“Ke Hange ko Ia Hoʻomou Lele”

FAKAʻUTA atu ko koe tonu ʻokú ke ʻi ha sitētiume sipoti ʻo feʻefiʻefihi tuʻu ai fakataha mo ha kakai loto-māfana. ʻOku laka mai ʻa e kau ʻatelitá ki he loto malaʻé. ʻOku kaikaila longoaʻa ʻa e fuʻu kakaí ʻi he ʻasi mai ʻenau kau heló. ʻOku ʻi ai ʻa e kau fakamāú ke ngāueʻaki ʻa e ngaahi laó. ʻI he fai ʻa e ngaahi kongá, ko e ngaahi kaila ʻo e ikuná ʻoku fio ia mo e ngaahi kalanga ʻi he siva ʻa e ʻamanakí. ʻOku fai talamonū ki he kau ikuná ʻaki ʻa e ngaahi pasi leʻo-lahi!

ʻOkú ke maʻu eni, ʻikai ko ha sipoti fakaeonopooni, ka ko e taha naʻe fai ʻi he taʻu nai ʻe 2,000 kuohilí ʻi he ʻIsimasi ʻo Kolinitoó. ʻI heni, ʻi he taʻu ua kotoa pē mei he senituli hono ono K.M. ki he senituli hono fā T.S., naʻe fai ai ʻa e ngaahi Vaʻinga faka-ʻIsimia ʻiloa. ʻI he ngaahi ʻaho lahi naʻe puke ʻe he meʻa naʻe hokó ʻa e mahuʻingaʻia ʻa e tokotaha kotoa ʻi Kalisí. Ko e ngaahi vaʻingá naʻe ʻikai ko ha fanga kiʻi feʻauhi fakaʻatelita pē. Ko e kau ʻatelitá ko e ngaahi fakatātā kinautolu ʻo e mateuteu fakakautau. Ko e kau ikuná—ʻi hono ʻaitoliʻaki ko e kau heló—naʻa nau maʻu ʻa e ngaahi kalauni naʻe ngaohi mei he ngaahi lauʻiʻakaú. Naʻe foaki kiate kinautolu ʻa e ngaahi meʻaʻofa, pea naʻe foaki kiate kinautolu ʻe he koló ha fuʻu vāhenga mālōlō lahi ki he kotoa ʻo ʻenau moʻuí.

Naʻe maheni ʻa e ʻapositolo ko Paulá mo e ngaahi Vaʻinga faka-ʻIsimia ofi ki Kolinitoó pea naʻá ne fakahoa ʻa e ʻalunga moʻui ʻa ha Kalisitiane ki ha feʻauhi ʻatelita. ʻI heʻene lave ki he kau lelé, kau fangatuá, mo e kau fuhú, ngalingali naʻá ne fakatātaaʻi ai ʻa e ngaahi pale ʻo e akoʻi leleí, ngaahi feinga naʻe tataki leleí, pea mo e kātakí. Ko e moʻoni, ko e kau Kalisitiane ko ia naʻá ne tohi ki aí naʻa nau toe ʻilo ʻo fekauʻaki mo e ngaahi vaʻingá. ʻOku ʻikai ha veiveiua ko e niʻihi ʻo kinautolu naʻa nau ʻi he lotolotonga ʻo e fuʻu kakai naʻe kaikaila ʻi he sitētiumé. Ko ia naʻa nau mahinoʻi lelei ʻa e ngaahi talanoa fakatātā ʻa Paulá. Fēfē ʻa kitautolu ʻi he ʻaho ní? Ko kitautolú foki ʻoku tau ʻi ha lova—ki he moʻui taʻengatá. ʻOku lava fēfē ke tau maʻu ʻaonga mei he ngaahi lave ʻa Paula ki he ngaahi feʻauhi ko iá?

‘Fai ʻo Hange ko e Ngaahi Laó’

Ko e ngaahi fiemaʻu ki he hū ʻo kau ʻi he ngaahi vaʻinga he kuonga muʻá naʻe mātuʻaki fefeka. ʻE ʻomai ʻe ha ʻōfisa ʻa e tokotaha ʻatelita taki taha ki he kau mamatá peá ne kaila: ‘ʻOku ʻi ai ha taha ʻe lava ke ne tukuakiʻi ʻa e tangatá ni ki ha faihia? Ko ha kaihaʻa ia pe fulikivanu pea fakalielia ʻi heʻene moʻuí mo ʻene ngaahi tōʻongá? Fakatatau ki he Archaeologia Graeca, “naʻe ʻikai ha tokotaha ʻa ia naʻe ʻiloa tonu ko ha faihia, pe felāveʻi [ofi] mo ha meʻa pehē, naʻe fakangofua ke ne feʻauhi.” Pea ko hono maumauʻi ʻa e ngaahi lao ʻo e ngaahi vaʻingá naʻe tauteaʻi mamafa ia ʻaki hono taʻofi ʻa e kau maumau-laó mei he ngaahi feʻauhí.

