Faʻifaʻitaki ki Heʻenau Tuí

Naʻá Ne Faʻo “ki Hono Loto”

NAʻE mafulifuli holo ʻikai fiemālie ʻa Mele ʻi heʻene heka ʻi he kiʻi monumanu fua kavengá. Kuó ne heka ai ʻi ha ngaahi houa. Naʻe luelue māmālie pē ʻi muʻa ʻa Siosefa, ʻi heʻene taki ʻa e fononga mamaʻo ki Selusalemá. Naʻe toe ongoʻi ʻe Mele ʻa e ngaue ʻa e kiʻi moʻui ʻi loto ʻiate iá.

Ne ʻosi lahi e māhina ʻo Melé; ʻoku fakamatalaʻi ia ʻe he Tohi Tapú ʻi he taimi ko ení ʻaki ʻa e kupuʻi lea “kuo vave ke hoko e fāʻele.” (Luke 2:6, Ko e Taulua) ʻI he fakalaka atu ʻa e ongo meʻá ʻi he ngoue ki he ngoue, mahalo naʻe hanga hake ʻa e kau fāmá mei heʻenau palaú pe tūtūʻí mo nau fifili pe ko e hā ʻoku fāifononga ai ha fefine ʻokú ne ʻi ha tuʻunga pehē. Ko e hā naʻá ne tataki ʻa Mele ke mamaʻo ʻaupito ai mei hono ʻapi ʻi Nasaletí?

Naʻe kamata kotoa ia ʻi he ngaahi māhina ki muʻa ʻi he taimi naʻe maʻu ai ʻe he finemui Siu ko ení ha ngāue naʻe makehe ʻi he hisitōlia kotoa ʻo e faʻahinga ʻo e tangatá. Naʻe pau ke ne ʻaloʻi ʻa e tama ʻa ia ʻe hoko ko e Mīsaiá, ko e ʻAlo ʻo e ʻOtuá! (Luke 1:35) ʻI he ofi ki hono taimi fāʻelé, naʻe fiemaʻu ai ke fai ʻa e fononga ko ení. ʻI he lolotonga ʻa e fonongá, naʻe fehangahangai ai ʻa Mele mo ha ngaahi meʻa naʻá ne ʻahiʻahiʻi ʻa ʻene tuí. Tau sio angé ki he meʻa naʻá ne tokoniʻi ia ke ne kei mālohi fakalaumālie aí.

Fononga ki Pētelihema

Naʻe ʻikai ko Siosefa pē mo Mele naʻe fonongá. Ko e toki ʻosi ia ʻa e tuʻutuʻuni ʻa Sisa ʻAkosito ke fakahoko ha tohi kakai ʻi he fonuá, pea naʻe pau ai ke fononga ʻa e kakaí ki honau kolo tupuʻangá koeʻuhi ke kau ki ai. Naʻe fēfē ʻa e tali ʻa Siosefá? ʻOku pehē ʻe he fakamatalá: “Pea fononga hake mo Siosefa foki mei he kolo ko Nasaleti ʻi Kaleli, ko ʻene ʻalu ki Siutea, ki he kolo ʻo Tevita, ʻa ia ʻoku hingoa ko Petelihema; (he naʻa ne kau ki he hako mo e faʻahinga ʻo Tevita).”—Luke 2:1-4.

Naʻe ʻikai ke hokonoa pē ʻa hono fai ʻe Sisa ʻa ʻene tuʻutuʻuní ʻi he taimi ko ení. Ko ha kikite naʻe tohi ʻi he taʻu nai ʻe 700 ki muʻa naʻe tomuʻa tala ai ko e Mīsaiá ʻe ʻaloʻi ia ʻi Pētelihema. Ko ia ko e meʻa leva naʻe hokó naʻe ʻi ai ha kolo ko Pētelihema ʻi he kilomita pē ʻe 11 mei Nasaleti. Kae kehe, naʻe fakahaaʻi papau ʻe he kikité ko “Petelihema Efalata” ʻe haʻu mei ai ʻa e Mīsaiá. (Maika 5:2) ʻI he ngaahi hala he ʻaho ní, ko e kilomita moʻungaʻia nai ʻe 150 ʻa e mamaʻo ʻo Nasaleti mei he kiʻi kolo ko ia ʻi he tafaʻaki fakatongá. Ko e Pētelihema ia naʻe fekau ʻa Siosefa ke ʻalu ki aí, he ko e ʻapi tukufakaholo ia ʻo e fāmili ʻo Tuʻi Tēvitá—ʻa e fāmili naʻe fakatou kau ki ai ʻa Siosefa mo hono hoá.

