“ʻE Fokotuʻu ʻa e Pekia”

“ʻE ifi ʻa e talupite, pea ʻe fokotuʻu ʻa e pekia, ʻo taʻefaʻaʻauha, pea ko kitautolu ʻe liliu.”​—1 KOLINITO 15:52.

 1, 2. (a) Ko e hā ʻa e talaʻofa fakafiemālie naʻe ʻomai ʻo fakafou mai ʻi he palōfita ko Hōseá? (e) ʻOku tau ʻilo fēfē ʻoku finangalo ʻa e ʻOtuá ke fakafoki mai ʻa e kau maté ki he moʻuí?

KUO mole atu ʻi he maté ha taha naʻe vāofi mo koe? Tā ʻokú ke ʻiloʻi ʻa e mamahi ʻoku lava ke ʻomai ʻe he maté. Ka neongo ia, ʻoku maʻu ʻe he kau Kalisitiané ʻa e fiemālie ʻi he talaʻofa naʻe foaki mai ʻe he ʻOtuá fakafou mai ʻi he palōfita ko Hōseá: “Te u huhuʻi kinautolu mei he nima ʻo Hetesi; te u fakatau kinautolu mei he mate. Mate, kofaʻa hoʻo ʻu fakaʻauha? Hetesi, kofaʻa hoʻo fakakaʻanga?”​—Hosea 13:14.

² Ko e foʻi fakakaukau ko ia ki he toe foki mai ʻa e kau maté ki he moʻuí ʻoku hā ngali vale ia ki he kau fakataʻetaʻetuí. Ka ko hono moʻoní, ʻoku maʻu ʻe he ʻOtua Māfimafi-Aoniú ʻa e mālohi ke fakahoko ha mana pehē! Ko e ʻīsiu moʻoní pe ʻoku finangalo ʻa Sihova ke fakafoki mai ʻa e kau maté ki he moʻuí. Naʻe ʻeke ʻe he tangata anga-tonu ko Siopé: “Ka pekia ha tangata, te ne toe moʻui koa?” Pea, naʻá ne ʻomai leva ʻa e tali fakapapau ko ʻení: “Te ke toki ui, pea te u tali atu ʻe au: ʻE kavea ho finangalo ki he fitaʻa ʻaho nima.” (Siope 14:​14, 15) Ko e foʻi lea “kavea” ʻoku ʻuhinga ki ha fakaʻamu pe holi tōtōivi. (Fakafehoanaki mo Sāme 84:2.) ʻIo, ʻoku fakatuʻotuʻa vēkeveke atu ʻa Sihova ki he toetuʻú​—ʻokú ne kāvea ke toe sio ki he kau anga-tonu ne mavahe atú, ʻa ia ʻoku nau moʻui ʻi heʻene manatú.​—Mātiu 22:​31, 32.

ʻOku ʻOmai ʻe Sīsū ʻa e Fakamaama ki he Toetuʻú

 3, 4. (a) Ko e hā ʻa e maama naʻe huluhulu ʻe Sīsū ki he ʻamanaki ʻo e toetuʻú? (e) Ko e hā naʻe fokotuʻu hake ai ʻa Sīsū ko ha laumālié, ʻikai ʻi he kakanó?

³ Ko e kau tangata ʻo e tuí ʻi he kuonga muʻá ʻo hangē ko Siopé naʻa nau maʻu ha mahino fakakonga pē ki he toetuʻú. Ko Sīsū Kalaisi ia naʻá ne toki fakamaama kakato mai ʻa e ʻamanaki fakaofo ko ʻení. Naʻá ne fakahaaʻi ʻa e ngafa tefito ʻokú ne fai ʻe ia tonú ʻi heʻene pehē: “Ko ia ʻoku ne tui pikitai ki he ʻAlo ʻoku ne maʻu ʻa e moʻui taʻengata.” (Sione 3:36) ʻE fiefia ʻi he moʻui ko iá ʻi fē? Ki he tokolahi taha ʻo e faʻahinga ʻoku nau ngāueʻi ʻa e tuí, ʻe ʻi he māmaní ia. (Sāme 37:11) Kae kehe, naʻe tala ʻe Sīsū ki heʻene kau ākongá: “Naʻi fanga sipi toko siʻi, ʻoua ʻe manavahe; he kuo finangalo ʻe hoʻomou Tamai ke ʻatu kiate kimoutolu ʻa e puleʻanga.” (Luke 12:32) Ko e Puleʻanga ʻo e ʻOtuá ʻoku fakahēvani ia. Ko ia ai, ʻoku ʻuhinga ʻa e talaʻofa ko ʻení ko ha “fanga sipi toko siʻi” te nau kau fakataha mo Sīsū ʻi hēvani ʻi he tuʻunga ko e ngaahi meʻamoʻui laumālie. (Sione 14:​2, 3; 1 Pita 1:​3, 4) Ko ha ʻamanaki lāngilangiʻia ē! Naʻe toe fakahā ʻe Sīsū ki he ʻapositolo ko Sioné ko e “fanga sipi toko siʻi” ko ʻení ʻe toko 144,000 pē.​—Fakahā 14:1.

