Kau Mātuʻa, Fakamaau ʻAki ʻa e Māʻoniʻoni

“Mou fanogo ki he gaahi mea a ho mou gaahi kaiga, bea fakamāu maonioni.”​—TEUTALONOME 1:16, PM.

 1. ʻI he meʻa fekauʻaki mo e fakamaaú, kuo hoko ʻa e tuku ʻo e mafai fē, pea ko e hā ʻoku fakahuʻuhuʻu ʻe he meʻá ni ki he kau fakamaau ʻi he faʻahinga ʻo e tangatá?

ʻI HE tuʻunga ko e Fakamaau Aoniú, kuo tuku ai ʻe Sihova ʻa e mafai fakaefakamaau ki hono ʻAló. (Sione 5:27) Pehē pē, ʻi he tuʻunga ko e ʻUlu ʻo e fakatahaʻanga Kalisitiané, ʻoku ngāueʻaki ai ʻe Kalaisi ʻa e kalasi tamaioʻeiki angatonu mo potó mo hono Kulupu Pulé ke fakanofo ha kau mātuʻa, ʻa ia ʻi he taimi ʻe niʻihi te nau hoko ʻo hangē ko e kau fakamaau. (Mātiu 24:​45-47; 1 Kolinitō 5:​12, 13; Taitusi 1:​5, 9) ʻI he tuʻunga ko e kau fakamaau tokoni, ko honau fatongia ia ke muimui ofi ʻaupito ki he faʻifaʻitakiʻanga ʻa e ongo Fakamaau fakahēvani, ko Sihova mo Kalaisi Sīsū.

Kalaisi​—Ko e Fakamaau Alafaʻifaʻitakiʻanga

 2, 3. (a) Ko e hā ʻa e kikite Faka-Mīsaia ʻokú ne fakahā mai ʻa e ngaahi ʻulungaanga ʻo Kalaisi ʻi hono tuʻunga ko e Fakamaaú? (e) Ko e hā ʻa e ngaahi poini ʻoku taau ke fakatokangaʻí?

² Naʻe tohi fakaekikite ʻo fekauʻaki mo Kalaisi ʻi hono tuʻunga ko e Fakamaaú: “Pea ʻoku nofo hifo ki ai ʻa e Laumalie ʻo Sihova, ʻa e laumalie ʻo e poto mo e ʻilomeʻa, ʻa e laumalie ʻo e faleʻi mo e mafai, ʻa e laumalie ʻo e ʻiloʻi ʻo Sihova mo e ʻapasia ki ai. Pea ko e ʻapasia kia Sihova ko ʻene fangu nanamu ia; pea ko ʻene fai fakamaau ʻoku ʻikai fai ki he meʻa ʻoku ha ki he mata, pea ko ʻene fakaʻosi ʻe ʻikai fai ki he ongo ʻo e telinga. Ka ʻe fou ʻi he totonu ʻene fakamaau ʻa e kau masiva, pea ʻe fai ki he tuha ʻene tuʻutuʻuni meʻa ki he faʻahinga maʻulalo ʻo mamani.”​—ʻAisea 11:​2-4.

³ Fakatokangaʻi ʻi he kikite ko iá ʻa e ngaahi ʻulungaanga ʻoku tokoniʻi ai ʻa Kalaisi ke “ne fakamāu maonioni ai a mamani.” (Ngāue 17:​31, PM) ʻOkú ne fakamaau ʻo fakatatau mo e laumālie ʻo Sihová, mo e poto fakaʻotuá, mo e mahino, mo e faleʻi, mo e ʻiloʻi. Toe fakatokangaʻi foki, ʻokú ne fakamaau ʻi he manavahē kia Sihova. Ko ia, ko e “fakamāuanga ʻo Kalaisi” ʻokú ne fakafofongaʻi ʻa e “fakamāuʻanga ʻo e ʻOtua.” (2 Kolinitō 5:10; Loma 14:10) ʻOkú ne tokanga ke fakamaau ʻa e ngaahi meʻá ʻi he founga ʻe fakamaauʻi ai kinautolu ʻe he ʻOtuá. (Sione 8:16) ʻOku ʻikai te ne fakamaau ʻo fakatatau pē ki he fōtunga hā maí pe ki ha fanongo pē. ʻOkú ne fakamaau ʻi he totonu maʻá e faʻahinga māʻulaló mo e masivá. Ko ha Fakamaau fakaofo ē! Pea ko ha faʻifaʻitakiʻanga lelei ē ki he faʻahinga ʻo e tangata taʻehaohaoa ʻa ia ʻoku fiemaʻu ke nau kau ki ha ngāue fakaefakamaau ʻi he ʻahó ni!

Kau Fakamaau Fakaemāmani

 4. (a) Ko e hā ʻa e taha ʻo e ngaahi ngāue ʻe fai ʻe he toko 144,000 he lolotonga ʻa e Pule Taʻu ʻe Taha Afe ʻa Kalaisí? (e) Ko e hā ʻa e kikite ko ia ʻokú ne fakahā ʻe fakanofo ʻa e niʻihi ʻo e kau Kalisitiane paní ko e kau fakamaau lolotonga ʻa ʻenau kei ʻi māmaní?

