Ko Hai ʻOku Nau ʻAve ki he ʻOtuá ʻa e Lāngilangí he ʻAho Ní?

“Tāu pē Koe, ʻa e ʻAfiona ko homau ʻOtua, ke lau ki ai ʻa e kololia [pe lāngilangi], mo e fakaʻapaʻapa, mo e mafai.”​—FAKAHĀ 4:11.

1, 2. (a) Ko e hā ʻa e ngaahi fakatātā ʻokú ne fakahaaʻi ʻa e malaʻe ʻoku ui ko e paiomimētiká? (e) Ko e hā ʻa e fehuʻi ʻoku malanga haké, pea ko e hā ʻa e talí?

ʻI HE ʻaho ʻe taha ʻi he 1940 tupú, naʻe luelue ai ʻo ʻeveʻeva ha tokotaha ʻenisinia Suisalani ko George de Mestral mo ʻene kulií. ʻI he foki ki ʻapí, naʻá ne fakatokangaʻi ʻa hono valá pea pehē ki he fulufulu ʻo e kulií ʻoku ʻufiʻufi ʻe he fanga kiʻi tengaʻi ʻakau. ʻI he fieʻilo ki aí, naʻá ne sivisiviʻi ʻa e fanga kiʻi tengaʻi ʻakaú ʻi ha meʻa-fakaʻata siemu pea naʻá ne fakatumutumu ai ʻi he fanga kiʻi mātaʻu valevale ʻoku piki maʻu ki ha faʻahinga meʻa pē naʻe fuopotopoto. Naʻe faai mai pē, ʻo ne faʻu foʻou ai ha meʻa tatau ʻoku fihi hono faʻungá—ko e Velcro. Naʻe ʻikai ko de Mestral toko taha pē naʻe faʻifaʻitaki ki he meʻa ʻi natulá. ʻI he ʻIunaite Seteté, naʻe faʻu ai ʻe he ongo tautehina Wright ha vakapuna hili ʻa e ako ki he puna ʻa e fanga manupuna lalahí. Ko e ʻenisinia Falanisē ko Alexandre-Gustave Eiffel naʻá ne tisaini ʻa e taua ʻi Pālesi ʻoku ui ʻaki hono hingoá, ʻo ngāueʻaki ʻa e ngaahi moʻoniʻi meʻa tefito ʻokú ne ʻai ke malava ʻa e hui-alanga ʻo e tangatá ke ne fataki ʻa e mamafa ʻo e sinó.

² ʻOku fakahaaʻi lelei ʻe he ngaahi fakatātaá ni ʻa e meʻa ʻoku ui ko e paiomimētiká, ko e malaʻe ʻo e saienisí ʻoku feinga ke faʻifaʻitaki ki he ngaahi tisaini ʻoku maʻu ʻi natulá.a Kae kehe, ʻoku malanga hake ai ha fehuʻi lelei: ʻOku tuʻo fiha hono ʻave ʻe he kau faʻu meʻa foʻoú ʻa e fakahīkihikí ki he Tokotaha ko ia naʻá ne tisaini ʻa e fanga kiʻi tengaʻi ʻakau valevalé, ʻa e fanga manupuna lalahí, ʻa e hui-alanga fakaetangatá, pea mo e kotoa ʻo e ngaahi muʻaki meʻa fisifisimuʻa ʻa ē ʻoku fakatuʻunga ai ʻa e ngaahi faʻu foʻou fakaetangata lahi? Ko e meʻa fakamamahi ka ʻoku moʻoní he ko e māmani ʻo e ʻaho ní, ʻoku hāhāmolofia ke ʻave ai ki he ʻOtuá ia ʻa e fakahīkihiki pe ko e lāngilangi ʻokú ne tuha mo iá.

3, 4. Ko e hā ʻa e ʻuhinga ʻo e foʻi lea faka-Hepelū naʻe liliu ko e “lāngilangí,” pea ko e hā ʻoku totonu ke ʻuhinga ki ai ʻi hono ngāueʻaki kia Sihová?

³ ‘Ko e hā e ʻuhinga,’ ko e fifili nai ia ʻa e niʻihi, ‘ʻoku fiemaʻu ai ke ʻave ki he ʻOtuá ʻa e lāngilangí? ʻIkai kuo ʻosi lāngilangiʻia pē ʻa e ʻOtuá ia?’ Ko e moʻoni, ko Sihova ʻa e Tokotaha lāngilangiʻia lahi taha ʻi he ʻunivēsí, ka ʻoku ʻikai ʻuhinga eni iá ʻokú ne lāngilangiʻia ʻi he vakai ki ai ʻa e faʻahinga kotoa ʻo e tangatá. ʻI he Tohi Tapú, ko e foʻi lea faka-Hepelū naʻe liliu ko e “lāngilangí” ʻokú ne maʻu ʻa e ʻuhinga tefito ko e “mamafa.” ʻOku ʻuhinga ia ki ha meʻa pē ʻokú ne ʻai ha tokotaha ke hā ngali mamafa ai pe mahuʻinga ki he niʻihi kehé. ʻI hono ngāueʻaki ki he ʻOtuá, ʻoku ʻuhinga ia ki he meʻa ʻokú ne ʻai ke fakaueʻiloto ʻa e ʻOtuá ki he tangatá.

