Laui Miliona ʻOku Lolotonga Maté Te Nau Toe Moʻui Mai

KO E laui miliona kuo mate ʻe toe moʻui​—ko ha ʻamanaki fakatupu-ueʻi loto ē! Ka ko e meʻa moʻoni? Ko e hā ʻe lava ke ne ʻai ke ke tuipau ki ai? Ke tui ki ha talaʻofa, ʻoku fiemaʻu ke ke ʻilo pau ko e tokotaha ʻokú ne fai ʻa e talaʻofá ʻoku fakatou loto-fiefai mo malava ke fakahoko ia. Ko ia, ko hai ia kuó ne talaʻofa ko e laui miliona kuo maté ʻe toe moʻui?

ʻI he faʻahitaʻu matala ʻo e 31 T.S., naʻe fakahā lototoʻa ai ʻe Sīsū Kalaisi kuo fakaivia ia ʻe he ʻOtua ko Sihová ke fokotuʻu ʻa e kau maté. Naʻe talaʻofa ʻe Sīsū: “He hange ā ʻoku fokotuʻu ʻe he Tamai ʻa e kau pekia, mo ne ngaohi ke moʻui; pehe foki mo e ʻAlo, ʻoku ne ngaohi ke moʻui ʻa kinautolu ʻoku ne loto ki ai. ʻOua te mou ofo ʻi he meʻa ko ia: he ʻoku ʻunu mai ha taimi, ʻa ia ʻe fanongo ai ki hono leʻo [Sīsū] ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.” (Sione 5:​21, 28, 29) ʻIo, naʻe talaʻofa ʻe Sīsū ko e laui miliona kuo nau maté ʻe toe moʻui ʻi he māmani ko ʻení pea maʻu mo e ʻamanaki ke nofo ai pē ʻo taʻengata. (Sione 3:16; 17:3; fehoanaki mo Sāme 37:29 mo Mātiu 5:5) Koeʻuhi ko Sīsū kuó ne fai ʻa e talaʻofa ko iá, ʻoku fakapotopoto ke pehē pē ʻokú ne loto-fiefai ke fakahoko ia. Ka ʻokú ne malava ke fai pehē?

Fakatatau ki he fakamatala ʻa e Tohitapú, ʻi he aʻu mai ki he taimi naʻe fai ai ʻe Sīsū ʻa e talaʻofa ko iá, naʻe teʻeki ai ke ne fokotuʻu ʻe ia ha taha mei he maté. Ka naʻe ʻikai ke aʻu ki he taʻu ʻe ua ki mui mai ai, naʻá ne fakahāhaaʻi ʻi ha founga mālohi ʻokú ne fakatou loto-fiefai mo malava ke fai ʻa e fokotuʻu mei he maté.

“Lasalosi, Tuʻu Mai Kituʻa”

Ko ha meʻa fakaueʻi loto. Naʻe puke lahi ʻa Lāsalosi. Ko hono ongo tuofefiné ko Mele mo Māʻata naʻá na pōpoaki kia Sīsū, ʻa ia naʻe ʻi he tafaʻaki ʻe taha ʻo e Vaitafe Sioataní: “ʻEiki, ke ke meaʻi ko e siana ʻoku ke ʻofa ai ʻoku puke.” (Sione 11:3) ʻIo, naʻe ʻofa lahi ʻaupito ʻa Sīsū ʻi he fāmili ko ʻení. Naʻe toutou fakaafeʻi nai ia ki honau ʻapí ʻi Pētani. (Luke 10:​38-42; fehoanaki mo Luke 9:58) Ka naʻe puke lahi ʻeni ʻa e kaumeʻa ʻofeina ʻo Sīsuú.

