Kalaisi—Ko e Fakamaʻungaʻanga ʻo e Kikité

“Ko e fai fakamoʻoni kia Sisu, ko e laumalie ʻo e palofisai.”—FAKAHĀ 19:10.

1, 2. (a) Kamata ʻi he 29 T.S., ko e hā ʻa e fili naʻe fetaulaki mo ʻIsilelí? (e) Ko e hā ʻe lāulea ki ai ʻi he kupu ko ʻení?

KO E taʻú ko e 29 T.S. ʻOku talanoa fiefia ai ʻa ʻIsileli fekauʻaki mo e Mīsaia naʻe talaʻofaʻaki maí. Kuo fakalahi ʻe he ngāue fakafaifekau ʻa Sione Papitaisó ʻa e ongoʻi ʻo e fakatuʻamelié. (Luke 3:15) ʻOku fakaʻikaiʻi ʻe Sione ʻa e pehē ko ia ʻa e Kalaisí. ʻI hono kehé, ʻi he tuhu kia Sīsū ʻo Nasaletí, ʻokú ne pehē: “Kuo u fakahā, Ko eni ia ʻa e ʻAlo ʻo e ʻOtua.” (Sione 1:​20, 34) ʻOku muimui leva ʻa e fuʻu kakai tokolahi ʻia Sīsū ke fanongo ki heʻene faiakó pea ke ne fakamoʻui kinautolu.

² ʻI he ngaahi māhina hoko mai aí, ʻoku tokonaki mai ai ʻe Sihova ha fakamoʻoni lahi fau fekauʻaki mo hono ʻAló. Ko e faʻahinga kuo nau ako ʻa e Tohi Tapú pea kuo nau mamata ki he ngaahi ngāue ʻa Sīsuú ʻoku nau maʻu ha makatuʻunga fefeka ke tui ai kiate ia. Kae kehe, ʻoku ʻikai ke fakahāhā ʻe he kakai fuakava ʻa e ʻOtuá ia ha tui ʻi he tuʻunga fakalūkufuá. Ko e kiʻi tokosiʻi pē ʻoku nau lāuʻilo ko Sīsū ʻa e Kalaisí, ko e ʻAlo ʻo e ʻOtuá. (Sione 6:​60-69) Ko e hā naʻá ke mei faí kapau naʻá ke moʻui ʻi he taimi ko iá? Naʻe mei ueʻi koe ke ke tali ʻa Sīsū ko e Mīsaiá pea hoko ko ʻene tokotaha muimui faitōnunga? Fakakaukau angé ki he fakamoʻoni fekauʻaki mo ia ʻoku ʻomai ʻe Sīsū tonu ʻi hono tukuakiʻi ia ki he maumauʻi ʻo e Sāpaté, pea fakatokangaʻi ʻa e ngaahi fakamoʻoni ki mui ʻokú ne ʻomai koeʻuhi ke fakafefekaʻi ʻaki ʻa e tui ʻa ʻene kau ākonga mateakí.

ʻOku ʻOmai ʻe Sīsū Tonu ʻa e Fakamoʻoni

 3. Ko e hā ʻa e ngaahi tuʻunga naʻá ne ueʻi ʻa Sīsū ke ne ʻoatu ʻa e fakamoʻoni ʻo fekauʻaki mo ia tonú?

³ Ko e taimi Pāsova ʻeni ʻi he 31 T.S. ʻOku ʻi Selusalema ʻa Sīsū. Kuo toki ʻosi ʻene fakamoʻui ha tangata ʻa ia naʻe puke ʻo feʻunga mo e taʻu ʻe 38. Neongo ia, ʻoku fakatangaʻi ʻe he kau Siú ʻa Sīsū ʻi hono fai ʻa e meʻá ni ʻi he Sāpaté. ʻOku nau toe tukuakiʻi ia ki he lea-fieʻotua pea feinga ke tāmateʻi ia koeʻuhi ko ʻene ui ʻa e ʻOtuá ko ʻene Tamaí. (Sione 5:​1-9, 16-18) Ko e taukapo ʻoku fai ʻe Sīsū maʻaná ʻoku ʻomai ai ʻa e ngaahi ʻuhinga mālohi ʻe tolu ʻe fakatuipauʻi ai ha Siu loto-totonu pē ʻo fekauʻaki mo Sīsū tonu.

