Tamai mo Mātuʻa​—Ko Hono Fakahoko ʻa e Ongo Ngafá

“Ka ʻo kapau ʻoku ʻikai lava ʻe ha tangata ke pule ki hono fale oʻona, pea fefe haʻane tauhi ʻa e siasi ʻa e ʻOtua?”​—1 TĪMOTE 3:5.

1, 2. (a) ʻI he ʻuluaki senitulí, naʻe anga-fēfē ʻa e malava ʻe he kau ʻovasia taʻemalí pea mo e kau ʻovasia naʻe ʻosi mali kae ʻikai maʻu fānaú ʻo ngāue maʻa honau ngaahi tokouá? (e) ʻOku anga-fēfē ʻa e hoko ʻa ʻAkuila mo Pīsila ko ha faʻifaʻitakiʻanga ki he ngaahi hoa mali lahi ʻi he ʻahó ni?

KO E kau ʻovasia ʻi he muʻaki fakatahaʻanga Kalisitiané naʻe malava ke kau ki ai ʻa e kau tangata taʻemali pe ʻosi mali kae ʻikai maʻu fānau pe kau tangata maʻu fāmili fakataha mo e fānau. ʻOku ʻikai ha veiveiua naʻe malava ke muimui ʻa e niʻihi ʻo e kau Kalisitiane ko iá ʻi he faleʻi ʻa e ʻaposetolo ko Paulá naʻe fai ʻi heʻene ʻuluaki tohi ki he kau Kolinitoó, vahe 7, ʻo nofo taʻemali ai pē. Naʻe fakahā ʻe Sīsū: “ʻOku ʻi ai ʻa e faʻahinga iunoke kuo nau ngaohi kinautolu ke pehe, koeʻuhi ko e Puleʻanga ʻo Hevani.” (Mātiu 19:12) Ko e kau tangata taʻemali peheé, hangē ko Paula mo e niʻihi kehe nai ʻo hono ngaahi kaungā fonongá, te nau ʻataʻatā ke ō ʻo tokoni ki honau ngaahi tokouá.

² ʻOku ʻikai ke talamai ʻe he Tohitapú ia ko ha kau tangata taʻemali ʻa Panepasa, Maʻake, Sailosi, Luke, Tīmote, mo Taitusi. Kapau naʻa nau mali, tā naʻa nau tauʻatāina feʻunga mei honau ngaahi fatongia fakafāmilí kae lava ke nau fononga mamaʻo ʻi he ngaahi ngāue kehekehe naʻe vaheʻi angé. (Ngāue 13:2; 15:​39-41; 2 Kolinitō 8:​16, 17; 2 Tīmote 4:​9-11; Taitusi 1:5) Naʻe malava ke nau ʻalu fakataha nai mo honau ngaahi uaifí, ʻo hangē ko Pita mo “hono toe ʻo e kau ʻaposetolo,” ʻoku hā mahino naʻa nau ō mo honau ngaahi uaifí ʻi heʻenau ʻalu mei he feituʻu ki he feituʻu. (1 Kolinitō 9:​5) Ko ʻAkuila mo Pīsila ko ha faʻifaʻitakiʻanga ia ʻo ha ongo meʻa mali ʻa ia naʻá na loto-lelei ke hikihiki holo, ʻo muimui ʻia Paula mei Kolinitō ki ʻEfesō, pea hiki ai ki Loma, pea toe foki ki ʻEfesō. ʻOku ʻikai ke talamai ʻe he Tohitapú ia pe naʻe ʻi ai haʻana fānau. Ko ʻena ngāue līʻoa ki hona ngaahi tokouá naʻá na maʻu ai ʻa e fakamālō ʻa e “ngaahi siasi kotoa ʻo Senitaile.” (Loma 16:​3-5; Ngāue 18:​2, 18; 2 Tīmote 4:19) ʻI he ʻahó ni, ʻoku ʻikai ha veiveiua ʻoku tokolahi ʻa e ngaahi hoa mali hangē ko ʻAkuila mo Pīsilá, ʻoku malava ke nau ngāue ʻi ha ngaahi fakatahaʻanga kehe, ʻaki ʻenau hiki nai ki he feituʻu ʻoku lahi ange ai ʻa e fiemaʻú.

