Husepāniti mo Mātuʻa—ʻAi ke Palanisi ʻa e Ngaahi Fatongiá
‘Ko hono totonu ʻo e faifekau pulé [ʻovasia] ko e husepaniti ʻo ha fefine pe taha.’—1 TĪMOTE 3:2.
1, 2. Ko e hā ʻoku taʻefakatohitapu ai ʻa e taʻemali ʻa e kau pātelé?
ʻI HE ʻuluaki senitulí, naʻe tokanga ʻa e kau Kalisitiane anga-tonú ki hono ʻai ke palanisi honau ngaahi fatongia kehekehé. ʻI he pehē ko ia ʻe he ʻaposetolo ko Paulá “ʻe lelei ange” ha Kalisitiane ʻoku nofo taʻemalí, naʻá ne ʻuhingá ko e tangata peheé ʻe feʻunga ange ia ke ngāue ko ha ʻovasia ʻi he fakatahaʻanga Kalisitiané? Naʻá ne ʻai moʻoni ai ʻa e taʻemalí ko ha fiemaʻu ia ki he tuʻunga-mātuʻá? (1 Kolinitō 7:38) ʻOku fiemaʻu ʻa e taʻemalí ia ʻi he haʻa feifekau Katoliká. Ka ʻoku Fakatohitapu ʻa e taʻemali ʻa e kau pātelé? ʻOku fakaʻatā ʻe he ngaahi Siasi ʻOfotokisī Fakahahaké ia ʻenau kau pātele ʻi honau vāhenga fakafaifekaú ke nau hoko ko e kau tangata mali, kae ʻikai pehē ki heʻenau kau pīsopé. ʻOku fehoanakimālie ia mo e Tohitapú?
2 Ko e tokolahi ʻo e kau ʻaposetolo ʻe toko 12, ko e kau mēmipa makatuʻunga ia ʻo e fakatahaʻanga Kalisitiané, ko e kau tangata mali kinautolu. (Mātiu 8:14, 15; ʻEfesō 2:20) Naʻe tohi ʻe Paula: “ʻOku ʻikai ʻamaua koā ke ō holo mo ha fefine lotu kuo ma mali, ʻo hange foki ko hono toe ʻo e kau Aposetolo, mo e ngaahi tokoua ʻo e ʻEiki, kaeʻumaʻā ʻa Kifasi [Pita]?” (1 Kolinitō 9:5) ʻOku tala moʻoni ʻe he New Catholic Encyclopedia ʻo pehē “ko e lao ʻo e taʻemalí ko e tupu pē ia mei he siasí” pea ko e “kau faifekau ʻo e F[uakava] F[oʻoú] naʻe ʻikai te nau moʻuaʻaki ke taʻemali.” ʻOku muimui ʻa e Kau Fakamoʻoni ʻa Sihová ki he sīpinga Fakatohitapú kae ʻikai ko e lao fakaesiasí.—1 Tīmote 4:1-3.
ʻOku Fehoanaki ʻa e Tuʻunga-Mātuʻá mo e Malí
3. Ko e hā ʻa e ngaahi moʻoniʻi meʻa Fakatohitapu ʻoku nau fakahaaʻi ʻoku malava ke mali ʻa e kau ʻovasia Kalisitiané?
3 ʻI he ʻikai ʻuhinga ʻo pehē ko e kau tangata kuo fakanofo ko e kau ʻovasiá ʻoku totonu ke nau taʻemalí, naʻe tohi ʻe Paula kia Taitusi: “Koe mea ni naaku tuku ai koe i Keliti, koeuhi ke ke fakatonutonu ae gaahi mea nae ikai fakaoji, o fakanofo ae kau mātua [faka-Kalisi, pre·sbyʹte·ros] i he kolo kotoabe, o hage koia naaku fekau kiate koe: Kabau oku taehala ha toko taha, koe unoho oe fefine be taha, oku tui ene fānau, bea oku ikai valokia i ha fakamaveuveu be ha talagataa. He oku totonu ke taehalaia ae tauhi, [faka-Kalisi, e·piʹsko·pos, haʻu mei ai ʻa e foʻi lea “pīsope”], o tāu moe tauhi koloa ae Otua.”—Taitusi 1:5-7, PM.