⁴ Ko e tokosiʻi pē he ʻahó ni ʻoku nau ʻiloʻi ʻa e meʻa ʻokú ne ʻai ke fakaueʻiloto ai ʻa e ʻOtuá. (Sāme 10:4; 14:1) Ko hono moʻoní, ko e faʻahinga tuʻu-ki-muʻa ʻi he sōsaietí, kapau ʻoku ʻi ai haʻanau tui ki he ʻOtuá, kuo nau faʻa tākiekina ʻa e kakaí ke nau fakafeangai taʻefakaʻapaʻapa ki he Tokotaha-Fakatupu lāngilangiʻia ʻo e ʻunivēsí. ʻI he ngaahi founga fē kuo nau fai pehē aí?

“ʻOku ʻIkai Ai Hanau Haoʻanga”

5. ʻOku anga-fēfē hono fakamatalakeheʻi ʻe he kau saienisi tokolahi ʻa e ngaahi meʻa fakaofo ʻo e fakatupú?

⁵ ʻOku tuʻukāivi ʻa e kau saienisi tokolahi ʻoku ʻikai ha ʻOtua. ʻOku anga-fēfē leva ʻenau fakamatalaʻi ʻa e ngaahi meʻa fakaofo ʻo e fakatupú, ʻo kau ai ʻa e faʻahinga ʻo e tangatá? ʻOku nau tuku ʻa e ngaahi meʻa fakaofo peheé ki he ʻevalūsiō, ko ha mālohi kui ʻoku makatuʻunga ʻi ha meʻa hokonoa. Ko e fakatātaá, ko e tui ʻevalūsiō ko Stephen Jay Gould naʻá ne tohi: “ʻOku tau ʻi hení koeʻuhi ko ha kulupu anga-kehe ʻe taha ʻo e fanga iká naʻe ʻi ai hano kaponga faikehe naʻe malava ke liliu ko e ngaahi vaʻe ki he ngaahi meʻamoʻui fakamāmaní . . . Te tau hoholi nai ki ha tali ‘māʻolunga ange’—ka ʻoku halaʻatā ke ʻi ai.” ʻI he founga meimei tatau, naʻe tohi ʻe Richard Leakey mo Roger Lewin: “Mahalo pē ko e faʻahinga fakaetangatá ko ha fuʻu fehālaaki fakapaiolosī pē ia.” Naʻa mo e kau saienisi ʻe niʻihi ʻoku nau fakahīkihikiʻi ʻa e fakaʻofoʻofa mo e tisaini ʻi natulá ʻoku ʻikai ke nau ʻave ʻa e lāngilangí ki he ʻOtuá.

6. Ko e hā ʻokú ne fakalotoʻi ʻa e tokolahi ke ʻoua te nau ʻave ki he ʻOtuá ʻa e lāngilangi ʻokú ne tuha mo ia ʻi he tuʻunga ko e Tokotaha-Fakatupú?

⁶ ʻI he fakamatematē mai ʻa e faʻahinga ako māʻolunga tāutahá ko e ʻevalūsiō ko ha moʻoniʻi meʻá, ʻoku nau fakahuʻunga mai ai ko e kau taʻeʻiló pē ʻoku nau fakafisi ke tui ki aí. ʻOku anga-fēfē ʻa e tali ʻa e tokolahi ki ha fakamatematē pehē? ʻI he ngaahi taʻu kuo maliu atú, naʻe fakaʻekeʻeke ai ʻe ha tangata mataotao ʻi he ʻevalūsiō ʻa e kakai ko ia naʻe ʻikai te nau tali ʻa e foʻi fakakaukau ko iá. Naʻá ne pehē: “Naʻá ku ʻiloʻi ko e tokolahi taha ʻo e kau tui ki he ʻevalūsiō ko e kau tui pē koeʻuhi naʻe tala ange kiate kinautolu ko e kakai ʻatamaiʻia kotoa pē ʻoku nau tui ki ai.” ʻIo, ʻi hono fakahā ʻe he faʻahinga ako lelei tāutahá ʻenau ngaahi fakakaukau fakaʻikaiʻi-ʻOtuá, ʻoku fakalotoʻi ai ʻa e niʻihi kehé ke ʻoua te nau ʻave ki he ʻOtuá ʻa e lāngilangi ʻokú ne tuha mo ia ʻi he tuʻunga ko e Tokotaha-Fakatupú.—Palovepi 14:​15, 18.

7. Fakatatau ki he Loma 1:​20, ko e hā ʻoku malava ke sio lelei ki ai fakafou ʻi he fakatupu hāmaí, pea ko e hā hono ʻuhingá?

⁷ Kuo aʻu ʻa e kau saienisí ki heʻenau ngaahi fakamulitukú koeʻuhi ko e tuhu tonu ki ai ʻa e ngaahi foʻi moʻoní mo e fakamoʻoní? ʻIkai ʻaupito! ʻOku takatakaiʻi kitautolu ʻe he fakamoʻoni ʻo ha Tokotaha-Fakatupu. ʻI he fekauʻaki mo iá, naʻe tohi ʻe he ʻapositolo ko Paulá: “Naʻa mo e ngaahi meʻa oʻona ʻoku taʻehāmai, ka talu e ngaohi ʻo mamani [ʻo e faʻahinga ʻo e tangatá] mo e ha ia [pe sio lelei ki ai], ʻi hono ʻutangiʻi mei he ngaahi meʻa kuo ne ngaohi, ʻio, ʻa hono māfimafi mo hono ʻotua, ʻo fakatou lau itaniti; ko ia ʻoku ʻikai ai hanau [kau taʻetuí] haoʻanga.” (Loma 1:20) ʻOku malava ke tau sio lelei ki he fakamoʻoni ʻo e Tokotaha-Fakatupú ʻi he ngāue ʻa hono toʻukupú. Ko ia ʻoku lea ai ʻa Paula ʻo pehē ko e talu mei he kamataʻanga ʻo e ʻi ai ʻa e faʻahinga ʻo e tangatá, mo e malava ʻa e faʻahinga ʻo e tangatá ke ‘ʻutangiʻi’ ʻa e fakamoʻoni ʻo e ʻi ai ʻa e ʻOtuá fakafou ʻi he fakatupu hāmaí. Ko fē ʻa e fakamoʻoni ko ʻení?

