ʻAʻeva ʻi he Manavahē kia Sihova

“Bea naa nau [ko e fakatahaʻanga] aeva i he manavahe ki he Eiki [Sihova], moe fiemalie oe laumalie maonioni, bea tubu o toko lahi.”​—NGĀUE 9:​31, “PM.”

 1, 2. (a) Ko e hā naʻe hoko ʻi he maʻu ʻe he fakatahaʻanga Kalisitiané ha vahaʻa taimi ʻo e melinó? (e) Neongo ʻoku fakangofua ʻe Sihova ʻa e fakatangá, ko e hā mo ha toe meʻa kehe ʻokú ne fai?

NAʻE fehangahangai ha ākonga mo ha ʻahiʻahi lahi. Te ne tauhimaʻu ʻene angatonu ki he ʻOtuá? ʻIo, ʻe pehē! Naʻá ne ʻaʻeva ʻi he manavahē ki he ʻOtuá, mo e manavahē ki hono Fakatupú, pea ʻe mate ia ko ha fakamoʻoni māteaki ʻa Sihova.

² Ko e tokotaha tauhi angatonu manavahē-ʻOtua ko Sitīvení, “ko e tangata naʻe fonu ʻi he tui mo e laumālie māʻoniʻoni.” (Ngāue 6:5) Naʻe langaʻi ʻe hono fakapoó ha fuʻu fakatanga, ka ʻi he hili iá ko e fakatahaʻanga ʻi Siuteá, Kāleli, mo Samēlia naʻa nau maʻu ha vahaʻa taimi ʻo e melino mo e langa hake fakalaumālie. ʻIkai ko ia pē, “naa nau aeva i he manavahe ki he Eiki [Sihova], moe fiemalie oe laumalie maonioni, bea tubu o toko lahi.” (Ngāue 9:​31, PM) ʻI he hoko ko e Kau Fakamoʻoni ʻa Sihova ʻi he ʻaho ní, ʻoku malava ke tau ʻilo pau ʻe tāpuakiʻi kitautolu ʻe he ʻOtuá ʻo tatau ai pē pe ʻoku tau hokosia ʻa e melinó pe fakatangá, ʻo hangē ko ia ʻoku hā ʻia Ngāue vahe 6 ki he 12. Ko ia ke tau ʻaʻeva ʻi he manavahē anga-ʻapasia ki he ʻOtuá ʻi he hoko ha fakatanga, pe ke tau ngāueʻaki ha nonga mei he fakatangá ki he langa hake fakalaumālie mo toe fai ʻa e ngāue longomoʻui lahi ange kiate ia.​—Teutalōnome 32:​11, 12; 33:27.

Angatonu ʻo Aʻu ki he Ngataʻangá

 3. Ko e hā ʻa e palopalema naʻe lavaʻi ʻi Selusalemá, pea naʻe anga-fēfē?

³ Naʻa mo e malanga hake nai ha ngaahi palopalema ʻi he taimi melinó, ʻe tokoni nai ʻa e fokotuʻutuʻu maaú ke fakaleleiʻi kinautolu. (6:​1-7) Naʻe lāunga ʻa e kau Siu lea-faka-Kalisi ʻi Selusalemá ʻo pehē naʻe taʻetokangaʻi honau kau uitoú ʻi he tufa meʻakai fakaʻahó kae tokangaʻi pē ʻa e kau tui Siu naʻa nau lea faka-Hepeluú. Ko e palopalema ko ʻení naʻe fakaleleiʻi ʻi hono fakanofo ʻe he kau ʻapositoló ha kau tangata ʻe toko fitu ke tokanga “ki he ngāue ko ia.” Ko Sitīveni ko e taha ia ʻiate kinautolu.

 4. Naʻe anga-fēfē hono tali ʻe Sitīveni ʻa e ngaahi tukuakiʻi loí?

⁴ Kaekehe, naʻe vave ʻa e fehangahangai ʻa e tokotaha manavahe-ʻOtua ko Sitīvení mo e ʻahiʻahí. (6:​8-15) Naʻe tuʻu hake mo ha kau tangata ʻa ia naʻa nau fakakikihi mo Sitīveni. Ko e faʻahinga ʻe niʻihi mei he “falelotu ʻo e kau Lipataine,” ko e kau Siu nai naʻe puke pōpula ʻe he kau Lomá pea toki fakatauʻatāina ki mui pe ko ha kau ului Siu naʻa nau hoko ko e kau pōpula. ʻI he taʻemalava ke tuʻu atu ʻenau fakakaukaú ʻa kinautolu ki he poto mo e laumālie naʻe leaʻaki ʻe Sitīvení, naʻe ʻave ia ʻe hono ngaahi filí ki he Sanetalimí. Naʻe pehē ai ʻe he kau fakamoʻoni loí: ‘Kuo mau fanongo ʻi hono pehē ʻe he tangata ko ʻení ʻe fakaʻauha ʻe Sīsū ʻa e temipalé pea liliu mo e ngaahi founga naʻe ʻomai ʻe Mosesé.’ Ka naʻa mo hono kau fakafepakí naʻe lava ke nau ʻilo naʻe ʻikai ko ha tokotaha faikovi ʻa Sitīveni ka ko hono fofongá naʻe hangē ha fofonga ʻo ha ʻāngelo, ko ha talafekau ʻa e ʻOtuá ʻa ia ʻokú ne ʻilo pau ʻa e tokotaha ʻokú ne poupouʻi iá. Ko e faikehekehe ē mei honau ngaahi matá, he naʻe fakatuʻutāmaki mo kovi koeʻuhi kuo nau tuku atu kinautolu kia Sētane!

