ʻOku Malava ke ʻOfa ki he Kaungāʻapí

KO E talanoa fakatātā ʻa Sīsū Kalaisi ʻo kau ki he tangata Samēliá ʻokú ne fakahā ʻa e ʻuhinga totonu ʻo e ʻofa moʻoni ki he kaungāʻapí. (Luke 10:​25-37) Naʻe toe akonaki foki ʻa Sīsū: “Ke ke ofa kia Jihova ko ho Otua aki ho laumalie kotoa, mo hoo moui kotoa, mo ho loto kotoa. Koe uluaki bea koe lahi ia oe fekau. Bea ko hono ua oku tatau mo ia, Ke ke ofa ki ho kaugaabi o hage be ko koe.”​—Mātiu 22:​37-39, PM.

Hangē ko e kakai tokolahi, ʻoku faingataʻa kiate koe ke ʻofa ki ho kaungāʻapi ʻoku kau ki ha matakali kehe? Mahalo pē ʻoku hoko ʻa e meʻá ni koeʻuhí ko hoʻo ʻilo pe kuó ke hokosia tonu ha filifilimānako mo ha meʻa taʻe totonu. Mahalo pē naʻe faingataʻaʻia ʻa koe pe ko ho ngaahi ʻofaʻangá ʻi he ngaohikoviʻi fakamamahi mo e fakamālohi mei he kakai ʻo ha matakali kehe.

Koeʻuhi naʻe fakahā ʻe Sīsū ʻo pehē ko e taha ʻo e ngaahi fekau ʻa e ʻOtuá ko e ʻofa ki hotau kaungāʻapí, kuo pau ke malava ke lavaʻi ʻa e ngaahi ongo mālohi peheé. Ko e kī ki hono fai iá ko e vakai ki he kakaí ʻo hangē ko e vakai mai ki ai ʻa e ʻOtuá mo Kalaisí. ʻI he meʻá ni tau vakai ange ki he faʻifaʻitakiʻanga ʻa Sīsū mo e muʻaki kau Kalisitiané.

Ko e Faʻifaʻitakiʻanga Lelei ʻa Sīsū

ʻI he ʻuluaki senitulí naʻe fehiʻa lahi ʻa e kakai Siú ki he kakai Samēliá, ʻa ia ko e kakai naʻa nau nofo ʻi he vahefonua ʻi he vahaʻa ʻo Siutea mo Kālelí. ʻI he taimi ʻe taha naʻe fehuʻi anga paetaku kia Sīsū ʻe he kau fakafepaki Siú: “Hono ʻikai moʻoni ʻa e lea ʻoku mau fai, ʻo pehē, ko e Samelia koe, mo e ʻiate koe ha tevolo?” (Sione 8:48) Naʻe fuʻu mālohi fau ʻa e ongoʻi fehiʻaʻia ʻa e kau Siú ki he kau Samēliá ʻo fakamalaʻiaʻi fakahāhā ʻe he kau Siu ʻe niʻihi ʻa e kau Samēliá ʻi he ngaahi sinakoké pea nau lotu ʻi he ʻaho kotoa ke ʻoua ʻe tuku mai ki he kakai Samēliá ʻa e moʻui taʻe ngatá.

ʻOku ngalingali naʻe ueʻi ʻa Sīsū ʻe he ʻilo ʻo e loto fehiʻa tautakele ko ʻení ke ne fai ʻa e talanoa fakatātā ʻo kau ki he tangata Samēlia naʻá ne fakamoʻoniʻi ko e kaungāʻapi moʻoní ia ʻi heʻene tokangaʻi ʻa e tangata Siu naʻe tā ʻe he kau kaihaʻá. Ko e hā leva ʻa e tali naʻe mei lava ke fai ʻe Sīsū ki he fehuʻi ʻa e tangata Siu naʻe pōtoʻi ʻi he Lao ʻia Mōsesé ʻa ia naʻá ne ʻeke: “Pea ko hai nai hoku kaungaʻapi?” (Luke 10:29) Naʻe mei lava ʻe Sīsū ke tali hangatonu atu ʻaki haʻane pehē: ‘ʻOku ʻikai ke ngata ʻa ho kaungāʻapí ki ho kaungā-Siú pē ka ʻoku toe kau atu ki ai mo e niʻihi kehe, naʻa mo ha taha Samēlia.’ Kae kehe, ʻe faingataʻa ke tali ʻe he kakai Siú ʻa e meʻa ko iá. Ko ia naʻá ne fai ʻa e talanoa fakatātā ʻo kau ki ha tangata Siu naʻe fai manavaʻofa ki ai ha tangata Samēlia. Naʻe tokoniʻi ai ʻe Sīsū ʻa e kau fanongo Siú ke nau aʻu ki he fakamulituku ko e ʻofa moʻoni ki he kaungāʻapí ʻe aʻu atu ia ki he kakai ʻoku ʻikai ko e kakai Siú.