⁴ Ko ia, ʻe hū fēfē ʻa e toko 144,000 ki he lāngilangi fakahēvaní? Naʻe hanga ʻe Sīsū ʻo “huluhulu ʻa e moʻui mo e taʻeʻauha ʻaki ʻa e Kosipeli.” ʻAki hono taʻataʻá, naʻá ne fokotuʻu ai ha “hala foʻou mo moʻui” ki hēvani. (2 Timote 1:10; Hepelu 10:​19, 20) ʻUluakí, naʻá ne pekia, ʻo hangē pē ko ia naʻe tomuʻa tala ʻe he Tohitapú ʻe hoko kiate iá. (Aisea 53:12) ʻI he hili iá, hangē ko ia naʻe toki fanongonongo ki mui ʻe he ʻapositolo ko Pitá, “ko e Sīsū ko eni naʻe toe fokotuʻu ia ʻe he ʻOtua.” (Ngāue 2:32) Ka naʻe ʻikai fokotuʻu hake ʻa Sīsū ko ha tangata. Naʻá ne pehē: “Ko e mā foki te u ʻatu ko hoku kakano ia, koeʻuhiā ko e moʻui ʻa māmani.” (Sione 6:51) Ko hono toe maʻu mai hono sinó ʻe taʻeʻaonga ai ʻa e feilaulau ia ko iá. Ko ia ko Sīsuú naʻe “tamateʻi ʻi hono angakakano, ka naʻe fakamoʻui hake ʻi hono angalaumalie.” (1 Pita 3:18) Ko ia, naʻe hoko ai ʻa Sīsū ʻo ne “lavaʻi ai ha huhuʻi taʻengata,” maʻá e “fanga sipi toko siʻi.” (Hepelu 9:12) Naʻá ne ʻoatu ki he ʻOtuá ʻa e mahuʻinga ʻo ʻene moʻui fakaetangata haohaoá ko ha huhuʻi maʻá e faʻahinga ʻo e tangata angahalaʻiá, pea ko e toko 144,000 naʻa nau ʻuluaki maʻu ʻa e ʻaonga mei he meʻá ni.

 5. Ko e hā ʻa e ʻamanaki naʻe fakaaʻu atu ki he kau muimui ʻo Sīsū ʻi he ʻuluaki senitulí?

⁵ Heʻikai ko Sīsū pē ʻa e tokotaha ke toetuʻu hake ki he moʻui fakahēvaní. Naʻe tala ʻe Paula ki hono kaungā Kalisitiane ʻi Lomá kuo pani kinautolu ʻaki ʻa e laumālie māʻoniʻoní ke hoko ko e ngaahi foha ʻo e ʻOtuá pea kaungā-ʻea mo Kalaisi ʻo kapau te nau tuʻumaʻu ʻi honau paní ʻaki ʻa e kātaki ʻo aʻu ki he ngataʻangá. (Loma 8:​16, 17) Naʻe toe fakamatalaʻi ʻe Paula: “Kapau kuo tau tupu taha mo ia ʻi he tatau o ʻene pekia, pea te tau pehe foki ʻi he tatau o ʻene toetuʻu.”​—Loma 6:5.