 5. Ko e hā ʻa e ngaahi poini naʻe lave ki ai ʻa Sitīveni ʻi he lolotonga ʻene fai fakamoʻoní?

⁵ Naʻe fai fakamoʻoni taʻemanavahē ʻa Sitīveni ʻi hono fakafehuʻi ia ʻe he Taulaʻeiki Lahi ko Kaiafasí. (7:​1-53) Naʻe hā mei heʻene fakamanatu ʻa e hisitōlia ʻo e kau ʻIsilelí naʻe taumuʻa ʻa e ʻOtuá ia ke toʻo atu ʻa e Laó mo e ngāue ʻi he temipalé ʻi he hoko mai ʻa e Mīsaiá. Naʻe pehē ʻe Sitīveni naʻe talitekeʻi ʻe he kau ʻIsilelí ʻa Mosese, ko e tokotaha fakatauʻatāina ia ʻoku taku ʻe he Siu kotoa pē kuo nau fakalāngilangiʻí, ʻo hangē tofu pē ko e ʻikai te nau tali ʻa e Tokotaha ʻokú ne ʻomai ʻa e fakatauʻatāina lahi angé. ʻI heʻene pehē ʻoku ʻikai ke ʻafio ʻa e ʻOtuá ʻi he ngaahi fale kuo ngaohi ʻe he nima ʻo e tangatá, naʻe fakahā ai ʻe Sitīveni ʻe mole atu ʻa e temipalé mo hono ngaahi founga ki he lotú. Ka koeʻuhi ko hono kau fakamaaú naʻe ʻikai te nau manavahē ʻOtua pe fie ʻilo ki Hono finangaló, naʻe pehē ʻe Sitīveni: ‘Ko e faʻahinga kia kekeva, ʻoku mou talitekeʻi maʻu ai pē ʻa e laumālie māʻoniʻoní. Ko e palōfita fē ia naʻe ʻikai ke fakatangaʻi ʻe hoʻomou ngaahi kuí? Naʻa nau tāmateʻi ʻa kinautolu naʻa nau kikiteʻi ʻa e hoko mai ʻa e Tokotaha Māʻoniʻoní, ʻa ia kuo mou hoko ai ko hono kau lavaki mo hono kau fakapoongi.’

 6. (a) Ko e hā ʻa e meʻa fakatupu tui-mālohi naʻe hokosia ʻe Sitīveni ki muʻa ke ne maté? (e) Ko e hā naʻe totonu ai pē ʻa e pehē ʻe Sitīveni: “ʻEiki Sisū, ke ke maʻu atu hoku laumālie”?

⁶ Ko e ngaahi fakamatala taʻemanavahē ʻa Sitīvení naʻe fakatupunga ai ʻa hono fakapoongí. (7:​54-60) Naʻe fakaʻitaʻi ʻa e kau fakamaaú ʻi hono fakahaaʻi ko ʻeni ʻa ʻenau halaia ʻi he pekia ʻa Sīsuú. Ka ko e fakamālohi ē naʻe hoko ki he tui ʻa Sitīvení ʻi heʻene ‘sio fakamamaʻu ki he langí ʻo ne mamata ai ki he nāunau ʻo e ʻOtuá, pea mo Sīsū ʻokú ne tuʻu mei he toʻomataʻú’! Kuo malava ʻi he taimi ko ʻení ke fehangahangai ʻa Sitīveni mo hono ngaahi filí mo e fakapapau kuó ne fai ʻa e finangalo ʻo e ʻOtuá. Neongo ʻoku ʻikai ke maʻu ʻe he Kau Fakamoʻoni ʻa Sihová ha ngaahi vīsone, ka ʻoku tau maʻu ʻa e nonga meimei tatau ʻoku foaki mai ʻe he ʻOtuá ʻi he fakatangá. Hili hono lī ʻo Sitīveni ki he tuʻakolo ʻo Selusalemá, naʻe kamata ai ʻe hono ngaahi filí ke tolomakaʻi ia, peá ne kole: “ʻEiki Sisū, ke ke maʻu atu hoku laumālie.” Naʻe totonu pē ia koeʻuhi he naʻe fakangofua ʻe he ʻOtuá ʻa Sīsū ke fokotuʻu ha niʻihi mei he maté. (Sione 5:26; 6:40; 11:​25, 26) Naʻe tuʻulutui ʻa Sitīveni, pea naʻá ne kalanga: “ʻEiki [Sihova], ʻoua naʻa lau ʻa e angahala ni kiate kinautolu.” Pea naʻá ne tō ʻo mohe ʻi he mate ko ha maʻata, ʻo hangē ko ia kuo fai ʻe he kau muimui tokolahi ʻo Sīsū talu mei ai, pea naʻa mo e taimi ʻo onopooní.