ʻOku tokoniʻi kitautolu ʻe he moʻoniʻi meʻa ko ení ke tau mahinoʻi ʻa e fakamatala ʻa Paulá: “Ka ko ha taha ʻoku kau ʻi ha feʻauhi, talaʻehai ʻoku [fakakalauni] ia ʻo kapau ʻoku ʻikai te ne fai ʻo hange ko e lao.” (2 Timote 2:5) ʻI he tuʻunga meimei tatau, ke lele ʻi he lova ki he moʻuí, kuo pau ke tau aʻusia ʻa e ngaahi fiemaʻu ʻa Sihová, ʻo fai ki heʻene ngaahi tuʻunga fakaeʻulungaanga māʻolungá ʻo hangē ko hono fokotuʻu mai kinautolu ʻi he Tohitapú. Kae kehe, ʻoku fakatokanga mai ʻa e Tohitapú kiate kitautolu: “Ko e filioʻi ʻo e loto ʻo e tangata ʻoku kovi mei heʻene tamasiʻi.” (Senesi 8:21) Ko ia ai, naʻa mo e hili ʻa e hū ʻo kau ʻi he lová, ʻoku fiemaʻu ke tau tokanga ke hanganaki fai ʻo fakatatau ki he ngaahi laó koeʻuhi ke hokohoko atu ʻa hono maʻu ʻa e hōifua ʻa Sihová pea maʻu ʻa e moʻui taʻengatá.

Ko e tokoni lahi taha ke ngāue ai ʻi he foungá ni ko e ʻofa ki he ʻOtuá. (Maake 12:​29-​31) Ko e ʻofa ko iá te ne ʻai kitautolu ke tau loto ke fakafiefiaʻi ʻa Sihova pea ngāue ʻo fakatatau ki hono finangaló.​—1 Sione 5:3.

“Huʻihuʻi ʻa e Fakamamafa Kotoa Pe”

ʻI he ngaahi vaʻinga ʻi he kuonga muʻá, naʻe ʻikai ke fakamamafaʻi ʻa e kau lelé ʻe ha ngaahi vala pe meʻangāue. “ʻI he ngaahi lova lelé, . . . ko e kau feʻauhí naʻa nau faʻa hā mātuʻaki telefua,” ko e lau ia ʻa e tohi The Life of the Greeks and Romans. Ko e ʻikai ke tui ha ngaahi kofú naʻe ngaue vave ai ʻa e kau ʻatelitá, faingofua ʻenau ngaʻunú, pea nau mateuteu. Naʻe ʻikai ha ivi fakamoleki noa naʻe hoko mei ha fakamamafa naʻe ʻikai fiemaʻu. ʻOku ngalingali naʻe ʻi he fakakaukau ʻa Paulá ʻa e meʻá ni ʻi he taimi naʻá ne tohi ai ki he kau Kalisitiane Hepeluú: “Ke tau huʻihuʻi ʻa e fakamamafa kotoa pe . . . , pea tau kitaki atu ʻetau lele he fakapuepue kuo tala humaki mai kiate kitautolu.”—Hepelu 12:1.

Ko e hā ʻa e faʻahinga fakamamafa ʻe lava ke ne taʻofi kitautolu ʻi he lova ki he moʻuí? Ko e taha ko e holi ke tānaki ʻo fokotuʻuna ʻa e ngaahi meʻa fakamatelie ʻoku ʻikai fiemaʻú pe ke tauhi maʻu ha founga moʻui koloaʻia. ʻE hanga nai ʻa e niʻihi ki he koloá ki ha maluʻanga pe sio ki ai ko ha matavai ʻo e fiefiá. Ko e “fakamamafa” fuʻu hulu ko iá te ne fakamāmālieʻi hifo nai ai ha tokotaha lele ʻo aʻu ki he tuʻunga, ʻe faifai atu pē nai, ʻo ʻikai moʻoni toe mahuʻinga lahi ʻa e ʻOtuá kiate ia. (Luke 12:​16-​21) ʻE hoko mai nai ʻa e moʻui taʻengatá ʻo hā ngali hangē ha ʻamanaki ʻoku kei mamaʻó. ‘ʻE hoko mai ʻa e māmani foʻoú ʻi ha ʻaho he kahaʻú,’ ko ha fakaʻuhinga nai ia ʻa ha tokotaha, ‘ka ʻi he lolotonga ní ʻe sai ange nai ke tau ngāueʻaongaʻaki ʻa e meʻa ʻoku tuʻuaki mai ʻe he māmani ko ení.’ (1 Timote 6:​17-​19) Ko ha fakakaukau fakamatelie pehē ʻe mātuʻaki lava ke ne afeʻingofua ha taha mei he lova ki he moʻuí pe taʻofi ha taha mei haʻane kamata nai ia.