8. (a) ʻOku anga-fēfē ʻa e fakamoʻoni ʻa e langi matelié ki he mālohi mo e poto ʻo e ʻOtuá? (e) Ko e hā ʻokú ne fakahaaʻi naʻe ʻi ai ha Muʻaki Tupuʻanga ʻo e ʻunivēsí?

⁸ ʻOku tau sio ki he fakamoʻoni ʻo e ʻOtuá ʻi he ngaahi langi fetuʻuá. “Ko e ngaahi langi ʻoku nau tala ʻa e nāunauʻia [pe lāngilangi] ʻo e ʻOtua,” ko e lau ia ʻa e Sāme 19:1. “Ko e ngaahi langi”—ʻa e laʻaá, māhiná, mo e ngaahi fetuʻú—ʻoku nau fakamoʻoni ki he mālohi mo e poto ʻo e ʻOtuá. Ko e lahi fau ʻo e ngaahi fetuʻú ʻoku nau fakafonu kitautolu ʻaki ʻa e fakatumutumu. Pea ko e kotoa ʻo e ngaahi nāunau fakahēvani ko ʻení ʻoku nau ngaʻunu takai ʻi he vavaá, ʻo ʻikai taumuʻavalea, ka ʻoku fakatatau ki he ngaahi lao fakamatelie tonu matematē.b (Aisea 40:26) ʻOku ʻuhinga lelei ke tau tuku ha tuʻunga maau pehē ki ha meʻa hokonoa taʻeʻuhinga pē? ʻOku taau ke fakatokangaʻi, ʻoku pehē ʻe he kau saienisi tokolahi naʻe fakafokifā pē ʻa e kamataʻanga ʻo e ʻunivēsí. ʻI hono fakamatalaʻi ʻa e ngaahi ʻuhinga ki aí, naʻe tohi ʻe ha palōfesa ʻe taha: “Ko ha ʻuniveesi ʻoku ʻi ai taʻengata ʻoku ala tali lahi ange ia ʻi ha [fakakaukau] fakaʻikaiʻi-ʻOtua pe fakaeʻakinositika. ʻI he tuʻunga meimei tatau, ko ha ʻuniveesi naʻe ʻi ai hano kamataʻanga ʻoku hā ngali naʻe pau ke ʻi ai hano muʻaki tupuʻanga; he ko hai ʻe malava ke ne fakakaukau atu ki ha meʻa ʻoku hoko taʻeʻiai hano tupuʻanga feʻungamālie?”

9. ʻOku anga-fēfē ʻa e hā mahino ʻa e poto ʻo Sihová ʻi he fakatupu ʻo e fanga manú?

⁹ ʻOku tau toe sio ʻi he māmaní ki he fakamoʻoni ʻo e ʻOtuá. Naʻe kalanga ʻa e tokotaha-tohi-sāmé: “Hono ʻikai ko e fuʻufuʻunga meʻa hoʻo ngaahi ngaue, ʻe Sihova! Pea ko e poto kuo ke ngaohi ʻaki hono kotoa: ʻoku fonu ʻa mamani ʻi hoʻo koloa.” (Sāme 104:24) Ko e “koloa” ʻa Sihová, ʻo kau ai ʻa e fakatupu ʻo e fanga manú, ʻoku fakamoʻoni ia ki hono potó. Hangē ko ia naʻa tau fakatokangaʻi ʻi he kamatá, ko e tisaini ʻo e ngaahi meʻamoʻuí ʻi he tuʻunga māʻolunga peheé ʻoku faʻa feinga ai ʻa e kau saienisí ke faʻifaʻitaki ki ai. Fakakaukau angé ki ha ngaahi fakatātā ʻe niʻihi. ʻOku ako ʻa e kau fakatotoló ki he ngaahi meʻa-tui mangamangá, ʻi he taumuʻa ke faʻu ha ngaahi tatā mālohi ange; ʻoku nau sivisiviʻi ha faʻahinga ʻo e langó ʻokú ne maʻu ha fanongo mātuʻaki mālohi, ʻi he fakakaukau atu ki hano ʻai ke fakalakalaka ange ʻa e ngaahi meʻa tokoni ki he fanongó; pea ʻoku nau sivisiviʻi ʻa e ngaahi fulufulu kapakau ʻo e lulú, ʻi he fakakaukau ke ʻai ke fakalakalaka ange ʻa e ngaahi vakapuna fakapulipulí. Kae tatau ai pē pe ko e hā ʻa e lahi ʻo ʻene feingá, heʻikai malava ʻe he tangatá ke ne ngaohi ʻa e tatau moʻoni ʻo e ngaahi muʻaki meʻa haohaoa ʻoku maʻu ʻi natulá. ʻOku fakamatala ʻa e tohi ko e Biomimicry​—Innovation Inspired by Nature: “Kuo fai ʻe he ngaahi meʻamoʻuí ʻa e meʻa kotoa pē ʻoku tau fiemaʻu ke faí, ʻo ʻikai ngāueʻaki tōtuʻa ha fefie fōsili, ʻuliʻi ʻo e palanité, pe ʻai ke fakatuʻutāmaki ʻa honau kahaʻú.” Ko ha poto moʻoni ē!