Fakamafola ʻe he Fakatangá ʻa e Ongoongo Leleí

 7. Ko e hā hono ola ʻo e fakatangá?

⁷ Tupu mei he mate ʻa Sitīvení naʻe mafola atu ai ʻa e ongoongo leleí. (8:​1-4) Naʻe fakamovete ʻe he fakatangá ʻa e kau ākongá hono kotoa ʻi Siutea mo Samēlia kotoa, tukukehe pē ʻa e kau ʻapositoló. Ko Saula, ʻa ia naʻe loto-lelei ki hono fakapoongi ʻo Sitīvení, naʻá ne vete ʻa e fakatahaʻangá ʻo hangē ha manufekaí, ʻo ne hū ʻi he fale ki he fale ke toho mo taki pōpula ʻa e kau muimui ʻo Sīsuú. ʻI he hoko atu ʻa e malanga ʻa e kau ākonga naʻe moveté, naʻe fakataʻeʻaongaʻi ʻa e palani ko ia ʻa Sētane ke taʻofi ʻa e kau fanongonongo manavahē-ʻOtua ʻo e Puleʻangá ʻaki ʻa e fakatangá. ʻOku pehē pē mo e ʻahó ni foki, kuo faʻa fakamafola ʻe he fakatangá ʻa e ongoongo leleí pe fakahanga ʻa e tokangá ki he ngāue fakamalanga ʻo e Puleʻangá.

 8. (a) Ko e hā ʻa e ngaahi meʻa naʻe hoko ko e ola ia ʻo e malanga naʻe fai ʻi Samēliá? (e) Naʻe anga-fēfē ʻa hono ngāueʻaki ʻe Pita ʻa e kī hono ua naʻe tuku ki ai ʻe Sīsuú?

⁸ Naʻe ʻalu ʻa e ʻevangeliō ko Filipé ki Samēlia ke “ne malangaʻaki ʻa Kalaisi.” (8:​5-25) Naʻe hoko ha fiefia lahi ʻi he kolo ko iá ʻi hono malangaʻi ʻa e ongoongo leleí, ʻi hono tuli ʻa e kau laumālie ʻulí, pea naʻe fakamoʻui ʻa e kakaí. Naʻe fekau atu ʻe he kau ʻapositoló mei Selusalema ʻa Pita mo Sione ki Samēlia, pea ʻi heʻena lotu mo hilifaki hona nimá kiate kinautolu kuo papitaisó, naʻe maʻu ʻe he kau ākonga foʻoú ʻa e laumālie māʻoniʻoní. Naʻe feinga ha faimana ki muʻa kuo toki papitaiso ko Saimone ke ne fakatau ʻa e mafai ko ʻení, ka naʻe pehē ʻe Pita: ‘ʻOfa ke ʻauha hoʻo paʻangá mo koe. ʻOku ʻikai ke totonu ho lotó ʻi he ʻao ʻo e ʻOtuá.’ ʻI he tala ki ai ke ne fakatomala mo kole fakamolemole kia Sihová, naʻá ne kole ki he kau ʻapositoló ke nau lotu koeʻuhi ko ia. ʻOku totonu ke ueʻi ʻe he meʻa ko ʻení ʻa e kau manavahē kotoa pē kia Sihova ke lotu ke maʻu ʻa e tokoni fakaʻotuá ke maluʻi ʻa e lotó. (Palōvepi 4:23) (Mei he meʻa ko ʻení naʻe maʻu mei ai ʻa e foʻi lea “simony,” “ko e fakatau mai pe fakatau atu ʻo ha tuʻunga ʻi he siasí.”) Naʻe fanongonongo ʻe Pita mo Sione ʻa e ongoongo leleí ʻi he ngaahi kolo lahi ʻi Samēlia. Ko ia, naʻe ngāueʻaki ʻe Pita ʻa e kī hono ua naʻe ʻoange ki ai ʻe Sīsū ke fakaavaʻaki ʻa e matapā ʻo e ʻiló mo e faingamālie ke hū ki he Puleʻanga faka-hēvaní.​—Mātiu 16:19.