4. (a) ʻOku anga-fēfē ʻetau ʻilo ko e malí ʻoku ʻikai ko ha fiemaʻu ia ki he kau ʻovasia Kalisitiané? (e) Ko e hā ʻa e lelei ʻoku maʻu ʻe ha tokoua taʻemali ʻa ia ko ha tokotaha mātuʻa ia?
4 ʻI he tafaʻaki ʻe tahá, ko e malí ʻoku ʻikai ko ha fiemaʻu Fakatohitapu ia ki he tuʻunga-mātuʻá. Naʻe nofo taʻemali pē ʻa Sīsū. (ʻEfesō 1:22) Ko Paula, ko ha ʻovasia tuʻu-ki-muʻa ia ʻi he fakatahaʻanga Kalisitiane ʻi he ʻuluaki senitulí, naʻe ʻikai mali. (1 Kolinitō 7:7-9) ʻI he ʻahó ni, ʻoku tokolahi ʻa e kau Kalisitiane taʻemali ʻoku nau ngāue ko e kau mātuʻa. ʻOku hanga nai ʻe honau tuʻunga taʻemalí ʻo ʻoange kiate kinautolu ʻa e taimi lahi ange ke fakahoko ai honau ngaahi ngafa ko e kau ʻovasiá.
‘Ko e Tangata Fakauaifí ʻOku Fetohoaki Hono Lotó’
5. Ko e hā ʻa e moʻoni Fakatohitapu ʻoku totonu ke ʻiloʻi ʻe he ngaahi tokoua kuo ʻosi malí?
5 ʻI he mali ʻa ha tangata Kalisitiane, ʻoku totonu ke ne fakatokangaʻi ʻokú ne maʻu ha fatongia foʻou ʻa ia ʻe fiemaʻu ai hono taimí mo ʻene tokangá. ʻOku fakahā ʻe he Tohitapú: “ʻOku moʻua ʻa e loto ʻo e tangata taʻemaʻu uaifi ʻi he ngaahi meʻa ʻa e ʻEiki, heʻene feinga ke hohóʻia ʻa e finangalo ʻo e ʻEiki: ka ko e tangata fakauaifi ʻoku moʻua hono loto ʻi he meʻa ʻo mamani, heʻene feinga ke hohóʻia hono uaifi; pea fetohoaki ai hono loto.” (1 Kolinitō 7:32-34) ʻI he ʻuhinga fē ʻoku fetohoaki aí?
6, 7. (a) Ko e hā ʻa e founga ʻe taha ʻoku ‘fetohoaki ai ʻa e loto’ ʻo ha tangata mali? (e) Ko e hā ʻa e akonaki ʻoku ʻomai ʻe Paula ki he kau Kalisitiane ʻosi malí? (f) ʻOku malava fēfē ke tataki ʻe he meʻá ni ʻa e fili ʻa ha tangata ke ne tali ha ngāue ʻoku vaheʻi ange?
6 Ko e meʻa ʻe taha, ʻoku tukuange atu ʻe ha tangata mali ʻa ʻene pule ki hono sino ʻoʻoná. Naʻe fakamahino ʻaupito ʻeni ʻe Paula: “ʻOku ʻikai ʻa e uaifi ke faʻiteliha ki hono sino oʻona, ka ko hono husepaniti pe: pehe foki, ʻoku ʻikai ʻa e husepaniti ke faʻiteliha ki hono sino oʻona, ka ko hono uaifi.” (1 Kolinitō 7:4) ʻOku ongoʻi nai ʻe he niʻihi ʻoku fakakaukau atu ke malí ʻoku ʻikai loko mahuʻinga ʻeni ia koeʻuhi he ʻikai hoko ʻa e fehokotaki fakasinó ia ko e meʻa mahuʻinga ʻi heʻena nofo malí. Kae kehe, koeʻuhi ko ha fiemaʻu Fakatohitapu ʻa e anga-maʻa ʻi he ki muʻa ke malí, ʻoku ʻikai ke ʻiloʻi moʻoni ai ʻe he kau Kalisitiané ʻa e ngaahi fiemaʻu fekoekoeʻi ʻa honau hoa ʻi he kahaʻú.
