Founga ke Maʻu Ai ʻa e Tauʻatāina Moʻoní

1, 2. (a) Ko e hā ʻoku fai ʻe he kakaí ke nau maʻu ai ʻa e tauʻatāiná? (e) Ko e hā ʻa e olá?

ʻI HE ʻahó ni ʻoku talanoa ai ʻa e kakai ʻi he feituʻu lahi ʻo e māmaní ʻo fekauʻaki mo e tatau ʻi he ngaahi totonú mo e tauʻatāiná. ʻOku loto ʻa e niʻihi ke nau tauʻatāina mei he ngaohikovia taʻetotonú, tomuʻa fehiʻá, mo e masivá. ʻOku fiemaʻu ʻe he niʻihi ke nau tauʻatāina ke leaʻaki ʻa e meʻa ʻoku nau loto ke leaʻakí, ke fili ʻa e meʻa ʻoku nau loto ke filí, pea ke moʻui ʻi he founga ʻoku nau loto ke moʻui aí. ʻOku loto ʻa e kakai ʻi he feituʻu kotoa pē ke nau tauʻatāina.

² Ke maʻu ʻa e tauʻatāiná, ʻoku fokotuʻutuʻu ʻe he kakaí ʻa e ngaahi laka fakahāhā pea aʻu ki he ngaahi liukava. Ka ʻoku nau maʻu moʻoni ʻa e meʻa ʻoku nau fiemaʻú? ʻIkai. Ko e ola ʻoku faʻa hokó ko e faingataʻaʻia lahi ange pea naʻa mo e mate. Ko e lea ʻa Tuʻi Solomone ʻi he Tangata Malanga 8:9 ʻoku moʻoni ʻaupito: “Lolotonga ʻa e taimi kuo pule ai ha tangata ki ha tangata ko e kovi pē ʻokú ne ʻomi kiate iá.”

 3. Ko e hā ʻe lava ke tau fai ke hoko ai ʻo fiefia mo fiemālie moʻoní?

³ ʻOku tala mai ʻe he Tohi Tapú ʻa e meʻa ʻoku fiemaʻu ke tau fai ke hoko ai ʻo fiefia mo fiemālie moʻoní. Naʻe pehē ʻe he ākonga ko Sēmisí: “Ko e tokotaha ʻokú ne sio fakamamaʻu ki he lao haohaoa ʻokú ne ʻomai ʻa e tauʻatāiná pea hanganaki muimui aí . . . te ne fiefia ʻi heʻene fai iá.” (Sēm. 1:25) Ko e lao haohaoá ʻoku haʻu ia meia Sihova, pea ʻokú ne ʻiloʻi lelei taha ʻa e meʻa ʻoku tau fiemaʻu koeʻuhi ke hoko ai ʻo fiefia mo fiemālie fakaʻaufulí. Naʻe ʻoange ʻe Sihova kia ʻĀtama mo ʻIvi ʻa e tauʻatāina moʻoní mo e meʻa kehe kotoa pē naʻá na fiemaʻu ke na hoko ai ʻo fiefiá.

 4. Ko e hā ʻa e tauʻatāina naʻe maʻu ʻe ʻĀtama mo ʻIví? (Sio ki he ʻuluaki fakatātā ʻi he kupú ni.)

⁴ ʻI heʻetau lau ʻa e Sēnesi vahe 1 mo e 2, ʻoku tau ʻilo ai naʻe maʻu ʻe ʻĀtama mo ʻIvi ʻa e faʻahinga tauʻatāina ko ē ʻoku fakaʻānaua ki ai ʻa e kakai ʻi he ʻaho ní. Naʻá na maʻu ʻa e meʻa kotoa pē naʻá na fiemaʻú, naʻe ʻikai te na ilifia ki ha meʻa, pea naʻe ʻikai ke ngaohikovia taʻetotonu kinaua ʻe ha taha. Naʻe ʻikai te na hohaʻa fekauʻaki mo hano maʻu ha meʻakai, ngāue, puke, pe mate. (Sēn. 1:27-29; 2:8, 9, 15) Ka naʻá na tauʻatāina ʻo ʻikai fakangatangata? Tau vakai angé ki aí.

 5. Neongo ʻa e anga ʻo e fakakaukau ʻa e tokolahi, ko e hā ʻoku fiemaʻu ʻe he kakaí koeʻuhi ke nau maʻu ai ʻa e tauʻatāiná?