Tamai mo Mātuʻa

 3. Ko e hā ʻokú ne fakahā mai ko e tokolahi ʻo e kau mātuʻa ʻi he ʻuluaki senitulí ko e kau tangata mali pea maʻu mo e ngaahi fāmili?

³ ʻOku hā ko e tokolahi ʻo e kau mātuʻa Kalisitiane ʻi he ʻuluaki senituli T.S., ko e kau tangata mali mo maʻu fānau. ʻI hono fokotuʻu ʻe Paula ʻa e ngaahi tuʻunga taau naʻe fiemaʻu mei ha tangata ʻoku ‘feinga ke maʻu ʻa e lakanga ʻo e faifekau pulé,’ naʻá ne fakahā ko e tokotaha Kalisitiane peheé ʻoku totonu “ko e toko taha ʻoku pule lelei ki hono fale oʻona, ʻo mapuleʻi ʻene fanau ʻi he fakaʻapaʻapa ai pe.”​—1 Tīmote 3:​1, 4.

 4. Ko e hā naʻe fiemaʻu mei he kau mātuʻa naʻe ʻosi mali pea maʻu fānaú?

⁴ Hangē ko ia kuo tau vakai ki aí, naʻe ʻikai pau ki ha ʻovasia ke ne maʻu ha fānau, pe aʻu ʻo mali. Ka ʻo kapau naʻe mali, ke taau ko ha tokotaha mātuʻa pe ko ha sevāniti fakafaifekau, naʻe pau ki he tokotaha Kalisitiané ke ne ngāueʻi ʻa e tuʻunga-ʻulu totonu mo anga-ʻofá ki hono uaifí pea fakahāhā ko iá tonu ʻokú ne malava ʻo tauhi ʻa ʻene fānaú ʻi he anganofo totonu. (1 Kolinitō 11:3; 1 Tīmote 3:​12, 13) ʻE fakataʻeʻaongaʻi ha tokoua mei he ngaahi monū makehe ʻi he fakatahaʻangá ʻi he ʻi ai ha vaivai māfatukituki pē ʻi hono puleʻi hono falé. Ko e hā hono ʻuhingá? ʻOku fakamatalaʻi mai ʻe Paula: “Ka ʻo kapau ʻoku ʻikai lava ʻe ha tangata ke pule ki hono fale oʻona, pea fefe haʻane tauhi ʻa e Siasi ʻa e ʻOtua?” (1 Tīmote 3:5) Kapau naʻe ʻikai loto-lelei ʻa e faʻahinga ia ʻi hono fale ʻoʻoná ke nau anganofo ki heʻene tauhí, ʻe anga-fēfē ʻa e tali ʻa e niʻihi kehé ia?

“ʻOku Tui Ene Fānau”

5, 6. (a) Ko e hā ʻa e fiemaʻu fekauʻaki mo e fānaú naʻe lave ʻa Paula kia Taitusi ʻo kau ki aí? (e) Ko e hā ʻoku ʻamanekina mei he kau mātuʻa ʻoku ʻi ai ʻenau fānaú?

⁵ ʻI hono fakahinohinoʻi ʻo Taitusi ke fakanofo ha kau ʻovasia ʻi he ngaahi fakatahaʻanga ʻi Kēlití, naʻe tuʻutuʻuni ʻe Paula: “Kabau oku taehala ha toko taha, koe unoho oe fefine be taha, oku tui ene fānau, bea oku ikai valokia i ha fakamaveuveu be ha talagataa. He oku totonu ke taehalaia ae tauhi, o tāu moe tauhi koloa ae Otua.” Ka ʻoku ʻuhinga koā ki he hā ʻa e fiemaʻu ʻo pehē “oku tui ene fānau”?​—Taitusi 1:​6, 7, PM.

⁶ Ko e kupuʻi lea ko ia “oku tui ene fānau” ʻoku ʻuhinga ia ki he tamaiki kuo nau ʻosi fakatapui ʻenau moʻuí kia Sihova pea kuo nau ʻosi papitaiso pe ko e faʻahinga taʻu siʻi ʻoku nau fakalakalaka atu ki he fakatapui mo e papitaisó. ʻOku ʻamanekina ʻe he kau mēmipa ʻo ha fakatahaʻanga ʻa e fānau ʻa e kau mātuʻá ke hoko ʻo māʻunga ʻulungaanga lelei mo talangofua. ʻOku totonu ke hā mahino ʻoku fai ʻe ha tokotaha mātuʻa ʻa e meʻa kotoa te ne malavá ke langa hake ʻa e tui ʻa ʻene fānaú. Naʻe tohi ʻe Tuʻi Solomone: “Atu ako ki ha tamasiʻi, ʻo tāu mo hono ʻalunga, talaatu ʻo ka ne ka motuʻa ʻe ʻikai te ne hiki mei ai.” (Palōvepi 22:6) Kae fēfē kapau ʻoku fakafisi ha talavou ia kuó ne maʻu ʻa e akoʻi peheé ke tauhi ʻa Sihova, pe aʻu ʻo ne fai ha faihala mamafa?

