Vahe 26

ʻI ʻApi ʻi Kāpaneume

ʻI HE aʻu mai ki he taimi ko ʻení naʻe ʻilolahia ai ʻa Sīsū, pea naʻe fononga ʻa e kakai tokolahi ki he ngaahi feituʻu mamaʻo naʻá ne nofo aí. Kae kehe, ʻi he hili ʻa e ngaahi ʻaho ʻe niʻihi naʻá ne foki ki Kāpaneume naʻe ofi ki he Tahi Kālelí. Naʻe vave ʻa hono fakamafola ʻa e ongoongo ʻo pehē kuo foki ia ki ʻapi, pea naʻe haʻu ʻa e tokolahi ki he fale naʻá ne ʻi aí. Naʻe haʻu ʻa e kau Fālesi mo e kau faiako ʻi he Laó mei he feituʻu mamaʻo naʻa mo Selusalema.

Naʻe fuʻu tokolahi ʻa e kakaí ʻo nau fakaʻefihiaʻi ʻa e matapaá, pea naʻe ʻikai malava ke hao ha taha kehe ki loto. Naʻe teu ke hoko ha meʻa mātuʻaki fakaofo. Ko e meʻa leva naʻe hokó naʻe mātuʻaki mahuʻinga ia, koeʻuhi ʻokú ne tokoniʻi kitautolu ke tau ʻilo ʻoku maʻu ʻe Sīsū ʻa e mālohi ke toʻo atu ʻa e tupuʻanga ʻo e mamahi ʻa e faʻahinga ʻo e tangatá pea fakafoki ʻa e moʻui lelei fakasinó ki he faʻahinga kotoa pē ʻokú ne loto ke fai pehē kiate kinautolú.

ʻI he lolotonga ʻo hono akoʻi ʻe Sīsū ʻa e kakai tokolahí, naʻe ʻomi ki he falé ʻe he kau tangata ʻe toko fā ha tangata mamatea ʻi ha mohenga. Naʻa nau fiemaʻu ʻa Sīsū ke ne fakamoʻui honau kaumeʻá, ka naʻe ʻikai malava ke nau hū ki he falé koeʻuhi ko e fuʻu tokolahí. Ko e toki meʻa fakalotomamahi ē! Ka, naʻe ʻikai te nau foʻi. Naʻa nau kaka ki he ʻato lafalafá, ʻo ʻai ha ava ai, pea nau tuku hifo ʻa e mohenga ʻa ia naʻe tokoto ai ʻa e tangata mamateá ki he tafaʻaki ʻo Sīsuú.

Naʻe ʻita ʻa Sīsū koeʻuhi ko e fakahohaʻá? ʻIkai ʻaupito! Ka, naʻe maongo lahi kiate ia ʻa ʻenau tuí. Naʻá ne pehē ki he tangata mamateá: “Kuo fakamolemoleʻi hoʻo ngaahi angahalá.” Ka ʻoku malava moʻoni ke fakamolemoleʻi ʻe Sīsū ʻa e ngaahi angahalá? Naʻe ʻikai fakakaukau pehē ʻa e kau sikalaipé mo e kau Fālesí. Naʻa nau fifili ʻi honau lotó: “Ko e hā ʻoku lau pehē ai ʻe he sianá ni? ʻOkú ne lea fieʻotua. Ko hai ha taha ʻoku mafai ke fakamolemole angahala, ka ko e toko taha pē, ko e ʻOtuá?”

ʻI he ʻiloʻi ʻe Sīsū ʻa ʻenau fakakaukaú, naʻá ne pehē kiate kinautolu: “Ko e hā ʻa e ngaahi meʻá ni ʻoku mou fifili ki ai ʻi homou lotó? Ko e fē ʻoku faingofuá, ʻa e pehē ki he tangata mamaté ni, ‘Kuo fakamolemole hoʻo ngaahi angahalá,’ pe ko e pehē, ‘Tuʻu, toʻo ho mohengá, pea ʻalu’?”

Pea naʻe toki fakaʻatā ʻe Sīsū ki he kakai tokolahi, kau ai mo e faʻahinga naʻa nau fakaangaʻi iá, ke nau sio ki ha fakahāhā fakaofo ʻa ia naʻá ne fakahā ʻa ʻene maʻu ʻa e mafai ke ne fakamolemoleʻi ʻa e ngaahi angahala ʻi māmaní pea ko e moʻoni ko e moʻungaʻi tangata lahi taha ia kuo moʻui maí. Naʻá ne hanga ki he tangata mamateá ʻo ne fekau kiate ia: “Tuʻu, toʻo ho mohengá, pea ke foki ki ho ʻapí.” Pea naʻá ne fai leva ia, ʻo ne luelue atu mo hono mohengá ʻi he ʻao ʻo kinautolu kotoa pē! Naʻe ofo ʻa e kakaí kotoa ʻo nau fakalāngilangiʻi ʻa e ʻOtuá ʻo nau pehē: “Kuo teʻeki ke tau mamata ki ha meʻa pehē”!

Naʻá ke fakatokangaʻi naʻe lave ʻa Sīsū ki he ngaahi angahalá ʻo fakafekauʻaki ia ki he mahamahakí pea ko hono fakamolemoleʻi ʻo e ngaahi angahalá ʻoku kaunga ia ki hono maʻu ʻa e moʻui lelei fakasinó? ʻOku fakamatalaʻi ʻe he Tohitapú ʻo pehē ko ʻetau ʻuluaki mātuʻá, ko ʻĀtama, naʻá ne faiangahala pea kuo tau maʻu kotoa ʻa e nunuʻa ʻo e angahala ko iá, ʻa ia ko e mahamahakí mo e maté. Ka, ʻi he pule ʻa e Puleʻanga ʻo e ʻOtuá, ʻe fakamolemoleʻi ʻe Sīsū ʻa e ngaahi angahala ʻa kinautolu kotoa ʻoku nau ʻofa ki he ʻOtuá mo tauhi Iá, pea ʻe toki toʻo atu ʻa e mahamahaki kotoa. Ko e toki meʻa lelei lahi ē ʻe hoko! Maake 2:​1-12; Luke 5:​17-26; Mātiu 9:​1-8; Loma 5:​12, 17-19.

▪ ʻI he tuʻunga fē naʻe hoko ai ha meʻa mātuʻaki fakaofo?

▪ Naʻe aʻu fēfē ʻa e tangata mamateá kia Sīsū?

▪ Ko e hā ʻoku tau angahalaʻia ai kitautolu kotoa, ka ʻi he founga fē naʻe fakahoko mai ai ʻe Sīsū ʻa e ʻamanaki ʻoku malava ke fakamolemoleʻi ʻetau ngaahi angahalá pea lava ke tau maʻu ʻa e moʻui lelei haohaoá?