ʻUhinga ʻOku ‘Hokohoko Atu Ai ʻEtau Fua Lahí’

1, 2. (a) Ko e hā naʻe lāulea ki ai ʻa Sīsū mo ʻene kau ākongá ʻi he pō ki muʻa ke ne pekiá? (Sio ki he ʻuluaki fakatātā ʻi he kupú ni.) (e) Ko e hā ʻoku mahuʻinga ai ke tau manatuʻi ʻa e ʻuhinga ʻoku tau malanga aí? (f) Ko e hā te tau lāulea ki aí?

ʻI HE pō ki muʻa ke ne pekiá, naʻe talanoa fuoloa ai ʻa Sīsū mo ʻene kau ʻapositoló. Naʻá ne fakapapauʻi ange ʻokú ne ʻofa lahi ʻaupito ʻiate kinautolu. Naʻá ne toe fai ange foki ʻa e talanoa fakatātā fekauʻaki mo e fuʻu kālepí, ʻa ia naʻa tau lāulea ki ai ʻi he kupu ki muʻá. Naʻe loto ʻa Sīsū ke fakalototoʻaʻi ʻene kau ākongá ke ‘hokohoko atu ʻenau fua lahí,’ ʻa ia, ke nau kātaki ʻi hono malangaʻi ʻa e pōpoaki fekauʻaki mo e Puleʻangá.​—Sione 15:8.

² Kae kehe, naʻe ʻikai ke tala pē ʻe Sīsū ki heʻene kau ākongá ʻa e meʻa naʻe fiemaʻu ke nau faí kae toe pehē foki ki he ʻuhinga naʻe fiemaʻu ai ke nau fai iá. Naʻá ne ʻoange kiate kinautolu ʻa e ngaahi ʻuhinga naʻe fiemaʻu ai ke hokohoko atu ʻenau malangá. ʻOku mahuʻinga ke tau manatuʻi ʻa e ʻuhinga ʻoku fiemaʻu foki ai ke hokohoko atu ʻetau malangá. Ko e fakakaukau fekauʻaki mo ení ʻe ueʻi ai kitautolu ke tau kātaki lolotonga ʻetau fai “ha fakamoʻoni ki he ngaahi puleʻanga kotoa pē.” (Māt. 24:13, 14) ʻI he kupu ko ení, te tau lāulea ai ki he ʻuhinga Fakatohitapu ʻe fā ʻoku tau malanga aí. ʻIkai ko ia pē, te tau lāulea ki he meʻaʻofa ʻe fā meia Sihova ʻokú ne tokoniʻi kitautolu ke hokohoko atu ʻetau fua lahí.

 3. (a) Fakatatau ki he Sione 15:8, ko e hā ʻa e ʻuhinga mahuʻinga taha ʻoku tau malanga aí? (e) Ko e hā ʻoku fakafofongaʻi ʻe he ngaahi foʻi kālepi ʻi he talanoa fakatātā ʻa Sīsuú, pea ko e hā ʻoku feʻungamālie ai ʻa e fakahoa ko ení?

