“Leʻohi Kimoutolu Telia ʻa e Ngaahi Manumanu”

“Neongo oku fuʻu lahi ʻa e koloa ʻa ha taha, ka ʻoku ʻikai hoko ai ʻo tautau ʻene moʻui ki heʻene ngaʻotoʻota.”​—LUKE 12:15.

1, 2. (a) Ko e hā kuó ke fakatokangaʻi fekauʻaki mo e ngaahi meʻa ʻoku mahuʻingaʻia mo tuli ki ai ʻa e kakaí he ʻaho ní? (e) ʻE anga-fēfē nai hano uesia kitautolu ʻe he ngaahi fakakaukau peheé?

KO E paʻangá, koloá, tuʻungá, ngaahi ngāue totongi leleí, fāmilí—ko e ngaahi meʻá ni ʻoku kau ia ʻi he ngaahi meʻa ʻoku vakai ki ai ʻa e tokolahi taha ʻo e kakaí ko ha meʻafua ia ʻo e lavameʻa pe ko e fakapapauʻiʻanga ia ʻo ha kahaʻu malu. ʻOku hā mahino ko e ngaahi fonua koloaʻia mo masivá, ko e ngaahi meʻa ʻoku mahuʻingaʻia mo tuli ki ai ʻa e kakai tokolahi ʻoku fakahanga ia ki hono maʻu ʻa e ngaahi meʻa fakamatelié mo e lavameʻá. ʻI he tafaʻaki ʻe tahá, ko ʻenau mahuʻingaʻia ʻi he ngaahi meʻa fakalaumālié—kapau ʻoku ʻi ai—ʻoku hōloa vave ia.

² ʻOku hangē tofu pē eni ko e meʻa naʻe tomuʻa tala ʻe he Tohi Tapú. ʻOkú ne pehē: “Ka hokosia ʻa e kuonga fakamui, ʻe ai ha ngaahi taimi faingataʻa. He ko hono kakai te nau ʻofa kiate kinautolu pe, te nau ʻofa ki he paʻanga, . . . ko e kau ʻofa ki he malie ʻo ʻikai ʻofa ki he ʻOtua, ko e kakai ʻoku maʻu ʻa e ngeʻesi ʻo e lotu, ka kuo nau liʻaki hono kakano.” (2 Timote 3:​1-5) Ko e nofo ʻi he haʻohaʻonga ʻo e kakai peheé ʻi he ʻaho ki he ʻaho, ʻoku hoko ai ʻa e kau Kalisitiane moʻoní ʻo ʻi he malumalu ʻo e tenge hokohoko ke muimui ki he faʻahinga fakakaukau mo e founga moʻui ko ení. Ko e hā ʻe lava ke ne tokoniʻi kitautolu ke talitekeʻi ʻa e ngaahi feinga ʻa e māmaní ke ‘fakafuo kitautolu ki hono angá’?​—Loma 12:​2, The New Testament in Modern English, ʻa J. B. Phillips.

 3. Ko e hā ʻa e ekinaki naʻe tokonaki ʻe Sīsū te tau lāulea ki ai he taimi ní?

³ ʻI hono tuʻunga ko e “Takimuʻa ʻi he tui mo hono Fakaaʻu,” naʻe tokonaki mai ai ʻe Sīsū Kalaisi maʻa kitautolu ha ngaahi lēsoni mālohi fekauʻaki mo e meʻá ni. (Hepelu 12:2) ʻI he taimi ʻe taha ʻi he lea ʻa Sīsū ki ha fuʻu kakai fekauʻaki mo ha ngaahi meʻa ʻoku fakamaama fakalaumālie, naʻe fakahohaʻasi ʻe ha tangata ʻa e lāuleá ʻaki haʻane kole: “Tangataʻeiki, ke ke tala ki hoku tokoua, ke ne vaeua mo au ʻa e tofiʻa.” ʻI he tali ki aí, naʻe ʻoange ai ʻe Sīsū ki he tangatá—pea mo e kau fanongó kotoa—ha akonaki mamafa. Naʻá ne fakaongo atu ai ha fakatokanga fefeka fekauʻaki mo e mānumanú pea fakamamafaʻi ʻa e fakatokanga ko iá ʻaki ha talanoa fakatātā fakatupu fakakaukau. ʻOku lelei ke tau tokanga ki he meʻa naʻe leaʻaki ʻe Sīsū ʻi he taimi ko iá pea sio pe ʻe lava fēfē ke tau maʻu ʻaonga mei hono ngāueʻaki ia ʻi heʻetau moʻuí tonu.—Luke 12:​13-21.

