Te Ke Lava ʻo Kātaki ʻo Aʻu ki he Ngataʻangá

“Tau kitaki atu ʻetau lele he fakapuepue kuo tala humaki mai kiate kitautolu.”​—HEPELU 12:1.

 1, 2. Ko e hā ʻa e ʻuhinga ʻo e pehē ke kātakí?

“ʻOKU tuha mo kimoutolu ʻa e kitaki,” ko e tohi ia ʻa e ʻapositolo ko Paulá ki he kau Kalisitiane Hepelū ʻo e ʻuluaki senitulí. (Hepelu 10:36) ʻI hono fakamamafaʻi ʻa e mahuʻinga ʻo e ʻulungaanga ko ení, naʻe toe pehē mo e naʻinaʻi ʻa e ʻapositolo ko Pitá ki he kau Kalisitiané: “ʻI hoʻomou maʻu tui na . . . maʻu ʻa e kataki.” (2 Pita 1:​5, 6) Ka ko e hā koā ʻa e kātakí?

² ʻOku fakamatalaʻi ʻe ha tikisinale Kalisi-Pilitānia ʻa e foʻi veape faka-Kalisi ki he “kātakí” ko e “nofo maʻu ʻo ʻikai hola . . . tuʻumaʻu, taʻofi tuʻu.” Fekauʻaki mo e foʻi nauna faka-Kalisi ki he “kātakí,” ʻoku pehē ʻe ha tohi maʻuʻanga fakamatala ʻe taha: “Ko e laumālie ia ʻoku malava ke ne fuesia ha ngaahi meʻa, ʻo ʻikai faiʻaki ʻa e anga-nofo pē, ka ko e faiʻaki ʻa e ʻamanaki faivelenga . . . Ko e ʻulungaanga ia ʻokú ne tauhi ha tangata ke tuʻu ʻo hanga ki he matangí. Ko e ʻulungaanga lelei ia ʻoku lava ke ne fulihi ʻa e ʻahiʻahi fefeka tahá ki he lāngilangi koeʻuhi ko e hili ʻa e mamahí te ne sio ki he taumuʻá.” Ko e kātakí leva, ʻokú ne fakamafeia ha taha ke tuʻumaʻu lolotonga ʻo e fehangahangai mo e ngaahi faingataʻaʻiaʻangá mo e ngaahi tuʻunga tuʻutāmakí ʻo ʻikai mole ʻa e ʻamanakí. Ko hai ʻoku tautefito ʻene fiemaʻu ʻa e ʻulungaanga ko ení?

 3, 4. (a) Ko hai ʻoku fiemaʻu ke kātakí? (e) Ko e hā kuo pau ai ke tau kātaki ʻo aʻu ki he ngataʻangá?

³ Ko e kau Kalisitiane kotoa pē ʻoku nau kau fakaefakatātā atu ʻi ha lova ʻa ia ʻoku fiemaʻu ai ʻa e kātakí. Fakafuofua ki he taʻu 65 T.S., naʻe tohi ai ʻa e ʻapositolo ko Paulá ki hono kaungāngāue mo e kaungāfononga tōnunga ko Tīmoté ʻa e ngaahi lea fakapapau ko ení: “Kuo u tau ʻa e tau lelei, kuo u lavaʻi ʻa e fakapuepue, kuo u tauhi mai ʻa e tui totonu.” (2 Timote 4:7) ʻI he kupuʻi lea “lavaʻi ʻa e fakapuepue,” naʻe fakahoa ai ʻe Paula ʻa ʻene moʻui ko e Kalisitiané ki ha lova, ʻa ia ʻoku ʻi ai ʻa e leleʻanga mo ha ngataʻanga. ʻI he taimi ko iá, naʻe fakaofiofi lavameʻa atu ai ʻa Paula ki he ngataʻanga ʻo e lová, pea naʻá ne hanga loto-falala atu ki hono maʻu ʻo e palé. “Hili ʻeni,” ko e hoko atu ia ʻene leá, “kuo tuku tauhi maʻaku ʻa e pale ʻo e maʻoniʻoni ʻa ia ʻe toki ʻomi kiate au ʻi he ʻaho ko é ʻe he ʻEiki ko e fakamāu.” (2 Timote 4:8) Naʻe falala ʻa Paula te ne maʻu ʻa e palé koeʻuhi he naʻá ne kātaki ʻo aʻu ki he ngataʻangá. Fēfē ʻa e toenga ʻo kitautolú?

