Vahevahe Atu ʻa e Fakafiemālie ʻOku Tokonaki Mai ʻe Sihová

“Bea oku tuu mau be e mau amanaki lelei kiate kimoutolu, koe mau ilo, koe mea i hoo mou kau i he gaahi mamahi, te mou kau foki i he fiemalie.”​—2 KOLINITŌ 1:​7, PM.

1, 2. Ko e hā kuo aʻusia ʻe he tokolahi kuo nau hoko ko e kau Kalisitiane ʻi he ʻaho ní?

TOKOLAHI ʻa e kau lautohi ki mui mai ʻo e Taua Leʻo naʻa nau tupu hake mo e ʻikai ha ʻiloʻi ʻo e moʻoni ʻa e ʻOtuá. Mahalo pē ʻoku hoko moʻoni ia ʻiate koe. Kapau ko ia, fakamanamanatu angé ki he anga ʻa hoʻo ongoʻí ʻi he kamata ke ʻā ʻa e mata ʻo hoʻo mahinó. Ko e fakatātaá, ʻi he taimi naʻe fuofua mahino ai kiate koe ʻoku ʻikai ke faingataʻaʻia ʻa e kau maté ka ʻoku ʻikai te nau toe ʻilo ha meʻa, ʻikai naʻá ke nonga ai? Pea ʻi he taimi naʻá ke ʻilo ai ʻa e ʻamanaki ki he kau maté, ʻa ia ko e laui piliona ʻe fokotuʻu mai ke moʻui ʻi he māmani foʻou ʻa e ʻOtuá, ʻikai naʻe fakafiemālieʻi ai koe?​—Koheleti 9:​5, 10; Sione 5:​28, 29.

² Fēfē ʻa e talaʻofa ʻa e ʻOtuá ke fakangata ʻa e fulikivanú pea ke liliu ʻa e māmani ko ʻení ki ha palataisí? ʻI he taimi naʻá ke ʻilo ai fekauʻaki mo ʻení, ʻikai naʻá ne fakafiemālieʻi koe mo fakafonuʻaki koe ʻa e fakatuʻamelie loto-vēkeveke? Naʻe fēfē hoʻo ongoʻí ʻi hoʻo fuofua ʻilo ki he malava ke ʻikai toe mate ka ko e hao moʻui atu ki he Palataisi fakaemāmani ko ia ʻe hoko maí? ʻOku ʻikai ha veiveiua naʻá ke fiefia-loto. ʻIo, naʻá ke hoko ʻo maʻu ʻa e pōpoaki fakafiemālie ʻa e ʻOtuá ʻoku lolotonga malangaʻaki ʻi māmani lahi ʻe he Kau Fakamoʻoni ʻa Sihová.​—Sāme 37:​9-​11, 29; Sione 11:26; Fakahā 21:​3-5.

 3. Ko e hā ʻoku toe faingataʻaʻia ai ʻi he mamahí ʻa kinautolu ko ia ʻoku nau vahevahe atu ʻa e pōpoaki fakafiemālie ʻa e ʻOtuá ki he niʻihi kehé?

³ Kae kehe, ʻi hoʻo feinga ke vahevahe atu ki he niʻihi kehé ʻa e pōpoaki ʻi he Tohitapú, ʻokú ke toe hoko ʻo fakatokangaʻi ai ʻoku “ikai maʻu kotoabe ae tui.” (2 Tesalonaika 3:​2, PM) Mahalo pē ko e niʻihi ʻi ho kaungāmeʻa ki muʻá naʻa nau manukiʻi koe ʻi hoʻo fakahāhaaʻi ʻa e tui ki he ngaahi talaʻofa ʻi he Tohitapú. Naʻe aʻu nai ki hoʻo faingataʻaʻia ʻi he fakatanga ʻi he hokohoko atu hoʻo ako ʻa e Tohitapú ʻi hoʻo feohi mo e Kau Fakamoʻoni ʻa Sihová. Naʻe ʻai nai ʻo lahi ʻa e fakafepakí ʻi hoʻo kamata fai ʻa e ngaahi liliu ke ʻomai ʻa hoʻo moʻuí ʻo fakafehoanaki mo e ngaahi tefitoʻi moʻoni ʻi he Tohitapú. Naʻá ke kamata aʻusia ʻa e mamahi ʻa ia ʻoku ʻomai ʻe Sētane mo hono māmaní ki he faʻahinga kotoa ʻoku nau tali ʻa e fakafiemālie ʻa e ʻOtuá.