Ko ha Kole ʻIkai Feʻungamālie

 4. Ko e hā naʻe ʻikai feʻungamālie ai ʻa hono fakahohaʻasi ʻe he tangatá ʻa Sīsuú?

⁴ Ki muʻa ʻi he fakahohaʻa ʻa e tangatá, naʻe lea ai ʻa Sīsū ki heʻene kau ākongá mo e niʻihi kehé fekauʻaki mo e leʻohi kinautolu mei he mālualoí, fekauʻaki mo e loto-toʻa ke fakahā ʻoku nau kau mo e Fanautama ʻa Tangatá, pea fekauʻaki mo hono maʻu ʻa e tokoni mei he laumālie māʻoniʻoní. (Luke 12:​1-​12) ʻOku pau moʻoni ko e ngaahi kaveinga mātuʻaki mahuʻinga eni naʻe fiemaʻu ke tukulotoa ʻe he kau ākongá. Kae kehe, ʻi he lolotonga ʻo ha malanga fakatupu fifili pehē, naʻe fakahohaʻa fakafokifā mai ʻa e tangatá ʻo kole kia Sīsū ke ne fakamāuʻi ʻa e meʻa ne hā ko ha fekīhiaki fakafāmili ia fekauʻaki mo e ngaahi koloa fakamatelie. Neongo ia, ʻoku ʻi ai ha lēsoni mahuʻinga ʻe lava ke tau ako mei he meʻá ni.

 5. Ko e hā naʻe fakaeʻa ʻe he kole ʻa e tangatá ʻo fekauʻaki mo iá?

⁵ Kuo lau ʻo pehē “ko e ʻulungāanga ʻo ha tangata ʻoku faʻa fakahaaʻi ia ʻi he tafaʻaki ʻoku huʻu ki ai ʻene fakakaukaú ʻi he taimi ʻokú ne fanongo ai ki ha akonaki fakalotu.” Lolotonga ʻa e lea ʻa Sīsū fekauʻaki mo e ngaahi meʻa mahuʻinga fakalaumālié, ʻoku ngalingali naʻe fakakaukau ʻa e tangatá ia fekauʻaki mo e meʻa ʻe lava ke ne fai ke maʻu pau ai ha ngaahi lelei fakapaʻanga. ʻOku ʻikai ke fakahaaʻi ia pe naʻá ne maʻu ha totonu fakalao ki heʻene mamahi fekauʻaki mo e tofiʻá. Mahalo ko ʻene feinga pē ke ngāueʻaongaʻaki ʻa e mafai mo e ongoongo ʻo Sīsū ʻi he pehē ko ha fakamaau poto ia ʻi he ngaahi meʻa ʻa e faʻahinga ʻo e tangatá. (Aisea 11:​3, 4; Mātiu 22:16) Pe ko e hā pē ʻa e tuʻungá, ko ʻene fehuʻí ʻoku fakahuʻunga ai naʻe ʻi ai ha palopalema ʻi hono lotó—ko ha mātuʻaki taʻehoungaʻia ʻi he ngaahi meʻa fakalaumālié. ʻIkai ko e ʻuhinga lelei eni ke tau sivisiviʻi ai kitautolu? Ko e fakatātaá, ʻi he ngaahi fakataha faka-Kalisitiané, ʻoku faingofua ke fakaʻatā ʻetau fakakaukaú ke heva takai holo pe ke nōfoʻi ʻi he meʻa te tau toki fai nai ʻamui. Ka ko e meʻá ia, ʻoku totonu ke tau tokanga ki he meʻa ʻoku leaʻakí pea fakakaukau ki he ngaahi founga ke ngāueʻaki fakafoʻituitui ai ʻa e fakamatalá koeʻuhi ke tau lava ai ʻo fakalakalaka ʻi hotau vahaʻangatae mo ʻetau Tamai fakahēvaní, ʻa Sihova ko e ʻOtuá, pea mo hotau kaungā Kalisitiané.​—Sāme 22:22; Maake 4:​24.