Ko Hono Taukapoʻi ʻa e ʻAmanaki ʻo e Toetuʻú

 6. Ko e hā naʻe ʻohofi ai ʻa e tui ki he toetuʻú ʻi Kolinitoó, pea naʻe anga-fēfē ʻa e tali ʻa e ʻapositolo ko Paulá?

⁶ Ko e toetuʻú ko e konga ia ʻo e “uluaki akonaki” ʻa e lotu faka-Kalisitiané. (Hepelu 6:​1, 2, PM) Ka neongo ia, naʻe fai hono ʻohofi ʻa e tokāteliné ʻi Kolinitō. Ko e niʻihi ʻi he fakatahaʻangá, ʻoku hā mahino naʻe tākiekina ʻe he fakakaukau fakafilōsefa faka-Kalisí, ʻo nau pehē: “ʻOku ʻikai ke toetuʻu ʻa e pekia.” (1 Kolinito 15:12) ʻI he aʻu ʻa e līpooti ʻo e meʻá ni ki he ʻapositolo ko Paulá, naʻá ne hoko mai leva ke taukapoʻi ʻa e ʻamanaki ʻo e toetuʻú, tautefito ki he ʻamanaki ʻa e kau Kalisitiane paní. Tau sivisiviʻi ange ʻa e ngaahi lea ʻa Paulá ʻa ia ʻoku lēkooti ʻi he 1 Kolinito vahe 15. Te ke ʻilo ʻe mātuʻaki tokoni ʻa hono lau ʻa e vahé fakakātoa, ʻo hangē ko ia naʻe fokotuʻu mai ʻi he kupu ki muʻá.

 7. (a) Ko e hā ʻa e fakakikihi tefito naʻe tokangataha ki ai ʻa Paulá? (e) Ko hai naʻe sio kia Sīsū kuo toetuʻú?

⁷ ʻI he ʻuluaki foʻi veesi ʻe ua ʻo e 1 Kolinito vahe 15, ʻoku fokotuʻu mai ai ʻe Paula ʻa e kaveinga ʻo ʻene fakamatalá: “Kainga, ʻoku ou fakapapau atu ʻa e Kosipeli naʻa ku malangaʻaki kiate kimoutolu, ʻa ia naʻa mou tali foki, ʻio, pea ʻoku mou tuʻu ai foki; kaeʻumaʻā ʻoku mou fakatau ai ki he moʻui, . . . ko hono meʻa pe naʻa ko e kula noa pe hoʻomou tui.” Kapau naʻe ʻikai ke tuʻu maʻu ʻa e kau Kolinitoó ʻi he ongoongo leleí, naʻe kula noa pē ʻenau tali ʻa e moʻoní. Naʻe hoko atu ʻa Paula: “He ko e taha ʻo e ngaahi meʻa naʻa ku fuofua tuku atu, ʻa ia foki naʻa ku maʻu ʻe au, ʻa ʻeni, Naʻe pekia ʻa Kalaisi koeʻuhi ko ʻetau ngaahi angahala, ʻo fakatatau ki he Tohitapu; pea naʻe telio ia; pea naʻe fokotuʻu ia ʻi hono ʻaho tolu, ʻo fakatatau ki he Tohitapu; pea naʻa ne ha kia Kifasi, pea hili ia ki he kau Hongofulumaua, hili ia naʻa ne ha ki he kainga lotu ʻe toko nimangeau tupu, fakataha, ʻa ia ʻoku kei tolonga ni honau tokolahi, ka kuo mohe ha niʻihi: hili ia naʻa ne ha kia Semisi; hili ia ki he kau Aposetolo kotoa pe. Pea kimui ʻaupito, ʻo hange tofu pe ko e fanauʻi taʻehoko kita, naʻa ne ha kiate au foki.”​—1 Kolinito 15:​3-8.

 8, 9. (a) ʻOku fēfē ʻa e mahuʻinga ʻo e tui ki he toetuʻú? (e) ʻOku ngalingali ko e taimi fē naʻe hā ai ʻa Sīsū ki he “kainga lotu ʻe toko nimangeau tupu”?

⁸ Ki he faʻahinga naʻa nau tali ʻa e ongoongo leleí, naʻe ʻikai fakaʻalongaua ki ai ʻa e tui ki he toetuʻú. Naʻe lahi ʻa e kau fakamoʻoni sio tonu “naʻe pekia ʻa Kalaisi koeʻuhi ko ʻetau ngaahi angahala” pea naʻe fokotuʻu hake ia. Ko e taha ko Kīfasi, pe ko Pita, ʻa ia ʻoku ʻiloʻi lelei ange ai iá. ʻI he hili ʻa hono fakaʻikaiʻi ʻe Pita ʻa Sīsū ʻi he pō naʻe lavakiʻi mo taki fakapōpula ai ʻa Sīsuú, kuo pau pē naʻá ne maʻu ha fiemālie lahi ʻi he hā ange ʻa Sīsū kiate iá. Ko e toko “hongofulumaua,” ʻa e kau ʻapositoló ʻi he tuʻunga ko ha kulupú, naʻe toe ʻaʻahi ki ai ʻa Sīsū ʻi heʻene toetuʻú​—ko ha meʻa ʻoku ʻikai ha veiveiua naʻe tokoni ia kiate kinautolu ke nau ikuʻi ai ʻenau manavaheé pea hoko ʻo loto-toʻa ʻi he faifakamoʻoni ki he toetuʻu ʻa Sīsuú.​—Sione 20:​19-23; Ngāue 2:32.