⁴ Ke fakalototoʻaʻi ʻa e faʻahinga ko ia kuo nau kau atu ʻi he lová, naʻe tohi ʻe Paula: “Tau kitaki atu ʻetau lele he fakapuepue kuo tala humaki mai kiate kitautolu.” (Hepelu 12:1) ʻI he tuʻunga ko e kau Kalisitiané, ʻoku tau kau atu ʻi he lele kītaki ko ení ʻi he taimi ʻoku tau fakatapui ai kitautolu kia Sihova ko e ʻOtuá fakafou ʻia Sīsū Kalaisí. ʻOku mahuʻinga ha kamataʻanga ʻoku lelei ʻi he ʻalunga ʻo e ngaohi-ākongá, ka ko e meʻa ʻoku mātuʻaki laú ko ʻetau fakaʻosi ʻa e ʻalunga ko iá. Naʻe fakahā ʻe Sīsū: “Ko ia te ne kataki ʻo aʻu ki he ngataʻanga, ko e toko taha ko ia te ne moʻui.” (Mātiu 24:13) Ko e pale ʻoku fakatatali ki he faʻahinga ko ia ʻoku nau fakaʻosi lavameʻa ʻa e lová ko e moʻui taʻengata! Ko ia, ʻi hono maʻu ha taumuʻa ʻi he fakakaukaú kuo pau ke tau kātaki ke aʻu ki he ngataʻangá. Ko e hā te ne tokoniʻi kitautolu ke aʻusia ʻa e taumuʻa ko iá?

Meʻakai Totonu​—Ko ha Meʻa Pau

 5, 6. (a) Ke kātaki ʻi he lova ki he moʻuí, ko e hā kuo pau ke tau tokanga ki aí? (e) Ko e hā ʻa e ngaahi tokonaki fakalaumālie kuo pau ke tau fakafaingamālieʻi kitautolu ki aí, pea ko e hā hono ʻuhingá?

⁵ Ofi ki he kolo ko Kolinitoó, Kalisi, naʻe tuʻu ai ʻa e feituʻu naʻe fai ai ʻa e Ngaahi Sipoti ʻiloa faka-ʻIsimia ʻi he kuonga muʻá. ʻOku ʻikai ha veiveiua naʻe ʻiloʻi ʻe Paula naʻe maheni ʻa e fanga tokoua Kolinitoó mo e ngaahi feʻauhi sipoti mo e ngaahi feʻauhi kehe naʻe fai aí. Makatuʻunga ʻi heʻenau ʻilo ko iá, naʻá ne fakamanatu ai kiate kinautolu ʻa e lova ki he moʻuí ʻa ia naʻa nau kau aí: “ʻIkai ʻoku mou ʻilo, ko e kakai ʻoku lele ʻi he fakapuepue ʻoku nau lele kotoa pe, ka ko e toko taha pe ʻoku maʻu ʻa e koloa? Ke hange ko ia hoʻomou lele, koeʻuhi ke mou maʻumaʻu lelei.” Naʻe fakamamafaʻi ʻe Paula ʻa e mahuʻinga ʻo e nofo maʻu ʻi he lová pea tutui atu kae ʻoua kuo aʻu ki he ngataʻangá. Ka ko e hā te ne tokoniʻi kinautolu ke fai peheé? “ʻIlonga ha taha ʻoku kau ʻi he fakapuepue, ʻoku ne fakamaʻumaʻu ʻi he meʻa kotoa pe,” ko ʻene hoko atú ia. ʻIo, ko e kau feʻauhi ko ia ʻi he ngaahi sipoti ʻo e kuonga muʻá naʻa nau fakamoʻulaloa kinautolu ki he fakamālohisino mālohi, fai ʻa e tokanga lelei ki he meʻa naʻa nau kai mo inú, pea māpuleʻi ʻenau tōʻonga kotoa pē koeʻuhi ka nau ikuna.​—1 Kolinito 9:​24, 25.