ʻI he Malanga ʻi he Moʻungá, naʻe pehē ai ʻe Sīsū: “ʻOku ʻikai ke lava ʻe ha taha ke ne ʻeikiʻaki ha ʻeiki ʻe toko ua: he te ne fehiʻa ki he taha kae ʻofaʻi ʻa e taha, pe te ne piki ki he taha kae taʻetokaʻi ʻa e taha. ʻOku ʻikai te mou lava ke eikiʻaki ʻa e ʻOtua mo Koloa fakatouʻosi.” ʻI he hili leva ʻene talanoa fekauʻaki mo hono tokangaʻi ʻe Sihova ʻa e ngaahi fiemaʻu ʻa e fanga manú mo e ngaahi ʻakaú peá ne pehē ʻoku mahuʻinga lahi ange ʻa e tangatá ʻi he ngaahi meʻa ko iá, naʻá ne naʻinaʻi: “Ko ia, ʻoua te mou lotomoʻua, ʻo mou pehe, Te tau kai ai e ha mo inu e ha? mo kofuʻaki ʻa e ha? he ko e ngāhi mea ko eni ʻoku hehenga ki ai ʻa Senitaile: pea ʻoku meaʻi ʻe hoʻomou Tamai Fakalangi ʻoku tāu mo kimoutolu ʻa e ngāhi meʻa ko ia kotoa. Ka mou kumi muʻa ki hono puleʻanga, mo e maʻoniʻoni aʻana, pea ʻe ʻatu mo ia foki ʻa e ngāhi meʻa ko ia kotoa.”—Mātiu 6:​24-33.

‘Kitaki Atu ʻi he Lelé’

Naʻe ʻikai ke nounou ʻa e ngaahi lova lele kotoa ʻi he kuonga muʻá. Ko e lova ʻe taha, naʻe ui ko e doʹli·khos, naʻe fai ia ʻi he kilomita nai ʻe fā. Ko ha sivi ia naʻe fiemaʻu ki ai ʻa e mālohi mo e kītaki. Fakatatau ki he talatukufakaholó, ʻi he 328 K.M., ko ha ʻatelita ko hono hingoá ko Ageas, ʻi he hili ʻene ikunaʻi ʻa e lova ko ení, naʻá ne mavahe ʻo lele ʻi heʻene fononga kotoa ki hono kolo nofoʻangá, ko Argos, ke fanongonongo ʻa ʻene ikuná. ʻI he ʻaho ko iá, naʻá ne lele ai ʻo fakafuofua ki he kilomita ʻe 110!

Ko e lova ʻa e Kalisitiané ko ha toe lele mamaʻo ia ʻoku siviʻi ai ʻetau kītakí. Ko e kītaki ʻi he lova ko ení ʻo aʻu ki he ngataʻangá ʻoku fiemaʻu ia ke maʻu ai ʻa e hōifua ʻa Sihová pea mo e pale ko e moʻui taʻengatá. Naʻe lele ʻa Paula ʻi he lová ʻi ha founga pehē. ʻI he ofi ki he ngataʻanga ʻo ʻene moʻuí, naʻe malava ai ke ne pehē: “Kuo u tau ʻa e tau lelei, kuo u [lele ʻo aʻu ki he ngataʻangá], kuo u tauhi mai ʻa e tui totonu. Hili ʻeni kuo tuku tauhi maʻaku ʻa e pale ʻo e maʻoniʻoni.” (2 Timote 4:​7, 8) ʻI he hangē ko Paulá, kuo pau ke tau lele “ki he ngataʻangá.” Kapau ʻoku hōloa ʻetau kītakí koeʻuhi pē ʻoku kiʻi lōloa ange ʻa e lová ʻi he meʻa naʻa tau ʻuluaki ʻamanekiná, ʻe ʻikai leva te tau maʻu hotau palé. (Hepelu 11:6) Ko ha meʻa fakamamahi ē ʻe hokó, ʻi he sio atu ʻoku tau mātuʻaki ofi ki he tepí!