⁴ ʻOku fakahā ʻe he Tohitapú ko e tokosiʻi fakangatangata pē ko e kau Kalisitiane paní, kamata mei he kau ʻapositolo ʻe toko 12, ʻe kaungāfakamaau mo Kalaisi Sīsū he lolotonga ʻa e Afeʻi Taʻú. (Luke 22:​28-30; 1 Kolinitō 6:2; Fakahā 20:4) Naʻe fakamaauʻi mo toe fakaleleiʻi ʻi he 1918-19 ʻa e toenga ʻo e kau mēmipa pani ʻo e ʻIsileli fakalaumālié ʻi he māmaní. (Malakai 3:​2-4) Naʻe kikiteʻi ʻo fekauʻaki mo e toe fakaleleiʻi ko ʻeni ʻo e ʻIsileli fakalaumālié ʻo pehē: “Pea te u fakafoki ho kau fakamāu hange ko e taimi muʻa, pea mo ho kau faleʻi hange ko ia ʻi he kamataʻanga.” (ʻAisea 1:26) Ko ia, ʻo hangē pē ko ia naʻá ne fai ʻi he “kamataʻanga” ʻo ʻIsileli fakaekakanó, kuo ʻoange ʻe Sihova ʻa e kau fakamaau mo e kau faleʻi māʻoniʻoni ki he toenga ʻo e kau pani naʻe toe fakaleleiʻí.

 5. (a) Ko hai ‘naʻe fakanofo ko e kau fakamaaú’ ʻi he ʻosi ʻa hono toe fakaleleiʻi ʻo e ʻIsileli fakalaumālié, pea ʻoku anga-fēfē ʻa hono fakatātaaʻi kinautolu ʻi he tohi ʻa Fakahaá? (e) Ko hai ʻoku nau tokoni ki he kau ʻovasia pani ʻi he taimi ní ki he ngāue fakaefakamaaú, pea ʻoku anga-fēfē ʻa hono akoʻi ʻo e faʻahinga ko ʻení ke nau hoko ko e kau fakamaau lelei ange?

⁵ ʻI he kamataʻangá, ko e ‘kau tangata poto’ ʻa ia ‘naʻe fakanofo ko e kau fakamaaú’ ko e kau tangata motuʻa ange, pe kau mātuʻa pani kotoa. (1 Kolinitō 6:​4, 5) ʻOku fakatātaaʻi ʻi he tohi Fakahaá ʻa e kau ʻovasia pani mateaki mo ʻapasiaʻi, ʻo pehē kuo nau ʻi he nima toʻomataʻu ʻo Sīsuú, ʻa ia ʻokú ne puleʻi mo tataki kinautolu. (Fakahā 1:​16, 20; 2:1) Talu mei he 1935 kuo maʻu ʻe he kau paní ʻa e poupou mateaki ʻa e “fuʻu kakai lahi” ʻoku fakautuutu ai pē hono tokolahí, ʻa ia ko ʻenau ʻamanakí ke hao moʻui atu ʻi he “mamahi lahi” mo moʻui taʻengata ʻi he māmani palataisí. (Fakahā 7:​9, 10, 14-17) ʻI he panaki mai ʻa e “katoanga taʻane ʻa e Lami”, ʻoku fakautuutu ʻa e tokolahi ʻa e faʻahinga ko ʻeni kuo fakanofo ʻe he Kulupu Pule kuo paní ke nau hoko ko e kau mātuʻa mo e kau fakamaau ʻi he ngaahi fakatahaʻanga ʻe 66,000 tupu ʻo e Kau Fakamoʻoni ʻa Sihová ʻi māmani lahi.a (Fakahā 19:​7-9) ʻOku akoʻi kinautolu fakafou mai ʻi he ngaahi ako makehe ke nau fakahoko ʻa e fatongia ʻi he sōsaieti ʻo e “fonua foʻou.” (2 Pita 3:13) Ko e Ako Fakafaifekau ʻo e Puleʻangá, naʻe fai ʻi he fakaʻosinga ʻo e 1991 ʻi he ngaahi fonua lahi, naʻe fakamamafaʻi ai ʻa hono fakahoko fakalelei ʻa e ngaahi meʻa fakaefakamaaú. Ko e fatongia ia ʻo e kau mātuʻa ʻoku nau hoko ko e kau fakamaaú ke faʻifaʻitaki kia Sihova mo Kalaisi Sīsū, ʻa ia ko ʻena ngaahi fakamaaú ʻoku moʻoni mo māʻoniʻoni.​—Sione 5:30; 8:16; Fakahā 19:​1, 2.

