Ngaahi Tāpuaki Lahi Ange Fakafou ʻi he Fuakava Foʻoú

“[“Ko Sīsū,” NW] ʻoku . . . hoa mo e lelei hake ʻo e fuakava ʻoku ne nofo ko hono Fakalaloa.”​—HEPELU 8:6.

 1. Ko hai naʻe fakamoʻoniʻi ko e ‘hako ia ʻo e fefiné’ naʻe talaʻofa ʻi ʻĪtení, pea naʻe anga-fēfē hono ‘laiki ia ʻi he muivaʻé’?

HILI ʻa e angahala ʻa ʻĀtama mo ʻIví, naʻe fanongonongo ai ʻe Sihova ha fakamaau kia Sētane, ʻa e tokotaha naʻá ne kākaaʻi ʻa ʻIví, ʻaki ʻene pehē: “Te u ʻai ke mo fetāufehiʻa ʻaki, ʻa koe mo e fefine, pea ko ho hako mo hono hako; ʻe laiki ʻe ia ho ʻulu, pea te ke laiki ʻe koe ʻa hono muivaʻe.” (Senesi 3:15) ʻI he taimi naʻe papitaiso ai ʻa Sīsū ʻi he Vaitafe Sioataní ʻi he 29 T.S., naʻe toki hā ai ʻa e Hako naʻe talaʻofa ʻi ʻĪtení. ʻI heʻene pekia ʻi ha ʻakau fakamamahi ʻi he 33 T.S., naʻe fakahoko ai ha konga ʻo e kikite motuʻa ko iá. Naʻe hanga ai ʻe Sētane ʻo ‘laiki ʻa e muivaʻe’ ʻo e Hakó.

 2. Fakatatau ki he ngaahi lea tonu ʻa Sīsuú, ʻoku anga-fēfē ʻa e ʻaonga ʻa ʻene pekiá ki he faʻahinga ʻo e tangatá?

² ʻOku fakafiefiá, he ko e kafo ko iá, neongo naʻe mātuʻaki mamahi, naʻe ʻikai ke tuʻuloa. Naʻe fokotuʻu hake ʻa Sīsū mei he maté ko ha laumālie taʻefaʻamate pea naʻe hāʻele hake ki heʻene Tamaí ki hēvani, ʻa ia naʻá ne foaki ange ai ʻa e mahuʻinga ʻa hono taʻataʻa ne lilingí ke “huhuʻiʻaki ha tokolahi.” Ko ia, naʻe hoko ai ʻo moʻoni ʻa ʻene ngaahi leá tonu: “Kuo pau ke hiki ki ʻolunga ʻa e Fanautama ʻa Tangata: koeʻuhi ko ia kotoa pe ʻoku tui ke ne maʻu ʻiate ia ʻa e moʻui taʻengata. He naʻe ʻofa pehe ʻa e ʻOtua ki māmani, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Mātiu 20:28; Sione 3:​14-16; Hepelu 9:​12-14) Ko e fuakava foʻoú ʻoku ʻi ai ʻene kaunga tefito ki hono fakahoko ʻo e kikite ʻa Sīsuú.

Ko e Fuakava Foʻoú

 3. Naʻe fuofua mātā ʻanefē kuo ngāue ʻa e fuakava foʻoú?

³ Taimi nounou pē ki muʻa ʻi heʻene pekiá, naʻe tala ange ʻe Sīsū ki hono kau muimuí, ko hono taʻataʻa naʻe lilingí “ko e toto fuakava [foʻou].” (Mātiu 26:28; Luke 22:20) Hili ʻa e ʻaho ʻe hongofulu ʻo ʻene hāʻele hake ki hēvaní, naʻe mātā ai kuo ngāue ʻa e fuakava foʻoú ʻi he taimi naʻe huaʻi hifo ai ʻa e laumālie māʻoniʻoní ki he kau ākonga nai ʻe toko 120 naʻe fakatahataha ʻi ha loki ʻi ʻolunga ʻi Selusalema. (Ngāue 1:15; 2:​1-4) Ko hono ʻomai ko eni ʻa e kau ākonga ʻe toko 120 ki he fuakava foʻoú, naʻe hā ai ko e “ʻuluaki” fuakavá, ʻa e fuakava Laó, kuo ʻikai toe ngāueʻaki ʻi he taimi ko ení.​—Hepelu 8:13.

 4. Naʻe ʻikai ke siaʻa ʻa e fuakava motuʻá ia? Fakamatalaʻi.

⁴ Naʻe ʻikai siaʻa ʻa e fuakava motuʻá ia? Halaʻatā. ʻOku moʻoni, koeʻuhí naʻe fetongi ia ʻi he taimi ko ení, naʻe ʻikai ai toe hoko ʻa ʻIsileli fakakakano ko e kakai makehe ʻa e ʻOtuá. (Mātiu 23:38) Ka naʻe ʻuhingá pē ko e talangataʻa ʻa ʻIsilelí mo ʻenau fakataleʻi ʻa e Tokotaha Pani ʻa Sihová. (Ekisoto 19:5; Ngāue 2:​22, 23) Neongo ia, ki muʻa pea fetongi ʻa e Laó, naʻá ne fakahoko ʻe ia ʻa e meʻa lahi. Naʻá ne tokonaki ʻe ia ʻi he laui senituli, ha hala ke fakaofiofi ai ki he ʻOtuá pea mo e maluʻanga mei he lotu loí. Naʻe ʻi loto ai ʻa e ngaahi fakamelomelo ʻo e fuakava foʻoú, pea ʻaki ʻa hono ngaahi feilaulau naʻe fai hokohokó, naʻe fakahāhaaʻi ai ʻa e mātuʻaki fiemaʻu ki he tangatá ʻa e huhuʻi mei he angahalá mo e maté. ʻOku moʻoni, ko e Laó naʻe hoko ia ko ha “fakaleʻo maʻa Kalaisi.” (Kaletia 3:​19, 24; Loma 3:20; 4:15; 5:12; Hepelu 10:​1, 2) Kae kehe, naʻe fakafou ʻi he fuakava foʻoú ʻa hono toki fakahoko kakato ʻa e tāpuaki naʻe talaʻofa kia ʻĒpalahamé.