³ Ko e ʻuhinga mahuʻinga taha ʻoku tau malanga aí he ʻoku tau loto ke fakalāngilangiʻi ʻa Sihova pea fakamāʻoniʻoniʻi ʻa hono huafá. (Lau ʻa e Sione 15:1, 8.) ʻI hono fai ʻe Sīsū ʻa e talanoa fakatātā ki he fuʻu kālepí, naʻá ne fakahoa ʻa Sihova ki ha tauhi ngoue, pe tokotaha ngoue, ʻoku tō kālepi. Naʻe pehē ʻe Sīsū ko ia ʻa e fuʻu kālepí pea ko hono kau muimuí ʻa e ngaahi vaʻá. (Sione 15:5) Ko ia ai, ʻi he talanoa fakatātaá, ʻoku fakafofongaʻi ʻe he ngaahi foʻi kālepí ʻa e fua ʻoku ʻomai ʻe he kau ākonga ʻa Sīsuú, pe ko e ngāue fakamalanga ʻoku nau faí. Naʻe tala ʻe Sīsū ki heʻene kau ʻapositoló: “ʻOku fakalāngilangiʻi ʻa ʻeku Tamaí ʻi he meʻá ni, ʻi he hokohoko atu hoʻomou fua lahí.” ʻI hono ʻomai ʻi he fuʻu kālepí ʻa e ngaahi foʻi kālepi leleí, ʻoku ʻoatu ai ʻa e lāngilangi ki he tauhi ngoué. ʻI ha founga meimei tatau, ʻi heʻetau fai hotau lelei tahá ʻi hono malangaʻi ʻa e pōpoaki fekauʻaki mo e Puleʻangá, ʻoku tau ʻoatu ai ʻa e ngeia, pe lāngilangi, kia Sihova.​—Māt. 25:20-23.

 4. (a) ʻOku anga-fēfē ʻetau fakamāʻoniʻoniʻi ʻa e huafa ʻo e ʻOtuá? (e) ʻOku anga-fēfē hoʻo ongoʻi fekauʻaki mo hono maʻu ʻa e monū ke fakamāʻoniʻoniʻi ʻa e huafa ʻo e ʻOtuá?

⁴ ʻOku ʻosi māʻoniʻoni pē ʻa e huafa ia ʻo e ʻOtuá. ʻOku ʻikai ha meʻa ʻe lava ke tau fai ke ʻai ai ia ke toe māʻoniʻoni lahi ange. Ko ia ʻoku anga-fēfē ʻetau fakamāʻoniʻoniʻi ʻa e huafa ʻo e ʻOtuá ʻi he taimi ʻoku tau malanga aí? Fakatokangaʻi ʻa e meʻa naʻe leaʻaki ʻe he palōfita ko ʻAiseá: “Ko Sihova ʻo e ngaahi kau taú​—ko ia ʻa e Tokotaha ʻoku totonu ke mou lau ʻoku māʻoniʻoní.” (ʻAi. 8:13) ʻOku tau fakamāʻoniʻoniʻi ʻa e huafa ʻo e ʻOtuá, ʻa e Sihová, ʻi he taimi ʻoku tau fakakaukau ai ko e huafa māʻolunga taha ia ʻi he ngaahi hingoa kotoa pē pea ʻi he taimi ʻoku tau tokoniʻi ai ʻa e niʻihi kehé ke nau mahinoʻi ʻoku māʻoniʻoni iá. (Māt. 6:9) Ko e fakatātaá, ʻi heʻetau akoʻi ki he kakaí ʻa e moʻoni fekauʻaki mo e ngaahi ʻulungaanga fisifisimuʻa ʻo Sihová mo ʻene taumuʻa ke moʻui taʻengata ʻa e faʻahinga ʻo e tangatá ʻi Palataisí, ʻoku tau tokoniʻi ai kinautolu ke nau ʻiloʻi ko e ngaahi meʻa kovi kotoa naʻe leaʻaki ʻe Sētane fekauʻaki mo Sihová ko e ngaahi foʻi loi. (Sēn. 3:1-5) ʻOku tau toe fakamāʻoniʻoniʻi ʻa e huafa ʻo e ʻOtuá ʻi he taimi ʻoku tau tokoniʻi ai ʻa e kakaí ke nau ʻiloʻi ʻoku taau mo Sihova ke ne “maʻu ʻa e ngeiá mo e lāngilangí pea mo e mālohí.” (Fkh. 4:11) Ko Rune, ʻa ia kuó ne tāimuʻa ʻi he taʻu ʻe 16, ʻokú ne pehē: “ʻI hono ʻiloʻi kuo ʻomai kiate au ʻa e faingamālie ke u hoko ko ha fakamoʻoni maʻá e Tokotaha-Fakatupu ʻo e ʻunivēsí ʻokú ne ʻai au ke u houngaʻia. ʻOkú ne ʻomai kiate au ha holi ke hokohoko atu ʻeku malangá.”