 7. (a) Ko e hā ʻoku hā mahino ai ʻoku ʻikai ke fakahaaʻi mai ʻe he Palōvepi 22:6 ha tuʻutuʻuni taʻengaofengofuá? (e) Kapau ʻoku ʻikai ke fili ʻa e tama ia ʻa ha tokotaha mātuʻa ke ne tauhi ʻa Sihova, ko e hā ʻe ʻikai ke hoko noa ai ha mole mei he tokotaha mātuʻá ʻa hono ngaahi monuú?

⁷ ʻOku hā mahino ko e palōvepi ko ia ʻoku hā ʻi ʻolungá ʻoku ʻikai ko hono fakahā mai ia ha tuʻutuʻuni tuʻumaʻu-mo-papau. ʻOku ʻikai te ne tāmateʻi ʻe ia ʻa e tefitoʻi moʻoni ʻo e tauʻatāina ke filí. (Teutalōnome 30:​15, 16, 19) ʻI he aʻu ʻa ha foha pe ko ha ʻofefine ki he taʻumotuʻa ʻo e fua fatongiá, kuo pau ke ne fai ha fili fakafoʻituitui ʻo fekauʻaki mo e fakatapuí mo e papitaisó. Kapau ʻoku hā mahino kuo fai ʻe ha tokotaha mātuʻa ia ʻa e tokoni, tataki, mo e akonaki fakalaumālie naʻe fiemaʻú, ka ʻoku ʻikai ke fili ʻa e talavoú ia ke tauhi ʻa Sihova, ʻoku ʻikai ke hokonoa pē ʻa hono fakataʻeʻaongaʻi ʻa e tamaí ia mei he ngāue ʻi he tuʻunga ko ha ʻovasiá. ʻI he tafaʻaki ʻe tahá, kapau ko e tokotaha mātuʻá ʻokú ne nofo mo haʻane fānau iiki ʻi ʻapi, pea ʻoku nau taufetongi ʻi he puke fakalaumālié mo e tō ki he faikoví, heʻikai nai ke kei lau ia “ko e tokotaha ʻoku pule lelei ki hono fale oʻona.” (1 Tīmote 3:4) Ko e poiní ʻeni, ʻoku totonu ke hā mai ʻoku fai ʻe ha ʻovasia ʻa ʻene lelei tahá ke “tui ene fānau, bea oku ikai valokia i ha fakamaveuveu be ha talagataa.”a

Mali ki ha “Unoho Taetui”

 8. ʻOku totonu ke fēfē ʻa e tōʻonga ʻa ha tokotaha mātuʻa ki hono uaifi taʻetuí?

⁸ ʻI he fekauʻaki mo ha kau tangata Kalisitiane kuo mali mo ha kau taʻetui, naʻe tohi ʻe Paula: “Kabau oku ai ha kaiga tagata oku maʻu ae unoho taetui, bea oku loto lelei ia ke na nonofo, ke oua naa ne liaki ia. . . . He oku . . . fakatabuʻi ae fefine taetui e hono unoho: ka ne ikai behe, e taemaa hoo mou fānau: ka ko eni oku nau maa. He . . . oku ke ilo fefeʻi, e tagata, be te ke fakamoui ho unoho be ikai?” (1 Kolinitō 7:​12-14, 16, PM) Ko e foʻi lea “taetui” hení ʻoku ʻikai ke ʻuhinga ia ki ha uaifi ʻoku ʻikai haʻane ngaahi tui fakalotu, ka ki ha taha ʻoku ʻikai fakatapui kia Sihova. Naʻe malava ke ne hoko ko ha Siu, pe ko ha tokotaha-tui ki he ngaahi ʻotua panganí. ʻI he ʻahó ni, ʻoku mali nai ha tokotaha mātuʻa mo ha fefine ʻoku kau ʻi ha lotu kehe, ko ha tokotaha ʻakinositika, pe naʻa mo ha tokotaha fakaʻikaiʻi-ʻOtua. Kapau ʻoku loto-lelei ʻa e fefiné ke nofo mo ia, ʻoku totonu ke ʻoua ʻe liʻaki ia ʻe he tangatá koeʻuhi pē ko e kehekehe ʻa e ngaahi tuí. ʻOku totonu ke ne kei ‘nonofo mo ia o fakatatau ki he ilo, o fakaabaaba ki he unoho o tāu moe ibu vaivai,’ ʻo nofo ai pē ʻi he ʻamanaki ki hono fakamoʻui ia.​—1 Pita 3:7, PM; Kolose 3:19.