⁶ Fēfē ʻa e lova ʻoku kau atu ki ai ʻa e kau Kalisitiané? “Kuo pau ke ke tokanga ki hoʻo kai fakalaumālié kapau ʻokú ke fie kātaki ʻi he lova ki he moʻuí,” ko e lau ia ʻa ha tokotaha mātuʻa ʻi ha fakatahaʻanga ʻa e Kau Fakamoʻoni ʻa Sihová. Tau vakai angé ki he meʻakai fakalaumālie kuo tokonaki mai kiate kitautolu ʻe Sihova, “ko e ʻOtua ʻoku ʻa ʻEne ʻAfio ʻa e fakakataki.” (Loma 15:5) Ko e matavai tefito ʻo ʻetau meʻakai fakalaumālié, ko ʻene Folofolá, ʻa e Tohitapú. ʻIkai ʻoku totonu ke tau tauhi maʻu ha taimi-tēpile lau Tohitapu ʻoku leleí? Fakafou ʻi he “tamaioeiki agatonu mo boto,” kuo toe tokonaki mai ai ʻe Sihova ʻa e ongo makasini taimi totonu ʻa ia Ko e Taua Leʻo mo e Awake! pea mo e ngaahi tohi kehe makatuʻunga mei he Tohitapú. (Matiu 24:​45, PM) Ko hono ako fakamātoato ʻa e ngaahi meʻá ni te ne fakaivimālohiʻi fakalaumālie ai kitautolu. ʻIo, kuo pau ke tau tuku ha taimi​—‘lamalama ʻa e faingamālie’​—ki he ako fakafoʻituituí.​—Efeso 5:16.

 7. (a) Ko e hā ʻoku totonu ai ke ʻoua te tau fiemālie pē ʻi hono ʻiloʻi ʻa e ngaahi tokāteline faka-Kalisitiane tefitó? (e) ʻE anga-fēfē nai haʻatau “tuiaki atu ki he tuʻunga matuʻotuʻá”?

⁷ Ke nofo maʻu ʻi he ʻalunga ʻo e ngaohi-ākonga faka-Kalisitiané, ʻoku fiemaʻu ke tau fakalaka atu ʻi he “tokāteline muʻomuʻa” tefitó pea “tuiaki atu ki he tuʻunga matuʻotuʻá.” (Hepelu 6:1, NW) Ko ia, kuo pau ke tau fakatupulekina ha mahuʻingaʻia ʻi he “māukupu, mo hono loloa, mo hono maʻolunga, mo hono loloto” ʻo e moʻoní pea maʻu ʻa e meʻakai mei he “meʻakai malohi [ko ia] ʻoku ʻanautolu ʻoku matuʻotuʻa.” (Efeso 3:​18; Hepelu 5:​12-​14) Ko e fakatātaá, ko e fakamatala falalaʻanga ko ia ʻe fā ʻo e moʻui ʻa Sīsū ʻi māmaní​—ʻa e Kōsipeli ʻa Mātiu, Maake, Luke, pea mo Sioné. Fakafou ʻi hano ako fakalelei ʻa e ngaahi fakamatala Kōsipeli ko ení, ʻe ʻikai ngata pē ʻetau ʻilo ki he ngaahi ngāue naʻe fai ʻe Sīsuú pea ko e tokotaha fēfē ia, ka te tau toe mahinoʻi foki ai ʻa e sīpinga fakakaukau naʻá ne tākiekina ʻene ngaahi tōʻongá. Pea ʻe lava leva ke hoko ʻo ‘ʻiate kitautolu ʻa e finangalo ʻo Kalaisí.’​—1 Kolinito 2:16.

 8. ʻOku anga-fēfē hono tokoniʻi kitautolu ʻe he ngaahi fakataha faka-Kalisitiané ke tau kātaki ʻi he lova ki he moʻuí?

⁸ Naʻe ekinaki ʻa Paula ki hono ngaahi kaungātuí: “Ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, ʻo hange ko e anga ʻo e niʻihi; ka mou feenginakiʻaki, pea ʻasili he ʻoku mou sio ki he fakaofiofi mai ʻa e ʻaho.” (Hepelu 10:​24, 25) He matavai moʻoni ia ki he fakalototoʻá ka ko ʻetau ngaahi fakataha faka-Kalisitiané! Pea ko e meʻa fakaivifoʻou moʻoni ke fakataha mo hotau fanga tokoua mo e fanga tuofāfine ʻofá ʻa ia ʻoku nau mahuʻingaʻia ʻiate kitautolu mo loto ke tokoniʻi kitautolu ke kātaki ʻo aʻu ki he ngataʻangá! ʻOku ʻikai totonu ke tau fakamaʻamaʻaʻi ʻa e tokonaki anga-ʻofa ko eni meia Sihová. Fakafou ʻi heʻetau ako fakamātoato fakafoʻituituí mo e maʻu maʻu pē ʻa e fakatahá, tau “tagata . . . i he ilo.”​—1 Kolinito 14:​20, PM.

Kau Mamata ke Fakaʻaiʻai Koe

 9, 10. (a) ʻI he founga fē ʻe lava ke hoko ai ʻa e kau mamatá ko ha matavai ʻo e fakalototoʻá ʻi ha lova ʻoku kātekina? (e) Ko e hā ʻa e ‘ʻao ʻo e kau fakamoʻoni ʻoku fuʻu pehē fau’ ʻoku lave ki ai ʻi he Hepelu 12:1?