7 ʻOku fakahāhaaʻi ʻe Paula ʻo pehē naʻa mo ha ongo meʻa mali ʻokú na ‘fokotuʻu ʻi heʻena fakakaukaú ʻa e ngaahi meʻa ʻa e laumālié’ kuo pau ke na fefakakaukauʻaki ki he ngaahi fiemaʻu fakaefehokotaki fakasino ʻa kinauá taki taha. Naʻá ne faleʻi ʻa e kau Kalisitiane ʻi Kolinitoó: “Ke fai ange ʻe he husepaniti ki hono uaifi ʻa e toʻonga totonu; pea pehe foki ʻa e uaifi ki hono husepaniti. ʻOua te mou mavae; ngata pe nai ʻi haʻamo loto taha ke fai, ʻo fuoloa siʻi pe, koeʻuhi ke mou ʻataʻatā ke fai ha lotu: pea mo toe fakataha, telia naʻa ʻahiʻahi kimoutolu ʻe Setane ʻi hoʻomou taʻefaʻakataki.” (Loma 8:5; 1 Kolinitō 7:3, 5) ʻOku fakalotomamahí he kuo hoko ʻa e ngaahi keisi fekauʻaki mo e tonó ʻi he ʻikai ke muimui ki he faleʻi ko ʻení. ʻI heʻene peheé, ʻoku totonu leva ki ha tokotaha Kalisitiane ʻosi mali ke ne fakakaukauʻi fakalelei ʻa e ngaahi meʻá ki muʻa ke ne tali ha ngāue ʻoku vaheʻi ange ʻa ia te ne fakamavaheʻi ai ia mei hono uaifí ʻi ha vahaʻa taimi lōloa. ʻOku ʻikai te ne kei maʻu ʻa e tauʻatāina tatau ʻo e ngāué ʻo hangē ko ia naʻá ne maʻu ʻi he taimi naʻá ne kei taʻemali aí.
8, 9. (a) Ko e hā naʻe ʻuhinga ki ai ʻa Paula ʻi heʻene pehē ko e kau Kalisitiane ʻosi malí ʻoku “moʻua hono loto ʻi he meʻa ʻo mamani”? (e) Ko e hā ʻoku totonu ke loto-moʻua ʻa e kau Kalisitiane ʻosi malí ke faí?
8 ʻI he ʻuhinga fē ʻoku malava ai ke pehē ko e kau tangata Kalisitiane ʻosi malí, ʻo kau ai ʻa e kau mātuʻá, ʻoku ‘moʻua honau lotó ʻi he meʻa ʻo mamaní [koʹsmos]’? (1 Kolinitō 7:33) ʻOku hā mahino ʻaupito naʻe ʻikai ke lea ʻa Paula ia ʻo kau ki he ngaahi meʻa kovi ʻo e māmani ko ʻení, ʻa ia kuo pau ke fakamamaʻo mei ai ʻa e kau Kalisitiane moʻoní kotoa. (2 Pita 1:4; 2:18-20; 1 Sione 2:15-17) ʻOku akoʻi kitautolu ʻe he Folofola ʻa e ʻOtuá “ke tau fakafisi ki he fakaʻotuamate, mo e ngaahi holi fakaemamani [ko·smi·kosʹ]; ka tau moʻui angafakamaʻumaʻu mo angatonu mo angafakalotu ʻi he maama ko eni.”—Taitusi 2:12.
9 Ko ia ai, ko ha tokotaha Kalisitiane ʻosi mali ʻoku “moʻua hono loto ʻi he meʻa ʻo mamani” he ʻokú ne tokanga totonu ʻo fekauʻaki mo e ngaahi meʻa fakaemāmani ʻa ia ko e konga ia ʻo e moʻui nofo mali totonú. ʻOku kau heni ʻa e nofoʻanga, meʻakai, vala, fakafiefia—ʻoku ʻikai fai ha lau ia ki he toe ngaahi tokanga kehe taʻefaʻalaua kapau ʻoku ʻi ai ha fānau. Ka naʻa mo ha ongo meʻa mali ʻoku ʻikai maʻu fānau, ke lavameʻa ʻa e nofo malí, kuo pau ki he husepānití mo e uaifí fakatouʻosi ke na loto-moʻua ki hono maʻu ʻa e “hohóʻia” ʻa hono hoa malí. ʻOku tautefito ʻa e mahuʻinga ʻa e meʻá ni ki he kau mātuʻa Kalisitiané ʻi heʻenau ʻai ke palanisi honau ngaahi fatongiá.
