“Kuo Hoko Mai ʻa e Māma ki Māmani”

“Pea ko eni ia ʻa e fakamāu: kuo hoko mai ʻa e māma ki māmani, pea ʻofa ʻa e kakai ki he poʻuli ʻo ʻikai ki he maama.”​—SIONE 3:19.

 1. Ko e hā ʻoku totonu ai ke loto-hohaʻa ʻa e tokotaha kotoa pē ʻo kau ki he fakamaau ʻa e ʻOtuá?

KO E tokolahi taha ʻo e kakaí ʻi he ʻahó ni ʻoku ʻikai te nau fuʻu tokanga lahi ʻo kau ki he fakamaau ʻa e ʻOtuá. ʻOku tui ʻe he faʻahinga ʻe niʻihi ʻo pehē kapau te nau ʻalu maʻu pē ki he lotú pea ʻoua ʻe fai ha meʻa ʻoku kovi ki honau ngaahi kaungāʻapí ʻe pau ke nau maʻu ʻa e fakamaau ʻo e hōifua mei he ʻOtuá. Ko e ngaahi akonaki ʻa e Puleʻanga-Haʻa-Kalisitiané ʻo kau ki he afi ʻo helí mo e pulekatolió kuó na ʻai ke taʻe tui ʻa e tokolahi ki he fakamaau fakaeʻotuá. Ka ʻoku ʻikai malava ʻe he mafola lahi ʻa e loto-hanganoa mo e ngaahi loi ʻa e Puleʻanga-Haʻa-Kalisitiané ke ne liliu ʻa e moʻoniʻi meʻa ko ia ʻe faifai atu pea ʻe fakamaauʻi ʻe he ʻOtuá ʻa e tokotaha taki taha. (Loma 14:12; 2 Tīmote 4:1; Fakahā 20:13) Pea ʻoku lahi ʻa e meʻa ʻe fakatuʻunga ʻi he fakamaau ko ʻení. Ko kinautolu te nau maʻu ʻa e fakamaau ʻo e hōifuá te nau maʻu ʻa e meʻaʻofa ʻa e ʻOtuá ko e moʻui taʻengata, ka ko kinautolu ʻe maʻu ʻa e fakamaau ʻo e taʻehōifuá te nau maʻu ʻa e totongi kakato ʻo e angahalá: ko e mate.​—Loma 6:23.

 2. Ko e hā ʻa e meʻa ʻe fakatuʻunga ai ʻa e fakamaau ʻa e ʻOtuá?

² Ko ia, ko e kau Kalisitiane moʻoní ʻoku nau ongoʻi hohaʻa ʻo kau ki he fakamaau ʻa e ʻOtuá, pea ʻoku nau feinga mālohi ke fakahōifua kiate ia. ʻOku anga-fēfē haʻanau fai ʻa e meʻá ni? ʻOku fakahā mai kiate kitautolu ʻe Sīsū ʻa e kī ʻia Sione 3:19. ʻOkú ne pehē: “Pea ko eni ia ʻa e fakamāu: kuo hoko mai ʻa e māma ki māmani, pea ʻofa ʻa e kakai ki he poʻuli ʻo ʻikai ki he maama; he ko ʻenau ngaahi ngaue naʻe kovi.” ʻIo, ko e fakamaau ʻa e ʻOtuá ʻoku fakatuʻunga pe ʻoku tau ʻofa ʻi he maamá kae ʻikai ko e poʻulí.

“Ko e ʻOtua ko e Maama”

 3. Ko e hā ʻa e poʻulí, pea ko e hā ʻa e maamá?

³ Fekauʻaki mo e meʻa fakalaumālié, ko e poʻulí ʻoku ʻi ai ʻene fekauʻaki mo e tuʻunga mūnoa mo e taʻe ʻi ai ha ʻamanaki ʻa ia ko e meʻa ia ʻoku ʻi he haʻohaʻonga ʻo Sētané​—neongo ko Sētané ʻokú ne faʻa fakangalingali ko ha “agelo oe māma.” (2 Kolinitō 4:4; 11:​14, PM; ʻEfesō 6:12) ʻI he tafaʻaki ʻe tahá, ko e maamá ʻoku ʻi ai ʻene fekauʻaki mo e mahino mo e fakamaama ʻoku ʻomai ʻe he ʻOtua ko Sihová. Naʻe lea ʻa Paula ʻo kau ki he maamá ʻi heʻene tohi ʻo pehē: “He ko e ʻOtua ia naʻa ne folofola, ʻE ulo mai ha maama mei he poʻuli; pea ko ia ia kuo ne ulo ʻi homau loto, koeʻuhi ke ai ha ulo atu ʻo e ʻilo ki he langilangi ʻo e ʻOtua, ʻi he fofonga ʻo Sisu Kalaisi.” (2 Kolinitō 4:6) Koeʻuhi ʻoku vāofi ʻaupito ʻa e maama fakalaumālié mo e ʻOtua ko Sihová ko ia naʻe tohi ʻe he ʻapositolo ko Sioné ʻo pehē: “Ko e ʻOtua ko e maama.”​—1 Sione 1:5; Fakahā 22:5.