Ka neongo ia, ko e hā naʻe ʻamanekina ʻe Mele mo Māʻata ke fai ʻe Sīsuú? Naʻe ʻikai te na kole ki ai ke haʻu ki Pētani. Ka naʻá na ʻilo naʻe ʻofa ʻa Sīsū ʻia Lāsalosi. ʻE ʻikai ke fie sio ʻa Sīsū ki hono kaumeʻa ʻoku puké? ʻOku ʻikai ha veiveiua naʻá na ʻamanaki ʻe fakamoʻui ia ʻe Sīsū ʻi ha mana. He ʻi he taimi ko ʻeni ʻo ʻene ngāue fakamalangá, kuo ʻosi fai ai ʻe Sīsū ha ngaahi mana lahi ʻo e fakamoʻuí, pea naʻa mo e vahaʻa mamaʻó naʻe ʻikai ko ha fakangatangataʻanga ia ki ai. (Fehoanaki mo Mātiu 8:​5-13.) ʻE toe siʻi ange haʻane fai ki ha kaumeʻa ʻokú ne ʻofa ai? ʻOku hā ngalikehe, he naʻe ʻikai ke ʻalu leva ʻa Sīsū ia ki Pētani, ka naʻá ne nofo ʻi he feituʻu naʻá ne ʻi aí ʻi ha ʻaho ʻe ua.​—Sione 11:​5, 6.

Naʻe mate ʻa Lāsalosi ia ʻi he hili hono ʻave ʻa e pōpoakí, ʻi he taimi nai naʻe maʻu ai ʻe Sīsū ʻa e pōpoakí. (Fehoanaki mo Sione 11:​3, 6, 17.) Naʻe ʻikai ke fiemaʻu ha toe pōpoaki. Naʻe ʻilo ʻe Sīsū ia ʻa e mate ʻa Lāsalosí, pea naʻá ne fakataumuʻa ke fai ha meʻa ki ai. ʻI he lea ʻo fekauʻaki mo e mate ʻa Lāsalosí, naʻá ne tala ki heʻene kau ākongá: “Ko siʻota kaumeʻa ko Lasalosi kuo mohe; ka ko ʻeku ʻalu ni ke u fafangu ia.” (Sione 11:11) Kuo ʻosi fokotuʻu ʻe Sīsū ki muʻa atu ha toko ua mei he maté, ʻi he taimi siʻi pē mei heʻena mate ʻi he taimi taki taha.a Kaekehe, ko e taimi ko ʻení ʻe kehekehe ia. ʻI he faifai pea aʻu ʻa Sīsū ki Pētaní, ko hono kaumeʻa moʻoní kuo ʻosi mate ia ʻo feʻunga mo e ʻaho ʻe fā. (Sione 11:​17, 39) ʻE lava ʻe Sīsū ke toe fakamoʻui ha tokotaha kuó ne ʻosi mate fuoloa pehē pea ko hono sinó kuo kamata ke ʻaunga?

ʻI he fanongo kuo haʻu ʻa Sīsuú, ko Māʻata, ko ha fefine longomoʻui, naʻá ne lele ke fakafetaulaki kiate ia. (Fehoanaki mo Luke 10:​38-42.) ʻI heʻene fetaulaki leva mo Sīsuú, naʻe ueʻi ia ʻe hono lotó ke ne pehē: “ʻEiki, ka ne ke ʻi heni pehē ne ʻikai pekia hoku tuongaʻane.” Ka neongo ia, naʻá ne fakahāhā ʻene tuí: “Ka ʻoku ou ʻilo, neongo pē ko e ha haʻo kole ʻe fai ki he ʻOtua, ʻe ʻatu pē, ʻe he ʻOtua.” Naʻe ongo ʻene mamahí kia Sīsū, peá ne fakapapauʻi ange ki ai: “ʻE toetuʻu ho tuongaʻane.” Pea ʻi he fakahā ʻe Māʻata ʻa ʻene tui ki ha toetuʻu ʻi he kahaʻú, naʻe fakahā mahino ʻe Sīsū kiate ia: “Ko au pē ko e toetuʻu, pea mo e moʻui: ko ia ʻoku tui pikitai kiate au, neongo kuo pekia, ka te ne moʻui pē.”​—Sione 11:​20-25.

ʻI he aʻu ki he fonualotó, naʻe fekau ʻe Sīsū ke toʻo ʻa e maka tāpuní. Naʻe ʻuluaki lea fakafepaki ange ʻa Māʻata: “ʻEiki, kuo namuhāhā; he ko hono ʻaho fa mālō ʻeni.” Ka naʻe fakapapauʻi ʻe Sīsū kiate ia: “ʻIkai naʻa ku tala atu, kapau te ke tui, te ke mamata ki he langilangi ʻo e ʻOtua?” Ko ia, ʻi he ʻosi haʻane lotu leʻo lahi, naʻá ne fekau atu: “Lasalosi, tuʻu mai kituʻa.” ʻI he fekau ʻa Sīsuú naʻe hū mai ki tuʻa ʻa Lāsalosi, neongo kuó ne mate ʻo feʻunga mo e ʻaho ʻe fā!​—Sione 11:​38-44.