 4. Ko e hā ʻa e ngaahi tafaʻaki kehekehe ʻe tali ʻaki nai ʻe he faʻahinga mahuʻingaʻia foʻoú ʻa e mamahí?

⁴ ʻOku fakamamahí, hangē ko ia naʻe tomuʻa tala ʻe Sīsuú, ʻoku fakatupunga ʻe he mamahí ʻa e niʻihi ke tūkia pea tuku ai ʻenau feohi mo e fakatahaʻanga Kalisitiané. (Mātiu 13:​5, 6, 20, 21) ʻOku kātekina ʻe he niʻihi kehe ʻa e mamahí ʻaki ʻa e tauhi maʻu ʻi heʻenau fakakaukaú ʻa e ngaahi talaʻofa fakafiemālie ʻa ia ʻoku nau akó. Faifai atu pē ʻo nau fakatapui ʻenau moʻuí kia Sihova pea papitaiso ʻo hoko ko e kau ākonga ʻa hono ʻAló, ʻa Sīsū Kalaisi. (Mātiu 28:​19, 20; Maʻake 8:​34) Ko e moʻoni, ʻoku ʻikai ʻosi ʻa e mamahí ia ʻi he taimi pē ʻoku papitaiso ai ha Kalisitiane. Ko e fakatātaá, ʻoku lava ke hoko ko ha fāinga faingataʻa ia ke tauhi ʻa e anga-maʻá ʻe ha taha naʻe ʻosi ʻi ha tuʻunga ʻulungaanga taʻetaau. Ko e niʻihi kehe naʻe pau ke nau fetakai mo e fakafepaki hohoko mei he ngaahi mēmipa taʻetui ʻi he fāmilí. Ko e hā pē ʻa e mamahí, ko kinautolu kotoa ʻoku nau tuli anga-tonu ki ha moʻui fakatapui ki he ʻOtuá ʻoku lava ke nau fakapapauʻi ʻa e meʻa ʻe taha. ʻI ha founga mātuʻaki fakafoʻituitui, te nau aʻusia ʻa e fakafiemālie mo e tokoni mei he ʻOtuá.

“Otua oe Fiemalie Kotoabe”

 5. Ko e hā naʻe toe aʻusia ʻe Paula fakataha mo e ngaahi ʻahiʻahi lahi naʻe faingataʻaʻia aí?

⁵ Ko e tokotaha naʻe houngaʻia lahi ʻi he fakafiemālie ko ia ʻoku ʻomai ʻe he ʻOtuá ko e ʻaposetolo ko Paulá. Hili ha taimi naʻe tautefito ai ʻa e ʻahiʻahí ʻi ʻĒsia mo Masitōniá, naʻá ne aʻusia ai ha nonga lahi heʻene fanongo naʻe tali lelei ʻe he fakatahaʻanga ʻi Kolinitoó ʻa ʻene tohi atu ʻo akonakí. Naʻe ueʻi ia ʻe he meʻá ni ke ne fai kiate kinautolu ha tohi hono ua, ʻa ia naʻe kau ai ʻa e fakahaaʻi ʻo e fakahīkihiki ko ʻeni hono hokó: “Fakafetai ki he Otua, moe Tamai a ho tau Eiki ko Jisu Kalaisi, koe Tamai ae gaahi aloofa, moe Otua oe fiemalie kotoabe; Aia oku ne fakafiemalieʻi akimautolu i he e mau mamahi kotoabe.”​—2 Kolinitō 1:​3, 4, PM.

 6. Ko e hā ʻoku tau ako mei he ngaahi lea ʻa Paula ʻoku maʻu ʻi he 2 Kolinitō 1:​3, 4?

⁶ ʻOku ʻomai ha fakamatala lahi ʻi he ngaahi lea fakamānavaʻi ko ʻení. Tau ʻanalaiso angé kinautolú. ʻI he taimi ʻoku fakahāhaaʻi ai ʻe Paula ʻa e fakahīkihiki pe fakamālō ki he ʻOtuá pe fai ha kole kiate ia ʻi heʻene ngaahi tohí, ʻoku tau faʻa ʻilo ai ʻokú ne toe fakakau ki ai ʻa e houngaʻia lahi kia Sīsū, ko e ʻUlu ʻo e fakatahaʻanga Kalisitiané. (Loma 1:8; 7:​25; ʻEfesō 1:3; Hepelū 13:​20, 21) ʻI hení, ʻoku ngāueʻaki ai ʻe Paula ʻa e fakahaaʻi ko ʻeni ʻo e fakahīkihiki ki he “Otua, moe Tamai a ho tau Eiki ko Jisu Kalaisi.” (Fakaʻītali ʻamautolu.) Hili iá, ko e ʻuluaki taimi ʻeni ʻi heʻene ngaahi tohí, ʻokú ne ngāueʻaki ai ha nauna faka-Kalisi naʻe liliuʻi ko e “gaahi aloofa.” ʻOku haʻu ʻa e nauna ko ʻení mei ha foʻi lea naʻe ngāueʻaki ke fakahaaʻi ʻa e mamahi ʻi ha faingataʻaʻia ʻa ha taha kehe. Ko ia ʻoku fakamatalaʻi ai ʻe Paula ʻa e ngaahi ongoʻi fakaalaala ʻa e ʻOtuá ki ha taha pē ʻo ʻEne kau sevāniti anga-tonu ʻoku nau faingataʻaʻia ʻi ha mamahi​—ko e ngaahi ongoʻi fakaalaala ʻa ia ʻokú ne ueʻi ʻa e ʻOtuá ke fai meesi koeʻuhi ko kinautolu. Fakaʻosí, naʻe hanga ʻa Paula kia Sihova ko e tupuʻanga ia ʻo e ʻulungaanga manakoa ko ʻení ʻi heʻene ui ia “ko e Tamai ae gaahi aloofa.”​—Fakaʻītali ʻamautolu.