 4. (a) ʻOku anga-fēfē hono ʻai ʻe Sihova ke ala maʻu ʻa e maamá? (e) ʻI he founga fē ʻe lava ke tau fakahā ai ʻa e ʻofa ki he maamá?

⁴ Kuo ʻai ʻe Sihova ʻa e maamá ke ala maʻu ʻo fakafou mai ʻi heʻene folofolá, ʻa ia kuo hiki ia ʻi he Tohitapú ʻo ala maʻu taʻe taʻofia ia ʻi he ʻahó ni. (Sāme 119:105; 2 Pita 1:19) Ko ia, ko hono moʻoní naʻe fakahā ʻe he tangata-tohi-sāmé ʻene ʻofa ki he maamá ʻi heʻene tohi ʻo pehē: “ʻOi ʻeku ʻofa ki hoʻo lao na! ʻOku ou fakalaulauloto ki ai he ʻaho kotoa. Kuo tauhi ʻe hoku laumalie hoʻo ʻu fakamoʻoni; pea ʻoku ou ʻofa ʻaupito ki ai.” (Sāme 119:97, 167) ʻOku lahi tatau ʻa hoʻo ʻofa ki he maamá mo ia naʻe maʻu ʻe he tangata-tohi-sāmé? ʻOkú ke lau tuʻu maʻu ʻa e Folofola ʻa e ʻOtuá, ʻo fakalaulauloto ki ai, mo feinga mālohi ke ngāueʻaki ʻa e meʻa ʻokú ne fakahaá? (Sāme 1:1-3) Kapau ʻoku pehē, ʻokú ke fekumi ke maʻu ha fakamaau ʻo e hōifua meia Sihova.

“Koe Māma Au o Mamani”

 5. ʻOku fakahanga ʻa e tokangá ʻe he maama faka-ʻotuá kia hai?

⁵ ʻOku fakahanga ʻa e tokangá ʻe he maama foaki-moʻui meia Sihová ki he tokotaha ko Sīsū Kalaisí. ʻI he kamataʻanga ʻo e Kōsipeli ʻa Sioné, ʻoku tau lau ai ʻo pehē: “Nae iate ia [Sīsū] ae moui; bea koe moui koe māma ia oe tagata. Bea nae ulo ae māma i he bouli; ka nae ikai maʻu ia e he bouli.” (Sione 1:4, 5, PM) Ko e moʻoni, koeʻuhi ʻoku maʻu ʻe Sīsū ha feohi vāofi mo e maamá ʻoku ui ai ia “koe māma mooni ia, oku ne fakamāma ki he tagata kotoabe.” (Sione 1:9, PM) Naʻe lea ʻa Sīsū tonu ʻo pehē: “I he eku kei i mamani, koe māma au o mamani.”​—Sione 9:5, PM.

 6. Ko e hā kuo pau ke fai ʻe ha tokotaha koeʻuhi ka ne maʻu ʻa e fakamaau ʻo e hōifua ʻa ia ʻoku tataki atu ki he moʻui taʻengatá?

⁶ Ko ia ai, ko kinautolu ʻoku ʻofa ʻi he maamá ʻoku nau ʻofa ʻia Sīsū mo tui kiate ia. ʻOku ʻikai ke lava ke maʻu ha fakamaau ʻo e hōifua taʻe ʻi ai ha kaunga kia Sīsū. ʻIo, ʻoku malava ke maʻu ha fakamaau ʻo e hōifua ʻi heʻetau hanga pē kiate ia ko e fakamoʻuiʻanga kuo fakanofo ʻe he ʻOtuá. Naʻe pehē ʻe Sīsū: “Ko ia ʻoku ne tui pikitai ki he ʻAlo ʻoku ne maʻu ʻa e moʻui taʻengata: ka ko ia ʻoku ʻikai te ne talangofua ki he ʻAlo ʻe ʻikai te ne mamata ia ki he moʻui; ka ʻoku nofo maʻu kiate ia ʻe he houhau ʻa e ʻOtua.” (Sione 3:36) Ka, ʻoku ʻuhinga ki he hā ke ngāueʻi ʻa e tui kia Sīsū?