⁵ ʻOku fakakaukau ʻa e kakai tokolahi ko hono maʻu ʻa e tauʻatāina moʻoní ʻoku ʻuhinga iá ʻe lava ke nau fai ha meʻa pē ʻoku nau loto ki ai ʻo ʻikai hohaʻa fekauʻaki mo hono ngaahi nunuʻá. ʻOku pehē ʻi he The World Book Encyclopedia ko e tauʻatāiná ko e “malava ke fai ha ngaahi fili pea ke fakahoko ia.” Kae kehe, ʻoku toe pehē ai ʻoku tauʻatāina ʻa e kakaí kapau ʻoku ʻikai fakangatangata kinautolu ʻe ha puleʻanga ʻi he ngaahi founga ʻoku taʻetotonu, ʻikai fiemaʻu, pe ʻikai ʻuhinga lelei. ʻOku ʻuhinga ení ʻoku fiemaʻu ha fakangatangata ʻe niʻihi koeʻuhí ke lava ʻo maʻu ai ʻe he tokotaha kotoa pē ʻa e tauʻatāiná. Ka ko hai ʻokú ne maʻu ʻa e totonu ke ne fili pe ʻoku totonu, fiemaʻu, mo ʻuhinga lelei ha fakangatangata pau?

 6. (a) Ko e hā ʻoku maʻu ai ʻe Sihova tokotaha pē ʻa e tauʻatāina fakaʻaufulí? (e) Ko e hā ʻa e faʻahinga tauʻatāina ʻoku lava ke maʻu ʻe he faʻahinga ʻo e tangatá, pea ko e hā hono ʻuhingá?

⁶ ʻOku mahuʻinga ke tau manatuʻi ko Sihova pē ko e ʻOtuá ʻokú ne maʻu ʻa e tauʻatāina fakaʻaufuli mo taʻefakangatangatá. Ko e hā hono ʻuhingá? Koeʻuhí naʻá ne fakatupu ʻa e meʻa kotoa pē pea ko ia ʻa e Pule māfimafi-aoniu ʻo e ʻunivēsí. (1 Tīm. 1:17; Fkh. 4:11) Naʻe ngāueʻaki ʻe Tuʻi Tēvita ʻa e ngaahi lea lelei ke fakamatalaʻi ʻaki ʻa e tuʻunga ʻo Sihová. (Lau ʻa e 1 Kalonikali 29:11, 12.) ʻI hono kehé, ko e tauʻatāina ʻa e meʻamoʻui kotoa pē ʻi hēvani pea ʻi māmaní ʻoku ʻi ai hono ngataʻanga. Ko e tauʻatāina fakangatangata ia. ʻOku fiemaʻu mai ʻe Sihova ko e ʻOtuá ke tau manatuʻi ko ia pē ʻokú ne maʻu ʻa e totonu ke ne fili ʻa e ngaahi fakangatangata ʻoku totonu, fiemaʻu, mo ʻuhinga leleí. Kuo fokotuʻu ʻe Sihova talu pē mei he kamataʻangá ʻa e ngaahi fakangatangata ki heʻene meʻa fakatupú.

 7. Ko e hā ʻa e ngaahi meʻa ʻe niʻihi kuo pau ke tau fai ʻoku ʻai ai kitautolu ke tau fiefia?

⁷ Neongo naʻe maʻu ʻe ʻĀtama mo ʻIvi ha tauʻatāina lahi, naʻe ʻi ai ʻa e ngaahi fakangatangata ki heʻena tauʻatāiná. Ko e niʻihi ʻo e ngaahi fakangatangata ko iá naʻe ongo fakanatula pē kiate kinaua. Ko e fakatātaá, ke hokohoko atu ʻena moʻuí, naʻe pau ke na mānava, kai, mo mohe. Naʻe ʻuhinga iá naʻe ʻikai te na tauʻatāina? ʻIkai. Ko hono moʻoní, naʻe fakapapauʻi ʻe Sihova ko hono fai ʻa e ngaahi meʻa ko iá ʻe ʻai ai ke na fiefia mo fiemālie. (Saame 104:14, 15; Tml. 3:12, 13) ʻOku tau fiefia kotoa ʻi hono mānavaʻaki ʻa e ʻea leleí, kai ʻa e ngaahi meʻakai ʻoku tau ifoʻia taha aí, mo hono maʻu ha mālōlō lelei ʻi he poʻulí. ʻOku ʻikai te tau ongoʻi ʻoku taʻotaʻofi kitautolu ʻi heʻetau fai ʻa e ngaahi meʻa ko iá. Kuo pau pē naʻe ongoʻi pehē ʻa ʻĀtama mo ʻIvi.

