ʻOfa mo e Houngaʻia kia Sihová ʻOku Taki Atu ki he Papitaiso

1-2. Hangē ko ia ʻoku fakahaaʻi ʻi he Ngāue 8:27-31, 35-38, ko e hā naʻá ne ueʻi ʻa e ʻiunoke ʻItiopeá ke papitaisó?

ʻOKÚ KE loto ke hoko ʻo papitaiso ko ha ākonga ʻa Kalaisi? Ko e ʻofá mo e houngaʻiá kuó ne ueʻi ʻa e tokolahi ke fai ʻa e fili ko iá. Fakakaukau ki he fakatātā fekauʻaki mo ha ʻōfisa naʻe ngāue ki he kuini ʻo ʻItiopeá.

² Naʻe ngāueʻaki vave ʻe he tangata ʻItiopeá ʻa e meʻa naʻá ne ako mei he Folofolá. (Lau ʻa e Ngāue 8:27-31, 35-38.) Ko e hā naʻá ne ueʻi iá? Naʻá ne houngaʻia moʻoni ʻi he Folofola ʻa e ʻOtuá; naʻá ne lau ha konga mei he tohi ʻa ʻAiseá ʻi heʻene heka ʻi ha saliote. Pea ʻi he lea ʻa Filipe kiate iá, naʻe fakatupulekina ʻe he tangatá ha houngaʻia ʻi he meʻa naʻe fai ʻe Sīsū maʻaná. Ka ko e hā naʻe fononga ai ʻa e ʻōfisá ki Selusalemá? Koeʻuhí naʻá ne ʻosi fakatupulekina ha ʻofa kia Sihova. ʻOku anga-fēfē ʻetau ʻiloʻi iá? Naʻe toki ʻosi pē ʻene lotu kia Sihova ʻi Selusalema. ʻOku ngalingali naʻe liʻaki ʻe he tangatá ʻa e lotu naʻá ne tupu hake aí peá ne kau ki he puleʻanga pē ʻe taha naʻe fakatapui ki he ʻOtua moʻoní. Ko e ʻofa kia Sihova tatau pē ko ení naʻá ne ueʻi ia ke fou ʻi ha toe sitepu mātuʻaki mahuʻinga ʻe taha, ʻa e hoko ʻo papitaiso pea hoko ko ha ākonga ʻa Kalaisi.—Māt. 28:19.

 3. Ko e hā ʻokú ne taʻofi nai ha tokotaha mei he hoko ʻo papitaisó? (Sio ki he puha “Ko e Hā ʻOku ʻi Ho Lotó?”)

³ Ko e ʻofa kia Sihová ʻoku lava ke ne ueʻi koe ke hoko ʻo papitaiso. Ka ʻe toe taʻofi nai koe ʻe he ʻofá mei he fai peheé. Anga-fēfē? Fakatokangaʻi ʻa e ngaahi fakatātā ʻe niʻihi. ʻOkú ke ʻofa lahi nai ʻi ho fāmili taʻetuí mo e kaungāmeʻá, pea ʻokú ke hohaʻa nai kapau te ke papitaiso, te nau fehiʻa ʻiate koe. (Māt. 10:37) Pe ʻokú ke ʻofa ʻi he ngaahi tōʻonga ʻokú ke ʻilo ʻoku fehiʻa ai ʻa e ʻOtuá, pea ʻokú ke ʻilo nai ʻoku faingataʻa ke taʻofi ʻa e ngaahi tōʻonga ko iá. (Saame 97:10) Pe kuó ke tupu hake nai ʻo kātoangaʻi ʻa e ngaahi anga fakafonua ʻoku fekauʻaki mo e lotu loí. ʻOkú ke saiʻia nai ʻi he ngaahi manatu melie ʻoku fekauʻaki mo e ngaahi kātoanga ko iá. Ko hono olá, ʻe faingataʻa nai ke ke taʻofi hono tauhi ʻa e ngaahi anga fakafonua ʻoku taʻefakahōifua kia Sihová. (1 Kol. 10:20, 21) Ko e fehuʻí leva, “Ko e hā pe ko hai ʻoku ou ʻofa taha aí?”