 7. Ko e tui kia Sīsuú ʻoku toe fakakau atu ki ai mo e tui kia hai?

⁷ Ko e ʻuluaki meʻa, naʻe lea ʻa Sīsū tonu ʻo pehē: “Ko ia oku tui kiate au, oku ikai tui kiate au be, ka kiate ia naa ne fekau au. Bea ko ia oku ne mamata kiate au, oku ne mamata kiate ia naa ne fekau au. Kuou haʻu au koe māma ki mamani, koeuhi ko ia e tui kiate au ke oua naa nofo ia i he bouli.” (Sione 12:44-46, PM) Ko kinautolu ʻoku ʻofa ʻia Sīsū pea ngāueʻi ʻa e tui kiate iá kuo pau ke nau toe maʻu ʻa e ʻofa loloto mo e tui ki he ʻOtua mo e Tamai ʻa Sīsuú, ko Sihova. (Mātiu 22:37; Sione 20:17) Ko kinautolu ʻoku nau ngāueʻaki ʻa e hingoa ʻo Sīsuú ʻi heʻenau lotú kae ʻikai te nau fakalāngilangiʻi lahi ange ʻa Sihová ʻoku ʻikai ke hā mei ai ha ʻofa moʻoni ki he maamá.​—Sāme 22:27; Loma 14:7, 8; Filipai 2:10, 11.

Ko e “Takimuʻa” ʻa e ʻOtuá

 8. Naʻa mo e ki muʻa ʻi hono ʻaloʻi mai ʻa Sīsū ko e tangatá naʻe fēfē ʻa hono fakahanga ʻa e tokangá kiate ia ʻe he maama faka-ʻotua?

⁸ Ko e ngāueʻi ʻo e tui kia Sīsuú ʻoku toe ʻuhinga ia ke tali kakato hono ngafa ʻi he ngaahi taumuʻa ʻa Sihová. Naʻe fakaeʻa ʻa e mahuʻinga ʻo e ngafa ko ʻení ʻe ha ʻāngelo kia Sione ʻo ne pehē: “Ko e fai fakamoʻoni kia Sisu, ko e [meʻa ia ʻokú ne ueʻi ʻa e] laumalie ʻo e palofisai.” (Fakahā 19:10; Ngāue 10:43; 2 Kolinitō 1:20) Kamata mei he ʻuluaki kikite ʻi ʻĪtení, ko e ngaahi kikite fakamānava fakae-ʻotua kotoa pē naʻe pau ke fekauʻaki mo Sīsū mo ʻene kau ki hono fakahoko ʻa e ngaahi taumuʻa ʻa e ʻOtuá. Pehē pē, naʻe tala ange ʻe Paula ki he kau Kalisitiane Kalētiá ko e fuakava ʻo e Laó ko ha “fakaleʻo maʻa Kalaisi.” (Kalētia 3:24) Naʻe faʻu ʻa e fuakava ʻo e Lao ʻi he kuonga muʻá ke teuteu ʻa e puleʻanga ki he hoko mai ʻa Sīsū ʻi he tuʻunga ko e Mīsaiá. Ko ia naʻa mo e ki muʻa ʻi hono ʻaloʻi mai ia ko e tangatá, naʻe fakahanga ʻa e tokangá kia Sīsū ʻe he maama meia Sihova.