4, 5. Ko e hā ʻa e taumuʻa ʻo e ngāue fakafaifekau ʻa Sioné, pea naʻe ola lelei fēfē ʻene fakahoko iá?

⁴ ʻUluakí, ʻoku tuhu ʻa Sīsū ki he fakamoʻoni ʻa hono fakamelomeló, ʻa Sione Papitaiso, ʻo pehē: “Ko kimoutolu naʻa mou fekau atu kia Sione, pea naʻa ne fakamoʻoni ki he moʻoni. Ko e toko taha ko ia ko e māma kuo tutu pea ulo: pea ko kimoutolu naʻa mou loto ke hakahaka ʻi hono māma, ʻo fuoloa siʻi.”—Sione 5:​33, 35.

⁵ Naʻe hoko ʻa Sione Papitaiso “ko e māma kuo tutu pea ulo” koeʻuhi ʻi he ki muʻa ʻi hono tuku pilīsone taʻetotonu ia ʻe Hēlotá, naʻá ne fakahoko ʻa e fekau kiate ia mei he ʻOtuá ke ne teuteu ʻa e hala ki he Mīsaiá. Naʻe pehē ʻe Sione: “Ko hono fakahā ki Isileli [ʻa e Mīsaiá], ko hono ʻuhinga ia ʻo ʻeku haʻu ʻo papitaiso vai. . . . Kuo u mamata ki he Laumālie ʻoku ʻalu hifo mei langi ʻi he tatau ʻo ha lupe, ʻo nofoʻi ia. Pea naʻe ʻikai te u ʻilo ia ʻe au: ka ko ia naʻa ne fekau au ke papitaiso vai naʻa ne folofola mai, ʻo pehē, Ko e toko taha te ke mamata ki ai, ʻoku ʻalu hifo ʻa e Laumālie, ʻo nofoʻi ia, ko ia ia ʻoku fai papitaiso ʻaki ʻa e Laumālie Māʻoniʻoni. Pea kuo u mamata ʻe au, pea kuo u fakahā, Ko eni ia ʻa e ʻAlo ʻo e ʻOtua.”a (Sione 1:​26-37) Naʻe fakahaaʻi hangatonu ʻe Sione ko Sīsuú ko e ʻAlo ʻo e ʻOtuá—ko e Mīsaia ia naʻe talaʻofaʻaki maí. Naʻe mahino ʻaupito ʻa e fakamoʻoni ʻa Sioné he ʻi he māhina ʻe valu nai hili ʻene maté, naʻe fakahaaʻi ai ʻe he kau Siu loto-totonu tokolahi ʻo pehē: “Ko e ngaahi meʻa naʻe fakaha ʻe Sione ki he toko taha ni, ta ʻoku moʻoni hono kotoa.”—Sione 10:​41, 42.

 6. Ko e hā ne totonu ai ke fakatuipauʻi ʻe he ngaahi ngāue ʻa Sīsuú ʻa e kakaí naʻá ne maʻu ʻa e poupou ʻa e ʻOtuá?

⁶ Ko hono hokó, ʻoku ngāueʻaki ʻe Sīsū ha toe fakaʻuhinga ʻe taha ke fakapapauʻi ʻaki ʻene ngaahi fakamoʻoni ko ia ʻa e Mīsaiá. ʻOkú ne tuhu ki heʻene ngaahi ngāue lelei pē ʻaʻaná ko e fakamoʻoni ia ʻo e poupou ʻa e ʻOtuá. “Oku ou maʻu ae fakamooni lahi ia Jone,” ko ʻene leá ia, “he koe gaahi gaue kuo tuku kiate au e he Tamai keu fai, koe gaue koia oku ou fai, oku fakamooni kiate au, kuo fekau au e he Tamai.” (Sione 5:​36, PM) Naʻa mo e ngaahi fili ʻo Sīsuú naʻe ʻikai malava ke nau fakaʻikaiʻi ʻa e fakamoʻoni ko ʻení, ʻa ia naʻe kau ai ʻa e ngaahi mana lahi. “Koeha oku tau fai? he oku fai e he tagata ni ae gaahi mana lahi,” ko e ʻeke ia ʻa e faʻahinga ʻe niʻihi ki mui. (Sione 11:​47, PM) Neongo ia, ʻoku fai ʻe he niʻihi ha tali lelei ʻo pehē: “Oka haʻu ae Kalaisi, e lahi hake ae mana e fai eia i he gaahi mea ni kuo fai e he tagata ni?” (Sione 7:​31, PM) Naʻe ʻi ha tuʻunga lelei ʻaupito ʻa e kau fanongo ʻa Sīsuú ke nau ʻiloʻi ʻa e ngaahi ʻulungāanga ʻo e Tamaí ʻi he ʻAló.—Sione 14:9.

