻa ai ki muʻa. Naʻe fai ʻe he toko tolú kotoa ʻa e ngaahi liliu ko ení he naʻa nau loto ke hoko ʻo hangē ko Kalaisí.
16 ʻOku mahuʻinga ʻaupito ke fai ʻa e ngaahi liliu ko ení! ʻOku pehē ʻe he Tohi Tapú ko e faʻahinga ʻo e tangatá ʻoku nau hangē ko e tahi hoú ʻo ʻikai ʻaupito ke nonga. (ʻAi. 17:12; 57:20, 21; Fkh. 13:1) Ko e ngaahi ʻīsiu fakapolitikalé ʻoku fakaʻitaʻi ai ʻa e kakaí, ʻai ke nau māvahevahe, pea iku atu ai ki he fakamālohi. Ka ʻoku tau melino kitautolu mo fāʻūtaha. ʻI he vakai mai ʻa Sihova ki he māvahevahe ʻa e kakai ʻi he māmaní, ʻoku pau pē ʻokú ne fiefia lahi ʻi he vakai mai ki he fāʻūtaha ʻa ʻene kakaí.—Lau ʻa e Sēfanaia 3:17.
17. (a) Ko e hā ʻa e founga ʻe tolu ʻe lava ke tau pouaki ai ʻa e fāʻūtahá? (e) Ko e hā te tau lāulea ki ai ʻi he kupu hono hokó?
17 ʻI he kupu ko ení, kuo tau ako ai ʻe lava ke tau pouaki ʻa e fāʻūtahá ʻi he founga ʻe tolu: (1) ʻOku tau falala ʻe fakatonutonu ʻe he Puleʻanga ʻo e ʻOtuá ʻa e fakamaau taʻetotonú kotoa, (2) ʻoku ʻikai ʻaupito ke tau fakafaʻafaʻahi ʻi he ngaahi ʻīsiu fakapolitikalé, pea ko e (3) ʻoku tau talitekeʻi ʻa e fakamālohí. Ka ko e meʻa ʻe taha ʻe lava ke ne fakamanamanaʻi ʻetau fāʻūtahá ko e tomuʻa fehiʻá. ʻI he kupu hono hokó, te tau ako ai ʻa e founga ʻe lava ke tau ikuʻi ʻaki ʻa e tomuʻa fehiʻá, ʻo hangē ko ia naʻe fai ʻe he muʻaki kau Kalisitiané.