 9. Ko hai ʻa e ʻItiopea ʻa ia naʻe fakamoʻoni ki ai ʻa Filipé, pea ko e hā naʻe lava ai ke papitaiso ʻa e tangatá ni?

⁹ Naʻe toki ʻoange ʻe he ʻāngelo ʻa e ʻOtuá kia Filipe ha vāhenga-ngāue foʻou. (8:​26-40) ʻI he fononga saliote ʻi he halá mei Selusalema ki Kesa naʻe heka ai ha “iunoke,” ko ha pule ia ki he koloa ʻa e kuini ʻItiopea ko Kanetaké. Naʻe ʻikai ko ha ʻiunoke ʻi he kakano ia, ʻo hoko ko ha taha naʻe tapui mei he fakatahaʻanga Siú, ka naʻá ne ʻalu ki Selusalema ke lotu ʻi hono tuʻunga ko ha tokotaha ului kuo ʻosi kamu. (Teutalōnome 23:1) Naʻe ʻilo ʻe Filipe ʻoku lau ʻe he ʻiunoké ʻa e tohi ʻa ʻAiseá. ʻI hono fakaafeʻi ia ke heka ki he salioté, naʻe lāulea ʻa Filipe ʻo kau ki he kikite ʻa ʻAiseá mo ne “malangaʻaki ʻa Sisu kiate ia.” (ʻAisea 53:​7, 8) Naʻe kalanga leva ʻa e ʻItiopeá: “ʻE, ko e vai ʻeni; ʻoku ai ha meʻa ʻoku taʻofi ki haku papitaiso?” Naʻe ʻikai ke ʻi ai ha meʻa ia, he kuó ne ʻilo ʻo fekauʻaki mo e ʻOtuá pea kuó ne tui ʻi he taimí ni kia Kalaisi. Ko ia naʻe papitaiso ʻe Filipe ʻa e ʻItiopeá, ʻa ia naʻe toki ʻalu kuó ne fiefia. ʻOku ʻi ai ha meʻa ʻokú ne taʻofi koe mei he papitaisó?

Ko ha Tokotaha Fakatanga Naʻe Tafoki

10, 11. Ko e hā naʻe hoko kia Saula ʻo Tāsusí ʻi he hala ki Tāmasikusí mo e taimi siʻi pē mei ai?

¹⁰ Lolotonga ʻení, naʻe feinga ʻa Saula ke fakatafoki ʻa e kau muimui ʻo Sīsuú mei heʻenau tuí ʻaki hono fakamanaʻi ʻaki ʻa e nofo pilīsone pe ko e mate. (9:​1-18a) Ko e taulaʻeiki lahí (ngalingali ko Kaiafasi) naʻá ne ʻoange kia Saula ha ngaahi tohi ki he ngaahi sinakoke ʻi Tāmasikusí ʻo fakamafaiʻi ia ke taki pōpula mai ʻa e kau tangata mo e kau fafine ʻoku nau kau ki he “ʻAlunga ko é,” pe founga ʻo e moʻui ʻoku makatuʻunga ʻi he faʻifaʻitakiʻanga ʻa Kalaisí. Fakafuofua ko e hoʻatā nai ʻi heʻene ofi ki Tāmasikusí, naʻe tapa ha maama mei hēvani pea naʻe ʻeke ʻe ha leʻo: “ʻE Saula, ko e ha ʻoku ke fakatangaʻi ai au?” Ko kinautolu naʻa nau ō mo Saulá naʻa nau “fanongo pe ki he leʻo” ka naʻe ʻikai ke mahino kiate kinautolu ʻa e meʻa naʻe leaʻakí. (Fehoanaki mo Ngāue 22:​6, 9) Ko e fakahā fakakonga ko ia ʻo Sīsū kuo fakalāngilangiʻí naʻe feʻunga pē ke ne fakakuiʻi ʻa Saula. Naʻe ngāueʻaki ʻe he ʻOtuá ʻa e ākonga ko ʻĀnanaiá ke toe fakaʻā ia.

¹¹ ʻI he hili hono papitaisó, naʻe hoko ʻa e tokotaha fakatanga ki muʻá ko e tokotaha ke fai ki ai ʻa e fakatanga. (9:18e-25) Naʻe loto ʻa e kau Siu ʻi Tāmasikusí ke tāmateʻi ʻa Saula. Kaekehe, ʻi he poʻulí, naʻe tukutuku hifo ia ʻe he kau ākongá ʻi ha ava ʻi he holisí, ngalingali ʻi ha kato lahi naʻe fīʻaki ha maea pe takatakaiʻaki ha ngaahi vaʻakau. (2 Kolinitō 11:​32, 33) Ko e avá ko ha matapā nai ia ʻo ha ʻapi ʻo ha ākonga naʻe ngaohi ʻi he holisí. Naʻe ʻikai ko ha foʻi ia ke hola mei he ngaahi filí ke hanganaki fai ʻa e malangá.

12. (a) Ko e hā naʻe hoko kia Saula ʻi Selusalemá? (e) Ko e hā naʻe hoko ki he fakatahaʻangá?

