Hanga kia Sihova ki ha Fakafiemālie

“Ke tuku kiate kimoutolu e he Otua oe faa kataki mo e fiemalie, ke mou felototatau aki be kiate kimoutolu o tatau mo Kalaisi Jisu.”​—LOMA 15:​5, PM.

 1. Ko e hā ʻoku ʻomai ai ʻe he ʻaho taki taha ʻa e fiemaʻu lahi ange ki ha fakafiemālié?

ʻOKU ʻomai ʻe he ʻaho taki taha ʻoku hoko maí fakataha mo ia ha tupulekina ʻi he fiemaʻu ha fakafiemālié. Hangē ko ia naʻe fakamatalaʻi ʻe ha tokotaha-tohi Tohitapu ki muʻa ʻi he taʻu ʻe 1,900 kuohilí, “ʻoku fai ʻo aʻu ki he taimi ni ʻa e fetoʻeaki mo langā ʻa Natula katoa.” (Loma 8:​22) Kuo toe fakautuutu ange ʻi hotau taimí ʻa e “fetoʻeaki” mo e “langā.” Kuo mamahi ʻa e faʻahinga ʻo e tangatá ʻi he hokohoko ʻa e faingataʻá ʻi he tuʻunga ʻo e ngaahi taú, faihiá, mo e ngaahi fakatamaki fakaenatula ʻa ia ʻoku nau faʻa fekauʻaki mo hono ngāuehalaʻaki ʻe he tangatá ʻa e māmaní, talu mei he Tau I ʻa Māmaní.​—Fakahā 11:18.

 2. (a) Ko hai ʻoku taau taha ke tukuakiʻi ki he ngaahi faingataʻaʻia lolotonga ʻa e faʻahinga ʻo e tangatá? (e) Ko e hā ʻa e moʻoniʻi meʻa ʻokú ne ʻomai kiate kitautolu ha makatuʻunga ki he fakafiemālié?

² Ko e hā kuo lahi pehē ai ʻa e mamahí ʻi hotau taimí? ʻOku tali ia ʻe he Tohitapú, ʻi heʻene fakamatalaʻi ʻa hono lī hifo ʻa Sētane mei he ngaahi langí hili hono fanauʻi ʻo e Puleʻangá ʻi he 1914: “Ka ʻoiaue ʻa e fonua mo e tahi! He kuo hoko hifo ʻa e Tevolo kiate kimoua, ʻoku ne ʻita lahi, ko ʻene ʻilo, ʻoku toesiʻi pe hono taimi.” (Fakahā 12:12) Ko e hā mahino ʻa hono fakahoko ʻo e kikite ko iá ʻoku ʻuhinga iá kuo tau mei aʻu ki he ngataʻanga ʻo e pule fulikivanu ʻa Sētané. He fakafiemālie ē ke ʻilo ko e moʻui ko ia he māmaní ʻe vavé ni ke toe fakafoki ki he tuʻunga melino ko ia naʻe ʻi ai ki muʻa ʻi hono taki ʻe Sētane ʻetau ʻuluaki ongo mātuʻá ki he angatuʻú!

 3. Ko fē ʻa e taimi naʻe ʻikai fiemaʻu ai ha fakafiemālie ʻe he faʻahinga ʻo e tangatá?

³ ʻI he kamataʻangá, naʻe tokonaki ʻe he Tokotaha-Fakatupu ʻo e tangatá ha paʻake fakaʻofoʻofa ko ha ʻapi maʻá e ʻuluaki ongo meʻa ʻi he faʻahinga ʻo e tangatá. Naʻe tuʻu ia ʻi ha feituʻu naʻe ui ko ʻĪteni, ko hono ʻuhingá ko e “Mālieʻia” pe “Fiefia.” (Sēnesi 2:​8, NW, fakamatala ʻi laló) Pehē foki, naʻe maʻu ʻe ʻĀtama mo ʻIvi ʻa e moʻui lelei haohaoa, fakataha mo e ʻamanaki ko e ʻikai ke toe mate. Fakakaukau atu pē ki he ngaahi tafaʻaki lahi ʻa ia naʻá na mei lava ai ke fakatupulekina ʻena ngaahi malavá​—ngoué, ʻaatí, tufungá, mūsiká. Fakakaukau atu foki, ki he ngaahi ngāue fakaefakatupu kotoa naʻe mei lava ke na ako ʻi heʻena fakahoko hona ngafa ke pule ki he māmaní pea ngaohi ia ko ha palataisí. (Sēnesi 1:​28) Ko e moʻoni, naʻe mei fakafonu ʻa e moʻui ʻa ʻĀtama mo ʻIví, ʻikai ʻaki ʻa e fetoʻeaki mo e langa, ka ko e fiefia mo e mālieʻia. ʻOku hā mahino, naʻe ʻikai te na mei toe fiemaʻu ha fakafiemālie.