⁹ Naʻe toe hā ʻa Kalaisi ki he kulupu tokolahi ange, “ki he kainga lotu ʻe toko nimangeau tupu.” Koeʻuhi ko Kāleli pē naʻá ne maʻu ai ʻa e kau muimuí ʻi he fuʻu tokolahi pehē, mahalo naʻe hoko iá ʻi he meʻa ko ia ʻoku fakamatalaʻi ʻi he Mātiu 28:​16-20, ʻi he ʻoange ko ia ʻe Sīsū ʻa e fekau ke ngaohi ākongá. Ko ha fakamoʻoni mālohi ē naʻe malava ke fai ʻe he faʻahingá ni! Naʻe kei moʻui ʻa e niʻihi ʻi he 55 T.S. ʻi he taimi ko ia naʻe faʻu ai ʻe Paula ʻa e ʻuluaki tohi ko ʻeni ki he kau Kolinitoó. Ka, fakatokangaʻi ko e faʻahinga ko ia naʻe maté naʻe lave ki ai ʻo pehē “kuo mohe.” Naʻe teʻeki ai ke fokotuʻu hake kinautolu ke maʻu honau pale fakahēvaní.

10. (a) Ko e hā ʻa e ola ʻo e fakataha fakamuimui ʻa Sīsū mo ʻene kau ākongá? (e) Naʻe anga-fēfē ʻa e hā ʻa Sīsū kia Paula “ʻo hange tofu pe ko e fanauʻi taʻehoko”?

¹⁰ Ko e toe fakamoʻoni tuʻu-ki-muʻa ʻe taha ki he toetuʻu ʻa Sīsuú ko Sēmisi, ko e foha ʻo Siosefa pea mo e faʻē ʻa Sīsuú, ʻa Mele. Ki muʻa ʻi he toetuʻú, ʻoku hā mahino naʻe teʻeki ai ke hoko ʻa Sēmisi ia ko ha tokotaha tui. (Sione 7:5) Ka ʻi he hili ʻa e hā ʻa Sīsū kiate iá, naʻe hoko leva ʻa Sēmisi ko ha tokotaha tui pea kaunga lahi ki hono fakatafokiʻi mai ʻa hono ngaahi tokouá. (Ngāue 1:​13, 14) ʻI heʻene fakataha fakamuimui ko ʻeni mo ʻene kau ākongá, ʻi he taimi ko ʻeni peá ne hāʻele hake ai ki hēvaní, naʻe fekauʻi kinautolu ʻe Sīsū ke nau “fakamoʻoni . . . ʻo aʻu ki he ngataʻanga ʻo māmani.” (Ngāue 1:​6-11) Ki mui ai, naʻá ne hā kia Saula ʻo Tāsusí, ko ha tokotaha fakatangaʻi ʻo e kau Kalisitiané. (Ngāue 22:​6-8) Naʻe hā ʻa Sīsū kia Saula “ʻo hange tofu pe ko e fanauʻi taʻe hoko.” Naʻe hangē ia ne ʻosi toetuʻu ʻa Saula ia ki he moʻui fakalaumālié pea malava ke ne sio ki he ʻEiki lāngilangí he laui senituli ia ki muʻa pea toki hoko ʻa e toetuʻu ko iá. Naʻe hanga ʻe he meʻá ni ʻo taʻofi fakafokifā ai ʻa Saula ʻi heʻene fononga ko e fakafepaki anga-fakapō ki he fakatahaʻanga Kalisitiané pea naʻe tupu ai ha liliu fakaofo. (Ngāue 9:​3-9, 17-19) Naʻe hoko ʻa Saula ko e ʻapositolo ko Paulá, ko e taha ʻo e kau taukapoʻi tuʻu-ki-muʻa ʻo e tui faka-Kalisitiané.​—1 Kolinito 15:​9, 10.