 9. Talu mei he 33 T.S., ko e hā ʻa e meʻa ʻoku kau ki he ʻofa ki he maamá?

⁹ ʻI he 29 T.S., naʻe tuku atu ai ʻe Sīsū ia ke papitaiso pea naʻe pani ia ʻaki ʻa e laumālie māʻoniʻoní, ʻo ne hoko ai ko e Mīsaia naʻe talaʻofá. ʻI he 33 T.S. naʻá ne pekia ai ko e tangata haohaoa, pea toetuʻu, ʻo ne hāʻele hake ki hēvani, peá ne foaki atu ai ʻa e mahuʻinga ʻo ʻene moʻuí koeʻuhi ko ʻetau ngaahi angahalá. (Hepelū 9:11-14, 24) Ko e ngaahi meʻa hokohoko ko ʻení naʻe fakaʻilongaʻi ai ha liliuʻanga ʻi he ngaahi feangai ʻa e ʻOtuá mo e faʻahinga ʻo e tangatá. Naʻe toki hoko ʻa Sīsū ko e “Moʻuiʻanga,” ‘ko e fakahaofiʻanga,’ “ko e Takimuʻa mo e Fakahaohaoa ʻo ʻetau tui.” (Ngāue 3:15; Hepelū 2:10; 12:​2, NW; Loma 3:23, 24) Talu mei he 33 T. S. ʻo faai mai, ko e kau ʻofa ki he maamá kuo nau ʻiloʻi pea mo tali lelei, ʻo pehē “oku ikai ha fakamoui i ha taha kehe: he oku ikai ke tuku mo ha higoa ki he kakai i lalo lagi, ke tau moui ai” tukukehe pē ʻia Sīsū.​—Ngāue 4:12, PM.

10. Ko e hā ʻoku mahuʻinga pehē fau ai ke fanongo ki he ngaahi lea ʻa Sīsuú mo talangofua ki ai?

¹⁰ Ko e ngāueʻi ʻa e tui kia Sīsuú ʻoku toe ʻuhinga ko hono tali ia ko e “Folofola” mo “Fakaofo-ʻene-faleʻi.” (Sione 1:1; ʻAisea 9:6) Ko e meʻa kotoa pē ʻoku leaʻaki ʻe Sīsū ʻokú ne fakahā ʻa e moʻoni faka-ʻotuá. (Sione 8:28; Fakahā 1:1, 2) Ko e fanongo kiate iá pe ʻikai ko e meʻa ʻoku fakatuʻunga ai ʻa e moʻuí pe ko e mate. Naʻe tala ange ʻe Sīsū ki he kakai Siu ʻi hono ʻahó: “Ko ia ʻoku ne fanongo ki heʻeku lea, pea tui kiate ia naʻa ne fekau mai au, ʻoku ne maʻu ʻa e moʻui taʻengata, pea ʻoku ʻikai te ne aʻu ki he fakamāu; ka kuo ne hiki mei he mate ki he moʻui.” (Sione 5:24) ʻI he ʻuluaki senituli T.S., ko kinautolu naʻa nau ngāue ʻo fakatatau ki he ngaahi lea ʻa Sīsuú naʻe fakahaofi kinautolu mei he poʻuli ʻo e māmani ʻa Sētané pea nau hoko mai ʻo hangē ʻoku nau moʻui. Naʻe lau kinautolu ko e kakai māʻoniʻoni fakataha mo e ʻamanaki ke nau hoko ko e kaungā-ʻea mo ia ʻi hono Puleʻanga fakahēvaní. (ʻEfesō 1:1; 2:1, 4-7) ʻI he ʻahó ni, ko e talangofua ki he ngaahi lea ʻa Sīsuú ʻokú ne fakaʻatā ai ʻa e hala ki he tokolahi ke lau kinautolu ko e kakai māʻoniʻoni pea ʻamanaki atu ke hao moʻui atu ʻi ʻĀmaketone pea ke aʻusia ʻa e moʻui fakaetangata haohaoa ʻi he māmani foʻou.​—Fakahā 21:1-4; fehoanaki mo Sēmisi 2:21, 25.

‘Pule ʻi he Meʻa Kotoa Pē’

