Moʻuiʻaki ʻa e Lao ʻa Kalaisí

“Mou fetoutou fefuaʻaki homou ngaahi mafaisiaʻanga: pea ʻi hoʻomou fai pehē, kuo mou ʻosiki ʻa e lao ʻa Kalaisi.”​—KALĒTIA 6:2.

 1. Ko e hā ʻoku lava ai ke pehē ko e lao ʻa Kalaisí ko ha mālohi lahi fakaʻulia ia ki he leleí he ʻahó ni?

ʻI LUANITĀ, naʻe feinga ai ʻi he tuʻunga fakatuʻutāmaki ʻa e Kau Fakamoʻoni ʻa Sihova ko e kau Hutu mo e Tutsi ke femaluʻiʻaki kinautolu mei he tāmate tokolahi fakamatakali ko ia naʻe toki matafi atu mei he fonua ko iá. Ko e Kau Fakamoʻoni ʻa Sihova ʻi Kobe, Siapaní, ʻa ia naʻe mole ʻa e ngaahi mēmipa ʻo honau fāmilí ʻi he mofuike fakaʻauha aí, naʻe mātuʻaki ongo ʻa e mole ko iá kiate kinautolu. Ka neongo ia, naʻa nau ngaue vave ke fakahaofi ʻa e kau faingataʻaʻia kehé. ʻIo, ʻoku fakahāhā ʻe he ngaahi fakatātā ʻo e manavaʻofa pehē mei he takatakai ʻo e māmaní ʻoku ngāue ʻa e lao ʻa Kalaisí ʻi he ʻahó ni. Ko ha mālohi lahi fakaʻulia ia ki he leleí.

 2. Kuo anga-fēfē ʻa e ʻikai maʻu ʻe Puleʻanga-Haʻa-Kalisitiane ʻa e ʻuhinga ʻo e lao ʻa Kalaisí, pea ʻoku anga-fēfē ʻetau fakahoko ʻa e lao ko iá?

² ʻI he taimi tatau pē, ʻoku fakahoko ai ha kikite ʻa e Tohitapú ʻo fekauʻaki mo e “kuonga fakamui.” ʻOku maʻu ʻe he tokolahi “ʻa e ngeʻesi ʻo e lotu” kae “liʻaki hono kakano.” (2 Tīmote 3:​1, 5) Tautefito ki Puleʻanga-Haʻa-Kalisitiane, ʻoku faʻa hoko ai ʻa e lotú ia ko ha tōʻonga pē, ʻikai ko ha meʻa ʻoku mei he lotó. ʻOku peheé koeʻuhi ʻoku fuʻu faingataʻa ke moʻuiʻaki ʻa e lao ʻa Kalaisí? ʻIkai. ʻE ʻikai ʻomai ʻe Sīsū kiate kitautolu ha lao ʻe ʻikai lava ke muimui ki ai. Kuo ʻikai pē ke maʻu ʻe Puleʻanga-Haʻa-Kalisitiane ia ʻa e ʻuhinga ʻo e lao ko iá. Kuo ʻikai te ne tokanga ki he ngaahi lea fakamānavaʻi ko ʻení: “Mou fetoutou fefuaʻaki homou ngaahi mafasiaʻanga: pea ʻi hoʻomou fai pehē, kuo mou ʻosiki ʻaupito ʻa e lao ʻa Kalaisi.” (Kalētia 6:2) ʻOku tau “ʻosiki ʻaupito ʻa e lao ʻa Kalaisi” ʻaki ʻetau fefuaʻaki ʻa e ngaahi mafasiaʻangá, ʻo ʻikai ko e faʻifaʻitaki ki he kau Fālesí mo toe tānaki taʻealafakatonuhiaʻi mai ha ngaahi kavenga ki hotau ngaahi tokouá.

 3. (a) Ko e hā ʻa e niʻihi ʻo e ngaahi fekau ʻoku kau ʻi he lao ʻa Kalaisí? (e) Ko e hā ʻe hala ai ke fakaʻosiʻaki ʻo pehē ko e fakatahaʻanga Kalisitiané ʻoku ʻikai totonu ke ʻi ai haʻanau ngaahi tuʻutuʻuni tuku kehe pē ʻa e ngaahi fekau fakahangatonu ʻa Kalaisí?