 4. Ko e hā ʻa e fakaueʻiloto tefito te ne taki atu koe ki he papitaisó?

⁴ ʻOku lahi ʻa e ngaahi meʻa ʻaonga ke ke ʻofa ai mo fakahoungaʻi. Ko e fakatātaá, naʻa mo e ki muʻa ke ako mo e Kau Fakamoʻoni ʻa Sihová, naʻá ke houngaʻia lahi nai ʻi he Tohi Tapú. Pea naʻá ke fakatupulekina nai ha ʻofa kia Sīsū. ʻI hoʻo ʻiloʻi he taimí ni ʻa e Kau Fakamoʻoni ʻa Sihová, ʻokú ke saiʻia nai ke feohi mo kinautolu. ʻI hoʻo saiʻia pe ʻofa ʻi he ngaahi meʻa lelei ko iá heʻikai ʻotomētiki pē ai hoʻo loto ke fakatapui hoʻo moʻuí kia Sihova pea papitaiso. Ko e fakaueʻiloto tefito te ne taki atu koe ki he papitaisó ko e ʻofa kia Sihova ko e ʻOtuá. ʻI hoʻo ʻofa kia Sihova ʻo laka ange ʻi ha toe meʻá, heʻikai ai te ke fakaʻatā ha meʻa pe ko ha tokotaha ke ne taʻofi koe mei he tauhi kiate iá. ʻE lava ke ke vakai ki he ʻofa kia Sihová ko ha matapā ia ki he papitaisó pea mo ha maluʻi ke ke tauhi faitōnunga ai pē ki he ʻOtuá.

 5. Ko e hā ʻa e fehuʻi te tau lāulea ki aí?

⁵ Naʻe pehē ʻe Sīsū kuo pau ke tau ʻofa kia Sihova ʻaki hotau lotó, moʻuí, ʻatamaí mo e mālohí kotoa. (Mk. 12:30) ʻE lava fēfē ke ke ako ke ʻofa mo fakaʻapaʻapa lahi pehē kia Sihova? ʻI he fakakaukauloto ki he ʻofa mai ʻa Sihova kiate kitautolú ʻoku ueʻi ai ke tau ʻofa kiate ia. (1 Sio. 4:19) Ko e hā ha toe ngaahi ongoʻi mo e tōʻonga ʻe fakanatula hoʻo maʻu ʻi hoʻo fakatupulekina pē ʻa e ʻofa mahuʻinga taha ko iá?b

 6. Fakatatau ki he Loma 1:20, ko e hā ʻa e founga ʻe taha ʻoku lava ke ke ako ai fekauʻaki mo Sihová?

⁶ Ako fekauʻaki mo Sihova fakafou ʻi heʻene fakatupú. (Lau ʻa e Loma 1:20; Fkh. 4:11) Fakalaulauloto ki he poto ʻoku hā mahino ʻi hono faʻu ʻo e ʻuluʻakaú mo e fanga manú. Ako ha meʻa fekauʻaki mo e founga fakaofo hono ngaohi ho sinó. (Saame 139:14) Pea fakakaukau fekauʻaki mo e mālohi naʻe ʻai ʻe Sihova ki he laʻaá, ʻo ʻiloʻi ko e taha pē ia ʻo e ngaahi fetuʻu ʻe laui pilioná.c (ʻAi. 40:26) ʻI hoʻo fai peheé, ko hoʻo fakaʻapaʻapa kia Sihová ʻe toe lahi ange. Kae kehe, ko hono ʻiloʻi ko Sihova ʻoku poto mo mālohí ko e konga pē ia ʻo e makatuʻunga ki ho vahaʻangatae mo iá. Ke langa hake ha ʻofa mālohi kia Sihova, ʻoku fiemaʻu ke ke ʻilo lahi ange fekauʻaki mo ia.