 7. ʻOku anga-fēfē ʻa e fakamoʻoni ʻa e Ngaahi Konga Tohi Tapu Faka-Hepeluú ʻo kau kia Sīsuú?

⁷ Fakaʻosí, ʻoku fakahanga ʻe Sīsū ʻa e tokangá ki ha fakamoʻoni taʻealafehuʻia. “[Ko e] Tohitapu . . . ko ia ia ʻoku fakamoʻoni kiate au,” ko ʻene leá ia, ʻo tānaki atu: “Ka ne ʻoku mou tui kia Mosese, pehē ʻoku mou tui kiate au: he ko e tohi ʻa e toko taha ko ia, ko e tohi kiate au.” (Sione 5:​39, 46) Ko hono moʻoní, ko Mōsesé ko e taha pē ia ʻo e kau fakamoʻoni tokolahi ki muʻa ʻi he Kalisitiané naʻe tohi ʻo fekauʻaki mo e Kalaisí. Ko ʻenau ngaahi tohí naʻe kau ai ʻa e laui teau ʻo e ngaahi kikite mo e ngaahi laine hohoko fakaikiiki, ʻoku tuhu kotoa pē ki he Mīsaiá. (Luke 3:​23-38; 24:​44-46; Ngāue 10:43) Pea fēfē ʻa e Lao ʻa Mōsesé? “Ko e Lao ko hota fakaleʻo maʻa Kalaisi,” ko e tohi ia ʻa e ʻapositolo ko Paulá. (Kaletia 3:24) ʻIo, “ko e fai fakamoʻoni kia Sisu, ko e laumalie [pe, ko e fakakātoa ia ʻo e hehema, fokotuʻutuʻu mo e taumuʻa] ʻo e palofisai.”—Fakahā 19:10.

 8. Ko e hā naʻe ʻikai tui ai ʻa e kau Siu tokolahi ki he Mīsaiá?

⁸ Meʻa ní heʻikai hanga ʻe he kotoa ʻo e fakamoʻoni ko ʻení—ʻa e fakamoʻoni taʻealafehuʻia ʻa Sioné, ngaahi ngāue mana mo e ngaahi ʻulungāanga fakaʻotua ʻo Sīsuú tonu, mo e fakamoʻoni lahi fau ʻa e Tohi Tapú—ʻo fakatuipauʻi koe ko Sīsuú ko e Mīsaiá ia? Ko ha taha pē naʻá ne maʻu ʻa e ʻofa moʻoni ki he ʻOtuá mo ʻene Folofolá naʻá ne lāuʻilo ki he meʻá ni pea ngāueʻi ʻa e tui kia Sīsū ko e Mīsaia ia naʻe talaʻofaʻaki maí. Neongo ia, naʻe ʻikai ke ʻi ai ha ʻofa tefito pehē ʻi ʻIsileli. Ki hono kau fakafepakí, naʻe pehē ʻe Sīsū: “Kuo u ʻiloʻi kimoutolu, tā ʻoku ʻikai ʻiate kimoutolu ʻa e ʻofa ki he ʻOtua.” (Sione 5:42) ʻI he ʻikai ke “kumi ʻa e fakahikihikiʻi ʻe he ʻOtua Taha-tofu-pe,” naʻa nau ‘tali ʻa e fakahikihikiʻi ʻoku nau fefaiʻakí.’ ʻOku ʻikai ha ofo ʻi heʻenau taʻelototatau mo Sīsuú, ʻa ia ʻoku hangē ko ʻene Tamaí ʻo fehiʻa ʻi he fakakaukau peheé!—Sione 5:​43, 44; Ngāue 12:​21-23.

Fakaivimālohiʻi ʻe ha Vīsone Fakaekikite

9, 10. (a) Ko e hā naʻe mātuʻaki taimi tonu ai ha fakaʻilonga ki he kau ākonga ʻa Sīsuú? (e) Ko e hā ʻa e talaʻofa fakaofo naʻe fai ʻe Sīsū ki heʻene kau ākongá?