 7. Ko e hā ʻoku lava ai ke pehē ko Sihová ko e “Otua oe fiemalie kotoabe”?

⁷ ʻOku iku ʻa e “gaahi aloofa” ʻa e ʻOtuá ki he nonga ʻa e tokotaha ʻoku faingataʻaʻia ʻi he mamahí. Ko ia ai, ʻoku hoko atu ʻa Paula ʻo fakamatalaʻi ʻa Sihova ʻi hono tuʻunga ko e “Otua oe fiemalie kotoabe.” Ko ia ai, ko e hā pē ha fakafiemālie ʻoku tau aʻusia nai ʻi he anga-ʻofa ʻa hotau kaungā-tuí, ʻoku lava ke tau hanga kia Sihova ko e tupuʻangá ia. ʻOku ʻikai ha fakafiemālie tuʻuloa moʻoni, ʻe taʻetupu mei he ʻOtuá. Tānaki atu ki ai, ko ia naʻá ne ngaohi ʻa e tangatá ʻi hono ʻīmisí, ʻo ʻai ai kitautolu ke tau hoko ko e kau fakafiemālie. Pea ko e laumālie māʻoniʻoni ko ia ʻo e ʻOtuá ʻokú ne ueʻi ʻene kau sevānití ke fakahāhā ʻa e ʻaloʻofa fakaalaala kiate kinautolu ko ia ʻoku nau fiemaʻu ʻa e fakafiemālié.

Naʻe Akoʻi ke Hoko ko e Kau Fakafiemālie

 8. Neongo ʻoku ʻikai ko e ʻOtuá ʻa e tupuʻanga ʻo hotau ngaahi ʻahiʻahí, ko e hā ʻa e ʻaonga ola lelei ʻe lava ke hoko kiate kitautolu ʻi heʻetau kātekina ʻa e mamahí?

⁸ Lolotonga hono fakangofua ʻe he ʻOtua ko Sihová ʻa e ngaahi ʻahiʻahi kehekehe ʻoku hoko ki heʻene kau sevāniti anga-tonú, ʻoku ʻikai ʻaupito ko ia ia ʻa e tupuʻanga ʻo e ngaahi ʻahiʻahi peheé. (Sēmisi 1:​13) Kae kehe, ko e fakafiemālie ʻokú ne tokonaki mai ʻi he taimi ʻoku tau kātekina ai ʻa e mamahí ʻoku lava ke ne akoʻi kitautolu ke hoko ʻo ongongofua ange ai ki he ngaahi fiemaʻu ʻa e niʻihi kehé. Ko e hā hono olá? “Ke mau faa fai ai ke fakafiemalieʻi akinautolu ʻoku mamahiia aki ae fakafiemalie koia aia oku fakafiemalieʻi aki akimautolu e he Otua.” (2 Kolinitō 1:​4, PM) Ko ia ʻoku akoʻi ai kitautolu ʻe Sihova ke hoko ko e kau vahevahe ola lelei ʻo ʻene fakafiemālié ki he kaungā-tuí mo kinautolu ko ia ʻoku tau fetaulaki ʻi heʻetau ngāue fakafaifekaú ʻi heʻetau faʻifaʻitaki kia Kalaisi mo “fakafiemalieʻi akinautolu kotoabe oku mamahi.”—ʻAisea 61:​2, PM; Mātiu 5:4.

 9. (a) Ko e hā te ne tokoniʻi kitautolu ke kātekina ʻa e faingataʻá? (e) ʻOku anga-fēfē hono fakafiemālieʻi ʻa e niʻihi kehé ʻi he taimi ʻoku tau kātekina anga-tonu ai ʻa e mamahí?