Ko e Palé

Ko e kau ikuna ʻi he ngaahi feʻauhi ʻatelita ʻi Kalisi ʻo e kuonga muʻá naʻe ʻoange kiate kinautolu ʻa e ngaahi kahoa ʻa ia naʻe faʻa ngaohiʻaki ʻa e ngaahi lauʻiʻakaú pea naʻe teuteuʻi ʻaki ʻa e ngaahi matalaʻiʻakaú. ʻI he ngaahi Vaʻinga Pītiá, naʻe maʻu ai ʻe he kau ikuná ha kalauni naʻe ngaohi mei he mailé. ʻI he ngaahi Vaʻinga ʻOlimipiá naʻa nau maʻu ai ʻa e ngaahi kalauni ʻo e lauʻi ʻōlive vao, lolotonga ia ʻi he ngaahi Vaʻinga faka-ʻIsimiá naʻe ʻoange kiate kinautolu ʻa e ngaahi kalauni naʻe ngaohi mei he painí. “Ke fakaʻaiʻai ʻa e mateaki ʻa e kau feʻauhí,” ko e fakamatala ia ʻa ha mataotao Tohitapu ʻe taha, “ko e ngaahi kalauní, ko e ngaahi pale ʻo e ikuná, mo e ngaahi vaʻa pāmé, naʻe hili ia, lolotonga ʻa e feʻauhí, ke nau sio kakato ki ai, ʻi ha kiʻi sea, pe tēpile, naʻe fokotuʻu ʻi he sitētiumé.” Ki he tokotaha ikuná, ko hono tui ʻa e kalauní naʻe hoko ia ko ha fakaʻilonga ʻo e lāngilangiʻia lahi. ʻI heʻene foki ki ʻapí, naʻá ne heka fakamaʻalali atu ai ʻi ha saliote ki he koló.

ʻI hono manatuʻi ení, naʻe ʻeke ʻe Paula ki heʻene kau lautohi Kolinitoó: “ʻIkai ʻoku mou ʻilo, ko e kakai ʻoku lele ʻi he fakapuepue ʻoku nau lele kotoa pe, ka ko e toko taha pe ʻoku maʻu ʻa e koloa? Ke hange ko ia hoʻomou lele, koeʻuhi ke mou maʻumaʻu lelei. . . . Pea ko e fai ʻe kinautolu foki ke maʻu ha pale ʻe mae, ka ko kitaua ha pale ʻe ʻikai mae.” (1 Kolinito 9:​24, 25; 1 Pita 1:​3, 4) Ko ha faikehekehe moʻoni ē! ʻI he ʻikai hangē ko e ngaahi kalauni mae ʻo e ngaahi vaʻinga ʻi he kuonga muʻá, ko e pale ʻoku fakatatali mai ki he faʻahinga ʻoku nau lele ʻi he lova ki he moʻuí ʻo aʻu ki he ngataʻangá ʻe ʻikai ʻaupito ke ʻauha.

ʻI he fekauʻaki mo e kalauni lelei ange ko ení, naʻe tohi ʻa e ʻapositolo ko Pitá: “ʻI he faifai pea fakaeʻa mai ʻa e Tauhi Lahi, pea te mou maʻu ʻa e [kalauni ʻikai mae] ʻo e langilangiʻia.” (1 Pita 5:4) ʻE lava ʻe ha pale ʻoku tuʻuaki mai ʻe he māmani ko ení ke fakahoa ki he taʻefaʻamaté, ʻa e pale ʻo e moʻui taʻefaʻaʻauha ʻi he lāngilangi fakahēvaní fakataha mo Kalaisí?