³ ʻOku kau ʻi he lao ʻa Kalaisí ʻa e kotoa ʻo e ngaahi fekau ʻa Kalaisi Sīsuú​—tatau ai pē pe ko e malanga mo e faiako, tauhi ke maʻa mo faingofua ʻa e sio hoto matá, ngāue ke tauhi ʻa e melino mo hotau kaungāʻapí, pe ko hono toʻo atu ʻa e taʻemaʻá mei he fakatahaʻangá. (Mātiu 5:​27-​30; 18:​15-​17; 28:​19, 20; Fakahā 2:​14-​16) Ko e moʻoni, ʻoku moʻuaʻaki ʻe he kau Kalisitiané ke tauhi ʻa e kotoa ʻo e ngaahi fekau ʻi he Tohitapú ʻoku fakahangatonu ki he kau muimui ʻo Kalaisí. Pea ʻoku ʻi ai ʻa e toe ngaahi meʻa lahi ange. Kuo pau ki he kautaha ʻa Sihová, pea pehē ki he ngaahi fakatahaʻanga taki taha, ke ne fokotuʻu ha ngaahi tuʻutuʻuni ʻoku fiemaʻú pea mo e ngaahi founga ke tauhi maʻu ai ʻa e tuʻunga maau leleí. (1 Kolinitō 14:​33, 40) Ko hono moʻoní, naʻe ʻikai mei malava ke fakataha fakatahataha ʻa e kau Kalisitiané kapau naʻe ʻikai ke ʻi ai haʻanau ngaahi tuʻutuʻuni fekauʻaki mo e taimi, feituʻu, mo e founga ke fai ai ʻa e ngaahi fakataha peheé! (Hepelū 10:​24, 25) Ko e ngāue fakataha mo e ngaahi tataki anga-fakaʻatuʻi naʻe fokotuʻu ʻe he faʻahinga naʻe tuku ki ai ʻa e mafai ʻi he kautahá, ʻoku toe hoko ia ko ha konga ʻo hono fakahoko ʻa e lao ʻa Kalaisí.​—Hepelū 13:17.

 4. Ko e hā ʻa e ivi mālohi ʻokú ne poupou mei mui ki he founga-lotu maʻá?

⁴ Ka neongo ia, ʻoku ʻikai ke fakaʻatā ʻe he kau Kalisitiane moʻoní ke hoko ʻenau founga-lotú ko ha faʻunga ʻo e ngaahi lao taʻeʻuhinga. ʻOku ʻikai te nau tauhi pē ʻa Sihova koeʻuhi ko hano talaange ki ai ʻe ha niʻihi pe ko e kautahá ke fai pehē. Ka, ko e ivi mālohi ʻoku poupou ki heʻenau founga-lotú ko e ʻofa. Naʻe tohi ʻe Paulá: “Oku fakafeigaʻi akimautolu e he ofa a Kalaisi.” (2 Kolinitō 5:​14, PM, fakaʻītali ʻamautolu.) Naʻe fekau ʻe Sīsū ki hono kau muimuí ke nau feʻofaʻaki. (Sione 15:​12, 13) Ko e ʻofa feilaulauʻi-kitá ko e makatuʻunga ia ʻo e lao ʻa Kalaisí, pea ʻokú ne fakafeingaʻi pe ueʻi ʻa e kau Kalisitiane moʻoní ʻi he feituʻu kotoa pē, fakatouʻosi ʻi he fāmilí pea ʻi he fakatahaʻangá. Tau sio ange pe ʻoku anga-fēfē ia.

ʻI he Fāmilí

 5. (a) ʻOku malava fēfē ke fakahoko ʻe he ngaahi mātuʻá ʻa e lao ʻa Kalaisí ʻi ʻapi? (e) Ko e hā ʻoku fiemaʻu ki he fānaú mei heʻenau mātuʻá, pea ko e hā ʻa e ngaahi faingataʻaʻiaʻanga kuo pau ke ikuʻi ʻe he ngaahi mātuʻa ʻe niʻihi kae lava ke tokonaki mai ia?

⁵ Naʻe tohi ʻe he ʻaposetolo ko Paulá: “ʻA e kau tangata, mou ʻofa ki homou ngaahi uaifi, ʻo hange foki ko Kalaisi ne ne ofaʻi ʻa e Siasi, ʻo ne liʻoa ʻa ʻEne ʻAfio koeʻuhi ko ia.” (ʻEfesō 5:25) ʻI he faʻifaʻitaki ha husepāniti kia Kalaisi pea feangai ki hono uaifí ʻi he ʻofa mo e mahino, ʻokú ne fakahoko ai ha tafaʻaki mātuʻaki mahuʻinga ʻo e lao ʻa Kalaisí. ʻIkai ngata aí, naʻe fakahaaʻi fakahāhā ʻe Sīsū ʻa e ʻofa ki he fānau iikí, ʻo puke mai kinautolu ki hono umá ʻo hilifaki hono ongo nimá kiate kinautolu, mo tāpuakiʻi kinautolu. (Maʻake 10:16) Ko e ngaahi mātuʻa ʻoku nau fakahoko ʻa e lao ʻa Kalaisí ʻoku nau toe fakahāhā ʻa e ʻofa ki heʻenau fānaú. Ko e moʻoni, ʻoku ʻi ai ʻa e ngaahi mātuʻa ʻoku nau ʻilo ko ha pole ia ʻa e faʻifaʻitaki ki he faʻifaʻitakiʻanga ʻa Sīsuú ʻi he meʻá ni. ʻOku ʻikai ke fakaenatula ki ha niʻihi ke anga-fakahāhā. Ngaahi mātuʻa, ʻoua ʻe fakaʻatā ʻa e ngaahi fakakaukau peheé ke ne taʻofi kimoutolu mei hono fakahāhā ki hoʻomou fānaú ʻa e ʻofa ʻoku mou ongoʻi kiate kinautolú! ʻOku ʻikai ke feʻunga ke mou ʻilo pē ʻoku mou ʻofa ʻi hoʻomou fānaú. Kuo pau ke nau ʻiloʻi mo ia ʻe kinautolu. Pea heʻikai te nau ʻiloʻi ia kaeʻoua kuo mou maʻu ha ngaahi founga ke fakahāhā ai hoʻomou ʻofá.​—Fakafehoanaki mo Maʻake 1:​11.

