ʻOkú Ke Vakai ki he Vaivaiʻanga Fakaetangatá ʻo Hangē ko e Vakai ʻa Sihová?

“Ko e ngaahi kupu ʻo e sinó ʻa ia ʻoku hā ngali vaivai angé ko hono moʻoní ʻoku mātuʻaki fiemaʻu ia.”—1 KOL. 12:22.

KO E HĀ HOʻO TALÍ?

ʻOku anga-fēfē vakai ʻa Sihova ki heʻene kau sevāniti ʻoku hā ngali vaivaí?

Ko e hā te ne tokoniʻi kitautolu ke vakai ki hotau fanga tokouá ʻo hangē ko e vakai ʻa Sihová ʻi he taimi ʻoku nau fai ai ha ngaahi fehālaaki?

Ko hai ʻoku maʻu ʻaonga ʻi he taimi ʻoku tau tokoniʻi ai ʻa e faʻahinga ʻoku vaivaí, pea ʻoku anga-fēfē?

1, 2. Ko e hā naʻe lava ai ke fakahaaʻi ʻe Paula ʻa e kaungāongoʻí ki he vaivaí?

ʻOKU tau ongoʻi vaivai kotoa ʻi ha ngaahi taimi. ʻI he ngaahi ʻaho ʻe niʻihi ʻi he taimi ʻoku ʻikai ke tau ongoʻi lelei aí, ʻe ʻikai nai ʻi ai hatau ivi pea faingataʻa nai ke fakahoko ha meʻa ʻoku tau fiemaʻu ke fai. Kae sioloto atu he taimí ni ko e ongoʻi pehení ʻoku fuʻu fuoloa. Te tau loto ke fēfē ʻa e fakafeangai mai kiate kitautolu ʻa e niʻihi kehé? Ko hono moʻoní, te tau loto ke nau feinga ke mahinoʻi ʻa e anga ʻetau ongoʻí, ʻa ia ko ʻenau fakahaaʻi mai ʻa e kaungāongoʻi.

² Naʻe ongoʻi vaivai he taimi ʻe niʻihi ʻa e ʻapositolo ko Paulá koeʻuhí ko e ngaahi tenge mei tuʻa pea mei loto ʻi he fakatahaʻangá. Laka hake ʻi he tuʻo tahá, naʻá ne ongoʻi heʻikai lava ke ne toe hoko atu. (2 Kol. 1:8; 7:5) Koeʻuhí ko ʻene ngaahi hokosiá tonu, naʻe malava ai ʻa Paula ke ne mahinoʻi ʻa e ʻuhinga ko ia ʻo e ongoʻi vaivaí. Naʻá ne pehē: “Ko hai ia ʻoku vaivai, ʻo ʻikai ke u vaivai ai?” (2 Kol. 11:29) ʻI he taimi naʻá ne fakahoa ai ʻa e kau mēmipa ʻo e fakatahaʻanga Kalisitiané ki he ngaahi konga ʻo e sino ʻo e tangatá, naʻá ne pehē ko e faʻahinga ko ia “ʻoku hā ngali vaivai angé ko hono moʻoní ʻoku mātuʻaki fiemaʻu ia.” (1 Kol. 12:22) Ko e hā ʻene ʻuhingá? ʻOku anga-fēfē ongoʻi ʻa Sihova fekauʻaki mo e faʻahinga ʻoku hā ngali vaivaí? ʻE lava fēfē ke tau ako ke vakai ki hotau fanga tokouá ʻo hangē ko e vakai ʻa Sihová? Pea ʻoku anga-fēfē ʻetau maʻu ʻaonga mei he meʻá ni?

VAKAI ʻA SIHOVA KI HE VAIVAIʻANGÁ

 3. Ko e hā ʻoku tau maʻu nai ai ʻa e ngaahi ongoʻi ʻikai lelei ki hotau fanga tokouá?

³ ʻI he māmani ʻo e ʻaho ní, ʻoku ngāuehalaʻaki ʻe he tokolahi ʻa e faʻahinga ʻoku vaivaí koeʻuhí ke maʻu ai ʻa e meʻa ʻoku nau loto ki aí. ʻOku nau tui ke hoko ʻo lavameʻá, ko ha taha kuo pau ke kei talavou mo mālohi. Ko e fakakaukau ʻa e māmaní ʻe lava ke ne uesia foki mo kitautolu. Te tau kamata nai ke maʻu ha vakai ʻikai lelei fekauʻaki mo ha fanga tokoua pau ʻoku nau faʻa fiemaʻu tokoní. ʻE lava fēfē ke tau vakai ki he mēmipa taki taha ʻi he fakatahaʻangá ʻo hangē ko e vakai ʻa Sihová?