 8. Ko e hā ʻa e fekau hangatonu naʻe fai ʻe he ʻOtuá kia ʻĀtama mo ʻIví, pea ko e hā hono ʻuhingá?

⁸ Naʻe ʻoange ʻe Sihova kia ʻĀtama mo ʻIvi ha fekau hangatonu. Naʻá ne tala ange ke na maʻu fānau, fakafonu ʻa e māmaní, pea tokangaʻi ia. (Sēn. 1:28) Naʻe toʻo ʻena tauʻatāiná ʻi he fekau ko ení? ʻIkai ʻaupito! Naʻe ʻoange ai kiate kinaua ʻa e faingamālie ke na liliu ʻa e māmaní kotoa ko ha palataisi, ʻo ʻai ia ko ha ʻapi ʻa ia ʻe lava ke na moʻui taʻengata ai mo ʻena fānau haohaoá. Ko e taumuʻa eni ʻa e ʻOtuá. (ʻAi. 45:18) ʻI he ʻahó ni, ʻoku ʻikai ke talangataʻa ʻa e kakaí ki he ʻOtuá kapau ʻoku nau fili ke ʻoua te nau mali pe maʻu fānau. Kae kehe, ʻoku mali ʻa e kakaí pea maʻu fānau neongo ʻoku hoko heni ha ngaahi faingataʻa. (1 Kol. 7:36-38) Ko e hā hono ʻuhingá? Koeʻuhí ʻoku nau ʻamanekina ke maʻu ai ʻa e fiefia mo e fiemālie. (Saame 127:3) Kapau naʻe talangofua ʻa ʻĀtama mo ʻIvi kia Sihova, naʻe mei lava ke na fiefia ʻi heʻena nofo malí mo e fāmilí ʻo taʻengata.

 9. Ko e hā ʻoku ʻikai ai ke taʻetotonu, taʻefiemaʻu, pe taʻeʻuhinga ʻa e fekau ʻa e ʻOtuá ʻi he Sēnesi 2:17?

⁹ Naʻe ʻoange ʻe Sihova kia ʻĀtama mo ʻIvi ha toe fekau ʻe taha pea tala mahino kiate kinaua ʻa e meʻa ʻe hokó kapau te na talangataʻa ki ai. Naʻá ne pehē: “Ko e ʻakau ʻo e ʻilo ʻo e leleí mo e koví, kuo pau ke ʻoua te ke kai mei ai, he ʻi he ʻaho te ke kai ai mei aí ko e moʻoni te ke mate.” (Sēn. 2:17) Naʻe taʻetotonu, ʻikai fiemaʻu, pe taʻeʻuhinga ʻa e fekau ko iá? Naʻe toʻo ai ʻa e tauʻatāina ʻa ʻĀtama mo ʻIví? ʻIkai ʻaupito. Ko hono moʻoní, ʻoku fakakaukau ʻa e kau mataotao Tohi Tapu tokolahi ko e fekau ʻa e ʻOtuá naʻe mātuʻaki fakapotopoto mo ʻuhinga lelei. ʻOku pehē ʻe ha taha ʻo kinautolu ʻokú ne akoʻi mai kiate kitautolu “ko e ʻOtuá pē tokotaha ʻokú ne ʻiloʻi ʻa e meʻa ʻoku lelei . . . ki he tangatá pea ko e ʻOtuá pē tokotaha ʻokú ne ʻiloʻi ʻa e meʻa ʻoku ʻikai lelei . . . kiate kinautolú. Ke fiefia ʻi he ‘meʻa ʻoku leleí,’ kuo pau ke falala ʻa e faʻahinga ʻo e tangatá ki he ʻOtuá pea talangofua kiate ia. Kapau te nau talangataʻa, ʻe tuku kiate kinautolu ke nau fili pē maʻanautolu ʻa e meʻa ʻoku leleí . . . mo e meʻa ʻoku ʻikai leleí.” ʻOku fuʻu faingataʻa ke fai ʻa e meʻa ko iá ʻe he faʻahinga ʻo e tangatá ʻiate kinautolu pē.