¹² ʻI Selusalema, naʻe tokoni ʻa Panepasa ki he kau ākongá ke tali ʻa Saula ko e kaungā-tui. (9:​26-31) Naʻe fakakikihi taʻe manavahē ai ʻa Paula mo e kau Siu naʻe lea faka-Kalisí, ʻa e faʻahinga naʻa nau toe feinga ke tāmateʻi ia. ʻI hono ʻilo ʻa e meʻa ko ʻení, naʻe ʻave ia ʻe he fanga tokouá ki Sesalia pea fakafolau ia ki Tāsusi, ko hono kolo totonú ia ʻi Silisia. Ko ia ko e ngaahi fakatahaʻanga ʻi Siuteá, Kāleli, mo Samēlia naʻa nau “maʻu ae fiemalie . . . bea nae laga hake” fakalaumālie. ʻI he ‘ʻaʻeva ʻi he manavahē kia Sihová mo e fakafiemālie ʻa e laumālie māʻoniʻoní, naʻe tupu ʻo tokolahi.’ Ko ha faʻifaʻitakiʻanga lelei ē ki he ngaahi fakatahaʻanga kotoa pē ʻi he ʻahó ni ʻo kapau ʻoku nau fiemaʻu ʻa e tāpuaki ʻa Sihová!

Naʻe Hoko ʻo Tui ʻa e Kau Senitailé!

13. Ko e hā ʻa e ngaahi mana naʻe tokoniʻi ʻe he ʻOtuá ke fai ʻe Pita ʻi Lita mo Siopá?

¹³ Naʻe femoʻuekina mo Pita foki. (9:​32-43) ʻI Lita (ko Lod ia ʻi he taimí ni) ʻi he Tokalelei ʻo Sāloné, naʻá ne fakamoʻui ai ha mamatea ko ʻEneasi. Ko e fakamoʻui ko ʻení naʻe fakatupunga ai ha tokolahi ke tafoki ki he ʻEikí. ʻI Siopa, ko e ākonga ʻofeina ko ia ko Tāpaitá (Toakase) naʻe puke peá ne mate. ʻI he aʻu ki ai ʻa Pitá, naʻe fakahā ange ki ai ʻe he kau uitou ʻoku nau tangi ʻa e ngaahi tupenu naʻe ngaohi ʻe Toakasé pea naʻa nau tui nai ia. Naʻá ne toe fakamoʻui mai ʻa Toakase, pea ʻi he mafola atu ʻa e ongoongo ko ʻení, naʻe hoko ai ʻa e tokolahi ʻo tui. Naʻe nofo ʻa Pita ʻi Siopa mo Saimone ko e tufunga kiliʻimanu, ʻa ia ko hono falé naʻe tuʻu ʻi he matātahí. Naʻe unu ʻe he kau tufunga kiliʻimanú ʻa e ngaahi kiliʻimanú ʻi he tahí pea ʻai ki ai ha laimi ki muʻa ke toʻo ʻa e fulufulú. Naʻe toki liliu ʻa e ngaahi kilí ki he leta ʻaki hono ngāueʻaki ʻa e huhuʻa mei ha ngaahi ʻakau.

14. (a) Ko hai ʻa Koliniusi? (e) Ko e hā ʻa e moʻoni ʻo fekauʻaki mo e ngaahi lotu ʻa Koliniusí?

¹⁴ ʻI he taimi ko iá (36 T.S.), naʻe ʻi ai mo e tupu lahi naʻe fakatokangaʻi ʻi ha feituʻu kehe. (10:​1-8) Naʻe nofo ʻi Sesalia ha mateaki ko e Senitaile ko Koliniusi, ko ha senituliō Loma ʻoku pule ki he kau tangata ʻe toko teau nai. Naʻe taki ia he “vahengatau . . . ʻItali,” ngalingali ko e kau sōtia foʻou mei he kau Lomá mo e kau pōpula naʻe tuku ange ʻi ʻĪtalí. Neongo naʻe manavahē ʻOtua ʻa Koliniusi, naʻe ʻikai ko ha Siu ia kuo ului. ʻI ha vīsone, naʻe fakahā ki ai ʻe ha ʻāngelo ʻo pehē ko ʻene ngaahi lotú kuo “hoko ko e meʻa ke manatu ki ai ʻe he ʻOtua.” Neongo naʻe teʻeki ai ke fakatapui ʻa Koliniusi kia Sihova, ka naʻá ne maʻu ha tali ki heʻene lotú. Kae hangē ko e fakahinohino ʻa e ʻāngeló, naʻá ne fekau ke haʻu ʻa Pita.