⁹ Kae kehe, neongo ai ha teuteu lelei ha tokotaha lele, ʻe ʻi ai nai ʻa e ngaahi meʻa he halá ʻe lava ke ne fakatūkiaʻi ia. “Naa mou lele lelei; kohai naa ne taofi akimoutolu ke oua naa mou talagofua ki he mooni?” ko e ʻeke ia ʻa Paulá. (Kaletia 5:7, PM) ʻOku fakamoʻoniʻi, ko e niʻihi ʻo e kau Kalisitiane ʻi Kalētiá naʻa nau tō ki he kaungāmeʻa koví, pea ko hono olá, naʻe fakaleluʻi ai ʻenau lova ki he moʻuí. ʻI he tafaʻaki ʻe tahá, ko e poupou mo e fakalototoʻa mei he niʻihi kehé ʻe lava ke ne ʻai ʻa e lová ke faingofua ange ke kātakiʻi. ʻOku mei hangē tofu ia ko e ola ʻe lava ke fakahoko atu ʻe ha kau mata-vaʻinga ki he kau vaʻingá. ʻOku hanga ʻe he fuʻu kakai ʻoku loto-māfaná ʻo langalangaʻi ʻa e fiefia ko ia ʻokú ne hanganaki fakaʻaiʻai ʻa e kau feʻauhí mei he kamatá ʻo aʻu ki he ngataʻangá. Ko e fakakaekae ʻa e kau mamatá, ʻa ia ʻoku faʻa ō ua mo e ngaahi fasi leʻo-lahí mo e pasipasí, ʻoku lava ke ne ʻoatu ʻa e ivi makehe ʻoku fiemaʻu ki he kau vaʻingá ʻi heʻenau hū atu ko ia ke fakaʻosí. Ko e moʻoni, ko e kau mamata ʻoku kaungāongoʻí ʻoku lava ke nau tōtōivi ʻi ha tākiekina lelei ki he faʻahinga ko ia ʻi he lová.

¹⁰ Ko e lova ko ia ki he moʻuí ʻa ia kuo kau atu ki ai ʻa e kau Kalisitiané, ko hai ʻa e kau mamatá? Hili hono fakalau ʻa e kau fakamoʻoni ʻa Sihova ki muʻa ʻi he Kalisitiané, hangē ko ia ʻoku hiki ʻi he Hepelū vahe hono 11, naʻe tohi ʻe Paula: “Pea ko e meʻa ʻi he kapuʻi ʻa kitautolu ʻe ha ʻao kau fakamoʻoni ʻoku fuʻu pehē fau, . . . tau kitaki atu ʻetau lele he fakapuepue kuo tala humaki mai kiate kitautolu.” (Hepelu 12:1) ʻI hono ngāueʻaki ʻa e lea fakatātā ʻo ha ʻao, naʻe ʻikai ke ngāueʻaki ʻe Paula ia ʻa e foʻi lea faka-Kalisi ʻokú ne fakamatalaʻi ʻa e ʻao ʻoku fakangatangata mahino hono lahí mo hono fōtungá. Ka, naʻá ne ngāueʻaki ʻa e foʻi lea, fakatatau ki he tangata faʻu tikisinale ko W. E. Vine, “ʻokú ne fakamahinoʻi ʻa e fuʻu ʻaoʻaofia matolu taʻefakakongakonga ʻokú ne ʻufiʻufi ʻa e langí.” ʻOku hā mahino, naʻe ʻi he fakakaukau ʻa Paulá ʻa e fuʻu kakai tokolahi ʻo e kau fakamoʻoni​—ʻoku fuʻu lahi fau ʻo nau hangē ha fuʻu konga ʻao matolú.

11, 12. (a) ʻOku lava fēfē ke fakaʻaiʻai atu kitautolu ʻe he kau fakamoʻoni ko ia ki muʻa ʻi he Kalisitiané, ʻo hangē ko e laú, ke tau lele he lová ʻi he kātaki? (e) ʻE anga-fēfē nai haʻatau maʻu ʻaonga kakato ange mei he ‘ʻao ʻo e fuʻu kau fakamoʻoni fuʻu pehē fau’?