4, 5. (a) Ko e hā ʻoku akoʻi mai ʻe he talanoa fakatātā ʻa Paula ki he sino ʻo e tangatá ʻo fekauʻaki mo e anga ʻo e vakai mai ʻa Sihova kia kitautolu taki tahá? (e) ʻE lava fēfē ke tau maʻu ʻaonga ʻi heʻetau tokoniʻi ʻa e vaivaí?

⁴ ʻOku vakai ʻa Sihova ki he mēmipa taki taha ʻi he fakatahaʻangá ʻoku mahuʻinga. ʻI he vahe 12 ʻo ʻene ʻuluaki tohi ki he kau Kolinitoó, ʻoku fakamanatu mai ai ʻe Paula kia kitautolu ʻo pehē naʻa mo e konga vaivai taha ʻo e sino ʻo e tangatá ʻoku fiemaʻu. (Lau ʻa e 1 Kolinitō 12:12, 18, 21-23.) Ko e niʻihi ʻoku tui ki he ʻevalūsioó kuo nau pehē ʻoku ʻikai ke fiemaʻu ʻa e ngaahi konga ʻe niʻihi ʻo e sinó.a Ko e fakatātā, ko e foʻi vaʻe siʻisiʻí naʻe fai ʻa e vakai ki ai ʻoku taʻeʻaonga. Ka kuo ʻiloʻi ʻe he kau saienisí he taimí ni ko hotau foʻi vaʻe siʻisiʻí ʻoku tokoni ia ki hotau sinó kotoa ke tuʻumaʻu ʻi he taimi ʻoku tau tuʻu aí.

⁵ Ko e talanoa fakatātā ʻa Paula fekauʻaki mo e sino ʻo e tangatá ʻoku fakahaaʻi ai ko e mēmipa kotoa pē ʻi he fakatahaʻangá ʻoku fiemaʻu. ʻOku loto ʻa Sētane ke tau tui ʻoku ʻikai hatau ʻaonga. Ka ʻoku vakai ʻa Sihova ki heʻene kau sevānití kotoa “ʻoku mātuʻaki fiemaʻu ia,” naʻa mo e faʻahinga ʻoku hā ngali vaivai angé. (Siope 4:18, 19) ʻOku ʻuhinga ení ʻe lava ke tau ongoʻi lelei he ʻoku fiemaʻu kitautolu ʻi heʻetau fakatahaʻangá pea ʻi he haʻohaʻonga ʻo e kakai ʻa e ʻOtuá ʻi māmani lahi. Ko e fakatātaá, fakakaukau ki ha taimi naʻá ke tokoniʻi ai ha tokotaha taʻumotuʻa. Naʻá ne maʻu ʻaonga ai, ka naʻá ke toe maʻu ʻaonga mei ai? ʻIo. ʻI he taimi ʻoku tau tokoniʻi ai ʻa e niʻihi kehé, ʻoku tau fiefia, ʻoku tau anga-kātaki ange, ʻoku tau ʻofa lahi ange ʻi hotau fanga tokouá, pea ʻoku tau hoko ai ko e kau Kalisitiane lelei ange. (ʻEf. 4:15, 16) ʻOku loto ʻa Sihova ke tau fakakaukau ki hotau fanga tokouá mo e fanga tuofāfiné ʻoku nau mahuʻinga, naʻa mo e faʻahinga ʻoku hā ngali vaivaí. ʻI he taimi ʻoku tau maʻu ai ʻa e vakai ko ení, ʻe ʻikai ke tau ʻamanekina ha meʻa lahi ange mei hotau fanga tokouá, pea ʻe anga-ʻofa lahi ange ʻa e fakatahaʻangá.