 6. Ko e hā naʻe ʻikai tali ai ʻe Sīsū ke ne fai ha meʻa ki he kole ʻa e tangatá?

⁶ Ko e hā pē meʻa naʻá ne ueʻi ʻa e tangatá ke ne fai ʻa e kolé, naʻe ʻikai tali ia ʻe Sīsū ke ne fai ha meʻa ki ai. Ka naʻe pehē ʻe Sīsū ia kiate ia: “Siana, ko hai naʻa ne fakanofo au ke fai fakamāu ʻiate kimoutolu, pē ke tufa?” (Luke 12:14) ʻI heʻene lea peheé, ko e lave ia ʻa Sīsū ki ha meʻa naʻe lāuʻilo lelei ki ai ʻa e kakaí, he fakatatau ki he Lao ʻa Mōsesé, ko e kau fakamaau ki he ngaahi koló naʻe fakanofo kinautolu ke nau fai tuʻutuʻuni ki he ngaahi meʻa tofu pē ko iá. (Teutalonome 16:​18-​20; 21:​15-​17; Lute 4:​1, 2) Ko Sīsuú, ʻi he tafaʻaki ʻe tahá, naʻe tokanga ia ki he ngaahi meʻa mahuʻinga angé—ke faifakamoʻoni ki he moʻoni ʻo e Puleʻangá pea ke akoʻi ki he kakaí ʻa e finangalo ʻo e ʻOtuá. (Sione 18:37) ʻI he muimui ki he faʻifaʻitakiʻanga ʻa Sīsuú, kae ʻikai fakaheleleuʻi ʻe he ngaahi palopalema anga-mahení, ʻoku tau ngāueʻaki ai hotau taimí mo e iví ki hono malangaʻi ʻo e ongoongo leleí pea ‘ngaohi ʻa e ngāhi kakai kotoa pe ko ʻene kau ako.’—Mātiu 24:14; 28:19.

Tokanga Telia ʻa e Mānumanú

 7. Ko e hā ʻa e vakai loloto naʻe fai ʻe Sīsuú?

⁷ ʻI heʻene malava ke ʻilo ʻa e ngaahi taumuʻa taupotu ʻo e lotó, naʻe lāuʻilo ʻa Sīsū naʻe ʻi ai ha meʻa mafatukituki ange ia naʻe fekauʻaki mo e kole ko ia ʻa e tangatá kia Sīsū ke ne kau atu ai ʻi ha meʻa fakafoʻituitui. Ko ia ai, ʻi he ʻikai ngata pē ʻi heʻene taʻetali ʻa e kolé, naʻe aʻu ʻa Sīsū ia ki he uho ʻo e meʻá ʻo ne pehē: “Mou ʻā, ʻo leʻohi kimoutolu telia ʻa e ngaahi manumanu: he neongo oku fuʻu lahi ʻa e koloa ʻa ha taha, ka ʻoku ʻikai hoko ai ʻo tautau ʻene moʻui ki heʻene ngaʻotoʻota.”—Luke 12:15.