¹¹ ʻE lava ke hoko ʻa e kau fakamoʻoni ki muʻa ʻi he Kalisitiané ko e kau mamata moʻoni ʻi he ʻahó ni? ʻIkai ʻaupito. ʻOku nau mohe kotoa ʻi he mate, ʻo fakatatali ki ha toetuʻu. Kae kehe, ne nau hoko ko e kau lele lavameʻa ʻi he taimi naʻa nau moʻui aí, pea ko ʻenau faʻifaʻitakiʻangá ʻoku kei moʻui ia ʻi he ngaahi peesi ʻo e Tohitapú. ʻI heʻetau ako ʻa e ngaahi Konga Tohitapú, ko e kau anga-tonu ko ení ʻoku lava ke nau moʻui ʻi heʻetau fakakaukaú mo lava ke fakaʻaiʻai atu kitautolu, ʻo hangē ko e laú, ke tau lele ʻi he lová ʻo aʻu ki he ngataʻangá.​—Loma 15:4.a

¹² Hangē ko ení, ʻi he taimi ʻoku fakataueleʻi ai kitautolu ʻe he ngaahi faingamālie fakamāmaní, ʻikai ʻoku hanga ʻe he fakakaukau ki he anga hono talitekeʻi ʻe Mōsese ʻa e ngaahi lāngilangi ʻo ʻIsipité ʻo ueʻi kitautolu ke tau nofo maʻu ʻi he leleʻangá? Kapau ʻoku ngali fefeka ha ʻahiʻahi ʻoku tau fehangahangai mo ia, ko hono manatuʻi ʻa e ʻahiʻahi faingataʻa naʻe fehangahangai mo ʻĒpalahame ʻi he taimi naʻe kole ai kiate ia ke ne feilaulauʻi ʻa ʻAisaké, te ne fakalototoʻaʻi moʻoni kitautolu ke ʻoua te tau foʻi ʻi he feʻauhi ʻo e tuí. Ko e lahi ko ia ʻo e ‘ʻao ʻoku pehē fau’ ʻo e kau fakamoʻoni ko ení ʻokú ne fakaʻaiʻai kitautolu ʻi he ʻalunga ko ení ʻoku makatuʻunga ia ʻi he anga ʻo ʻetau sio lelei kiate kinautolu ʻaki ʻa e mata ʻo e mahinó.

13. ʻI he founga fē ʻoku fakaʻaiʻai atu ai kitautolu ʻe he Kau Fakamoʻoni ʻa Sihova ʻi onopōní ʻi he lova ki he moʻuí?

¹³ ʻOku toe takatakaiʻi kitautolu ʻe ha fuʻu Kau Fakamoʻoni tokolahi ʻa Sihova ʻi he kuongá ni. He ngaahi faʻifaʻitakiʻanga lahi ē ʻo e tuí kuo fokotuʻu ʻe he kau Kalisitiane paní pea pehē ki he kau tangata mo e kau fefine ʻo e “fuʻu kakai lahi”! (Fakahā 7:9) ʻOku lava ke tau lau ʻa e ngaahi hisitōlia ʻo ʻenau moʻuí mei he taimi ki he taimi ʻi he makasini ko ení mo e ngaahi tohi kehe ʻa e Taua Leʻó.b ʻI heʻetau fakalaulauloto ki heʻenau tuí, ʻoku fakalototoʻaʻi ai kitautolu ke tau kātaki ʻo aʻu ki he ngataʻangá. Pea ko e meʻa fakafiefia moʻoni ia ke maʻu ʻa e poupou ʻa e ngaahi kaungāmeʻa mo e ngaahi kāinga ofi ko ia ʻoku nau tauhi anga-tonu mo kinautolu kia Sihová! ʻIo, ʻoku tau maʻu ʻa e faʻahinga tokolahi ke fakaʻaiʻai atu kitautolu ʻi he lova ko ia ki he moʻuí.

Fokotuʻutuʻu Fakapotopoto ʻa e Vave Te Ke Ngāueʻakí

14, 15. (a) Ko e hā ʻoku mahuʻinga ai ke fokotuʻutuʻu fakapotopoto ʻa e vave ʻoku tau ngāueʻakí? (e) Ko e hā ʻoku totonu ai ke tau fakaʻutoʻuta lelei ʻi hono fokotuʻu ʻo e ngaahi taumuʻá?