 6. Naʻe anga-fēfē hono ngāueʻaki ʻe Paula ʻa e foʻi lea “vaivai” mo e “mālohí”?

⁶ Ko e moʻoni naʻe ngāueʻaki ʻe Paula ʻa e foʻi lea “vaivai” mo e “vaivaiʻanga” ʻi he taimi naʻá ne lea ai fekauʻaki mo e niʻihi ʻi he fakatahaʻangá. Naʻá ne fai ení koeʻuhí he ko e kau taʻetui ʻe niʻihi naʻa nau vakai ki he kau Kalisitiané ʻi he founga ko iá. Ka naʻe ʻikai ke pehē ʻe Paula naʻe lelei ange ʻa e kau Kalisitiane ʻe niʻihi ʻi he niʻihi kehé. Pehē foki, naʻá ne fakamatalaʻi he taimi ʻe niʻihi ʻa ia tonu ʻokú ne vaivai. (1 Kol. 1:26, 27; 2:3) ʻI he taimi naʻá ne ngāueʻaki ai ʻa e foʻi lea “mālohí” ke fakamatalaʻiʻaki ha kau Kalisitiane ʻe niʻihi, naʻe ʻikai ke ne pehē naʻa nau lelei ange kinautolu ʻi he niʻihi kehé. (Loma 15:1) Naʻá ne pehē pē ko e faʻahinga ʻoku nau taukei angé ʻoku totonu ke nau anga-kātaki ki he faʻahinga ʻoku ʻikai ke nau fuʻu taukeí.

ʻOKU FIEMAʻU KE LILIU ʻA E ANGA ʻETAU FAKAKAUKAÚ?

 7. Ko e hā heʻikai faingofua nai ai ke tau tokoniʻi ʻa e faʻahinga ʻoku fiemaʻu tokoní?

⁷ ʻOku tokoniʻi ʻe Sihova ʻa e vaivaí, pea ʻoku ʻai ia ke ne fiefia ʻi he taimi ʻoku tau fai pehē aí. (Saame 41:1; ʻEf. 5:1) Ka ʻoku ʻikai ke faingofua maʻu pē ke tau fai eni. Ko e hā hono ʻuhingá? Mahalo pē ʻoku tau fakakaukau ʻoku totonu ki hotau tokouá ke ne fekuki pē mo ʻene ngaahi palopalemá tonu. Pe ʻoku tau fakaʻehiʻehi nai meiate ia koeʻuhí ʻoku ʻikai ke tau ʻilo ʻa e meʻa ke leaʻakí. Ko e fakatātaá, fakakaukau ki he meʻa naʻe hoko ki ha tuofefine ko Sinitī.b Naʻá ne fiemaʻu tokoni ʻi he taimi naʻe liʻaki ai ia ʻe hono husepānití. ʻOkú ne pehē: “Kapau ʻoku fakaʻehiʻehi ʻa e fanga tokouá meiate koe pe ʻikai ke fakafeangai ʻi he founga ʻokú ke ʻamanekina mei ha ngaahi kaumeʻa ofi, ʻe lava ke fakalotomamahi ia. ʻI he taimi ʻokú ke hokosia ai ha ngaahi ʻahiʻahi, ʻokú ke fiemaʻu ʻa e tokoni ʻa e kakaí.” Naʻe ongoʻi loto-mamahi foki ʻa Tuʻi Tēvita ʻi he taimi naʻe fakaʻehiʻehi ai meiate ia hono ngaahi kaumeʻá.—Saame 31:12.

 8. Ko e hā te ne tokoniʻi kitautolu ke tau mahinoʻi hotau fanga tokouá?

⁸ Ko e hā te ne tokoniʻi kitautolu ke tau mahinoʻi lahi ange hotau fanga tokoua ʻoku fiemaʻu tokoní? Manatuʻi ko e tokolahi ʻo kinautolu ʻoku nau faingataʻaʻia koeʻuhí ko ha mahamahaki pe loto-mafasia pe koeʻuhí ʻoku nau nofo mo ha ngaahi mēmipa ʻo e fāmilí ʻoku ʻikai ke nau ʻi he moʻoní. Kapau naʻa tau maʻu ʻa e ngaahi palopalema tatau, te tau loto ke fakahaaʻi mai ʻe he niʻihi kehé ʻa e kaungāongoʻi. Fakakaukau fekauʻaki mo e kau ʻIsilelí. Naʻa nau faingataʻaʻia lahi ʻi ʻIsipite, ka ki muʻa ke nau hū ki he Fonua ʻo e Talaʻofá, naʻe fakamanatu ange ʻe Sihova ʻoku totonu ke ʻoua te nau fakafefeka honau lotó. Naʻe ʻamanekina ʻe Sihova ke tokoniʻi ʻe he kau ʻIsilelí honau fanga tokoua naʻe masiva mo vaivaí.—Liv. 25:35-38; Teu. 15:7, 11.