Ngaahi Husepāniti Lelei Pea Pehē Foki ko e Kau Mātuʻa Lelei
10. Ke taau ha tokotaha Kalisitiane ke hoko ko ha tokotaha mātuʻa, ko e hā ʻoku totonu ke malava ʻe hono ngaahi tokouá mo e kakai ʻi tuʻá ʻo fakatokangaʻí?
10 Neongo ko e malí ʻoku ʻikai ko ha fiemaʻu ia ki he tuʻunga-mātuʻá, kapau ʻoku mali ha tangata Kalisitiane, ki muʻa pea fai hono fakaongoongoleleiʻi ke fakanofo ko ha mātuʻá, ʻoku totonu moʻoni ke ne ʻomai ʻa e fakamoʻoni ʻo e feinga ke hoko ko ha husepāniti lelei, anga-ʻofa, ʻi hono ngāueʻi ʻa e tuʻunga-ʻulu totonú. (ʻEfesō 5:23-25, 28-31) Naʻe tohi ʻe Paula: “Ka feinga ʻe ha taha ke maʻu ʻa e lakanga ʻo e faifekau pule, ko ʻene holi ki ha ngaue lelei. Ko ia ko hono tonu ʻo e faifekau pule ke taʻemele, ko e husepaniti ʻo ha fefine pe taha.” (1 Tīmote 3:1, 2) ʻOku totonu ke hā mahino ʻoku fai ʻe ha tokotaha mātuʻa ʻa ʻene lelei tahá ke hoko ko ha husepāniti lelei, ʻo tatau ai pē pe ko hono uaifí ko ha kaungā-Kalisitiane pe ʻikai. Ko hono moʻoní, naʻa mo e kakai ʻi tuʻa mei he fakatahaʻangá ʻoku totonu ke nau malava ʻo fakatokangaʻi ʻokú ne tokanga lelei ki hono uaifí pea mo hono ngaahi fatongia kehé. Naʻe tānaki atu ʻe Paula: “Ko hono tonu ke ne ongoongolelei mei he kakai ʻo tuaʻā, naʻa to ia ki he laua, pea mo ha tauhele ʻa e Tevolo.”—1 Tīmote 3:7.
11. ʻOku ʻuhinga ki he hā ʻa e kupuʻi lea “ko e husepaniti ʻo ha fefine pe taha,” ko ia ko e hā ʻa e tomuʻa fakatokanga ʻoku totonu ke fai ki ai ʻa e kau mātuʻá?
11 Ko e moʻoni, ʻoku hanga ʻe he kupuʻi lea “ko e husepaniti ʻo ha fefine pe taha” ʻo taʻofi ʻa e mali tokolahí, ka ʻoku toe ʻuhinga ki he anga-tonu fakaemalí. (Hepelū 13:4) ʻOku tautefito ki he kau mātuʻá ʻa e fiemaʻu ke mātuʻaki tokanga ʻi he taimi ʻoku nau tokoni ai ki he ngaahi tuofāfine ʻi he fakatahaʻangá. ʻOku totonu ke nau fakaʻehiʻehi mei he ʻalu tokotaha pē ʻi hono fai ha ʻaʻahi ki ha tuofefine ʻoku fiemaʻu ki ai ha akonaki mo ha fakafiemālie. ʻE lelei ke nau ʻalu fakataha mo ha tokotaha mātuʻa ʻe taha, ko ha sevāniti fakafaifekau, pe naʻa mo honau uaifí kapau ko hano fai pē ha ʻaʻahi fakalototoʻa.—1 Tīmote 5:1, 2.
12. Ko e hā ʻa e fakamatala ʻoku totonu ke aʻusia ʻe he ngaahi uaifi ʻo e kau mātuʻá mo e kau sevāniti fakafaifekaú?
12 Ko ha meʻa ʻe taha, ʻi hono fakahokohoko mai ʻa e ngaahi fiemaʻu ki he kau mātuʻá mo e kau sevāniti fakafaifekaú, naʻe toe fai ai ʻe he ʻaposetolo ko Paulá ha lea akonaki ki he ngaahi uaifi ʻo e faʻahinga ʻoku fakakaukauʻi ki ai ʻa e ngaahi monū peheé. Naʻá ne tohi: “Bea ke aga fakalogobe a ho nau unoho, ikai koe kau fakakovi, kae aga fakabotoboto, o agatotonu i he mea kotoabe.” (1 Tīmote 3:11, PM) ʻOku malava ʻe ha husepāniti Kalisitiane ke ne tokoni lahi ki hono uaifí ke ne aʻusia ʻa e fakamatala ko ʻení.
