Fakahaʻele Faʻahikehé pea mo e Kumi ki he Tuʻunga Fakalaumālie Moʻoní

KĀTOA kitautolu ʻoku tau maʻu ʻa e ngaahi fiemaʻu fakalaumālie pea pehē ki he fakamatelie. Ko e ʻuhinga ia ʻoku ʻeke ai ʻe he fuʻu tokolahi ʻa e ngaahi fehuʻi hangē ko ení, Ko e hā ʻa e taumuʻa ʻo e moʻuí, ko e hā ʻoku faingataʻaʻia ai ʻa e kakaí, pea ko e hā ʻoku hoko kiate kitautolu ʻi he taimi ʻoku tau mate aí? ʻOku fekumi ʻa e kakai loto-moʻoni tokolahi ki ha ngaahi tali ki he ngaahi fehuʻí ni pea mo e ngaahi fehuʻi meimei tatau ʻi he ngaahi fakatahaʻanga uiui-tēvoló, ʻa ia ʻoku nau talatala ai ki he kau fetuʻutakí (ʻoku toe ui ko e ngaahi fouʻanga), ʻi he ʻamanaki ke fetuʻutaki mo e ngaahi laumālie ʻo e kau maté. ʻOku ui ʻa e tōʻonga ko ʻení ko e fakahaʻele faʻahikehe.

Ko e kau poupou ʻo e fakahaʻele faʻahikehé ʻoku maʻu ia ʻi he ngaahi fonua lahi, pea ʻoku nau fakatahataha ʻi he ngaahi fakatahaʻanga mo e ngaahi siasi. Ko e fakatātaá, ʻi Pelēsila, ʻoku fakafuofua ki he kau faifakahaʻele faʻahikehe ʻe toko 4,000,000 ʻoku nau muimui ki he ngaahi akonaki naʻe fokotuʻutuʻu ʻe Hyppolyte Léon Denizard Rivail, ko ha poto mataotao mo filōsefa Falanisē ʻa ia naʻá ne tohi ʻi he malumalu ʻo e hingoa ko e Allan Kardec. Naʻe ʻuluaki hoko ʻa Kardec ʻo mahuʻingaʻia ʻi he faifakahaʻele faʻahikehé ʻi he 1854. Naʻá ne ʻoatu ki mui ai ha ngaahi fehuʻi ki he kau fetuʻutakí ʻi he ngaahi feituʻu lahi pea hiki ʻa e ngaahi talí ʻi he The Book of Spirits, naʻe pulusi ʻi he 1857. Ko e toe ongo tohi ʻe ua naʻá ne tohí ko e The Mediums’ Book pea mo e The Gospel According to Spiritism.

Kuo fekauʻaki ʻa e fakahaʻele faʻahikehé mo e ngaahi tōʻonga fakalotu hangē ko e vūtuú, fakafaʻahikehé, mēsikí, pe lotu faka-Sētané. Kae kehe, ko e faʻahinga ʻoku nau muimui ʻi he ngaahi akonaki ʻa Allan Kardec ʻoku nau pehē ʻoku kehe ʻenau tuí ʻa kinautolu. Ko ʻenau ngaahi tohí ʻoku nau faʻa hiki-lea mei he Tohitapú, pea ʻoku nau lave kia Sīsū ko e “tataki mo e faʻifaʻitakiʻanga ia ki he kotoa ʻo e faʻahinga ʻo e tangatá.” ʻOku nau pehē ko e ngaahi akonaki ʻa Sīsuú “ko e fakahaaʻi haohaoa taha ia ʻo e lao fakaʻotuá.” Naʻe vakai ʻa Allan Kardec ki he ngaahi tohi ki he tui fakaefakahaʻele faʻahikehé ko e meʻa fakahā hono tolu ia ʻo e lao ʻa e ʻOtuá ki he faʻahinga ʻo e tangatá, ko e ongo ʻuluaki meʻa fakahaá ko e ngaahi akonaki ia ʻa Mōsesé mo e ngaahi akonaki ʻa Sīsuú.