 6. (a) ʻOku fiemaʻu ki he fānaú ha ngaahi tuʻutuʻuni fakaemātuʻa, pea ko e hā ʻokú ke tali pehē aí? (e) Ko e hā ʻa e ʻuhinga tefito ki he ngaahi tuʻutuʻuni fakaefāmilí ʻoku fiemaʻu ke makupusi ʻe he fānaú? (f) Ko e hā ʻa e ngaahi fakatuʻutāmaki ʻoku hao mei ai ʻi he taimi ʻoku mālohi ai ʻa e lao ʻa Kalaisí ʻi he fāmilí?

⁶ ʻI he taimi tatau pē, ʻoku fiemaʻu ki he fānaú ʻa e ngaahi fakangatangataʻanga, ʻa ia ʻoku ʻuhingá ʻoku fiemaʻu ke fokotuʻu ʻe he ngaahi mātuʻá ʻa e ngaahi tuʻutuʻuni pea ʻai ke mālohi ʻa e ngaahi tuʻutuʻuni ko iá ʻi he taimi ʻe niʻihi ʻaki ʻa e akonakiʻí. (Hepelū 12:​7, 9, 11) Neongo ia, kuo pau ke tokoniʻi fakalakalaka ʻa e fānaú ke nau sio ki he ʻuhinga tefito ʻo e ngaahi tuʻutuʻuni ko ʻení: ʻoku ʻofa ʻenau ngaahi mātuʻá ʻiate kinautolu. Pea kuo pau ke nau ako ko e ʻofá ko e ʻuhinga lelei taha ia kiate kinautolu ke nau talangofua ai ki heʻenau mātuʻá. (ʻEfesō 6:1; Kolose 3:​20; 1 Sione 5:3) Ko e taumuʻa ia ʻa ha ongo mātuʻa ʻiloʻilo ke akoʻi ʻa e fānau iikí ke nau ngāueʻaki ʻenau “malava fakaʻatamaí” koeʻuhi ke faifai atu pē pea te nau fai ha ngaahi fili lelei ʻiate kinautolu pē. (Loma 12:​1, NW; fakafehoanaki mo 1 Kolinitō 13:11.) ʻI he tafaʻaki ʻe tahá, ʻoku ʻikai totonu ke fuʻu lahi ʻa e ngaahi tuʻutuʻuní pe fuʻu fefeka ʻa e akonakiʻí. ʻOku pehē ʻe Paula: “ʻA e ngaahi tamai, ʻoua te mou fakahohaʻasi hoʻomou fanau, naʻa faifai pea nau loto kina.” (Kolose 3:21; ʻEfesō 6:4) ʻI he mālohi ʻa e lao ʻa Kalaisí ʻi he fāmilí, ʻoku ʻikai leva ke ʻi ai ha tafaʻaki ke fakahoko ai ha akonaki ʻoku taʻemapuleʻi ai ʻa e ʻitá, pe lea manuki ʻoku fakatupu loto-lavea. ʻI ha ʻapi pehē, ʻoku ongoʻi malu mo fakatupu langa hake ai ʻa e fānaú, ʻikai ke mafasia pe leakoviʻi.​—Fakafehoanaki mo Sāme 36:7.

 7. ʻI he ngaahi founga fē ʻoku ʻomai ai ʻe he ngaahi ʻapi Pētelí ha faʻifaʻitakiʻanga ʻi he fekauʻaki ko ʻeni mo hono fokotuʻu ha ngaahi tuʻutuʻuni ʻi he ʻapí?

⁷ Ko e niʻihi kuo nau ʻaʻahi ki he ngaahi ʻapi Pēteli takatakai ʻi he māmaní ʻoku nau pehē ko e ngaahi faʻifaʻitakiʻanga lelei ia ʻo e mafamafatatau ʻi he meʻa fekauʻaki mo e ngaahi tuʻutuʻuni ki ha fāmili. Neongo ko e kakai lalahi ʻoku fokotuʻu ʻaki iá, ʻoku ngāue ʻa e ngaahi ʻapi peheé ʻo meimei hangē pē ha ngaahi fāmilí.a ʻOku fihi ʻa e ngaahi ngāue ʻi Pētelí pea ʻoku fiemaʻu ai ha ngaahi tuʻutuʻuni lahi​—ʻoku pau ʻe lahi ange ia ʻi he meʻa ki he fāmili anga-mahení. Ka neongo ia, ʻe takimuʻa ʻa e kau mātuʻá ʻi he ngaahi ʻapi Pētelí, ngaahi ʻōfisí, mo e ngaahi fale ngāué ʻi he feinga ke ngāueʻaki ʻa e lao ʻa Kalaisí. ʻOku nau vakai ki ai ko honau ngafa ia ke ʻoua ʻe ngata pē ʻi hono fokotuʻutuʻu maau ʻa e ngāué kae toe pehē foki ki hono tokoniʻi ʻa e fakalakalaka fakalaumālié pea mo e “fiefia a Jihova” ʻoku ʻi he lotolotonga ʻo honau kaungā-ngāué. (Nehemaia 8:​10, PM) Ko ia ai, ʻoku nau feinga ke fai ʻa e ngaahi meʻá ʻi ha founga pau mo fakalototoʻa pea feinga ke hoko ʻo anga-fakaʻatuʻi. (ʻEfesō 4:​31, 32) Tā neʻineʻi ke ʻiloa ʻa e ngaahi fāmili Pētelí ʻi he laumālie fiefia ʻoku nau maʻú!