 9. ʻI he taimi ʻoku vaivai ai hotau tokouá, ko e hā ʻokú ne fiemaʻu moʻoní? ʻOmai ha fakatātā.

⁹ ʻOku totonu ke ʻoua te tau vave ke tukuakiʻi hotau fanga tokouá ki heʻenau ngaahi palopalemá pe fakakaukau ʻoku tau lelei ange ʻia kinautolu. ʻOku tau loto ke tokoniʻi hotau fanga tokouá ʻi he taimi ʻoku nau vaivai aí. (Siope 33:6, 7; Māt. 7:1) Ko e fakatātaá, sioloto atu ʻoku lavea ha taha ʻi ha fakatuʻutāmaki ʻi ha paiki pea ʻoku leleakiʻi ki falemahaki. ʻI heʻene aʻu ki aí, ʻe fakamoleki ʻe he kau toketaá mo e kau nēsí ʻa e taimi ke ʻeke pe ko hai ʻe tukuakiʻi ki he fakatuʻutāmakí? ʻIkai. Te nau fai leva ha tokoni fakafaitoʻo. ʻOku tatau pē ia mo kitautolu. ʻI he taimi ʻoku vaivai ai hotau tokouá, ko e meʻa ʻokú ne fiemaʻu moʻoní ko ʻetau tokoni fakalaumālié.—Lau ʻa e 1 Tesalonaika 5:14.

10. ʻOku anga-fēfē ʻa e “koloaʻia ʻi he tuí” ʻa e niʻihi neongo ʻoku nau hā ngali vaivai?

¹⁰ ʻOku hā ngali vaivai nai ʻa e fanga tokoua mo e fanga tuofāfine ʻe niʻihi. Ka ʻo kapau te tau kiʻi tuʻu ʻo fakakaukau ki honau tuʻungá, te tau ʻilo nai ai ʻoku ʻikai ke nau vaivai. Sioloto atu ki he faingataʻa kuo pau ʻe hoko ki ha tuofefine ʻoku ʻikai tauhi hono husepānití kia Sihova. Fēfē ha faʻē taʻehoa ʻa ia ʻokú ne ngāue mālohi ke tauhi hake pē ʻe ia ʻene fānaú tonu pea ʻokú ne kei ʻalu maʻu pē ki he ngaahi fakatahá? Pe fakakaukau fekauʻaki mo ha kau taʻu hongofulu tupu ʻi he ʻapiakó ʻa ia ʻoku nau talitekeʻi fakaʻaho ʻa e tenge ke mavahe mei he moʻoní. ʻOku nau maʻu kotoa ʻa e ʻofa moʻoni kia Sihova pea fakapapauʻi ke nofoʻaki mateaki kiate ia. ʻI he taimi ʻoku tau fakakaukau atu ai ki he meʻa kotoa ʻoku fai ʻe hotau fanga tokouá ke tauhi kia Sihová, ʻe tokoniʻi heni kitautolu ke tau vakai kia kinautolu ʻoku nau “koloaʻia ʻi he tuí,” neongo ʻoku nau hā ngali vaivai.—Sēm. 2:5.

FAKAKAUKAU HANGĒ KO E FAKAKAUKAU ʻA SIHOVÁ

11, 12. (a) Ko e hā te ne tokoniʻi kitautolu ke tau fakakaukau ʻo hangē ko e fakakaukau ʻa Sihová ʻi he taimi ʻoku fai ai ʻe hotau fanga tokouá ha ngaahi fehālaaki? (e) Ko e hā naʻe fakamolemoleʻi ai ʻe Sihova ʻa ʻĒloné? Ko e hā ʻoku tau ako mei aí?