Mātuʻaki Fiemaʻu ʻa e Tui ki he Toetuʻú

11. Naʻe anga-fēfē hono fakaeʻa ʻe Paula ʻa e hala ʻa e pehē ko ia, “ʻOku ʻikai ha toetuʻu”?

¹¹ Ko ia ai, ko e toetuʻu ʻa Sīsuú ko ha fakamoʻoni lelei ia. “Pea ko eni, kapau ʻoku malangaʻaki ʻa Kalaisi, ʻo pehe, Kuo fokotuʻu ia mei he pekia,” ko e fakaʻuhinga ia ʻa Paulá, “pea fefe ai ʻa e lau ʻa homou niʻihi, tokua ʻoku ʻikai ke toetuʻu ʻa e pekia?” (1 Kolinito 15:12) Naʻe ʻikai ke ngata pē ʻi hono maʻu ʻe he faʻahingá ni ʻa e ngaahi veiveiua fakafoʻituituí pe ngaahi fehuʻi fekauʻaki mo e toetuʻú ka naʻa nau toe tala fakahāhā atu ʻa e taʻetui ki ai. Ko ia naʻe fakaeʻa ʻe Paula ʻa e hala ʻa ʻenau fakaʻuhingá. ʻOkú ne pehē kapau naʻe ʻikai ke fokotuʻu hake ʻa Kalaisi, ko e pōpoaki ʻa e Kalisitiané ko ha loi, pea ko e faʻahinga ko ia naʻe fakamoʻoni ki he toetuʻu ʻa Kalaisí ko e “kau lohiakiʻi ʻo e ʻOtua.” Kapau naʻe ʻikai ke fokotuʻu hake ʻa Kalaisi, naʻe ʻikai ha huhuʻi ia ne totongi ki he ʻOtuá; ko e kau Kalisitiané ia ‘ʻoku nau kei ʻi heʻenau angahalá.’ (1 Kolinito 15:​13-19; Loma 3:​23, 24; Hepelu 9:​11-14) Pea ko e kau Kalisitiane naʻe “mohe,” ʻi he tuʻunga ʻe niʻihi ko e kau mate māʻatá, naʻa nau ʻauha taʻeʻiai ha ʻamanaki moʻoni. He tuʻunga fakaʻofa ē ne mei ʻi ai ʻa e kau Kalisitiané kapau ko e moʻui pē ko ʻení naʻe malava ke nau ʻamanekiná! Ko ʻenau ngaahi faingataʻaʻiá ʻe hoko pē ko e foʻi noa.

12. (a) Ko e hā ʻoku ʻuhinga ki ai ʻa hono ui ʻa Kalaisi “ko e polopolo ʻo e faʻahinga kuo mohe”? (e) Naʻe anga-fēfē ʻa hono ʻai ʻe Kalaisi ke malava ʻa e toetuʻú?

¹² Kae kehe, naʻe ʻikai ko e meʻá ia. ʻOku hoko atu ʻa Paula: “Kuo fokotuʻu ʻa Kalaisi mei he pekia.” ʻIkai ngata aí, ko iá “ko e polopolo ʻo e faʻahinga kuo mohe.” (1 Kolinito 15:20) ʻI he taimi naʻe talangofua ai ʻa e kau ʻIsilelí ʻo ʻave kia Sihova ʻa e ngaahi polopolo ʻo e ngaahi meʻa naʻa nau maʻú, naʻe tāpuakiʻi kinautolu ʻe Sihova ʻaki ha utu-taʻu lahi ʻaupito. (Ekisoto 22:​29, 30; 23:19; Palovepi 3:​9, 10) ʻI hono ui ʻo Kalaisi “ko e polopolo,” ʻoku ʻuhinga ai ʻa Paula ki ha toe utu-taʻu ʻo e faʻahinga tāutaha ʻe fokotuʻu hake mei he maté ki he moʻui fakahēvaní. “Ko e meʻa ʻi he fou mai ʻi ha tangata ʻa e mate,” ʻoku pehē ʻe Paula, “pea fou mai ʻi ha tangata foki ʻa e toetuʻu ʻo e pekia. ʻIo, hange tofu pe ʻoku mate kotoa pe ʻia Atama, pehe foki ʻe fakamoʻui hake kotoa pe ʻia Kalaisi.” (1 Kolinito 15:​21, 22) Naʻe ʻai ʻe Sīsū ke malava ʻa e toetuʻú ʻaki hono foaki ʻene moʻui fakaetangata haohaoá ko e huhuʻi, ʻo fakaava ai ʻa e hala ki he faʻahinga ʻo e tangatá ke fakatauʻatāinaʻi ai mei he pōpula ki he angahalá mo e maté.​—Kaletia 1:4; 1 Pita 1:​18, 19.a

13. (a) ʻOku hoko fakakū ʻa e toetuʻu fakahēvaní? (e) Fēfē leva ʻa e niʻihi ia ʻo e kau paní ʻoku ʻikai ke nau ‘mohe ʻi he maté’?