 8. Ko e hā ʻa e mānumanu, pea ko e hā ʻe lava ke taki atu ki aí?

⁸ Ko e mānumanú ʻoku hulu atu ia ʻi he holi pē ke maʻu ha paʻanga pe ko ha ngaahi meʻa pau, ʻa ia ʻe lava ke ngāue mo taumuʻa totonu ʻaki. Ko e “holi tōtuʻa ia ki he tuʻumālié pe koloá pe ki ha koloa ʻa ha taha kehe,” ko e lau ia ʻa ha tikisinale ʻe taha. ʻOku lava ke kau ki ai ʻa e holi havala taʻetopono, ke maʻu ha ngaahi meʻa​—mahalo ko ha ngaahi meʻa ʻa ha taha kehe​—koeʻuhi pē ke maʻu mai kinautolu, ʻo ʻikai fai ha tokanga ia ki heʻete ngaahi fiemaʻú pe ko e uesia ʻo e niʻihi kehé. Ko ha taha mānumanu ʻokú ne fakaʻatā ʻa e meʻa ʻokú ne holi ki aí ke ne puleʻi ʻene fakakaukaú mo ʻene tōʻongá ʻo aʻu ia ki ha tuʻunga ʻoku hoko tefito ia ko hono ʻotua. Manatuʻi ʻoku fakatatau ʻe he ʻapositolo ko Paulá ha tokotaha mānumanu ki ha tokotaha tauhi ʻaitoli, ʻa ia ʻoku ʻikai hano tofiʻa ʻi he Puleʻanga ʻo e ʻOtuá.​—Efeso 5:4 (Ef 5:​5, PM); Kolose 3:5.

 9. ʻI he ngaahi founga fē ʻe lava ke fakahāhā ai ʻa e mānumanú? ʻOmai ha ngaahi fakatātā.

⁹ ʻOku mālié, naʻe fakatokanga ʻa Sīsū fekauʻaki mo e “ngaahi manumanu.” Ko e mānumanú ʻoku lahi hono ngaahi faʻahingá. Ko e fakamuimui taha ʻi he Fekau ʻe Hongofulú naʻe fakalau mai ai ʻa e niʻihi ʻo kinautolu, ʻo pehē: “ʻOua te ke manumanu ki he fale ʻo ho kaungaʻapi. ʻOua te ke manumanu ki he uaifi ʻo ho kaungaʻapi, pe ki haʻane tamaioʻeiki, pe ki haʻane kaunanga, pe ki haʻane pulu, pe ki haʻane asi, pe ki ha meʻa ʻe taha ʻoku ʻa ho kaungaʻapi.” (Ekisoto 20:17) ʻOku fonu ʻa e Tohi Tapú he ngaahi fakatātā ʻo e faʻahinga kuo nau tō ki he angahala mamafá koeʻuhi ko e mānumanú ʻi hano faʻahinga founga. Ko Sētane ʻa e ʻuluaki tokotaha ke mānumanu ki ha meʻa ʻa e tokotaha kehe—ko e kolōlia, lāngilangi mo e mafai ʻa ia ʻoku ʻa Sihova tokotaha pē. (Fakahā 4:​11) Naʻe mānumanu ʻa ʻIvi ki he totonu ʻo e fili tauʻatāiná, pea ʻi hono kākaaʻi ia fekauʻaki mo e meʻá ni naʻe kamata ai ʻa e faʻahinga ʻo e tangatá ke huʻu atu ʻi he hala ki he angahalá mo e maté. (Senesi 3:​4-7) Ko e fanga tēmenioó ko e kau ʻāngelo ia naʻa nau hoko ʻo taʻetōliʻa ʻi he “tuʻunga naʻe ʻonautolu, ka nau liʻaki honau nofoʻanga totonu” koeʻuhi ko ha meʻa naʻe ʻikai haʻanau totonu ki ai. (Siutasi 6; Senesi 6:2) Toe fakakaukau atu foki kia Pēlami, ʻĀkani, Kēhesi mo Siutasi. ʻI he ʻikai tōliʻa pē ʻi ngaahi meʻa naʻa nau maʻú, naʻa nau fakaʻatā ʻe kinautolu ha holi taʻetopono ki he koloa fakamatelié ke ne fakatupunga ai kinautolu ke ngāuekoviʻaki honau tuʻunga falalaʻangá, ʻo nau tūʻulu ai ki he maumau mo e ʻauha.

10. ʻOku totonu ke fēfē ʻetau “ʻā” ʻo hangē ko ia naʻe ekinaki ʻe Sīsuú?