 9. ʻI he ngaahi fonua ko ia ʻoku ʻoange ai ʻe he laó ki he husepānití mo e uaifí fakatouʻosi ʻa e totonu ke fakahā ki heʻena fānaú ʻa ʻena ngaahi tui fakalotú taki taha, ʻoku totonu ke fēfē ʻa e ngāue ki ai ʻa e tokotaha mātuʻá, pea ʻe anga-fēfē hono uesia ʻe he meʻá ni ʻa hono ngaahi monuú?

⁹ Kapau ʻoku ʻi ai ha fānau ʻa ha ʻovasia, te ne ngāueʻaki ʻa e tuʻunga-ʻulu totonu fakaehusepānití mo fakaetamaí ʻi hono ʻohake kinautolu “ʻi he akonaki mo e fakatonutonu-fakaʻatamai ʻa Sihová.” (ʻEfesō 6:4, NW) ʻI he ngaahi fonua lahi ʻoku ʻoange ai ʻe he laó ʻa e totonu ki he ongo meʻa malí fakatouʻosi ki hono tokonaki ʻo e fakahinohino fakalotú ki heʻena fānaú. ʻI he meʻá ni ʻe fekau nai ai ki he uaifí ke ne ngāueʻaki ʻa ʻene totonú ke fakahā ki he fānaú ʻa ʻene ngaahi tui fakalotú mo e ngaahi tōʻongá, ʻa ia ʻoku kau nai ai ʻa hono ʻave kinautolu ki hono siasí.b Ko hono moʻoní, ʻoku totonu ki he fānaú ke nau muimui ki honau konisēnisi kuo akoʻi mei he Tohitapú ʻi he fekauʻaki mo e ʻoua ʻe kau ki he ngaahi ouau fakalotu loí. ʻI he tuʻunga ko e ʻulu ʻo e fāmilí, ʻe ngāueʻaki ʻe he tamaí ʻa ʻene totonu ʻaʻaná ke ako mo ʻene fānaú pea ʻave kinautolu ki he ngaahi fakataha ʻi he Fale Fakatahaʻangá ʻi he taimi ʻe malava aí. ʻI heʻenau aʻu ki he taʻumotuʻa ʻa ia te nau fai nai ai ʻenau ngaahi fili pē ʻa kinautolú, te nau fai leva ʻa e fili maʻanautolu pe ko fē ʻa e tafaʻaki te nau ʻalu aí. (Siōsiua 24:15) Kapau ʻoku sio ʻa hono kaungā-mātuʻá pea mo e kau mēmipa ʻo e fakatahaʻangá ʻokú ne fai ʻa e meʻa kotoa ʻoku fakaʻatā ai ia ʻe he laó ke ne fai ke akoʻi totonu ʻa ʻene fānaú ʻi he hala ʻo e moʻoní, ʻe ʻikai ke fakataʻeʻaongaʻi ai ia mei hono tuʻunga ko ha ʻovasiá.