⁹ Naʻe kātekina ʻe Paula ʻa ʻene ngaahi faingataʻaia lahí koeʻuhi ko e fakafiemālie lahi fau naʻá ne maʻu mei he ʻOtuá fakafou mai ʻia Kalaisí. (2 Kolinitō 1:5) ʻOku tau lava foki ke aʻusia ha fakafiemālie lahi ʻi heʻetau fakalaulauloto ki he ngaahi talaʻofa fisifisimuʻa ʻa e ʻOtuá, ʻi he lotu ki he tokoni ʻa hono laumālie māʻoniʻoní, pea ʻi he aʻusia ʻa e ngaahi tali mei he ʻOtuá ki heʻetau ngaahi lotú. Ko ia ʻe ʻai ai ke tau mālohi ke hokohoko atu ʻi hono poupouʻi ʻa e tuʻunga-hau ʻo Sihová mo hono fakamoʻoniʻi ko e tokotaha loi ʻa e Tēvoló. (Siope 2:4; Palōvepi 27:11) ʻI he taimi kuo tau kātekina anga-tonu ai ha faʻahinga tuʻunga pē ʻo e mamahí, ʻoku totonu ke tau hangē ko Paulá, ʻo tuku ʻa e lelei kotoa pē kia Sihova, ʻa ia ko ʻene fakafiemālié ē ʻokú ne ʻai ai ʻo malava ke tauhi anga-tonu ʻa e kau Kalisitiané lolotonga ʻa e ʻahiʻahí. Ko e kātaki ʻa e kau Kalisitiane anga-tonú ʻoku ʻi ai ʻene ola lelei fakafiemālie ki he fetokouaʻakí, ʻi hono ʻai ʻo fakapapauʻi ʻe he niʻihi kehé ke “ʻukuma ʻa e ngaahi mamahi . . . tatau.”​—2 Kolinitō 1:6.

10, 11. (a) Ko e hā ʻa e ngaahi meʻa ʻe niʻihi naʻá ne fakatupunga ʻa e faingataʻaʻia ki he fakatahaʻanga ʻi muʻa ʻi Kolinitoó? (e) Naʻe anga-fēfē hono fakafiemālieʻi ʻe Paula ʻa e fakatahaʻanga ʻi Kolinitoó, pea ko e hā ʻa e ʻamanaki naʻá ne fakahaaʻí?

¹⁰ Naʻe kau ʻa e kau Kolinitoó ʻi he ngaahi faingataʻaʻia naʻe hoko ki he kotoa ʻo e kau Kalisitiane moʻoní. ʻI he tānaki atu ki aí, naʻe fiemaʻu kiate kinautolu ʻa e akonaki ke tuʻusi ha tokotaha feʻauaki taʻefakatomala. (1 Kolinitō 5:​1, 2, 11, 13) Ko e taʻemalava ke fai ʻa e meʻá ni, pea ke fakangata ʻa e fekeʻikeʻí mo e ngaahi māvahevahé naʻá ne ʻomai ʻa e fakamāʻanga ki he fakatahaʻangá. Ka naʻe faifai atu pē ʻo nau ngāueʻaki ʻa e akonaki ʻa Paulá pea fakahāhā ʻa e fakatomala moʻoni. Ko ia ai, naʻá ne fakaongoongoleleiʻi loto-māfana kinautolu peá ne pehē naʻe fakafiemālieʻi ia ʻi heʻenau tali lelei ʻene tohí. (2 Kolinitō 7:​8, 10, 11, 13) ʻOku hā mahino, naʻe toe fakatomala mo e tokotaha naʻe tuʻusí. Ko ia ai, naʻe fakahinohinoʻi kinautolu ʻe Paula ke ‘fai hono fakamolemole mo hono fakafiemalie, naʻa ʻiloange ʻe fongia ʻaupito ha tokotaha pehe, ʻo ka hulu atu ʻene mamahí.’​—2 Kolinitō 2:7.

¹¹ Kuo pau pē naʻe hanga ʻe he tohi hono ua ʻa Paulá ʻo fakafiemālieʻi ʻa e fakatahaʻanga ʻi Kolinitoó. Pea ko e taha ʻeni ʻo ʻene ngaahi taumuʻá. Naʻá ne fakamatala: “Oku tuu mau be e mau ʻamanaki lelei kiate kimoutolu, koe mau ilo, koe mea i hoo mou kau i he gaahi mamahi, te mou kau foki i he fiemalie.” (2 Kolinitō 1:​7, PM) ʻI he fakaʻosinga ʻo ʻene tohí, naʻe naʻinaʻi ai ʻa Paula: “Mou . . . fakafiemalie, . . . pea ko e ʻOtua ʻo e ʻofa mo e melino te ne toki kau mo kimoutolu.”​—2 Kolinitō 13:11.