15. Ko e hā naʻe hoko lolotonga ʻa e lotu ʻa Pita ʻi he funga fale ʻo Saimoné?

¹⁵ Lolotonga ʻení, naʻe maʻu ʻe Pita ha vīsone lolotonga ʻene lotu ʻi he funga fale ʻo Saimoné. (10:​9-23) Naʻe ʻāvea hono lotó pea naʻá ne sio ki ha meʻa ʻo hangē ha tupenu kuo tukutukuhifo mei he langí ʻoku fonu ʻi he ngaahi meʻamoʻui veʻe fā taʻemaʻa, manu totolo mo e fanga manupuna. ʻI he fakahinohino ki ai ke tāmateʻi ʻo kaí, naʻe pehē ʻe Pita kuo teʻeki ai ke ne kai ha meʻa taʻetāu. Naʻe tala ki ai “ko e ngaahi meʻa kuo fakamaʻa ʻe he ʻOtua, ʻoua te ke pehē ʻe koe ʻoku taʻetāu.” Naʻe fakapuputuʻu ʻe he vīsoné ʻa Pita, ka naʻá ne muimui ki he fakahinohino ʻa e laumālié. Ko ia naʻa nau ō mo e fanga tokoua Siu ʻe toko ono mo e ongo talafekau ʻa Koliniusí.​—Ngāue 11:12.

16, 17. (a) Ko e hā naʻe tala ʻe Pita kia Koliniusi mo kinautolu naʻe fakataha ʻi hono ʻapí? (e) Ko e hā naʻe hoko ʻi he lolotonga ʻo e kei lea ʻa Pitá?

¹⁶ Ko e ʻuluaki ʻeni mei he kau Senitailé ʻoku ʻamanaki ke fanongo ki he ongoongo leleí. (10:​24-43) ʻI he aʻu atu ʻa Pita mo hono kau fonongá ki Sesaliá, naʻe talitali mai ʻa Koliniusi, mo hono ngaahi kāingá, pea mo hono ngaahi kaungāmeʻá. Naʻe tō tuʻulutui atu mo punou ʻa Koliniusi ki he vaʻe ʻo Pitá, ka naʻe fakafisingaʻi anga-fakatōkilalo ʻe he ʻapositolo ʻa e fakaʻapaʻapa peheé. Naʻá ne lea ʻo kau ki he anga hono pani ʻe Sihova ʻa Sīsū ʻaki ʻa e laumālie māʻoniʻoní mo ha mafai ʻo hoko ko e Misaiá mo fakamatalaʻi ʻoku maʻu ʻe he tokotaha kotoa pē ʻe tui kiate iá ʻa e fakamolemole ʻo e ngaahi angahalá.

¹⁷ Naʻe toki fai ʻe Sihova ha meʻa. (10:​44-48) Lolotonga ʻa e kei lea ʻa Pitá, naʻe foaki ʻe he ʻOtuá ʻa e laumālie māʻoniʻoní ki he kau Senitaile tui ko iá. Naʻe fanauʻi leva kinautolu ʻaki ʻa e laumālie ʻo e ʻOtuá pea naʻe fakamānavaʻi ke nau lea ʻi he ngaahi lea kehekehé mo fakangeingeiaʻi ia. Ko ia ai, naʻe feʻungamālie ʻa hono papitaiso kinautolu ʻi he huafa ʻo Sīsū Kalaisí. Ko ia naʻe ngāueʻaki ʻe Pita ʻa e kī hono tolu ke fakaava ki he kau Senitaile manavahē-ʻOtuá ʻa e matapā ʻo e ʻiló mo e faingamālie ke hū ki he Puleʻanga fakahēvaní.​—Mātiu 16:19.

18. Ko e hā ʻa e meʻa naʻe fai ʻe he fanga tokoua Siú ʻi hono fakamatalaʻi ʻe Pita naʻe ‘papitaiso ʻaki ʻa e laumālie māʻoniʻoni’ ʻa e kau Senitailé’?

¹⁸ Ki mui mai, ʻi Selusalema, naʻe fakakikihi mo Pita ʻa e kau poupou ki he kamú. (11:​1-18) ʻI heʻene fakamatala ki he anga ʻo e ‘papitaiso ʻaki ʻa e laumālie māʻoniʻoní’ ʻa e kau Senitailé, naʻe tuku ʻe he fanga tokoua Siú ʻenau laú pea nau fakalāngilangiʻi ʻa e ʻOtuá mo pehē: “Ta kuo tuku ʻe he ʻOtua ki he Senitaile foki ʻa e fakatomala, koeʻuhi ke nau moʻui.” ʻOku totonu ke tau tali pehē foki mo kitautolu ʻi hono fakamahino kiate kitautolu ʻa e finangalo ʻo e ʻOtuá.