“Pule Lelei Ki Hono Fale”

10. Kapau ko ha tokotaha mātuʻa ha tangata maʻu fāmili, ko e hā ʻa hono fatongia tefitó?

¹⁰ Naʻa mo ha tokotaha mātuʻa ʻa ia ko ha tamai pea ko hono uaifí ko ha kaungā-Kalisitiane, ʻoku ʻikai ko ha ngāue faingofua ʻa hono vahevahe totonu ʻa hono taimí mo ʻene tokangá ki hono uaifí, fānaú, mo e ngaahi fatongia ʻi he fakatahaʻangá. ʻOku mahino ʻaupito ʻa e Tohitapú ʻi heʻene pehē ko ha fatongia ia ʻo ha tamai Kalisitiane ko e tokanga ki hono uaifí mo e fānaú. Naʻe tohi ʻe Paula: “He kabau oku ikai ke tokonaki e ha toko taha ki hono kaiga, bea kiate kinautolu tonu i hono fale, kuo jiaki eia ae lotu, bea lahi hake ene kovi aana iate ia oku taelotu.” (1 Tīmote 5:8, PM) ʻI he tohi tatau pē, naʻe fakahā ai ʻe Paula ko e kau tangata mali pē kuo nau ʻosi fakahāhaaʻi ʻa kinautolu tonu ko e ngaahi husepāniti mo e ngaahi tamai leleí, ʻoku totonu ke fakaongoongoleleiʻi ke ngāue ʻi he tuʻunga ko e kau ʻovasiá.​—1 Tīmote 3:​1-5.

11. (a) ʻI he ngaahi founga fē ʻoku totonu ai ki ha tokotaha mātuʻa ke ne ‘tokonaki ki hono kaigá’? (e) ʻOku anga-fēfē ʻa e malava ke tokoni ʻeni ki ha tokotaha mātuʻa ke ne aʻusia ʻa hono ngaahi fatongia ʻi he fakatahaʻangá?

¹¹ ʻOku totonu ke fai ʻe ha tokotaha mātuʻa ha “tokonaki” ki hono fāmilí ʻo ʻikai ngata pē ʻi he fakamatelié kae toe pehē ki he fakalaumālié mo fakaeongó. Naʻe tohi ʻe he tuʻi poto ko Solomoné: “Tokonaki hoʻo ngaue ʻi tuʻa, pea teuteu maʻau ʻi he vao; hili ia pea ke nofo ke langa hao fale.” (Palōvepi 24:27) Ko ia lolotonga ʻa hono tokonaki ʻa e ngaahi fiemaʻu fakamatelié, fakaeongó, mo e fakaefakafiefiá ki hono uaifí mo e fānaú, ʻoku toe totonu ki ha ʻovasia ke ne langa hake fakalaumālie kinautolu. ʻOku fiemaʻu ki he meʻá ni ʻa e taimi​—ʻa e taimi ko ia heʻikai te ne lava ke vaheʻi ia ki he ngaahi meʻa ʻa e fakatahaʻangá. Ka ko e taimi ia ʻoku lava ke iku ai ki ha ola lelei lahi ki he fiefia mo e tuʻunga fakalaumālie ʻo e fāmilí. ʻE faai atu pē, kapau ʻoku mālohi fakalaumālie ʻa hono fāmilí, ʻe siʻi leva ʻa e taimi ʻe fiemaʻu nai ai ki he tokotaha mātuʻá ke ngāue ki ha ngaahi palopalema ʻa e fāmilí. ʻE tauʻatāina ange ai ʻa hono ʻatamaí ke tokanga ki he ngaahi meʻa ʻa e fakatahaʻangá. Ko ʻene faʻifaʻitakiʻanga ko ia ʻi he tuʻunga ko ha husepāniti mo ha tamai leleí ʻe ʻaonga fakalaumālie ia ki he fakatahaʻangá.​—1 Pita 5:​1-3.

12. Ko e hā ʻa e meʻa fakafāmili ʻoku totonu ke fokotuʻu ʻe he ngaahi tamai ko ia ʻoku nau hoko ko e kau mātuʻá ha faʻifaʻitakiʻanga leleí?

¹² Ko e pule lelei ki ha fale ʻoku kau ai ʻa hono fokotuʻutuʻu ʻa e taimi ke fai ai ha ako fakafāmili. ʻOku mahuʻinga ia tautefito ki he kau mātuʻá ke nau fokotuʻu ha faʻifaʻitakiʻanga lelei ʻi he meʻá ni, he ʻoku faʻu ʻe he ngaahi fāmili mālohí ʻa e ngaahi fakatahaʻanga mālohi. Ko e taimi ʻa ha ʻovasia ʻoku totonu ke ʻoua ʻe moʻua maʻu pē ia ʻi he ngaahi monū kehe ʻo e ngāué ʻo ʻikai maʻu ai ha taimi ia ke ako mo hono uaifí mo e fānaú. Kapau ko e meʻa ia kuo hokó, ʻoku totonu ke ne toe sivisiviʻi ʻa ʻene taimi-tēpilé. ʻE fiemaʻu nai ke ne toe fakataimitēpileʻi pe fakasiʻisiʻi ʻa e taimi ʻokú ne vaheʻi ki ha ngaahi meʻa kehe, pea aʻu ʻo fakafisi mei ha ngaahi monū ʻe niʻihi ʻi ha taimi.