Naʻe Hoko Moʻoni Ia?

Ko e fakamatala ki hono fokotuʻu ʻo Lāsalosí ʻoku fakahā ia ʻi he Kōsipeli ʻa Sioné ko ha moʻoni fakahisitōlia. Ko e ngaahi fakaikiikí ʻoku fuʻu mahino lelei ʻo ʻikai lava ke pehē ai ko ha lea fakatātā pē. Ke fehuʻia ʻa hono tuʻunga fakahisitōliá ko hono fehuʻia ia ʻa e kotoa ʻo e ngaahi mana ʻi he Tohitapú, kau ki ai mo e toetuʻu ʻa Sīsū Kalaisí tonu pē.b Pea ke fakaʻikaiʻi ʻa e toetuʻu ʻa Sīsū Kalaisí ko e fakaʻikaiʻi ia ʻa e tui faka-Kalisitiané fakakātoa.​—1 Kolinitō 15:​13-15.

Ko hono moʻoní, kapau ʻokú ke tui ʻoku ʻi ai ha ʻOtua, ʻoku ʻikai ke ʻi ai haʻo palopalema ʻi he tui ki he toetuʻú. Ke fakatātaaʻi: ʻE lava ʻe ha taha ke hiki vitiooʻi ʻene tohi tukú, pea ka hili ʻene maté ʻe lava ʻa hono ngaahi kāingá mo e ngaahi kaumeʻá ke sio mo fanongo kiate ia, ʻi heʻene fakamatala ʻa e meʻa ke fai ki hono tofiʻá. ʻI ha taʻu ʻe teau ki muʻa atu, naʻe ʻikai malava ke fakakaukauʻi ha meʻa pehē. Pea ki ha kakai ʻoku moʻui ʻi he ngaahi feituʻu mamaʻo ʻo e māmaní, ko e “mana” ʻo e hiki vitiooʻí ko ha meʻa ʻoku ʻikai malava ke makupusi fakaefakakaukau. Kapau ko e ngaahi moʻoniʻi meʻa fakasaienisi kuo fokotuʻu ʻe he Tokotaha-fakatupú kuo malava ke ngāueʻaki ia ʻe he faʻahinga ʻo e tangatá ke toe faʻuʻaki ha meʻa hāmai pehē mo lava ke fanongo ki ai, ʻikai ʻoku totonu ke toe lahi ange ʻa e malava ia ʻa e Tokotaha-fakatupú? Ko ia, ʻikai ʻoku ʻuhinga lelei ke tui, ko e Tokotaha naʻá ne fakatupu ʻa e moʻuí ʻokú ne malava ke toe fokotuʻu ha taha ʻaki ʻene toe faʻu hono angaʻitangatá ʻi ha sino kuo fakatupu foʻou?

Ko e mana ʻo e toe fakamoʻui mai ʻo Lāsalosi ki he moʻuí ʻokú ne fakatupulaki ʻa e tui kia Sīsū mo e toetuʻú. (Sione 11:​41, 42; 12:​9-11, 17-19) ʻI ha founga fakaueʻi-loto, ʻoku toe fakahā ai ʻa e loto-fiefai mo e holi ʻa Sihova mo hono ʻAló ke fakahoko ʻa e toetuʻú.