ʻOku tohoakiʻi ʻe he fakahaʻele faʻahikehé ʻa e tokolahi koeʻuhi ʻokú ne fakaeʻa ʻa e ʻofa fakakaungāʻapí mo e ngaahi ngāue ʻofá. Ko e tui ʻeni ʻa e tokotaha tui fakaefakahaʻele faʻahikehe ʻe taha: “Ka ʻikai ha ngāue ʻofa ʻoku ʻikai ha fakamoʻui.” ʻOku longomoʻui ʻa e kau tui fakaefakahaʻele faʻahikehe tokolahi ʻi he ngāue fakasōsialé, ko hono fokotuʻu ʻa e ngaahi falemahaki, ngaahi ʻapiako, mo e ngaahi langa kehe. ʻOku taau ke fakaongoongoleleiʻi ʻa e ngaahi feinga peheé. Ka neongo ia, ʻoku anga-fēfē hono fakahoa ʻa e ngaahi tui ʻa e kau fakahaʻele faʻahikehé ki he ngaahi akonaki ʻa Sīsuú ʻo hangē ko ia ʻoku hiki ʻi he Tohitapú? Tau sio angé ki ha fakatātā ʻe ua: ko e ʻamanaki ki he kau maté pea mo e ʻuhinga ki he faingataʻaʻiá.

Ko e Hā ʻa e ʻAmanaki ki he Kau Maté?

ʻOku tui ʻa e kau tui fakaefakahaʻele faʻahikehe tokolahi ki he fanauʻi sino foʻoú. ʻOku pehē ʻe he tohi ʻa e tokotaha tui fakahaʻele faʻahikehe ʻe taha: “Ko e fanauʻi sino foʻoú ʻa e tokāteline pē taha ʻokú ne fakafiemālieʻi ʻetau fakakaukau atu ki he fakamaau totonu fakaʻotuá; ko e tokāteline pē ia ʻe taha ʻoku malava ke ne fakamatalaʻi ʻa e kahaʻú mo fakaivimālohiʻi ʻetau ngaahi ʻamanakí.” ʻOku fakamatalaʻi ʻe he kau tui fakahaʻele faʻahikehé ʻo pehē ko e soulú ʻi he maté, pe “laumālie ʻoku fakasino kehé,” ʻoku mavahe ia mei he sinó—hangē ha kiʻi pepe ʻoku ʻasi mai mei hono kofukofú. ʻOku nau tui ko e ngaahi laumālie ko ʻení ʻoku fanauʻi sino foʻou mai kinautolu ʻamui ʻi he tuʻunga ko e faʻahinga ʻo e tangatá koeʻuhi ke nau fakamaʻa ʻa e ngaahi angahala naʻe fakahoko ʻi he moʻui ki muʻá. Ka ʻoku ʻikai toe fai ha manatu ia ki he ngaahi angahala ko ia ki muʻá. “ʻOku fakakaukau mai ʻa e ʻOtuá ʻoku feʻungamālie ke fakangaloʻi atu ʻa e ngaahi angahala ia ʻi he kuohilí,” ko e lau ia ʻa e The Gospel According to Spiritism.

“Ke fakaʻikaiʻi ʻa e fanauʻi sino foʻoú ko hono toe fakaʻikaiʻi ia ʻa e ngaahi lea ʻa Kalaisí,” ko e tohi ia ʻa Allan Kardec. Kae kehe, naʻe ʻikai ʻaupito ke leaʻaki ʻe Sīsū ʻa e foʻi lea ko e “fanauʻi sino foʻou” pea ʻikai ʻaupito ke fai ha lave ki ha fakakaukau pehē. (Sio ki he “ʻOku Akoʻi ʻe he Tohitapú ʻa e Fanauʻi Sino Foʻoú?” ʻi he peesi 22.) ʻI hono kehé, naʻe akoʻi ʻe Sīsū ia ʻa e toetuʻu ʻa e maté. ʻI he lolotonga ʻo ʻene ngāue fakafaifekau ʻi he māmaní, naʻá ne fokotuʻu mei he maté ha kakai ʻe toko tolu—ko e tama ʻa ha uitou ʻi Neini, ko e ʻofefine ʻo e ʻōfisa tauhi ʻo ha sinakoke, pea mo hono kaumeʻa ofi ko Lasalosí. (Maake 5:​22-​24, 35-​43; Luke 7:​11-​15; Sione 11:​1-​44) Tau lāulea angé ki he taha ʻo e ngaahi meʻa fakaofo ko iá pea sio ki he meʻa naʻe ʻuhinga ki ai ʻa Sīsū ʻo fekauʻaki mo e “toetuʻu.”