4, 5. (a) Ko e hā naʻe ʻikai lava ai ʻa ʻĀtama mo ʻIvi ʻi he ʻahiʻahi ʻo e talangofuá? (e) Naʻe anga-fēfē ʻa e hoko ʻo fiemaʻu ʻe he faʻahinga ʻo e tangatá ʻa e fakafiemālié?

⁴ Kae kehe, ko e meʻa naʻe fiemaʻu ia kia ʻĀtama mo ʻIví, ke fakatupulekina ha ʻofa lahi mo e houngaʻia ʻi heʻena Tamai fakahēvani anga-ʻofá. Ko e faʻahinga ʻofa peheé naʻá ne mei ueʻi kinaua ke na talangofua ki he ʻOtuá ʻi he ngaahi tuʻunga kotoa pē. (Fakafehoanaki mo Sione 14:31.) ʻOku fakamamahí, ko e ʻikai lava ke fakatou talangofua ʻetau ʻuluaki ongo mātuʻá ki hona Hau totonú, ʻa Sihova. ʻI hono kehé, naʻá na fakaʻatā kinaua ke na hoko ki he malumalu ʻo e pule ʻa ha ʻāngelo hinga, ko Sētane ko e Tēvolo. Ko Sētané naʻá ne fakataueleʻi ʻa ʻIvi ke faiangahala pea kai ʻi he fuaʻiʻakau naʻe tapuí. Naʻe toki faiangahala leva ʻa ʻĀtama ʻi heʻene kai mo ia foki mei he fua ʻo e ʻakau ʻa ia naʻe hā mahino ʻa e fakatokanga fekauʻaki mo ia ʻa e ʻOtuá: “He ko e ʻaho te ke kai mei ai kuo pau te ke mate.”​—Sēnesi 2:​17.

⁵ ʻI he foungá ni, naʻe kamata ke mate ʻa e ongo meʻa angahalaʻiá. ʻI hono ʻoatu ʻa e tautea maté, naʻe toe pehē ai ʻe he ʻOtuá kia ʻĀtama: “Kuo malaʻia ʻa e kelekele koeʻuhi ko koe; te ke kai mei ai ʻi he mamahi ʻi he ʻaho kotoa pe ʻo hoʻo moʻui; pea ko e ʻakau talatala mo e talatalaʻamoa te ne fakatupu maʻau; pea te ke kai ʻa e mohuku ʻo e ngoue.” (Sēnesi 3:​17, 18) Ko ia naʻe mole ai meia ʻĀtama mo ʻIvi ʻa e ʻamanaki ko hono ʻai ʻa e māmani teʻeki ngoueʻí ke hoko ko ha palataisi. ʻI hona tuli mei ʻĪtení, naʻe pau ke tuku taha hona iví ʻi he ngāue mālohi ki ha meʻakai mei he kelekele kuo ʻosi fakamalaʻiaʻí. Ko hona ngaahi hakó, ʻi heʻenau maʻu tukufakaholo ʻa e tuʻunga angahala, fakamate ko ʻení, ʻoku nau hoko ʻo fiemaʻu lahi ai ha fakafiemālie.​—Loma 5:​12.

Naʻe Fakahoko ha Talaʻofa Fakafiemālie

 6. (a) Ko e hā ʻa e talaʻofa fakafiemālie naʻe fai ʻe he ʻOtuá hili ʻa e tō ʻa e faʻahinga ʻo e tangatá ki he angahalá? (e) Ko e hā ʻa e kikite naʻe leaʻaki ʻe Lēmeki ʻo fekauʻaki mo e fakafiemālié?

⁶ ʻI hono tauteaʻi ʻa e tokotaha fakalanga ʻo e angatuʻu ʻa e tangatá, naʻe fakamoʻoniʻi ʻa e hoko ʻa Sihova ‘ko e Otua oe fiemalié.’ (Loma 15:​5, PM) Naʻá ne fai pehē ʻaki ʻene talaʻofa ke fekauʻi mai ha “hako” ʻa ia ʻe faifai atu pē peá ne fakatauʻatāinaʻi ʻa e fānau ʻa ʻĀtamá mei he ngaahi nunuʻa fakatuʻutāmaki ʻo e angatuʻu ʻa ʻĀtamá. (Sēnesi 3:​15) ʻI he faai mai ʻa e taimí, naʻe toe tokonaki mai ʻe he ʻOtuá ʻa e ngaahi tapua mai ki muʻa ʻo e fakatauʻatāinaʻi ko ʻení. Ko e fakatātaá, naʻá ne fakamānavaʻi ʻa Lēmeki, ko ha hako mamaʻo atu ʻo ʻĀtama fakafou ʻi hono foha ko Setí, ke kikite ʻo fekauʻaki mo e meʻa ʻe fai ʻe he foha ʻo Lēmekí: “Ko eni ia te ne fakafiemalie kitautolu mei heʻetau ngaue mo e mamahi ʻa hotau nima ʻa ia ʻoku tupu mei he kelekele ne fakamalaʻia ʻe Sihova.” (Sēnesi 5:​29) ʻI he fehoanaki mo e talaʻofá ni, naʻe ui ʻa e tamasiʻí ko Noa, ʻa ia naʻe mahino ko hono ʻuhingá ko e “Mālōlō” pe ko e “Fakafiemālie.”

