“Naʻe ʻIkai Te Ne Leaʻaki ha Meʻa Kiate Kinautolu, ʻo Taʻe ha Fakatātā”

“Ko e ngāhi meʻa ni kotoa naʻe leaʻaki ʻe Sisu ki he kakai ʻi he fakatātā; pea naʻe ʻikai te ne leaʻaki ha meʻa kiate kinautolu, ʻo taʻe ha fakatātā.”​—MĀTIU 13:34.

1, 2. (a) Ko e hā ʻoku ʻikai ke ngalongofua ai ʻa e ngaahi talanoa fakatātā ola leleí? (e) Ko e hā ʻa e ngaahi founga ʻo e talanoa fakatātaá naʻe ngāueʻaki ʻe Sīsuú, pea ko e hā ʻa e ongo fehuʻi ʻoku malanga hake fekauʻaki mo ʻene ngāueʻaki ʻa e ngaahi talanoa fakatātaá? (Toe sio ki he fakamatala ʻi laló.)

ʻE LAVA ke ke manatuʻi ha talanoa fakatātā naʻá ke fanongoa, ʻi ha malanga nai maʻá e kakaí, ʻi he ngaahi taʻu lahi kuo maliu atú? Ko e ngaahi talanoa fakatātā ola leleí ʻoku ʻikai ke ngalo vave. Naʻe pehē ʻe ha faʻu-tohi ʻe taha, ko e ngaahi talanoa fakatātaá “ʻokú ne liliu ʻa e meʻa ʻoku fanongoá ki ha meʻa ʻe lava ke sioloto ki ai pea fakaʻatā ai ʻa e kau fanongó ke fakakaukauloto ki ai.” Koeʻuhi ʻoku faʻa tokoni lelei taha ʻa e fakakaukaulotó ki heʻetau mahinó, ʻoku lava ke ʻai ʻe he ngaahi talanoa fakatātaá ʻa e ngaahi fakakaukaú ke faingofua ange ai hono mahinoʻí. ʻOku lava ke ʻai ʻe he ngaahi talanoa fakatātaá ke mahino ʻa e ngaahi foʻi leá, ʻo akoʻi ʻa e ngaahi lēsoni ʻe hoko ʻo tuʻumaʻu ʻi heʻetau manatú.

² ʻOku ʻikai ha faiako ʻi māmani ʻe faifai ange pea pōtoʻi lahi ange ʻi hono ngāueʻaki ʻa e ngaahi talanoa fakatātaá ʻia Sīsū Kalaisi. Ko e ngaahi pealapeli lahi ʻa Sīsuú ʻoku manatuʻi ngofua ia ʻi he meimei taʻu ʻe ua afe hili hono leaʻakí.a Ko e hā naʻe falala lahi ai ʻa Sīsū ki he founga faiako tefito ko ení? Pea ko e hā naʻá ne ʻai ke mātuʻaki ola lelei ʻa ʻene ngaahi talanoa fakatātaá?

ʻUhinga Naʻe Faiako Ai ʻa Sīsū ʻAki ʻa e Ngaahi Talanoa Fakatātaá

 3. (a) Fakatatau ki he Mātiu 13:​34, 35, ko e hā ʻa e ʻuhinga ʻe taha naʻe ngāueʻaki ai ʻe Sīsū ʻa e ngaahi talanoa fakatātaá? (e) Ko e hā ʻokú ne fakahaaʻi kuo pau pē ʻoku mahuʻingaʻia ʻa Sihova ʻi he founga faiako ko ení?

³ ʻOku ʻomai ʻe he Tohitapú ʻa e ongo ʻuhinga ʻiloa ʻe ua naʻe ngāueʻaki ai ʻe Sīsū ʻa e ngaahi talanoa fakatātaá. ʻUluakí, ko ʻene fai iá naʻe fakamoʻoniʻi ai ʻa e kikité. Naʻe tohi ʻe he ʻapositolo ko Mātiú: “Ko e ngāhi meʻa ni kotoa naʻe leaʻaki ʻe Sisu ki he kakai ʻi he fakatātā; pea naʻe ʻikai te ne leaʻaki ha meʻa kiate kinautolu, ʻo taʻe ha fakatātā: koeʻuhi ke fakamoʻoni ai ʻa e meʻa naʻe folofolaʻaki ʻi he palōfita, ʻo pehē, Te u tangaki hoku ngutu ʻi he ngāhi fakatātā.” (Mātiu 13:​34, 35) Ko e “palofita” naʻe lave ki ai ʻa Mātiú ko e faʻu-hiva ia ʻo e Sāme 78:2. Naʻe tohi ʻa e tokotaha-tohi-sāmé ʻi he malumalu ʻo hono fakamānavaʻi ʻe he laumālie ʻo e ʻOtuá ʻi he laui senituli ki muʻa ʻi hono ʻaloʻi ʻo Sīsuú. ʻIkai ʻoku taau ke fakatokangaʻi naʻe fakapapauʻi ʻe Sihova ʻi he laui teau taʻu ki muʻa, ʻe faiakoʻaki ʻe hono ʻAló ʻa e ngaahi talanoa fakatātā? Ko e moʻoni kuo pau ʻoku mahuʻingaʻia ʻa Sihova ʻi he founga faiako ko ení!