‘ʻE Holi ʻa e ʻOtuá’

Ko e meʻa naʻe fai ʻe Sīsū ʻi he mate ʻa Lāsalosí ʻoku hā mei ai ʻa e ʻofa uʻuuʻu ʻi he tafaʻaki ʻa e ʻAlo ʻo e ʻOtuá. Ko ʻene ngaahi ongoʻi loloto ʻi he meʻa ko ʻení ʻoku fakahā mahino ai ʻa ʻene holi mālohi ke fokotuʻu ʻa e kau maté. ʻOku tau lau: “Pea ʻi he hoko leva ʻa Mele ki he potu naʻe ʻi ai ʻa Sīsū, ʻo ne mamata kiate ia, naʻa ne hinga atu ki hono vaʻe, ʻo ne pehē kiate ia, ʻEiki, ka ne ke ʻi heni, pehē ne ʻikai pekia siʻoku tuongaʻane. Pea ʻi he meʻa ʻa Sīsu kiate ia ʻoku ne tangi, mo kinautolu naʻe haʻu mo ia, ʻa haʻa Siu, ʻoku nau tangi, naʻa ne ʻita [toʻe, NW] ʻi hono laumalie, mo ne fakatekelili [hohaʻa, NW], pea ne pehē, ‘Kuo mou telio ia ʻi fē?’ Pea na pehē ange, ʻEiki, ke ke meʻa mai, ʻo meʻa ki ai. Naʻe tutulu ʻa Sīsū. Pea pehē ai ʻe haʻa Siu, Vakai ā: ta naʻe lahi ʻene ʻofa kiate ia!”​—Sione 11:​32-36.

Ko e ongoʻi kaungāmamahi mei he loto ʻo Sīsuú naʻe fakahāhā ia heni ʻi he ngaahi kupuʻi lea ʻe tolu: “toʻe ia,” “hohaʻa,” mo e “naʻe tutulu ʻa Sīsū.” Ko e ngaahi muʻaki lea naʻe ngāueʻaki ʻe he ʻapositolo ko Sioné ki hono hiki ʻa e meʻa fakaueʻi-loto ko ʻení ʻokú ne fakahaaʻi ʻa e tuʻunga ʻa ia naʻe ueʻi ai ʻa Sīsū ʻe heʻene ongoʻí.

Ko e foʻi lea faka-Kalisi ʻoku fakalea ko e “toʻe” ʻoku mei ha veape (em·bri·maʹo·mai) ʻoku ʻuhinga ke ueʻi ʻi ha founga ʻoku langa, pea loloto. ʻOku pehē ʻe he tokotaha fakamatala Tohitapu ko William Barclay: “ʻI he ngaahi tohi motuʻa faka-Kalisí ko e ngāue angamaheniʻaki ʻa e [em·bri·maʹo·mai] ko e māfulu ʻa e hoosí. ʻOku taha pē ʻa hono ʻuhinga ʻi hení naʻe fuʻu loloto ʻa e ongoʻi naʻe maʻu ʻe Sīsuú ʻa ia ko ha toʻe ʻoku ʻikai malava ke puleʻi naʻe haʻu mei Hono lotó.”

Ko e kupuʻi lea kuo liliu ko e “hohaʻa” ko e haʻu mei ha lea faka-Kalisi ko e (tarasʹso) ʻokú ne fakahaaʻi ʻa e hohaʻa tuʻu. Fakatatau ki he The New Thayer’s Greek-English Lexicon of the New Testament, ʻoku ʻuhingá “ke fakatupunga ha taha ke ongoʻi loto-mamahi ʻi loto, . . . ke uesia ʻaki ʻa e mamahi pe fakatupu-loto-mamahi lahi.” Ko e kupuʻi lea ko e “tutulu” ko e haʻu mei he veape Kalisi ko e (da·kryʹo) ʻoku ʻuhinga ke “tō loʻimata, tangi fakalongolongo.” ʻOku faikehekehe ʻeni ia mei he “tangi” ʻa Mele mo e kau Siu naʻe ʻiate iá, ʻa ia ʻoku lave ki ai ʻi he Sione 11:33. ʻOku ngāueʻaki ai ia ʻa e lea faka-Kalisi (mei he klaiʹo) ʻoku ʻuhinga ke tangi ke maheʻa pe leʻo lahi.c