 5. (a) Ko e hā ʻa e ʻuhinga ki hono fai ʻo e malangá ʻoku fakahaaʻi ʻi he Sione 15:9, 10? (e) Naʻe anga-fēfē hono tokoniʻi ʻe Sīsū ʻene kau ākongá ke nau mahinoʻi ʻe fiemaʻu ke nau kātakí?

⁵ Lau ʻa e Sione 15:9, 10. Ko e ʻuhinga hono ua ʻoku tau malangaʻi ai ʻa e pōpoaki fekauʻaki mo e Puleʻangá he ʻoku tau ʻofa ʻia Sihova mo Sīsū. (Mk. 12:30; Sione 14:15) Naʻe tala ʻe Sīsū ki heʻene kau ākongá ʻoku totonu ke nau ‘nofo maʻu ʻi heʻene ʻofá.’ Ko e hā naʻe leaʻaki ai eni ʻe Sīsuú? Koeʻuhí naʻá ne ʻiloʻi ʻe fiemaʻu ki hono kau muimuí ʻa e kātakí ke nau moʻui ʻi he tuʻunga ko e kau Kalisitiane moʻoni. Ko hono moʻoní, ʻi he Sione 15:4-10, ʻoku tau ʻiloʻi naʻe ngāueʻaki tuʻo lahi ai ʻe Sīsū ʻa e lea ko e “nofo maʻu” ke tokoniʻi ʻene kau ākongá ke nau mahinoʻi ʻe fiemaʻu ke nau kātaki.

 6. ʻOku anga-fēfē ʻetau fakahāhā ʻoku tau loto ke nofo maʻu ʻi he ʻofa ʻa Kalaisí?

⁶ ʻOku anga-fēfē ʻetau fakahāhā ʻoku tau loto ke nofo maʻu ʻi he ʻofa ʻa Kalaisí pea maʻu ʻene hōifuá? ʻAki ʻa e talangofua kiate ia. ʻOku fiemaʻu mai pē ʻe Sīsū ke tau fai ʻa e meʻa naʻá ne faí. Naʻá ne pehē: “[Kuó u] tauhi ʻa e ngaahi fekau ʻa e Tamaí mo nofo maʻu ʻi heʻene ʻofá.” Kuo fokotuʻu mai ʻe Sīsū ʻa e faʻifaʻitakiʻangá kiate kitautolu.​—Sione 13:15.

 7. ʻOku anga-fēfē ʻa e fehokotaki ʻa e talangofuá mo e ʻofá?

⁷ Naʻe ʻai ʻe Sīsū ke mahino ko e talangofuá ʻoku fehokotaki ia mo e ʻofá ʻi heʻene pehē: “ʻIlonga ʻa ia ʻokú ne maʻu ʻeku ngaahi fekaú mo tauhi iá ko e tokotaha ia ʻoku ʻofa ʻiate aú.” (Sione 14:21) Ko e ngaahi fekau ʻa Sīsuú ko e haʻu mei heʻene Tamaí, ko ia ʻi he taimi ʻoku tau talangofua ai ki he fekau ʻa Sīsū ke malangá, ʻoku tau toe fakahāhā ai ʻoku tau ʻofa ʻia Sihova. (Māt. 17:5; Sione 8:28) Pea ʻi he taimi ʻoku tau fakahāhā ai kia Sihova mo Sīsū ʻoku tau ʻofa ʻiate kinauá, ʻokú na tauhi kitautolu ʻi heʻena ʻofá.

8, 9. (a) Ko e hā ʻa e toe ʻuhinga ʻe taha ʻoku tau malanga aí? (e) ʻOku anga-fēfē hono ueʻi kitautolu ʻe he lea ʻa Sihova ʻi he ʻIsikeli 3:18, 19 mo e 18:23 ke hokohoko atu ʻetau malangá?