Ko e Toetuʻu ʻa Lasalosí

Naʻe fanongo ʻa Sīsū naʻe puke hono kaumeʻa ko Lasalosí. Hili ʻa e ʻaho ʻe ua, naʻá ne tala ange ki heʻene kau ākongá: “Ko [siʻotau] kaumeʻa ko Lasalosi kuo mohe; ka ko ʻeku ʻalu ni ke u fafangu ia.” Naʻe ʻikai mahinoʻi ʻe he kau ākongá ʻa e meʻa naʻe ʻuhinga ki ai ʻa Sīsuú, ko ia naʻá ne lea mahino atu: “Kuo pekia ʻa Lasalosi.” ʻI he faifai pea aʻu mai ʻa Sīsū ki he fonualoto ʻo Lasalosí, ne ʻosi ʻa e ʻaho ia ʻe fā ʻo e mate ʻa e tangatá. Kae kehe, naʻe tuʻutuʻuni atu ʻa Sīsū ke toʻo ʻa e fuʻu maka naʻá ne tāpuni malu ʻa e hūʻanga ʻo e fonualotó. Naʻá ne kalanga leʻo-lahi atu leva: “Lasalosi, tuʻu mai kituʻa”! ʻI he meʻa ko iá, naʻe ʻi ai ha meʻa fakaofo naʻe hoko. “Pea hū kituʻa ʻa e pekia, kuo haʻi hono ongo vaʻe mo ono ongo nima ʻaki ʻa e ngaahi noʻo; pea ko hono fofonga naʻe takai aki ha holoholo. Pea folofola ʻa Sisu kiate kinautolu, Vete ia, pea tukuange ke ne ʻalu.”—Sione 11:​5, 6, 11-14, 43, 44.

ʻOku hā mahino, naʻe ʻikai ko ha fanauʻi sino foʻou mai ʻeni. Naʻe pehē ʻe Sīsū ko Lasalosi ko ʻeni naʻe maté naʻe mohe, ʻo ʻikai toe ʻilo ha meʻa. Hangē pē ko hono fakahaaʻi ia ʻe he Tohitapú, ‘ko ʻene ngaahi fakakaukaú naʻe mate.’ Naʻe ‘ʻikai te ne ʻilo ha momoʻi meʻa.’ (Sāme 146:4; Koheleti 9:5) Ko Lasalosi ko eni naʻe toetuʻú naʻe ʻikai ko ha tokotaha kehe ia mo ha laumālie fanauʻi sino foʻou mai. Naʻá ne maʻu ʻa e angaʻitangata tatau pē, naʻe ʻi he taʻumotuʻa tatau pē, pea maʻu ʻa e ngaahi manatu tatau pē. Naʻá ne toe maʻu pē ʻa ʻene moʻui ʻa ia naʻá ne mavahe mutukia mei aí pea toe foki ki he faʻahinga ʻofeina ko ia naʻa nau tengihia ʻene maté.—Sione 12:​1, 2.