Ko ia, naʻe ueʻi loloto ʻa Sīsū ʻi he mate ʻa hono kaumeʻa ʻofeina moʻoni ko Lāsalosí pea mo ʻene sio ki he tuofefine ʻo Lāsalosí ʻoku tangí. Naʻe fonu ʻa e loto ʻo Sīsuú ʻi heʻene ongoʻí pea tō ai hono loʻimatá. Ko e meʻa ʻoku fakaofó, kuo ʻosi fokotuʻu ʻe Sīsū ia ha toko ua kehe ki muʻa ʻo na moʻui. Pea ʻi he taimi ko ʻení naʻá ne fakaangaanga kakato ke faitatau pe kia Lāsalosi. (Sione 11:​11, 23, 25) Ka, naʻá ne “tutulu.” Ko ia, ko e fakafoki ʻa e faʻahinga ʻo e tangatá ki he moʻuí ʻoku ʻikai ko ha meʻa ia kia Sīsū ke kehe pē ke fai. Ko ʻene ngaahi ongoʻi angaʻofa mo loloto ʻo hangē ko ia ʻoku fakahāhā ʻi he meʻa ko ʻení ʻoku fakahaaʻi mahino ai ʻa ʻene holi vivili ke veteange ʻa e maté.

Koeʻuhi ko Sīsū ko e ‘fakatātā totonu ʻo e ʻOtua ko Sihová tonu,’ ʻoku tau ʻamanekina ʻe ʻikai ke toe siʻi ange ʻa e ngaahi ongoʻi ʻa ʻetau Tamai fakahēvaní. (Hepelū 1:3) Naʻe pehē ʻe he tangata angatonu ko Siopé ʻo kau ki he loto-fiefai ʻa Sihova tonu ke fai ʻa e toetuʻú: “Ka pekia ha tangata, te ne toe moʻui koa? . . . Te ke toki ui, pea te u tali atu ʻe au: ʻE kavea [holi] ho finangalo ki he fitaʻa ʻa ho nima.” (Siope 14:​14, 15) Ko e motuʻaʻi lea ʻoku ʻai ko e “kavea [holi] ho finangalo” ʻoku ʻuhinga ki he ʻunaloto mo e holi fakamātoato. (Sēnesi 31:30; Sāme 84:2) ʻOku hā mahino, ʻoku fakaʻuta loto-fiefai atu ʻa Sihova ki he toetuʻú.

ʻOku lava ke tau tui moʻoni ki he talaʻofa ʻo e toetuʻú? ʻOku ʻikai ha toe veiveiua he ko Sihova mo hono ʻAló ʻokú na fakatou loto-fiefai mo malava ke na fakahoko ia. Ko e hā hono ʻuhinga ʻo ʻeni kiate koe? ʻOkú ke maʻu ʻa e ʻamanaki ʻo e toe fakataha mo kinautolu ʻokú ke ʻofeina kuo nau maté ki he māmani pē ko ʻení ʻi ha ngaahi tuʻunga ia ʻoku melino!

Ko e ʻamanaki ia ʻa Lōpeta ʻi he taimi ní (ʻo hangē ko ia naʻe lave ki ai ʻi he kupu ki muʻá). ʻI he hili ha ngaahi taʻu mei he mate ʻa ʻene faʻeé, naʻe tokoni kiate ia ʻa e Kau Fakamoʻoni ʻa Sihová ke fai ha ako fakamākukanga ki he Tohitapú. ʻOkú ne pehē: “ʻI he hili ʻeku ako ʻo kau ki he ʻamanaki ʻo e toetuʻú, naʻá ku tangi. Naʻe fakaofo ke ʻilo te u toe sio ki heʻeku faʻeé.” Kapau ʻoku ʻunaloto nai ho lotó ke toe sio ki ha taha naʻá ke ʻofa ai, ʻoku ʻikai ha veiveiua te ke fie ako ke lahi ange ki he ʻamanaki fakaofo ko ʻení.

[Fakamatala ʻi lalo]

[Fakatātā ʻi he peesi 5]

Ko e fokotuʻu ʻe Sīsū ʻa e ʻofefine ʻo Siailosí ʻokú ne ʻomai ha makatuʻunga ke tui ki he toetuʻu ʻi he kahaʻú ʻa e kau maté

[Fakatātā ʻi he peesi 6]

Naʻe uesia loloto ʻa Sīsū ʻi he mate ʻa Lāsalosí

[Fakatātā ʻi he peesi 7]

Ko e fiefia ʻa kinautolu ʻe fakamoʻoni ki he toetuʻú ʻe hangē pē ko e fiefia ʻa e uitou ʻi Neiní ʻi hono fokotuʻu ʻe Sīsū ʻa ʻene tama naʻe maté