ʻI he Fakatahaʻangá

 8. (a) Ko e hā ʻoku totonu ko ʻetau koló maʻu pē ia ʻi he fakatahaʻangá? (e) ʻI he malumalu ʻo e ngaahi tuʻunga fē kuo faʻa ʻeke ai ha niʻihi ki ha ngaahi tuʻutuʻuni pe feinga ke faʻu ai ha ngaahi tuʻutuʻuni?

⁸ Ko ʻetau koló foki ia ʻi he fakatahaʻangá ke felangahakeʻaki ʻi he laumālie ʻo e ʻofá. (1 Tesalonaika 5:​11) Ko ia ai, ʻoku totonu ke tokanga ʻa e kau Kalisitiane kotoa pē ke ʻoua te nau toe fakalahi mai ʻa e ngaahi mafasiaʻanga ʻo e niʻihi kehé ʻaki hono tuku mai kiate kinautolu ke nau fai ʻenau fakakaukau pē ʻanautolú ʻi he ngaahi meʻa ko e fili fakafoʻituitui ia. ʻI he taimi ʻe niʻihi, ʻoku tohi ʻa e niʻihi ia ki he Sōsaieti Taua Leʻó ʻo ʻeke fekauʻaki mo e ngaahi tuʻutuʻuni ʻi he ngaahi meʻa hangē ko e ʻeke pe ko e hā ʻa e vakai ʻoku totonu ke nau maʻu fekauʻaki mo e ngaahi filimi makehe, ngaahi tohi, pea naʻa mo e ngaahi meʻa-vaʻinga. Ka, ʻoku ʻikai ke fakamafaiʻi ʻa e Sōsaietí ke ne fakalautelau mai ʻa e ngaahi meʻa peheé pea mo fai ha ngaahi fakamaau ki ai. ʻI he ngaahi meʻa lahi, ko e ngaahi meʻa ʻeni ia ʻoku totonu ki he tokotaha tāutaha pe ko e ʻulu ʻo e fāmilí ke ne fai ʻa e filí, ʻo makatuʻunga ʻi heʻene ʻofa ki he ngaahi tefitoʻi moʻoni ʻo e Tohitapú. ʻOku hehema ʻa e niʻihi ke liliu ʻa e ngaahi fokotuʻu mo e ngaahi tataki ʻa e Sōsaietí ke hoko ko e ngaahi tuʻutuʻuni. Ko e fakatātaá, ʻi he tatau ʻo e The Watchtower, ʻo Maʻasi 15, 1996, naʻe ʻi ai ha kupu lelei ai naʻá ne fakalototoʻaʻi ʻa e kau mātuʻá ke nau fai tuʻumaʻu ha ngaahi ʻaʻahi fakatauhi-sipi ki he ngaahi mēmipa ʻo e fakatahaʻangá. Naʻe fakataumuʻá ke fokotuʻu ha ngaahi tuʻutuʻuni? ʻIkai. Neongo ko e faʻahinga ʻoku malava ke nau muimui ki he ngaahi fokotuʻú ʻoku nau maʻu nai ha ngaahi ʻaonga lahi ai, ʻoku ʻikai malava ke fai ia ʻe he kau mātuʻa ʻe niʻihi. ʻI he founga meimei tatau, ko e kupu ko e “Fehuʻi mei he Kau Lautohí” ʻi he tatau ʻo e The Watchtower ʻo ʻEpeleli 1, 1995, naʻe fakatokanga mai ai fekauʻaki mo hono fakasiʻisiʻiʻi ʻa e ngeia ʻo e vahaʻa taimi ʻo e papitaisó ʻaki hono fai ha meʻa ʻo fuʻu tōtuʻa, hangē ko hono fai ai ha paati taʻemapuleʻi pe fokotuʻutuʻu ha ngaahi fakafiefia ki ai. Kuo ʻai ʻe he niʻihi ia ʻa e akonaki fakamatuʻotuʻá ni ʻo fuʻu tōtuʻa, ʻo aʻu ʻo faʻu ai ha tuʻutuʻuni ko hono ʻave ha kaati fakalototoʻa ʻi he taimi ko ʻení ʻe hala ia!

