Ngaahi Fehuʻi mei he Kau Lautohí

ʻI he taimi naʻe fakahinohinoʻi ai ʻe Sīsū ʻa hono kau muimuí ke “tali nonō, neongo ʻoku ʻikai te mou ʻamanaki ʻe to e maʻu mai ha meʻa,” naʻá ne ʻuhingá ʻoku ʻikai totonu ke nau toe ʻeke fakafoki naʻa mo e paʻanga tefitó?

Ko e ngaahi lea ʻa Sīsū ʻoku lēkooti ʻi he Luke 6:35 ʻoku mahinoʻi lelei tahá ʻi he puipuituʻa ʻo e Lao ʻa Mōsesé. Naʻe fekauʻi ai ʻe he ʻOtuá ʻa e kau ʻIsilelí ke nau fai ha ngaahi nō ʻo ʻikai toe ʻeke tupu ki he ngaahi kaungā ʻIsileli ʻa ia naʻa nau hoko ʻo masiva fakapaʻanga pea naʻa nau fiemaʻu ʻa e tokoní. (Ekisoto 22:25; Livitiko 25:​35-​37; Mātiu 5:​42) Ko e ngaahi nō ko ení naʻe ʻikai ki ha taumuʻa fakakomēsiale, ki ha ngāue fakapisinisi. ʻI hono kehé, ko e ngaahi nō ʻikai ʻeke ha tupu peheé naʻe fiemaʻú ke tokoniʻi ai ʻa e masivá pe faingatāmakí. He ko ē, ʻe hoko ia ko ha mātuʻaki taʻeʻofa ke maʻu tupu mei ha ngaahi maliu fakaʻekonōmika ʻa ha kaungāʻapi. Neongo ia, ko e tokotaha naʻá ne foaki ha noó naʻe ʻi ai ʻa e totonu ke ne toe maʻu mai ʻa e paʻanga tefitó, ko ha tohi fakapapau (maluʻi ʻo e noó) ʻoku fai ia ʻi he taimi ʻe niʻihi.​—Teutalonome 15:​7, 8.

Lolotonga hono pouaki ʻa e Laó, naʻe fai ki ai ʻe Sīsū naʻa mo ha ngāue mata-lahi ange, ʻi he pehē ko e tokotaha ʻokú ne fai ha tokoní ʻoku ʻikai totonu ke ne ʻamanaki ʻe “to e maʻu mai ha meʻa.” ʻI he hangē ko e kau ʻIsilelí, ʻoku hokosia he taimi ʻe niʻihi ʻe he kau Kalisitiané ʻa e ngaahi maliu fakaʻekonōmika, pe ko e ngaahi tuʻunga kehe ʻa ia ʻe hoko nai ai ʻo nau masiva ʻangoʻango, naʻa mo tuēnoa. Kapau ʻoku kumi ha tokoua Kalisitiane ʻi ha tuʻunga faingatāmaki pehē ki ha tokoni fakapaʻanga, ʻikai ʻe anga-ʻofa ke fai ha tokoni? Ko e moʻoni, ko e ʻofa moʻoní ʻe ueʻi ai ha kaungā Kalisitiane ke loto ke ne tokoniʻi ha tokoua ʻa ia ʻoku hoko ki ai ha faingataʻa fakapaʻanga mafatukituki ʻo ʻikai ʻi hano foʻui. (Palovepi 3:​27) ʻE malava nai ke fai ha meʻaʻofa ki ha tokoua masiva pehē, neongo ko hono lahí ʻe siʻi nai ia ʻi he meʻa ko ia ʻe foaki ko ha noó.​—Sāme 37:21.

ʻI he ʻuluaki senituli T.S., naʻe fekauʻi ai ʻa e ʻapositolo ko Paulá mo Panepasa ke na ʻave ʻa e ngaahi tokoni mei he kau Kalisitiane ʻi ʻĒsia Mainá ki honau fanga tokoua ʻi Siuteá koeʻuhi ko ha honge. (Ngāue 11:​28-​30) Hangē pē ko e ʻaho ní, ʻi he patō ha fakatamaki, ʻoku faʻa ʻave ai ʻe he kau Kalisitiané ha ngaahi meʻaʻofa ki honau fanga tokoua masivá. ʻI he fai peheé, ʻoku nau toe fai ai ha fakamoʻoni lelei ki he niʻihi kehé. (Mātiu 5:​16) Ko e moʻoni, ko e fakakaukau pea mo e tuʻunga ʻo e tokotaha ʻoku kumi tokoní ʻoku totonu ke fakakaukauʻi. Ko e hā ʻokú ne masiva aí? ʻOku taau ke fakatokangaʻi ʻa e ngaahi lea ʻa Paulá: “Ka ʻikai fie ngaue ha taha, pea ʻoua foki naʻa ne kai.”—2 Tesalonaika 3:10.

Kapau ʻoku ʻikai ke masiva ʻangoʻango ha tokoua ʻokú ne kole ha nō ka ʻokú ne fiemaʻu ha tokoni fakataimi pē ke tokoniʻi ia hili ha maliu fakapaʻanga, ʻe hā feʻungamālie nai ke ʻoange kiate ia ha nō ʻo ʻikai ʻeke ha tupu. ʻI he malumalu ʻo e ngaahi tuʻunga peheé, ko hono fai ha nō fakataha mo ha fakakaukau ke totongi fakafoki kakató ʻe ʻikai ke fepaki ia mo e ngaahi lea ʻa Sīsū ʻoku maʻu ʻi he Luke 6:35. ʻOku totonu ke fakahaaʻi fakapepa ha aleapau, pea ko e tokotaha ʻokú ne maʻu ʻa e noó ʻoku totonu ke ne fai ʻa e feinga kotoa ke totongi fakafoki ia ʻo fakatatau ki he ngaahi meʻa naʻe fai ki ai ʻa e felotoí. Ko e moʻoni, ko e ʻofa faka-Kalisitiané ʻoku totonu ke ne ueʻi ʻa e tokotaha kole noó ke ne totongi fakafoki ʻa e noó ʻo hangē tofu pē ko hono ueʻi ʻe he ʻofá ʻa e tokotaha foakí ke ne tali ʻa e noó.

Ko e tokotaha ʻoku fakakaukau ke foaki ha noó (pe foaki ha meʻaʻofá) ʻe toe fiemaʻu ke ne sivisiviʻi ʻa hono tuʻunga fakafāmilí tonu. Hangē ko ení, te ne fakangaloku ai ʻa ʻene malava ke tokanga ki he ngaahi fiemaʻu ʻa e ngaahi mēmipa ʻo hono fāmilí, ʻa ia ko ha meʻa muʻomuʻa Fakatohitapú? (2 Kolinito 8:​12; 1 Timote 5:8) Neongo ia, ʻoku kumi ʻa e kau Kalisitiané ki ha ngaahi faingamālie ke fakahaaʻi ai ʻa e feʻofaʻakí, ʻo fakahāhā ʻa e ʻofa ko iá ʻi he ngaahi founga ʻaonga ʻa ia ʻoku fehoanaki mo e ngaahi tefitoʻi moʻoni Fakatohitapú.​—Semisi 1:​27; 1 Sione 3:​18; 4:​7-​11.