7, 8. (a) Ko e hā ʻa e tuʻunga naʻe iku ai ʻo ongoʻi fakatomala ʻa Sihova fekauʻaki mo hono fakatupu ʻo e tangatá, pea ʻi he tali ki aí ko e hā naʻá Ne fakataumuʻa ke faí? (e) Naʻe anga-fēfē ʻa e moʻui ʻa Noa ʻo fakatatau ki he ʻuhinga ʻo hono hingoá?

⁷ Lolotonga iá, naʻe maʻu ʻe Sētane ʻene kau muimui mei he lotolotonga ʻo e niʻihi ʻi he kau ʻāngelo fakahēvaní. Ko e faʻahingá ni naʻa nau liliu kakano ʻo hoko ko e faʻahinga ʻo e tangatá pea nau ʻave ʻa e ngaahi hako fefine fakaʻofoʻofa ʻo ʻĀtamá ke hoko ko honau ngaahi uaifi. Ko e faʻahinga fehokotaki taʻefakaenatula peheé naʻá ne fakameleʻi lahi ange ai ʻa e sōsaieti ʻo e faʻahinga ʻo e tangatá pea fakatupu ha matakali taʻefakaʻotua ko e kau Nefilimi, “kakai lalahi,” ʻa ia naʻa nau fakafonuʻaki ʻa e fakamālohí ʻa e māmaní. (Sēnesi 6:​1, 2, 4, 11; Siutasi 6) “Pea naʻe ʻafioʻi ʻe Sihova kuo fakautuutu ʻa e kovi ʻa e faʻahinga ʻo e tangata ʻi mamani . . . Pea naʻe fakatomala ʻa Sihova ʻi heʻene ngaohi ʻa e tangata ʻi mamani, ʻo ne fakamamahi ʻi hono finangalo.”​—Sēnesi 6:​5, 6.

⁸ Naʻe fakataumuʻa ʻe Sihova ke fakaʻauha ʻa e māmani fulikivanu ko iá fakafou ʻi ha lōmaki ʻi māmani lahi, ka ki muʻa aí naʻá ne ʻai ke langa ʻe Noa ha ʻaʻake ke maluʻi ai ʻa e moʻuí. Ko ia naʻe fakahaofi ai ʻa e matakali ʻo e faʻahinga ʻo e tangatá, mo e faʻahinga kehekehe ʻo e fanga manú. He nonga ē kuo pau naʻe ongoʻi ʻe Noa mo hono fāmilí hili ʻa e Lōmakí ʻi heʻenau hū ki tuʻa mei he ʻaʻaké ki ha māmani kuo maʻa! He fakafiemālie ē ke ʻilo kuo toʻo ʻa e fakamalaʻiaʻi ʻo e kelekelé, ʻo ne ʻai ʻo faingofua lahi ange ai ʻa e ngāue fakaengoué! Ko e moʻoni, naʻe fakamoʻoniʻi ʻa e moʻoni ʻo e kikite ʻa Lēmekí, pea naʻe moʻui ʻa Noa ʻo fakatatau ki he ʻuhinga ʻo hono hingoá. (Sēnesi 8:​21) ʻI hono tuʻunga ko ha sevāniti anga-tonu ʻa e ʻOtuá, naʻe meʻangāueʻaki ʻa Noa ki hono ʻomai ʻa e tuʻunga ʻo e “fakafiemālie” ki he faʻahinga ʻo e tangatá. Kae kehe, naʻe ʻikai ke ngata ʻi he Lōmakí ʻa e tākiekina fulikivanu ʻa Sētane mo ʻene kau ʻāngelo tēmenioó, pea ʻoku hokohoko atu ʻa e fetoʻeaki ʻa e faʻahinga ʻo e tangatá ʻi he mamafa ʻo e angahalá, mahamahakí, mo e maté.

Ko e Tokotaha Lahi Ange ʻia Noa

 9. Kuo anga-fēfē hono fakamoʻoniʻi ʻe Sīsū Kalaisi ʻene hoko ko ha tokotaha tokoni mo ha tokotaha fakafiemālie ki he faʻahinga ʻo e tangata fakatomalá?