⁹ Ne ʻosi atu ha taʻu talu mei hono ʻoatu ʻe Sīsū ʻa e fakamoʻoni ʻo hono tuʻunga faka-Mīsaiá naʻe lave ki ai ki muʻá. Kuo mahili atu ʻa e taimi ʻo e Pāsova ʻo e taʻu 32 T.S. Ko e tokolahi naʻe tuí kuo nau tuku ʻenau muimui ʻiate iá, mahalo pē koeʻuhi ko e fakatangá, tuli ki he meʻa fakamatelié, pe ko e ngaahi loto-moʻua ʻi he moʻuí. Naʻe puputuʻu nai ʻa e niʻihi pe siva e ʻamanakí koeʻuhi ko hono talitekeʻi ʻe Sīsū ʻa e ngaahi feinga ʻa e kakaí ke ʻai ia ko e tuʻí. ʻI hono poleʻi ʻe he kau taki lotu Siú, naʻá ne fakafisi ke ʻomai ha fakaʻilonga fakalāngilangiʻi-kita mei hēvani. (Mātiu 12:​38, 39) Ne fakapuputuʻuʻi nai ʻa e niʻihi ʻe he fakafisi ko ʻení. ʻIkai ngata aí, kuo kamata ke fakahaaʻi ʻe Sīsū ki heʻene kau ākongá ʻa e meʻa ne nau ʻilo naʻe faingataʻa ʻaupito ke nau makupusi—“ʻa e pau ke ne ʻalu ki Selusalema, pea ke lahi hono fakamamahiʻi ʻe he kau matuʻa mo e houʻeiki taulaʻeiki mo e kau sikalaipe, pea ke tamateʻi.”—Mātiu 16:​21-23.

¹⁰ ʻI ha toe māhina ʻe hiva ki he hongofulu, ko e taimi ia “ke hiki [ai ʻa Sīsū] mei he maama ko eni ʻo ʻalu ki he Tamai.” (Sione 13:1) ʻI he tokanga loloto fekauʻaki mo ʻene kau ākonga mateakí, ʻoku talaʻofa ai ʻe Sīsū ki he niʻihi ʻo kinautolu ʻa e meʻa tofu pē ko ia naʻá ne fakaʻikaiʻi mei he kau Siu taʻefaitōnungá—ko ha fakaʻilonga mei hēvani. “Ko au e, ʻoku ou tala atu,” ko e lea ia ʻa Sīsuú, “ʻoku ai ha niʻihi ʻo kinautolu ʻoku tutuʻu heni, ʻa ia ʻe ʻikai te nau momoʻi lave ki he mate, kaeʻoua ke nau mamata ki he Fanautama ʻa Tangata ʻoku ne haʻele fakapuleʻanga mai.” (Mātiu 16:28) ʻOku hā mahino, ʻoku ʻikai ke pehē mai ʻe Sīsū ia ʻe moʻui ʻa e faʻahinga pau ʻo ʻene kau ākongá ʻo aʻu ki hono fokotuʻu ʻa e Puleʻanga faka-Mīsaiá ʻi he 1914. Naʻe ʻi he fakakaukau ʻa Sīsuú ʻa hono ʻoange ki he toko tolu ʻo ʻene kau ākonga ofi taha kiate iá ha tomuʻa fakaʻali fakaueʻiloto ʻo hono lāngilangi ʻi he mālohi ʻo e Puleʻangá. Ko e tomuʻa vakai fakaevīsone ko ʻení ʻoku ui ia ko e fakasinokehe.