 7. Ke ʻofa lahi kia Sihová, ko e hā ʻoku fiemaʻu ke ke tuipau fekauʻaki mo iá?

⁷ ʻOku fiemaʻu ke ke tuipau ʻoku tokanga atu ʻa Sihova kiate koe fakafoʻituitui. ʻOku faingataʻa ke ke tui ko e Tokotaha-Fakatupu ʻo hēvani mo māmaní ʻokú ne ʻiloʻi ʻokú ke ʻi ai pea ʻokú ne tokanga atu kiate koe? Kapau ko ia, manatuʻi ko Sihová “ʻoku ʻikai te ne mamaʻo mei ha taha ʻo kitautolu.” (Ngā. 17:26-28) ʻOkú ne ‘hakule ʻa e ngaahi loto kotoa pē,’ pea ʻokú ne talaʻofa atu kiate koe, ʻo hangē ko e meʻa naʻe tala ange ʻe Tēvita kia Solomoné, “kapau te ke kumi kiate ia, te ne fakaʻatā atu ke ke ʻiloʻi ia.” (1 Kal. 28:9) Ko hono moʻoní, ko e ʻuhinga ʻokú ke ako ai he taimí ni ʻa e Tohi Tapú, koeʻuhi he ʻoku pehē ʻe Sihova, “Kuó u tohoakiʻi mai . . . koe kiate au.” (Sel. 31:3) Ko e lahi ange hoʻo houngaʻia ʻi he meʻa kotoa kuo fai ʻe Sihova maʻaú, ko e lahi ange ia hoʻo ʻofa kiate iá.

 8. ʻE lava fēfē ke ke tali ʻa e ʻofa ʻa Sihová?

⁸ Ko e founga ʻe taha ke tali ai ʻa e ʻofa ʻa Sihová ko e talanoa kiate ia ʻi he lotu. Ko hoʻo ʻofa ki he ʻOtuá ʻe tupulaki ʻi hoʻo tala kiate ia hoʻo ngaahi hohaʻá pea fakamālō kiate ia ki he meʻa kotoa ʻokú ne fai maʻaú. Pea ko e haʻi ʻi ho vahaʻa mo Sihová ʻe fakaivimālohiʻi ʻi hoʻo sio ki he anga ʻene tali hoʻo lotú. (Saame 116:1) Te ke hoko ʻo tuipau ʻokú ne mahinoʻi koe. Ka ke toe ofi ange kia Sihová, ʻoku fiemaʻu ke ke mahinoʻi ʻa e anga ʻene fakakaukaú. Pea ʻoku fiemaʻu ke ke ʻilo ʻa e meʻa ʻokú ne fiemaʻu meiate koé. Ko e founga pē ʻe taha te ke maʻu ai ʻa e ʻilo ko iá ko hono ako ʻene Folofolá, ʻa e Tohi Tapú.

 9. ʻE lava fēfē ke ke fakahaaʻi ʻokú ke houngaʻia ʻi he Tohi Tapú?

⁹ Ako ke houngaʻia ʻi he Folofola ʻa e ʻOtuá, ʻa e Tohi Tapú. Ko e Tohi Tapú pē ʻoku maʻu ai ʻa e moʻoni fekauʻaki mo Sihova mo ʻene taumuʻa kiate koé. ʻOkú ke fakahaaʻi hoʻo houngaʻia ʻi he Tohi Tapú ʻaki hono lau ia ʻi he ʻaho taki taha, teuteu ki hoʻo taimi ako Tohi Tapu fakafoʻituituí pea ngāueʻaki ʻa e meʻa ʻokú ke akó. (Saame 119:97, 99; Sione 17:17) ʻOkú ke maʻu ha taimi-tēpile lau Tohi Tapu fakafoʻituitui? ʻOkú ke muimui ʻi he taimi-tēpile ko iá, ʻo fakapapauʻi ke lau ʻa e Tohi Tapú ʻi he ʻaho taki taha?