⁹ Faifai atu pē, ʻi he ngataʻanga ʻo e meimei taʻu ʻe 4,000 ʻo e hisitōlia ʻo e tangatá, naʻe aʻu mai ʻa e Hako naʻe talaʻofá. ʻI hono ueʻi ʻe he ʻofa lahi ki he faʻahinga ʻo e tangatá, naʻe fekauʻi mai ʻe he ʻOtua ko Sihová ʻa hono ʻAlo tofu-pē-taha-ne-fakatupú ki he māmaní ke pekia ko ha huhuʻi maʻá e faʻahinga ʻo e tangata angahalaʻiá. (Sione 3:​16) ʻOku ʻomai ai ʻe Sīsū Kalaisi ʻa e nonga lahi ki he kau angahala ʻosi fakatomalá ʻa ia ʻoku nau ngāueʻi ʻa e tui ki heʻene pekia fakaefeilaulaú. Ko kinautolu kotoa kuo fakatapui ʻenau moʻuí kia Sihova pea hoko ko e kau ākonga ʻosi papitaiso ʻa hono ʻAló ʻoku nau aʻusia ʻa e fakaongoʻimālohi mo e fakafiemālie tuʻuloa. (Mātiu 11:​28-​30; 16:24) Neongo ʻa ʻenau taʻehaohaoá, ʻoku nau maʻu ʻa e fiefia lahi ʻi he tauhi kia Sihova ʻaki ha konisēnisi maʻa. He fakafiemālie ē kiate kinautolu ʻi he ʻilo kapau te nau hokohoko atu ʻenau ngāueʻi ʻa e tui kia Sīsuú, ʻe fakapaleʻiʻaki kinautolu ʻa e moʻui taʻengatá! (Sione 3:​36; Hepelū 5:9) Kapau ʻoku nau fai ha angahala mamafa koeʻuhi ko honau vaivaiʻangá, ʻoku nau maʻu leva ʻa e ʻEiki ko Sīsū Kalaisi kuo toetuʻú ko honau tokotaha tokoni, pe tokotaha fakafiemālie. (1 Sione 2:​1, 2) ʻI hono vete ʻo e angahala peheé pea ʻi he fou ʻi he ngaahi sitepu Fakatohitapu ke fakaʻehiʻehi mei he hoko ʻo fai angahalá, ʻoku nau maʻu ai ʻa e nonga, ʻi he ʻilo ko e ‘ʻOtua ko ʻene anga fakamoʻoni talaʻofa, mo ʻene anga faitotonu, ʻoku na kau ke ne fakamolemole ʻenau ngaahi angahalá.’​—1 Sione 1:9; 3:6; Palōvepi 28:13.

10. Ko e hā ʻoku tau ako mei he ngaahi mana naʻe fakahoko ʻe Sīsū ʻi heʻene ʻi māmaní?

¹⁰ ʻI he lolotonga ʻo ʻene ʻi he māmaní, naʻe toe ʻomai ai ʻe Sīsū ʻa e fakaongoʻimālohi ʻi heʻene fakatauʻatāinaʻi ʻa e faʻahinga naʻe uluisino ai ʻa e tēmenioó, ʻi hono fakamoʻui ʻa e faʻahinga alangamahaki kotoa pē, pea ʻi hono fokotuʻu mai ke toe moʻui ʻa e ngaahi ʻofaʻanga naʻe maté. Moʻoni ia, ko e ngaahi mana peheé naʻa nau ʻaonga fakataimi pē, koeʻuhi he ko e faʻahinga ko ia naʻe tāpuakiʻí naʻe hili iá naʻa nau tupu ʻo motuʻa pea mate. Ka neongo ia, naʻe tuhu ai ʻa Sīsū ia ki he ngaahi tāpuaki tuʻumaʻu ʻi he kahaʻú ʻa ia te ne huaʻi mai ki he faʻahinga ʻo e tangatá kotoa. ʻI heʻene hoko he taimí ni ko ha Tuʻi māfimafiʻia fakahēvaní, ʻe vavé ni ke ne fai ʻa e meʻa lahi mamaʻo ange ia ʻi hono kapusi pē ʻo e kau tēmenioó. Te ne lolofonuaʻi kinautolu fakataha mo honau takí, ʻa Sētane, ki ha tuʻunga ʻo e ʻikai ke toe ngāue. ʻE toki fokotuʻu leva ʻa e Pule Taʻu Taha Afe lāngilangiʻia ʻa Kalaisí.​—Luke 8:​30, 31; Fakahā 20:​1, 2, 6.

11. Ko e hā naʻe ui ai ʻe Sīsū ʻa ia tonu ko e “ʻEiki ia ʻo e Sapate”?

¹¹ Naʻe pehē ʻe Sīsū ko e “ʻEiki ia ʻo e Sapate,” pea ko e lahi ʻo ʻene ngaahi fakamoʻuí naʻe fai ia ʻi he ʻaho Sāpate. (Mātiu 12:​8-​13; Luke 13:​14-​17; Sione 5:​15, 16; 9:​14) Ko e hā naʻe pehē ai ʻení? Sai, ko e Sāpaté ko e konga ia ʻo e Lao ʻa e ʻOtuá ki ʻIsilelí, pea ko ia naʻe ngāue ia ko ha “ʻata pe ʻo e ngaahi lelei ka hoko.” (Hepelū 10:1) Ko e ʻaho ngāue ʻe ono ʻi he uiké ʻoku fakamanatu mai ai kiate kitautolu ʻa e taʻu ʻe 6,000 ʻo e nofo pōpula ʻa e tangatá ʻi he kuohilí ki he pule fakafeʻātungia ʻa Sētané. Ko e ʻaho Sāpate ʻi he ngataʻanga ʻo e uiké ʻokú ne ʻomai ki he fakakaukaú ʻa e mālōlō fakafiemālie ʻe aʻusia ʻe he faʻahinga ʻo e tangatá he lolotonga ʻo e Pule Taʻu Taha Afe ʻa Noa Lahi Angé, ko Sīsū Kalaisi.​—Fakafehoanaki mo 2 Pita 3:8.