Ngaahi Ngafa Fakatohitapu ki ha Uaifi
13, 14. Neongo ʻoku ʻikai ko ha kaungā Fakamoʻoni ʻa e uaifi ia ʻo ha tokotaha mātuʻa, ko e hā ʻoku totonu ai ke ne nofo mo ia pea ke ne hoko ko ha husepāniti leleí?
13 Ko e moʻoni, ko e akonaki ko ʻeni ʻoku fai ki he ngaahi uaifi ʻo e kau mātuʻá pe kau sevāniti fakafaifekaú ko e tomuʻa mahalo mai ia ko e ngaahi uaifi peheé ko e kau Kalisitiane ʻosi fakatapui kinautolu. Hangē ko ia ʻoku angaʻakí, ko e meʻa ia ʻoku fiemaʻú koeʻuhi ʻoku fiemaʻu ki he kau Kalisitiané ke nau mali “i he Eiki be.” (1 Kolinitō 7:39, PM) Kae fēfē kapau ko ha tokoua ia naʻe ʻosi mali mo ha tokotaha taʻetui ʻi he taimi naʻá ne fakatapui ai ʻa ʻene moʻuí kia Sihová, pe kuo tō ʻa hono uaifí mei he moʻoní ka naʻe ʻikai ko ha kovi ia ʻa e tokouá?
14 ʻE ʻikai ke taʻofi ia ʻe he meʻá ni mei he hoko ko ha tokotaha mātuʻá. Neongo ia, ʻe ʻikai ke fakatonuhiaʻi ai ia mei haʻane mavahe mei hono uaifí koeʻuhi pē ko e ʻikai te ne kau fakataha mo ia ʻi heʻene ngaahi tuí. Naʻe faleʻi mai ʻa Paula: “Ka ʻoku ke alafianga ki ha fefine, ʻoua te ke kumi ha vete.” (1 Kolinitō 7:27) Naʻá ne toe fakahā: “Kabau oku ai ha kaiga tagata oku maʻu ae unoho taetui, bea oku loto lelei ia ke na nonofo, ke oua naa ne liaki ia. Bea kabau e alu ae taetui, tuku be ke alu. Oku ikai haʻijia ha kaiga tagata, be ha kaiga fefine, i he gaahi mea behe; ka kuo ui akitautolu e he Otua ki he aga fakamelino. He oku ke ilo fefe, e fefine, be te ke fakamoui ho unoho be ikai? bea oku ke ilo fefeʻi, e tagata, be te ke fakamoui ho unoho be ikai?” (1 Kolinitō 7:12, 15, 16, PM) Neongo ka ʻoku ʻikai ko ha tokotaha Fakamoʻoni ʻa hono uaifí, ʻoku totonu ki ha tokotaha mātuʻa ke ne hoko ko ha husepāniti lelei.
15. Ko e hā ʻa e akonaki ʻoku ʻomai ʻe he ʻaposetolo ko Pitá ki he ngaahi husepāniti Kalisitiané, pea ko e hā ʻa e ngaahi nunuʻa ʻoku malava ke hoko kapau ʻoku fakamoʻoniʻi ha tokotaha mātuʻa ko ha husepāniti taʻetokanga?