¹⁰ He feʻungamālie moʻoni ko hono talateu ʻe Sīsū ʻa e fakatokanga fekauʻaki mo e mānumanú ʻaki ʻa e lea, “mou ʻā”! Ko e hā hono ʻuhingá? Koeʻuhi ʻoku faingofua ʻaupito ki he kakaí ke sio ʻoku havala pe mānumanu ha taha kehe, ka ʻoku tātātaha ke nau ʻiloʻi hifo ʻoku nau halaia tonu ai. Neongo ia, ʻoku fakahaaʻi ʻe he ʻapositolo ko Paulá “ko e ʻofa ki he paʻanga ko e aka ʻoku tupu mei ai ʻa e ngaahi kovi kotoa pe.” (1 Timote 6:​9, 10) ʻOku fakamatala ʻa e ākonga ko Sēmisí ko e holi ko ia ʻoku halá, ‘oka tuituia oku fanauʻi koe agahala.’ (Semisi 1:​15, PM) ʻI he fehoanaki mo e ekinaki ʻa Sīsuú, ʻoku totonu ke ‘tau ʻā’ ʻo ʻikai ko e fakasio ʻa e niʻihi kehé ke vakai pe ʻoku nau feʻungamālie mo e fakamatalá, ka ke sivisiviʻi kitautolu ke sio pe ko e hā ʻa e meʻa kuo fakahanga ki ai hotau lotó, koeʻuhi ke ‘leʻohi kitautolu telia ʻa e ngaahi manumanú.’

Ko ha Moʻui ʻOku Fuʻu Lahi Ai ʻa e Koloá

11, 12. (a) Ko e hā ʻa e fakatokanga naʻe fai ʻe Sīsū fekauʻaki mo e mānumanú? (e) Ko e hā ʻoku fiemaʻu ai ke tau tokanga ki he fakatokanga ʻa Sīsuú?

¹¹ ʻOku ʻi ai ha toe ʻuhinga ʻe taha kuo pau ai ke tau leʻohi kitautolu mei he mānumanú. Fakatokangaʻi ʻa e meʻa hono hoko naʻe leaʻaki ʻe Sīsuú: “Neongo oku fuʻu lahi ʻa e koloa ʻa ha taha, ka ʻoku ʻikai hoko ai ʻo tautau ʻene moʻui ki heʻene ngaʻotoʻota.” (Luke 12:15) Ko e meʻa eni ʻoku taau ke fai ha fakakaukau lelei ki ai ʻi hotau kuonga fakamatelié ni, ʻi he hanga ko ia ʻe he kakaí ʻo fakatatau ʻa e koloaʻiá mo e tuʻumālié ki he fiefiá mo e lavameʻá. ʻI he ngaahi lea ko iá, naʻe fakamahino mai ai ʻe Sīsū ko e moʻui mohu ʻuhinga mo fakafiemālie moʻoní ʻoku ʻikai fakatupunga ia pe fakatuʻunga ʻi he ngaahi koloa fakamatelié, tatau ai pē pe ko e hā hono lahi.

¹² Kae kehe, ʻe ʻikai nai loto-tatau mo ia ha niʻihi. Te nau fakaʻuhinga nai ko e ngaahi koloa fakamatelié ʻokú ne ʻai ʻa e moʻuí ke fakafiemālie mo fakafiefia ange, ʻo ʻaonga lahi ange ai. Ko ia ai, ʻoku nau līʻoa kinautolu ki he ngaahi ngāue te ne ʻai ke nau malava ai ʻo maʻu ʻa e koloa mo e nāunau kotoa pē ʻoku nau holi ki aí. ʻOku nau fakakaukau ko e meʻá ni, ʻe iku ia ki ha moʻui ʻoku lelei. Ka ʻi he fakakaukau peheé, ʻoku ʻikai ai te nau mahinoʻi ʻa e poini naʻe fakamamafaʻi ʻe Sīsuú.