10. Ko e hā ʻoku ʻikai ke tatau ai ʻa e tauʻatāina ke filí mo e totonu ke fakapapauʻi ʻa e meʻa ʻoku leleí mo e meʻa ʻoku koví?

¹⁰ ʻE fakakaukau nai ʻa e kakai ia ʻe niʻihi naʻe ʻikai ke ʻoange ʻe Sihova kia ʻĀtama ʻa e tauʻatāina ke ne fai ʻa e meʻa naʻá ne loto ke faí. Kae kehe, ʻoku ʻikai te nau ʻiloʻi ko e tauʻatāina ke filí, pe ko e totonu ke fili ʻa e meʻa ke faí, ʻoku ʻikai ke tatau ia mo e totonu ke fakapapauʻi ʻa e meʻa ʻoku leleí mo e meʻa ʻoku koví. Naʻe maʻu ʻe ʻĀtama mo ʻIvi ʻa e tauʻatāina ke fili pe te na talangofua ki he ʻOtuá pe ʻikai. Ka ko Sihova pē tokotaha ʻokú ne maʻu ʻa e totonu ke ne fakapapauʻi ʻa e meʻa ʻoku leleí mo e meʻa ʻoku koví. Ko e “ʻakau ʻo e ʻilo ʻo e leleí mo e koví” naʻe fakamoʻoniʻi ai kia ʻĀtama mo ʻIvi ʻa e moʻoniʻi meʻa ko iá. (Sēn. 2:9) ʻOku ʻikai ke tau ʻiloʻi maʻu pē ʻa e ola ʻe hoko ʻi heʻetau ngaahi fili ʻoku faí, pea heʻikai moʻoni lava ke tau ʻiloʻi pe ʻe lelei maʻu pē ʻa e ngaahi olá. Ko e ʻuhinga ia ʻoku tau faʻa sio ai ki hono fai ʻe he kakaí ʻa e ngaahi fili pe fakapapau fakataha mo e taumuʻa lelei, ka ko e ola ʻo e ngaahi fili ko ení ko e faingataʻaʻia, fakatamaki, pe fakamamahi. (Pal. 14:12) ʻIo, ʻoku fakangatangata ʻa e meʻa ʻoku lava ke fai ʻe he faʻahinga ʻo e tangatá. ʻI hono ʻoange kia ʻĀtama mo ʻIvi ʻa e fekau ke ʻoua te na kai mei he fuʻu ʻakaú, naʻe akoʻi ai ʻe Sihova kiate kinaua naʻe pau ke na talangofua kiate ia ke maʻu ai ʻa e tauʻatāina moʻoní. Ko e hā naʻe fili ʻa ʻĀtama mo ʻIvi ke na faí?

11, 12. Ko e hā naʻe iku ai ki he fakatamaki ʻa e fili ʻa ʻĀtama mo ʻIví? ʻOmai ha fakatātā.

¹¹ Ko e meʻa fakamamahí, naʻe fili ʻa ʻĀtama mo ʻIvi ke na talangataʻa kia Sihova. Naʻe fili ʻa ʻIvi ke ne fanongo kia Sētane ʻi heʻene palōmesi: ‘“E ʻā homo matá pea te mo hangē ko e ʻOtuá, ʻo ʻilo ʻa e leleí mo e koví.” (Sēn. 3:5) Naʻe iku ʻa e fili ʻa ʻĀtama mo ʻIví ki he tauʻatāina lahi ange, ʻo hangē ko ia naʻe pehē ʻe Sētane ʻe hokó? ʻIkai ʻaupito. Ko hono moʻoní, naʻá na ʻiloʻi ko hono siʻaki ʻa e fakahinohino ʻa Sihová naʻe iku ki he fakatamaki. (Sēn. 3:16-19) Ko e hā hono ʻuhingá? Koeʻuhí naʻe ʻikai ke ʻoange ʻe Sihova ki he tangatá ʻa e tauʻatāina ke fili pē ʻiate kinautolu ʻa e meʻa ʻoku leleí mo e meʻa ʻoku koví.​—Lau ʻa e Palōveepi 20:24 mo e fakamatala ʻi lalo; Selemaia 10:23.