Mafamafatatau ʻa e Tauhí

13, 14. Ko e hā ʻa e akonaki kuo ʻomai ʻe he “tamaioeiki agatonu mo boto” ki he kau mātuʻa ko ia ko e kau tangata maʻu fāmilí?

¹³ ʻOku ʻikai ko ha meʻa foʻou ʻa e akonaki ko ia ke ʻai ke mafamafatatau ʻa e ngaahi fatongia ki he fāmilí mo e fakatahaʻangá. Kuo laui taʻu ʻa hono ʻomai ʻe he “tamaioeiki agatonu mo boto” ʻa e akonaki ki he kau mātuʻá ʻo kau ki he meʻá ni. (Mātiu 24:​45, PM) Ki muʻa ʻi he taʻu ʻe 37 kuo maliu atú, ko e The Watchtower ʻo Sepitema 15, 1959, peesi 553 mo e 554, naʻe faleʻi mai ai: “Ko hono moʻoní, ʻikai ʻoku tefito kotoa ʻi hono ʻai ke mafamafatatau ʻa e ngaahi meʻa kotoa ʻoku fiemaʻu ki ai hotau taimí? ʻI hono ʻai ko ʻeni ke mafamafatataú, ʻai ke tō ʻa e fakamamafa totonú ki he ngaahi mahuʻingaʻia ʻa ho fāmilí tonu. ʻOku pau heʻikai ke ʻamanekina mai ʻe he ʻOtua ko Sihová ha tangata ke ne ngāueʻaki ʻa e kotoa ʻo hono taimí ʻi he ngāue ʻa e fakatahaʻangá, ʻi he tokoni ki hono ngaahi tokouá mo e ngaahi kaungā-ʻapí ke maʻu ʻa e fakamoʻuí, pea hili iá ʻoku ʻikai ke tokanga ia ki he fakamoʻui ʻa hono falé tonu. Ko e fatongia tefito ia ʻo ha tangata ko hono uaifí mo e fānaú.”

¹⁴ ʻI he The Watchtower ʻo Nōvema 1, 1986, peesi 22, naʻe akonaki mai ai: “Ko e kau ʻi he ngāue fakafaifekaú ʻi he tuʻunga ko ha foʻi fāmilí te ne tohoaki ai kimoutolu ke mou vāofi ange, neongo ia, ka ko e ngaahi fiemaʻu makehe ki he fānaú ʻoku fiemaʻu ki ai ha vahevahe ho taimi fakafoʻituituí mo e ivi fakaeongó. Ko ia ai, ʻoku fiemaʻu ʻa e mafamafatatau ke fakapapauʻi ʻa hono lahi ʻo e taimi ʻoku malava ke ke ngāueʻaki ki he . . . ngaahi ngafa ʻi he fakatahaʻangá lolotonga iá ʻokú ke tokanga fakalaumālie, fakaeongo, mo fakamatelie ki ho ‘kaiga.’ Kuo pau [ki ha Kalisitiane] ke ne ‘fuofua fakaha e aga fakalotú i [hono] abí.’ (1 Tīmote 5:​4, 8, PM)”