¹³ ʻOku hoko atu ʻa Paula: “Ka ʻe taki taha ʻi hono vahenga; ko e polopolo ko Kalaisi; hoko ai ʻa kinautolu ʻoku ʻo Kalaisi ʻoka fai ʻene haʻele mai.” (1 Kolinito 15:23) Naʻe toetuʻu hake ʻa Kalaisi ʻi he 33 T.S. Kae kehe, ko hono kau muimui paní​—“ʻa kinautolu ʻoku ʻo Kalaisi”—naʻe pau ke nau tatali kae ʻoua ke hili ha taimi siʻi mei he kamata ʻa Sīsū ke ʻi ai fakatuʻí, ʻa ia ʻoku fakahaaʻi ʻe he kikite ʻa e Tohitapú naʻe hoko ia ʻi he 1914. (1 Tesalonaika 4:​14-16; Fakahā 11:18) Fēfē ʻa e faʻahinga ʻe moʻui he lolotonga ʻa e ʻi ai ko iá? ʻOku pehē ʻe Paula: “ʻE! kau tala atu ha misiteli: ʻE ʻikai te tau mohe kotoa pe, ka te tau liliu kotoa pe, ʻi ha foʻi momeniti, ʻi ha foʻi kemo pe, ʻi he ifi fakamui ʻo e talupite: ʻio, ʻe ifi ʻa e talupite, pea ʻe fokotuʻu ʻa e pekia, ʻo taʻefaʻaʻauha, pea ko kitautolu ʻe liliu.” (1 Kolinito 15:​51, 52) ʻOku hā mahino, ʻoku ʻikai ke tatali ʻa e faʻahinga pani kotoa ʻoku mohe ʻi he faʻitoká ki ha toetuʻu. Ko e faʻahinga ʻoku mate he lolotonga ʻa e ʻi ai ʻa Kalaisí ʻoku nau liliu ʻi he mōmeniti pē ko iá.​—Fakahā 14:13.

14. ʻOku anga-fēfē ʻa e hoko ʻa e kau paní ʻo “papitaiso maʻá e pekia”?

¹⁴ “He ka ʻikai,” ʻoku ʻeke ʻe Paula, “pea ko e ha ʻanautolu ai ʻe fai, ʻa e faʻahinga ʻoku papitaiso maʻá e pekia? Kapau ʻoku ʻikai ʻaupito ha fokotuʻu ʻo e pekia, pea koeʻumaʻā honau papitaiso maʻanautolu? Pea koeʻumaʻā ʻemau nofo ʻi lelenga ʻoku fai ʻi he houa kotoa pe?” (1 Kolinito 15:​29, 30) Naʻe ʻikai ke ʻuhinga ʻa Paula ia naʻe papitaiso ʻa e faʻahinga tāutaha ʻoku moʻuí maʻá e faʻahinga ko ia ʻoku maté, ʻo hangē ko ia ʻoku hā ʻi he ngaahi liliu Tohitapu ʻe niʻihi. Ko hono moʻoní, ʻoku felāveʻi ʻa e papitaisó ia mo e tuʻunga-ākonga Kalisitiané, pea ko e kau maté ʻoku ʻikai malava ke nau hoko ko e kau ākonga. (Sione 4:1) Ka, naʻe lāulea ʻa Paula ki he kau Kalisitiane ʻoku moʻui, ko e tokolahi ʻo kinautolu, hangē ko Paulá tonu, naʻa nau “nofo ʻi lelenga . . . ʻi he houa kotoa pe.” Ko e kau Kalisitiane paní ia naʻa nau ‘papitaiso ki he pekia ʻa Kalaisí.’ (Loma 6:3) Koeʻuhi ko hono pani kinautolú, naʻa nau hoko ai ʻo “papitaiso,” ʻo meimei hangē pē ko e hoko ai, ki ha ʻalunga ʻe iku atu ki he mate hangē ko ia ko Kalaisí. (Maake 10:​35-40) Te nau mate fakataha mo e ʻamanaki ki ha toetuʻu fakahēvani lāngilangiʻia.​—1 Kolinito 6:14; Filipai 3:​10, 11.