10. Ko e hā ʻoku taʻetotonu ai ke fakaʻikaiʻi ʻa e ʻi ai ʻa ha Tokotaha-Tisaini Lahí? Fakatātaaʻi.

¹⁰ Pe ko haʻo sio hake ki he ngaahi langí ʻi ʻolunga pe sio fakamamaʻu ki he fakatupu ʻi heni tonu ʻi he māmaní, ʻoku hā mahino ʻa e fakamoʻoni ʻo ha Tokotaha-Fakatupú. (Selemaia 10:12) ʻOku totonu ke tau mātuʻaki loto-tatau mo e ngaahi meʻamoʻui fakahēvani ko ia ʻoku nau kalanga: “Tāu pē Koe, ʻa e ʻAfiona ko homau ʻOtua, ke lau ki ai ʻa e kololia [pe lāngilangí], mo e fakaʻapaʻapa, mo e mafai: he ko koe ia naʻa ke ngaohi ʻa e meʻa kotoa pē.” (Fakahā 4:11) Ka, ʻoku ʻikai malava ʻa e kau saienisi tokolahi ke sio ki he fakamoʻoní ʻaki ‘ʻa e mata ʻo honau lotó,’ neongo ʻoku nau ofoofo ʻi he tisaini ʻoku ʻi he ngaahi meʻa ʻoku nau sio ki ai ʻaki honau matá tonu. (Efeso 1:18) ʻOku malava ke tau fakatātaaʻi ia ʻi he foungá ni: Ke manumanumelieʻia ʻi he fakaʻofoʻofa mo e tisaini ʻi natulá pea fakaʻikaiʻi ʻa e ʻi ai ha Tokotaha-Tisaini Lahí ʻoku taʻetotonu tatau pē ia mo e manumanumelieʻia ʻi ha tā valivali fisifisimuʻa pea fakaʻikaiʻi ʻi he taimi tatau pē ʻa e ʻi ai ʻa e tokotaha-ʻaati ko ia naʻá ne liliu ha lauʻi lā taʻeʻiai ha meʻá ʻo hoko ko ha ngāue mataotaó. ʻOku ʻikai ha ofo ʻi hono fakahaaʻi ʻa e faʻahinga ʻoku nau fakafisi ke tui ki he ʻOtuá “ʻoku ʻikai ai hanau haoʻanga”!

“Koto Takimuʻa Kui” ʻOku Nau Takihalaʻi ʻa e Tokolahi

11, 12. ʻOku fakatuʻunga ʻa e tokāteline ʻo e tomuʻa fakatufakangaʻí ʻi he foʻi fakamahalo ko e hā, pea ko e hā ʻokú ne fakahaaʻi ko e tokāteline ko ʻení ʻoku ʻikai te ne fakalāngilangiʻi ʻa e ʻOtuá?

¹¹ Ko e kakai lotu tokolahi ʻoku nau tui loto-moʻoni ko ʻenau founga lotú ʻoku ʻave ai ki he ʻOtuá ʻa e lāngilangí. (Loma 10:​2, 3) Kae kehe, kuo hanga ʻe he lotú ʻi he tuʻunga fakalūkufuá ʻo fokotuʻu ha toe konga ʻe taha ʻo e sōsaieti fakaetangatá kuó ne taʻofi moʻoni ʻe ia ʻa e laui miliona mei hono fakalāngilangiʻi ʻa e ʻOtuá. ʻO anga-fēfē? Tau lāulea ki ha founga ʻe ua.

¹² ʻUluakí, ʻoku toʻo ʻe he ngaahi lotú ʻa e lāngilangí mei he ʻOtuá fakafou ʻi he ngaahi akonaki loí. Fakatātāʻaki ʻa e akonaki ʻo e tomuʻa fakatufakangaʻí. ʻOku fakatuʻunga ʻa e tokāteline ko ʻení ʻi he fakamahalo ʻo pehē koeʻuhi ʻoku maʻu ʻe he ʻOtuá ʻa e mālohi ke ʻafioʻi ʻa e kahaʻú, kuo pau pē ʻokú ne toka ʻafioʻi ʻa e ola ʻo e meʻa kotoa pē. ʻOku pehē ʻe he tomuʻa fakatufakangaʻí ko e ʻOtuá naʻá ne tomuʻa fakapapauʻi fuoloa ʻa e kahaʻu—lelei pe kovi—ʻo e tokotaha tāutaha kotoa pē. Fakatatau ki he foʻi fakakaukau ko ʻení, ko e tukuakiʻi ki he faingataʻa mo e fulikivanu kotoa pē ʻi he māmani ʻo e ʻaho ní kuo pau ke tuku ia ki he ʻOtuá. ʻOku ʻikai moʻoni ke fakalāngilangiʻi ʻa e ʻOtuá ʻi hono tuku kiate ia ʻa e tukuakiʻi ʻoku totonu ke fai ki hono Fili lahí, ʻa Sētane, ʻa e tokotaha ko ia ʻoku ui ʻe he Tohi Tapú ko e “ʻeiki ʻo māmani”!—Sione 14:30; 1 Sione 5:19.