11. Ko e hā ʻa e mafai māʻolunga naʻe ʻoange kia Sīsū ʻi he 33 T.S.?

¹¹ ʻI he hili ʻene toetuʻú, naʻe fakahā ʻe Sīsū ki heʻene kau muimuí ʻa e toe tafaʻaki ʻe taha ʻo e maamá. Naʻá ne pehē: “Kuo tuku kiate au ʻa e pule kotoa pe ʻi langi pea ki mamani.” (Mātiu 28:18) Ko ia naʻe hakeekina ʻa Sīsū ki he tuʻunga māʻolunga taha ʻi he kautaha fakalūkufua ʻa Sihová. Naʻe fakahā ʻe Paula ʻa e toe fakaikiiki ʻi heʻene pehē: “Heʻene [ʻOtua] fokotuʻu ia [Sīsū] mei he pekia, mo ne fakanofo ia mei hono toʻomataʻu ʻi he ngaahi feituʻu ʻo langi, ʻo maʻolunga ʻi he faʻahinga pule kotoa pe, mo e maʻu tuʻunga, mo e maʻu malohi, mo e tuʻunga ʻeiki, ʻio, ʻi he hingoa kotoa pe ʻoku hingoa ʻaki ʻi he tuʻu ko eni, pea ʻikai ngata ai, ka ʻi he tuʻu foki ka hoko mai; pea naʻa ne tuku ke ʻi he lalo vaʻe oʻona ʻa e meʻa kotoa pe; pea ne foaki ia ke ʻulu ki he siasi ʻi he meʻa kotoa pe; ʻa ia ko hono sino.” (ʻEfesō 1:20-23; Filipai 2:9-11) Talu mei he 33 T.S., kuo fakakau atu ki he ʻofa ki he maamá ʻa e lāuʻilo ʻo kau ki he tuʻunga māʻolunga ko eni ʻo Sīsuú.

12. Ko e hā kuo tali loto-fiefia ʻe he kau Kalisitiane paní talu mei he kamataʻangá, pea naʻe anga-fēfē ʻenau fakahā ʻa e meʻá ni ʻi ha founga ʻaonga?

¹² ʻE faifai atu pē, kuo pau ke lāuʻilo ki he mafai ʻo Sīsuú ʻa e faʻahinga kotoa ʻo e tangatá. (Mātiu 24:30; Fakahā 1:7) Kaekehe, ko e kau ʻofa ki he maamá, kuo nau fiefia ʻi he ʻiloʻi ʻa e meʻa ko ení mei he kamataʻangá. Ko e kau mēmipa ʻo e fakatahaʻanga Kalisitiané pani ʻoku nau tali ʻa Sīsū ʻi he tuʻunga ko e “ulu ia oe jino, koe jiasi [fakatahaʻanga].” (Kolose 1:​18, PM; ʻEfesō 5:23) ʻI heʻenau hoko ko e konga ʻo e sino ko iá, ʻoku ‘fakahaofi kinautolu mei he mafai ʻo e poʻulí ʻo hiki kinautolu ki he puleʻanga ʻo e ʻAlo ʻofaʻanga ʻo e ʻOtua.’ (Kolose 1:13) Mei he taimi ko iá, ʻoku nau muimui fakamātoato ki he tataki ʻa Sīsuú ʻi he tafaʻaki kotoa pē ʻo ʻenau moʻuí, pea ʻi hotau kuongá ni kuo nau akoʻi ʻa e “fanga sipi kehe” ke nau fai ʻa e meʻa tatau. (Sione 10:16) Ko e lāuʻilo ki he tuʻunga-ʻulu ʻo Sīsuú ko e meʻa tefito ia ʻoku fiemaʻu kae maʻu ha fakamaau ʻo e hōifua.

13. Naʻe kamata ʻanefē ke ngāueʻaki ʻe Sīsū hono mafai ʻi he Puleʻangá, pea ko e hā leva ʻa e meʻa naʻe hoko ʻi he māmaní?

¹³ ʻI heʻene hāʻele hake ki hēvani ʻi he 33 T.S., naʻe ʻikai ke ngāueʻaki leva ʻe Sīsū hono mafai kakató. Neongo ko e ʻUlu ia ʻo e fakatahaʻanga Kalisitiané, naʻá ne talitali ki he taimi totonu ke ngāueʻaki kakato ai ʻa e mafai ki he faʻahinga ʻo e tangatá fakalūkufua. (Sāme 110:1; Ngāue 2:33-35) Naʻe hoko mai ʻa e taimi ko iá ʻi he 1914, ʻi hono fakanofo ʻa Sīsū ko e Tuʻi ʻo e Puleʻanga ʻo e ʻOtuá mo e kamata mei ai ʻa e “gaahi aho fakamui” ʻo e māmaní. (2 Tīmote 3:1, PM) Talu mei he 1919, ko e fakatahatahaʻi ko ia ʻo e toenga ʻo e kau paní kuo hokohoko atu ki hono fakaʻosí. Tautefito mei he 1935, naʻe hanga ai ʻe Sīsū ʻo vahevahe ʻa e faʻahinga ʻo e tangatá ki he “fanga sipi,” ʻa ia te nau maʻu ʻa e “puleʻanga kuo toka teuteu [moʻo kinautolu],” mo e “fanga kosi,” ʻa ia ʻe “ʻalu atu ʻa kinautolu ni ki he tautea taʻengata.”​—Mātiu 25:31-34, 41, 46.