15 Tatau ai pē pe ko hono uaifí ko ha kaungā-tui pe ʻikai, ʻoku totonu ke ʻiloʻi ʻe he tokotaha mātuʻa Kalisitiané ʻoku fiemaʻu ki hono uaifí ʻa ʻene tokanga anga-ʻofá. Naʻe tohi ʻe he ʻaposetolo ko Pitá: “Ko kimoutolu foki ae kau tagata, ke mou nonofo mo kinautolu [homou ngaahi uaifí] o fakatatau ki he ilo, o fakaabaaba ki he unoho, o tāu moe ibu vaivai, bea ke hage koe kauga hoko mo ia ki he ofa fakamoui; bea koeuhi ke oua naa taofia hoo mou gaahi lotu.” (1 Pita 3:7, PM) ʻOku maumauʻi ʻe ha husepāniti ʻa ia ʻoku ʻikai ke fie tokanga ki he ngaahi fiemaʻu ʻa hono uaifí ʻa hono vahaʻangatae mo Sihová; ʻoku lava ʻe he meʻa ko iá ʻo taʻofi ʻa ʻene fetuʻutaki kia Sihová ʻo hangē ʻoku pūlouʻi “ʻaki ha ʻao ke ʻoua naʻa ʻasi ha hu.” (Tangilāulau 3:44) ʻOku lava ke taki atu ʻe he meʻá ni ke ne hoko ai ʻo ʻikai taau ke ngāue ko ha ʻovasia Kalisitiane.
16. Ko e hā ʻa e poini tefito ʻoku ʻomai ʻe Paulá, pea ʻoku totonu ke anga-fēfē ʻa e ongoʻi ʻa e kau mātuʻá ʻo kau ki he meʻá ni?
16 Hangē ko ia kuo fakahaaʻí, ko e foʻi fakakaukau tefito ʻo e fakamatala ʻa Paula ʻoku pehē, ʻi he mali ʻa ha tangata, ʻokú ne tukuange atu ha konga ʻo e tauʻatāina naʻá ne maʻu ʻi heʻene kei hoko ko ha tangata taʻemalí ʻa ē naʻá ne fakaʻatā ia ke ne “fakafeʻao lelei ki he ʻEiki taʻe ha fehākaaki.” (1 Kolinitō 7:35) ʻOku hā mei he ngaahi līpootí ʻoku ʻi ai ʻa e kau mātuʻa ʻosi mali ʻe niʻihi kuo ʻikai te nau fakakaukau palanisi maʻu pē ʻi he ngaahi lea fakamānavaʻi ʻa Paulá. ʻI heʻenau holi ke aʻusia ʻa e meʻa ʻoku nau fakakaukau ʻoku totonu ke fai ʻe he kau mātuʻa leleí, ʻoku nau fakatooki nai ai ʻa e niʻihi ʻo honau ngaahi ngafa fakaehusepānití. ʻE faingataʻa ki he niʻihi ke nau fakafisingaʻi ha monū ʻi he fakatahaʻangá, neongo ʻoku hā mahino ko hono tali iá ʻe kaunga kovi fakalaumālie ia ki honau ngaahi uaifí. ʻOku nau fiefia ʻi he ngaahi monū ʻoku ʻomai ʻe he nofo malí, ka ʻoku nau loto-lelei ke fakahoko ʻa e ngaahi fatongia ʻoku ō fakataha mo iá?
17. Ko e hā kuo hoko ki he ngaahi uaifi ʻe niʻihi, pea naʻe mei malava fēfē nai ke taʻofi ke ʻoua ʻe hoko ʻa e meʻá ni?
17 Ko hono moʻoní, ʻoku taau ke fakaongoongoleleiʻi ʻa e faivelenga ʻi he tuʻunga ko ha tokotaha mātuʻá. Ka, ko ha tokotaha Kalisitiane palanisi kapau ko hono fakahoko ʻa hono ngaahi ngafa ʻi he fakatahaʻangá, ʻokú ne taʻetokanga ai ki hono ngaahi fatongia Fakatohitapu ki hono uaifí? Neongo ʻa e loto ke poupou ki he faʻahinga ʻi he fakatahaʻangá, ʻoku toe tokanga foki ha tokotaha mātuʻa palanisi ʻo fekauʻaki mo e tuʻunga fakalaumālie ʻa hono uaifí. Kuo hoko ʻa e ngaahi uaifi ʻo e kau mātuʻa ʻe niʻihi ʻo vaivai fakalaumālie, pea kuo hoko ʻa e niʻihi ʻo “tūkia” fakalaumālie. (1 Tīmote 1:19) Neongo ko e fatongia ia ʻo ha uaifi ke ngāue ki hono fakamoʻui ʻo ia tonú, ʻi he ngaahi meʻa ʻe niʻihi naʻe mei malava pē ke ʻoua ʻe hoko ʻa e palopalema fakalaumālié ia kapau naʻe “fafanga mo tauhi” ʻe he tokotaha mātuʻá ʻa hono uaifí, “ʻo hangē foki ko e fai ʻa Kalaisi ki he siasi.” (ʻEfesō 5:28, 29) Ko e moʻoni, kuo pau ki he kau mātuʻá ke nau ‘lamasi kinautolu, mo e fanga sipí kotoa.’ (Ngāue 20:28, fakaʻītali ʻamautolu.) Kapau ʻoku nau mali ʻoku kau heni ʻa honau ngaahi uaifí.