12. Ko e hā ʻa e ngaahi meʻa fakafiemālie ʻoku lava ke tau fakatuʻotuʻa atu ki aí?

¹² Ko ha fiefia ē ʻe ongoʻi ʻe he kau mēmipa ʻe ʻi he māmaní ʻa ia ʻe pule mai ki ai ʻa Kalaisí, ʻi he taimi ʻe iku atu ai ʻo nau ʻilo kuo nau hao fakaʻaufuli mei he tākiekina fulikivanu ʻa Sētané! ʻE hoko mai ʻa e fiemālie lahi ange ʻi heʻenau aʻusia ʻa honau fakamoʻui fakasinó, fakaeongó, mo e ngaahi mahaki fakaeʻatamaí. (ʻAisea 65:17) Hili iá, fakakaukau atu pē ki heʻenau loto-fiefiá ʻi heʻenau kamata talitali lelei ʻa e ngaahi ʻofaʻanga ʻe foki mai mei he maté! ʻI he ngaahi meʻá ni, ko e ʻOtuá “te ne holoholo ʻa e loʻimata kotoa pē mei honau mata.” (Fakahā 21:4) ʻI hono ngāueʻaki fakalakalaka ʻa e ngaahi ʻaonga ʻo e feilaulau huhuʻi ʻa Sīsuú, ʻe tupu ai ʻo aʻu ki he haohaoá ʻa e kau mēmipa talangofua ʻo e Puleʻanga ʻo e ʻOtuá, ʻo nau hoko ai ʻo tauʻatāina fakaʻaufuli mei he ngaahi nunuʻa kovi kotoa pē ʻo e angahala ʻa ʻĀtamá. (Fakahā 22:​1-5) ʻE toki veteange ʻa Sētane “ʻo fuoloa siʻi.” (Fakahā 20:​3, 7) Ko e faʻahinga kotoa ʻo e tangatá ʻa ē ʻoku nau poupou anga-tonu ki he tuʻunga-hau totonu ʻo Sihová ʻe fakapaleʻi ʻaki ʻa e moʻui taʻengatá. Fakaʻuta atu ki he fiefia mo e nonga taʻealafakamatalaʻi ʻi he hoko fakaʻaufuli ʻo “fakaʻataʻatā mei heʻenau popula ki he ʻauha”! Ko ia ai ʻe fiefia ʻa e faʻahinga ʻo e tangata talangofuá ʻi he “tauʻataina fakalangi ʻa e fanau ʻa e ʻOtua.”​—Loma 8:​21.

13. Ko e hā ʻoku fiemaʻu ai ʻe he kau Kalisitiane moʻoní kotoa ʻa e fakafiemālie ʻoku ʻomai ʻe he ʻOtuá?

¹³ ʻI he taimi ní, ʻoku hokohoko atu pē ʻetau moʻulaloa ki he fetoʻeaki mo e langa ʻoku hoko lahia ki he faʻahinga kotoa ʻoku moʻui ʻi he lotolotonga ʻo e fokotuʻutuʻu fulikivanu ko ʻeni ʻa Sētané. Ko e tupulekina ʻo e mahamahaki fakasinó mo e ngaahi maumau fakaeongó ʻokú ne uesia ʻa e faʻahinga kotoa ʻo e kakaí, ʻo kau ai ʻa e kau Kalisitiane anga-tonú. (Filipai 2:​25-​27; 1 Tesalonaika 5:​14) Tānaki atu ki ai, ʻi heʻetau hoko ko e kau Kalisitiané ʻoku tau faʻa mamahi ʻi he manuki taʻetotonu mo e fakatanga ʻoku fokotuʻutuʻu mai ʻe Sētane kiate kitautolu koeʻuhi ko e “fai ki he pule ʻa e ʻOtua ʻi he pule ʻa e tangata.” (Ngāue 5:​29) Ko ia ai, kapau ʻoku fiemaʻu ke tau kātaki ʻi hono fai ʻo e finangalo ʻo e ʻOtuá ke aʻu ki he ngataʻanga ʻo e māmani ʻo Sētané ʻoku tau fiemaʻu ʻa e fakafiemālie, tokoni, mo e mālohi ʻa ia ʻokú Ne ʻomaí.