Ki mui mai ai, naʻe toe mate ʻa Lasalosi. Ko ia, ko e hā ʻa e taumuʻa naʻe fakahoko ʻe heʻene toetuʻú? Fakataha mo e ngaahi toetuʻu kehe naʻe fakahoko ʻe Sīsuú, ʻoku toe fakaivimālohiʻi ai ʻetau falala ki he talaʻofa ʻa e ʻOtuá ko ʻEne kau sevāniti loto-tōnungá ʻe fokotuʻu hake mei he maté ʻi Heʻene taimi kuo kotofá. Ko e ngaahi mana ko ia ʻa Sīsuú ʻoku nau toe fakalahi mai ʻa e mahuʻinga ki heʻene ngaahi leá: “Ko au pē ko e Toetuʻu, pea mo e Moʻui: ko ia ʻoku tui pikitai kiate au, ne ongo kuo pekia, ka te ne moʻui pe.”—Sione 11:25.

ʻI he fekauʻaki mo e toetuʻu ko ia ʻi he kahaʻú, naʻe pehē ʻe Sīsū: “ʻOku ʻunu mai ha taimi, ʻa ia ʻe fanongo ai ki hono leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai; ko kinautolu naʻe ngaue lelei, ki he toetuʻu ke moʻui, ko kinautolu naʻe fai kovi, ki he toetuʻu ke fakamāu.” (Sione 5:​28, 29) Hangē pē ko ia naʻe hoko ʻia Lasalosí, ʻe hoko ia ko ha toetuʻu ʻo e kakai maté. ʻE ʻikai ko ha toe fakatahaʻi ia ʻo e ngaahi laumālie ʻilo meʻá fakataha mo e ngaahi sino ʻoku toetuʻu hake ʻa ia naʻe ʻosi ʻauʻauha atu pea naʻa mo ʻene hoko ko ha konga ʻo e toe ngaahi meʻa moʻui kehé. Ko hono fokotuʻu hake ʻo e maté ʻoku ʻi loto ia ʻi he malava ʻa e Tokotaha-Fakatupu ʻo hēvani mo māmaní, ʻa ia ʻoku taʻengata ʻi he poto mo e mālohi.

ʻIkai ʻoku hanga ʻe he tokāteline ʻo e toetuʻú, ʻo hangē ko ia naʻe akoʻi ʻe Sīsū Kalaisí, ʻo fakahaaʻi ʻa e ʻofa loloto ʻa e ʻOtuá ki he faʻahinga ʻo e tangatá ʻi he tuʻunga fakatāutahá? Kae fēfē ʻa e fehuʻi hono ua naʻe lave ki ai ʻanenai angé?

Ko e Hā ʻa e ʻUhinga ki he Faingataʻaʻiá?

ʻOku hoko mai nai ʻa e faingataʻaʻia lahi fakaetangatá koeʻuhi ko e ngaahi meʻa ʻoku taʻefakapotopoto, taʻetaukei, pe naʻa mo e fulikivanu ʻoku fai ʻe he kakaí. Kae fēfē leva ʻa e ngaahi meʻa fakamamahi ʻa ia ʻoku ʻikai malava ke tukuakiʻi fakahangatonu ki he kakaí? Ko e fakatātaá, ko e hā ʻoku ʻi ai ai ʻa e ngaahi fakatuʻutāmaki mo e ngaahi fakatamaki fakanatulá? Ko e hā ʻoku fāʻeleʻi mai ai ʻa e fānau ʻe niʻihi mo e ngaahi mele mei manavá? Naʻe vakai ʻa Allan Kardec ki he ngaahi meʻa peheé ko ha ngaahi tautea. Naʻá ne tohi: “Kapau ʻoku tauteaʻi kitautolu kuo pau leva naʻe fakahoko ha faihala. Kapau ko e faihala ko iá ʻoku ʻikai ʻo e moʻui lolotongá kuo pau leva ko e haʻu ia mei ha moʻui ʻi he kuohilí.” ʻOku akoʻi ki he kau tui fakahaʻele faʻahikehé ke nau lotu: “ʻEiki, ʻOkú Ke fakamaau totonu ʻataʻatā pē. Ko e mahaki naʻá Ke vakai ki ai ʻoku feʻunga ke ʻomai kiate aú kuo pau pē ko hoku tuha . . . ʻoku ou tali ia ko ha fakaleleiʻanga ki hoku kuohilí pea ko ha fakamoʻoni ia ʻo ʻeku tuí mo ʻeku anganofo ki Ho finangalo monūʻiá.”—The Gospel According to Spiritism.