10. Ko e hā ʻa e taha ʻo e ngaahi tafaʻaki makehe ʻo e Tohi Tapú?

¹⁰ Ko e taha ʻo e ngaahi tafaʻaki makehe ʻo e Tohi Tapú ko hono maʻu ai ʻa e ngaahi fakamatala fakamoʻoni sio tonu fekauʻaki mo Sīsū. Ko e lēkooti tonu mātē pē ia ʻoku fakamatalaʻi ai ʻa e meʻa kuo fai ʻe Sīsū maʻaú. ʻI hoʻo ako ʻa e meʻa naʻe leaʻaki mo fai ʻe Sīsuú, ʻoku ngalingali ʻe ueʻi ai koe ke faʻu ha kaumeʻa mo ia.

11. ʻE lava fēfē ke ke ako ke ʻofa kia Sihova?

¹¹ Ako ke ʻofa kia Sīsū, pea ko hoʻo ʻofa kia Sihová ʻe tupulaki. Ko e hā hono ʻuhingá? Koeʻuhi ʻoku tapua haohaoa mai ʻe Sīsū ʻa e ngaahi ʻulungaanga ʻene Tamaí. (Sione 14:9) Ko ia ko e lahi ange hoʻo ako fekauʻaki mo Sīsuú, ko e lelei ange ia hoʻo mahinoʻi mo houngaʻia ʻia Sihová. Fakakaukau ki he manavaʻofa naʻe fakahaaʻi ʻe Sīsū ki he faʻahinga naʻe siolalo ki ai ʻa e niʻihi kehé—ʻa e masivá, mahamahakí mo tuʻu laveangofuá. Fakakaukau foki ki he faleʻi ʻaonga ʻokú ne ʻoatú pea mo e lelei ange hoʻo moʻuí ʻi hoʻo fanongo kiate iá.—Māt. 5:1-11; 7:24-27.

12. ʻI hoʻo ako fekauʻaki mo Sīsuú, ko e hā ʻe ueʻi nai ai koe ke faí?

¹² Ko hoʻo ʻofa kia Sīsuú ʻoku ngalingali ʻe toe mālohi ange ʻi hoʻo fakakaukau lahi fekauʻaki mo e feilaulau naʻá ne fai koeʻuhi ke lava ʻo fakamolemoleʻi ʻetau ngaahi angahalá. (Māt. 20:28) ʻI hoʻo mahinoʻi naʻe loto-lelei ʻa Sīsū ke pekia maʻaú, ʻe ueʻi nai ai koe ke fakatomala pea kumi ki he fakamolemole ʻa Sihová. (Ngā. 3:19, 20; 1 Sio. 1:9) Pea ʻi hoʻo hoko ʻo ʻofa kia Sīsū mo Sihová, ʻe fakanatula pē hono tohoakiʻi koe ki he niʻihi ʻoku nau maʻu ʻa e ongoʻi tatau.

13. Ko e hā kuo tokonaki ʻe Sihova maʻaú?

¹³ Ako ke ʻofa ʻi he fāmili ʻo Sihová. Heʻikai nai ke mahinoʻi ʻe ho fāmili taʻetuí mo e kaungāmeʻa ki muʻá ʻa e ʻuhinga ʻokú ke loto ai ke fakatapui hoʻo moʻuí kia Sihová. ʻE aʻu nai ʻo nau fakafepakiʻi koe. ʻE tokoniʻi koe ʻe Sihova ʻaki hono tokonaki atu ha fāmili fakalaumālie. Kapau te ke nofo ofi ki he fāmili fakalaumālie ko iá, te ke maʻu ʻa e ʻofa mo e poupou ʻokú ke fiemaʻú. (Mk. 10:29, 30; Hep. 10:24, 25) ʻI he faai atu ʻa e taimí, ʻe kau fakataha nai mo koe ʻa e ngaahi mēmipa ho fāmilí ʻi he tauhi kia Sihová pea moʻuiʻaki ʻene ngaahi tuʻungá.—1 Pita 2:12.