Kau Fakamaau ʻOku ‘Nau Fai Manavahē ʻEnau Fakafeangai’

 6. Ko e hā ʻoku totonu ai ki he kau mātuʻa ʻi he ngaahi kōmiti fakamaaú ke ‘nau fai manavahē ʻenau fakafeangai’?

⁶ Kapau ko Kalaisi tonu ē ʻokú ne fakamaau ʻi he manavahē koeʻuhi ko Sihova pea fai ʻaki ʻa e tokoni ʻa Hono laumālié, huanoa hake ai ʻa e totonu ke fai pehē ʻa e kau mātuʻa taʻehaohaoá! ʻI hano vaheʻi ke kau ki ha kōmiti fakamaau, ʻoku fiemaʻu ke ‘nau fai manavahē ʻenau fakafeangai,’ ʻo lotu “ki he Tamai, aia oku ne fakamāu o taefilifilimanako” ke tokoni mai kiate kinautolu ke fakamaau ʻi he māʻoniʻoni. (1 Pita 1:​17, PM) ʻOku totonu ke nau manatuʻi ʻoku nau ngāue fekauʻaki mo e moʻui ʻa e kakaí, ko honau “ngaahi soulu,” he ko kinautolu “te nau fai ʻa e fakamatala.” (Hepelū 13:​17, NW) Koeʻuhi ko e meʻa ko ʻení, ʻoku pau te nau fai foki ha fakamatala ʻi he ʻao ʻo Sihová ʻo kau ki ha ngaahi fehalaaki fakaefakamaau naʻa nau fai nai naʻe mei malava ke fakaʻehiʻehi mei ai. Naʻe tohi ʻe J. H. A. Ebard ʻi heʻene fakamatala ʻo kau ki he Hepelū 13:17: “Ko e fatongia ia ʻo e tauhisipí ke leʻohi ʻa e ngaahi soulu kuo tuku kiate ia ke ne tokangaʻí, pea . . . kuo pau ke ne fai ha fakamatala ʻo kau kiate kinautolu hono kotoa, mo kinautolu foki kuo mole koeʻuhi ko e foʻui ia ʻoʻona tauhisipí. Ko ha lea mamafa ʻeni. Ke fakatokangaʻi ʻe he faifekau taki taha, kuó ne loto pē ke fatongiaʻaki ʻa e lakanga mamafa [lahi fakaʻulia] ko ʻení.”​—Fehoanaki mo Sione 17:12; Sēmisi 3:1.

 7. (a) Ko e hā ʻoku totonu ke manatuʻi ʻe he kau fakamaau ʻi onopooní, pea ko e hā ʻoku totonu ko ʻenau taumuʻá ia? (e) Ko e hā ʻa e ngaahi meʻa ʻoku totonu ke ako ʻe he kau mātuʻá mei he Mātiu 18:​18-20?

⁷ ʻOku totonu ke manatuʻi ʻe he kau mātuʻa ʻoku nau fakahoko ʻa e ngāue ʻi he tuʻunga ko e kau fakamaaú, ko e ongo Fakamaau moʻoni ʻi he meʻa fakamaau taki taha ko Sihova mo Kalaisi Sīsū. Manatuʻi ʻa e meʻa naʻe tala ki he kau fakamaau ʻi ʻIsilelí: “Ko hoʻomou fakamaau ʻoku ʻikai maʻa e tangata, ka maʻa Sihova; pea ʻoku ne ʻafio mo kimoutolu ʻi he fai fakamaau. Pea ko ia ke ʻiate kimoutolu ʻa e ngeia ʻo Sihova. . . . Fai pehe, pea ʻe ʻikai te mou hia.” (2 Kalonikali 19:​6-10) ʻI he manavahē anga-ʻapasia, ʻoku totonu ki he kau mātuʻa ʻoku fakamaau ʻi ha meʻa ke fai ʻa honau lelei tahá ke fakapapauʻi ʻoku kau moʻoni ʻa Sihova mo ‘kinautolu ʻi he fakamaaú.’ ʻOku totonu ke hā tonu mai mei heʻenau tuʻutuʻuní ʻa e anga ʻo e vakai ʻa Sihova mo Kalaisi ki he meʻa ko iá. Ko e meʻa te nau ‘haʻi’ fakaefakatātā (ʻilo ʻoku halaia) pe ‘tuku ange’ (ʻilo ʻoku tonuhia) ʻi māmaní ʻoku totonu ko e meʻa ia kuo ʻosi haʻi pe tuku ange ʻi hēvani​—ʻo hangē ko ia kuo ʻosi fakahā ʻe he meʻa kuo hiki ʻi he Folofola fakamānavaʻi ʻa e ʻOtuá. Kapau te nau lotu kia Sihova ʻi he hingoa ʻo Sīsuú, ʻe “ʻi honau lotolotonga” ʻa Sīsū ke tokoniʻi kinautolu. (Mātiu 18:​18-20, fakamatala ʻi lalo; Ko e Taua Leʻo, ʻAokosi 1, 1988, peesi 9). ʻOku totonu ke hā ʻa e feōngoaki ʻi he fakataha fakaefakamaaú ʻoku ʻi ai moʻoni ʻa Kalaisi ʻi honau lotolotongá.