¹² ʻOku meimei tatau eni mo ha pailate ʻoku puna ʻi ha vakapuna. Ke tūʻuta malu ki he feituʻu ʻoku ʻalu ki aí, ʻoku fakanatula pē ʻene muimui ʻi ha halanga kuo fakapapauʻi, ʻo ne ngāueʻaki ʻa e ngaahi meʻangāue faifolau ʻi he vakapuná pea fetuʻutaki mo e faʻahinga ʻi he tauá ʻoku nau puleʻi ʻa e fepunaʻakí. Ka ʻo kapau ʻoku ʻikai ke muimui ʻa e pailaté ʻi he ngaahi fakahinohinó peá ne puna ki ha feituʻu pē ʻokú ne loto ke ʻalu ki ai, ʻe lava ke iku ia ki he fakatamaki. ʻI he hangē ko e pailate ko iá, naʻe loto ʻa ʻĀtama mo ʻIvi ke na fai ʻa e ngaahi meʻá ʻi he founga pē ʻanaua. Naʻá na siʻaki ʻa e tataki ʻa e ʻOtuá. Ko e hā ʻa e olá? Ko e fakatamaki! Ko ʻena filí naʻe iku ki he angahala mo e mate kiate kinaua mo e kotoa ʻena fānau ʻi he hili kinauá. (Loma 5:12) Naʻe ʻikai ke maʻu ʻe ʻĀtama mo ʻIvi ha tauʻatāina lahi ange ʻi heʻena feinga ke na fili pē ʻiate kinaua ʻa e meʻa ʻoku leleí mo e meʻa ʻoku koví. ʻI hono kehé, naʻe mole meiate kinaua ʻa e tauʻatāina moʻoni naʻe ʻoange ʻe Sihová.

13, 14. ʻE lava fēfē ke tau maʻu ʻa e tauʻatāina moʻoní?

¹³ ʻOku fakakaukau ʻa e kakai ʻe niʻihi ko hono maʻu ʻa e tauʻatāina taʻefakangatangatá ʻe lelei tahá. Ka ʻe pehē moʻoni? Neongo ʻoku ʻi ai ʻa e ngaahi ʻaonga lahi ʻo hono maʻu ʻa e tauʻatāiná, sioloto atu angé pe ʻe fēfē ʻa e māmaní kapau heʻikai ʻaupito ha fakangatangata? ʻOku pehē ʻe he The World Book Encyclopedia ʻoku fihi ʻa e ngaahi lao ʻa e sōsaieti fokotuʻutuʻu maau kotoa pē koeʻuhí kuo pau ke nau maluʻi pea ʻi he taimi tatau kuo pau ke nau ʻoange ha fakangatangata ki he tauʻatāina ʻa e kakaí. ʻOku ʻikai maʻu pē ke faingofua eni. ʻI he ʻuhinga ko iá, ʻoku tau sio ki he lahi fau ʻa e ngaahi lao mo e tokolahi fau ʻa e kau loea mo e kau fakamaau ʻoku nau feinga ke fakamatalaʻi mo ngāueʻaki iá.

¹⁴ Naʻe fakamatala ʻa Sīsū Kalaisi ki he founga ʻe lava ke tau maʻu ai ʻa e tauʻatāina moʻoní. Naʻá ne pehē: “Kapau te mou nofo maʻu ʻi heʻeku leá, ko e moʻoni ko e kau ākonga kimoutolu ʻaʻaku, pea te mou ʻilo ʻa e moʻoní, pea ʻe fakatauʻatāinaʻi kimoutolu ʻe he moʻoní.” (Sione 8:31, 32) Ko ia ke maʻu ʻa e tauʻatāina moʻoní, ʻoku fiemaʻu ke tau fai ʻa e meʻa ʻe ua. ʻUluakí, ʻoku fiemaʻu ke tau tali ʻa e moʻoni naʻe akoʻi ʻe Sīsuú. Uá, ʻoku fiemaʻu ke tau hoko ko ʻene kau ākonga. Ko hono fai ʻa e ongo meʻa ko ení te ne ʻomai kiate kitautolu ʻa e tauʻatāina moʻoní. Ka ko e tauʻatāina mei he hā? Naʻe pehē ʻe Sīsū: “Ko e tokotaha faiangahala kotoa pē ko ha pōpula ia ʻa e angahalá.” Naʻá ne toe pehē: “Kapau ʻoku fakatauʻatāinaʻi kimoutolu ʻe he Fohá, te mou tauʻatāina moʻoni.”​—Sione 8:34, 36.