Naʻe ʻikai ke ʻi ai ha ongoʻi fehiʻa ʻa Sīsū ki he kakai Samēliá. ʻI heʻene fononga ʻo fou atu ʻi Samēlia ʻi he taimi ʻe taha, naʻá ne mālōlō ʻi ha veʻe vaikeli lolotonga ʻa e ʻalu ʻene kau ākongá ki he kolo ofi mai ke ʻomai ha meʻakai. ʻI he ʻalu atu ʻa ha fefine Samēlia ke ʻutu vai, naʻe pehē ange ʻe Sīsū: “ʻE, mai siʻaku inu.” Koeʻuhi naʻe ʻikai ke ʻi ai ha felāveʻi ʻa e kakai Siú mo e kakai Samēliá naʻe ʻeke ange ʻe he fefiné: “Ko e toe tala inu hā e kiate au, ka koe Siu koe, pea ko e fefine Samelia kita?” Naʻe lea leva ʻa Sīsū ʻo fai fakamoʻoni ki he fefiné, naʻa mo hono fakahā mahino ki ai ko e Mīsaiá ia. Ko e meʻa naʻe fai ʻe he fefiné naʻá ne ʻalu ki he koló ʻo ui mai ha niʻihi kehe ke nau ō mai ʻo fanongo kiate ia. Ko e hā hono olá? “Naʻe ai ha tokolahi mei he kolo ko ia naʻa nau tui pikitai kiate ia.” Ko ha ola lelei lahi ē naʻe maʻu koeʻuhi naʻe ʻikai ke fakaʻefihiaʻi ʻa Sīsū ʻi he anga ʻo e fakakaukau naʻe eʻa lahi ʻi he lotolotonga ʻo hono kaungā-Siú!​—Sione 4:​4-42.

ʻOku ʻIkai ke Filifilimānako ʻa e ʻOtuá

Ko e taumuʻa ia ʻa e ʻOtuá ke fakatefito ʻa e malanga ʻa Sīsuú ki he kakai Siú, “ki he fanga sipi kuo mole ʻi he hako ʻo Isileli.” (Mātiu 15:24) Ko ia ai, ko hono ʻuluaki kau muimuí ko e kakai naʻe tupu hake ʻi ha ʻātakai Siu. Ka ʻi he ʻosi ʻa e taʻu ʻe tolu pē mei he huaʻi hifo ʻo e laumālie māʻoniʻoní ʻi he Penitekosi 33 T.S., naʻe fakamahino ʻe Sihova ʻokú ne fie maʻu ki he kakai Siu ko ia naʻe tuí ke fakalahi atu ʻenau ngāue ngaohi ākongá ki he kakai ʻo e ngaahi puleʻangá, ko e kau Senitailé.

Ki he fakakaukau ʻa e kakai Siú, kuo ʻosi feʻunga pē ʻa e faingataʻa ke ʻofa ki ha taha Samēlia ʻo hangē pē ko kitá. ʻE toe fuʻu faingataʻa ange ke fakahā ha ʻofa fakakaungāʻapi ki he kakai Senitaile taʻe kamú, ko ha kakai ʻoku siʻisiʻi ange haʻanau meʻa-taha mo e kakai Siú ʻi he kakai Samēliá. ʻI he fakamatala ʻo kau ki he fakakaukau ʻa e kakai Siú ki he kakai Senitailé, ʻoku pehē ʻe he The International Standard Bible Encyclopaedia: “ʻOku tau ʻilo ʻi he ngaahi kuonga ʻo e F[uakava] F[oʻoú], naʻe fuʻu tōtuʻa ai ʻa e fakalielia, paetaku mo e tāufehiʻa. Naʻe lau kinautolu [kau Senitaile] ʻoku taʻe maʻa, pea naʻe taʻe fakalao ke fai ha faʻahinga felāveʻi fakakaumeʻa mo kinautolu. Ko e ngaahi fili kinautolu ʻo e ʻOtuá mo ʻEne kakaí, pea naʻe taʻofi meiate kinautolu ʻa e ʻilo ʻo kau ki he ʻOtuá kae ʻoua ke nau hoko ko e kau ului, pea naʻa mo ʻenau fai pehē, hangē pē ʻi he kuonga muʻa fuoloá, naʻe ʻikai lava ke nau fai ha feohi kakato. Naʻe tapu ki he kakai Siú ke nau akonakiʻi kinautolu, pea kapau te nau ʻeke ha meʻa fekauʻaki mo e ʻOtuá naʻe totonu ke talatukiʻi ai kinautolu.”