Kau Tauhisipi Taimi-Kakato

 8. Ko e hā ʻa e fatongia tefito ʻo e kau mātuʻá ki he tākangá, ʻo hangē ko ia kuo fakatātaaʻi ʻe Sihova mo Sīsū Kalaisí? (ʻAisea 40:​10, 11; Sione 10:​11, 27-29)

⁸ ʻOku ʻikai ke fakamaau taimi-kakato ʻe he kau mātuʻá. Ka ko e kau tauhisipi taimi-kakato kinautolu. Ko e kau faitoʻo kinautolu, ʻikai ko e kau fakahoko tautea. (Sēmisi 5:​13-16) Ko e ʻuhinga tefito ki he foʻi lea ko e ʻovasia (e·piʹsko·pos) ʻi he lea faka-Kalisí ko e tokanga ʻoku fai ʻaki ʻa e maluʻi. ʻOku pehē ʻe he Theological Dictionary of the New Testament: “Tānaki atu ki he tauhisipi [ʻia 1 Pita 2:25], ko e foʻi lea ko iá [e·piʹsko·pos] ʻokú ne fakahā ʻa e fakakaukau ki he ngāue fakaefaifekaú ko e tokangaʻi pe leʻohi.” ʻIo, ko honau fatongia tefitó ko e tokangaʻi ʻa e fanga sipí mo leʻohi kinautolu, ʻo tauhi kinautolu ke nofo ʻi loto ʻi he tākangá.

 9, 10. (a) Naʻe anga-fēfē ʻa hono fakamamafaʻi ʻe Paula ʻa e ʻuluaki fatongia ʻo e kau mātuʻá, ko ia ko e hā ʻa e fehuʻi ʻe lelei nai ke ʻeke? (e) ʻOku fakahuʻuhuʻu ki he hā ʻa e ngaahi lea ʻa Paula ʻi he Ngāue 20:​29, ko ia ko e hā ʻe fai ʻe he kau mātuʻá ke feinga ke fakasiʻisiʻi ʻa e ngaahi meʻa fakaefakamaaú?

⁹ ʻI he lea ʻa e ʻapositolo ko Paulá ki he kau mātuʻa ʻo e fakatahaʻanga ʻi ʻEfesoó, naʻá ne fakamamafaʻi totonu ʻa e meʻá ni: “Ko ia mou lamasi kimoutolu, mo e fanga sipi kotoa, ʻa ia kuo fakanofo kimoutolu ʻe he Laumalie Maʻoniʻoni ʻi honau lolotonga ko honau kau leʻo, koeʻuhi ke mou tauhi ʻa e Siasi ʻo e ʻOtua, ʻa ia naʻa ne fakatau ʻaki hono taʻataʻa [ʻo hono ʻAlo].” (Ngāue 20:28) ʻOku fakaeʻa ʻe Paula ʻa e tauhi, kae ʻikai ko e tauteaʻi. ʻE lelei ki he kau mātuʻa ʻe niʻihi ke nau fakalaulauloto ki he fehuʻi ko ʻení: ʻE lava nai ke ʻoua ʻe mole ai ʻa e taimi lahi ʻoku fiemaʻu ki hono fakatotoloʻi mo hono fakahoko ʻa e ngaahi meʻa fakaefakamaaú ʻo kapau te tau vaheʻi ha taimi mo feinga lahi ange ke fai ʻa e ngāue fakaetauhisipí?’

¹⁰ Ko e moʻoni, naʻe fakatokanga ʻa Paula ʻo kau ki he “fanga ulofi anga malohi.” Ka, ʻikai naʻá ne valokiʻi ʻa e faʻahinga ko ʻení he “naʻe ʻikai te nau mamae ki he fanga sipi”? (Ngāue 20:29) Pea neongo ʻene fakahuʻuhuʻu ʻoku totonu ki he kau ʻovasia mateakí ke nau kapusi ʻa e “fanga ulofi” ko ʻení, ʻikai ʻoku hā mei heʻene ngaahi leá ʻoku totonu ki he kau mātuʻá ke nau “mamae” ki he kau mēmipa kehe ʻo e tākangá? ʻI he hoko ʻo vaivai fakalaumālie ha sipi pea tuku ʻa ʻene ngāue ki he ʻOtuá, ko e hā ʻoku fiemaʻu kiate iá​—ko e taaʻi pe faitoʻo, ko e tautea pe ʻaʻahi fakaetauhisipi ki ai? (Sēmisi 5:​14, 15) Ko ia ai, ʻoku totonu ke vaheʻi maʻu pē ʻe he kau mātuʻá ha taimi ki he ngāue fakaetauhisipí. ʻE ʻomi nai ʻe he meʻá ni ʻa e ola fakafiefia ko e siʻi ange ai ʻa e taimi ʻoku fakamoleki ki he ngaahi meʻa fakaefakamaau ʻa ia ʻoku kau ki ai ʻa e kau Kalisitiane kuo ikunaʻi ʻe he angahalá. ʻOku pau, ko e ʻuluaki meʻa ʻoku totonu ke tokanga ki ai ʻa e kau mātuʻá ko e tokonaki ʻo ha maʻuʻanga ʻo e fakafiemālie mo e fakafoʻou, ʻo fakatupunga ai ʻa e melino, nonga, mo e maluʻanga ʻi he lotolotonga ʻo e kakai ʻa Sihová.​—ʻAisea 32:​1, 2.