ʻE poupouʻi ʻe Mele ʻa Siosefa ʻi heʻene fili ke fai ki aí? He ko ē, ʻe faingataʻa kiate ia ʻa e fonongá. ʻOku ngalingali ko e konga ki muʻa ia ʻo e taimi fakatōlau ʻo e taʻú, ko ia naʻe malava ke ʻuhoʻuha ʻi he faai atu ke ngata ʻa e taimi laʻalaʻaá. Ko e toe meʻa ʻe taha, ko e kupuʻi lea ‘fononga hake mei Kalelí’ ʻoku feʻungamālie, he ko Pētelihemá naʻe tuʻu ʻi ha feituʻu māʻolunga laka hake he mita ʻe 760—ko ha kaka lahi, faingataʻa ʻi he fakaʻosiʻosi ʻa e fononga lalo ʻi he laui ʻaho. Mahalo pē naʻe lōloa ange ia he tuʻunga anga-mahení, he naʻe fiemaʻu nai ʻi he tuʻunga ʻo Melé ha ngaahi vahaʻa taimi mālōlō. ʻI he taimi ko ení, ʻi he ofi ki he fāʻelé, ʻe holi nai ai ha finemui ke nofo ofi ki ʻapi, ʻa ia ʻoku ʻi ai hono fāmilí mo e ngaahi kaumeʻá kuo nau ʻosi mateuteu ke tokoni ʻi he taimi ʻo ʻene langaá. ʻOku ʻikai ha veiveiua, naʻe fiemaʻu ke ne loto-toʻa ke fai ai e fononga ko ení.

Neongo ia, ʻoku tohi ʻe Luke naʻe ʻalu ʻa Siosefa “ke na tohi ai mo Mele.” ʻOkú ne toe pehē ko Melé “kuo poloʻi [kia Siosefa].” (Luke 2:4, 5) Ko e hoko ko e uaifi ʻo Siosefá naʻá ne tākiekina lahi ʻa e ngaahi fili ʻa Melé. Naʻá ne vakai ki hono husepānití ko hono ʻulu fakalaumālie, ʻo ne tali lelei ʻa hono ngafa kuo ʻoange ʻe he ʻOtuá ko e tokoni kiate ia ʻaki ʻene poupouʻi ia ʻi heʻene ngaahi fili naʻe faí.a Ko ia naʻá ne ikuʻi ʻa e pole ko eni naʻe malava ke hoko ki heʻene tuí ʻaki pē ʻa ʻene talangofua.

Ko e toe hā ha meʻa naʻe ueʻi nai ai ʻa Mele ke talangofuá? Naʻá ne ʻilo ki he kikite fekauʻaki mo Pētelihema ko e feituʻu ia ʻe ʻaloʻi ai ʻa e Mīsaiá? ʻOku ʻikai ke tala mai ia ʻe he Tohi Tapú. Heʻikai lava ke tau pehē naʻe ʻikai ke ne ʻilo ki ai, he ko e moʻoniʻi meʻá ni ʻoku hā mahino naʻe fai e ʻilo lahi ki ai ʻi he lotolotonga ʻo e kau taki lotú pea naʻa mo e kakaí fakalūkufua. (Mātiu 2:1-7; Sione 7:40-42) Naʻe ʻikai ʻaupito ke taʻeʻilo ʻa Mele ki he Tohi Tapú. (Luke 1:46-55) Ko e hā pē ʻa e tuʻungá, pe naʻe fili ʻa Mele ke fononga koeʻuhi ko ʻene talangofua ki hono husepānití, ki he tuʻutuʻuni fakapuleʻangá, pe ki he kikite tonu ʻa Sihová—pe koeʻuhí ko e fakatahaʻi ʻo e ngaahi meʻá ni kotoa—naʻá ne fokotuʻu ha faʻifaʻitakiʻanga tuʻu-ki-muʻa. ʻOku fakamahuʻingaʻi lahi ʻe Sihova ha laumālie fakatōkilalo mo talangofua fakatouʻosi ʻi he kakai tangatá mo e kakai fefiné. ʻI hotau ʻahó ni, ʻi he ʻikai faʻa fakamahuʻingaʻi ai ʻa e fakamoʻulaloá, ʻoku tuʻu ai ʻa e faʻifaʻitakiʻanga ʻa Melé ko ha fakaʻilonga ki he kakai faitōnunga ʻi he feituʻu kotoa pē.