Naʻe akoʻi ʻe Sīsū ha meʻa pehē? ʻIkai. Naʻe ʻiloʻi lelei ʻe Sīsū ʻa e fakamatala ʻa e Tohitapú: “ʻOku hokonoa ki he faʻahinga kotoa pe ʻa e faingamalie mo e tuʻutamaki.” (Koheleti 9:11) Naʻá ne ʻiloʻi ʻe ʻi ai ʻa e taimi ʻe niʻihi ʻe hoko mai pē ai ha ngaahi meʻa kovi. ʻOku ʻikai pau ko ha tautea kinautolu ia ki ha ngaahi angahala.

Fakakaukau ange ki he meʻa ko ʻeni ʻi he moʻui ʻa Sīsuú: “ʻI heʻene ʻalu ange [ʻa Sīsuú], naʻa ne ʻilo ha tangata naʻe kui, ʻa ia naʻe fanauʻi ʻoku pehē. Pea fehuʻi kiate ia ʻe heʻene kau ako, ʻo pehē, Lāpai, ko hai ne angahala, ʻa e siana ni, pē ko ʻene mātuʻa, ʻo tupu ai hono fanauʻi kui?” Naʻe mātuʻaki fakatupu ʻilo ʻa e tali naʻe ʻoange ʻe Sīsuú: “Naʻe ʻikai ko e angahala ʻa e siana ni, pe ko ʻene mātuʻa: ka koeʻuhi ke fakaeʻa ʻiate ia ʻa e ngaahi ngaue ʻa e ʻOtua. Pea ʻi heʻene lea pehē, naʻa ne aʻanu ki he kelekele, ʻo ne ngaohiʻaki ʻa e fāvai ha meʻi pelepela, mo ne pani ʻaki ʻene pelepela ʻa e ongo foʻi mata, ʻo ne folofola kiate ia, Mole pe ʻo fufulu ʻi he vai ko Sailoame, . . . Ko ia naʻa ne ʻalu ʻo fufulu, ʻo ne haʻu kuo ʻā.”—Sione 9:​1-3, 6, 7.

Naʻe fakahaaʻi ʻe he ngaahi lea ʻa Sīsuú naʻe ʻikai ko e tangatá pe ko ʻene ongo mātuʻá ke tukuakiʻi ki heʻene kui naʻe fanauʻi mai mo iá. Ko ia naʻe ʻikai fai ʻe Sīsū ia ha poupou ki he foʻi fakakaukau ko ia naʻe tauteaʻi ʻa e tangatá koeʻuhi ko e ngaahi angahala naʻe fakahoko ʻi he moʻui ki muʻa. ʻOku moʻoni, naʻe ʻilo ʻe Sīsū ko e kotoa ʻo e faʻahinga ʻo e tangatá ʻoku nau maʻu tukufakaholo ʻa e angahalá. Ka ʻoku nau maʻu tukufakaholo mai ʻa e angahala ʻa ʻĀtama, ʻikai ko e ngaahi angahala naʻa nau fakahoko ki muʻa ia ʻi honau fanauʻi maí. Koeʻuhi ko e angahala ʻa ʻĀtamá, ʻoku fanauʻi mai ai ʻa e kotoa ʻo e faʻahinga ʻo e tangatá ʻi he taʻehaohaoa fakaesino, ʻo nau moʻulaloa ai ki he puké mo e maté. (Siope 14:4; Sāme 51:5; Loma 5:12; 9:​11) Ko hono moʻoní, ko e tuʻunga ia naʻe fekauʻi mai ʻa Sīsū ke ne fakaleleiʻí. Naʻe pehē ʻe Sione Papitaiso ko Sīsū “ʻa e Lami ʻa e ʻOtua, ʻa ia ʻoku ne ʻave ʻa e angahala ʻa māmani!”—Sione 1:29.a