 9. Ko e hā ʻoku mahuʻinga ai ke tau fakaʻehiʻehi mei he hoko ʻo fuʻu fakaanga mo faifakamaau ki ha tahá?

⁹ Toe fakakaukau ange foki, kapau ko e “lao haohaoa, ʻa e lao tauʻataina” ke mālohi ʻi hotau lotolotongá, kuo pau ke tau tali ʻoku ʻikai ke tatau ʻa e ngaahi konisēnisi ʻo e tokotaha Kalisitiane kotoa pē. (Sēmisi 1:​25) ʻOku totonu ke tau mamahi kapau ʻoku maʻu ʻe he kakaí ʻa e ngaahi fili fakatāutaha ʻa ia ʻoku ʻikai ke maumauʻi ai ʻa e ngaahi tefitoʻi moʻoni Fakatohitapú? ʻIkai. Ko ʻetau fai peheé ʻe fakatupu māvahevahe ia. (1 Kolinitō 1:​10) Ko Paula, ʻi heʻene fakatokanga mai kiate kitautolu ke ʻoua ʻe fakamāuʻi ha kaungā Kalisitiané, naʻá ne pehē: “Kohai koe, oku ke fakamāuʻi ae tamaioeiki ae tagata kehe? oku i he ene eiki be aana a ene tuu be higa. Io, e boubou hake ia: he oku mafai e he Otua ke fakatuu mau ia.” (Loma 14:4, PM) ʻOku tau ʻi he tuʻunga fakatuʻutāmaki ko hono taʻefakahōifuaʻi ʻa e ʻOtuá kapau ʻoku tau felauʻikoviʻaki ʻi he ngaahi meʻa ʻoku totonu ke tuku pē ia ki he konisēnisi fakatāutahá.​—Sēmisi 4:​10-​12.

10. Ko hai ʻoku vaheʻi ke ne tokangaʻi ʻa e fakatahaʻangá, pea ʻoku totonu ke anga-fēfē ʻetau poupou kiate kinautolú?

¹⁰ Tau toe manatuʻi foki, ʻoku vaheʻi ki he kau mātuʻá ke nau tokangaʻi ʻa e tākanga ʻa e ʻOtuá. (Ngāue 20:28) ʻOku nau ʻi aí ke tokoni. ʻOku totonu ke tau ongoʻi tauʻatāina ke fakaofiofi kiate kinautolu ki ha faleʻi, he ko kinautolú ko e kau ako ʻo e Tohitapú pea ʻoku nau anga-maheni mo e meʻa kuo lāulea ki ai ʻi he ngaahi tohi ʻa e Sōsaieti Taua Leʻó. ʻI he sio ʻa e kau mātuʻá ʻoku ʻi ai ha ʻulungaanga ʻoku ngalingali ʻe iku atu ki hano maumauʻi ʻo e ngaahi tefitoʻi moʻoni Fakatohitapú, ʻoku nau fai taʻemanavahē ʻa e akonaki ʻoku fiemaʻú. (Kalētia 6:1) ʻOku muimui ʻa e kau mēmipa ʻo e fakatahaʻangá ki he lao ʻa Kalaisí ʻaki ʻa e ngāue fakataha mo e siʻi kau tauhi-sipí ni, ʻa ia ʻoku nau takimuʻa ʻi honau lotolotongá.​—Hepelū 13:7.

Ngāueʻaki ʻe he Kau Mātuʻá ʻa e Lao ʻa Kalaisí

11. ʻOku anga-fēfē hono ngāueʻaki ʻe he kau mātuʻá ʻa e lao ʻa Kalaisí ʻi he fakatahaʻangá?

¹¹ ʻOku loto-vēkeveke ʻa e kau mātuʻá ke fakahoko ʻa e lao ʻa Kalaisí ʻi he fakatahaʻangá. ʻOku nau takimuʻa ʻi hono malangaʻi ʻa e ongoongo leleí, faiako mei he Tohitapú koeʻuhi ke aʻu ki he ngaahi lotó pea ʻi he tuʻunga ko e kau tauhi-sipi anga-ʻofa, mo anga-maluú, ʻoku nau lea ki he “kau loto foi.” (1 Tesalonaika 5:​14, PM) ʻOku nau fakaʻehiʻehi mei he ngaahi fakakaukau taʻefakakalisitiane ʻoku ʻi he konga lahi ʻo e ngaahi lotu ʻo Puleʻanga-Haʻa-Kalisitiané. Ko e moʻoni, ʻoku vave ʻaupito ʻa e faai hifo ʻa e māmaní, pea hangē ko Paulá, ʻoku ongoʻi loto-moʻua nai ʻa e kau mātuʻá ki he tākangá; ka ʻoku nau tauhi maʻu ʻa e mafamafatataú ʻi heʻenau ngāue ʻi he ngaahi loto-hohaʻa peheé.​—2 Kolinitō 11:28.

12. ʻI he fakaofiofi ha tokotaha Kalisitiane ki ha tokotaha mātuʻa ki ha tokoni, ʻe anga-fēfē nai ʻa e tali ki ai ʻa e tokotaha mātuʻá?