ʻI he ʻahó ni, ko e fuʻu tokolahi ʻo e kau lele Kalisitiané ʻoku ʻikai pani ʻe he ʻOtuá ke nau hoko ko hono ngaahi foha fakalaumālie pea ʻoku ʻikai te nau maʻu ha ʻamanaki fakahēvani. ʻOku ʻikai te nau lele ki he pale ʻo e taʻefaʻamaté. Kae kehe, ʻoku toe tuku mai ʻe he ʻOtuá ha pale taʻehanotatau ʻi honau ʻaó. Ko e moʻui taʻengata ʻi he haohaoa ʻi ha māmani palataisi ʻi he malumalu ʻo e Puleʻanga ʻo hēvaní. Ko fē pē ʻa e pale ʻoku feinga ki ai ha tokotaha lele Kalisitiane, ʻoku totonu ke ne lele fakataha mo e fakapapauʻi lahi ange pea mo e longomoʻui ʻi ha toe tokotaha lele pē ʻi ha feʻauhi ʻatelita. Ko e hā hono ʻuhingá? Koeʻuhi he ko e palé ʻe ʻikai ʻaupito mae: “Ko eni ia ʻa e meʻa naʻa ne talaʻofaʻaki ʻe he ʻEne ʻAfio kiate kitautolu, ko e moʻui taʻengata.”​—1 Sione 2:25.

ʻI ha pale taʻealafakatataua pehē ʻi he ʻao ʻo e tokotaha lele Kalisitiané, ko e hā ʻoku totonu ke hoko ko ʻene vakai ia fekauʻaki mo e ngaahi fakatauele ʻa e māmani ko ení? ʻOku totonu ke hangē ia ko e vakai ʻa Paulá, ʻa ia naʻá ne pehē: “ʻOku ou kei lau ni foki ʻa e ngaahi meʻa ko ia kotoa ko e koto fakamasiva, koeʻuhi ko ʻene fungani ʻa e ʻiloʻi ʻo Kalaisi Sisu ko hoku ʻEiki; ʻa ʻEne ʻAfio naʻa ku tuku ai ke mole kotoa, ʻio, ʻou lau ko e kinohaʻa pe.” ʻI he fakatatau ki he meʻá ni, he faingataʻa moʻoni ē ko e lele ʻa Paulá! “Kainga, ʻoku ʻikai te u lau au kuo u maʻu: ka ko e meʻa pe taha ʻoku ou fai; ʻoku ou fakangalongaloʻi ʻa e ngaahi meʻa kuo tuku ki mui, kau kakapa atu ki he ngaahi meʻa mei muʻa: ʻou tuli atu pe ki he ngataʻanga, ke maʻu ʻa e pale.” (Filipai 3:​8, 13, 14) Naʻe lele ʻa Paula mo sio fakamamaʻu ki he palé. ʻOku totonu ke pehē pē mo kitautolu.

Ko Hotau Faʻifaʻitakiʻanga Lelei Tahá

ʻI he ngaahi vaʻinga ʻi he kuonga muʻá, naʻe fiefia ai ʻa e kau haú ʻi he mafolalahia ʻa e mālieʻia ʻiate kinautolú. Naʻe tohi ʻa e kau faʻu-māú fekauʻaki mo kinautolu, pea ko e kau tā tongitongí naʻa nau faʻu ʻa e ngaahi maka fakamanatu ʻo kinautolu. ʻOku pehē ʻe he faihisitōlia ko Věra Olivová naʻa nau “fonu ʻi he lāngilangi pea nau fiefia ʻi hono manakoaʻi lahí.” Naʻa nau toe hoko ko e ngaahi faʻifaʻitakiʻanga ki ha toʻutangata kei siʻi ange ʻo e kau haú.

Ko hai ʻa e “hau” ʻokú ne fokotuʻu ʻa e faʻifaʻitakiʻanga lelei taha ki he kau Kalisitiané? ʻOku tali ia ʻe Paula: “Tau kitaki atu ʻetau lele he fakapuepue kuo tala humaki mai kiate kitautolu; ʻo tau sio fakamamaʻu atu ki he Takimuʻa ʻi he tui mo hono Fakaaʻu, ʻio, ʻa Sisu; ʻa ia, ko e meʻa ke ne maʻu ʻa e fiefia naʻe tala humaki kiate ia, ko ia naʻa ne kataki ʻa e mate kalusefai, naʻe ʻikai te ne tokaʻi hono fakamāʻi, pea kuo ne nofo hifo foki mei he toʻomataʻu ʻo e taloni ʻo e ʻOtua.” (Hepelu 12:​1, 2) ʻIo, kapau ʻoku tau fiemaʻu ke tau ikuna ʻi heʻetau lova ki he moʻui taʻengatá, ʻoku fiemaʻu ke tau sio fakamamaʻu ki hotau Faʻifaʻitakiʻangá, ʻa Sīsū Kalaisi. ʻE lava ke tau fai ʻa e meʻá ni ʻaki ʻa hono lau maʻu pē ʻa e ngaahi fakamatala Kōsipelí pea fakalaulauloto ki he ngaahi founga ʻa ia ʻe lava ke tau faʻifaʻitaki ai kiate iá. Ko e ako peheé te ne tokoniʻi kitautolu ke tau houngaʻia ʻi he talangofua ʻa Sīsū Kalaisi ki he ʻOtuá pea fakamoʻoniʻi ʻa e tuʻunga lelei ʻo ʻene tuí ʻaki ʻene kītakí. ʻI he hoko ko ha pale ki heʻene kītakí, naʻá ne maʻu ai ʻa e hōifua ʻa Sihova ko e ʻOtuá fakataha mo e ngaahi monū fakaofo lahi.​—Filipai 2:​9-​11.