13. Ko e hā ha vakai mafamafatatau ki he moʻuí mo e koloá?

¹³ ʻI he ʻikai fakahanga ʻa e tokangá pe ʻoku tonu pe hala ke maʻu ʻo fuʻu lahi ʻa e koloá, naʻe fakamahino ʻe Sīsū ko e moʻui ʻa ha tangata ʻoku ʻikai tautau ia “heʻene ngaʻotoʻota,” ʻa ia, ko e ngaahi meʻa kuó ne ʻosi maʻú. ʻI he fekauʻaki mo e meʻá ni, ʻoku tau ʻiloʻi kotoa, ke moʻuí, pe tolonga ʻa e moʻui ʻoku tau maʻú, ʻoku ʻikai moʻoni fiemaʻu ki ai ha meʻa ʻoku fuʻu lahi. ʻOku fiemaʻu pē ha kiʻi meʻakai, ha meʻa ke vala mo ha feituʻu ke mohe ai. Ko e kau koloaʻiá ʻoku nau maʻu ʻo fuʻu hulu ʻa e ngaahi meʻá ni, pea ko e kau masivá kuo pau nai ke nau fāinga ke maʻu ʻa e meʻa ʻoku nau fiemaʻú. Kae kehe, neongo ʻa e faikehekehe ʻoku hokó, ʻe ai ʻa e faitatau ʻi he taimi ʻoku ngata ai ʻa e moʻuí—ʻoku ngata ʻa e meʻa kotoa. (Koheleti 9:​5, 6) Ko ia ai, ke ʻuhinga mo ʻaonga ʻa e moʻuí, heʻikai lava pea ʻikai totonu ke fakatefito pē ia ʻi he ngaahi meʻa ʻoku lava ʻe ha taha ke fakatau mai pe lolotonga maʻú. ʻOku hoko ʻo hā mahino ʻa e fakakaukau ko ení ʻi heʻetau sivisiviʻi ko ia ʻa e faʻahinga moʻui naʻe lea ki ai ʻa Sīsuú.

14. Ko e hā ʻoku lava ke tau ako mei he foʻi lea ki he “moʻui” ʻoku maʻu ʻi he fakamatala ʻa e Tohi Tapú?

¹⁴ ʻI he pehē ko ia ʻe Sīsū, “ʻoku ʻikai hoko ai ʻo tautau ʻene moʻui ki heʻene ngaʻotoʻota” ko e foʻi lea naʻe ngāueʻaki heni ki he “moʻui” ʻi he Kōsipeli ʻa Luké (faka-Kalisí, zo·eʹ) ko e lave ia, ʻikai ki he anga pe founga ʻo e moʻuí, ka ki he moʻuí tonu, ʻa e moʻuí ʻi hono ʻuhinga fakahangatonú.a Naʻe pehē ʻe Sīsuú ʻoku tatau ai pē pe ʻoku tau koloaʻia pe masiva, tatau ai pē pe ʻoku tau moʻui tuʻumālie pe mālō pē maʻu ha meʻa, ʻoku ʻikai ke tau mafai kakato pe ʻe fuoloa fēfē nai ʻetau moʻuí pe te tau moʻui koā ki ʻapongipongi pe ʻikai. Naʻe fakahā ʻe Sīsū heʻene Malanga ʻi he Moʻungá: “Neongo hoʻomou lotomoʻua ki ai, ka talaʻehai ʻe lava ai ʻe ha taha ke toloʻi atu hono taʻu ko ha momoʻi hanga pe ʻe taha.” (Mātiu 6:27) ʻOku fakahaaʻi mahino ʻe he Tohi Tapú ko Sihova ʻataʻatā pē ʻa e “matavai ʻo e moʻui” pea ko ia pē taha ʻe lava ke ne foaki ki he kau faitōnungá ʻa e “moʻui moʻoni,” pe “moʻui taʻengata,” ʻa e moʻui heʻikai toe ʻosí, tatau ai pē pe ʻi hēvani pe ʻi māmani. —Sāme 36:9; 1 Timote 6:​12, 19.