15. Ko e hā ʻoku fiemaʻu ai ʻa e potó mo e ʻiloʻiló ki ha tokotaha mātuʻa ʻoku maʻu ha uaifi mo e fānaú?

¹⁵ ʻOku pehē ʻe ha palōvepi Fakatohitapu: “Ko e poto pe ʻoku langa ai ha fale; pea ko e fai fakapotopoto [“ʻiloʻiló,” NW] ʻa ia ʻoku tuʻumaʻu ai.” (Palōvepi 24:3) ʻIo, ke fakahoko ʻe ha ʻovasia ʻa hono ngaahi ngafa fakateokalatí pea ke ne langa hake ʻa hono fāmilí ʻi he taimi tatau pē, ʻoku pau ke fiemaʻu kiate ia ʻa e poto mo e ʻiloʻilo. ʻI he Fakatohitapú, ʻokú ne maʻu ʻo lahi hake ʻi he tahá ʻa e tafaʻaki ʻo e tauhí. ʻOku kau ai ʻa hono ngaahi fatongia ki hono fāmilí mo e fakatahaʻangá. ʻOku fiemaʻu kiate ia ʻa e ʻiloʻiló ke ne tauhi maʻu ʻa e mafamafatatau ʻi he vahaʻa ʻo e ongo tafaʻaki ko ʻení. (Filipai 1:​9, 10) ʻOku fiemaʻu kiate ia ʻa e potó ke ne fokotuʻutuʻuʻaki ʻa e ngaahi meʻa ke ne fakamuʻomuʻá. (Palōvepi 2:​10, 11) Neongo pe ʻoku fēfē ʻa hono lahi ʻo ʻene ongoʻi ʻa e fatongia ke ne tokanga ki hono ngaahi monū ʻi he fakatahaʻangá, ʻoku totonu ke ne fakatokangaʻi ko e tuʻunga ko ia ko e husepāniti mo tamaí, ko hono fatongia tefito kuo ʻomai ʻe he ʻOtuá ko e tokangaʻi mo e fakamoʻui ʻa hono fāmilí.

Ngaahi Tamai Lelei Pea Pehē Foki ko e Kau Mātuʻa Lelei

16. Ko e hā ʻa e lelei ʻoku maʻu ʻe ha tokotaha mātuʻa kapau ʻokú ne toe hoko ko ha tamai?

¹⁶ Ko ha tokotaha mātuʻa kuó ne maʻu ha fānau ʻulungaanga leleí ko ha meʻa ʻaonga lahi moʻoni ia. Kapau kuó ne ako ke tokangaʻi lelei ʻa hono fāmilí, ʻokú ne ʻi ha tuʻunga ai ke tokoni ki he ngaahi fāmili kehe ʻi he fakatahaʻangá. ʻE mahino lelei ange ai kiate ia ʻa ʻenau ngaahi palopalemá pea malava ke ne fai ʻa e akonaki ʻe tapua mei ai ʻa ʻene taukei ʻaʻaná. Ko e meʻa fakafiefia ia, ʻoku laui afe ʻa e kau mātuʻa ʻi he māmaní kotoa ʻoku nau fai ʻa e ngāue lelei ʻi he tuʻunga ko e ngaahi husepāniti, ngaahi tamai, mo e kau ʻovasia.

17. (a) Ko e hā ʻoku totonu ke ʻoua ʻaupito naʻa ngalo ʻi ha tangata ʻokú ne fakatou hoko ko ha tamai mo mātuʻa? (e) ʻOku totonu ke anga-fēfē hono fakahāhā ʻe he kau mēmipa kehe ʻo e fakatahaʻangá ʻa e kaungā ongoʻí?

¹⁷ Ke hoko ha tangata maʻu fāmili ko ha tokotaha mātuʻa, kuo pau ke ne hoko ko ha Kalisitiane matuʻotuʻa, ʻa ia ʻi he lolotonga ʻo ʻene tokanga ki hono uaifí mo ʻene fānaú, ʻoku malava ke ne fokotuʻutuʻu maau ʻa ʻene ngaahi meʻá kae malava ke ne vaheʻi ha taimi mo e tokanga ki he niʻihi kehe ʻi he fakatahaʻangá. ʻOku totonu ke ʻoua ʻaupito naʻa ngalo ʻiate ia ʻoku kamata ʻa ʻene ngāue fakaetauhi-sipí ʻi ʻapi. ʻI hono ʻiloʻi ʻoku maʻu ʻe he kau mātuʻa ʻoku maʻu ha uaifi mo e fānaú ʻa e fatongia fakatouʻosi ki honau ngaahi ngafa ki honau fāmilí mo ʻenau fakatahaʻangá, ʻe feinga ʻa e kau mēmipa ʻo e fakatahaʻangá ke ʻoua ʻe ʻai ha ngaahi fiemaʻu tōtuʻa ki honau taimí. Hangē ko ʻení, ko ha tokotaha mātuʻa ʻoku ʻi ai ʻene fānau ʻa ē kuo pau ke nau ō ki he akó ʻi he pongipongi hono hokó, ʻe ʻikai nai te ne malava maʻu pē ke nofo atu ʻi ha vahaʻa taimi ʻi he hili ʻa e ngaahi fakataha poʻulí. ʻOku totonu ke mahino ʻeni ki he kau mēmipa kehe ʻo e fakatahaʻangá pea fakahāhā ʻa e kaungā ongoʻí.​—Filipai 4:5.

