Sīsū–Ko ʻEne Moʻuí mo ʻEne Ngāue Fakafaifekau

Ko Hono Tuʻo Tolu ʻo e Fanongo ki he Leʻo ʻo e ʻOtuá

LOLOTONGA ʻa e ʻi he temipalé ʻa Sīsuú, naʻá ne ongoʻi mamahi lahi ʻo kau ki he mate kuo vavé ni ke ne fehangahangai mo iá. Ko e meʻa naʻe tokanga tefito ki aí pe ʻe anga-fēfē hano uesia ai ʻa e ongoongo ʻo ʻene Tamaí, ko ia naʻá ne lotu: “ʻAlā Tamai, ke ke fakalangilangiʻi hoʻou huafa.”

ʻI he meʻa ko iá, ko ha leʻo mālohi naʻe ongo mai mei he langí, ʻo pehē: “Kuo u fakalangilangiʻi ia, pea te u toe fakalangilangiʻi foki.”

Naʻe puputuʻu ʻa e kakai naʻe tuʻu takatakaí. Naʻe kamata ke pehē ʻe ha niʻihi: “Ko e lea ʻa ha angelo kiate ia.” Naʻe taukaveʻi ʻe he niʻihi ia ko e mana. Ka ko hono moʻoní ko e ʻOtua ko Sihová naʻe leá! Kaekehe, naʻe ʻikai ko e ʻuluaki taimi ʻeni naʻe ongona ai ʻa e leʻo ʻo e ʻOtuá ʻo fekauʻaki mo Sīsū.

ʻI hono papitaiso ʻo Sīsuú, ʻi he taʻu ʻe tolu mo e konga ki muʻa atu mei heni, naʻe fanongo ʻa Sione Papitaiso ki he lea ʻa e ʻOtuá ʻo kau kia Sīsū: “Ko hoku ʻAlo pele ʻena, ʻa ia kuo u hōifua ai.” Pea ʻi ha taimi hili ʻa e Lakaatu ki muʻa atu mei hení, ʻi he fakakehe ʻa Sīsū ʻi honau ʻaó, naʻe fanongo ʻa Sēmisi mo Sione mo Pita ki he fakahā ʻe he ʻOtuá: “Ko hoku ʻAlo pele ʻena, ʻa ia kuo u hōifua ai; mou fakaongo kiate ia.” Pea ko hono tuʻo tolú ʻeni, ʻi Nīsani 10, ko e ʻaho ia ʻe fā ki muʻa pea pekia ʻa Sīsū, naʻe toe fanongoa ai ʻa e leʻo ʻo e ʻOtuá ʻe he tangatá. Ka naʻe lea ʻeni ʻa Sihova ke lava ʻo ongoʻi ʻe he fuʻu kakai tokolahi!

Naʻe fakamatala ʻe Sīsū: “Naʻe ʻikai koeʻuhi ko au ʻa e hoko mai ʻa e leʻo ni, ka koeʻuhi ko kimoutolu.” Naʻe tokonaki ai ha fakamoʻoni ko Sīsū ko e ʻAlo moʻoni ʻo e ʻOtuá, ko e Mīsaia naʻe talaʻofá. Naʻe hoko atu ʻe Sīsū: “ʻE, kuo hoko ʻeni ʻa e fakamāu ʻo e maama ko eni: ʻe, ʻe kapusi ki tuʻa ʻeni ʻa e ʻeiki ʻo e maama ko eni.” Ko hono moʻoní, ko e founga moʻui angatonu ʻa Sīsuú naʻá ne fakapapauʻi ko Sētane ko e Tēvoló, ko e pule ia ʻo e māmaní, ʻoku taau ke “kapusi ki tuʻa,” pea tāmateʻi.

Naʻe pehē ʻe Sīsū ʻi heʻene fakahanga ʻa e tokangá ki he meʻa ʻe iku mei heʻene pekia naʻe tuʻunuku atú: “Pea ko au, kapau ʻe hiki au ki ʻolunga mei he kelekele, te u tohoaki ʻa e kakai kotoa pe kiate au.” Ko ʻene pekiá naʻe ʻikai ko ha ikunaʻi ia, he naʻe fakafou mai ai ʻa ʻene tohoaki mai ʻa e niʻihi kiate ia koeʻuhi ke nau fiefia ʻi he moʻui taʻengatá.

Ka naʻe lea fakafepaki ʻa e kakaí: “Kuo mau fanongo mei he Lao, ʻoku nofo ʻa e Misaia ʻo taʻengata: pea fēfē ai hoʻo lau aʻau, tokua kuo pau ke hiki ki ʻolunga ʻa e Fanautama ʻa tangata? Ko hai tū ʻa e Fanautama ʻa tangata ko ia”?