12. Ko e hā ʻa e fiemaʻu ʻa e kau Kalisitiane kotoa pē?

¹² He lēsoni mahuʻinga ē ʻoku lava ke tau ako mei hení! ʻOku fiemaʻu ki he mēmipa kotoa pē ʻi he fakatahaʻanga Kalisitiané ke “kau foki i he fiemalie” ʻa ia ʻoku tokonaki mai ʻe he ʻOtuá fakafou ʻi heʻene Folofolá, ko hono laumālie māʻoniʻoní, mo ʻene kautaha ʻi he māmaní. Naʻa mo e faʻahinga kuo tuʻusí ʻoku nau fiemaʻu nai ʻa e fakafiemālié kapau kuo nau fakatomala pea fakatonutonu honau ngaahi ʻalunga halá. Ko ia ai, “ko e tamaioeiki agatonu mo boto” kuó ne fokotuʻutuʻu ha tokonaki mohu meesi ke tokoniʻi kinautolu. Tuʻo taha ʻi he taʻu ʻoku ʻaʻahi atu nai ai ha ongo mātuʻa ʻe toko ua ki he faʻahinga ʻe niʻihi naʻe tuʻusí. Ko e faʻahinga nai ko ʻení ʻoku ʻikai te nau kei fakahaaʻi ha fakakaukau angatuʻu pe kei kau ʻi ha angahala mamafa pea ʻoku nau fiemaʻu nai ha tokoni ke fou ʻi he ngaahi lākanga ʻoku fiemaʻu ki hono toe fakafoki maí.​—Mātiu 24:​45, PM; ʻIsikeli 34:16.

Ko e Mamahi ʻa Paula ʻi ʻĒsiá

13, 14. (a) Naʻe anga-fēfē hono fakamatalaʻi ʻe Paula ʻa e taimi ʻo e mamahi kakaha naʻá ne aʻusia ʻi ʻĒsiá? (e) Ko e hā ʻa e meʻa naʻe hoko naʻe ʻi he fakakaukau nai ʻa Paulá?

¹³ Ko e faʻahinga faingataʻaʻia ko ia naʻe aʻusia ʻe he fakatahaʻanga ʻi Kolinitoó ʻi he aʻu mai ki he tuʻunga ko ʻení ʻoku ʻikai lava ke fakafehoanaki ia mo e ngaahi mamahi lahi naʻe pau ke kātekina ʻe Paulá. Ko ia ai, naʻe lava ke ne fakamanatuʻi kiate kinautolu: “ʻOku ʻikai te mau loto ke mou taʻeʻilo, kainga, ki he tuʻutamaki naʻe hoko kiate kimautolu ʻi Esia; heʻemau matuʻaki mafasia ai, ʻo ʻikai mei lava ke tali, ko ia naʻe mole ʻaupito ʻemau ʻamanaki ki he moʻui. ʻIo, naʻa mau ongona kuo tonu ʻakinautolu ki he mate: koeʻuhi ke ʻoua naʻa mau falala kiate kimautolu, ka ki he ʻOtua ʻa ia ʻoku ne fokotuʻu ʻa e pekia. Pea ko ia ia naʻa ne hamusi kimautolu mei he fuʻu mateʻanga ko ia naʻe pehe fau, pea te ne hamusi: ʻio, ʻoku mau falala kiate ia te ne fai ai pe ʻene hamusi.”​—2 Kolinitō 1:​8-10.

¹⁴ ʻOku tui ʻa e kau mataotao ʻe niʻihi ʻi he Tohitapú naʻe lave ʻa Paulá ki he maveuveu ʻi ʻEfesoó, ʻa ia naʻe mei lava ke mole ai ʻa e moʻui ʻa Paulá pea pehē foki ki he moʻui ʻa e ongo Masitōnia naʻa nau kaungā fonongá, ʻa Keio mo ʻAlisitako. Naʻe ʻave fakamālohiʻi ʻa e ongo Kalisitiane ko ʻení ki ha malaʻe vaʻinga ʻa ia naʻe fonu ʻi ha fuʻu kakai naʻa nau “kalanga ʻo pehe, Langilangi ā ka ko Taiana, ko e ʻotua ʻotautolu Efeso!” Faifai atu pē, naʻe lavameʻa ha ʻōfisa ʻi he koló ʻi hono ʻai ke fakalongolongo ʻa e fuʻu kakaí. Kuo pau pē naʻe fakalotomafasiaʻi lahi ʻa Paula ʻi he fakamanamana ko ʻeni ki he moʻui ʻa Keio mo ʻAlisitakó. Ko hono moʻoní, naʻá ne loto ke hū ki loto ʻo fefakaʻuhingaʻaki mo e fuʻu kakai loto-māfana tōtuʻá, ka naʻe taʻofi ia mei hano fakamoleki ʻene moʻuí ʻi he founga ko ʻení.​—Ngāue 19:​26-​41.