13. Ko e hā ʻoku fakavalevale ai ke fakakaukau atu ʻoku ʻikai lava ʻe he ʻOtuá ke ne puleʻi ʻene malava ke ʻafioʻi ʻa e kahaʻú? Fakatātaaʻi.

¹³ Ko e tomuʻa fakatufakangaʻí ko ha akonaki taʻefakatohitapu ia ʻokú ne lauʻikovi loi ʻa e ʻOtuá. ʻOkú ne fetoʻoaki ʻa e meʻa ʻoku malava ke ne faí mo e meʻa ʻokú ne fai moʻoní. Ko e moʻoniʻi meʻa ko ia ʻo e malava ke tomuʻa ʻafioʻi ʻe he ʻOtuá ʻa e ngaahi meʻa ʻe hokó ʻoku fakahā mahino mai ia ʻi he Tohi Tapú. (Aisea 46:​9, 10) Kae kehe, ʻoku taʻetotonu ke fakakaukau atu ʻe ʻikai te ne lava ke puleʻi ʻa ʻene malava ke ʻafioʻi ʻa e kahaʻú pe ke tukuakiʻi kiate ia ʻa e meʻa kotoa pē ʻoku hokó. Ke fakatātaaʻi: Tau pehē pē naʻá ke maʻu ha mālohi fakaesino lahi. ʻE hanga ʻe he meʻa ko iá ʻo ʻai koe ke ke ongoʻi hehema ke ke hiki ʻa e meʻa mamafa kotoa pē ʻokú ke sio ki aí? Ko hono moʻoní heʻikai! Pehē foki, ko hono maʻu ʻa e malava ke ʻafioʻi ʻa e kahaʻú ʻoku ʻikai ke ueʻi ai ʻa e ʻOtuá ia ke ne tomuʻa ʻafioʻi pe tomuʻa fakapapauʻi ʻa e meʻa kotoa pē. Ko ʻene ngāueʻaki ʻa e tomuʻa ʻafioʻí ʻoku filifili mo fai fakapotopoto.c ʻOku hā mahino, ko e ngaahi akonaki loí, ʻo kau ai ʻa e tomuʻa fakatufakangaʻí, ʻoku ʻikai ke nau fakalāngilangiʻi ʻa e ʻOtuá.

14. ʻI he founga fē kuo taʻefakalāngilangiʻi ai ʻa e ʻOtuá ʻe ha kautaha lotu?

¹⁴ Ko ha founga hono ua ʻoku taʻefakalāngilangiʻi ai ʻa e ʻOtuá ʻe ha kautaha lotu ʻoku fakafou ia ʻi he ʻulungāanga ʻo hono kau muimuí. ʻOku ʻamanekina ʻa e kau Kalisitiané ke nau muimui ʻi he ngaahi akonaki ʻa Sīsuú. ʻI he lotolotonga ʻo e ngaahi meʻa kehé, naʻe akoʻi ʻe Sīsū ʻa hono kau muimuí ke nau “feʻofaʻaki” pea hanganaki “ʻikai te nau ʻo māmāni.” (Sione 15:12; 17:​14-16) Fēfē ʻa e kau mēmipa ʻo e haʻa faifekau ʻo e Puleʻanga-Haʻa-Kalisitiané? Kuo nau muimui moʻoni ki he ongo akonaki ko iá?

15. (a) Ko e hā ʻa e lēkooti ʻo e haʻa faifekaú ʻi he fekauʻaki mo e ngaahi tau ʻa e ngaahi puleʻangá? (e) Ko e hā kuo fai ʻe he ʻulungāanga ʻo e haʻa faifekaú ki he laui miliona?

¹⁵ Fakakaukau atu ki he lēkooti ʻo e haʻa faifekaú ʻi he fekauʻaki mo e taú. Kuo nau poupouʻi, fakamolemoleʻi, pea aʻu ʻo takimuʻa ʻi he ngaahi tau lahi ʻa e ngaahi puleʻangá. Kuo nau tāpuakiʻi ʻa e kau taú pea fakatonuhiaʻi ʻa e tāmaté. ʻOku tau ongoʻi ʻoku ueʻi kitautolu ke tau fifili, ‘Kuo ʻikai ʻaupito ke hā ki he kau faifekau peheé ko honau kaungā haʻa faifekau ʻi he tafaʻaki fakafepakí ʻoku nau fai ʻa e meʻa tatau pē?’ (Sio ki he puha “Ko e Tafaʻaki ʻa Hai ʻOku ʻI Ai ʻa e ʻOtuá?”) ʻOku ʻikai ke fakalāngilangiʻi ʻe he haʻa faifekaú ʻa e ʻOtuá ʻi he taimi ʻoku nau taukaveʻi ai ʻoku nau maʻu ʻene tokoní ʻi he ngaahi tau totoʻiá; ʻoku ʻikai foki ke nau fakalāngilangiʻi ia ʻi heʻenau talaki kuo ʻosi ʻa e taimi ia ʻo e ngaahi tuʻunga ʻa e Tohi Tapú pea fakamolemoleʻi pē ʻa e ʻulungāanga taʻetaau fakaefehokotaki fakasinó ʻi ha faʻahinga tuʻunga pē. He fakamanatu lelei moʻoni mai ē ʻe kinautolu kiate kitautolu ʻa e kau taki lotu ko ia naʻe ui ʻe Sīsū ko e “kau maumau lao” mo e “koto takimuʻa kui”! (Mātiu 7:​15-23; 15:14) Ko e ʻulungāanga ʻo e haʻa faifekaú kuó ne fakatupunga ʻa e laui miliona ke fakaʻaʻau ʻo momoko ʻa ʻenau ʻofa ki he ʻOtuá.—Mātiu 24:12.