Toe fakatokangaʻi foki, naʻe ʻikai pehē ʻe Sīsū ia naʻe fakatupunga loto-lelei pē ʻe he ʻOtuá ke fanauʻi kui mai ʻa e tangatá koeʻuhi ke malava ʻa Sīsū ʻo ne haʻu ʻo fakamoʻui ia ʻi ha ʻaho. Ko ha toki foʻi ngāue anga-fakamamahi mo anga-manuki ē ne mei hokó! Ne mei ʻomai ai ha fakahīkihiki ki he ʻOtuá? ʻIkai. Kae kehe, naʻe hoko ʻa e fakamoʻui fakaemana ia ʻo e tangata kuí ke ‘fakaeʻa ai ʻa e ngaahi ngāue ʻa e ʻOtuá.’ Hangē pē ko e ngaahi fakamoʻui lahi kehe naʻe fakahoko ʻe Sīsuú, naʻe tapua mai ai ʻa e ʻofa loto-moʻoni ʻa e ʻOtuá ki he faʻahinga faingataʻaʻia ʻo e tangatá pea fakapapauʻi ai ʻa e alafalalaʻanga ʻo ʻEne talaʻofa ke fakangata ʻa e puke mo e faingataʻaʻia fakaetangata kotoa pē ʻi Heʻene taimi kuo kotofá.—Aisea 33:24.

ʻIkai ko ha meʻa fakafiemālie ia ke ʻiloʻi ʻi he ʻikai ke ne fakatupunga mai ʻa e faingataʻaʻiá, ʻoku foaki mai ʻe heʻetau Tamai fakahēvaní ʻa e “meʻa lelei kiate kinautolu ʻoku kole kiate ia.” (Mātiu 7:11) Ko ha lāngilangi lahi ē ʻe ʻomai ki he Fungani Māʻolungá ʻi he taimi ʻe ʻā ai ʻa e mata ʻo e kuí, fanongo ʻa e telinga ʻo e tulí, pea luelue, puna, mo lele ʻa e heké!—Aisea 35:​5, 6.

Fakalato ʻEtau Ngaahi Fiemaʻu Fakalaumālié

Naʻe fanongonongo ʻe Sīsū: “Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.” (Mātiu 4:4) ʻIo, ʻoku fakalato ʻetau ngaahi fiemaʻu fakalaumālié ʻi he taimi ʻoku tau lau ai ʻa e Folofola ʻa e ʻOtuá, ʻa e Tohitapú, pea ʻai ʻetau moʻuí ke fehoanaki mo iá. Ko e talatala ki he kau fetuʻutaki ki he laumālié ʻoku ʻikai te ne fakalato moʻoni ʻetau ngaahi fiemaʻu fakalaumālié. Ko e moʻoni, ko ha tōʻonga pehē ʻoku fakahalaiaʻi fakaʻaufuli ia ʻi he meʻa naʻe lave ki ai ʻa Allan Kardec ko e ʻuluaki meʻa fakahā ʻo e lao ʻa e ʻOtuá.—Teutalonome 18:​10-13.