15. Ko e hā ʻa e tuʻunga fuʻu tōtuʻa ʻoku fakamatalaʻi nai ʻi he 1 Kolinitō 15:32?

¹⁵ Kae kehe, naʻe fakamatala nai ʻe Paula ia ha tuʻunga ʻo fuʻu tōtuʻa ʻi he meʻa ko ia naʻe hoko ki muʻá. ʻI heʻene ʻuluaki tohi ki he kau Kolinitoó, naʻe ʻeke ʻe Paula: “Kapau naʻe fakaetangata pe ʻeku tau mo e manu fekai ʻi Efeso, ko e ha hono ʻaonga kiate au?” (1 Kolinitō 15:32) ʻOku ʻuhinga nai ʻení naʻe fakamanaʻi ʻa e moʻui ʻa Paulá ʻo ʻikai mei he kau tangata anga-fakamanú pē, ka mei he fanga manu fekai moʻoni ʻi he malaʻe vaʻinga ʻi ʻEfesoó. Naʻe faʻa tauteaʻi ʻa e kau faihiá ʻi he taimi ʻe niʻihi ʻaki hono fakamālohiʻi ke tau mo e fanga manu fekaí lolotonga iá ʻoku mamata ki ai ʻa e fuʻu kakai loto-fakapoó. Kapau naʻe ʻuhinga ʻa Paulá naʻá ne ʻosi fehangahangai mo e fanga manu fekai moʻoni, kuo pau pē naʻe fakahaofi fakaemana ia ʻi he mōmeniti fakaʻosí mei ha mate fakamamahi, hangē pē ko hono fakahaofi ʻa Tāniela mei he ngutu ʻo e fanga laione moʻoní.​—Tāniela 6:​22.

Ngaahi Faʻifaʻitakiʻanga ʻi Onopooni

16. (a) Ko e hā ʻoku lava ai ke mahino ki he tokolahi ʻo e Kau Fakamoʻoni ʻa Sihová ʻo fakaʻilongaʻi ʻaki ʻa e ngaahi mamahi naʻe faingataʻaʻia ai ʻa Paulá? (e) Ko e hā ʻoku lava ke tau fakapapauʻi ʻo fekauʻaki mo kinautolu ko ia naʻe mate koeʻuhi ko ʻenau tuí? (f) Ko e hā ʻa e ola lelei kuo hoko ʻi he hokosia ʻe he kau Kalisitiane ʻa e tuʻunga ʻo e mālō pe hao mei he maté?

¹⁶ ʻOku lava ke mahino ki he kau Kalisitiane tokolahi ʻi he ʻaho ní ʻa e ngaahi mamahi naʻe faingataʻaʻia ai ʻa Paulá. (2 Kolinitō 11:​23-​27) ʻI he ʻahó ni foki, ko e kau Kalisitiané kuo ‘taomia lahi hake aubito kinautolu i he enau malohi,’ pea kuo fehangahangai ʻa e tokolahi mo e ngaahi tuʻunga ʻa ia ‘nae ikai ai te nau amanaki ki he mouí.’ (2 Kolinitō 1:​8, PM) Kuo mate ʻa e niʻihi ʻi he nima ʻo e kau tāmate tokolahi mo e kau fakatanga fakamamahi. ʻOku lava ke tau fakapapauʻi ko e ivi fakafiemālie ʻo e ʻOtuá naʻá ne ʻai kinautolu ʻo malava ke nau kātaki pea naʻa nau mate mo e ngaahi loto mo e ʻatamai kuo fakamaʻu fefeka ʻi he fakahoko ʻo ʻenau ʻamanakí, pe ko ha ʻamanaki fakahēvani pe ko ha ʻamanaki ki he māmaní. (1 Kolinitō 10:13; Filipai 4:​13; Fakahā 2:​10) ʻI he ngaahi tuʻunga kehe, kuo fokotuʻutuʻu ai ʻe Sihova ʻa e ngaahi meʻá, pea kuo hao ai mei he maté ʻa hotau ngaahi tokoua. ʻOku ʻikai ha veiveiua ko e faʻahinga ko ia kuo nau fou he fakahaofi peheé kuo nau fakatupulekina ai ʻo fakautuutu ʻa e falala “ki he ʻOtua ʻa ia ʻoku ne fokotuʻu ʻa e pekia.” (2 Kolinitō 1:9) Hili iá, ʻoku lava ke nau leaʻaki fakataha mo e tuipau lahi ange ʻi heʻenau vahevahe atu ʻa e pōpoaki fakafiemālie ʻa e ʻOtuá ki he niʻihi kehé.​—Mātiu 24:14.

17-19. Ko e hā ʻa e ngaahi meʻa naʻe hokosia ʻoku hā ai kuo kau ʻa hotau ngaahi tokoua ʻi Luanitaá ʻi hono vahevahe atu ʻa e fakafiemālie ʻa e ʻOtuá?