14. Kuo anga-fēfē hono fakahāhā ʻe he fuʻu kakai lahí ʻa e ʻofa ki he maamá, pea ko e hā ʻe hoko kiate kinautolú?

¹⁴ Ko e meʻa fakafiefiá, kuo iku ʻo tokolahi ʻa e fanga sipí ʻi he ngaahi ʻaho fakaʻosí ni. Kuo hā ʻi māmani ha fuʻu tokolahi ʻo kinautolu ʻa ia ʻoku aʻu ki he toko laui miliona “mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea.” Ko e faʻahinga ko ʻeni hangē ha sipí ʻoku nau ʻofa ki he maamá ʻo hangē ko ia ʻoku fai ʻe honau kaungā-ngāué, ko e kau paní. Kuo nau “fō honau kofu, ʻo fakahinehina ʻi he taʻataʻa ʻo e Lami,” pea ʻoku nau kalanga leʻo lahi: “Ko hotau fakamoʻui ʻoku mei hotau ʻOtua, ʻa ia ʻoku ʻafio ʻi he taloni, pea mei he Lami.” Koeʻuhi ko e meʻá ni, ko e fuʻu kakai lahí ʻi he tuʻunga ko ha kulupú te nau maʻu ʻa e fakamaau ʻo e hōifuá. “ʻOku haʻu mei he mamahi lahi” ʻa hono kau mēmipá ʻo hao moʻui atu ʻi he fakaʻauha ʻi ʻĀmaketone ʻo e faʻahinga ʻoku nau ʻofa ki he poʻulí.​—Fakahā 7:9, 10, 14.

“Fanau ʻa e Maama”

15. ʻI he founga fē ʻoku fakahā ai ʻe heʻetau ngaahi ngāué ʻoku tau fakaanganofo ʻa kitautolu ki he Tuʻi, ko Sīsū Kalaisí?

¹⁵ Ka, ʻi he founga fēfē ʻoku anganofo ai ʻa e kau ʻofa ki he maamá, tatau ai pē pe ko e kau paní pe ko e fanga sipi kehé, kia Sīsū ʻi he tuʻunga ko e tokotaha kuo fakanofo ʻe he ʻOtuá ko e Tuʻi mo e Fakamaau tokoni? Ko e founga ʻe taha ko e feinga ke hoko ko e kakai ko ia ʻoku hōifua ki ai ʻa Sīsū. ʻI he taimi naʻe ʻi māmani ai ʻa Sīsuú naʻá ne fakahā ʻene mahuʻingaʻia ʻo fekauʻaki mo e ngaahi ʻulungaanga ʻo hangē ko e loto-moʻoni, anga-ʻaufuatō, mo e loto-māfana ki he moʻoní, pea naʻá ne hoko ko e faʻifaʻitakiʻanga ʻi he ngaahi ʻulungaanga ko ʻení. (Maʻake 12:28-34, 41-44; Luke 10:17, 21) Kapau te tau holi ke maʻu ha fakamaau ʻo e hōifua, kuo pau ke tau fakatupu ʻa e ngaahi ʻulungaanga pehē.

16. Ko e hā ʻoku mātuʻaki mahuʻinga ai ke huʻi atu ʻa e ngaahi ngāue ʻoku kau ki he poʻulí?

¹⁶ ʻOku mātuʻaki moʻoni ʻeni koeʻuhi ko e poʻuli ko ia ʻo e māmani ʻo Sētané ʻoku fakaʻau ke poʻuli ange ʻi he fakaofiofi mai ʻa e ngataʻangá. (Fakahā 16:10) Ko ia ʻoku mātuʻaki feʻungamālie ʻa e ngaahi lea naʻe tohi ʻe Paula ki he kakai Lomá: “Kuo fakaaʻau atu ʻa e po, pea kuo ofi ʻa e ʻaho: ko ia ke tau huʻihuʻi ʻa e ngaahi ngaue ʻo e poʻuli, ka tau ʻai ʻa e mahafu ʻo e maama. Tau fai ʻa e laka ʻo e ʻaho, ʻo anga māopo: ʻo ʻoua ʻe fai ʻaki ʻa e faʻa katoanga kai mo e faʻa konā, pe ko e fai feʻauaki mo e pauʻu fakalielia, pe ko e fetuʻusi mo e meheka.” (Loma 13:12, 13) Neongo ko e moʻui taʻengatá ko e meʻaʻofa ia mei he ʻOtuá, ʻe hā ʻa ʻetau tui mo ʻofa moʻoni ki he maamá ʻi heʻetau ngaahi ngāué. (Sēmisi 2:26) Ko ia ai, ko e fakamaau te tau maʻú ʻe fakatuʻunga ki hono lahi ʻo ʻetau fai ʻa e ngaahi ngāue leleí mo e fakaʻehiʻehi mei he ngaahi ngāue fulikivanú.