⁸ Ko e ʻuhinga hono tolu ʻoku tau malanga aí he ʻoku tau loto ke fakatokanga ki he niʻihi kehé fekauʻaki mo e ʻaho ʻo Sihova ka hoko maí. ʻI he Tohi Tapú, ʻoku fakamatalaʻi ai ʻa Noa ko ha ‘tokotaha malanga.’ (Lau ʻa e 2 Pita 2:5.) Ki muʻa ke hoko mai ʻa e Lōmakí, ko e pōpoaki ʻa Noa ki he kakaí kuo pau pē naʻe kau ai ha fakatokanga fekauʻaki mo e fakaʻauha ka hoko maí. Ko e hā ʻoku tau leaʻaki ai iá? Koeʻuhí naʻe pehē ʻe Sīsū: “Hangē ko e ngaahi ʻaho ko ia ki muʻa ʻi he Lōmakí, ko e kakaí naʻa nau kai mo inu, mali ʻa e kakai tangatá pea foaki atu ʻa e kakai fefiné ʻi he mali, kae ʻoua kuo aʻu ki he ʻaho naʻe hū ai ʻa Noa ki he ʻaʻaké, pea naʻe ʻikai te nau tokanga kae ʻoua kuo hoko mai ʻa e Lōmakí ʻo tafiʻi kotoa atu kinautolu, ʻe pehē pē ʻa e ʻi heni ʻa e Foha ʻo e tangatá.” (Māt. 24:38, 39) Neongo ko e tokolahi taha ʻo e kakaí naʻa nau tukunoaʻi ʻa Noa, naʻá ne malangaʻi faitōnunga ʻa e pōpoaki fakaefakatokanga naʻe ʻoange ʻe Sihova kiate iá.

⁹ ʻI he ʻahó ni, ʻoku tau malangaʻi ʻa e pōpoaki fekauʻaki mo e Puleʻangá ke ʻoatu ki he kakaí ha faingamālie ke nau ʻilo fekauʻaki mo e meʻa ʻe fai ʻe he ʻOtuá ki he faʻahinga ʻo e tangatá ʻi he kahaʻú. ʻI he hangē ko Sihová, ʻoku tau loto moʻoni ke tokanga ʻa e kakaí ki he pōpoakí pea nau “moʻui atu ai pē.” (ʻIsi. 18:23) ʻI heʻetau malanga mei he fale ki he falé pea ʻi he ngaahi feituʻu kakaí, ʻoku tau fakatokanga ai ki he kakai tokolahi taha ʻoku ala lavá ʻe hoko mai ʻa e Puleʻanga ʻo e ʻOtuá ʻo fakaʻauha ʻa e māmani fulikivanu ko ení.​—ʻIsi. 3:18, 19; Tan. 2:44; Fkh. 14:6, 7.

10. (a) Ko e hā ʻa e ʻuhinga ki he malangá ʻoku fakahaaʻi ʻi he Mātiu 22:39? (e) Naʻe anga-fēfē hono tokoniʻi ʻe Paula mo Sailosi ha kaʻate ʻi he pilīsone ʻi Filipaí?