¹¹ ʻOku fiemaʻu ke tau fakakaukau ki hotau fanga tokouá ʻo hangē ko e fakakaukau ʻa Sihová, naʻa mo e taimi ʻoku nau fai ai ha ngaahi fehālaaki. ʻE tokoniʻi kitautolu ʻe he ngaahi faʻifaʻitakiʻanga Fakatohitapú ke tau ako ki he anga ʻo e vakai ʻa Sihova ki heʻene kau sevānití. (Lau ʻa e Saame 130:3.) Ko e fakatātaá, sioloto atu naʻá ke kau fakataha mo Mōsese ʻi he taimi naʻá ne fanongo ai ki he kumi kalofanga ʻa ʻĒlone fekauʻaki mo e ʻuhinga naʻá ne ngaohi ai ʻa e kiʻi pulu koulá. Ko e hā naʻá ke mei fakakaukau ki ai fekauʻaki mo ʻĒloné? (ʻEki. 32:21-24) Naʻá ke mei ongoʻi fēfē ʻi he taimi naʻe fanongo ai ʻa ʻĒlone kia Meliame pea fakaangaʻi leva ʻa Mōsese ʻi heʻene mali mo ha fefine mulí? (Nōm. 12:1, 2) Kae fēfē ʻa e taimi naʻe taʻefakalāngilangiʻi ai ʻe ʻĒlone mo Mōsese ʻa Sihova hili ʻEne ʻai ʻa e vaí ke haʻu mei ha maká?—Nōm. 20:10-13.

¹² Naʻe mei tauteaʻi leva ʻe Sihova ʻa ʻĒlone ʻi heʻene fai ʻa e ngaahi fehālaaki ko iá. Ka naʻe ʻiloʻi ʻe Sihova neongo naʻe vaivai ʻa ʻĒlone ʻi he ngaahi taimi ʻe niʻihi, naʻe ʻikai ko ha tokotaha kovi ia. Naʻá ne fai ʻa e ngaahi fehālaaki koeʻuhí naʻá ne ʻi ha ngaahi tuʻunga faingataʻa pea koeʻuhí naʻá ne fanongo ki he kakai hala. Ka naʻe loto-lelei ʻa ʻĒlone ke fakahaaʻi naʻá ne fai ʻa e ngaahi fehālaaki ko iá, pea naʻá ne tali ʻa e akonaki ʻa Sihová. (ʻEki. 32:26; Nōm. 12:11; 20:23-27) Naʻe ʻofa ʻa ʻĒlone kia Sihova pea naʻá ne fakatomala. Ko ia naʻe fakamolemoleʻi ia ʻe Sihova. Ko e ʻuhinga ia ʻi he ngaahi taʻu lahi ki mui ai, naʻe kei manatua ai ʻa ʻĒlone mo hono fāmilí ko e kau sevāniti faitōnunga ʻa Sihova.—Saame 115:10-12; 135:19, 20.

13. ʻE lava fēfē ke tau liliu ʻa e anga ʻetau fakakaukaú? ʻOmai ha fakatātā.

¹³ Hangē ko ʻĒloné, ʻe fai nai ho tokouá ha ngaahi fehālaaki. ʻI he hoko ení, ʻoku anga-fēfē hoʻo vakai kiate iá? ʻOku fiemaʻu ke liliu hoʻo fakakaukaú? (1 Sām. 16:7) Ko e fakatātaá, fakakaukau fekauʻaki mo ha taʻu hongofulu tupu ʻoku hā ngali ʻokú ne maʻu ha tōʻonga kovi. Mahalo pē ʻoku ʻikai ke ne tokanga ʻi heʻene fili ʻa e fakafiefiá. ʻOua ʻe fakavave ke fakakaukau ko ha tokotaha kovi ia. Kae fakakaukau ki he founga ʻe lava ke ke tokoniʻi ai iá. Vaheʻi ha taimi ke akoʻi ia ki he founga ke fai ai ha ngaahi fili fakapotopoto. ʻI he taimi ʻokú ke tokoniʻi ai ho fanga tokouá ʻi he founga ko ení, ʻe lava ke ke hoko ʻo anga-kātaki lahi ange kia kinautolu pea ʻe tupulaki ai hoʻo ʻofa kia kinautolú.