11. Fakamatalaʻi ʻa e vīsone fakasinokehé.

¹¹ ʻI he ʻaho ʻe ono ki mui aí, ʻoku ʻave ai ʻe Sīsū ʻa Pita, Sēmisi mo Sione ki ha moʻunga māʻolunga—ngalingali ko ha konga māʻolunga ʻo e Moʻunga Heamoni. ʻI aí, ʻoku hoko ai ʻa Sīsū ʻo “fakakehe hono anga ʻi honau ʻao, pea naʻe malama hono fōtunga ʻo hange ko e laʻa, pea ko hono ngāhi kofu naʻe hinaekiaki mai ʻo hange ko e maama.” ʻOku toe hā mai ai ʻa e ongo palōfita ko Mōsese pea mo ʻIlaisiaá, ʻokú na fetalanoaʻaki mo Sīsū. ʻOku ngalingali naʻe hoko poʻuli ʻa e meʻa fakaofó ni, ʻo ʻai ai ia ke tautefito ʻene mataʻāʻaá. Ko hono moʻoní, ʻoku mātuʻaki moʻoni ia ʻo tuʻuaki atu ai ʻe Pita ke fokotuʻu ha tēniti ʻe tolu—ke taki taha ʻa Sīsū, Mōsese mo ʻIlaisiā. Lolotonga ʻa e kei lea ʻa Pitá, ʻoku fakamalumalu kinautolu ʻe ha konga ʻao maama pea ongo mai ha leʻo mei he konga ʻaó ʻo pehē: “Ko hoku ʻAlo Pele ʻena, ʻa ia kuo u hōifua ai; mou fakaongo kiate ia.”—Mātiu 17:​1-6.

12, 13. Ko e hā ʻene maongo ʻa e vīsone fakasinokehé ki he kau ākonga ʻa Sīsuú, pea ko e hā hono ʻuhingá?

¹² Ko e moʻoni, naʻe toki fakapapauʻi ʻe Pita ko Sīsuú “koe Kalaisi, koe Alo oe Otua moui.” (Mātiu 16:​16, PM) Kae sioloto atu angé ki he fanongo ki he ʻOtuá tonu heʻene ʻomai ʻa ʻene fakamoʻoní, ʻo fakapapauʻi mai ʻa e tuʻunga fakaeia pea mo e ngafa ʻo hono ʻAlo paní! He hokosia fakaivimālohi-tui ē ko e vīsone fakasinokehé kia Pita, Sēmisi mo Sioné! ʻI hono fakaivimālohiʻi lahi ai ʻenau tuí, ʻoku nau mateuteu lelei ange ai ʻi he taimi ko ʻení ki he meʻa ʻoku toka mei muʻá pea ki he ngafa mahuʻinga te nau fakahoko ʻi he fakatahaʻanga ʻi he kahaʻú.

¹³ ʻOku ʻai ʻe he fakasinokehé ke ʻi ai ha maongo tuʻuloa ʻi he kau ākongá. Laka hake ʻi he taʻu ʻe 30 ki mui aí, ʻoku tohi ʻe Pita: “[Ko Sīsuú] naʻa ne maʻu mei he ʻOtua ko e Tamai ʻa e fakaʻapaʻapa mo e fakalangilangiʻi, he ʻomai kiate ia ʻa e leʻo ko ia naʻe pehe fau ʻe he Sikaina nāunauʻia, ʻo pehe, Ko hoku ʻAlo Pele ʻena, ʻa ia kuo toka ki ai ʻeku hōifua. Pea ko e leʻo ko ia naʻa mau fanongo ki ai ʻi hono ʻomeia mei langi, ʻi heʻemau ʻiate ia ʻi he moʻunga tapu.” (2 Pita 1:​17, 18) ʻOku maongo tatau pē kia Sione ʻa e meʻa naʻe hokó. Laka hake ʻi he taʻu ʻe 60 hili ʻa ʻene hokó, ʻoku ngalingali ko ʻene lave ki ai ʻi he ngaahi leá ni: “Naa mau mamata ki hono nāunāu, koe nāunāu oe toko taha nae tubu mei he Tamai.” (Sione 1:​14, PM) Ka neongo ia, ko e fakasinokehé ʻoku ʻikai ko e vīsone fakamuimui taha ia naʻe ʻoange ki he kau muimui ʻo Sīsuú.

Fakamaama Lahi Ange ki he Faʻahinga Mateaki ʻa e ʻOtuá

14, 15. ʻI he founga fē naʻe nofo ai pē ʻa e ʻapositolo ko Sioné kae ʻoua ke haʻu ʻa Sīsuú?