¹² Ko e fakatātaá, ʻe loto nai ha Kalisitiane ke talanoa mo ha tokotaha mātuʻa ʻo fekauʻaki mo ha meʻa mahuʻinga ʻoku ʻikai lave ki ai ha fakamatala fakahangatonu Fakatohitapu ia, pe ʻoku fiemaʻu ai ke ʻai ke mafamafatatau ha ngaahi tefitoʻi moʻoni faka-Kalisitiane kehekehe. Mahalo pē kuo fakaʻaliʻali ange kiate ia ha hiki fakalakanga ʻi he ngāué ʻa ia ʻoku maʻu ai ha vāhenga lahi ange ka ʻoku toe lahi ange ai ʻa e fatongiá. Pe ko ha tamai taʻetui ʻa ha tokotaha Kalisitiane kei talavou ʻokú ne fai nai ha ngaahi tuʻutuʻuni ki hono fohá ʻo lava ke uesia ai ʻa ʻene ngāue fakafaifekaú. ʻI he ngaahi tuʻunga peheé ʻe fakamamaʻo ʻa e tokotaha mātuʻá mei hono ʻoatu haʻane fakakaukau fakafoʻituitui. Ka, te ne fakaava ʻa e Tohitapú pea tokoniʻi ʻa e tokotahá ke ne fakakaukau lelei ai ki he ngaahi tefitoʻi moʻoni ʻoku kau ki aí. Te ne ngāueʻaki nai ʻa e Watch Tower Publications Index, kapau ʻoku ala maʻu, ke fakahā ʻa e meʻa kuo leaʻaki ʻe he “tamaioeiki agatonu mo boto” ʻi he tuʻunga-lea ko iá ʻi he ngaahi peesi ʻo e Taua Leʻo mo e ngaahi tohi kehé. (Mātiu 24:​45, PM) Fēfē ʻo ka hili iá pea fai ʻe he tokotaha Kalisitiané ia ha fili ʻoku ʻikai hā ngali fakapotopoto ki he tokotaha mātuʻá? Kapau ko e fili ko iá ʻoku ʻikai ke fehālaaki fakahangatonu mei he ngaahi tefitoʻi moʻoni mo e ngaahi lao ʻa e Tohitapú, ʻe ʻilo ʻe he tokotaha Kalisitiané ʻoku ʻiloʻi ʻe he tokotaha mātuʻá ʻa e totonu ʻa e tokotahá ke ne fai ha fili peheé, ʻi hono ʻilo “kuo pau ke taki taha fua ʻene kavenga aʻana.” Kae kehe, ʻoku totonu ke manatuʻi ʻe he tokotaha Kalisitiané ʻa e pehē ko ia “ʻilonga pe meʻa ʻoku to ʻe ha tangata, ko ia ia te ne utu foki.”​—Kalētia 6:​5, 7.

13. ʻI he ʻikai ko hano ʻoatu ha ngaahi tali fakahangatonu ki he ngaahi fehuʻí pe ko hano ʻoatu ʻa ʻenau ngaahi fakakaukau pē ʻa kinautolú, ko e hā ʻoku tokoniʻi ai ʻe he kau mātuʻá ʻa e niʻihi kehé ke nau fakakaukau lelei ʻi he ngaahi meʻa ko iá?

¹³ Ko e hā ʻoku fai pehē ai ʻa e tokotaha mātuʻa taukeí ʻi he foungá ni? ʻOku ʻikai toe siʻi hifo ʻi he ʻuhinga ʻe ua. ʻUluakí, naʻe tala ʻe Paula ki he fakatahaʻanga ʻe taha naʻe ʻikai ko ia ‘ke pule ki heʻenau tuí.’ (2 Kolinitō 2:2 [1:​24, PM]) ʻI hono tokoniʻi ʻe he tokotaha mātuʻá ʻa hono tokouá ke ne fakakaukau lelei ʻi he Tohitapú pea fai ʻene fili pē ʻaʻaná ʻo fakatuʻunga aí, ʻokú ne faʻifaʻitaki ai ki he fakakaukau ʻa Paulá. ʻOkú ne ʻiloʻi ʻoku ʻi ai ʻa e ngaahi fakangatangata ʻo hono mafaí, ʻo hangē pē ko Sīsuú naʻá ne ʻilo naʻe ʻi ai ʻa e ngaahi fakangatangata ki hono mafaí. (Luke 12:​13, 14; Siutasi 9) ʻI he taimi tatau pē, ʻoku mateuteu ʻa e kau mātuʻá ke ʻoatu ha akonaki fietokoni, naʻa mo ha akonaki mālohi Fakatohitapu, ʻo ka fiemaʻu. Ko hono uá, ʻokú ne akoʻi hono kaungā Kalisitiané. Naʻe pehē ʻe he ʻaposetolo ko Paulá: “Ko e meʻakai malohi ʻoku ʻanautolu ʻoku matuʻotuʻa, ʻa kinautolu ʻa ia ko e meʻa ʻi heʻenau faʻa fai, kuo ako honau ngaahi ongoʻanga ke sivi ʻa e lelei mo e kovi.” (Hepelū 5:14) Ko ia ai, ke tupu ʻo matuʻotuʻa, kuo pau ke tau ngāueʻaki hotau ongoʻanga kuo akoʻí, ʻo ʻikai ke fakafalala maʻu pē ki ha taha kehe ke ne ʻomai kiate kitautolu ʻa e ngaahi talí. ʻI hono fakahāhā ʻe he tokotaha mātuʻá ki hono kaungā Kalisitiané ʻa e founga ke fakakaukau lelei ai ʻi he Tohitapú, ʻokú ne tokoniʻi ai ia ʻi he foungá ni ke ne fakalakalaka.