¹⁰ Ko e ʻuhinga hono fā ʻoku hokohoko atu ai ʻetau malangá he ʻoku tau ʻofa ʻi he kakaí. (Māt. 22:39) Ko e ʻofá ni ʻoku tokoniʻi ai kitautolu ke hokohoko atu ʻetau malangá he ʻoku tau ʻiloʻi ʻe liliu nai ʻa e fakakaukau ʻa e kakaí ʻi he taimi ʻoku liliu ai honau ngaahi tuʻungá. Ko e fakatātaá, naʻe lī ʻe he kau fakafepakí ʻa Paula mo Sailosi ki he pilīsoné ʻi he kolo ko Filipaí. Ka ʻi he tuʻapoó, naʻe luluʻi ai ʻe ha mofuike ʻa e pilīsoné pea ava ai hono ngaahi matapaá. Naʻe mātuʻaki ilifia ʻa e kaʻate ʻo e pilīsoné naʻa kuo hola ʻa e kau pōpulá ʻo ne loto ai ke ne tāmateʻi ʻa ia tonu. Ka naʻe taʻofi ia ʻe Paula ʻo ne kaila: “ʻOua te ke fai ha meʻa kiate koe!” Naʻe ʻeke ange ʻe he kaʻaté: “Ko e hā kuo pau ke u fai ke fakahaofi ai aú?” Naʻe tala ange ʻe Paula mo Sailosi kiate ia: “Tui ki he ʻEiki ko Sīsuú, pea ʻe fakahaofi koe.”​—Ngā. 16:25-34.

11, 12. (a) Ko e hā ʻoku akoʻi mai ʻe he talanoa fekauʻaki mo e kaʻate ʻo e pilīsoné ʻo fekauʻaki mo ʻetau ngāue fakafaifekaú? (e) Ko e hā ʻoku tau loto ai ke hokohoko atu ʻetau malangá?

¹¹ Ko e hā ʻoku akoʻi mai ʻe he talanoa fekauʻaki mo e kaʻate ʻo e pilīsoné ʻo fekauʻaki mo e ngāue fakamalangá? Fakatokangaʻi naʻe toki liliu pē ʻa e fakakaukau ʻa e kaʻate ʻo e pilīsoné ʻi he hili ʻa e mofuiké peá ne kole ai ki ha tokoni. ʻI ha founga meimei tatau, ko e kakai ʻe niʻihi ʻoku ʻikai te nau fiefanongo ki he pōpoaki ʻa e Tohi Tapú ʻe liliu nai ʻenau fakakaukaú pea nau kumi ki ha tokoni ʻi he taimi ʻoku hoko ai ha meʻa fakamamahi ʻi heʻenau moʻuí. Ko e fakatātaá, ʻe ʻohovale nai ʻa e niʻihi koeʻuhi ko e mole ʻa ʻenau ngāué pe ko e vete mali. ʻOku loto-mamahi lahi nai ʻa e niʻihi koeʻuhi ko ʻenau ʻiloʻi ʻoku nau puke lahi pe koeʻuhí ko e mate ʻa ha tokotaha ʻoku nau vāofi mo ia. ʻI he hoko ʻa e ngaahi meʻa peheé, ʻe kamata nai ai ke ʻeke ʻe he kakaí ha ngaahi fehuʻi fekauʻaki mo e moʻuí, ko e ngaahi fehuʻi naʻe ʻikai te nau fakakaukau ki ai ki muʻa. ʻE aʻu nai ʻo nau fifili, ‘Ko e hā kuo pau ke u fai ke fakahaofi ai aú?’ Te nau fiefanongo nai ai ki heʻetau pōpoaki ʻo e ʻamanakí ko e ʻuluaki taimi ia ʻi heʻenau moʻuí.

¹² Ko ia kapau ʻoku hokohoko atu faitōnunga ʻetau malangá, te tau faingamālie ai ʻi he taimi ʻoku mateuteu ai ʻa e kakaí ke tali ʻa e fakafiemālie ʻoku tau ʻoatú. (ʻAi. 61:1) Ko Charlotte, ʻa ia kuó ne tāimuʻa ʻi he taʻu ʻe 38, ʻokú ne pehē: “Ko e kakai ʻi he ʻaho ní ʻoku nau hē. ʻOku nau fiemaʻu ha faingamālie ke fanongo ai ki he ongoongo leleí.” Ko Ejvor, ʻa ia kuó ne tāimuʻa ʻi he taʻu ʻe 34, ʻokú ne pehē: “ʻI he ʻahó ni, ʻo laka ange ia ʻi ha toe taimi, ʻoku ongoʻi tōlalo fakaeongo ai ʻa e kakai tokolahi. ʻOku ou loto moʻoni ke tokoniʻi kinautolu. ʻOku ueʻi au ʻe he meʻa ko iá ke u malanga.” ʻOku hā mahino, ko e ʻofa ki he kakaí ko ha ʻuhinga lelei ʻaupito ia ke hokohoko atu ai ʻa e malangá!