¹⁴ ʻI he hili ʻene toetuʻú, ʻoku hā ʻa Sīsū ki heʻene kau ākongá ʻi he Tahi Kālelí. ʻOkú ne tala ange ai kia Pita: “Kapau ko hoku loto ke nofo pe [ʻa Sione] kaeʻoua ke u haʻu, ka he ʻoku ke kau ai?” (Sione 21:​1, 20-22, 24) ʻOku fakahaaʻi ʻe he ngaahi foʻi leá ni ʻe moʻui ʻa e ʻapositolo ko Sioné ʻo fuoloa ange ʻi he kau ʻapositolo kehé? ʻOku ngalingali pehē ia, he ʻokú ne tauhi tōnunga kia Sihova ʻi ha toe meimei taʻu ʻe 70. Kae kehe, ʻoku ʻi ai ʻa e meʻa lahi ange ia fekauʻaki mo e lea ʻa Sīsuú.

¹⁵ Ko e kupuʻi lea “kaeʻoua ke u haʻu” ʻokú ne fakamanatu mai kiate kitautolu ʻa e lave ʻa Sīsū ki “he Fanautama ʻa Tangata ʻoku ne haʻele fakapuleʻanga mai.” (Mātiu 16:28) Ko e nofo pē ʻa Sione kae ʻoua ke haʻu ʻa Sīsuú ʻi he ʻuhinga ko hono ʻoange kia Sione ki mui ha vīsone fakaekikite fekauʻaki mo e hoko mai ʻa Sīsū ʻi he mālohi ʻo e Puleʻangá. ʻI he ofi ki he ngataʻanga ʻo e moʻui ʻa Sioné, lolotonga hono fakaheeʻi ki he motu ko Pātimosí, ʻokú ne maʻu ai ʻa e Meʻa Fakahā fakataha mo e kotoa ʻo e ngaahi fakaʻilonga fakaekikite fakaofo ʻo e ngaahi meʻa ʻe hoko ʻi he lolotonga ʻa e “ʻaho ʻo e ʻEiki.” ʻOku mātuʻaki ueʻi loloto ʻa Sione ʻe he ngaahi vīsone fakaueʻilotó ni he ʻi he pehē ʻe Sīsū: “ʻIo, ʻoku vave ʻeku ʻalu atu,” ʻoku kalanga ʻa Sione: “ʻEmeni. ʻEiki Sisu, ke ke haʻele mai.”—Fakahā 1:​1, 10; 22:20.

16. Ko e hā ʻoku mahuʻinga ai ke tau hokohoko atu ke fakaivimālohiʻi ʻetau tuí?

¹⁶ Ko e faʻahinga loto-totonu ʻoku moʻui ʻi he ʻuluaki senitulí ʻoku nau tali ʻa Sīsū ʻi he tuʻunga ko e Mīsaiá pea tui kiate ia. ʻI he vakai atu ki he ʻikai ha tui naʻe hoko lahi ʻi he faʻahinga takatakai ʻiate kinautolú, ko e ngāue kuo pau ke nau faí, pea mo e ngaahi ʻahiʻahi ʻoku toka mei muʻá, ʻoku fiemaʻu ai ke fakaivimālohiʻi ʻa e faʻahinga ʻoku hoko ko e kau tuí. Kuo ʻosi ʻomai ʻe Sīsū ʻa e fakamoʻoni feʻunga ʻo hono tuʻunga faka-Mīsaiá pea ʻomai mo e ngaahi vīsone fakaekikite fakamaama ko e fakalototoʻa ki hono kau muimui mateakí. ʻI he ʻahó ni, ʻoku tau ʻi he uhouhonga ʻo e “ʻaho ʻo e ʻEiki.” ʻOku vavé ni ke fakaʻauha ʻe Kalaisi ʻa e ngaahi meʻa ʻo e fokotuʻutuʻu fulikivanu fakakātoa ʻa Sētané pea fakahaofi ʻa e kakai ʻa e ʻOtuá. Kuo pau kiate kitautolu foki ke tau fakaivimālohiʻi ʻetau tuí ʻaki hono maʻu ʻa e ʻaonga kakato mei he kotoa ʻo e ngaahi tokonaki ʻa Sihova ki heʻetau lelei fakalaumālié.

Fakahaofi Atu ʻi he Fakapoʻuli mo e Mamahi

17, 18. Ko e hā ʻa e faikehekehe lahi naʻe ʻi ai ʻi he ʻuluaki senitulí ʻi he vahaʻa ʻo e kau muimui ʻo Sīsuú mo e faʻahinga ko ia naʻa nau fakafepakiʻi ʻa e taumuʻa ʻa e ʻOtuá, pea ko e hā ʻa e ikuʻanga ki he kulupu taki taha?