¹⁴ ʻI he lele ko ia ʻi ha lova lōloa, ʻo hangē ko ha malafoní, kuo pau ke fokotuʻutuʻu fakapotopoto ʻe he tokotaha lelé ʻa e vave te ne ngāueʻakí. “ʻI ha kamata fuʻu vave ʻe fokotuʻutuʻu ai koe ki he taʻemalava,” ko e lau ia ʻa e New York Runner. “Ko e meʻa ʻe ngalingali iku ki aí ko ha fāinga lōloa ʻi he ngaahi ʻotu maile fakaʻosí pe ko e ʻikai toe hoko atu.” ʻOku manatu ha tangata-malafoni ʻe taha: “Naʻe fakatokanga maʻalaʻala mai ʻe he tokotaha-lea ʻi ha talatalaifale naʻá ku ʻi ai ʻi he teuteu ko ia ki he lová: ‘ʻOua te ke tulimui ki he kau lele vave angé. Lele ʻi he vave tonu pē ʻaʻaú. He ka ʻikai, te ke hoko ʻo helaʻia pea pau nai ai ke ʻikai te ke toe hoko atu.’ ʻI he fai ki he akonaki ko ení naʻe tokoniʻi ai au ke ʻosiki ʻa e lová.”

¹⁵ ʻI he lova ki he moʻuí, ko e kau sevāniti ʻa e ʻOtuá kuo pau ke nau feinga tōtōivi. (Luke 13:24) Kae kehe, naʻe tohi ʻe he ākonga ko Sēmisí: “Ko e poto ʻoku mei ʻolungá ʻoku . . . fakaʻutoʻuta lelei.” (Semisi 3:​17, NW) Lolotonga ʻe fakalototoʻaʻi nai kitautolu ʻe he ngaahi faʻifaʻitakiʻanga lelei ʻa e niʻihi kehé ke tau fai ʻa e meʻa lahi ange, ko e fakaʻutoʻuta leleí te ne tokoniʻi kitautolu ke tau fokotuʻu ha ngaahi taumuʻa ʻe alafakahoko ʻa ia ʻoku fehoanaki mo ʻetau ngaahi malavá mo hotau ngaahi tuʻungá. ʻOku fakamanatu mai kiate kitautolu ʻe he ngaahi Konga Tohitapú: “Ke taki taha sivi ʻene ngaue aʻana; pea te ne toki fakafuofuaʻaki ia pe hono polepoleʻanga, ʻo ʻikai ʻaki ha taha kehe: koeʻuhi kuo pau ke taki taha fua ʻene kavenga aʻana.”​—Kaletia 6:​4, 5. 

16. ʻOku anga-fēfē hono tokoniʻi kitautolu ʻe he angavaivaí ʻi hono fokotuʻutuʻu ʻa e vave ʻoku tau ngāueʻakí?

¹⁶ ʻI he Maika 6:​8, ʻoku ʻeke mai ai kiate kitautolu ʻa e fehuʻi fakatupu fakakaukau ko ení: “Ko e ha ʻa e meʻa ʻoku ʻeke ʻe Sihova kiate koe? . . . ke taka angavaivai ʻi hoʻo feangai mo ho ʻOtua.” Ko e angavaivaí ʻoku kau ki ai ʻa e ʻiloʻi hotau ngaahi ngātangá. Kuo hanga nai ʻe he mahamahakí pe hoholo ʻo motuʻá ʻo ʻomi ha ngaahi fakangatangata ki he meʻa ʻoku tau lava ʻo fai ʻi he ngāue ʻa e ʻOtuá? ʻOua te tau hoko ʻo loto-siʻi. ʻOku tali ʻe Sihova ʻetau ngaahi feingá mo ʻetau ngaahi feilaulaú ‘ʻaki ʻa e meʻa ʻoku tau maʻú, ʻo ʻikai ʻaki ʻa e meʻa ʻoku ʻikai te tau maʻú.’​—2 Kolinito 8:​12; fakafehoanaki mo Luke 21:​1-4.

Tauhi Maʻu Ho Matá ʻi he Palé

17, 18. Ko e sio fakamamaʻu ki he hā naʻá ne tokoniʻi ai ʻa Sīsū ke kātaki ʻi he ʻakau fakamamahí?