14. Hangē ko ia ʻoku hā ʻi he 1 Sione 5:3, ko e hā kuó ke ʻiloʻi fekauʻaki mo e ngaahi tuʻunga ʻa Sihová?

¹⁴ Ako ke houngaʻia mo ngāueʻaki ʻa e ngaahi tuʻunga ʻa Sihová. Ki muʻa ke ke ʻiloʻi ʻa Sihová, naʻe ʻi ai nai hoʻo ngaahi tuʻunga pē ʻaʻau, ka ʻi he taimi ní ʻokú ke vakai ʻoku lelei ange ʻa e ngaahi tuʻunga ʻa Sihová. (Saame 1:1-3; lau ʻa e 1 Sione 5:3.) Fakakaukau ki he akonaki ʻa e Tohi Tapú fekauʻaki mo e husepānití, uaifí, ngaahi mātuʻá mo e fānaú. (ʻEf. 5:22–6:4) ʻI hoʻo ngāueʻaki ʻa e faleʻi ko iá, kuó ke sio ʻoku fakalakalaka ange hoʻo moʻui fakafāmilí? ʻI hoʻo talangofua ki he tataki ʻa Sihova fekauʻaki mo hono fili fakapotopoto ho kaungāmeʻá, kuo fakalakalaka ange hoʻo ngaahi tōʻongá? ʻOkú ke fiefia ange? (Pal. 13:20; 1 Kol. 15:33) ʻOku ngalingali ko e tali ki he ngaahi fehuʻi ko iá ko e ʻio.

15. Ko e hā ʻoku lava ke ke fai kapau ʻokú ke fiemaʻu ha tokoni ki hono ngāueʻaki ʻa e ngaahi tefitoʻi moʻoni Fakatohitapú?

¹⁵ ʻI he taimi ʻe niʻihi, ʻe faingataʻa nai ke ke ʻiloʻi ʻa e founga ke ngāueʻaki ai ʻa e ngaahi tefitoʻi moʻoni Fakatohitapu ʻokú ke akó. Ko e ʻuhinga ia ʻoku ngāueʻaki ai ʻe Sihova ʻene kautahá ke tokonaki atu ʻa e ngaahi fakamatala makatuʻunga ʻi he Tohi Tapú ʻe lava ke tokoni kiate koe ke ʻiloʻi ʻa e tonú mo e halá. (Hep. 5:13, 14) ʻI hoʻo lau mo ako ʻa e fakamatala ko ení, te ke sio ai ki he anga ʻo ʻene ʻaonga mo paú, pea ʻoku ngalingali ʻe tohoakiʻi ai koe ke ofi ki he kautaha ʻa Sihová.