14, 15. (a) Naʻe anga-fēfē ongoʻi ʻa Sihova fekauʻaki mo ʻIlaisiā ʻi he taimi naʻá ne ilifia aí? (e) Ko e hā ʻe lava ke tau ako mei he founga naʻe tokoniʻi ai ʻe Sihova ʻa ʻIlaisiaá?

¹⁴ ʻOku anga-fēfē ongoʻi ʻa Sihova fekauʻaki mo e faʻahinga ʻoku loto-mafasiá? Fakakaukau ki he founga naʻá ne tokoniʻi ai ha taha ʻo ʻene kau sevānití ʻa ia naʻá ne ongoʻi peheni. Ko ʻIlaisiaá ko ha palōfita ʻa Sihova ʻa ia naʻá ne poleʻi loto-toʻa ʻa e kau palōfita ʻe toko 450 ʻa Pēalí. Ka naʻe fanongo leva ʻa ʻIlaisiā naʻe loto ʻa Kuini Sisipeli ke tāmateʻi ia. Naʻá ne ilifia ʻaupito ʻo ne lele ʻi he kilomita ʻe 150 (maile ʻe 95) ki Peasipa pea toe faai atu leva ki he toafá. Naʻá ne helaʻia ʻaupito pea loto-mafasia lahi ʻo ne fakaʻamu ai ke ne mate.—1 Tuʻi 18:19; 19:1-4.

¹⁵ Ko e hā naʻe fai ʻe Sihova ʻi he taimi naʻá ne ʻafioʻi ai ʻa e ilifia mo e loto-mafasia ʻa ʻIlaisiaá? Naʻá ne talitekeʻi ʻa ʻIlaisiā? ʻIkai. Naʻe fekau atu ʻe Sihova ha ʻāngelo ke tokoniʻi ia. Naʻe tuʻo ua hono ʻoange ʻe he ʻāngeló kia ʻIlaisiā ha meʻa ke ne kai koeʻuhí ke ne mālohi feʻunga ke hoko atu ʻene fonongá. (Lau ʻa e 1 Tuʻi 19:5-8.) Naʻa mo e ki muʻa ke ʻoange ʻe Sihova kia ʻIlaisiā ha ngaahi fakahinohinó, naʻá Ne fanongo kia ʻIlaisiā pea ʻoange kiate ia ʻa e tokoni naʻá ne fiemaʻú.

16, 17. ʻE lava fēfē ke tau tokoniʻi hotau fanga tokouá ʻo hangē ko e tokoni ʻa Sihová?

¹⁶ ʻE lava fēfē ke tau tokoniʻi hotau tokouá ʻo hangē ko e tokoniʻi ʻe Sihova ʻa ʻIlaisiaá? ʻOua ʻe fakavave ke tala ange ki ho tokouá ʻa e meʻa ʻokú ke fakakaukau ʻoku totonu ke ne faí. (Pal. 18:13) ʻI he taimi ʻokú ne loto-mafasia aí pe ongoʻi taʻeʻaongá, ʻokú ne ʻuluaki fiemaʻu koe ke ke fanongo mo fakahaaʻi ʻokú ke tokanga ange. (1 Kol. 12:23) Te ke ʻiloʻi leva ai ʻa e meʻa ʻokú ne fiemaʻu moʻoní pea te ke malava ai ke tokoniʻi ia.