Ko Hai ʻOku Nau ʻAve Moʻoni ki he ʻOtuá ʻa e Lāngilangí?

16. Ke tali ʻa e fehuʻi pe ko hai ʻoku nau ʻave moʻoni ki he ʻOtuá ʻa e lāngilangí, ko e hā kuo pau ai ke tau sio ki he Tohi Tapú?

¹⁶ Kapau kuo ʻikai malava ʻe he kakai tuʻu-ki-muʻa mo ʻiloa ʻo e māmaní ʻi he tuʻunga fakalūkufuá ke fakalāngilangiʻi ʻa e ʻOtuá, ko hai leva ʻoku nau fai moʻoni iá? Ke tali ʻa e fehuʻi ko iá, kuo pau ke tau sio ki he Tohi Tapú. Ko hono moʻoní, ko e ʻOtuá ʻokú ne maʻu ʻa e totonu ke ne tala mai ʻa e founga ke fakalāngilangiʻi ai iá, pea ʻokú ne fokotuʻu ʻa e ngaahi tuʻungá ʻi heʻene Folofolá, ko e Tohi Tapú. (Aisea 42:8) Tau vakai angé ki he ngaahi founga ʻe tolu ke fakalāngilangiʻi ai ʻa e ʻOtuá, ʻo lāulea ʻi he tuʻunga taki taha ki he fehuʻi pe ko hai he ʻahó ni ʻoku nau fai moʻoni iá.

17. Naʻe anga-fēfē hono fakahaaʻi ʻe Sihova tonu ko hono fakalāngilangiʻi hono huafá ko ha tafaʻaki mātuʻaki mahuʻinga ia ʻo hono finangaló, pea ko hai he ʻahó ni ʻoku nau fakahīkihikiʻi ʻa e huafa ʻo e ʻOtuá ʻi he kotoa ʻo e māmaní?

¹⁷ ʻUluakí, ʻoku malava ke tau fakalāngilangiʻi ʻa e ʻOtuá ʻaki hono fakahīkihikiʻi ʻa hono huafá. ʻOku hā mahino ko hono fai iá ko ha tafaʻaki mātuʻaki mahuʻinga ia ʻo e finangalo ʻo e ʻOtuá mei he meʻa naʻe leaʻaki ʻe Sihova kia Sīsuú. ʻI ha ngaahi ʻaho siʻi ki muʻa peá ne pekiá, naʻe lotu ʻa Sīsū: “ʻAlā Tamai, ke ke fakalangilangiʻi hoʻou huafa.” Naʻe tali mai leva ʻe ha leʻo: “Kuo u fakalangilangiʻi ia, pea te u toe fakalangilangiʻi foki.” (Sione 12:28) Ko e tokotaha-leá ʻoku ʻikai ha toe veiveiua ko Sihova tonu ia. Mei heʻene talí, ʻoku hā mahino ai ko hono fakalāngilangiʻi ʻa hono huafá ʻoku mahuʻinga ia kiate ia. Ko hai leva he ʻahó ni ʻoku nau fakalāngilangiʻi ʻa Sihova ʻaki hono ʻai hono huafá ke ʻiloa pea fakahīkihikiʻi ia ʻi he kotoa ʻo e māmaní? Ko e Kau Fakamoʻoni ʻa Sihová ia, pea ʻoku nau fai ia ʻi he ngaahi fonua ʻe 235!—Sāme 86:​11, 12.

18. ʻE malava fēfē ke tau ʻiloʻi fakapapau ʻa e faʻahinga ko ia ʻoku nau lotu ki he ʻOtuá ʻo fai ʻi he “moʻoni,” pea ko e hā ʻa e kulupu kuó ne akoʻi ʻa e moʻoni ʻa e Tohi Tapú ʻo laka hake ʻi ha senitulí?