Ko e tokolahi, ʻo kau ai ʻa e kau fakahaʻele faʻahikehé, ʻoku nau lāuʻilo ko e ʻOtuá ko e Tokotaha Aoniu ia, taʻengata, haohaoa taʻefakangatangata, anga-ʻofa, anga-lelei, mo fakamaau totonu. Ka ʻoku fakahā mai ʻe he Tohitapú ʻa e meʻa lahi ange. ʻOkú ne fakahaaʻi mai ʻokú ne maʻu hano huafa fakaeia, ko Sihova, ʻa ia kuo pau ke tau fakalāngilangiʻi ia ʻo hangē ko ia naʻe fai ʻe Sīsuú. (Mātiu 6:9; Sione 17:6) ʻOkú ne fakahā mai ko e ʻOtuá ko ha tokotaha moʻoni ʻa ia ʻoku malava ʻa e faʻahinga ʻo e tangatá ke nau fiefia ʻi ha vahaʻangatae vāofi mo ia. (Loma 8:​38, 39) Ko hono lau ʻa e Tohitapú, ʻoku tau ako ai ʻo ʻilo ko e ʻOtuá ʻoku mohu meesi pea “kuo ʻikai te ne fai kiate kitautolu ʻo fakatatau mo ʻetau ngaahi angahala, pe totongi kiate kitautolu ʻo fakatatau mo ʻetau ngaahi hia.” (Sāme 103:10) Fakafou ʻi heʻene Folofola tohí, ʻoku fakahaaʻi ai ʻe he ʻEiki Hau ko Sihová ʻa ʻene ʻofá, tuʻunga-aoniú, mo e anga-fakaʻatuʻí. Ko ia ʻa e Tokotaha ʻokú ne tataki mo maluʻi ʻa e faʻahinga talangofua ʻo e tangatá. Ko hono ʻiloʻi ʻa Sihova mo hono ʻAló, ʻa Sīsū Kalaisi, “ko eni ia ʻa e moʻui taʻengata.”—Sione 17:3.

ʻOku tokonaki mai ʻe he Tohitapú ʻa e kotoa ʻo e ngaahi fakamatala ʻoku tau fiemaʻu fekauʻaki mo e ngaahi taumuʻa ʻa e ʻOtuá, pea ʻokú ne tala mai kiate kitautolu ʻa e meʻa kuo pau ke tau fai kapau ʻoku tau fakaʻamu ke fakahōifuaʻi ia. Ko hano sivisiviʻi lelei ʻo e Tohitapú ʻoku tokonaki mai ai ʻa e ngaahi tali moʻoni mo fakafiemālie ki heʻetau ngaahi fehuʻí. ʻOku toe ʻomai ʻe he Tohitapú foki kiate kitautolu ʻa e tataki ki he meʻa ʻoku tonú mo ia ʻoku halá, pea ʻokú ne tokonaki mai ha ʻamanaki fefeka. ʻOkú ne fakapapauʻi mai kiate kitautolu ʻo pehē ʻi he kahaʻu ofi maí, ʻe hanga ai ʻe he ʻOtuá ʻo “holoholo ʻa e loʻimata kotoa pe mei honau mata [ʻo e faʻahinga ʻo e tangatá]; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.” (Fakahā 21:​3, 4) Fakafou ʻia Sīsū Kalaisi, ʻe fakatauʻatāinaʻi ai ʻe Sihova ʻa e faʻahinga ʻo e tangatá mei he angahala tukufakaholó mo e taʻehaohaoá, pea ʻe maʻu ʻe he faʻahinga talangofua ʻo e tangatá ʻa e moʻui taʻengata ʻi ha māmani palataisi. ʻI he taimi ko iá, ko ʻenau ngaahi fiemaʻu fakasinó mo fakalaumālié fakatouʻosi ʻe fakalato kotoa ia.—Sāme 37:​10, 11, 29; Palovepi 2:​21, 22; Mātiu 5:5.

[Fakamatala ʻi lalo]

[Puha ʻi he peesi 22]

ʻOKU AKOʻI ʻE HE TOHITAPÚ ʻA E FANAUʻI SINO FOʻOÚ?

ʻOku poupouʻi ʻe ha ngaahi konga Tohitapu ʻa e tokāteline ʻo e fanauʻi sino foʻoú? Fakakaukau ange ki he niʻihi ʻo e ngaahi konga Tohitapu kuo ngāueʻaki ʻe he kau tui ki he tokāteliné ni:

“He ko e kau Palofita kotoa pe mo e Lao, ʻo aʻu mai kia Sione . . . ko eni ia ʻa e Ilaisia ka hoko mai.”—Mātiu 11:​13, 14.