15. Ko e hā ʻoku falala ai ʻa e tokolahi ki he ngaahi koloa fakamatelié?

¹⁵ Ko e ngaahi lea ʻa Sīsuú ʻoku mahino ai ʻa e faingofua moʻoni ki he kakaí ke nau maʻu ha vakai mioʻi pe pikoʻi ki he moʻuí. Tatau ai pē pe ko e koloaʻia pe masiva, ko e faʻahinga kotoa ʻo e tangatá ʻoku nau taʻehaohaoa pea maʻu ʻa e ikuʻanga tatau pē taha. Naʻe pehē ʻe Mōsese ʻo e kuonga muʻá: “Ko e ngaahi ʻaho ʻo homau taʻu ko e taʻu ʻe fitungofulu; pea ka lahi hoto ngu, ʻe aʻu nai ki he valungofulu: Pea ko hoto vikiʻanga ko e ongosia mo e muna, he ʻoku tuʻusi vave pea tau puna.” (Sāme 90:10; Siope 14:​1, 2; 1 Pita 1:24) ʻI he ʻuhinga ko ení, ko e kakai ko ia kuo ʻikai te nau fakatupulekina ha vahaʻangatae lelei mo e ʻOtuá ʻoku nau faʻa ohi ʻa e fakakaukau ko ia “tau kai mo inu e, he ʻoku apongipongi ʻetau mate,” ʻa ē naʻe lave ki ai ʻa e ʻapositolo ko Paulá. (1 Kolinito 15:32) Ko e niʻihi, ʻi heʻenau ongoʻi ʻoku fuo nounou mo taʻepau ʻa e moʻuí, ʻoku nau feinga ke maʻu ʻa e maluʻangá mo e tolongá ʻi he ngaahi koloa fakamatelié. Mahalo ʻoku nau ongoʻi ko hono maʻu ʻo lahi ʻa e ngaahi meʻa fakamatelie hā sino maí te ne ʻai tokua ʻa e moʻuí ke toe malu ange. Ko ia ai, ʻoku nau ngāue taʻetuku ke fokotuʻuna ʻa e koloá mo e ngaʻotoʻotá, ʻo fakatatau hala ai ʻa e ngaahi meʻa peheé ki he maluʻangá mo e fiefiá.​—Sāme 49:​6, 11, 12.

Ko ha Kahaʻu Malu

16. ʻOku ʻikai makatuʻunga ʻi he hā ʻa e meʻa mahuʻinga moʻoni ʻi he moʻuí?

¹⁶ ʻE moʻoni nai ko ha tuʻunga māʻolunga ange ʻo e moʻuí—ʻa e maʻu ʻo fuʻu lahi ʻa e meʻakai, vala, nofoʻanga mo e ngaahi tuʻumālie kehé—ʻoku lava ke tokoni ia ki ha moʻui fiemālie ange pe aʻu nai ʻo lava ke maʻu ai ha tokangaʻi fakafaitoʻo lelei ange ʻo tānaki mai ai ha toe ngaahi taʻu ki he fuoloa ʻo e moʻui ʻa ha taha. Kae kehe, ʻoku mohu ʻuhinga ange mo malu ange moʻoni ha moʻui pehē? Ko e meʻa mahuʻinga moʻoni ʻi he moʻuí ʻoku ʻikai fuaʻaki ia ʻa e lahi ʻo e ngaahi taʻu ʻe moʻui nai ai ha taha pe ko e lahi ʻo e ngaahi meʻa fakamatelie ʻoku maʻu pe ngāueʻaki nai ʻe ha taha. Naʻe fakamahino ʻe he ʻapositolo ko Paulá ʻa e fakatuʻutāmaki ʻo e fuʻu falala lahi ki he ngaahi meʻa peheé. Naʻá ne tohi kia Tīmote: “Ke ke naʻinaʻi kiate kinautolu ʻoku koloaʻia fakaemaama ko eni, ke ʻoua te nau angahiki, ʻumaʻā ke tuʻu ʻenau falala ki he koto taʻemaʻu na ko e koloa; ka ki he ʻOtua, ʻa ia ʻoku ne ʻomi ʻa e meʻa kehekehe ʻo fuʻu lahi, maʻatau fiemalie pe.”—1 Timote 6:17.

17, 18. (a) Ko e hā ʻa e ngaahi faʻifaʻitakiʻanga tuʻu-ki-muʻa ʻoku fekauʻaki mo e ngaahi koloa fakamatelié ʻoku taau ke tau faʻifaʻitaki ki ai? (e) Ko e hā ʻa e pealapeli ʻa Sīsū ʻe lāulea ki ai ʻi he kupu hoko maí?