13, 14. (a) Ko e hā ʻa e meʻaʻofa ʻoku lave ki ai ʻi he Sione 15:11? (e) ʻE lava fēfē ke tau maʻu ʻa e fiefia ʻoku maʻu ʻe Sīsuú? (f) ʻOku anga-fēfē hono tokoniʻi kitautolu ʻe he fiefiá ʻi heʻetau ngāue fakafaifekaú?

¹³ Lolotonga ʻa e pō ki muʻa ke ne pekiá, naʻe toe lave ai ʻa Sīsū ki he ngaahi meʻaʻofa ʻe tokoniʻi ai ʻene kau ʻapositoló ke hokohoko atu ʻenau laku fuá. Ko e hā ʻa e ngaahi meʻaʻofa ko ení, pea ʻe lava fēfē ke ne tokoniʻi kitautolu ʻi he ʻahó ni?

¹⁴ Meʻaʻofa ko e fiefia. ʻOku fakakavenga kiate kitautolu ʻa e malangá? ʻIkai ʻaupito. Hili hono fai ʻe Sīsū ʻa e talanoa fakatātā fekauʻaki mo e fuʻu kālepí, naʻá ne pehē ʻi he taimi ʻoku tau malanga aí te tau maʻu ʻa ʻene fiefiá. (Lau ʻa e Sione 15:11.) ʻOku malava fēfē ke hoko ia? Manatuʻi, ʻi he talanoa fakatātā ʻa Sīsuú, naʻá ne fakahoa ai ia ki ha fuʻu kālepi pea ko ʻene kau ākongá ki he ngaahi vaʻá. ʻE maʻu ʻe he ngaahi vaʻá ʻa e vai mo e ivi ʻoku nau fiemaʻú ʻo kapau pē te nau pipiki maʻu ki he fuʻu kālepí. ʻI ha founga meimei tatau, ʻe lava ke tau fiefia ʻo hangē ko Sīsuú ʻo kapau pē te tau nofoʻaki fāʻūtaha mo ia pea muimui ofi ʻi hono topuvaʻé. Te tau toki maʻu leva ai ʻa e fiefia naʻá ne maʻú, ko e fiefia ʻoku hoko ʻi hono fai ʻa e finangalo ʻo e ʻOtuá. (Sione 4:34; 17:13; 1 Pita 2:21) Ko Hanne, ʻa ia kuó ne tāimuʻa ʻo laka hake ʻi he taʻu ʻe 40, ʻokú ne pehē, “Ko e fiefia ʻoku ou ongoʻi maʻu pē hili ʻeku kau ʻi he ngāue fakafaifekaú ʻokú ne ueʻi au ke u hokohoko atu ʻi he ngāue ʻa Sihová.” Ko e fiefiá ʻokú ne ʻomai kiate kitautolu ʻa e mālohi ke hokohoko atu ai ʻa e malangá naʻa mo e taimi ʻoku ʻikai ke fanongo ai ʻa e tokolahi taha ʻo e kakaí.​—Māt. 5:10-12.

15. (a) Ko e hā ʻa e meʻaʻofa ʻoku lave ki ai ʻi he Sione 14:27? (e) ʻOku anga-fēfē hono tokoniʻi kitautolu ʻe he nongá ke hokohoko atu ʻetau laku fuá?