14. ʻOku malava fēfē ke fakahāhā ʻe he kau matuʻotuʻá ʻoku nau falala kia Sihova?

¹⁴ ʻOku malava ke tau tui ʻe hanga ʻe Sihova ko e ʻOtuá ʻo tataki ʻa e loto ʻo e kau lotu moʻoní ʻaki hono laumālie māʻoniʻoní. Ko ia, ko e kau Kalisitiane matuʻotuʻá ʻoku nau fakatangi ke aʻu ki he ngaahi loto ʻo honau ngaahi tokouá, ʻo kōlenga kiate kinautolu, ʻo hangē ko ia naʻe fai ʻe he ʻaposetolo ko Paulá. (2 Kolinitō 8:8; 10:1; Filimone 8, 9) Naʻe ʻilo ʻe Paula naʻe tautefito ki he kau taʻemāʻoniʻoní, ʻikai ko e kau māʻoniʻoní, naʻe fiemaʻu ki ai ʻa e ngaahi lao fakaikiiki ki hono ʻai kinautolu ke anga-tonú. (1 Tīmote 1:9) Naʻá ne fakahaaʻi, ʻo ʻikai ko e mahalo kovi pe taʻefalala, ka ko e tui falala ki hono ngaahi tokouá. Naʻá ne tohi ki he fakatahaʻanga ʻe taha: “Oku mau falala ki he Eiki koeuhi ko kimoutolu.” (2 Tesalonaika 3:​4, PM) Ko e tui, falala, mo e loto-maʻu ʻa Paulá ʻoku pau naʻe kaunga lahi ia ki hono ueʻi ʻa e kau Kalisitiane ko iá. ʻOku maʻu ʻe he kau mātuʻa mo e kau ʻovasia fefonongaʻaki ʻi he ʻaho ní ʻa e ngaahi taumuʻa meimei tatau. He fakatupu ongoʻi fakafoʻou lahi ē ka ko e kau tangata anga-tonú ni, ʻi heʻenau tauhi anga-ʻofa ʻa e tākanga ʻa e ʻOtuá!​—ʻAisea 32:​1, 2; 1 Pita 5:​1-3.

Moʻuiʻaki ʻa e Lao ʻa Kalaisí

15. Ko e hā ʻa e niʻihi ʻo e ngaahi fehuʻi ʻoku lava ke tau ʻeke hifo kiate kitautolu ke sio pe ʻoku tau ngāueʻaki ʻa e lao ʻa Kalaisí ʻi hotau vahaʻangatae mo e ngaahi tokouá?

¹⁵ ʻOku fiemaʻu kiate kitautolu kātoa ke tau sivisiviʻi tuʻumaʻu kitautolu ke sio pe ʻoku tau moʻuiʻaki mo poupouʻi ʻa e lao ʻa Kalaisí. (2 Kolinitō 13:5) Ko hono moʻoní, ko e kotoa ʻo kitautolú ʻoku lava ke maʻu ʻa e ʻaonga ʻi he ʻeke hifo: ‘ʻOku ou fakatupu langa hake pe fakaanga? ʻOku ou fakakaukau mafamafatatau pe tōtuʻa? ʻOku ou fakahāhā ha fakaʻatuʻi ki he niʻihi kehé pe vilitaki pē ʻi heʻeku ngaahi totonu pē ʻaʻakú?’ ʻOku ʻikai ke feinga ha Kalisitiane ke fai tuʻutuʻuni atu pe ko e hā ʻa e ngaahi lākanga ʻoku totonu pe ʻikai totonu ke laka ai ʻa hono tokouá ʻi he ngaahi meʻa ʻoku ʻikai fakahā papau ia ʻi he Tohitapú.​—Loma 12:1; 1 Kolinitō 4:6.

16. ʻOku lava fēfē ke tau tokoni ki he faʻahinga ʻoku nau maʻu ha ngaahi fakakaukau ʻikai lelei kiate kinautolú, ʻo fakahoko ai ha tafaʻaki mātuʻaki mahuʻinga ʻo e lao ʻa Kalaisí?