15. Ko e hā ʻa e nofo ʻi lelenga naʻe hokosia nai ʻe Paulá, pea naʻe anga-fēfē ʻa e kaunga ʻa e tui ki he toetuʻú ʻi hono kātekina kinautolú?

¹⁵ ʻOku fakamatala leva eni ʻa Paula ʻo pehē ko ia tonu naʻá ne fehangahangai mo e nofo ʻi lelengá ʻo aʻu ki ha tuʻunga ke ne malava ai ʻo pehē: “Ko kita ʻoku te mate hokohoko ʻaho pe.” Telia naʻa tukuakiʻi ia ʻe ha niʻihi ki ha lea fakalahiʻi, ʻoku tānaki atu ʻe Paula: “ʻA, ko ʻeku moʻoni pe! hange ʻoku moʻoni ʻeku polepole ʻiate kimoutolu, kainga, ʻa ia ʻoku ou lava ʻia Kalaisi Sisu ko hotau ʻEiki.” Ko e fakalea ʻeni ia ʻe he The Jerusalem Bible ʻa e veesí ni: “ʻOku ou fehangahangai mo e maté he ʻaho kotoa pē, kāinga, pea ʻoku malava ke u fuakavaʻaki ia ʻaki ʻeku pōlepole ʻiate kimoutolu ʻia Kalaisi Sīsū ko hotau ʻEiki.” Ko ha fakatātā ʻo e ngaahi fakatuʻutāmaki naʻá ne fehangahangai mo iá, ʻi he veesi 32, ʻoku lea ai ʻa Paula ʻo fekauʻaki mo e ‘tau mo e manu fekai ʻi ʻEfeso.’ Naʻe faʻa tāmateʻi ʻe he kau Lomá ʻa e kau faihiá ʻaki hono lī kinautolu ki he fanga manu fekai ʻi he ngaahi malaʻe vaʻingá. Kapau naʻe kātekina ʻe Paula ha faitau mo ha fanga manu fekai moʻoni, naʻe malava pē ke ne haó ʻi he tokoni ʻa Sihová. Ka ne ʻikai ha ʻamanaki toetuʻu, ko e fili ki ha ʻalunga moʻui naʻe fakaʻatā atu ai ia ki ha nofo ʻi lelenga peheé ko ha meʻa ngali vale moʻoni ia. Ka ne ʻikai ha ʻamanaki ki ha moʻui ʻi he kahaʻú, ko hono kātekina ʻo e ngaahi faingataʻá pea fai ʻa e ngaahi feilaulau naʻe hoko mai ʻi hono tauhi ʻa e ʻOtuá ʻe ʻikai loko ʻaonga. “Kapau ʻoku ʻikai fokotuʻu ʻa e pekia,” ʻoku pehē ʻe Paula, “ʻe, tau kai mo inu e, he ʻoku apongipongi ʻetau mate.”​—1 Kolinito 15:​31, 32; sio ki he 2 Kolinito 1:​8, 9; 11:​23-27.

16. (a) Ko e tupu nai mei fē ʻa e kupuʻi lea “ʻe, tau kai mo inu e, he ʻoku apongipongi ʻetau mate”? (e) Ko e hā ʻa e ngaahi fakatuʻutāmaki ʻo hono maʻu ʻa e fakakaukau ko ʻení?