 4. Naʻe anga-fēfē hono fakamatalaʻi ʻe Sīsū ʻa e ʻuhinga naʻá ne ngāueʻaki ai ʻa e ngaahi talanoa fakatātaá?

⁴ Ko hono uá, ko Sīsū tonu naʻá ne fakamatalaʻi naʻá ne ngāueʻaki ʻa e ngaahi talanoa fakatātaá ke vaheʻiʻaki ʻa e faʻahinga naʻe ʻikai ongongofua honau lotó. Hili ʻene fakamatala ki he “kakai tokolahi” ʻa e pealapeli ʻo e tangata tūtūʻí, naʻe ʻeke ange ʻe heʻene kau ākongá: “Ko e ha ʻoku ke lea fakatātā ai kiate kinautolu?” Naʻe tali ʻe Sīsū: “Kuo tuku kiate kimoutolu ke ʻilo ʻa e ngāhi misiteli ʻo e Puleʻanga ʻo Hevani, ka ko kinautolu ʻoku ʻikai tuku ki ai. Ko hono ʻuhinga ʻeni o ʻeku lea fakatātā ai kiate kinautolu, koeʻuhi ʻoku nau mata, ka ʻoku ʻikai te nau mamata, pea ʻoku nau telinga ka ʻoku ʻikai te nau fanongo, ʻumaʻā ha ongoʻi. Pea ʻoku fakamoʻoni ʻiate kinautolu ʻa e palofisai ʻa Aisea, ʻa ia ʻoku pehe, Te mou matuaki fanongo, kae ʻikai ongoi; pea te mou matuaki sio, kae ʻikai ʻiloʻi. He kuo fangapesi [“ʻikai ongongofua,” NW] ʻa e loto ʻo e kakai ni.”—Mātiu 13:​2, 10, 11, 13-15; Aisea 6:​9, 10.

 5. Naʻe anga-fēfē hono vaheʻi ʻe he ngaahi talanoa fakatātā ʻa Sīsuú ʻa e kau fanongo anga-fakatōkilaló mei he kau loto-pōlepolé?

⁵ Ko e hā ʻa e meʻa fekauʻaki mo e ngaahi talanoa fakatātā ʻa Sīsuú naʻá ne vahevaheʻi ʻa e kakaí? ʻI he ngaahi tuʻunga ʻe niʻihi, naʻe pau ke mātuʻaki fekumi ai ʻa ʻene kau fanongó koeʻuhi ke maʻu ʻa e ʻuhinga kakato ʻo ʻene leá. Naʻe ueʻi ʻa e faʻahinga tāutaha anga-fakatōkilaló ke nau kole ki ha fakamatala lahi ange. (Mātiu 13:36; Maake 4:​34) Ko e ngaahi talanoa fakatātā leva ʻa Sīsuú, naʻe fakahaaʻi ai ʻa e moʻoní ki he faʻahinga ʻa ia naʻe fakaʻamu ki ai honau lotó; ʻi he taimi tatau, naʻe fufū ʻe heʻene ngaahi talanoa fakatātaá ʻa e moʻoní mei he faʻahinga naʻe loto-pōlepolé. Ko ha faiako fakaofo moʻoni ʻa Sīsū! Tau sivisiviʻi angé he taimí ni ʻa e niʻihi ʻo e ngaahi meʻa tefito ʻa ia naʻá ne ʻai ke mātuʻaki ola lelei ʻa ʻene ngaahi talanoa fakatātaá.

Filifili ʻi Hono Ngāueʻaki ʻo e Ngaahi Fakaikiikí

6-8. (a) Ko e hā ʻa e ʻaonga naʻe teʻeki ke maʻu ʻe he kau fanongo ʻa Sīsū ʻi he ʻuluaki senitulí? (e) Ko e hā ʻa e ngaahi fakatātā ʻoku fakahaaʻi ai naʻe filifili ʻa Sīsū ʻi heʻene ngāueʻaki ʻa e ngaahi fakaikiikí?