15. Ko e hā ʻe lava ai ke ʻai kitautolu ʻe he tauʻatāina naʻe talaʻofa mai ʻe Sīsuú ke tau “tauʻatāina moʻoni”?

¹⁵ Ko e tauʻatāina naʻe talaʻofa ʻe Sīsū ki heʻene kau ākongá ʻoku lelei mamaʻo ange ia ʻi he faʻahinga tauʻatāina ko ē ʻoku fiemaʻu ʻe he tokolahi taha ʻo e kakai ʻi he ʻaho ní. ʻI he pehē ʻe Sīsū, “Kapau ʻoku fakatauʻatāinaʻi kimoutolu ʻe he Fohá, te mou tauʻatāina moʻoni,” naʻá ne talanoa ai ʻo fekauʻaki mo e tauʻatāina mei he pōpula ki he angahalá, ʻa e faʻahinga kovi taha ʻo e pōpulá kuo faifai ange pea hokosia ʻe he faʻahinga ʻo e tangatá. ʻI he founga fē ʻoku tau pōpula ai ki he angahalá? ʻOku ʻai kitautolu ʻe he angahalá ke tau fai ʻa e ngaahi meʻa ʻoku koví. ʻOku lava foki ke ne taʻofi kitautolu mei hono fai ʻa e meʻa ʻoku tau ʻiloʻi ʻoku totonú pe mei heʻetau fai hotau lelei tahá. Ko e olá ko e ongoʻi feifeitamaki, mamahi, faingataʻaʻia, pea iku ki he mate. (Loma 6:23) Naʻe ʻiloʻi ʻe he ʻapositolo ko Paulá ʻa e fakamamahi ʻo e hoko ko ha pōpula ʻa e angahalá. (Lau ʻa e Loma 7:21-25.) Ko e toki taimi pē ʻe toʻo ʻosi ai ʻa e angahalá te tau maʻu ai ʻa e tauʻatāina moʻoni naʻe maʻu ki muʻa ʻe ʻĀtama mo ʻIví.

16. ʻE lava fēfē ke tau hoko ʻo tauʻatāina moʻoni?

¹⁶ Ko e fakamatala ʻa Sīsū “kapau te mou nofo maʻu ʻi heʻeku leá” ʻoku fakahaaʻi ai kapau ʻoku tau loto ke fakatauʻatāinaʻi kitautolu ʻe Sīsū, ʻoku fiemaʻu ke tau fai ʻa e ngaahi meʻa pau. Ko e hā ʻa e ngaahi meʻa ko iá? ʻI he tuʻunga ko e kau Kalisitiane ʻosi fakatapuí, kuo tau siʻaki kitautolu pea fili ke tali ʻa e ngaahi fakangatangata naʻe fokotuʻu ʻe Sīsū ki heʻene kau ākongá. (Māt. 16:24) Hangē pē ko ia naʻe talaʻofa ʻe Sīsuú, te tau tauʻatāina moʻoni ʻi he kahaʻú ʻi heʻetau maʻu ʻa e ngaahi ʻaonga kotoa ʻo e feilaulau huhuʻí.

17. (a) ʻE lava fēfē ke tau fiefia mo fiemālie moʻoni? (e) Ko e hā te tau ako ʻi he kupu hono hokó?

¹⁷ Ke hoko ʻo fiefia mo fiemālie moʻoni, kuo pau ke tau talangofua ki he ngaahi akonaki ʻa Sīsuú ʻi he tuʻunga ko ʻene kau ākonga. Kapau te tau fai eni, ʻe faifai pē ʻo lava ke tau tauʻatāina kakato mei he hoko ko e kau pōpula ʻa e angahalá mo e maté. (Lau ʻa e Loma 8:1, 2, 20, 21.) ʻI he kupu hono hokó, te tau ako ai ki he founga ʻe lava ke tau ngāueʻaki fakapotopoto ai ʻa e tauʻatāina ʻoku tau maʻu he taimi ní. ʻE lava leva ai ke tau fakalāngilangiʻi ʻa Sihova, ʻa e ʻOtua ʻo e tauʻatāina moʻoní, ʻo taʻengata.