Ko e Ngāue ko e Tauhisipi mo e Fakamaau Anga-Lelei

11. Ko e hā ʻoku fiemaʻu ai ki he kau mātuʻa ʻi he ngaahi kōmiti fakamaaú ke nau taʻefilifilimānako mo maʻu ʻa e “poto ʻoku mei ʻolunga”?

¹¹ ʻE fakasiʻisiʻi hifo nai ʻa e ngaahi meʻa fakaefakamaau ʻi he lotolotonga ʻo e kakai ʻa Sihová ʻe he ʻaʻahi fakaetauhisipi fakamātoato ange ki muʻa ke fai ʻe ha Kalisitiane ha laka hala. (Fehoanaki mo Kalētia 6:1.) Ka neongo ia, koeʻuhi ko e angahala mo e taʻehaohaoa ʻa e faʻahinga ʻo e tangatá ʻe fiemaʻu nai ʻi he taimi ki he taimi ke fai ʻe he ʻovasia Kalisitiané ha ngāue ki ha faihala. Ko e hā ʻa e ngaahi tefitoʻi moʻoni ʻoku totonu ke ne tataki kinautolú? Kuo ʻikai ke liliu ʻa e ngaahi tefitoʻi moʻoni ko ʻení talu mei he taimi ʻo Mōsesé pe mei he taimi ʻo e muʻaki kau Kalisitiané. ʻOku kei ʻaonga pē ʻa e ngaahi lea ʻa Mōsese naʻe fai ki he kau fakamaau ʻi ʻIsilelí: “Mou fanogo ki he gaahi mea a ho mou gaahi kaiga, bea fakamāu maonioni . . . Oua naa mou filifilimanako ki he kakai i he fakamāu.” (Teutalōnome 1:​16, 17, PM) Ko e taʻefilifilimānakó ko e fakaʻilonga ia ʻo e “poto ʻoku mei ʻolunga”, ʻa e poto ko ia ʻoku mātuʻaki mahuʻinga ki he kau mātuʻa ʻoku nau kau ki ha ngaahi kōmiti fakaefakamaau. (Sēmisi 3:17; Palōvepi 24:23) Ko e faʻahinga poto ko iá ʻe tokoni kiate kinautolu ke nau ʻiloʻi ʻa e faikehekehe ʻo e vaivaí mo e anga-fulikivanú.

12. ʻI he ʻuhinga fē ʻoku fiemaʻu ai ki he kau fakamaaú ke ʻoua te nau hoko pē ko e kau tangata māʻoniʻoni ka ko e kau tangata lelei foki?

¹² Kuo pau ke “fakamāu maonioni” ʻa e kau mātuʻá, ʻo fakatatau ki he ngaahi tuʻunga ʻa Sihova ʻo kau ki he totonú mo e halá. (Sāme 19:9) Neongo te nau feinga ke hoko ko e kau tangata māʻoniʻoni, kae ʻi he taimi tatau ʻoku totonu ke nau feinga foki ke hoko ko e kau tangata lelei, ʻi he ʻuhinga ʻoku fakafaikehekeheʻi ai ia ʻe Paula ʻia Loma 5:​7, 8. ʻI he fakamatala ki he ongo veesi ko ʻení ʻi he kaveinga ko e “Righteousness” [Māʻoniʻoni,] ʻoku pehē ʻe he tohi Insight on the Scriptures: “ʻOku fakahā mei hono ngāueʻaki ʻa e foʻi lea faka-Kalisí ko e tokotaha ʻoku ʻiloa pe ʻoku mahino ko e tokotaha leleí ʻokú ne loto-ʻofa (faʻa fai lelei pe fai ha meʻa ʻoku ʻaonga ki he niʻihi kehé) mo anga-ʻofa (fakahāhā ʻa e anga-lelei pehē ʻaki ʻa e ngāue pau). ʻOku ʻikai te ne tokanga pē ia ke fai ʻa e ngaahi meʻa ʻoku fiemaʻu fakaefakamaaú ka ʻokú ne fai ʻo laka atu ʻi he meʻá ni, ʻo ueʻi ia ʻe he fakaʻatuʻi totonu ki he niʻihi kehé pea mo e holi ke nau maʻu ha ʻaonga mo tokoni atu kiate kinautolu.” (Voliume 2, peesi 809) Ko e kau mātuʻa ʻa ia ʻoku ʻikai ngata pē ʻi heʻenau māʻoniʻoní ka ʻoku nau toe leleí te nau feangai mo e kau faihalá ʻaki ʻa e fakaʻatuʻi anga-ʻofa. (Loma 2:4) ʻOku totonu ke nau loto ke fakahāhā ʻa e meesi mo e kaungāongoʻi. ʻOku totonu ke nau fai ʻa ia ʻoku nau malavá ke tokoni ki he tokotaha faihalá ke ne sio ki he fiemaʻu ke fakatomala, neongo naʻe ʻikai te ne tali nai ʻa ʻenau ngaahi ʻuluaki feingá.