⁶ Kuo faifai ange pea ke fifili pe naʻe fēfē nai ʻa e kau ākonga ʻi he ʻuluaki senitulí ʻa ia naʻa nau fanongo fakahangatonu ki he faiako ʻa Sīsuú? Neongo ne nau maʻu ʻa e monū ke fanongo ki he leʻo ʻo Sīsuú, naʻe teʻeki ai te nau maʻu ʻa e ʻaonga ʻo e kumi ki ha lēkooti kuo tohi ke fakamanatuʻi ai kia kinautolu ʻa e ngaahi meʻa naʻá ne leaʻakí. ʻI hono kehé, naʻe pau ke nau tauhi ʻa e ngaahi lea ʻa Sīsuú ʻi honau ʻatamaí mo e lotó. Fakafou ʻi heʻene ngāueʻaki pōtoʻi ʻa e ngaahi talanoa fakatātaá, naʻe ʻai ai ʻe Sīsū ke faingofua ange kia kinautolu ke manatuʻi ʻa e meʻa naʻá ne akoʻí. ʻI he founga fē?

⁷ Naʻe filifili ʻa Sīsū ʻi heʻene ngāueʻaki ʻa e ngaahi fakaikiikí. ʻI he taimi naʻe kaunga ai ha ngaahi fakaikiiki pau ki ha talanoa pe fiemaʻu ki he fakamamafá, naʻá ne tokanga lahi ke fakakau ai ʻa e ngaahi meʻa pau ko iá.

⁸ ʻI he taimi tatau, naʻe liʻaki ʻe Sīsū ʻa e ngaahi fakaikiiki naʻe ʻikai fiemaʻu ʻa ia te ne taʻofi nai ʻetau mahinoʻi ʻa e ʻuhinga ʻo e ngaahi talanoa fakatātaá. Ko e fakatātaá, ʻi he pealapeli fekauʻaki mo e tamaioʻeiki taʻefaimēsí, naʻe ʻikai fai ha fakamatala ki he founga naʻe tānaki ai ʻe he tamaioʻeiki ko iá ha moʻua tēnali ʻe 60,000,000. Naʻe fakamamafaʻi ʻe Sīsū ʻa e fiemaʻu ke faʻa fakamolemolé. Ko e meʻa naʻe mahuʻingá, ʻoku ʻikai ko e founga naʻe hoko ai ki he tamaioʻeikí ʻa e moʻuá, ka ko e founga naʻe fakamolemoleʻi ai hono moʻuá, mo e founga ʻi he tafaʻaki ʻe tahá, naʻá ne tōʻongafai ʻaki ki ha kaungā tamaioʻeiki naʻá ne moʻua mai ʻaki kiate ia ha kiʻi paʻanga siʻisiʻi. (Mātiu 18:​23-​35) ʻI he founga meimei tatau, ʻi he talanoa fakatātā fekauʻaki mo e foha maumau koloá, naʻe ʻikai fai ʻe Sīsū ia ha fakamatala ki he ʻuhinga naʻe fiemaʻu fakafokifā ai ʻe he foha siʻisiʻí ʻa ʻene koloa tukufakaholó mo e ʻuhinga naʻá ne tolovekaʻaki ai iá. Ka naʻe fakamatalaʻi fakaikiiki ʻe Sīsū ʻa e anga ʻo e ongoʻi ʻa e tamaí pea mo ʻene talí ʻi he taimi naʻe liliu ai ʻa e loto ʻo hono fohá ʻo ne toe foki mai ki ʻapí. Ko e ngaahi fakaikiiki pehē fekauʻaki mo e tali ʻa e tamaí naʻe fiemaʻu ia ki he poini naʻe fokotuʻu ʻe Sīsuú, ko Sihová ʻoku fakamolemole “o lahi aubito.”—Aisea 55:​7, PM; Luke 15:​11-32.

9, 10. (a) ʻI hono fakamatalaʻi ʻa e faʻahinga ʻi heʻene ngaahi talanoa fakatātaá, ko e hā naʻe tokangataha ki ai ʻa Sīsuú? (e) Naʻe anga-fēfē hono ʻai ʻe Sīsū ke faingofua ange ki heʻene kau fanongó mo e niʻihi kehé ke nau manatuʻi ʻa ʻene ngaahi talanoa fakatātaá?

⁹ Naʻe toe fakapotopoto ʻa Sīsū ʻi he founga naʻá ne fakamatalaʻi ai ʻa e faʻahinga ʻi heʻene ngaahi pealapelí. ʻI he ʻikai fai ha fakamatala fakaikiiki fekauʻaki mo e fōtunga ʻo e faʻahinga ko iá, naʻe faʻa tokangataha ʻa Sīsū ki he meʻa naʻa nau faí pe ko e anga ʻo ʻenau tali ki he ngaahi meʻa naʻá ne talanoa ki aí. Ko ia ai, ʻi he ʻikai ko hono fakamatalaʻi ʻa e fōtunga ʻo e Samēlia anga-fakakaungāʻapí, naʻe fakamatala ʻa Sīsū ki he meʻa mahuʻinga mamaʻo ange​—ko e founga ʻo hono tokoniʻi manavaʻofa ʻe he Samēliá ha Siu naʻe kafo ʻa ia naʻá ne tokoto ʻi he halá. Naʻe ʻomai ʻe Sīsū ʻa e ngaahi fakaikiiki ʻa ia naʻe fiemaʻu ke akoʻí ko e ʻofa ki he kaungāʻapí ʻoku totonu ke fakaaʻu atu ia ki he kakai kehe mei he faʻahinga ʻi hotau matakalí pe fonuá tonu.​—Luke 10:​29, 33-​37.