Feituʻu ʻe Maʻu Ai ʻa e Fakafiemālié

14. (a) Ko e hā ʻa e palōmesi naʻe fai ʻe Sīsū ʻi he pō ki muʻa pea pekiá? (e) Ke tau maʻu ʻa e ʻaonga kakato mei he fakafiemālie ʻa e laumālie māʻoniʻoni ʻo e ʻOtuá, ko e hā ʻoku fiemaʻú?

¹⁴ ʻI he pō ki muʻa ke ne pekiá, naʻe ʻai ʻe Sīsū ʻo mahino ki heʻene kau ʻaposetolo anga-tonú ʻe vave ʻene tukuange kinautolu pea foki ki heʻene Tamaí. Naʻe fakahohaʻasi mo fakalotomamahiʻi ʻe he meʻá ni kinautolu. (Sione 13:​33, 36; 14:​27-​31) ʻI hono ʻiloʻi ʻenau fiemaʻu ha fakafiemālie hokohokó, naʻe palōmesi ai ʻa Sīsū: “Te u tala ki he Tamai, pea te ne foaki kiate kimoutolu ha Taukapo ʻe toko taha, koeʻuhi ke ne ʻiate kimoutolu ʻo taʻengata.” (Sione 14:16) Naʻe lave heni ʻa Sīsū ki he laumālie māʻoniʻoni ʻo e ʻOtuá, ʻa ia naʻe lilingi hifo ki heʻene kau ākongá ʻi he hili ʻa e ʻaho ʻe 50 mei heʻene toetuʻú.a ʻI he lotolotonga ʻo e ngaahi meʻa kehé, naʻe fakafiemālieʻi kinautolu ʻe he laumālie ʻo e ʻOtuá lolotonga honau ngaahi ʻahiʻahí pea ʻai ke nau mālohi ke hokohoko atu ʻa hono fai ʻo e finangalo ʻo e ʻOtuá. (Ngāue 4:​31) Kae kehe, ʻoku ʻikai totonu ke vakai ki he tokoni peheé ko ha meʻa pē ʻoku ʻotomētiki. Ke maʻu ha ʻaonga kakato mei ai, kuo pau ke hokohoko lotu ʻa e Kalisitiane taki taha ki he tokoni fakafiemālie ʻa ia ʻoku tokonaki ʻe he ʻOtuá ʻo fakafou mai ʻi hono laumālie māʻoniʻoní.​—Luke 11:13.

15. Ko e hā ʻa e ngaahi founga ʻe niʻihi ʻoku ʻomai ai ʻe Sihova kiate kitautolu ʻa e fakafiemālié?

¹⁵ Ko e founga ʻe taha ʻa ia ʻoku tokonaki mai ai ʻe he ʻOtuá ʻa e fakafiemālié ʻoku fakafou mai ʻi heʻene Folofolá, ko e Tohitapú. Naʻe tohi ʻe Paula: “ʻIlonga ha meʻa naʻe tohi muʻa naʻe tohi moʻotau akonekina; koeʻuhi ko e meʻa ʻi he fakakataki mo e poupou ʻoku fai ʻe he folofola ke tau maʻu ai ʻa e ʻamanaki lelei.” (Loma 15:4) ʻOku fakahā ʻi he meʻá ni ʻa e fiemaʻu maʻu pē kiate kitautolu ke ako pea ke fakalaulauloto ki he ngaahi meʻa ʻoku hiki ʻi he Tohitapú mo e ngaahi tohi ʻoku fakatuʻunga ʻi he Tohitapú. ʻOku toe fiemaʻu foki ke tau ʻi ai maʻu pē ʻi he ngaahi fakataha faka-Kalisitiané, ʻa ia ʻoku fevahevaheʻaki ai ʻa e ngaahi fakakaukau fakafiemālie mei he Folofola ʻa e ʻOtuá. Ko e taha ʻi he ngaahi taumuʻa tefito ʻo e ngaahi fakatahataha peheé ke fefakalototoʻaʻaki.​—Hepelū 10:25.

16. ʻOku totonu ke ueʻi kitautolu ʻe he ngaahi tokonaki fakafiemālie ʻa e ʻOtuá ke tau fai ʻa e hā?

¹⁶ Naʻe hoko atu ʻa e tohi ʻa Paula ki he kau Lomá ke fakahaaʻi ʻa e ngaahi ola lelei ʻoku tau maʻu mei hono ngāueʻaki ʻa e ngaahi tokonaki fakafiemālie ʻa e ʻOtuá. “Ke tuku kiate kimoutolu e he Otua oe faa kataki moe fiemalie,” naʻe tohi ʻe Paula, “ke mou felototatau aki be kiate kimoutolu o tatau mo Kalaisi Jisu: Koeuhi ke mou loto taha be, mo gutu taha be, i he fakamalo ki he Otua, io, koe Tamai a ho tau Eiki ko Jisu Kalaisi.” (Loma 15:​5, 6, PM) ʻIo, ʻi hono maʻu ʻa e ʻaonga kakato ʻo e ngaahi tokonaki fakafiemālie ʻa e ʻOtuá, te tau hoko lahi ange ai ʻo tatau mo hotau Taki loto-toʻá, ʻa Sīsū Kalaisi. ʻE ueʻi ʻe he meʻá ni kitautolu ke hanganaki ngāueʻaki hotau ngutú ke fakalāngilangiʻiʻaki hotau ʻOtuá ʻi heʻetau ngāue fakaefakamoʻoní, ʻi heʻetau ngaahi fakatahá, ʻi he fetalanoaʻaki tāutaha mo e kaungā-tuí, pea ʻi heʻetau ngaahi lotú.