Neongo naʻe maʻu ʻe he tokolahi ʻa e anga ʻo e fakakaukau ko ʻení, naʻe fakatupunga ʻe Sihova ke maʻu ʻe Pita ha vīsone ʻa ia naʻe fakahā ai kiate ia ke ‘ʻoua te ne ui ʻoku taʻe maʻa ha meʻa kuo fakamaʻa ʻe he ʻOtuá.’ Pea naʻe tataki ia ʻe he ʻOtuá ki he ʻapi ʻo e Senitaile ko Koliniusi. Naʻe fai fakamoʻoni ʻa Pita ʻo kau kia Kalaisi kia Koliniusi, mo hono fāmilí, mo e kau Senitaile kehe. Naʻe pehē ʻe Pita: “Ta ko ʻene toki mahino mai e kiate au, ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” Lolotonga ʻa e kei malanga ʻa Pitá, naʻe ʻalu hifo ʻa e laumālie māʻoniʻoní ki he kau tui foʻoú, pea nau papitaiso leva pea nau hoko ko e ʻuluaki kau Senitaile naʻe muimui ʻia Kalaisi.​—Ngāue, vahe 10.

Naʻe tali ʻe he kau muimui Siú ʻa e meʻa ko ʻení, ʻo nau maʻu ʻa e mahino ko e fekau ʻa Sīsū ke “ngaohi ʻa e ngāhi kakai kotoa pe ko ʻeku kau ako” naʻe ʻikai ke fakangatangata ki he kakai Siu ʻi he ngaahi fonua kotoa pē ka naʻe fakakau atu ki ai mo e kakai Senitailé. (Mātiu 28:​19, 20; Ngāue 11:18) ʻI heʻenau ikuʻi ʻa e ongoʻi loto fehiʻa naʻa nau maʻu nai ki he kau Senitailé, naʻa nau faʻufaʻu faivelenga ha feingatau ke fai fakamoʻoni ke ngaohi ākonga mei he ngaahi puleʻangá. Siʻi hifo he taʻu ʻe 30 mei ai, naʻe lava ke pehē kuo malangaʻi ʻa e ongoongo leleí “ki he meʻa moʻui kotoa pe ʻi he lalo langi.”​—Kolose 1:23.

Naʻe takimuʻa ʻe he ʻaposetolo ko Paulá ʻa e ngāue fakamalanga ko ʻení, ko e Kalisitiane ia naʻe tupuʻi Siu. Ki muʻa ke ne hoko ko e toko taha muimui ʻo Kalaisí, ko e memipa faivelenga ia ʻo e siasi fakalotu ko e kau Fālesí. Naʻa nau sio lalo ʻo ʻikai ngata pē ki he kakai Senitailé ka naʻe toe pehē ki he kakai lāuvale pē ko ia ʻo honau faʻahinga tonu. (Luke 18:​11, 12) Ka naʻe ʻikai ke tuku ʻe Paula ʻa e anga ʻo e fakakaukau ko iá ke ne taʻofi ia mei heʻene fakahāhā ʻa e ʻofa fakakaungāʻapi ki he niʻihi kehé. Ka, naʻá ne hoko “ko e aposetolo ʻo e Senitaile,” pea naʻe ʻosiʻosi-moʻui ʻa Paula ki he ngāue ko e ngaohi ākonga ʻi he ngaahi fonua ʻo e Metiteleniané.​—Loma 11:13.

ʻI he lolotonga ʻa hono fai ʻe Paula ʻa ʻene ngāue fakamalangá, naʻe tolomakaʻi ia, pea haha, mo tuku pilīsone. (Ngāue 14:19; 16:​22, 23) Naʻe fakatupunga ʻe he ngaahi fakamamahi naʻá ne hokosiá ke ne hoko ai ʻo loto-tāufehiʻa pea fakamulituku ʻaki ʻo ne pehē kuó ne fakamole noa hono taimí ki he ngaahi puleʻanga mo e ngaahi faʻahinga kakai ʻe niʻihi? ʻIkai ʻaupito. Naʻá ne ʻiloʻi ʻoku ʻi ai ʻa e kakai loto-totonu ʻe niʻihi ʻoku movete holo ʻi he ngaahi faʻahinga kakai kehekehe ʻi hono taimí.