¹⁰ Ko e ngāueʻaki tokanga ʻe Sīsū ʻa e ngaahi fakaikiikí naʻe tauhi ai ʻene ngaahi fakaikiikí ke nounou pea ʻikai felekeu. Naʻá ne ʻai ai ke faingofua ange ki heʻene kau fanongo ʻi he ʻuluaki senitulí​—mo e niʻihi kehe taʻefaʻalaua ʻa ia te nau lau ki mui ʻa e ngaahi Kōsipeli fakamānavaʻí​—ke nau manatuʻi ia pea mo e ngaahi lēsoni mahuʻinga naʻe akoʻi mai aí.

Toʻo mei he Moʻui Fakaʻahó

11. ʻOmai ha ngaahi fakatātā ʻo e founga naʻe tapua ai mei he ngaahi pealapeli ʻa Sīsuú ʻa e ngaahi meʻa ʻoku ʻikai ha veiveiua naʻá ne siofi lolotonga ʻa ʻene tupu hake ʻi Kālelí.

¹¹ Ko Sīsuú ko ha mataotao ia ʻi hono ngāueʻaki ʻa e ngaahi talanoa fakatātā naʻe felāveʻi mo e moʻui ʻa e kakaí. Ko e lahi ʻo ʻene ngaahi pealapelí ʻoku tapua mai ai ʻa e ngaahi meʻa ʻoku ʻikai ha veiveiua naʻá ne mamata ki ai lolotonga ʻene tupu hake ʻi Kālelí. Fakakaukau angé ʻi ha mōmeniti, fekauʻaki mo e konga ki muʻa ʻo ʻene moʻuí. Ko e hā hono lahi ʻo ʻene sio ki hono teuteu ʻe heʻene faʻeé ʻa e mā lēvaní ʻaki hono toʻo ha kiʻi konga ʻo ha foʻi tou kuo ʻosi fakatupu naʻe toe mei ha taʻo mā ki muʻa ʻo ngāueʻaki ia ko ha lēvani fakatupu? (Mātiu 13:33) Naʻe tuʻo fiha ʻa ʻene siofi ʻa e kau tangata toutaí ʻi heʻenau tukutuku hifo honau ngaahi kupengá ki he vai tasilo pulū ʻo e Tahi Kālelí? (Mātiu 13:47) Ko e hā hono lahi ʻo ʻene siofi ʻa e tamaikí ʻi heʻenau vaʻinga ʻi he feituʻu faiʻanga fakataú? (Mātiu 11:16) ʻOku ngalingali naʻe fakatokangaʻi ʻe Sīsū ʻa e ngaahi meʻa anga-maheni kehe naʻe hoko ko e konga ʻo ʻene ngaahi talanoa fakatātaá​—ko e ngaahi tenga naʻe tūtuuʻi, ngaahi kātoanga mali fakafiefia, mo e ngaahi ngoue uite kuo motuʻu ʻi he laʻaá.​—Mātiu 13:​3-8; 25:​1-​12; Maake 4:​26-​29.

12, 13. Naʻe anga-fēfē ʻa e tapua mei he pealapeli ʻa Sīsū fekauʻaki mo e uité pea mo e teá ʻa ʻene maheni mo e ngaahi tuʻunga ʻo e feituʻú?

¹² ʻOku ʻikai leva ha ofo, ʻi he hūhū ʻi he kotoa ʻo e ngaahi talanoa fakatātā lahi ʻa Sīsuú ʻa e ngaahi tafaʻaki mo e ngaahi tuʻunga ʻo e moʻui fakaʻahó. Ko ia ai, ke mahinoʻi kakato ange ʻa ʻene pōtoʻi ʻi hono ngāueʻaki ʻa e founga faiako ko ení, ʻoku ʻaonga ke fakakaukau ki he ʻuhinga ʻo ʻene ngaahi leá ki heʻene kau fanongo Siú. Tau sio angé ki ha fakatātā ʻe ua.