¹⁷ ʻI hono tuhuʻi atu ki he kau Kalisitiane Kolinitoó ʻa e fiemaʻu ko ia ke kātaki ʻi he lova ki he moʻuí, naʻe lave ai ʻa Paula ki ha toe tafaʻaki ʻe taha ʻo e Ngaahi Sipoti faka-ʻIsimia ʻa ia naʻe tuha mo ʻenau tokangá. Fekauʻaki mo e kau feʻauhi ʻi he ngaahi sipoti ko iá, naʻe tohi ʻe Paula: “Ko e [lele] ʻe kinautolu foki ke maʻu ha pale ʻe mae, ka ko kitaua ha pale ʻe ʻikai mae. ʻE, ko e anga ʻeni o ʻeku lele aʻaku, ʻoku ʻikai ke hamumu; ko e anga ʻeni o ʻeku fuhu, ʻoku ʻikai te u tuki matangi.” (1 Kolinito 9:​25, 26) Ko e pale ʻo e ikuná ʻi he ngaahi vaʻinga ʻi onoʻaho ko iá ko ha kalauni, pe kahoa, naʻe ngaohi mei he painí pe ngaahi ʻakau kehé, pea mo e seleli mōmoa foki ʻo e vaó​—ko e moʻoni ko ha “pale ʻe mae.” Ka ko e hā leva, ʻoku fakatatali mai ki he kau Kalisitiane ko ia ʻoku nau kātaki ʻo aʻu ki he ngataʻangá?

¹⁸ ʻI he lave ki hotau Faʻifaʻitakiʻangá, ʻa Sīsū Kalaisi, naʻe tohi ʻe he ʻapositolo ko Paulá: “Ne ne kataki ae bekia i he akau mo ne taekokaga ki he fakama, koe mea i he fiefia nae tuku i hono ao, bea kuo nofo eni i he nima toomatau oe afioaga oe Otua.” (Hepelu 12:2, PM) Naʻe kātaki ʻa Sīsū ʻo aʻu ki he ngataʻanga ʻo ʻene moʻui fakaetangatá ʻaki ʻene sio fakalaka atu ʻi he ʻakau fakamamahí ki hono palé, ʻa ia ʻoku kau ki ai ʻa e fiefia kuó ne maʻu ʻi heʻene tokoni ko ia ki hono fakamāʻoniʻoniʻi ʻa e huafa ʻo Sihová, ʻi hono huhuʻi ʻa e fāmili ʻo e faʻahinga ʻo e tangatá mei he maté, pea ʻi he pule ko e Tuʻi mo e Taulaʻeiki Lahi ʻi heʻene fakafoki ko ia ʻa e faʻahinga talangofua ʻo e tangatá ki he moʻui taʻengata ʻi he māmani palataisí.​—Matiu 6:​9, 10; 20:28; Hepelu 7:​23-26.

19. Ko e hā ʻoku totonu ke tau hanganaki hangataha ki ai ʻi heʻetau tuli ko ia ki he ʻalunga ʻo e ngaohi-ākonga faka-Kalisitiané?

¹⁹ Fakakaukau atu ki he fiefia ʻoku fokotuʻu mai mei muʻa kiate kitautolú ʻi heʻetau tuli ko ia ki he ʻalunga ʻo e ngaohi-ākonga faka-Kalisitiané. Kuo ʻomai ʻe Sihova kiate kitautolu ʻa e ngāue mātuʻaki fakafiemālie ko ia ʻo hono malangaʻi ʻa e ongoongo lelei ʻo e Puleʻanga ʻo e ʻOtuá pea mo hono tuku atu ko ia ʻa e ʻilo fakahaofi moʻui ʻo e Tohitapú ki he niʻihi kehé. (Mātiu 28:​19, 20) He meʻa fakafiefia moʻoni ia ke ʻilo ha taha ʻoku mahuʻingaʻia ʻi he ʻOtua moʻoní mo tokoniʻi ʻa e tokotaha ko iá ke kau ʻi he lova ki he moʻuí! Pea tatau ai pē pe ko e hā ʻa e tali ʻa e kakai ko ia ʻoku tau malanga ki aí, ko ha monū ia ke kau atu ʻi he ngāue ʻoku fekauʻaki mo e fakamāʻoniʻoniʻi ʻo e huafa ʻo Sihová. ʻI he taimi ʻoku tau kātaki ai ʻi he ngāue fakafaifekaú neongo ʻa e taʻemahuʻingaʻiá pe fakafepaki mei he tafaʻaki ʻa e faʻahinga ko ia ʻi hotau vāhenga fakamoʻoniʻangá, ʻoku tau maʻu ʻa e fiefia ko hono ʻai ʻa e loto ʻo Sihová ke fiefia. (Palovepi 27:11) Pea ko e pale maʻongoʻonga ʻokú ne talaʻofa mai kiate kitautolú ko e moʻui taʻengata. He toki meʻa fakafiefia moʻoni ia! ʻOku fiemaʻu ke tau sio fakamamaʻu ki he ngaahi tāpuaki ko ení pea kīvoi ʻi he lová.

ʻI he Fakaofi Mai ʻa e Ngataʻangá

20. ʻE anga-fēfē nai ʻa e fakaʻau ke faingataʻa ange ʻa e lova ki he moʻuí ʻi he fakaofi mai ko ia ʻa hono ngataʻangá?