¹⁷ Ki mui mai naʻe fou ai siʻotau ngaahi tokoua ʻi Luanitaá ʻi hono hokosia ʻa e meʻa meimei tatau mo ia naʻe ʻi ai ʻa Paula mo hono takangá. Naʻe mole ʻa e moʻui ʻa e tokolahi, ka naʻe ʻikai lava ʻe he ngaahi feinga ʻa Sētané ke fakaʻauha ʻenau tuí. ʻI hono kehé, naʻe aʻusia ʻe hotau ngaahi tokoua ʻi he fonua ko ʻení ʻa e fakafiemālie ʻa e ʻOtuá ʻi he ngaahi founga fakafoʻituitui lahi. Lolotonga ʻa e tāmate fakamatakali ʻa e kau Tutisī mo e kau Hutu ʻoku nofo ʻi Luanitaá, naʻe ʻi ai ʻa e kau Hutu naʻa nau loto ke tuku atu ke mole ʻenau moʻuí ke maluʻi ʻa e kau Tutisií mo e kau Tutisī naʻa nau maluʻi ʻa e kau Hutú. Naʻe tāmateʻi ʻe he kau poupou fuʻu tōtuʻá ʻa e niʻihi ʻi heʻenau maluʻi honau kaungā-tuí. Ko e fakatātaá, ko ha Fakamoʻoni Hutu ko Gahizi naʻe tāmateʻi ia hili ʻene fūfuuʻi ha tuofefine Tutisī ko Chantal. Ko e husepāniti Tutisī ʻo Chantal, ko Jean, naʻe fūfuuʻi ia ʻi ha feituʻu kehe ʻe ha tuofefine Hutu ko Charlotte. Naʻe feʻunga mo e ʻaho ʻe 40 ʻa e nofo toitoi ʻa Jean mo e tokoua Tutisī ʻe taha ʻi ha fuʻu siminī lahi, ʻo toki hū pē ki tuʻa ʻi he taimi nounou lolotonga ʻa e poʻulí. ʻI he taimi kotoa ko ʻení, naʻe tokonaki ʻe Charlotte kiate kinaua ʻa e meʻakai mo e maluʻanga, neongo ʻene nofo ofi ki ha kemi fakakautau ʻo e kau Hutú. ʻOku houngaʻia lahi ʻa Jean mo Chantal ʻi hona kaungā-lotu Hutú ʻi he ‘fakalalango honau uʻá’ koeʻuhi ko kinaua, hangē ko ia naʻe fai ʻe Pīsila mo ʻAkuila ki he ʻaposetolo ko Paulá.​—Loma 16:​3, 4.

¹⁸ Ko e Fakamoʻoni Hutu ʻe taha ko Rwakabubu, naʻe fakahīkihikiʻi ia ʻe he nusipepa ko e Intaremara ʻi heʻene maluʻi hono kaunga-tui Tutisī.a Naʻe pehē ai: “ʻOku toe ʻi ai foki mo Rwakabubu, ko e taha ʻi he Kau Fakamoʻoni ʻa Sihová, ʻa ia naʻá ne hokohoko fūfuuʻi ʻa e kakai kehekehe ʻi he lotolotonga ʻo hono ngaahi tokouá (ko e anga ia ʻo hono ui ʻe he kaungā-tuí kinautolú). Naʻá ne faʻa fakamoleki ʻa e ʻaho kakato ʻi he fetuku ʻa e meʻakai mo e vai inu kiate kinautolu neongo ʻokú ne mahaki hela. Ka naʻe ʻai ia ʻe he ʻOtuá ʻo taha kehe atu ʻa ʻene mālohí.”

¹⁹ Fakakaukau atu foki, ki ha ongo meʻa Hutu naʻá na mahuʻingaʻia, ko Nicodeme mo Athanasie. Ki muʻa ke kamata ʻa e fetāmateʻaki fakamatakalí, naʻe ako Tohitapu ʻa e ongo meʻa mali ko ʻení mo ha tokotaha Fakamoʻoni Tutisī ko Alphonse. Neongo naʻe fakatuʻutāmaki ki heʻena moʻuí, naʻá na fufū ʻa Alphonse ʻi hona ʻapí. Ki mui ai, naʻá na ʻiloʻi ʻoku ʻikai ko ha feituʻu malu hona falé koeʻuhi he naʻe ʻilo ʻa hona kaungāʻapi Hutú ʻo kau ki hona kaumeʻa Tutisī. Ko ia ai, naʻe fufū ʻe Nicodeme mo Athanasie ʻa Alphonse ʻi ha luo ʻi hona ʻapí. Ko ha fengaʻunuʻaki lelei ʻeni koeʻuhi he naʻe kamata ke haʻu ʻa hona kaungāʻapí ʻo kumi ʻa Alphonse ʻi he meimei ʻaho kotoa pē. Lolotonga ʻene tokoto ʻi he luo ko ʻení feʻunga mo e ʻaho ʻe 28, naʻe fakalaulauloto ai ʻa Alphonse ki he ngaahi fakamatala ʻa e Tohitapú hangē ko e taha fekauʻaki mo Lēhapí, ʻa ia naʻá ne fufū ʻa e ongo tangata ʻIsileli ʻe toko ua ʻi he ʻato ʻo hono falé ʻi Sielikó. (Siōsiua 6:​17) ʻI he ʻahó ni ʻoku hokohoko atu ʻa e ngāue ʻa Alphonse ʻi Luanitaá ʻi he tuʻunga ko ha tokotaha malanga ʻo e ongoongo leleí, mo e houngaʻia ʻi he tuku ʻe heʻene ongo ako Tohitapu Hutú ke ʻi ha tuʻunga fakatuʻutāmaki ʻa ʻena moʻuí koeʻuhi ko ia. Pea ʻoku fēfē ʻa Nicodeme mo Athanasie? ʻOkú na lolotonga hoko ko e ongo Fakamoʻoni ʻa Sihova ʻosi papitaiso pea ʻokú na fai ʻa e ngaahi ako Tohitapu lahi hake he 20 mo e faʻahinga mahuʻingaʻia.