ʻI he Ngaahi Taimi ʻo e ʻAhiʻahi Kakahá

17. Naʻe anga-fēfē hono fakafiemālieʻi ʻe Sihova ʻa hono ʻAló, pea ko e hā hono olá?

¹⁷ Naʻe hoko ʻo “hohaʻa lahi” ʻa Sīsū mo “mamahi fuʻu” ʻi he pō ki muʻa ʻi heʻene pekia fakamamahí. (Mātiu 26:​37, 38) Ko ia naʻá ne mavahe ʻo kiʻi mamaʻo mei heʻene kau ākongá ʻo lotu ki heʻene Tamaí ki ha tokoni. “Naʻe tali ko e meʻa ʻi heʻene fai fakaongoongo.” (Hepelū 5:7) ʻOku fakahā ʻe he Tohitapú ko “ha angelo mei he langi naʻe ha [kia Sīsū] ʻo ʻomi haʻane malohi.” (Luke 22:43) Ko e loto-toʻa mo e ngali tangata ʻa e founga naʻe hoko atu ʻaki ʻe Sīsū ke fehangahangai mo hono kau fakafepakí ʻoku fakamoʻoniʻi ai ko e founga ʻa e ʻOtuá ʻi hono fakafiemālieʻi hono ʻAló naʻe ola lelei tahá.​—Sione 18:​3-8, 33-​38.

18. (a) Ko e hā ʻa e vahaʻa taimi naʻe tautefito ai ʻa e faingataʻá ʻi he moʻui ʻa e ʻaposetolo ko Paulá? (e) ʻOku lava fēfē ke tau hoko ʻo fakafiemālie ki he kau mātuʻa ngāue mālohi, manavaʻofá?

¹⁸ Ko e ʻaposetolo foki ko Paulá naʻe fou ʻi he ngaahi taimi ʻo e ʻahiʻahi kakaha. Ko e fakatātaá, naʻe fakaʻilongaʻiʻaki ʻene ngāue fakafaifekau ʻi ʻEfesoó ʻa e “tangi loʻimata; kaeʻumaʻā ʻa e ngaahi ʻahiʻahi naʻe hoko kiate [ia] ʻi he puleakiʻi ʻe he kakai Siu.” (Ngāue 20:​17-​20) Naʻe faifai pē, ʻo mavahe ʻa Paula mei ʻEfesō hili hono ʻai ʻe he kau poupou ʻo e ʻotua fefine ko Taianá ke vālau lahi ʻa e koló ʻi heʻene ngāue fakamalangá. (Ngāue 19:​23-29; 20:1) ʻI he huʻu fakatokelau ʻa Paula ki he kolo ko Taloasí, naʻe ʻi ai ʻa e meʻa kehe naʻe māfatukituki ʻi heʻene fakakaukaú. ʻI ha taimi ki muʻa ʻi he vālau lahi ʻi ʻEfesoó, naʻá ne maʻu ai ha fakamatala fakatupu hohaʻa. Naʻe faingataʻaʻia ʻa e fakatahaʻanga kei foʻou ʻi Kolinitoó ʻi he māvahevahé, pea naʻe fakamolemoleʻi pē ai ʻa e feʻauakí. Ko ia naʻe fai ai ʻe Paula ha tohi valoki mālohi mei ʻEfesō, ʻi he ʻamanaki ki hono fakatonutonu ʻo e tuʻungá ni. Naʻe ʻikai ko ha meʻa faingofua ʻeni kiate ia ke fai. “Neu tohi atu kiate kimoutolu i he mamahi lahi moe feiga loto moe loimata lahi,” naʻá ne fakahā ia ki mui ʻi heʻene tohi hono uá. (2 Kolinitō 2:​4, PM) Hangē pē ko Paulá, ko e kau mātuʻa manavaʻofá ʻoku nau ʻilo ʻoku ʻikai ke faingofua ke fai ha akonaki fakatonutonu mo ha valoki, koeʻuhi ʻi he tafaʻaki ʻe tahá ʻoku nau ʻilo lelei ʻoku ʻi ai honau ngaahi vaivaiʻanga. (Kalētia 6:1) Ko ia, ʻofa ke tau hoko ko e fakafiemālie kiate kinautolu ko ia ʻoku takimuʻa ʻi hotau lotolotongá, ʻaki ʻetau mateuteu ke tali ʻa e akonaki anga-ʻofa fakatuʻunga ʻi he Tohitapú.​—Hepelū 13:17.