Neongo ʻa e ngaahi fakamoʻoni kotoa, kau ki ai mo e fanongo ki he leʻo tonu ʻo e ʻOtuá, ko e tokolahi taha naʻe ʻikai te nau tui ko Sīsū ko e Fanautama ʻa tangata moʻoni, ko e Mīsaia ia naʻe talaʻofá. Ka, ʻo hangē ko ʻene fai ʻi he māhina ʻe ono ki muʻa atu ʻi he Kātoanga ʻo e Falelouʻakaú, naʻe toe lave ʻa Sīsū kiate ia ko e “maama” mo ne fakalototoʻaʻi ʻene kau fanongó: “ʻI hoʻomou maʻu ʻa e maama, mou tui pikitai ki he maama, koeʻuhi ke mou hoko ko e fanau ʻa e maama.” ʻI he hili ʻa ʻene leaʻaki ʻa e ngaahi meʻa ko ʻení, naʻe ʻalu atu ʻa Sīsū ʻo toi, ʻoku hā mahino koeʻuhi he ko ʻene moʻuí naʻe ʻi ha tuʻunga fakatuʻutāmaki.

Ko e ʻikai ke tui ʻa e kau Siú kia Sīsuú naʻe fakahoko ai ʻa e ngaahi lea ʻa ʻAisea ʻo kau ki he ‘fakakuihi ʻa e mata ʻo e kakai pea kuo fakafefeka honau ngaahi loto koeʻuhi ke ʻoua te nau tafoki ka nau moʻui.’ Naʻe mamata ʻa ʻAisea ʻi he vīsone ki he fakamaauʻanga fakahēvani ʻo Sihová, kau ai mo Sīsū ʻi hono lāngilangi ki muʻa ke tangatá fakataha mo Sihova. Ka, ko e kau Siú, ʻi hono fakahoko ʻo ia naʻe tohi ʻe ʻAiseá, naʻa nau loto-fefeka ʻo talitekeʻi ʻa e fakamoʻoni ko e Tokotaha ʻeni ko honau Fakahaofi naʻe talaʻofá.

ʻI he tafaʻaki ʻe tahá, naʻa mo e tokolahi ʻo e kau pulé (ʻoku hā mahino ko e ngaahi mēmipa ʻo e fakamaauʻanga māʻolunga ʻa e kau Siú, ʻa ia ko e Sanitalimí) naʻa nau tui kia Sīsū. Ko Nikotīmasi mo Siosefa ʻo ʻAlemateá ko e toko ua ia ʻo e kau pule ko ʻení. Ka ko e kau pulé, he taimi ko ení, naʻe ʻikai te nau fakahā ʻa ʻenau tui, ko ʻenau manavahē ki hano kapusi kinautolu mei honau ngaahi tuʻunga ʻi he sinakoké. Ko e mole lahi ē ki he faʻahinga peheé!

Naʻe hoko atu ʻe Sīsū: “Ko ia ʻoku ne tui pikitai kiate au, ʻoku ʻikai ko au ʻoku ne tui ki ai, ka ko ia naʻa ne fekau mai au. Pea ko ia ʻoku ne siofia au, ʻoku ne siofia ʻa ia naʻa ne fekau mai au . . . Pea ka ai ha taha ne fanongo ki heʻeku ngaahi lea, ka kuo ʻikai lehilehiʻi, ʻoku ʻikai te u fakamāuʻi ia ʻe au: he naʻe ʻikai te u haʻu ke fakamāuʻi ʻa māmani, ka ke fakamoʻui ʻa māmani. . . . Ko e tokāteline kuo u lea ʻaki, ko e meʻa ia te ne fakamāu ʻa e tangata ko ia ʻi he ʻaho fakamui.”

Ko e ʻofa ʻa Sihova ki he faʻahinga ʻo e tangatá naʻá ne ueʻi ia ke ne fekau mai ʻa Sīsū koeʻuhi ko kinautolu ʻoku nau tui kiate iá ke nau hao moʻui atu nai. ʻE fakatuʻunga ʻa e hao ʻa e kakaí mei haʻanau talangofua ki he ngaahi meʻa kuo fekau ʻe he ʻOtuá kia Sīsū ke ne leaʻakí. Ko e fakamaaú ʻe fai ia ʻi he “ʻaho fakamui,” he lolotonga ʻa e Pule Taʻu Taha Afe ʻa Kalaisí.

Naʻe fakaʻosiʻaki ʻe Sīsū ʻene pehē: “Koeʻuhi naʻe ʻikai meiate au ʻeku lea; ka ko e Tamai naʻa ne fekau mai au, naʻe fai mai ʻe ia hoku tuʻutuʻuni ki he meʻa te u tala mo e lea te u fai. Pea ʻoku ou ʻilo ko ʻene tuʻutuʻuni ko e koto moʻui taʻengata ia: ko ia ko e ngaahi lea ʻoku ou fai ʻe au, hangē tofu pe hono folofolaʻaki mai ʻe he Tamai kiate au, ʻoku pehē ʻeku lea ʻaki.” Sione 12:​28-50; 19:​38, 39; Mātiu 3:17; 17:5; ʻAisea 6:​1, 8-10.

◆ Ko e hā ʻa e tuʻunga ʻe tolu naʻe ongona ai ʻa e leʻo ʻo e ʻOtuá ʻo fekauʻaki mo Sīsū?

◆ Naʻe anga-fēfē ʻa e sio ʻa e palōfita ko ʻAiseá ki he lāngilangi ʻo Sīsuú?

◆ Ko hai ʻa e kau pule naʻa nau tui kia Sīsū, ka ko e hā naʻe ʻikai te nau fakahā ai ia?

◆ Ko e hā ʻa e “ʻaho fakamui,” pea ʻe fakamaauʻi mei he hā ʻa e kakaí?