¹⁵ Meʻaʻofa ko e nonga. (Lau ʻa e Sione 14:27.) Lolotonga ʻa e efiafi ki muʻa pea pekia ʻa Sīsuú, naʻá ne tala ai ki heʻene kau ʻapositoló: “ʻOku ou foaki atu kiate kimoutolu ʻeku nongá.” ʻE lava fēfē ke tokoniʻi kitautolu ʻe he nonga ʻa Sīsuú ke hokohoko atu ʻetau malangá? ʻI he taimi ʻoku hokohoko atu ai ʻetau malangá, ʻoku tau ongoʻi nonga koeʻuhí ʻoku tau ʻiloʻi ʻoku tau ʻai ʻa Sihova mo Sīsū ke na fiefia. (Saame 149:4; Loma 5:3, 4; Kol. 3:15) Ko Ulf, ʻa ia kuó ne tāimuʻa ʻi he taʻu ʻe 45, ʻokú ne pehē, “Ko e ngāue fakamalangá ʻokú ne ʻai au ke u helaʻia, ka ʻokú ne ʻomai ʻa e fiemālie moʻoni mo e ʻuhinga moʻoni ki heʻeku moʻuí.” ʻOku tau houngaʻia ʻi heʻetau maʻu ʻa e nonga ʻoku tuʻuloá!

16. (a) Ko e hā ʻa e meʻaʻofa ʻoku fakahaaʻi ʻi he Sione 15:15? (e) Naʻe malava fēfē ke kei hoko ai pē ʻa e kau ʻapositoló ko e ngaahi kaumeʻa ʻo Sīsū?

¹⁶ Meʻaʻofa ko e kaumeʻa. Hili hono tala ʻe Sīsū ki heʻene kau ʻapositoló ʻokú ne loto ke nau fiefiá, naʻá ne fakamatalaʻi ʻa e ʻuhinga ʻoku mahuʻinga ai ke nau fakahāhā ʻa e ʻofa taʻesiokitá. (Sione 15:11-13) Naʻá ne pehē ange leva: “Kuó u ui kimoutolu ko e ngaahi kaumeʻa.” He meʻaʻofa mahuʻinga moʻoni ʻa e hoko ko e kaumeʻa ʻo Sīsuú! Ka naʻe malava fēfē ke kei hoko ai pē ʻa e kau ʻapositoló ko hono ngaahi kaumeʻa? Naʻe fakamatala ʻa Sīsū: “Hokohoko atu ai pē hoʻomou fuá.” (Lau ʻa e Sione 15:14-16.) ʻI hono fakalea ʻe tahá, ko e hokohoko atu ʻa e malangá. ʻI he taʻu nai ʻe ua ki muʻa ai, naʻe tala ʻe Sīsū ki heʻene kau ʻapositoló: “ʻI hoʻomou ʻalú, mou malanga ʻo pehē: ‘Kuo ofi ʻa e Puleʻanga ʻo hēvaní.’” (Māt. 10:7) Ko e ʻuhinga ia naʻe fakalototoʻaʻi ai ʻe Sīsū ʻa ʻene kau ākongá ʻi he pō ki muʻa ke ne pekiá, ke nau kātaki ʻi he ngāue fakamalangá. (Māt. 24:13; Mk. 3:14) Ko e moʻoni, naʻe ʻiloʻi ʻe Sīsū heʻikai ke faingofua ʻa hono fakahoko ʻa ʻene fekaú. Ka naʻe malava ke nau fai ia pea kei hoko ai pē ko hono ngaahi kaumeʻa. Anga-fēfē? ʻI he tokoni ʻa ha toe meʻaʻofa ʻe taha.

17, 18. (a) Ko e hā ʻa e meʻaʻofa ʻoku fakahaaʻi ʻi he Sione 15:7? (e) Naʻe anga-fēfē hono tokoniʻi ʻe he meʻaʻofa ko iá ʻa e kau ākonga ʻa Sīsuú? (f) Ko e hā ʻa e ngaahi meʻaʻofa ʻokú ne tokoniʻi kitautolu ʻi he ʻaho ní?