¹⁸ Uá, ʻoku malava ke tau fakalāngilangiʻi ʻa e ʻOtuá ʻaki hono akoʻi ʻa e moʻoni fekauʻaki mo iá. Naʻe pehē ʻe Sīsū ko e kau lotu moʻoní te nau “lotu [ki he ʻOtuá] . . . ʻi moʻoni.” (Sione 4:24) ʻE malava fēfē ke tau ʻiloʻi fakapapau ʻa e faʻahinga ko ia ʻoku nau lotu ki he ʻOtuá ʻo fai ʻi he “moʻoni”? Kuo pau ke nau talitekeʻi ʻa e ngaahi tokāteline ʻoku ʻikai makatuʻunga ʻi he Tohi Tapú pea ʻoku fakafofongahalaʻi ai ʻa e ʻOtuá mo hono finangaló. ʻI hono kehé, kuo pau ke nau akoʻi ʻa e ngaahi moʻoni maʻa ʻo e Folofola ʻa e ʻOtuá, ʻo kau ai ʻa e ngaahi meʻá ni: Ko Sihova ʻa e ʻOtua Fungani Māʻolungá, pea ko e lāngilangi ʻo e tuʻunga ko iá ʻoku ʻalu ia kiate ia toko taha pē (Sāme 83:18); ko Sīsuú ko e ʻAlo ia ʻo e ʻOtuá pea ko e Pule kuo fakanofo ʻo e Puleʻanga Faka-Mīsaia ʻo e ʻOtuá (1 Kolinito 15:​27, 28); ko e Puleʻanga ʻo e ʻOtuá te ne fakamāʻoniʻoniʻi ʻa e huafa ʻo Sihová pea fakahoko ʻene taumuʻa ki he māmaní pea mo e faʻahinga ʻo e tangatá ʻoku ʻi aí (Mātiu 6:​9, 10); ko e ongoongo lelei fekauʻaki mo e Puleʻanga ko ʻení kuo pau ke malangaʻi ʻi he kotoa ʻo e māmaní. (Mātiu 24:14) Laka hake ʻeni ʻi ha senituli, ko e kulupu pē ʻe taha kuó ne akoʻi faitōnunga ʻa e ngaahi moʻoni mahuʻinga peheé—ko e Kau Fakamoʻoni ʻa Sihová!

19, 20. (a) Ko e hā ʻoku malava ai ʻe ha ʻulungāanga lelei ʻo ha Kalisitiane ke ne ʻoatu ʻa e lāngilangí ki he ʻOtuá? (e) Ko e hā ʻa e ngaahi fehuʻi ʻoku malava ke ne tokoniʻi kitautolu ke tau fakapapauʻi pe ko hai he ʻahó ni ʻoku nau fakalāngilangiʻi ʻa e ʻOtuá ʻaki hono tauhi maʻu ʻa e ʻulungāanga leleí?

¹⁹ Tolú, ʻoku malava ke tau fakalāngilangiʻi ʻa e ʻOtuá ʻaki ʻa e moʻui ʻo fehoanaki mo ʻene ngaahi tuʻungá. Naʻe tohi ʻe he ʻapositolo ko Pitá: “ʻO mou ʻai ke tāu hoʻomou fakafeangai ki he Senitaile; koeʻuhi, ʻi he meʻa ʻoku nau lauʻikovi ai kimoutolu, tokua ko e faikovi, ke nau mamata ki hoʻomou ngaahi ngaue lelei, pea langaʻi ai ʻenau fakahikihikiʻi ʻa e ʻOtua ʻi he ʻaho ʻo e aʻahi.” (1 Pita 2:12) ʻOku tapua mai ʻa e ʻulungāanga ʻo ha Kalisitiane ʻi heʻene tuí. ʻI he vakai ki ai ʻa e faʻahinga ʻoku sio maí—ʻa ia, ʻi heʻenau sio ko e ʻulungāanga lelei ʻo e Kalisitiané ko ha ola fakahangatonu ia ʻo ʻene tuí—ʻoku ʻoatu ai ʻa e fakalāngilangi ki he ʻOtuá.

²⁰ Ko hai he ʻahó ni ʻoku nau fakalāngilangiʻi ʻa e ʻOtuá ʻaki hono tauhi maʻu ʻa e ʻulungāanga leleí? Sai, ko e hā ʻa e kulupu lotu kuo fakahīkihikiʻi ʻe he ngaahi puleʻanga lahi ki heʻenau hoko ko e kau tangataʻifonua fakamelino mo tauhi-lao ʻa ia ʻoku nau totongi ʻenau ngaahi tukuhaú? (Loma 13:​1, 3, 6, 7) Ko e hā ʻa e kakai ʻoku ʻiloa ʻi he māmaní kotoa ʻi heʻenau fāʻūtaha mo honau kaungātuí—ko ha fāʻūtaha ʻoku mahulu hake ia ʻi he ngaahi faikehekehe fakamatakalí, fakafonuá, pea mo fakaefaʻahingá? (Sāme 133:1; Ngāue 10:​34, 35) Ko e hā ʻa e kulupu ʻoku fakatokangaʻi ʻi māmani lahi ʻi heʻenau ngāue fakaeako Tohi Tapu ʻoku pouaki ai ʻa e fakaʻapaʻapa ki he laó, ngaahi tuʻunga mahuʻinga fakafāmilí, mo e ʻulungāanga taau Fakatohitapú? ʻOku taha pē ʻa e kulupu ʻa ia ko hono ʻulungāanga lelei ʻi he ngaahi tafaʻakí ni mo e ngaahi tafaʻaki kehé ʻoku fakamoʻoniʻí—ko e Kau Fakamoʻoni ʻa Sihová!

ʻOkú Ke ʻAve ki he ʻOtuá ʻa e Lāngilangí?