16. Kuo anga-fēfē hono fokotuʻutuʻu ʻe Sihova ʻene kakaí?

¹⁶ Ako ke ʻofa mo poupouʻi ʻa e kautaha ʻa Sihová. Kuo fokotuʻutuʻu ʻe Sihova ʻene kakaí ki ha fakatahaʻanga; ko hono ʻAló, ʻa Sīsū, ʻa honau ʻulú. (ʻEf. 1:22; 5:23) Kuo fakanofo ʻe Sīsū ha kiʻi kulupu ʻo e kau tangata pani ke takimuʻa ʻi hono fokotuʻutuʻu ʻa e ngāue ʻokú ne loto ke fai he ʻaho ní. Naʻe lave ʻa Sīsū ki he kulupu ʻo e kau tangata ko ení ko e “tamaioʻeiki anga-tonu mo potó,” pea ʻoku nau fakahoko fakamātoato honau fatongia ke fafanga mo maluʻi fakalaumālie koe. (Māt. 24:45-47) Ko e taha ʻo e ngaahi founga ʻoku tokoni ai ʻa e tamaioʻeiki anga-tonú ke tokangaʻi koé ko hono fakapapauʻi ʻoku fakanofo ha kau mātuʻa taau ke tauhi koe. (ʻAi. 32:1, 2; Hep. 13:17; 1 Pita 5:2, 3) ʻOku loto-lelei ʻa e kau mātuʻá ke foaki atu kinautolu, fakafiemālieʻi koe, pea tokoniʻi koe ke ʻunuʻunu ke toe ofi ange kia Sihova. Ka ko e taha ʻo e ngaahi meʻa mahuʻinga taha ʻe lava ke nau fai maʻaú ko hono tokoniʻi koe ke akoʻi ʻa e niʻihi kehé fekauʻaki mo Sihova.—ʻEf. 4:11-13.

17. Fakatatau ki he Loma 10:10, 13, 14, ko e hā ʻoku tau talanoa ai ki he niʻihi kehé fekauʻaki mo Sihová?

¹⁷ Tokoniʻi ʻa e niʻihi kehé ke ako ke ʻofa kia Sihova. Naʻe tala ʻe Sīsū ki hono kau muimuí ke akoʻi ʻa e niʻihi kehé fekauʻaki mo Sihova. (Māt. 28:19, 20) ʻOku malava ke tau talangofua ki he fekau ko iá koeʻuhí ʻoku tau ʻilo ʻoku totonu ke tau talangofua ki ai. Ka ʻi he tupulaki hoʻo ʻofa kia Sihová, te ke ongoʻi tatau ai mo e ʻapositolo ko Pita mo Sioné, ʻa ia naʻá na pehē: “ʻE ʻikai lava ke tuku ʻema lea ʻo fekauʻaki mo e ngaahi meʻa kuó ma mamata mo fanongo ki aí.” (Ngā. 4:20) Ko e ngaahi meʻa siʻi pē ʻoku ʻomi ai ʻa e fiefia lahi ʻo hangē ko e fiefia ʻoku maʻu mei hono tokoniʻi ha taha ke ʻofa kia Sihova. Sioloto atu ki he fiefia lahi ʻa e ʻevangeliō ko Filipé ʻi he taimi naʻá ne tokoniʻi ai ʻa e ʻItiopeá ke ako ʻa e moʻoni mei he Folofolá pea papitaisó! ʻI hoʻo faʻifaʻitaki kia Filipe pea talangofua ki he fekau ʻa Sīsū ke malangá, ʻokú ke fakamoʻoniʻi ai ʻokú ke loto ke hoko ko e taha ʻo e Kau Fakamoʻoni ʻa Sihová. (Lau ʻa e Loma 10:10, 13, 14.) ʻI he tuʻunga ko iá, ʻoku ngalingali te ke ʻeke ʻa e fehuʻi tatau ʻo hangē ko e ʻItiopeá: “Ko e hā ha meʻa ʻokú ne taʻofi au mei haʻaku papitaisó?”—Ngā. 8:36.

18. Ko e hā te tau lāulea ki ai ʻi he kupu hono hokó?

¹⁸ Te ke fou atu ʻi he sitepu mahuʻinga taha ʻi hoʻo moʻuí ʻi he taimi ʻokú ke fili ai ke papitaisó. Koeʻuhi ko ha sitepu mafatukituki ia, ʻoku fiemaʻu ke ke fakakaukau fakalelei ki he meʻa ʻoku kaunga ki aí. Ko e hā ʻoku fiemaʻu ke ke ʻilo fekauʻaki mo e papitaisó? Ko e hā ʻoku fiemaʻu ke ke fai ʻi he ki muʻa mo e hili hoʻo papitaisó? Ko e ongo fehuʻi ko iá ʻe tali ʻi he kupu hono hokó.