‘Fakamamahi ʻE To ki he Moʻuí’
18. Ko e hā ʻa e niʻihi ʻo e ngaahi tafaʻaki ʻo e “fakamamahi” ʻoku hokosia ʻe he kau Kalisitiane ʻosi malí, pea ʻoku malava fēfē ke uesia ʻe he meʻá ni ʻa e ngaahi ngāue ʻa ha tokotaha mātuʻa?
18 Naʻe toe tohi ʻe he ʻaposetoló: “Kapau te ke mali, talaʻehai ko hoʻo angahala: pea kapau ʻe mali ha finemui, talaʻehai kuo ne angahala ai. Ka ko e faʻahinga ko ia ʻe ai ha fakamamahi ʻe to ki heʻenau moʻui; pea ko siʻeku maemaeʻekina kimoutolu.” (1 Kolinitō 7:28) Naʻe loto ʻa Paula ke ne maemaeʻekina ʻa e faʻahinga ʻoku malava ke nau muimui ʻi heʻene faʻifaʻitakiʻanga ʻi he nofo taʻemalí mei he ngaahi loto-moʻua ʻoku hoko fakataha mai mo e malí ʻo ʻikai toe ala mataʻofí. ʻOku aʻu pē ki he ngaahi hoa mali ʻoku ʻikai haʻanau fānaú, ʻoku kau nai ʻi he ngaahi loto-moʻuá ni ʻa e ngaahi palopalema ʻo e moʻui leleí pe ngaahi faingataʻaʻia fakaepaʻanga pea pehē ki he ngaahi fatongia Fakatohitapu ki he ongo mātuʻa taʻumotuʻa ʻo hoto hoá. (1 Tīmote 5:4, 8) Kuo pau ki ha tokotaha mātuʻa, ke ne fekuki mo e ngaahi fatongiá ni ʻi ha founga ʻoku ala faʻifaʻitakiʻanga, pea ʻe hanga ʻe he meʻá ni ʻo uesia nai ʻi he taimi ʻe niʻihi ʻa ʻene ngaahi ngāue ʻi he tuʻunga ko ha ʻovasia Kalisitiané. Ko e meʻa fakafiefiá, ko e tokolahi taha ʻo e kau mātuʻá ʻoku nau fai ʻa e ngāue lelei ʻi hono fakahoko fakatouʻosi ʻa e ngaahi fatongia fakafāmilí mo e fakaefakatahaʻangá.
19. Ko e hā naʻe ʻuhinga ki ai ʻa Paula ʻi heʻene pehē: “Ke ʻilonga ʻa e maʻu uaifi, ke nau hange ʻoku ʻikai te nau maʻu”?
19 Naʻe tānaki atu ʻe Paula: “Kuo fakanounou ʻa e kuonga, koeʻuhi ʻi he taimi ʻoku toe, ke ʻilonga ʻa e maʻu uaifi, ke nau hange ʻoku ʻikai te nau maʻu.” (1 Kolinitō 7:29) Ko hono moʻoní, ʻi he vakai atu ki he meʻa naʻá ne ʻosi tohi ʻi he vahe ko ʻení ki he kau Kolinitoó, ʻoku hā mahino naʻe ʻikai te ne ʻuhinga ʻo pehē ʻoku totonu ki he kau Kalisitiane ʻosi malí ke nau tukunoaʻi honau ngaahi uaifí ʻi ha founga. (1 Kolinitō 7:2, 3, 33) Naʻá ne fakahāhā ʻa e meʻa naʻá ne ʻuhinga ki aí, ʻi he taimi naʻá ne tohi ai: “Ko kinautolu ʻoku ngaueʻaki ʻa mamani, ke hange ʻoku ʻikai ko ʻenau meʻa ke ʻosiki: he kuo kamata liliu ʻa e anga ʻo e maama ko eni.” (1 Kolinitō 7:31) ʻOku ʻangeʻange ange ʻa e “fakaʻaʻau ke mole ʻa mamani,” ʻi he taimí ni ʻi he ʻaho ʻo Paulá pe ʻi he ʻaho ʻo e ʻaposetolo ko Sioné. (1 Sione 2:15-17) Ko ia ai, ko e kau Kalisitiane ʻosi mali ko ia ʻoku nau ongoʻi ʻa e fiemaʻu ke fai ha ngaahi feilaulau ke muimui kia Kalaisí, ʻoku ʻikai te nau nōfoʻi maʻataʻatā pē ki he ngaahi fiefia mo e ngaahi monū ʻo e malí.—1 Kolinitō 7:5.