17. Ko e hā hono ʻuhinga ke “ʻai muʻa ʻa e ʻEiki ko Sisu Kalaisi”?

¹⁷ ʻI he ʻosi ʻene akonaki ko ia ʻia Loma 13:12, 13, naʻe fakaʻosiʻaki ʻe Paula ʻene lea ʻo pehē: “Ka mou ʻai muʻa ʻa e ʻEiki ko Sisu Kalaisi; pea ʻoua naʻa tokonaki ki he kakano ke kanoni ʻene ngaahi holi.” (Loma 13:14) Ko e hā hono ʻuhinga ke “ʻai muʻa ʻa e ʻEiki ko Sisu Kalaisi”? Ko hono ʻuhingá ʻoku totonu ki he kau Kalisitiané ke nau muimui ofi kia Sīsū, ʻo hangē ʻoku nau fakakofu kinautolu ʻaki ʻene faʻifaʻitakiʻangá mo hono angá, ʻo feinga ke hoko ʻo hangē ko Kalaisí. Naʻe lea ʻa Pita ʻo pehē, “ko e meʻa ia naʻe ui kimoutolu ki ai: he naʻe kataki mamahi ʻa Kalaisi foki koeʻuhi ko kimoutolu, ʻo ne tuku ha faʻifaʻitakiʻanga kiate kimoutolu, ke mou muimui ofi, ʻo topuvaʻe taha mo ia.”​—1 Pita 2:21.

18. Ko e hā ʻa e ngaahi liliu loloto ʻe fiemaʻu nai ʻo kapau ʻoku tau fakaʻamu ke maʻu ha fakamaau ʻo e hōifua?

¹⁸ ʻOku faʻa hoko ʻo fiemaʻu ai ke fai ʻa e ngaahi liliu loloto ʻi he moʻui ʻa ha tokotaha Kalisitiane. Naʻe lea ʻa Paula ʻo pehē: “He neongo ko e koto poʻuli kimoutolu ʻi muʻa, ka ʻi onopooni ko e koto maama kimoutolu ʻi he ʻEiki: mou laka ʻo tāu mo e fanau ʻa e maama; (he ko e fua ʻo e maama ʻoku fou ʻi he lelei kotoa pe mo e totonu mo e moʻoni).” (ʻEfesō 5:8, 9) Ka ʻi ai ha niʻihi ʻoku nau angaʻaki ʻa e ngaahi ngāue ʻo e poʻulí ʻoku ʻikai ko e kau ʻofa ki he maamá kinautolu pea heʻikai te nau maʻu ha fakamaau ʻo e hōifua kaeʻoua kuo nau fai ha liliu.

“Ko Kimoutolu ko e Māma ʻo Mamani”