¹³ ʻUluakí, ʻi he pealapeli fekauʻaki mo e uité pea mo e teá, naʻe talanoa ai ʻa Sīsū fekauʻaki mo ha tangata naʻá ne tūtuuʻi ʻa e uite lelei ʻi heʻene ngoué ka naʻe hū ha “fili” ki he ngoué ʻo toe tūtuuʻi hifo ai ʻa e tea. Ko e hā naʻe fili ai ʻe Sīsū ʻa e ngāue fakafili tefito ko iá? Sai, manatuʻi naʻe fakamatalaʻi ʻa e talanoa fakatātaá ofi ki he Tahi Kālelí, pea ko e ngāue tefito ʻa e kau Kālelí naʻe hā mahino ko e ngoué. Ko e hā ʻe lava ke toe fakatupu maumau lahi ange ki ha tangata ngoue ka ko e moulu mai ʻa ha fili ki heʻene ngoué ʻo toe tūtuuʻi hifo ai ha ngaahi tea fakatupu maumau? Ko e ngaahi lao fakamāmani he taimi ko iá ʻoku fakahaaʻi ai naʻe hoko ʻa e ngaahi ʻohofi pehē. ʻIkai ʻoku hā mahino naʻe ngāueʻaki ʻe Sīsū ha tuʻunga naʻe lava ke mahino ki heʻene kau fanongó?​—Mātiu 13:​1, 2, 24-​30.

14. ʻI he pealapeli fekauʻaki mo e Samēlia anga-fakakaungāʻapí, ko e hā ʻoku mahuʻinga ai hono ngāueʻaki ʻe Sīsū ʻa e hala naʻe ʻalu “mei Selusalema ki Sielikō” ke fakamamafaʻi ʻaki ʻene poiní?

¹⁴ Ko hono uá, manatuʻi ʻa e pealapeli fekauʻaki mo e Samēlia anga-fakakaungāʻapí. Naʻe kamata ʻe Sīsū ʻaki ʻene pehē: “Tokua naʻe ai ha tangata naʻe ʻalu hifo mei Selusalema ki Sielikō, pea ne toloto ʻi ha kaihaʻakau; ʻa ia naʻa nau toʻo hono kofu, pea ʻikai ngata ai, ka naʻa nau tāʻi ia, pea ʻi he tuku ia ʻo nau ʻalu, kuo ne kafo lahi, ʻo tei mate.” (Luke 10:30) ʻOku mahuʻingá, he naʻe ngāueʻaki ʻe Sīsū ʻa e hala naʻe ʻalu “mei Selusalema ki Sielikō” ke fakamamafaʻi ʻaki ʻene poiní. ʻI hono fakamatalaʻi ʻa e pealapeli ko ení, naʻá ne ʻi Siutea ai, ʻo ʻikai mamaʻo mei Selusalema; ko ia ʻoku ngalingali naʻe ʻilo ʻa ʻene kau fanongó fekauʻaki mo e hala naʻe fai ki ai ʻa e fakamatalá. Ko e hala tonu ko iá naʻe ʻiloa ʻi heʻene fakatuʻutāmakí, tautefito ki ha taha ʻoku fononga tokotaha. Naʻe lahi ai ʻa e fanga kiʻi afe lingolingoa, ʻo fakaʻatā ai ʻa e ngaahi feituʻu toitoiʻanga lahi ki he kau kaihaʻá.

15. Ko e hā ʻe ʻikai lava ai ke fakatonuhiaʻi moʻoni ʻe ha taha ʻa e taʻetokanga ʻa e taulaʻeiki mo e Līvai ʻi he talanoa fakatātā fekauʻaki mo e Samēlia anga-fakakaungāʻapí?

¹⁵ ʻOku taau ke fakatokangaʻi ʻa e toe meʻa kehe fekauʻaki mo e lave ʻa Sīsū ki he hala naʻe ʻalu “mei Selusalema ki Sielikō.” Fakatatau ki he talanoá, ʻuluakí naʻe fononga atu ha taulaʻeiki pea hoko atu leva ai ha Līvai ʻi he hala ko iá​—neongo ia naʻe ʻikai ha taha ʻe tuʻu ke tokoniʻi ʻa e tokotaha naʻe maʻukoviá. (Luke 10:​31, 32) Naʻe ngāue ʻa e kau taulaʻeikí he temipale ʻi Selusalemá, pea naʻe tokoni kia kinautolu ʻa e kau Līvaí. Naʻe nofo ʻa e kau taulaʻeiki mo e kau Līvai tokolahi ʻi Sielikō ʻi he taimi naʻe ʻikai ai te nau ngāue ʻi he temipalé, he naʻe kilomita pē ʻe 23 ʻa Sielikō mei Selusalema. Ko ia ai, naʻá na maʻu taʻetoeveiveiua ai ʻa e taimi ke fononga ʻi he hala ko iá. Fakatokangaʻi foki, naʻe ʻalu ʻa e taulaʻeikí mo e Līvaí ʻi he hala “mei Selusalema,” ʻo na huʻu mamaʻo ai mei he temipalé.b Ko ia ʻe ʻikai lava ke fakatonuhiaʻi moʻoni ʻe ha taha ʻa e taʻetokanga ʻa e ongo tangatá ni ʻaki haʻane pehē, ‘Naʻá na fakaʻehiʻehi mei he tangata kafó koeʻuhi naʻe hā ngali ʻokú ne mate, pea ko e ala ki ha ʻangaʻangá ʻe ʻai fakataimi ai kinaua ke na taʻetaau ke ngāue ʻi he temipalé.’ (Livitiko 21:1; Nomipa 19:​11, 16) ʻIkai ʻoku hā mahino naʻe tapua mei he talanoa fakatātā ʻa Sīsuú ʻa e ngaahi meʻa naʻe anga-maheni ki ai ʻa ʻene kau fanongó?