ʻAloʻi ʻo Kalaisí

Kuo pau pē naʻe ongoʻi fiefia ʻaupito ʻa Mele ʻi heʻene fuofua sio atu kuo ʻasi mai ʻa Pētelihemá. ʻI heʻena kaka he tafaʻaki moʻungá, ʻo fakalaka atu he ngaahi ngoue ʻōlivé—naʻe kau ʻi he ngaahi ʻakau fua naʻe toli fakaʻosí—ʻoku pau pē nai naʻe fakakaukau ʻa Mele mo Siosefa fekauʻaki mo e hisitōlia ʻo e kiʻi koló ni. Naʻe ʻikai fuʻu mahuʻinga ia ke lau ʻi he ngaahi kolo lalahi ʻo Siutá, ʻo hangē tofu pē ko e meʻa naʻe leaʻaki ʻe he palōfita ko Maiká; neongo ia ko e feituʻu ia naʻe fāʻeleʻi ai ʻa Pōasi, Nāomi, pea ki mui ai ko Tēvita, ʻo laka hake ʻi ha taʻu ʻe taha afe ki muʻa.

Naʻe ʻalu atu ʻa Mele mo Siosefá kuo tokolahi ʻa e kiʻi koló. Ne ʻosi aʻu ki ai ʻa e niʻihi ke tohi ki muʻa ʻia kinaua, ko ia naʻe ʻikai te na maʻu ha nofoʻanga ʻi he fale talifonongá.b Naʻe ʻikai ha toe fili ke na fai ka ko ʻena nofo ʻi he pō ko iá ʻi ha fale manu. ʻOku lava ke tau fakaʻuta atu pē ki he hohaʻa ʻa Siosefa ʻi heʻene sio ki he tofanga ʻa hono hoá ʻi ha langa lahi kuo teʻeki ai ke ne hokosia ki muʻa, ʻa ia naʻe fakalalahi he taimi ko iá. He toki kehe ange ē ko e feituʻu naʻe kamata ai ʻene langaá.

ʻOku lava ke ongoʻi ʻe he kakai fefine he feituʻu kotoa pē ʻa Mele. ʻI he taʻu nai ʻe 4,000 ki muʻá, naʻe tomuʻa tala ai ʻe Sihova ʻe tofanga ʻa e kakai fefine kotoa pē ʻi he langa lolotonga ʻa e fāʻelé koeʻuhi ko e angahala tukufakaholó. (Senesi 3:16) ʻOku ʻikai ha fakamoʻoni ia naʻe hao mei ai ʻa Mele. Ko e fakamatala ʻa Luké ʻoku ʻikai fakahaaʻi pau ai ʻa ʻene faingataʻaʻiá, ʻoku pehē pē ai: ‘“Pea naʻa ne ʻaloʻi ʻa e tama, ko hono ʻuluaki.” (Luke 2:6e, 7) ʻIo, naʻe fanauʻi ʻa ʻene “ʻuluaki”—ko e ʻuluaki ia ʻi he fānau tokolahi ʻa Mele, naʻe ʻikai siʻi hifo he toko fitu fakakātoa. (Maake 6:3) Kae kehe, ko e toko tahá ni, ʻe kehe ʻaupito ia. ʻIkai ngata pē ko ia ʻa e ʻuluaki naʻá ne fanauʻí ka ko e “Kimuʻa [ia] ʻi he meʻa kotoa pe kuo ngaohi” ʻe Sihová tonu, ko e ʻAlo-tofu-pē-taha-ne-fakatupu ʻo e ʻOtuá!—Kolose 1:15.

ʻOku tānaki mai ʻi he fakamatala ko ení ha fakaikiiki ʻiloa: “ʻO ne fakakofuʻaki ia ʻa e kofuʻi tamasiʻi valevale, ʻo ne fakatokoto ʻi he ʻaiʻangakai ʻo e manu.” (Luke 2:7) ʻOku hanga ʻe he ngaahi tulama, ngaahi tā valivali, mo e ngaahi konga ʻo e ʻaloʻí takatakai ʻi he māmaní, ʻo ʻai ke fuʻu tōtuʻa ʻa e fakakaukau ki he meʻá ni. Kae fakakaukau angé ki he meʻa moʻoni naʻe hokó. Ko ha ʻaiʻanga kai ko ha meʻa fafangaʻanga ia, ʻa ia naʻe kai ai ʻa e fanga manu ʻi he fāmá. Ko ia naʻe nofo ʻa e fāmilí ʻi ha fale manu, ʻoku ʻikai ʻaupito ko ha feituʻu ʻea lelei ia pe maʻa—ʻi he taimi ko iá pe ʻi he taimí ni. Ko hono moʻoní, ko hai ia ha tauhi fānau te ne fili ha feituʻu pehē ke fāʻele ai kapau naʻe toe ʻi ai ha feituʻu kehe? Ko e tokolahi taha ʻo e ngaahi mātuʻá te nau fiemaʻu ʻa e lelei tahá maʻa ʻenau fānaú. Huanoa hake ai ʻa Mele mo Siosefa naʻá na loto ke tokonaki ʻa e lelei tahá maʻá e ʻAlo ʻo e ʻOtuá!