¹⁶ ʻI he ngaahi taimi faingataʻá ni, ʻoku mahuʻinga kiate kitautolu ke tau kumi ki he ngaahi founga ke fefakalototoʻaʻaki aí. (Hepelū 10:​24, 25; fakafehoanaki mo Mātiu 7:​1-5.) ʻI heʻetau sio ki hotau ngaahi tokouá mo e ngaahi tuofāfiné, ʻikai ʻoku mahuʻinga lahi ange kiate kitautolu ʻa honau ngaahi ʻulungaanga leleí ʻi honau ngaahi vaivaiʻangá? ʻOku mahuʻinga kia Sihova ʻa e tokotaha taki taha. Ko e meʻa fakamamahí, ʻoku ʻikai ongoʻi pehē ʻa e faʻahinga kotoa, naʻa mo e fekauʻaki mo kinautolu tonú. ʻOku hehema ʻa e tokolahi ke sio pē ki heʻenau ngaahi fehālaakí mo ʻenau ngaahi taʻehaohaoá. Ke fakalototoʻaʻi ʻa e faʻahinga peheé​—mo e niʻihi kehé​—ʻe lava ke tau talanoa ki ha toko taha pe toko ua ʻi he fakataha taki taha, ʻo ʻai ke nau ʻilo ʻa e ʻuhinga ʻoku tau mahuʻingaʻia ai ʻi heʻenau haʻú mo e tokoni ʻoku nau fai ʻi he fakatahaʻangá? Ko ha fiefia ē ka ko hono fakamaʻamaʻa honau mafasiaʻangá ʻi he foungá ni mo hono fakahoko ai ʻa e lao ʻa Kalaisí!​—Kalētia 6:2.

ʻOku Ngāue ʻa e Lao ʻa Kalaisí!

17. ʻI he ngaahi founga kehekehe fē ʻokú ke sio ʻoku ngāue ai ʻa e lao ʻa Kalaisí ʻi ho fakatahaʻangá?

¹⁷ ʻOku ngāue ʻa e lao ʻa Kalaisí ʻi he fakatahaʻanga Kalisitiané. ʻOku tau sio fakaʻaho ai​—ʻi he taimi ʻoku kau vēkeveke ai ʻa e kaungā Kau Fakamoʻoní ʻi hono fakahā atu ʻa e ongoongo leleí, ʻi he taimi ʻoku nau fefakafiemālieʻaki ai mo fefakalototoʻaʻakí, ʻi he taimi ʻoku nau faitau ai ke tauhi ʻa Sihova neongo ʻa e ngaahi palopalema faingataʻa lahi tahá, ʻi he taimi ʻoku feinga ai ʻa e ngaahi mātuʻá ke tauhi hake ʻa ʻenau fānaú ke ʻofa kia Sihova ʻaki ʻa e loto-fiefia, ʻi he taimi ʻoku faiakoʻaki ai ʻe he kau ʻovasiá ʻa e Folofola ʻa e ʻOtuá ʻi he ʻofa mo loto-māfana, ʻi hono ueʻi ʻa e tākangá ke maʻu ha loto-faivelenga lahi ke tauhi ʻa Sihova ʻo taʻengata. (Mātiu 28:​19, 20; 1 Tesalonaika 5:​11, 14) ʻI he taimi ʻoku tau hanga ai ʻi hotau tuʻunga fakatāutahá ʻo ʻai ʻa e lao ʻa Kalaisí ke ngāue ʻi heʻetau moʻui ʻatautolú, ko ha fiefia lahi ē ka ko e loto ʻo Sihová! (Palōvepi 23:15) ʻOkú ne finangalo ke moʻui taʻengata ʻa e faʻahinga kotoa ʻoku nau ʻofa ki heʻene lao haohaoá. ʻI he Palataisi ʻoku tuʻunuku maí, te tau sio ai ʻi he taimi ʻe haohaoa ai ʻa e faʻahinga ʻo e tangatá, ha taimi ʻe ʻikai ʻi ai ai ha kau maumau-lao, mo ha taimi ʻe mapuleʻi ai ʻa e hehema kotoa pē ʻa hotau lotó. Ko ha pale lāngilangiʻia ē ki he moʻuiʻaki ʻa e lao ʻa Kalaisí!

[Fakamatala ʻi lalo]

Ko e Hā Hoʻo Fakakaukaú?

◻ Ko e hā kuo ʻikai maʻu ai ʻe Puleʻanga-Haʻa-Kalisitiane ʻa e ʻuhinga ʻo e lao ʻa Kalaisí?

◻ ʻE anga-fēfē nai ʻetau ʻai ʻa e lao ʻa Kalaisí ke ngāue ʻi he fāmilí?

◻ Ke ngāueʻaki ʻa e lao ʻa Kalaisí ʻi he fakatahaʻangá, ko e hā kuo pau ke tau fakaʻehiʻehi mei aí, pea ko e hā kuo pau ke tau faí?

◻ ʻE anga-fēfē nai ke talangofua ʻa e kau mātuʻá ki he lao ʻa Kalaisí ʻi heʻenau ngaahi feangai mo e fakatahaʻangá?

[Fakatātā ʻi he peesi 29]

ʻOku ʻi ai ʻa e fiemaʻu lahi ʻe hoʻo kiʻi tamá ʻa e ʻofa

[Fakatātā ʻi he peesi 31]

He fakatupu ongoʻi fakafoʻou lahi ē ka ko siʻetau kau tauhi anga-ʻofá!