19. Ko e hā naʻe hiki ai ʻa Paula mei Taloasi ki Masitōniá, pea naʻe anga-fēfē ʻa e faifai atu ʻo ne maʻu ʻa e nongá?

¹⁹ Lolotonga ʻene ʻi ʻEfesoó, naʻe ʻikai ke ngata pē ʻi he faitohi ʻa Paula ki he fanga tokoua ʻi Kolinitoó ka naʻá ne toe fekauʻi atu ʻa Taitusi ke tokoni kiate kinautolu, mo fekauʻi ia ke fakamatala ange pe ko e hā ʻenau tali ki he tohí. Naʻe ʻamanaki ʻa Paula ke fetaulaki mo Taitusi ʻi Taloasi. Naʻe tāpuakiʻi ai ʻa Paula ʻaki ʻa e ngaahi faingamālie lelei ke ngaohi ākonga. Ka naʻe ʻikai lava ʻe he meʻá ni ke fakanonga ʻa ʻene loto-moʻuá koeʻuhi he naʻe teʻeki ai ke aʻu ange ʻa Taitusi. (2 Kolinitō 2:​12, 13) Ko ia ai naʻá ne fononga ki Masitōnia, ʻi heʻene ʻamanaki ke fetaulaki ai mo Taitusí. Naʻe fakalahi atu ʻaki ki he tuʻunga loto-moʻua ʻo Paulá ʻa hono fakafepakiʻi lahi ʻa ʻene ngāue fakafaifekaú. “Naʻa mo ʻemau ōmai ki Masitonia ni,” ʻokú ne fakamatala, “naʻe ʻikai manofo homau kakano, ka naʻe tautuʻu mai homau fakamamahi mei he potu kotoa pe: mei tuʻa ko e koto fakafepaki, mei loto ko e koto hohaʻa. Ka ko e ʻOtua, ʻa ia ʻoku ne tokoni ai pe kiate kinautolu ʻoku moʻulaloa, naʻa ne tokoniʻi kimautolu ʻaki ʻa e lava mai ʻa Taitusi.” (2 Kolinitō 7:​5, 6) He toki fakanonga ē ka ko e faifai pea aʻu atu ʻa Taitusi ʻo talanoa kia Paula fekauʻaki mo hono tali lelei ʻe he kau Kolinitoó ʻa ʻene tohí!

20. (a) Hangē ko e meʻa fekauʻaki mo Paulá, ko e hā ʻa e founga mahuʻinga ʻe taha ʻoku tokonaki mai ai ʻe Sihova ʻa e fakafiemālié? (e) Ko e hā ʻe vakai ki ai ʻi he kupu hono hokó?

²⁰ ʻOku fakafiemālie ki he kau sevāniti ʻa e ʻOtuá ʻi he ʻaho ní ʻa e meʻa naʻe hokosia ʻe Paulá, ʻa ia ko e tokolahi ʻo kinautolu ʻoku nau fehangahangai foki mo e ngaahi ʻahiʻahi ʻa ia ʻokú ne ʻai kinautolu ke nau hoko ʻo “moʻulaloa,” pe “loto-mafasia.” (Phillips) ʻIo, ‘ko e ʻOtua ʻo e fiemalié’ ʻokú ne ʻiloʻi ʻetau ngaahi fiemaʻu fakafoʻituituí pea ʻoku lava ke ne ngāueʻaki kitautolu ke hoko ʻo fefakafiemālieʻaki, hangē pē ko e maʻu ʻe Paula ʻa e fakafiemālie fakafou ʻi he fakamatala ʻa Taitusi ki he fakakaukau fakatomala ʻa e kau Kolinitoó. (2 Kolinitō 7:​11-​13) ʻI heʻetau kupu hono hokó, te tau vakai ai ki he tali loto-māfana naʻe fai ʻe Paula ki he kau Kolinitoó, pea mo e founga ʻoku lava ke ne tokoniʻi kitautolu ke hoko ʻo ola lelei ʻi hono vahevahe atu ʻa e fakafiemālie ʻa e ʻOtuá ʻi he ʻaho ní.

[Fakamatala ʻi lalo]

ʻE Lava ke Ke Tali?

◻ Naʻe anga-fēfē ʻa e hoko ʻo fiemaʻu ʻe he faʻahinga ʻo e tangatá ʻa e fakafiemālié?

◻ Kuo anga-fēfē hono fakamoʻoniʻi ʻe Sīsū ʻokú ne lahi ange ia ʻia Noá?

◻ Ko e hā naʻe ui ai ʻe Sīsū ʻa ia tonu ko e “ʻEiki ia ʻo e Sapate”?

◻ ʻOku anga-fēfē hono ʻomai ʻe he ʻOtuá ʻa e fakafiemālié ʻi he ʻaho ní?