Anga ʻo e Fakakaukau Totonu ʻi he Ngaahi Fakataha Fakaefakamaaú

13. (a) ʻI he ngāue ha mātuʻa ko ha fakamaau, ʻoku kei hoko pē ia ko e hā? (e) Ko e hā ʻa e akonaki ʻa Paula ʻoku toe kaungatonu ki he ngaahi fakataha fakaefakamaaú?

¹³ ʻOku totonu ke ʻoua ʻe ngalo ʻi he kau ʻovasiá ʻo ka hoko ha tuʻunga ʻoku fiemaʻu ai ha fakataha fakaefakamaau, ʻoku nau kei hoko ko e kau tauhisipi, ʻoku nau tauhi ʻa e fanga sipi ʻa Sihová, ʻi he malumalu ʻo e “Tauhi Lelei.” (Sione 10:11) Ko e akonaki naʻe ʻomai ʻe Paula ke fai maʻu pē ha tokoni ki he fanga sipi ʻoku faingataʻaʻiá, ʻoku kaungatonu tatau pē ki he ngaahi fakataha fakaefakamaaú. Naʻá ne tohi: “Kainga, neongo pe ʻe puke nima ha taha lolotonga ʻene fai ha kovi; ka ko kimoutolu, ʻa e kau fakalaumalie, mou faitoʻo ki ha taha pehe ʻo angafakaalaala; pea ke vakai kiate koe naʻa ʻiloange ʻe ʻahiʻahiʻi mo koe foki. Mou fetoutou fefuaʻaki homou ngaahi mafaisiaʻanga: pea ʻi hoʻomou fai pehē, kuo mou ʻosiki ʻaupito ʻa e lao ʻa Kalaisi.”​—Kalētia 6:​1, 2.b

14. ʻOku totonu ke fēfē ʻa e vakai ʻa e kau ʻovasiá ki he ngaahi fakataha fakaefakamaaú, pea ʻoku totonu ke fēfē ʻa e anga ʻo ʻenau fakakaukau ki he tokotaha faihalá?

¹⁴ ʻOku totonu ki he kau mātuʻa ʻi he kōmiti fakamaaú ke nau vakai ki he fakataha ko ʻení ko e tafaʻaki ia ʻe taha ʻo ʻenau ngāue fakaetauhisipí, kae ʻikai ko e lau ai kinautolu ko e kau fakamaau māʻolunga ʻoku nau fakataha mai ke fakahoko tautea. ʻOku faingataʻaʻia ha sipi ʻe taha ʻa Sihova. Ko e hā ʻe malava ke nau fai ke fakahaofi ʻa e tokotaha ko iá? ʻOku fuʻu tōmui ke tokoni ki he sipi ko ʻeni kuó ne hē mei he tākangá? ʻOku tau ʻamanaki pē ʻoku ʻikai. ʻOku totonu ki he kau mātuʻá ke nau tauhi maʻu ʻa e fakakaukau pau ki hono fakahā ʻo e meesí ʻo ka ʻoku feʻunga. ʻOku ʻikai ke pehē te nau fakasiʻisiʻi ange ʻa e ngaahi tuʻunga ʻa Sihová kapau kuo fai ha angahala mamafa. Ka ko ʻenau ʻilo ki ha ngaahi tuʻunga ʻo kau ki ha meʻa naʻe hoko, ʻe tokoni ia kiate kinautolu ke nau fakahā ʻa e meesí ʻo ka fiemaʻu. (Sāme 103:​8-10; 130:3) Ko e meʻa pangó, ko e kau faihala ʻe niʻihi ʻoku nau fuʻu loto-taʻeʻunua ʻi heʻenau fakakaukaú pea kuo pau leva ki he kau mātuʻá ke nau fakahā ʻa e tuʻumaʻu, kae ʻikai ʻaupito anga-fefeka.​—1 Kolinitō 5:13.

Ko e Taumuʻa ʻo e Ngaahi Fakataha Fakaefakamaaú

15. ʻI he hoko ha palopalema mamafa ʻi he vā ʻo ha niʻihi, ko e hā ʻa e ʻuluaki meʻa ke vakaiʻí?

¹⁵ ʻI he hoko ha palopalema mamafa ʻi he vā ʻo ha niʻihi, ʻe ʻuluaki vakaiʻi ʻe he kau mātuʻa fakapotopotó pe kuo feinga ʻa kinautolu ʻoku kau ki aí ke fakaleleiʻi fakaekinautolu ʻa e meʻa ko iá, ʻo fakatatau ki he founga ʻi he Mātiu 5:​23, 24 pe Mātiu 18:15. Kapau naʻe fai ia ka naʻe ʻikai ke lavameʻa, ʻe feʻunga pē nai ha akonaki ʻe fai ʻe ha toko taha pe ko e toko ua ʻo e kau mātuʻá. ʻE fiemaʻu ke toki fai pē ha meʻa fakaefakamaau ʻo kapau kuo fai ha angahala mamafa ʻa ia ʻe iku nai ki hano tuʻusi. (Mātiu 18:17; 1 Kolinitō 5:11) Kuo pau ke ʻi ai ha makatuʻunga faka-Tohitapu feʻunga ki hono fokotuʻu ha kōmiti fakamaau. (Sio ki he Ko e Taua Leʻo (faka-Pilitānia), Sepitema 15, 1989, peesi 18.) ʻI hano fokotuʻu ha kōmiti, ʻoku totonu ke filifili ʻa e kau mātuʻa taukei lelei taha ki he meʻa ko ia ʻoku hokó.