21. Ko e hā ʻoku totonu ai ke tau fakakaukau pe ʻoku tau ʻave fakafoʻituitui ʻa e lāngilangí kia Sihová?

²¹ ʻOku totonu ki he tokotaha taki taha ʻo kitautolu ke tau ʻeke hifo, ‘ʻOku ou ʻave fakafoʻituitui kia Sihova ʻa e lāngilangí?’ Fakatatau ki he Sāme 148, ko e tokolahi taha ʻo e meʻa fakatupú ʻoku nau ʻave ki he ʻOtuá ʻa e lāngilangí. Ko e kau ʻāngeló, ko e ngaahi langi fakamatelié, ko e māmaní mo hono meʻa fakatupu ko e fanga manú—ʻoku nau fakahīkihikiʻi kotoa ʻa Sihova. (Sāme 148:Veesi 1-10) He meʻa fakamamahi ē ko e tokolahi taha ʻo e faʻahinga ʻo e tangatá he ʻaho ní ʻoku ʻikai te nau fai ia! ʻI he moʻui ʻi ha founga ʻoku ʻave ai ki he ʻOtuá ʻa e lāngilangí, ʻokú ke ʻai ai ʻa koe tonu ke ke feongoongoi ai mo e toenga ʻo e meʻa fakatupú ʻa ia ʻoku nau fakahīkihikiʻi ʻa Sihová. (Sāme 148:Veesi 11-13) ʻOku ʻikai ha toe founga lelei ange ke ngāueʻaki ai hoʻo moʻuí.

22. ʻI hono ʻave kia Sihova ʻa e lāngilangí, ʻi he ngaahi founga fē ʻoku tāpuekina ai koé, pea ko e hā ʻoku totonu ko hoʻo fakapapaú ia?

²² ʻI hono ʻave kia Sihova ʻa e lāngilangí, ʻoku tāpuekina ai koe ʻi he ngaahi founga lahi. ʻI hoʻo ngāueʻi ʻa e tui ki he feilaulau huhuʻi ʻa Kalaisí, ʻokú ke hoko ai ʻo fakalelei mo e ʻOtuá pea maʻu ai ha vahaʻangatae melino mo fua lahi mo hoʻo Tamai fakahēvaní. (Loma 5:10) ʻI hoʻo kumi ki ha ngaahi ʻuhinga ke ʻave ai ki he ʻOtuá ʻa e lāngilangí, ʻokú ke hoko ai ʻo fakatuʻamelie mo loto-houngaʻia lahi ange. (Selemaia 31:12) Te ke ʻi ha tuʻunga leva ai ke tokoniʻi ʻa e niʻihi kehé ke nau moʻui ʻi ha founga moʻui fiefia, mo mohu taumuʻa, ʻo ke maʻu ai ʻe koe tonu ʻa e fiefia lahi ange. (Ngāue 20:35) ʻOfa ke ke ʻi he lotolotonga ʻo e faʻahinga ʻa ia ʻoku nau fakapapauʻi mālohi ke ʻave ki he ʻOtuá ʻa e lāngilangí—ʻi he taimí ni pea taʻengata!

[Fakamatala ʻi lalo]

ʻOkú Ke Manatuʻi?

• Ko e hā ʻoku malava ai ke tau pehē kuo ʻikai hanga ʻe he kau saienisí ʻi he tuʻunga fakalūkufuá ʻo tokoniʻi ʻa e kakaí ke nau fakalāngilangiʻi ʻa e ʻOtuá?

• ʻI he ongo founga fē kuo taʻofi ai ʻe ha kautaha lotu ʻa e kakaí mei hono ʻave ki he ʻOtuá ʻa e lāngilangí?

• ʻI he ngaahi founga fē ʻe malava ke tau fakalāngilangiʻi ai ʻa e ʻOtuá?

• Ko e hā ʻoku totonu ai ke ke fakakaukau atu pe ʻokú ke ʻave fakafoʻituitui kia Sihova ʻa e lāngilangí?

[Puha ʻi he peesi 12]

“Ko e Tafaʻaki ʻa Hai ʻOku ʻI Ai ʻa e ʻOtuá?”

Ko ha tangata naʻe ʻi he Laulā Puna Siamané he lolotonga ʻa e Tau II ʻa Māmaní ka naʻá ne hoko ki mui ko e taha ʻo e Kau Fakamoʻoni ʻa Sihová ʻokú ne manatuʻi:

“Ko e meʻa naʻá ne fakahohaʻasi au he lolotonga ʻo e ngaahi taʻu ko ia ʻo e taú . . . ko e sio ki he meimei haʻa faifekau ʻo e ngaahi lotú kotoa—ʻa e Katoliká, Lūteló, Lotu Fakaepīsopé, mo e hā fua—ʻoku nau tāpuakiʻi ʻa e ngaahi vakapuná mo honau kau kauvaká ki muʻa ke nau mavahe atu ʻi he ngaahi tuʻutuʻuni ke laku ʻenau ngaahi uta fakatupu maté. Naʻá ku faʻa fakakaukau, ‘Ko e Tafaʻaki ʻa Hai ʻOku ʻI Ai ʻa e ʻOtuá?’

“Naʻe tui ʻe he kau sōtia Siamané ha leta ʻa ia naʻe tongi ʻi he pākoló ʻa e foʻi lea Gott mit uns (ʻOku ʻiate kitautolu ʻa e ʻOtuá). Ka naʻá ku fifili, ‘Ko e hā ʻe ʻikai ke kau ai ʻa e ʻOtuá mo e kau sōtia ʻi he tafaʻaki ʻe tahá ʻa ia ʻoku nau ʻi he lotu tatau pea naʻa nau lotu ki he ʻOtua tatau pē?’”

[Fakatātā ʻi he peesi 10]

ʻI he kotoa ʻo e māmaní, ʻoku ʻave moʻoni ai ʻe he Kau Fakamoʻoni ʻa Sihová ʻa e lāngilangí ki he ʻOtuá