¹⁷ ʻI he hili ʻa e pekia ʻa Sīsuú, ʻoku talangofua loto-toʻa ʻa e kau ākongá ki heʻene fekau ke faifakamoʻoni kiate ia, “ʻo ʻikai ʻi Selusalema pe, ka ʻi Siutea kātoa, mo Samelia, ʻio, ʻo aʻu ki he ngataʻanga ʻo māmani.” (Ngāue 1:8) Neongo ʻa e ngaahi taimi ʻo e fakatanga lahí, ʻoku tāpuakiʻi ʻe Sihova ʻa e fakatahaʻanga Kalisitiane kei foʻofoʻoú ʻaki ha fakamaama fakalaumālie pea ʻaki ʻa e kau ākonga foʻou tokolahi.—Ngāue 2:47; 4:​1-31; 8:​1-8.

¹⁸ ʻI he tafaʻaki ʻe tahá, ko e ngaahi ʻamanaki ʻa e faʻahinga ʻoku nau fakafepakiʻi ʻa e ongoongo leleí ʻoku hoko ʻo kovi ange ʻa ʻene fakautuutú. “Ko e hala ʻo e kau angahala ko e koto poʻuli lōlō,” ko e lau ia ʻa e Palovepi 4:19. “ʻOku ʻikai te nau ʻilo ʻa e meʻa ʻoku nau humu ai.” “Ko e koto poʻuli lōlō” ʻoku fakalalahi ia ʻi he 66 T.S. ʻi hono ʻākoloʻi ʻe he ngaahi konga kau Lomá ʻa Selusalemá. ʻI he hili hono fai ha holomui fakataimi ʻi ha ʻuhinga taʻemahino, ʻoku foki mai ʻa e kau Lomá ʻi he 70 T.S., pea ʻoku fakaʻauha ʻosi ʻa e koló ʻi he taimi ko ʻení. Fakatatau ki he faihisitōlia Siu ko Siosifasí, ʻoku laka hake ʻi he milioná ʻa e kau Siu ʻoku maté. Kae kehe, ʻoku hao ʻa e kau Kalisitiane faitōnungá. Ko e hā hono ʻuhingá? Koeʻuhi ʻi he holomui ʻa e ʻuluaki ʻākoloʻí, ʻoku nau talangofua ki he fekau ʻa Sīsū ke holá.—Luke 21:​20-22.

19, 20. (a) Ko e hā ʻoku ʻikai ai ha ʻuhinga ke ilifia ʻa e kakai ʻa e ʻOtuá ʻi he fakaofi atu ʻa e fokotuʻutuʻu lolotongá ki hono ngataʻangá? (e) Ko e hā ʻa e fakamaama fakaofo naʻe ʻomai ʻe Sihova ki heʻene kakaí ʻi he ngaahi hongofuluʻi taʻu ʻo aʻu mai ki he 1914?

¹⁹ ʻOku meimei tatau pē mo e tuʻunga ʻoku tau ʻi aí. Ko e fuʻu mamahi lahi ʻoku tuʻunuku maí te ne fakaʻilongaʻi ʻa e ngataʻanga ʻo e fokotuʻutuʻu fulikivanu fakakātoa ʻa Sētané. Ka ʻoku ʻikai fiemaʻu ki he kakai ʻa e ʻOtuá ke nau ilifia, he naʻe talaʻofa ʻe Sīsū: “Ko eni, ʻoku ou ʻiate kimoutolu ʻe au ʻi he ngaahi ʻaho kotoa pe, ʻo aʻu ki he ngataʻanga ʻo mamani.” (Mātiu 28:20) Ke langa hake ʻa e tui ʻa ʻene muʻaki kau ākongá pea ke teuʻi kinautolu ki he meʻa ʻoku toka mei muʻá, naʻe ʻoange ʻe Sīsū kiate kinautolu ha tomuʻa fakaʻali ʻo hono lāngilangi fakahēvani ʻi he tuʻunga ko e Tuʻi Faka-Mīsaiá. Fēfē ʻa e ʻahó ni? ʻI he 1914 naʻe hoko ai ʻa e tomuʻa fakaʻali ko iá ko ha meʻa moʻoni. Pea ko ha meʻa moʻoni fakaivimālohi-tui lahi ē kuo hoko ki he kakai ʻa e ʻOtuá! ʻOkú ne ʻomai ʻa e talaʻofa ʻo ha kahaʻu fakaofo, pea kuo tuku ki he kau sevāniti ʻa Sihová ha fakamaama hokohoko ki he meʻa moʻoni ko iá. ʻI he lotolotonga ʻo e māmani fakapoʻuli ʻo e ʻaho ní, “ko e ʻalunga ʻo haʻa faitotonu ʻoku hange ko e maama hengihengi, ʻa e fakautuutu ʻene maama ʻo aʻu ki he hoʻatā malie.”—Palovepi 4:18.