Ko e moʻoni, ko e ʻulungaanga tuʻu-ki-muʻa taha ʻo Sīsuú ko ʻene ʻofá. “Talaʻehai ʻoku ai ha ʻofa ʻa ha taha ʻe lahi ʻi he ʻofa ko é, ke ne liʻaki ʻene moʻui koeʻuhi ko hono ngaahi kaumeʻa.” (Sione 15:13) Naʻá ne ʻomai ʻa e ʻuhinga loloto ange ki he foʻi lea “ʻofa” ʻaki ʻene tala mai kiate kitautolu ke tau ʻofa ʻo aʻu ki hotau ngaahi filí. (Mātiu 5:​43-​48) Koeʻuhi naʻá ne ʻofa ʻi heʻene Tamai fakahēvaní, naʻe maʻu ʻe Sīsū ʻa e fiefia ʻi hono fai ʻa e finangalo ʻo ʻene Tamaí. (Sāme 40:​9, 10; Palovepi 27:11) Ko ʻetau hanga kia Sīsū ko hotau Faʻifaʻitakiʻangá pea ko e tokotaha ia ʻokú ne fokotuʻu mai ʻa e vave kiate kitautolu ʻi he lova mālohi ki he moʻuí te ne toe ueʻi ai kitautolu ke ʻofa ki he ʻOtuá mo hotau kaungāʻapí pea ke maʻu ʻa e fiefia moʻoni ʻi heʻetau ngāue toputapú. (Mātiu 22:​37-​39; Sione 13:34; 1 Pita 2:​21) Manatuʻi ʻoku ʻikai ke fiemaʻu mai ʻe Sīsū ia ha meʻa ʻoku taʻemalava. ʻOkú ne fakapapauʻi mai kiate kitautolu: “ʻOku ou faʻa kataki mo angafākatuʻa, pea te mou ʻilo ha mālōlō ʻi homou laumalie. He ko e ioke aʻaku ʻoku molū, pea ko e kavenga aʻaku ʻoku maʻamaʻa.”—Mātiu 11:​28-30.

ʻI he hangē ko Sīsuú, ʻoku fiemaʻu ke tau hanganaki sio ki he pale ʻa ia ʻoku tuku tauhi mai ki he faʻahinga kotoa ʻoku nau kītaki ʻo aʻu ki he ngataʻangá. (Mātiu 24:13) Kapau ʻoku tau fai ʻo fakatatau ki he ngaahi laó, kapau ʻoku tau huʻihuʻi ʻa e fakamamafa kotoa pē, pea kapau ʻoku tau lele fakataha mo e kītakí, ʻe lava ke tau falala ki ha ikuna. Ko e vakai atu ki he ngataʻangá ʻokú ne fakaʻaiʻai kitautolu ke tau ʻunu ki muʻa! ʻOkú ne fakafoʻou hotau mālohí koeʻuhi ko e fiefia ʻokú ne fakafonu ʻiate kitautolú, ko ha fiefia ʻa ia ʻokú ne ʻai ʻa e hala ʻi muʻa ʻiate kitautolú ke faingofua ange ʻa e laka atu aí.

[Maʻuʻanga ʻo e Tā ʻi he peesi 28]

Copyright British Museum

[Fakatātā ʻi he peesi 29]

Ko e lova faka-Kalisitiané ko ha lele lōloa —ʻoku fiemaʻu ki ai ʻa e kātaki

[Fakatātā ʻi he peesi 30]

ʻI he ʻikai hangē ko e kau ʻatelita naʻe fakakalauní, ʻoku lava ke hanga atu ki muʻa ʻa e kau Kalisitiané ki ha pale ʻe ʻikai ʻauha

[Fakatātā ʻi he peesi 31]

Ko e palé ʻoku maʻá e faʻahinga kotoa ʻoku nau kītaki ʻo aʻu ki he ngataʻangá