¹⁷ Manatuʻi ʻa e hokosia ʻa Sinitií. ʻI he taimi naʻe liʻaki ai ia ʻe hono husepānití, naʻá ne ongoʻi liʻekina mo hono ongo ʻofefiné. Naʻe anga-fēfē hono tokoniʻi kinautolu ʻe he niʻihi ʻi he fakatahaʻangá? ʻOku pehē ʻe Sinitī: “ʻI he miniti pē ʻe 45 naʻa nau aʻu mai ki homau ʻapí. Naʻa nau tangi. Naʻa nau ʻi ai maʻu pē mo kimautolu ʻi he ʻuluaki ʻaho ʻe ua pe tolú.” Ko Sinitī mo hono ongo ʻofefiné naʻa nau helaʻia mo loto-mamahi ʻaupito. Naʻe fakaafeʻi kinautolu ʻe he ngaahi mēmipa ʻo e fakatahaʻangá ke nofo ʻi honau ʻapí pea ʻoange mo ha meʻa ke nau kai. ʻOku fakamanatu mai kia kitautolu ʻe he hokosia ko ení ʻa e meʻa ʻoku leaʻaki ʻe he Tohi Tapú ʻi he tohi ʻa Sēmisí: “Kapau ʻoku ʻikai maʻu ʻe ha tokoua pe ha tuofefine ha vala mo ha meʻakai feʻunga ki he ʻaho ko iá, ka ʻoku pehē ange ʻe ha taha ʻo kimoutolu ki ai: ʻAlu ʻi he fiemālie, ke ke māfana peá ke mākona,’ ka ʻoku ʻikai te mou ʻoange ki ai ʻa e meʻa ʻoku fiemaʻu ki hono sinó, ko e hā ai hano ʻaonga? ʻOku pehē pē foki, ko e tuí ʻiate ia pē, ʻo taʻekau ai ʻa e ngaahi ngāué, ʻoku mate ia.” (Sēm. 2:15-17) Ko e tokoni naʻe ʻoange ʻe he fanga tokouá mo e fanga tuofāfiné kia Sinitī mo hono ongo ʻofefiné ʻa e meʻa tofu pē naʻa nau fiemaʻú. ʻI he māhina ʻe ono pē ki mui ai, naʻa nau ongoʻi mālohi feʻunga ke tāimuʻa tokoni.—2 Kol. 12:10.

ʻAONGA LAHI

18, 19. (a) ʻE lava fēfē ke tau tokoniʻi ʻa e faʻahinga ʻoku vaivaí? (e) Ko hai ʻoku maʻu ʻaonga ʻi he taimi ʻoku tau tokoniʻi ai ʻa e faʻahinga ʻoku vaivaí?

¹⁸ ʻOku fiemaʻu ʻa e taimi ke tau fakaakeake mei he puke ʻi ha taimi fuoloa. ʻI he taimi ʻoku fai ai ʻe hotau tokouá ha fehālaaki pe ʻoku ʻi ha tuʻunga faingataʻa, ʻe fiemaʻu nai ʻa e taimi ke ne fakaakeake ai. Ko e moʻoni kuo pau ke ne ako ʻa e Folofola ʻa e ʻOtuá, lotu kia Sihova, pea maʻu ʻa e ngaahi fakatahá ke fakaivimālohiʻi ai ia. Ka ʻokú ne fiemaʻu foki ʻetau tokoní. Lolotonga ʻa e taimi ko eni ʻo e fakaakeaké, ʻoku fiemaʻu ke tau anga-kātaki kiate ia. ʻOku fiemaʻu ke tau hokohoko atu ʻi hono fakahaaʻi kiate ia ʻoku tau ʻofa ai pea ko e kupu ia ʻoku mātuʻaki fiemaʻu ʻi he fakatahaʻangá.—2 Kol. 8:8.

¹⁹ Ko hono tokoniʻi ʻa e niʻihi kehé ʻoku ʻai ai kitautolu ke tau fiefia. ʻOku tau toe ako ai ke fakahaaʻi ʻa e kaungāongoʻí mo e anga-kātakí. Ka ʻoku ʻikai ko kitautolu pē ʻa e faʻahinga ʻoku maʻu ʻaongá. Ko e fakatahaʻangá kotoa te nau hoko ʻo anga-ʻofa lahi ange. Ko e mahuʻinga angé, ʻi heʻetau “tokoniʻi ʻa e faʻahinga ʻa ia ʻoku vaivaí,” ʻoku tau fakahaaʻi ai ʻoku tau loto ke hangē ko Sihová. ʻOku vakai ʻetau Tamai anga-ʻofá ki he tokotaha kotoa pē ʻoku mahuʻinga.—Ngā. 20:35.

[Fakamatala ʻi lalo]

[Fakatātā ʻi he peesi 26]

Naʻe ʻafioʻi ʻe Sihova ʻa e ilifia ʻa ʻIlaisiaá pea fekau atu ha ʻāngelo ke tokoniʻi ia (Sio ki he palakalafi 14, 15)