²⁰ Naʻa mo e ki muʻa ʻi he 1914, ko ha kiʻi kulupu tokosiʻi pē ʻo e kau Kalisitiane paní naʻa nau kamata ke mahinoʻi ʻa e ngaahi moʻoni mahuʻinga fekauʻaki mo e toe foki mai ʻa e ʻEikí. Hangē ko ʻení, naʻa nau ʻiloʻi ʻe taʻehāmai ʻa e meʻa ko iá, hangē ko ia naʻe fakahaaʻi ʻe he ongo ʻāngelo ko ia naʻá na hā ʻi he 33 T.S. ki he kau ākongá he lolotonga ʻa e hāʻele hake ʻa Sīsū ki hēvaní. Hili hono fakapuliki ʻe ha konga ʻao ʻa Sīsū mei he mamata ki ai ʻa e kau ākongá, naʻe pehē ʻe he ongo ʻāngeló: “Ko e Sisu ko ia ʻa ia kuo ʻohake meiate kimoutolu ki he langi, te ne toe haʻu; pea ʻe hangē tofu pe hono anga pea mo ʻene haʻele ki langi kuo mou mamata ki ai.”—Fakaʻītali ʻamautolu; Ngāue 1:​9-11.

21. Ko e hā ʻe lāulea ki ai ʻi he kupu hoko maí?

²¹ Ko e mavahe ʻa Sīsuú naʻe mamata ki ai ʻa ʻene kau muimui mateakí pē. Hangē pē ko ia ʻi he fakasinokehé, naʻe ʻikai fakahāhā ia ki he kakaí; ko e māmaní fakalūkufua naʻe ʻikai ʻaupito te nau ʻilo ki he meʻa naʻe hokó. Ko e meʻa tatau pē ʻe hoko ʻi he foki mai ʻa Kalaisi ʻi he mālohi ʻo e Puleʻangá. (Sione 14:19) Ko ʻene kau ākonga pani faitōnungá pē te nau ʻiloʻi ʻene ʻi ai fakatuʻí. ʻI he kupu hoko maí, te tau sio ai ki he founga ʻo e maongo loloto kiate kinautolu ʻa e fakamaama ko iá, ʻo aʻu ai ki hono tumutumú ʻi hono fakatahatahaʻi ʻo e laui miliona ʻa ia te nau hoko ko e faʻahinga ʻe pule mai ki ai ʻa Sīsū ʻi he māmaní.—Fakahā 7:​9, 14.

[Fakamatala ʻi lalo]

ʻOkú Ke Manatuʻi?

• ʻI hono tukuakiʻi ʻo Sīsū ki he maumauʻi ʻo e Sāpaté pea mo e lea-fieʻotuá, ko e hā ʻa e fakamoʻoni naʻá ne ʻoatu ke fakahaaʻi ko ia ʻa e Mīsaiá?

• Naʻe anga-fēfē ʻa e maʻu ʻaonga ʻa e muʻaki kau ākonga ʻa Sīsuú mei he fakasinokehé?

• Ko e hā naʻe ʻuhinga ki ai ʻa Sīsū ʻi heʻene pehē ʻe nofo pē ʻa Sione kae ʻoua ke ne haʻú?

• ʻI he 1914, ko e hā ʻa e tomuʻa fakaʻali naʻe hoko ko ha meʻa moʻoní?

[Fakatātā ʻi he peesi 10]

Naʻe tuhu ʻa Sīsū ki heʻene ngaahi fakamoʻoni ki hono tuʻunga ko e Mīsaiá

[Fakatātā ʻi he peesi 12]

Naʻe fakaivimālohi-tui ʻa e vīsone fakasinokehé

[Fakatātā ʻi he peesi 13]

Naʻe moʻui ai pē ʻa Sione kae ʻoua ke ‘haʻu’ ʻa Sīsū