Toʻo mei he Fakatupú

16. Ko e hā ʻoku ʻikai ai ha ofo ʻi he maheni lelei ʻa Sīsū mo e fakatupú?

¹⁶ Ko e ngaahi talanoa fakatātā mo e ngaahi pealapeli lahi ʻa Sīsuú ʻoku fakahaaʻi ai ʻene maheni mo e ngaahi ʻakaú, fanga manú pea mo e anga ʻo e ʻeá. (Mātiu 6:​26, 28-​30; 16:​2, 3) Naʻá ne maʻu mei fē ʻa e ʻilo ko iá? Lolotonga ʻene tupu hake ʻi Kālelí, ʻoku ʻikai ha veiveiua naʻá ne maʻu ai ʻa e faingamālie feʻunga ke siofi ʻa e ngaahi fakatupu ʻa Sihová. ʻIkai ko ia pē, ko Sīsū ʻa e “Kimuʻa ʻi he meʻa kotoa pe kuo ngaohi,” pea naʻe ngāueʻaki ia ʻe Sihova ko e “tokotaha pule ngāue” ʻi hono fakatupu ʻa e ngaahi meʻa kotoa pē. (Kolose 1:​15, 16; Palovepi 8:​30, 31, NW) ʻOku ʻi ai ha ofo ʻi he maheni lelei ʻa Sīsū mo e fakatupú? Tau sio angé ki he founga ʻo ʻene ngāue pōtoʻi ʻaki ʻa e ʻilo ko ení ʻi heʻene faiakó.

17, 18. (a) Naʻe anga-fēfē hono fakahaaʻi ʻe he ngaahi lea ʻa Sīsū ʻoku lēkooti ʻi he Sione vahe 10 naʻá ne maheni mo e tōʻonga ʻa e fanga sipí? (e) Ko e hā naʻe fakatokangaʻi ʻe he kau ʻaʻahi ki he ngaahi fonua faka-Tohitapú fekauʻaki mo e haʻi ʻi he vahaʻa ʻo e kau tauhi-sipí mo ʻenau fanga sipí?

¹⁷ ʻOku ʻi he lotolotonga ʻo e ngaahi talanoa fakatātā ongongofua taha ʻa Sīsuú ʻa e taha ko ia ʻoku lēkooti ʻi he Sione vahe 10, ʻa ia ʻokú ne fakatatau ai ʻa hono vahaʻangatae vāofi mo hono kau muimuí ki he vā ʻo ha tauhi-sipi mo ʻene fanga sipí. ʻOku fakahaaʻi ʻe he ngaahi lea ʻa Sīsuú naʻá ne maheni ʻaupito mo e tōʻonga ʻa e fanga sipi lalatá. Naʻá ne fakahaaʻi ʻoku loto-lelei ʻa e fanga sipí ke tataki kinautolu pea ʻoku nau muimui faitōnunga ʻi honau tauhí. (Sione 10:​2-4) Ko e haʻi makehe ʻi he vahaʻa ʻo e kau tauhi-sipí mo e fanga sipí kuo siofi ia ʻe he kau ʻaʻahi ki he ngaahi fonua faka-Tohitapú. ʻI he senituli hono 19, naʻe pehē ai ʻe he netulolisi ko H. B. Tristram: “Naʻá ku siofi he taimi ʻe taha ha tauhi-sipi ʻokú ne vaʻinga mo ʻene tākangá. Naʻá ne fakangalingali ʻokú ne hola; naʻe tuli ia ʻe he fanga sipí ʻo takatakaiʻi. . . . Fakaʻosí naʻe faʻu ʻe he tākangá kotoa ha siakale, ʻo nau topuna vaʻinga, takatakai ʻiate ia.”