20. ʻI he founga fē naʻe fakafiemālieʻi ai ʻe Sihova hotau ngaahi tokoua ʻi Luanitaá, ka ko e hā ʻa e fiemaʻu hokohoko ʻa e tokolahi ʻo kinautolú?

²⁰ ʻI he taimi naʻe kamata ai ʻa e fetāmateʻaki fakamatakali ʻi Luanitaá, naʻe ʻi ai ʻa e kau fanongonongo ʻo e ongoongo leleí ʻe toko 2,500 ʻi he fonuá. Neongo naʻe mole ʻa e ngaahi moʻui ʻe laui teau pe naʻe fakamālohiʻi kinautolu ke hola mei he fonuá, ko e tokolahi ʻo e Kau Fakamoʻoní kuo tupulaki ia ʻo laka hake he toko 3,000. Ko e fakamoʻoni ia naʻe fakafiemālieʻi moʻoni ʻe he ʻOtuá hotau ngaahi tokouá. Kae fēfē ʻa e kau paea mo e kau uitou tokolahi ʻi he lotolotonga ʻo e Kau Fakamoʻoni ʻa Sihová? Ko e faʻahingá ni, ʻoku fakanatula pē ʻenau kei faingataʻaʻia ʻi he mamahí pea ʻoku fiemaʻu kiate kinautolu ʻa e fakafiemālie hokohoko. (Sēmisi 1:​27) ʻE toki holoholoʻi fakaʻaufuli honau loʻimatá ʻi he taimi pē ʻe toki fai ai ʻa e toetuʻú ʻi he maama foʻou ʻa e ʻOtuá. Ka neongo ia, koeʻuhi ko e ngaahi tokoni ʻa honau ngaahi tokouá pea koeʻuhi ko e kau lotu kinautolu ʻa e “Otua oe fiemalie kotoabe,” ʻoku nau lava ai ʻo fekuki mo e moʻuí.

21. (a) Ko e toe feituʻu fē kuo fiemaʻu lahi ai ʻe hotau ngaahi tokouá ʻa e fakafiemālie ʻa e ʻOtuá, pea ko e hā ʻa e founga ʻe taha ʻa ia ʻoku lava ai ke tau tokoni kotoá? (e) Ko fē ʻa e taimi ʻe toki fakatōliʻa fakaʻaufuli ai ʻetau fiemaʻu ʻa e fakafiemālié?

²¹ ʻI he ngaahi feituʻu lahi kehe, hangē ko ʻElitelia, ko Singapoa, pea mo ʻIukosilāvia ki muʻá, ʻoku hokohoko atu ai hotau ngaahi tokouá ʻa e tauhi anga-tonu kia Sihová neongo ʻa e mamahí. ʻOfa ke tau tokoni ki he ngaahi tokoua peheé ʻi heʻetau fai maʻu pē ʻa e ngaahi lotu koeʻuhi ke nau maʻu ai ʻa e fakafiemālié. (2 Kolinitō 1:​11) Pea ʻofa ke tau kātaki ʻi he anga-tonu kae ʻoua kuo aʻu ki he taimi ʻa ia ʻe hanga ai ʻe he ʻOtuá fakafou ʻia Sīsū Kalaisi ʻo “holoholo ʻa e loʻimata kotoa pē mei [hotau] mata” ʻi he ʻuhinga kakato tahá. Te tau toki aʻusia leva ai ʻi he tuʻunga kakato tahá ʻa e fakafiemālie ʻe ʻomai ʻe Sihova ʻi heʻene maama foʻou māʻoniʻoní.​—Fakahā 7:​17; 21:4; 2 Pita 3:​13.

[Fakamatala ʻi lalo]

ʻOkú Ke ʻIloʻi?

◻ Ko e hā ʻoku ui ai ʻa Sihova ko e “Otua oe fiemalie kotoabe”?

◻ ʻOku totonu ke fēfē ʻetau vakai ki he ngaahi mamahí?

◻ ʻOku lava ke tau vahevahe atu kia hai ʻa e fakafiemālié?

◻ ʻE toki fakatōliʻa fakaʻaufuli fēfē ʻetau fiemaʻu ʻa e fakafiemālié?