¹⁷ Ke tuku ʻe ha taha ʻene ʻamanakí ʻi he koloá ʻoku taʻefakapotopoto ia koeʻuhí he ko e “koto taʻemaʻu.” Naʻe koloaʻia ʻaupito ʻa e pēteliake ko Siopé, ka ʻi he taimi naʻe hoko fakatuʻupakē ai ʻa e fakatamakí, naʻe ʻikai lava ʻe heʻene koloá ʻo tokoniʻi ia; ne nau mole fakafokifā. Ko hono vahaʻangatae mālohi mo e ʻOtuá naʻá ne fakamoʻui ia ʻi he kotoa ʻo hono ngaahi ʻahiʻahí mo hono ngaahi mamahí. (Siope 1:​1, 3, 20-​22) Naʻe ʻikai fakaʻatā ʻe ʻĒpalahame ʻa e fuʻu lahi ʻo ʻene koloa fakamatelié ke ne taʻofi ia mei heʻene tali ʻo ha vāhenga-ngāue faingataʻa meia Sihova, pea naʻe tāpuekina ia ʻaki ʻene hoko ko e “tupuʻanga ʻo ha fuifui puleʻanga.” (Senesi 12:​1, 4; 17:​4-6) Ko e ngaahi meʻá ni fakataha mo e ngaahi fakatātā kehe ʻoku taau ke tau faʻifaʻitaki ki ai. Iiki pe lalahi, ʻoku fiemaʻu ke tau sivisiviʻi kitautolu ke sio pe ko e hā ʻa e meʻa ʻoku mahuʻinga moʻoni ʻi heʻetau moʻuí pea mo e meʻa ʻoku tuku ai ʻetau ʻamanakí.​—Efeso 5:​10; Filipai 1:​10.

¹⁸ Ko e ngaahi lea siʻi naʻe leaʻaki ʻe Sīsū fekauʻaki mo e mānumanú pea mo e vakai totonu ki he moʻuí ʻoku mātuʻaki mohu ʻuhinga mo mohu fakahinohino. Kae kehe, naʻe toe ʻi ai ʻa e ngaahi meʻa kehe ʻi he fakakaukau ʻa Sīsuú, pea naʻá ne hoko atu ʻo talanoa fekauʻaki mo ha pealapeli, pe talanoa fakatātā fakatupu fakakaukau, fekauʻaki mo ha tangata koloaʻia vale. ʻOku anga-fēfē ʻa e kaungatonu ʻa e talanoa fakatātā ko iá ki heʻetau moʻui he ʻaho ní, pea ko e hā ʻe lava ke tau ako mei aí? Ko e kupu hoko maí te ne ʻomai ʻa e talí.

[Fakamatala ʻi lalo]

Ko e Hā Hoʻo Talí

• Ko e hā ʻoku lava ke tau ako mei hono taʻetali ko ia ʻe Sīsū ke fai ki he kole ʻa ha tangata ʻi he fuʻu kakaí?

• Ko e hā kuo pau ke tau leʻohi ai kitautolu mei he mānumanú, pea ʻe lava fēfē ke tau fai pehē?

• Ko e hā ʻoku ʻikai tautau ai ʻa e moʻuí ʻi he ngaahi koloa fakamatelié?

• Ko e hā ʻe lava ke ne ʻai ʻa e moʻuí ke ʻaonga mo malu moʻoní?

[Fakatātā ʻi he peesi 23]

Ko e hā naʻe ʻikai tali ai ʻe Sīsū ʻa e kole ʻa ha tangata ʻe taha?

[Fakatātā ʻi he peesi 23]

Ko e mānumanú ʻe lava ke taki atu ia ki ha ngaahi ola fakatupu ʻauha

[Fakatātā ʻi he peesi 25]

Naʻe anga-fēfē hono fakahāhā ʻe ʻĒpalahame ha vakai totonu ki he koloa fakamatelié?