Kae kehe, naʻe ʻikai te na tuku ʻa hona tuʻunga fakangatangatá ke kona ai hona lotó; naʻá na fai ʻaki pē ʻa e lelei taha naʻá na malavá ʻa e meʻa naʻá na maʻú. Hangē ko ení, fakatokangaʻi ange naʻe tokangaʻi tonu ʻe Mele ʻa e kiʻi valevalé, ʻi hono fakakofuʻi ia ke māfana, peá ne fakamohe fakalelei ia ʻi ha ʻaiʻanga kai ʻo e manú, ʻi heʻene fakapapauʻi te ne māfana ai mo malu. Naʻe ʻikai ʻaupito tuku ʻe Mele ʻene loto-moʻua ʻi hono ngaahi tuʻunga lolotongá ke fakahohaʻasi ai ʻene tokonaki ʻa e lelei taha naʻá ne malavá. Naʻá ne ʻiloʻi fakatouʻosi foki mo Siosefa, ko hono tokangaʻi fakalaumālie ʻo e kiʻi tamá ni ʻa e meʻa mahuʻinga taha ʻe lava ke na fai maʻaná. (Teutalonome 6:6-8) ʻI he ʻahó ni, ʻoku fakatupulekina ai ʻe he ngaahi mātuʻa fakapotopotó ʻa e ngaahi meʻa muʻomuʻa meimei tatau ʻi heʻenau tauhi hake ʻenau fānaú ʻi he māmani honge fakalaumālie ko ení.

ʻAʻahi Fakalototoʻa

Naʻe fakahohaʻasi fakafokifā ʻe ha fuʻu vālau longoaʻa ʻa e tuʻunga nongá. Naʻe fakavave mai ha kau tauhi-sipi ki he fale manú, ʻi he vēkeveke ke nau sio ki he fāmilí pea tautefito ki he kiʻi tamá. Ko e kau tangatá ni naʻe ʻikai lava ke mapukepuke ʻenau loto-māfaná, ʻi he hā mei honau matá ʻa e fiefia lahi. Naʻa nau fakavave mai mei he veʻe moʻunga ʻa ia naʻa nau nofo ai mo ʻenau fanga sipí.c Naʻa nau talanoa ki he ongo mātuʻa ne ʻohovalé fekauʻaki mo ha meʻa fakaofo ne nau toki hokosia. ʻI he veʻe moʻungá lolotonga ʻa e tuʻuapoó, naʻe hā fakafokifā ai ha ʻāngelo kia kinautolu. Naʻe malama takatakai ʻa e lāngilangi ʻo Sihová, pea naʻe tala ange ʻe he ʻāngeló kia kinautolu ko e Kalaisí, pe Mīsaiá, naʻe toki ʻosi ʻaloʻi ia ʻi Pētelihema. Te nau ʻilo ʻa e kiʻi tamá ʻoku tokoto ʻi ha ʻaiʻanga kai ʻo e manú, ʻoku kofuʻaki ha kofu fakatamasiʻi. Pea naʻe hā leva ha meʻa ne toe fakaueʻiloto ange—ko ha fuʻu kau ʻāngelo naʻa nau hiva fekauʻaki mo e lāngilangi ʻo Sihová!