16. Ko e hā ʻoku feinga ʻa e kau mātuʻá ke aʻu ki ai ʻi he ngaahi fakataha fakaefakamaaú?

¹⁶ Ko e hā ʻoku feinga ʻa e kau mātuʻá ke aʻu ki ai ʻi he ngaahi fakataha fakaefakamaaú? ʻUluaki, ʻoku faingataʻa ke fakamaau ʻi he māʻoniʻoni kaeʻoua ke ʻiloʻi ʻa e moʻoní. Hangē pē ko ia naʻe fai ʻi ʻIsilelí, kuo pau ke fai ha ‘hakule fakaʻāuliliki’ ki he ngaahi tuʻunga ʻoku māfatukituki. (Teutalōnome 13:14; 17:4) Ko ia ko e taumuʻa ʻe taha ʻo e fakataha fakaefakamaaú ke maʻu ʻa e ngaahi moʻoniʻi meʻa ʻo fekauʻaki mo e meʻa naʻe hokó. Ka ʻoku lava pea ʻoku totonu ke fai eni ʻi he ʻofa. (1 Kolinitō 13:​4, 6, 7) ʻI hano toki ʻilo pē ʻa e ngaahi moʻoniʻi meʻá, ʻe fai leva ʻe he kau mātuʻá ha meʻa pē ʻoku fiemaʻu ke maluʻi ʻa e fakatahaʻangá mo tauhi maʻu ʻi ai ʻa e ngaahi tuʻunga māʻolunga ʻa Sihová mo e fetāfeaki tauʻatāina ʻo hono laumālié. (1 Kolinitō 5:​7, 8) Kaekehe, ko e taha ʻo e ngaahi taumuʻa ʻo e fakataha fakaefakamaaú ko hono fai ha fakahaofi, kapau ʻoku ala malava, ʻo ha tokotaha faiangahala ʻoku ʻi ha tuʻunga fakatuʻutāmaki.​—Fehoanaki mo Luke 15:​8-10.

17. (a) ʻI he lolotonga ʻa e fakataha fakaefakamaaú ʻoku totonu ke anga-fēfē ʻa e fai ha ngāue ki ha tokotaha kuo tukuakiʻi, pea ko e hā ʻa e taumuʻá? (e) Ko e hā ʻe fiemaʻu ki he meʻá ni mei he kau mēmipa ʻo e kōmiti fakamaaú?

¹⁷ ʻOku totonu ke fai ʻa e meʻa ki ha tokotaha kuo tukuakiʻi ʻo hangē tofu pē ko hono fai ki ha sipi ʻa e ʻOtuá. ʻOku totonu ke ngāue ki ai mo e anga-fakaalaala. Kapau kuo fai ha angahala (pe ngaahi angahala), ko e taumuʻa ʻa e kau fakamaau māʻoniʻoní ke tokoni ki he tokotaha faihalá ke ne fai ha fakatonutonu, ke ne maʻu ʻa e mahino ki he hala ʻo ʻene foungá, ke fakatomala, pea ke hamusi leva ia mei he “tauhele ʻa e Tevolo.” ʻE fiemaʻu ki he meʻá ni ʻa e “pōtoʻi ʻi he fai ʻa e akoʻi,” “akonekina i he agamalu.” (2 Tīmote 2:​24-26, PM; 4:2, NW) Kae fēfē ʻo kapau ko e tokotaha faihalá kuó ne ʻiloʻi kuó ne faiangahala, pea kuo hūkia moʻoni hono lotó, peá ne kole fakamolemole kia Sihova? (Fehoanaki mo Ngāue 2:37.) Kapau ʻoku tui pau ʻa e kōmití ʻokú ne fiemaʻu moʻoni ha tokoni, ʻi he taimi lahi ʻoku ʻikai ke fiemaʻu ke tuʻusi ia.​—Sio ki he Ko e Taua Leʻo (faka-Pilitānia), Sānuali 1, 1983, peesi 31, palakalafi 1.

18. (a) Ko e fē ʻa e taimi ʻoku totonu ai ki he kōmiti fakamaaú ke fakahā ʻa e tuʻumaʻu ʻi hano tuʻusi ʻa e tokotaha faihalá? (e) Koeʻuhi ko e tuʻunga fakatupu loto-mamahi fē ʻoku totonu ai ki he kau mātuʻá ke nau ngāue tōtōivi koeʻuhi ko e fanga sipi kuo heé?