Fokotuʻu ʻa e Fakatahaʻanga Senitailé

19. Naʻe anga-fēfē ʻa e hoko ʻo ui ʻa e kau ākongá ko e kau Kalisitiané?

¹⁹ Kuo fokotuʻu ʻeni ʻa e ʻuluaki fakatahaʻanga Senitailé. (11:​19-26) ʻI he movetevete ʻa e kau ākongá koeʻuhi ko e fakatanga naʻe tupu ʻia Sitīvení, naʻe ʻalu ʻa e niʻihi ki ʻAniteoke, Sīlia, ʻa ia naʻe ʻiloa ʻi he founga lotu taʻemaʻá mo e kovi fakaeʻulungaangá. ʻI heʻenau leaʻaki ʻa e ongoongo leleí ki he kakai lea faka-Kalisi ʻi aí, “naʻe kau mo kinautolu ʻa e mafimafi ʻo e ʻEiki [Sihova],” pea naʻe tokolahi naʻe hoko ʻo tuí. Naʻe faiako ai ʻa Panepasa mo Paula ʻi ha taʻu ʻe taha, pea naʻe “fuofua ui ʻi Aniteoke ʻa e kau ako ko e Kalisitiane.” ʻOku ʻikai ha toe veiveiua naʻe tataki ʻe Sihova ke uiʻaki kinautolu ia, koeʻuhi ko e lea faka-Kalisi ko e khre·ma·tiʹzo ʻoku ʻuhingá “ke ui ʻaki ʻa e tataki faka-ʻOtua” pea ʻoku ngāueʻaki faka-Tohitapu maʻu ai pē ia ʻi he fekauʻaki mo e meʻa mei he ʻOtuá.

20. Ko e hā naʻe kikiteʻi ʻe ʻAkapusí, pea ko e hā ʻa e meʻa naʻe fai ʻe he fakatahaʻanga ʻAniteoké?

²⁰ Naʻe haʻu foki ki ʻAniteoke ʻa e kau palōfita manavahē-ʻOtuá mei Selusalema. (11:​27-30) Ko e tokotaha ko ʻAkapusi, ʻa ia naʻá ne fakahā ‘fakafou mai he laumālié ʻe tō ha fuʻu honge ki māmani kotoa.’ Ko e kikite ko iá naʻe fakahoko he lolotonga ʻa e pule ʻa e ʻemipola Loma ko Kālotí (41-54 T.S.), pea ʻoku lave ʻa e faihisitōlia ko Siosefusi ki he “honge lahi” ko ʻení. (Jewish Antiquities, XX, 51 [ii, 5]; XX, 101 [v, 2]) Naʻe ueʻi ʻe he ʻofá ʻa e fakatahaʻanga ʻi ʻAniteoké ke ʻave ha tokoni ki he ngaahi fiemaʻu ʻa e fanga tokoua ʻi Siuteá.​—Sione 13:35.

Taʻeʻaonga ʻa e Fakatangá

21. Ko e hā ʻa e meʻa naʻe fai ʻe Hēlota ʻAkilipa I kia Pitá, ka ko e hā hono olá?

²¹ Naʻe ngata ʻa e vahaʻa taimi ʻo e melinó ʻi he kamata ke fakatangaʻi ʻe Hēlota ʻAkilipa I ʻa e kau manavahē kia Sihova ʻi Selusalemá. (12:​1-11) Naʻe tāmateʻi ʻe Hēlota ʻa Sēmisi ʻaki ʻa e heletā, ʻo ne tuʻusi nai hono ʻulú ʻo ne hoko ko e ʻuluaki ʻapositolo naʻe mate fakamaʻatá. ʻI he vakai kuo fiemālie ʻa e kau Siú ʻi heʻene fai peheé, naʻe tuku pōpulaʻi ʻe Hēlota ʻa Pita. Ngalingali naʻe sēiniʻi ʻa e ʻapositoló ki ha ongo sōtia ʻi hono ongo tafaʻakí, pea leʻohi ʻe he toko ua kehe ʻa hono pilīsoné. Naʻe palani ʻa Hēlota ke tāmateʻi ia ʻi he hili ʻa e Pāsová mo e ngaahi ʻaho ʻo e tapu lēvaní (Nīsani 14-21), ka ko e ngaahi lotu ʻa e fakatahaʻangá ʻo fekauʻaki mo iá naʻe tali ʻi he taimi totonu, ʻo hangē tofu pē ko e faʻa tali ʻa ʻetau ngaahi lotú ʻi he taimi totonú. Naʻe hoko ʻeni ʻi ha mana ʻa ia naʻe fakahaofi ai ʻa e ʻapositoló ʻe he ʻāngelo ʻa e ʻOtuá.