²⁰ ʻI he lova ki he moʻuí, kuo pau ke tau fefaʻuhi mo hotau fili lahí, ʻa Sētane ko e Tēvoló. ʻI heʻetau fakaofi atu ki he ngataʻangá, ʻokú ne feinga ʻikai toe fakavaivai ke fakatūkiaʻi kitautolu pe fakatuaiʻi kitautolu. (Fakahā 12:​12, 17) Pea ʻoku ʻikai ke faingofua ke hokohoko atu ko e kau fanongonongo tōnunga, ʻosi fakatapui ʻo e Puleʻangá ʻi he vakai atu ki he ngaahi tau, ko e ngaahi honge, ko e ngaahi mahaki fakaʻauha, pea mo e ngaahi faingataʻa kehe kotoa ʻokú ne fakaʻilongaʻi ʻa e “kuonga fakamui.” (Taniela 12:4; Mātiu 24:​3-​14; Luke 21:11; 2 Timote 3:​1-5) ʻIkai ko ia pē, ko e ngataʻangá ʻi he taimi ʻe niʻihi, ʻe hā ngali mamaʻo atu ia mei he meʻa naʻa tau ʻamanekiná, tautefito kapau naʻa tau kau mai ki he lová ʻi ha ngaahi hongofuluʻi taʻu ʻi he kuohilí. Kae kehe, ʻoku fakapapauʻi mai ʻe he Folofola ʻa e ʻOtuá kiate kitautolu ko e ngataʻangá ʻe hoko mai. ʻOku pehē ʻe Sihova ʻe ʻikai ke tōmui. Ko e ngataʻangá kuo kite mai.​—Hapakuke 2:3; 2 Pita 3:9, 10.

21. (a) Ko e hā te ne fakaivimālohiʻi kitautolu ke hokohoko atu ʻi he lova ki he moʻuí? (e) Ko e hā ʻoku totonu ko ʻetau fakapapaú ia ʻi he fakaʻau ke ofi ange ʻa e ngataʻangá?

²¹ Ke lavameʻa leva ʻi he lova ki he moʻuí, kuo pau ke tau maʻu ʻa e mālohi mei he meʻa kuo tokonaki anga-ʻofa mai ʻe Sihova ko hotau fafanga fakalaumālié. ʻOku tau toe fiemaʻu foki ʻa e fakalototoʻa kotoa ʻoku malava ke tau maʻu mei heʻetau feohi tuʻumaʻu ko ia mo hotau kaungātuí, ʻa ia ʻoku nau toe lele foki ʻi he lová. Neongo kapau ʻoku hanga ʻe he ngaahi fakatanga kakahá mo e ngaahi meʻa ʻoku hoko taʻeʻamanekina ʻi he halá ʻo fakafaingataʻaʻiaʻi ʻetau lová, ʻe lava ke tau kātaki ʻo aʻu ki he ngataʻangá koeʻuhi ʻoku tokonaki mai ʻe Sihova “ʻa e makehe atu ʻo e mafai.” (2 Kolinito 4:7) He meʻa fakatupu loto-falala moʻoni ke ʻilo ʻoku loto ʻa Sihova ke tau ʻosiki lavameʻa ʻa e lelé! ʻAki ʻa e fakapapau loto-maʻu, “tau kitaki atu ʻetau lele he fakapuepue kuo tala humaki mai kiate kitautolu,” ʻo falala kakato “te ta utu ʻi hono faʻahitaʻu, ʻo kapau ʻe ʻikai te ta vaivai.”​—Hepelu 12:1; Kaletia 6:9.

[Fakamatala ʻi lalo]

ʻOkú Ke Manatuʻí?

◻ Ko e hā kuo pau ai ke tau kātaki ʻo aʻu ki he ngataʻangá?

◻ Ko e hā ʻa e ngaahi tokonaki ʻa Sihova ʻoku totonu ke ʻoua te tau taʻetokangaʻí?

◻ Ko e hā ʻoku mahuʻinga ai ke tau fokotuʻutuʻu fakapotopoto ʻa e vave ʻoku tau ngāueʻakí?

◻ Ko e hā ʻa e fiefia ʻoku fokotuʻu mei muʻa kiate kitautolu ʻi heʻetau hokohoko atu ko ia ʻi he lová?

[Fakatātā ʻi he peesi 18]

Maʻu ʻa e fakalototoʻa mei he ngaahi fakataha faka-Kalisitiané