Ngaahi Uaifi Feilaulauʻi-Kita
20, 21. (a) Ko e hā ʻa e ngaahi feilaulau ʻoku loto-lelei ʻa e ngaahi uaifi Kalisitiane tokolahi ke nau faí? (e) Ko e hā ʻoku totonu ke ʻamanekina ʻe ha uaifi mei hono husepānití, neongo ko ha tokotaha mātuʻa ia?
20 Hangē pē ko hono fai ʻe he kau mātuʻá ʻa e ngaahi feilaulau koeʻuhi ke ʻaonga ki he niʻihi kehé, kuo feinga ʻa e tokolahi ʻo e ngaahi uaifi ʻo e kau mātuʻá ke ʻai ke palanisi honau ngaahi fatongia ʻi he nofo malí mo e ngaahi meʻa mātuʻaki mahuʻinga ʻo e Puleʻangá. ʻOku fiefia ʻa e laui afe ʻo e kau fefine Kalisitiané ke ngāue fakataha ke malava ʻe honau ngaahi husepānití ke fakahoko honau ngaahi ngafa ko e kau ʻovasiá. ʻOku ʻofa ʻa Sihova ʻiate kinautolu koeʻuhi ko e meʻá ni, pea ʻokú ne tāpuakiʻi ʻa e laumālie lelei ʻoku nau fakahāhaá. (Filimone 25) Ka neongo ia, ʻoku fakahaaʻi ʻe he akonaki palanisi ʻa Paulá ʻoku totonu ʻa hono ʻamanekina ʻe he ngaahi uaifi ʻo e kau ʻovasiá ha taimi lahi feʻunga mo e tokanga mei honau ngaahi husepānití. Ko e ngafa Fakatohitapu ia ʻo e kau mātuʻa ʻosi malí ke vaheʻi ha taimi feʻunga ki honau ngaahi uaifí koeʻuhi ke aʻu ke palanisi honau ngaahi fatongia ko e husepāniti mo ʻovasiá.
21 Kae fēfē kapau ʻoku tānaki atu ki he hoko ko ha husepānití, ʻa e hoko ha tokotaha mātuʻa Kalisitiane ko ha tamai? ʻOku tānaki atu ʻa e meʻá ni ki hono ngaahi fatongiá pea ʻoku fakaava mai ai ha toe tafaʻaki ʻo e tauhí, ʻo hangē ko ia te tau sio ki ai ʻi he kupu hono hoko maí.
Ko e Fakamanatú
◻ Ko e hā ʻa e ngaahi moʻoni Fakatohitapu ʻoku nau fakahaaʻi ʻoku malava pē ki ha tangata ʻosi mali ke hoko ko ha ʻovasia Kalisitiane?
◻ Kapau ʻe mali ha tokotaha mātuʻa taʻemali, ko e hā ʻoku totonu ke ne ʻilo ki aí?
◻ ʻI he ngaahi founga fē ʻoku hoko ai ha tokotaha Kalisitiane ʻosi mali ʻo “moʻua hono loto ʻi he meʻa ʻo mamani”?
◻ ʻOku anga-fēfē hono fakahāhā ʻe he ngaahi uaifi tokolahi ʻo e kau ʻovasiá ha laumālie lelei ʻo e feilaulauʻi-kitá?
[Fakatātā ʻi he peesi 15]
Neongo ʻa e moʻumoʻua ʻi he ngaahi ngāue fakateokalatí, ʻoku totonu ki ha tokotaha mātuʻa ke ne fai ʻa e tokanga anga-ʻofa ki hono uaifí