¹⁸ Ko e hā ʻoku muimui ai ʻa e fanga sipí ʻi honau tauhí? “Koeʻuhi ʻoku nau ʻilo hono leʻo,” ko e lea ia ʻa Sīsuú. (Sione 10:4) ʻOku ʻiloʻi moʻoni ʻe he fanga sipí ʻa e leʻo ʻo honau tauhí? Mei ha fakamatala fakafoʻituitui, naʻe tohi ʻe George A. Smith ʻi heʻene tohi The Historical Geography of the Holy Land: “ʻI he taimi ʻe niʻihi naʻa mau maʻu ai ʻemau mālōlō hoʻataá ʻi he tafaʻaki ʻo e taha ʻo e ngaahi vaitupu ko ia ʻo Siuteá, ʻa ia ʻoku ʻomai ki ai ʻe ha kau tauhi-sipi ʻe toko tolu pe toko fā ʻenau ngaahi tākangá. Naʻe fetuifioʻaki ʻa e ngaahi tākangá, pea naʻa mau fifili pe ʻe anga-fēfē hano toe maʻu ʻe he tauhi-sipi taki taha ʻene fanga sipi ʻaʻaná. Ka ʻi he hili ʻa e inu mo e vaʻinga ʻa e tākangá, naʻe ʻalu tahataha atu ʻa e kau tauhi-sipí ʻi he ngaahi tafaʻaki kehekehe ʻo e teleʻá, ʻo taki taha fai ʻene ui makehe; pea ko e fanga sipi ʻa e tauhi-sipi taki taha naʻa nau mavahe mei he tākangá ki honau tauhi ʻonautolú, pea naʻe mavahe ʻa e ngaahi tākangá ʻi he tuʻunga maau naʻa nau haʻu ʻakí.” Naʻe ʻikai faingataʻa hono maʻu ʻe Sīsū ʻa e founga lelei ange ke fakatātaaʻi ʻaki ʻene poiní. Kapau ʻoku tau ʻiloʻi pea talangofua ki heʻene ngaahi akonakí pea kapau ʻoku tau muimui ʻi heʻene tatakí, ʻe lava leva ke tau hoko ʻo ʻi he malumalu ʻo e tokanga fakaalaala mo anga-ʻofa ʻa e “Tauhi Lelei.”—Sione 10:11.

Toʻo mei he Ngaahi Meʻa Naʻe ʻIloʻi ʻe Heʻene Kau Fanongó

19. Ke talitekeʻi ha tui hala, naʻe anga-fēfē hono ngāue ola lelei ʻaki ʻe Sīsū ha meʻa fakamamahi ʻi he feituʻú?

¹⁹ Ko e ngaahi talanoa fakatātā ola leleí ʻe lava ke fakakau ai ʻa e ngaahi meʻa naʻe hokosia, pe ko e ngaahi fakatātā ʻa ia ʻe lava ke ako mei ai ha ngaahi lēsoni. ʻI he taimi ʻe taha, naʻe ngāueʻaki ai ʻe Sīsū ha meʻa naʻe toki hoko ke talitekeʻi ʻaki ʻa e tui hala ʻo pehē, ʻoku tō ha meʻa fakamamahi ki he faʻahinga ʻoku tuha mo iá. Naʻá ne pehē: “Ko e toko hongofulu ma valu ko ia naʻe taʻomia ʻo mate ʻi he holo ʻa e taua ʻi Sailoame, ʻoku mou mahalo koā naʻe lahi honau moʻua [angahalá] ʻi he kakai kotoa pē naʻe nofo ʻi Selusalema?” (Luke 13:4) Naʻe fakaʻuhinga pōtoʻi ʻa Sīsū ʻo fakafepakiʻi ʻa e ʻuhinga ki he tomuʻa fakatufakangaʻí. Naʻe ʻikai ke ʻauha ʻa e ngaahi soulu ʻe 18 ko iá koeʻuhi ko ha angahala naʻe fakatupunga ai ʻa e taʻehōifua fakaʻotuá. Ko hono moʻoní, ko ʻenau mate fakamamahí ko e tupu ia mei he taimí mo e meʻa ʻoku hoko taʻeʻiloá. (Koheleti 9:​11, NW) Naʻá ne fakahalaʻi ai ha akonaki hala ʻaki ʻa e lave ki ha meʻa naʻe hoko ʻa ia ne ʻiloʻi lelei ʻe heʻene kau fanongó.

20, 21. (a) Ko e hā naʻe fakahalaiaʻi ai ʻe he kau Fālesí ʻa e kau ākonga ʻa Sīsuú? (e) Ko e hā ʻa e fakamatala Fakatohitapu naʻe ngāueʻaki ʻe Sīsū ke fakatātaaʻi ʻaki naʻe ʻikai ʻaupito fakataumuʻa ʻe Sihova ha ngāueʻaki fefeka ʻo ʻene lao Sāpaté? (f) Ko e hā ʻe lāulea ki ai ʻi he kupu hoko maí?