22. Ko e hā naʻe hoko ʻi he ʻalu ʻa Pita ki he fale ʻo e faʻē ʻa Maʻaké, ko Mele?

²² Naʻe vave ʻa e aʻu ʻa Pita ki he fale ʻo Melé (ko e faʻē ʻa Sione Maʻaké), ngalingali ko e faiʻanga fakataha Kalisitiané ia. (12:​12-19) ʻI he fakapoʻulí, naʻe ʻiloʻi ʻa e leʻo ʻo Pitá ʻe he taʻahine sevāniti ko Lota ka naʻe ʻikai te ne toʻo ʻa e loka ʻo e matapaá. Naʻe tomuʻa fakakaukau nai ʻa e kau ākongá kuo fekau mai ʻe he ʻOtuá ha talafekau ko ha ʻāngelo ʻo ne fakafofongaʻi ʻa Pita mo leaʻaki ha leʻo ʻo hangē ko iá. Kaekehe, ʻi heʻenau tuku ke hū atu ʻa Pitá, naʻá ne tala kiate kinautolu ke fakamatala ʻene haó kia Sēmisi mo e fanga tokouá (mahalo ko e kau mātuʻá). Peá ne ʻalu fakapulipuli pē ʻo ʻikai ke fakahā pe ko ʻene ʻalu ki fē ke fakaʻehiʻehi mei hono fakatupunga ha fakatuʻutāmaki kiate kinautolu pe ko ia tonu ʻi hano fakafehuʻi fakamālohi. Naʻe ʻikai ke siaʻa ʻa e kumi ʻa Hēlota kia Pitá, pea naʻe tautea ʻa e kau leʻó, mahalo pē naʻe tāmateʻi kinautolu.

23. Naʻe anga-fēfē ʻa e ngata ʻa e pule ʻa Hēlota ʻAkilipa I, pea ko e hā ʻoku lava ke tau ako mei hení?

²³ ʻI he 44 T.S. naʻe ngata fakafokifā ʻi Sesalia ʻa e pule ʻa Hēlota ʻAkilipa I ʻi hono taʻu 54 hono motuʻá. (12:​20-25) Naʻá ne tuputāmaki ki he kau Finisia ʻo Tāia mo Saitoní, ʻa ia naʻa nau totongi fufū ʻene sevāniti ko Palasito ke fokotuʻu ha alea ki he melinó. ʻI he “ʻaho naʻe kotofa” (ko ha kātoanga fakalāngilangiʻi foki ia ʻo Kāloti Sisa), naʻe tui ʻe Hēlota ha kofu fakatuʻi, peá ne nofo ʻi he sea fakamaaú, pea kamata ʻene lea ki he kakaí. ʻI hono talí naʻe kalanga ʻa e kakaí: “Ko e folofola ʻa ha ʻOtua, ʻo ʻikai ko ha tangata.” Naʻe teʻia leva ia ʻe he ʻāngelo ʻa e ʻOtuá ko e “ʻikai te ne tuku ʻa e kololia ki he ʻOtua.” Ko Hēlotá naʻe “keina ia ʻe he ponu, ʻo ne hala.” ʻOfa ke hoko ʻa e fakatātā ʻo e fakatokanga ko ʻení ke ne ueʻi kitautolu ke tau ʻaʻeva hokohoko atu ʻi he manavahē kia Sihová, ʻo liʻaki ʻa e loto-pōlepolé pea ʻoatu ʻa e lāngilangí kiate ia ʻi he meʻa ʻoku tau fai ʻi he tuʻunga ko hono kakai.

24. Ko e hā ʻe fakahā ʻe ha kupu ʻi he kahaʻú ʻo fekauʻaki mo ha toe fakatokolahi?

²⁴ Neongo ʻa e fakatanga ʻa Hēlotá, “ko e folofola ʻa e ʻOtua naʻe tuputupu maʻu pe, ʻo fakatokolahi.” Ko hono moʻoní, ʻo hangē ko ia ʻe fakahā ʻe ha kupu ʻi he kahaʻú, naʻe malava ke ʻamanekina ʻe he kau ākongá ha toe fakatokolahi. Ko e hā hono ʻuhingá? Koeʻuhi naʻa nau “ʻaʻeva ʻi he manavahē kia Sihova.”

ʻE Anga-fēfē Haʻo Tali?

◻ Naʻe anga-fēfē ʻa hono fakahā ʻe Sitīveni naʻá ne manavahē kia Sihová, ʻo hangē ko ia kuo fai ʻe he tokolahi ʻo e kau sevāniti ʻa e ʻOtuá talu mei ai?

◻ Ko e hā ʻa e uesia ʻa e mate ʻa Sitīvení ki he ngāue fakamalanga ʻo e Puleʻangá, pea ʻoku ʻi ai hano hoa tatau ʻi onopooni?

◻ Naʻe anga-fēfē ʻa e hoko ʻa e tokotaha fakatanga ko Saula ʻo Tāsusí ko e tokotaha manavahē kia Sihová?

◻ Ko hai ʻa e ʻuluaki kau tui Senitailé?

◻ ʻOku anga-fēfē ʻa hono fakahā ʻe he Ngāue vahe 12 ʻoku ʻikai ke taʻofi ʻe he fakatangá ʻa e kau manavahē kia Sihová?

[Fakatātā ʻi he peesi 16, 17]

Naʻe tapa ha maama mei he langi pea naʻe ʻeke ʻe ha leʻo: “ʻE Saula, ʻe Saula, ko e ha ʻoku ke fakatangaʻi ai au?”