ʻOku ʻikai ha ofo ʻi he fakavave mai ʻa e kau tangata anga-fakatōkilaló ni ki Pētelihemá! Kuo pau pē naʻa nau fiefia ke sio ki ha valevale toki fanauʻi ʻokú ne tokoto mai ʻo hangē tofu pē ko e meʻa naʻe toki ʻosi fakamatalaʻi ʻe he ʻāngeló. Naʻe ʻikai te nau tukulotoʻi pē ʻia kinautolu ʻa e ongoongo lelei ko ení. “Naʻa nau fai ʻenau fakamatala . . . Pea ko kinautolu naʻe fanongo ai, naʻa nau ofo kotoa pē ʻi he ngaahi meʻa naʻe leaʻaki ʻe he kau tauhi sipi kiate kinautolu.” (Luke 2:17, 18) Ko e kau taki lotu ʻo e ʻaho ko iá ʻoku hā mahino naʻa nau siolalo ki he kau tauhi-sipí. Ka ʻoku hā mahino naʻe fakamahuʻingaʻi ʻe Sihova ʻa e kau tangata anga-fakatōkilalo mo faitōnunga ko ení. Ko ia naʻe ueʻi fēfē ʻa Mele ʻe he ʻaʻahi ko ení?

Naʻe ongosia moʻoni ʻa Mele ʻi he ngaahi tuʻunga faingataʻa ʻo e fāʻelé, neongo ia naʻá ne fanongo tokanga ki he lea kotoa pē. Pea naʻá ne fai ʻa e meʻa lahi ange: “Nae faoa e Mele ae gaahi mea ni kotoabe ki hono loto, o fifili ki ai.” (Luke 2:19, PM) Ko e moʻoni ko e finemuí ni ko ha tokotaha faʻa fakakaukau. Naʻá ne ʻiloʻi ko e pōpoaki fakaeʻāngelo ko ení naʻe mātuʻaki mahuʻinga. Ko hono ʻOtua ko Sihová, naʻá ne fiemaʻu ke ne ʻiloʻi pea ke ne mahinoʻi ʻa e tuʻunga totonu mo e mahuʻinga ʻo ʻene tamá. Ko ia naʻá ne fai ʻa e meʻa lahi ange ʻi he fanongó pē. Naʻá ne tukulotoʻi ʻa e ngaahi leá koeʻuhi ke lava ʻo ne toutou fakalaulauloto ki ai ʻi he ngaahi māhina mo e ngaahi taʻu hoko maí. Ko ha kī tuʻu-ki-muʻa eni ki he tui naʻe fakahāhā ʻe Mele ʻi he kotoa ʻo ʻene moʻuí.

Te ke muimui ʻi he faʻifaʻitakiʻanga ʻa Melé? Naʻe fakafonu ʻe Sihova ʻa e ngaahi peesi ʻo ʻene Folofolá ʻaki ʻa e ngaahi moʻoni fakalaumālie mātuʻaki mahuʻinga. Kae kehe, ko e ngaahi moʻoni ko iá heʻikai ha loko lelei ʻe lava ke ne fai maʻatautolu kae ʻoua kuo tau ʻuluaki tokanga ki ai. ʻOku tau fai ia ʻaki hono lau tuʻumaʻu ʻa e Tohi Tapú—ʻo ʻikai ko ha tohi pē ia ka ko e Folofola fakamānavaʻi ʻa e ʻOtuá. (2 Timote 3:16) Pea ʻi he hangē ko Melé, ʻoku fiemaʻu ke tau tukulotoʻi ʻa e ngaahi lea fakalaumālié, ʻo maʻu mei ai ha fakamulituku. Kapau ʻoku tau fakalaulauloto ki he meʻa ʻoku tau lau ʻi he Tohi Tapú, ʻo fakakaukau ki he ngaahi founga ʻe lava ke tau ngāueʻaki ai ke toe kakato ange ʻa e akonaki ʻa Sihová, te tau fafangaʻi ai ʻetau tuí ʻaki ʻa e meʻakai ʻoku fiemaʻu ke tupu aí.

Lea Lahi Ange ke Tukulotoʻi

ʻI he ʻaho hono valu ʻo e pēpeé, naʻe ʻai ai ʻe Mele mo Siosefa ke kamu ia ʻo hangē ko ia naʻe fiemaʻu ʻi he Lao ʻa Mōsesé, pea fakahingoa ia ko Sīsū ʻo hangē ko e fakahinohino naʻe ʻoangé. (Luke 1:31) Pea ʻi he ʻaho hono 40, naʻá na ʻave ia mei Pētelihema ki he temipale ʻi Selusalemá, ko hono mamaʻó ko ha ngaahi kilomita, ʻo fai ʻa e ngaahi feilaulau fakamaʻa naʻe fakaʻatā ʻe he Laó ki he kakai naʻe masiva angé—ko e ongo foʻi kulukulu pe ongo foʻi lupe mui. Kapau naʻá na ongoʻi mā ʻi hono foaki ʻa e meʻa siʻi hifo ʻi he sipi tangatá pea foaki ha kulukulu ʻa ia naʻe lava ke maʻu ʻe he ngaahi mātuʻa kehé, naʻá na tuku ki tafaʻaki ʻa e ongoʻi peheé. Ko e hā pē ʻa e tuʻungá, naʻá na maʻu ʻa e fakalototoʻa mālohi lolotonga ʻena ʻi aí.—Luke 2:21-24.