ʻOku Totonu ke Tau Mahuʻingaʻia ʻi Heʻetau Kau Mātuʻá

18, 19. (a) Ko e hā kuo tau malava ʻo fakatokangaʻi ʻi heʻetau sivisiviʻi ʻa e 1 Kolinitō, vahe 7? (e) ʻOku totonu ke anga-fēfē ʻetau vakai ki he kau tangata Kalisitiane peheé?

¹⁸ ʻI heʻetau sivisiviʻi ʻa e vahe 7 ʻo e ʻuluaki tohi ʻa Paula ki he kau Kolinitoó kuo malava ai ke tau ʻilo, ʻi he muimui ki he faleʻi ʻa Paulá, ʻoku tokolahi ʻa e kau tangata taʻemali ʻoku nau ngāueʻaki ʻa ʻenau tauʻatāiná ke ngāue ai ki he ngaahi meʻa mahuʻinga ʻo e Puleʻangá. ʻOku toe ʻi ai mo e laui afe ʻo e ngaahi tokoua ʻosi mali ʻoku ʻikai maʻu fānau, ʻa ia, neongo ʻoku nau fai ʻa e tokanga totonu ki honau ngaahi uaifí, ʻoku nau ngāue ʻi he tuʻunga ko e kau ʻovasia lelei ʻi he ngaahi vahe, ngaahi feituʻu, ngaahi fakatahaʻanga, mo e ngaahi vaʻa ʻo e Taua Leʻó, fakataha mo e ngāue fakataha ʻoku taau ke fakaongoongoleleiʻi ai ʻa honau ngaahi uaifí. Fakaʻosí, ʻi he meimei ngaahi fakatahaʻanga ʻe 80,000 ʻo e kakai ʻa Sihová, ʻoku ʻi ai ʻa e ngaahi tamai tokolahi ai ʻoku ʻikai ngata pē ʻi heʻenau tokanga anga-ʻofa ki honau ngaahi uaifí mo e fānaú ka ʻoku nau toe vaheʻi ʻa e taimi ke ngāue ai maʻa honau ngaahi tokouá ʻi he tuʻunga ko e kau tauhi-sipi tokanga.​—Ngāue 20:28.

¹⁹ Naʻe tohi ʻe he ʻaposetolo ko Paulá: “Ko e kau faifekau ʻoku pule lelei, ʻe, ko honau tāu ha tokoni lōua; kaeʻumaʻā ʻa kinautolu ʻoku fakafitefitaʻa ʻi he malanga mo e faiako.” (1 Tīmote 5:17) ʻIo, ko e kau mātuʻa ʻoku nau pule ʻi ha founga lelei ʻi honau ngaahi ʻapí pea ʻi he fakatahaʻangá ʻoku taau ke tau ʻofa mo tokaʻi kinautolu. Ko hono moʻoní, ʻoku totonu ke tau “mahuʻingaʻia ʻi he kakai pehe.”​—Filipai 2:29.

[Fakamatala ʻi lalo]

Ko e Fakamanatú

◻ ʻOku tau ʻilo fēfē ko e tokolahi ʻo e kau mātuʻa ʻi he ʻuluaki senituli T.S. ko e kau tangata maʻu fāmili?

◻ Ko e hā ʻoku fiemaʻu mei he kau mātuʻa ʻosi mali ʻoku maʻu fānaú, pea ko e hā hono ʻuhingá?

◻ ʻOku ʻuhinga ki he hā ʻa e pehē ke maʻu ʻa e ‘fānau oku tuí,’ kae fēfē kapau ʻoku ʻikai ke fili ʻa e tama ia ʻa ha tokotaha mātuʻa ke ne tauhi ʻa Sihova?

◻ ʻI he ngaahi tafaʻaki fē ʻoku totonu ai ki ha tokotaha mātuʻa ke ne ‘tokonaki ki hono kaigá’?

[Fakatātā ʻi he peesi 21]

Ko e ngaahi fāmili mālohí ʻoku nau ʻai ʻa e ngaahi fakatahaʻanga mālohi