¹⁶ Naʻe lave nai heni ʻa Paula mei he Aisea 22:​13, ʻa ia ʻoku fakamatala ai ki he anga ʻo e fakakaukau fekauʻaki mo e maté naʻe ʻi he kau nofo talangataʻa ʻo Selusalemá. Pe naʻe ʻi heʻene fakakaukaú nai ʻa e ngaahi tui ʻa e kau ʻEpikulioó, ʻa ia naʻa nau fakamāfulifuli ki ha faʻahinga ʻamanaki pē ʻo kau ki ha moʻui hili pē ʻa e maté pea nau tui ko e fakafiefia fakaekakanó ko e meʻa tefito ia ʻi he moʻuí. Pe ko e hā pē ha tuʻunga ai, ko e fakakaukau fakafilōsefa ʻo e “kai mo inu” naʻe ʻikai fakaʻotua ia. Ko ia, ʻoku fakatokanga mai ʻa Paula: “ʻOua naʻa tuku ke kākāʻi kimoutolu. ʻOku maumauʻi ʻa e ngaahi ʻulungaanga lelei ʻe he faʻa talanoa kovi.” (1 Kolinito 15:33) ʻOku malava ke hoko ko e meʻa fakamate ʻa e feohi mo e faʻahinga ʻoku nau talitekeʻi ʻa e toetuʻú. Naʻe ʻi ai nai ha kaunga ʻa e feohi peheé ʻi he ngaahi palopalema naʻe pau ke ngāue ki ai ʻa Paula ʻi he fakatahaʻanga Kolinitoó, ʻo hangē ko e fehokotaki fakasino taʻetāú, fetuʻusí, hopo fakatonutonu, mo e taʻetokaʻi ʻa e Kai Efiafi ʻa e ʻEikí.​—1 Kolinito 1:11; 5:1; 6:1; 11:​20-22.

17. (a) Ko e hā ʻa e enginaki naʻe fai ʻe Paula ki he kau Kolinitoó? (e) Ko e hā ʻa e ngaahi fehuʻi ʻoku kei tuʻu ke talí?

¹⁷ Ko ia, ʻoku fai ʻe Paula ʻa e enginaki pau ko ʻení ki he kau Kolinitoó: “Tuku hoʻomou konā, ka mou ʻā hake ki he anga totonu; pea ʻoua te mou fai angahala. He ʻoku ʻi ai ʻa e niʻihi ʻoku ʻikai haʻanau momoʻi ʻilo ki he ʻOtua. ʻOku ou lea pehe ko homou fakamaaʻi.” (1 Kolinito 15:34) Ko ha fakakaukau taʻetaʻepau ki he toetuʻú naʻá ne taki ʻa e niʻihi ki ha ʻikai fakakaukau lelei fakalaumālie, ʻo hangē naʻe konaá. Naʻe fiemaʻu ke nau ʻā hake, ʻo nofo taʻekonā. ʻOku pehē pē ʻa hono fiemaʻu ki he kau Kalisitiane paní he ʻahó ni ke nau ʻāʻā fakalaumālie, ʻo ʻoua ʻe tākiekina ʻe he ngaahi fakakaukau fakataʻetaʻetui ʻa e māmaní. Kuo pau ke nau piki maʻu ki heʻenau ʻamanaki ki ha toetuʻu fakahēvaní. Ka ʻoku kei tuʻu pē ʻa e ngaahi fehuʻi​—ki he kau Kalisitiane ko iá pea kiate kitautolu ʻi he taimi ní. Ko e fakatātaá, ʻi he fōtunga fē ʻoku fokotuʻu ai ki hēvani ʻa e toko 144,000? Pea fēfē ʻa e toko laui miliona kehe ʻoku nau kei ʻi he faʻitoká pea ʻoku ʻikai te nau maʻu ha ʻamanaki fakahēvaní? ʻE ʻuhinga ki he hā ʻa e toetuʻú ki he faʻahinga peheé? ʻI heʻetau kupu hoko maí, te tau sivisiviʻi ai ʻa e toenga ʻo e fakamatala ʻa Paula ki he toetuʻú.

[Fakamatala ʻi lalo]

ʻOkú Ke Manatuʻi?

◻ Ko e hā ʻa e maama naʻe huluhulu ʻe Sīsū ki he toetuʻú?

◻ Ko hai ʻa e niʻihi naʻe fakamoʻoni sio tonu ki he toetuʻu ʻa Kalaisí?

◻ Ko e hā naʻe poleʻi ai ʻa e tokāteline toetuʻú, pea ko e hā ʻa e tali ki ai ʻa Paulá?

◻ Ko e hā naʻe mātuʻaki mahuʻinga ai ki he kau Kalisitiane paní ʻa e tui ki he toetuʻú?

[Fakatātā ʻi he peesi 15]

Naʻe hoko ʻa e ʻofefine ʻo Sailosí ko e fakamoʻoni naʻe malava ʻa e toetuʻú

[Fakatātā ʻi he peesi 16]

Ka ne ʻikai ha ʻamanaki ki ha toetuʻu, ʻe ʻikai hano ʻaonga ʻa e mate māʻata ʻa e kau Kalisitiane anga-tonú