Naʻe fakaofiofi ha tangataʻeiki aʻuaʻu ko Simione kia kinaua ʻo ne fakahā ange kia Mele ha ngaahi lea lahi ange ke ne tukulotoʻi. Naʻe fai e talaʻofa kiate ia te ne sio ki he Mīsaiá ki muʻa ke ne maté, pea naʻe fakahaaʻi ʻe he laumālie māʻoniʻoni ʻo Sihová kiate ia ko e kiʻi tamasiʻi ko Sīsuú ʻa e Mīsaia naʻe tomuʻa talá. Naʻe toe fakatokanga ʻa Simione kia Mele fekauʻaki mo e mamahi ʻa ia ʻe ʻi ai ʻa e ʻaho kuo pau ai ke ne kātekina. Naʻá ne pehē te ne ongoʻi hangē ne hokaʻi ʻaki ia ha heletaá. (Luke 2:25-35) Naʻa mo e ngaahi lea ko ia naʻe tomuʻa talá naʻe tokoniʻi nai ai ʻa Mele ke ne kātaki ʻi he taimi naʻe hoko mai ai ʻa e taimi faingataʻa ko iá laka hake he taʻu ʻe tolungofulu ki mui. Hili ʻa Simioné, naʻe sio ai ha palōfita fefine ko ʻAna ki he kiʻi tamasiʻi ko Sīsuú peá ne kamata lea fekauʻaki mo ia ki he faʻahinga kotoa naʻa nau tukulotoa ʻa e ʻamanaki ki he huhuʻi ʻo Selusalemá.—Luke 2:36-38.

Ko ha fili lelei moʻoni ia naʻe fai ʻe Siosefa mo Mele ʻi hono ʻave ʻena pēpeé ki he temipale ʻo Sihova ʻi Selusalemá! Naʻá na ʻai ai ke kamata ʻa hona fohá ʻi ha ʻalunga faitōnunga ʻi he kotoa ʻo ʻene moʻuí ki he temipale ʻo Sihová. Lolotonga ʻena ʻi aí, naʻá na fai ʻa e meʻa kotoa ʻo fakatatau ki heʻena malavá pea maʻu ʻa e ngaahi lea ʻo e fakahinohino mo e fakalototoʻa. ʻOku pau naʻe mavahe ʻa Mele mei he temipalé ʻi he ʻaho ko iá kuo mālohi ange ʻene tuí, ʻo fonu hono lotó ʻi he ngaahi lea fakalaumālie ke ne fakalaulauloto ki ai pea vahevahe atu ia ki he niʻihi kehé.

Ko ha meʻa fakaʻofoʻofa ia ke sio ki he ngaahi mātuʻa he ʻaho ní ʻoku nau muimui ʻi he faʻifaʻitakiʻanga ko iá. ʻI he lotolotonga ʻo e Kau Fakamoʻoni ʻa Sihová, ʻoku ʻave faitōnunga ai ʻe he ngaahi mātuʻá ʻenau fānaú ki he ngaahi fakataha faka-Kalisitiané. Ko e ngaahi mātuʻa peheé, ʻoku nau foaki e meʻa kotoa ʻoku nau malavá, ʻi hono fai ʻa e ngaahi lea fakalototoʻa ki honau kaungātuí. Pea ʻoku nau mavahe mei he fakatahá ʻoku nau mālohi ange, fiefia ange, pea fonu he ngaahi meʻa lelei ke vahevahe atu ki he niʻihi kehé. ʻOku fakaafeʻi loto-māfana atu koe ke ke feʻiloaki mo kinautolu. Kapau te ke fai ia, te ke ʻiloʻi ai ko hoʻo tuí, hangē ko e tui ʻa Melé, ʻe tupu ai ʻo toe mālohi ange.

[Fakamatala ʻi lalo]

[Fakatātā ʻi he peesi 15]

Naʻe tāpuakiʻi ʻa Simione ke ne sio ki he Fakamoʻui naʻe tomuʻa talá