¹⁷ Meʻaʻofa ko e tali ʻo ʻetau ngaahi lotú. Naʻe pehē ʻe Sīsū: “Mou kole ki ha meʻa pē ʻoku mou fiemaʻu pea ʻe foaki atu ia kiate kimoutolu.” (Sione 15:7, 16) Ko e talaʻofa ʻa Sīsuú kuo pau pē naʻe fakaivimālohiʻi moʻoni ai ʻa e kau ʻapositoló!a (Sio ki he fakamatala ʻi lalo.) Naʻe ʻikai ke mahinoʻi kakato ʻe he kau ʻapositoló ʻe vave ʻa e pekia ʻa Sīsuú. Ka ko ʻene pekiá heʻikai ke ʻuhinga ai iá heʻikai ke ʻi ai hanau tokoni. Naʻe mateuteu ʻa Sihova ke tali ʻenau ngaahi lotú pea tokoniʻi kinautolu ʻi heʻenau ngāue fakamalangá. Pea naʻá ne fai ʻa e meʻa tofu pē ko iá. ʻI he hili pē ʻa e pekia ʻa Sīsuú, naʻe kōlenga ʻa e kau ʻapositoló kia Sihova ke ne ʻoange kiate kinautolu ha loto-toʻa, pea naʻe tali ʻe Sihova ʻenau ngaahi lotú.​—Ngā. 4:29, 31.

¹⁸ ʻOku hoko ʻa e meʻa tatau ʻi he ʻahó ni. ʻI he taimi ʻoku tau kātaki ai ʻi he ngāue fakamalangá, ʻoku tau kei hoko ai pē ko e ngaahi kaumeʻa ʻo Sīsū. Pea ʻoku lava ke tau fakapapauʻi ʻoku mateuteu ʻa Sihova ke tali ʻetau ngaahi lotu ʻo kole ha tokoní ʻi he taimi ʻoku tau faingataʻaʻia ai ʻi he malangá. (Fil. 4:13) ʻOku tau houngaʻia lahi ʻi hono tali ʻe Sihova ʻetau ngaahi lotú pea mo ʻetau kaumeʻa mo Sīsuú. Ko e ngaahi meʻaʻofa ko eni meia Sihová ʻokú ne fakaivimālohiʻi kitautolu ke hokohoko atu ʻetau laku fuá.​—Sēm. 1:17.

19. (a) Ko e hā ʻoku hokohoko atu ai ʻetau malangá? (e) Ko e hā ʻokú ne tokoniʻi kitautolu ke fakaʻosi ʻa e ngāue kuo ʻomai kiate kitautolu ʻe he ʻOtuá?

¹⁹ ʻI he kupu ko ení, kuo tau ako ai fekauʻaki mo e ʻuhinga ʻe fā ʻoku hokohoko atu ai ʻetau malangá: Ke fakalāngilangiʻi ʻa Sihova mo fakamāʻoniʻoniʻi ʻa hono huafá, ke fakahāhā ʻetau ʻofa kia Sihova mo Sīsuú, ke fakatokanga ki he kakaí, pea ke fakahāhā ʻoku tau ʻofa ʻi he kakaí. Kuo tau toe ako foki fekauʻaki mo e meʻaʻofa ʻe fā: Ko e fiefia, melino, kaumeʻa, mo e tali ʻo ʻetau ngaahi lotú. Ko e ngaahi meʻaʻofa ko ení ʻokú ne fakaivimālohiʻi kitautolu ke fakaʻosi ʻa e ngāue kuo ʻomai ʻe he ʻOtuá ke tau faí. ʻOku fiefia lahi ʻa Sihova ʻi heʻene vakai mai ʻoku tau ngāue mālohi ke ‘hokohoko atu ʻetau fua lahí’!