19. Ko e hā ʻa e ngaahi founga kehekehe ʻe malava ai ʻe ha tokotaha Kalisitiane ke ne fakatapua atu ʻa e maamá?

¹⁹ Ko hono fakaʻosí, ko e ʻofa ki he maamá ʻoku ʻuhinga ia ke tapua atu ʻa e maamá ke mamata ki ai ha niʻihi kehe pea ke tohoakiʻi ki ai. Naʻe pehē ʻe Sīsū: “Ko kimoutolu ko e māma ʻo mamani.” Pea naʻá ne tānaki atu ki ai ʻo pehē: “Ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi hevani.” (Mātiu 5:14, 16) ʻOku kau ki he ngaahi ngāue lelei ʻa ha tokotaha Kalisitiane ʻa hono fakahā ʻo e faʻahinga anga-lelei mo e angatonu mo e moʻoni kotoa, koeʻuhi ko e ʻulungaanga lelei peheé ʻokú ne tokonaki mai ʻa e fakamoʻoni mālohi ki he moʻoní. (Kalētia 6:10; 1 Pita 3:1) ʻOku fakakau tefito ki ai ʻa e talanoa ki ha niʻihi kehe ʻo kau ki he moʻoní. ʻI he ʻahó ni, ʻoku ʻuhinga iá ke kau ki he feingatau ke malangaʻi ʻi māmani lahi ʻa e “ogoogolelei ni oe buleaga . . . i mamani kotoabe, koe mea fakamooni ki he buleaga kotoabe.” ʻOku toe ʻuhinga foki ia ke anga-kātaki ʻo toe ʻaʻahi kiate kinautolu ʻoku mahuʻingaʻiá, mo ako ʻa e Tohitapú mo kinautolu, mo tokoniʻi kinautolu, ke nau toki fai ʻe kinautolu ʻa e ngaahi ngāue ʻoku kau ki he maamá.​—Mātiu 24:14, PM; 28:19, 20.

20. (a) ʻOku fēfē ʻa e ngingila ʻo e ulo ʻa e maamá ʻi he ʻahó ni? (e) Ko e hā ʻa e ngaahi tāpuaki mātuʻaki mahuʻinga ʻoku maʻu ʻe kinautolu ʻoku nau tali ʻa e maamá?

²⁰ ʻI hotau ʻahó ni, kuo ongona ʻa e ongoongo leleí ʻi he ngaahi fonau laka hake he 200, pea ulo ngingila atu ʻa e maamá ʻo toe lahi ange ia ʻi ha toe taimi ki muʻa, koeʻuhi ko e ngāue fakamalanga faivelenga ʻoku fai ʻe he kau Kalisitiane loto-tōnunga. Naʻe pehē ʻe Sīsū: “Ko au pe ko e maama ʻo māmani: ko ia ʻoku ne muimui kiate au, ʻe ʻikai ʻaupito te ne fononga ʻi he poʻuli, ka te ne maʻu ʻa e maama ʻo e moʻui.” (Sione 8:12) Ko ha toki meʻa fakafiefia ē ke kau ʻi he fakahoko ʻo e talaʻofa ko ʻení! ʻOku fakakoloaʻia ange ai ʻa ʻetau moʻuí he ʻoku ʻikai te tau kei haufalea ʻi he poʻuli ʻo e māmani ʻo Sētané. Pea ʻoku fakaofo moʻoni ʻa ʻetau ngaahi ʻamanakí ʻi heʻetau fakatuʻamelie atu ki ha fakamaau ʻo e hōifua mei he Fakamaau kuo fakanofo ʻe Sihová. (2 Tīmote 4:8) Ka ko ha toki meʻa fakamamahi ē ʻe hoko ʻo kapau ʻe hili ʻetau haʻu ki he maamá, pea tau toe tēkina ki he poʻulí pea maʻu ai ʻa e fakamaau ʻo e taʻehōifuá! ʻI he kupu hono hoko maí, te tau lāulea ai pe ʻe anga-fēfē ke tau tuʻu maʻu ke mālohi ʻi he tui.

Te Ke Lava ke Fakamatala?

◻ ʻOku fakatuʻunga ʻa e fakamaau ʻa e ʻOtuá ʻi he hā?

◻ Ko e hā ʻa e ngafa tefito ʻoku fakahoko ʻe Sīsū ʻo fekauʻaki mo e ngaahi taumuʻa ʻa e ʻOtuá?

◻ ʻOku anga-fēfē ʻetau fakahāhā ʻoku tau fakamoʻulaloa kitautolu kia Sīsū ʻi hono tuʻunga ko e tokotaha kuo fakanofo ʻe Sihova ko e Tuʻi?

◻ ʻOku malava fēfē ke tau fakamoʻoniʻi ko e “fanau ʻa e maama” ʻa kitautolu?

◻ ʻI he poʻuli ʻo e māmani ko ʻení, ʻi he founga fē ʻoku toe ngingila ange ai ʻa e maamá ʻo lahi ange ia ʻi ha toe taimi ki muʻa?

[Fakatātā ʻi he peesi 12]

ʻE faifai atu pē, kuo pau ke lāuʻilo ʻa e faʻahinga kotoa pē ʻo e tangata ki he mafai ʻo Sīsuú

[Fakatātā ʻi he peesi 14]

ʻOku tau fakahā ʻoku tau ʻofa ʻi he maamá ʻi heʻetau fakatapua atu ia ki he niʻihi kehé