¹⁸ ʻI he tafaʻaki ʻe tahá, ʻi he fehangahangai ʻa e kau mēmipa ʻo e kōmiti fakamaaú mo ha tuʻunga ʻa ia ʻoku hā mahino ko e tafoki taʻeʻunua mei he moʻoní, ko e angatuʻu loto pē ki ai ki he ngaahi lao ʻa Sihová, pe ko e anga-fulikivanu maʻataʻatā, ko honau fatongiá ke maluʻi ʻa e ngaahi mēmipa kehe ʻo e fakatahaʻangá ʻaki hano tuʻusi ʻa e tokotaha faiangahala taʻefakatomalá. ʻOku ʻikai ke fatongiaʻaki ʻe he kōmiti fakamaaú ia ke toutou fakataha mo e tokotaha faihalá pe fakaʻaiʻai ʻa e meʻa ke ne leaʻakí, ʻo feinga ke fakamālohiʻi ia ke ne fakatomala, ʻo kapau ʻoku hā mahino ʻoku ʻikai ke ʻi ai ha loto-fakatomala moʻoni.c ʻI he ngaahi taʻu ki muí ni maí ʻoku fakafuofua ʻoku tuʻusi ʻi māmani lahi ʻa e peseti ʻe 1 ʻo e kau malangá. Ko hono fakalea ʻe tahá, mei he sipi ʻe teau ʻoku nofo ʻi he tākangá, ʻoku mole mei ai ʻa e tokotaha​—fakataimi pē nai. ʻI he fakakaukau atu ki he taimi mo e feinga ʻoku fiemaʻu ke ʻomai ha tokotaha ki he tākangá, ʻikai ʻoku fakatupu loto-mamahi ke ʻilo ʻoku ‘toe tuku ange kia Sētane’ ʻa e toko laui mano ʻi he taʻu taki taha?​—1 Kolinitō 5:5.

19. Ko e hā ʻoku totonu ke ʻoua ʻaupito naʻa ngalo ʻi he kau mātuʻa ʻoku kau ki ha kōmiti fakamaau, ko ia ko e hā ʻa ʻenau taumuʻá?

¹⁹ ʻOku totonu ke manatuʻi ʻe he kau mātuʻá ʻi he kamataʻanga ʻo ha meʻa fakaefakamaau, ʻoku kau ʻa e tuʻunga vaivaí ʻi he hoko ʻa e ngaahi angahala lahi taha ʻi he fakatahaʻangá, kae ʻikai ko e anga-fulikivanú. ʻOku totonu ke ʻoua ʻaupito naʻa ngalo ʻiate kinautolu ʻa e talanoa fakatātā ʻa Sīsū ʻo kau ki he sipi naʻe molé, ʻa ia naʻá ne fakaʻosiʻaki ʻa e ngaahi lea ko ʻení: “Tala atu, ʻe pehē ha fiefia ʻi he langi ʻi he fakatomala ʻa ha foʻi angahala ʻe toko taha, ʻio, ʻo hulu atu ʻi hā toko hivangofulu ma hiva faitotonu, ʻa ia ʻoku ʻikai haʻanau meʻa ke fakatomala ai.” (Luke 15:7) Ko e moʻoni, ko Sihova ʻoku “ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe.” (2 Pita 3:9) ʻI he tokoni ʻa Sihová, ʻofa ke fai ʻe he ngaahi kōmiti fakamaau ʻi māmani lahí ʻa honau lelei tahá ke fakatupu fiefia ʻi hēvani ʻaki ʻa ʻenau tokoni ki he kau faihalá ke nau sio ki he fiemaʻu ke fakatomala mo toe foki ki he hala fāsiʻi ʻa ia ʻoku fakatau ki he moʻui taʻengatá.​—Mātiu 7:​13, 14.

[Fakamatala ʻi lalo]

Ngaahi Fehuʻi Fakamanatu

◻ ʻI he muimui ki he faʻifaʻitakiʻanga ʻa e Tauhisipi Lahí mo e Tauhisipi Leleí, ko e hā ʻoku totonu ke hoko ko e meʻa mahuʻinga tefito ia ki he kau mātuʻá?

◻ ʻI he founga fē ʻe lava ai ʻe he kau mātuʻá ke fai ha feinga ke fakasiʻisiʻi ai ʻa e ngaahi meʻa fakaefakamaaú?

◻ ʻI he ʻuhinga fē ʻoku fiemaʻu ai ki he kau fakamaaú ke ʻoua ʻe māʻoniʻoni pē ka ke toe lelei foki?

◻ ʻOku totonu ke fēfē ʻa e ngāue ki ha tokotaha faihala he lolotonga ʻa e fakataha fakaefakamaaú, pea ko e hā ʻa e taumuʻá?

◻ Ko e hā ʻoku hoko ai ʻa e tuʻusí ko e tuʻunga fakaʻosi ke fai ʻi ha ʻikai ke toe felave ha ngaahi meʻa kehe?

[Fakatātā ʻi he peesi 18]

ʻI hono tomuʻa fai ha ʻaʻahi fakaetauhisipi, ʻe siʻisiʻi nai ai ʻa e ngaahi meʻa fakaefakamaaú

[Fakatātā ʻi he peesi 20]

Naʻa mo e lolotonga ʻo e fakataha fakaefakamaaú, ʻoku totonu ki he kau mātuʻá ke nau feinga ke fakatonutonu ʻa e tokotaha faihalá ʻi he anga-fakaalaala