Pea ʻi he maʻu ʻe Paula ʻa e kakai Senitaile naʻe loto ke akoʻi kinautolu ki he ngaahi founga ʻa e ʻOtuá, naʻe hoko ʻo ne ʻofa ʻiate kinautolu. Ko e fakatātā, naʻá ne tohi ki he kakai Tesalonaiká: “Kae kehe naʻa mau ʻi homou lotolotonga ʻo angalelei pe; hange tofu pe ha fefine toutama ʻa ia ʻoku ne tauhi siʻene fanau aʻana, pehe ʻi heʻemau ʻofauʻuuʻu kiate kimoutolu naʻa mau fakaʻamu ke ʻatu, ʻo ʻikai ko e Kosipeli pe ʻa e ʻOtua, ka ko siʻemau moʻui foki​—kae fēfē, he ne mou hoko ko homau ʻofaʻanga.” (1 Tesalonaika 2:​7, 8) ʻOku fakahā ʻe he ngaahi lea ongo mei he lotó ko ʻení naʻe ʻofa moʻoni ʻa Paula ki he kau Tesalonaika Senitailé pea naʻe ʻikai te ne fakaʻatā ha meʻa ke ne uesia ʻa e fiefia ʻo e vahaʻangatae lelei mo kinautolú.

Ko Hono Ngāueʻaki ʻa e ʻOfa ki he Kaungāʻapí

ʻI he ʻahó ni, ʻo hangē pē ko ia ʻi he ʻuluaki senitulí, ko kinautolu ʻoku nau kau ki he fakatahaʻanga Kalisitiané ʻoku nau fakatupulekina ʻa e ʻofa ki he kaungāʻapí ki he kakai ʻo e ngaahi faʻahinga kehekehe kotoa pē. ʻI hono fakatupulekina ʻa e anga ʻo e vakai mai ʻa e ʻOtuá ʻo kau ki he niʻihi kehé pea ʻi hono fakahā atu ʻa e ongoongo lelei ʻo e Puleʻangá kiate kinautolú, kuo fakalahi ai ʻe he kau Kalisitiane moʻoní ʻa ʻenau maʻu ʻa e mahino ʻo kau ki he kakai naʻe ʻikai ʻaupito te nau ʻiloʻi ʻo ka naʻe ʻikai te nau kau ki he fakatahaʻangá. ʻOku aʻu ʻo nau ʻofa fakaefakatokoua kiate kinautolu. (Sione 13:​34, 35) ʻE lava ke ke hokosia ʻe koe foki ʻa e meʻá ni.

Ko e ʻofa peheé ʻoku ʻi he lotolotonga ʻo e Kau Fakamoʻoni ʻa Sihová, neongo ʻoku nau ʻi he ngaahi fonua ʻe 229 ʻo nau fakafofongaʻi ʻa e ngaahi “puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea.” (Fakahā 7:9) ʻI honau tuʻunga ko e fetokouaʻaki ʻi māmani lahí, ʻoku nau fāʻūtaha ʻi he lotu kia Sihova, he ʻoku nau fakafisi ke kau ki ha fakafepaki mo e fefakavahaʻaʻaki fakamatakali, pea ʻoku nau talitekeʻi ʻa e loto-tāufehiʻa ʻa ia ʻoku mole ai mei he kakaí ʻa e vahaʻangatae māfana mo e kaungātangatá.

ʻAi ke feohi mo e Kau Fakamoʻoní, pea te ke fakatokangaʻi ai ʻa hono fai ʻo e finangalo ʻo e ʻOtuá ʻe he ngaahi faʻahinga kakai kehe kotoa pē. Te ke sio ai ki hono ngāueʻaki ʻa e ʻofa ki he kaungāʻapí ʻi heʻenau talaki atu ʻa e ongoongo lelei ʻo e Puleʻanga ʻo e ʻOtuá. ʻIo, pea ʻi heʻenau ngaahi fakatahaʻangá, te ke fetaulaki ai mo e kakai anga-ʻofa mo loto-totonu ʻa ia ʻoku nau fakahā ʻi heʻenau moʻuí kuo nau ako moʻoni ke ʻofa ki honau kaungāʻapí.

[Fakatātā ʻi he peesi 6]

ʻI he ngaahi fakatahaʻanga ʻa e Kau Fakamoʻoni ʻa Sihová, te ke ʻilo ai ʻa e kakai fiefia mei he ngaahi matakali kotoa pē

[Maʻuʻanga ʻo e Tā ʻi he peesi 4]

Ko e Aʻu ʻa e Samēlia Leleí ki he Fale Tali-Fonongá/The Doré Bible Illustrations/Dover Publications, Inc.