Ko Sione Papitaisó ko ʻIlaisiā ia naʻe toe fanauʻi mai? ʻI hono ʻeke ange: “Ko Ilaisia [koe]?” Naʻe tali mahino ʻe Sione: “ʻIkai.” (Sione 1:21) Kae kehe, naʻe ʻosi tomuʻa tala ʻe muʻomuʻa ʻa Sione ʻi he Mīsaiá ʻi he “anga mo e ivi ʻo Ilaisia.” (Luke 1:17; Malakai 4:​5, 6) ʻI hono fakalea ʻe tahá, ko Sione Papitaisó naʻe ʻIlaisiā ʻi he ʻuhinga naʻá ne fakahoko ha ngāue faitatau mo ia naʻe fai ʻe ʻIlaisiaá.

“ʻIlonga ʻa ia ʻe ʻikai fanauʻi foʻou mei ʻolunga, ʻe ʻikai te ne lava ke mamata ki he Puleʻanga ʻo e ʻOtua. ʻOua te ke ofo ʻi heʻeku pehe atu, Kuo pau ke mou fanauʻi foʻou mei ʻolunga.”—Sione 3:​3, 7.

Ko e taha ʻo e kau ʻapositoló naʻá ne tohi ki mui: “Ke fakamālōʻia ai pē ʻa e ʻOtua mo e Tamai ʻa hotau ʻEiki ko Sīsū Kalaisí! ʻI he lahi ʻo ʻene mēsí kuo fanauʻi foʻou ai kitautolu ki ha ʻamanaki ʻoku moʻui fakafou ʻi he toetuʻu ʻa Sīsū Kalaisi mei he pekiá.” (1 Pita 1:​3, 4, Revised Standard Version; Sione 1:​12, 13) ʻOku hā mahino, ko e toe fanauʻi naʻe lave ki ai ʻa Sīsuú ko ha meʻa ia ʻe hokosia fakalaumālie ʻa ia ʻe hoko ia he lolotonga ʻa e kei moʻui ʻa hono kau muimuí, ʻikai ko ha fanauʻi sino foʻou mai ʻi he kahaʻú.

“ʻI he mate ʻa ha tangata, ʻokú ne moʻui taʻengata: ʻi he taimi ʻe ʻosi ai hoku ngaahi ʻaho ʻo e moʻui ʻi he Māmaní, te u tatali, ʻo sio ki heʻeku toe foki maí.”—Ko ha “liliu faka-Kalisi” ʻo e Siope 14:14 naʻe hiki ʻi he The Gospel According to Spiritism.

Ko e fakalea eni ʻe he Revised Standard Version ʻa e vēsí ni: “Kapau ʻe mate ha tangata, te ne toe moʻui koā? Ko e kotoa ʻo e ngaahi ʻaho ʻo ʻeku ngāué te u tatali ai, kae ʻoua ke hoko mai hoku tukuangé.” Lau ʻa e potutohi ʻo e veesi ko iá. Te ke sio ai ʻoku fakatatali ʻa e kau maté ʻi he faʻitoká ki honau “tukuange.” (Siope vahe 14 Veesi 13) ʻI he lolotonga ʻo e fakatatalí, ʻoku ʻikai te nau toe moʻui. “Ko ha tangata kuo mate ʻokú ne mole fakaʻaufuli atu; pea ʻi he tō ʻa ha taha mate, ʻoku ʻikai te ne toe ʻi ai.”—Siope 14:​10, liliu Septuagint ʻa Bagster.

[Fakatātā ʻi he peesi 21]

ʻOku fakahaaʻi ʻe he ʻamanaki toetuʻú ʻa e mahuʻingaʻia loloto ʻa e ʻOtuá ʻiate kitautolu ʻi he tuʻunga fakatāutahá

[Fakatātā ʻi he peesi 23]

ʻE fakangata ʻe he ʻOtuá ʻa e kotoa ʻo e faingataʻaʻia fakaetangatá