²⁰ ʻI heʻene faiakó, naʻe toe ngāueʻaki ai ʻe Sīsū ʻa e ngaahi fakatātā Fakatohitapu. Manatuʻi ʻa e taimi naʻe fakahalaiaʻi ai ʻe he kau Fālesí ʻa ʻene kau ākongá ʻi hono toli ʻa e uité ʻo kai ʻi he Sāpaté. Ko hono moʻoní, naʻe maumauʻi ʻe he kau ākongá, ʻo ʻikai ko e Lao ʻa e ʻOtuá, ka ko e fakaʻuhingaʻi fefeka ʻe he kau Fālesí ʻa e ngāue naʻe taʻefakalao ʻi he Sāpaté. Ke fakatātaaʻi, naʻe ʻikai ʻaupito fakataumuʻa ʻa e ʻOtuá ki ha ngāueʻaki fefeka tōtuʻa pehē ʻo ʻene lao Sāpaté, naʻe lave ʻa Sīsū ki ha meʻa naʻe hoko ʻoku lēkooti ʻi he 1 Samiuela 21:​3-6. ʻI he fiekaiá, naʻe tuʻu ai ʻa Tēvita mo ʻene kau tangatá ʻi he tāpanekalé ʻo kai ʻa e ngaahi foʻi mā fono, ʻa ia naʻe toe fakafetongí. Ko e ngaahi foʻi mā motuʻá naʻe fakamavaheʻi anga-maheni ia maʻá e kau taulaʻeikí ke nau kai. Neongo ia, ʻi he malumalu ʻo e ngaahi tuʻungá, naʻe ʻikai ke fakahalaiaʻi ʻa Tēvita mo ʻene kau tangatá ʻi heʻenau kai iá. ʻOku taau ke fakatokangaʻi, ko e fakamatala ko iá ko e tuʻunga pē ia ʻe taha ʻoku lēkooti ʻi he Tohitapú fekauʻaki mo hono ngāueʻaki ʻa e ngaahi foʻi mā motuʻá ʻe ha faʻahinga ʻikai ko e kau taulaʻeiki. Naʻe ʻiloʻi ʻe Sīsū ʻa e talanoa totonu tofu pē ke ngāueʻakí, pea ʻoku ʻikai ha veiveiua ko ʻene kau fanongo Siú naʻa nau maheni mo ia.​—Mātiu 12:​1-8.

²¹ Ko e moʻoni, ko Sīsuú ko ha Faiako Lahi ia! ʻOku tau ofo moʻoni ʻi heʻene malava taʻefakatataua ke fakahaaʻi ʻa e ngaahi moʻoni mahuʻingá ʻi ha founga naʻe aʻu ki heʻene kau fanongó. Ko ia ai, ʻe lava fēfē ke tau faʻifaʻitaki kiate ia ʻi heʻetau faiakó? ʻE lāulea ki he meʻá ni ʻi he kupu hoko maí.

[Fakamatala ʻi lalo]

ʻOkú Ke Manatuʻi?

• Ko e hā naʻe faiakoʻaki ai ʻe Sīsū ʻa e ngaahi talanoa fakatātaá?

• Ko e hā ʻa e fakatātā ʻoku fakahaaʻi ai naʻe ngāueʻaki ʻe Sīsū ʻa e ngaahi talanoa fakatātā naʻe lava ke mahino ki heʻene kau fanongo ʻi he ʻuluaki senitulí?

• Naʻe anga-fēfē hono ngāue pōtoʻi ʻaki ʻe Sīsū ʻa ʻene ʻilo ki he fakatupú ʻi heʻene ngaahi talanoa fakatātaá?

• ʻI he ngaahi founga fē naʻe ngāueʻaki ai ʻe Sīsū ʻa e ngaahi meʻa naʻe ʻiloʻi ʻe heʻene kau fanongó?

[Fakatātā ʻi he peesi 15]

Naʻe talanoa ʻa Sīsū fekauʻaki mo ha tamaioʻeiki naʻá ne fakafisi ke fakamolemoleʻi ha kiʻi moʻua siʻisiʻi pea mo ha tamai naʻá ne fakamolemoleʻi ha foha ʻa ia naʻá ne tolovekaʻaki ʻa ʻene koloa tukufakaholó kotoa

[Fakatātā ʻi he peesi 16]

Ko e hā ʻa e poini ʻo e pealapeli ʻa Sīsū fekauʻaki mo e Samēlia anga-fakakaungāʻapí?

[Fakatātā ʻi he peesi 17]

ʻOku ʻiloʻi moʻoni ʻe he fanga sipí ʻa e leʻo ʻo honau tauhí?