Tāpuekina ʻa e Ngaahi Puleʻangá Fakafou ʻi he Hako ʻo ʻĒpalahamé

 5, 6. ʻI hono fakahoko tefito fakalaumālie ʻo e fuakava ʻa ʻĒpalahamé, ko hai ʻa e Hako ʻo ʻĒpalahamé, pea ko e puleʻanga fē naʻá ne fuofua maʻu ha tāpuaki fakafou ʻiate iá?

⁵ Naʻe talaʻofa ʻe Sihova kia ʻĒpalahame: “Ko ho hako ʻe [“tāpuekina,” NW] ai ʻa e ngaahi puleʻanga ʻo mamani.” (Senesi 22:18) ʻI he malumalu ʻo e fuakava motuʻá, naʻe tokolahi ʻa e kau muli anga-vaivai naʻe tāpuekina fakafou ʻi heʻenau feohi mo ʻIsilelí, ʻa e hako fakaepuleʻanga ʻo ʻĒpalahamé. Kae kehe, ʻi hono fakahoko tefito fakalaumālié, ko e Hako ʻo ʻĒpalahamé ko e tangata haohaoa pē taha. Naʻe fakamatalaʻi ʻeni ʻe Paula ʻi he taimi naʻá ne pehē ai: “Naʻe fai ʻa e ngaahi talaʻofa maʻa Epalahame mo hono hako. ʻOku ʻikai te ne pehe, Pea mo ho ngaahi hako, ʻo hange ko haʻane lau ki ha tokolahi; ka hange ko ʻene lau ki ha toko taha pe, ʻo pehe, Pea mo ho hako: ʻa ia ko Kalaisi.”​—Kaletia 3:16.

⁶ ʻIo, ko Sīsū ko e Hako ia ʻo ʻĒpalahamé, pea fakafou ʻiate Ia ʻe maʻu ai ʻe he ngaahi puleʻangá ha tāpuaki māʻolunga mamaʻo ange ʻi ha meʻa pē naʻe ala maʻu ki ʻIsileli fakakakano. Ko e moʻoni, ko e fuofua puleʻanga ke ne maʻu ʻa e tāpuaki ko ʻení ko ʻIsileli tonu pē. Ka ʻi he hili pē ʻa e Penitekosi ʻo e 33 T.S., naʻe pehē ʻe Pita ki ha kulupu ʻo ha kau Siu: “Ko kimoutolu ko e fanau ʻoku ʻamoutolu ʻa e kau palōfita, mo e fuakava naʻe fai ʻe he ʻOtua mo ʻetau ngaahi kui, heʻene folofola kia Epalahame, Pea ko ho hako ʻe [“tāpuekina,” NW] mei ai ʻa e ngaahi faʻahinga ʻo mamani. Pea ko e ʻOtua, ʻi heʻene fokotuʻu leva ʻene Sevaniti, naʻa ne fuofua fekau ia kiate kimoutolu, ke ne [“tāpuekina,” NW] kimoutolu ʻi he fakatafoki kimoutolu taki taha mei heʻene faikovi.”​—Ngāue 3:​25, 26.

 7. Ko e ngaahi puleʻanga fē naʻe tāpuekina fakafou ʻia Sīsū, ʻa e hako ʻo ʻĒpalahamé?

⁷ Naʻe vave pē ʻa e fakaaʻu atu ʻa e tāpuakí ki he kau Samēliá, pea toki hoko atu ki he kau Senitailé. (Ngāue 8:​14-17; 10:​34-48) ʻI he vahaʻa nai ʻo e 50 mo e 52 T.S., naʻe tohi ai ʻa Paula ki he kau Kalisitiane ʻi Kalētia ʻi ʻĒsia Mainá: “Ko e Tohitapu, ʻi heʻene vakai mamaʻo ʻi muʻa ʻa e fakatonuhia ʻe he ʻOtua ʻa e Senitaile mei he tui pe, ko ia naʻa ne malangaʻaki ʻa e kosipeli ʻi muʻa kia Epalahame, ʻo pehe, ʻE [“tāpuekina,” NW] ʻiate koe ʻa e faʻahinga kotoa pe. Ko ia ko kinautolu ʻoku ʻi he tui, [“ʻoku tāpuekina,” NW] fakataha mo siʻi tui ko Epalahame.” (Kaletia 3:​8, 9; Senesi 12:3) Neongo ko e tokolahi ʻo e kau Kalisitiane ʻi Kalētiá ko e “Senitaile,” naʻe tāpuekina kinautolu fakafou ʻia Sīsū koeʻuhi ko ʻenau tuí. ʻI he founga fē?

 8. Ki he kau Kalisitiane ʻi he ʻaho ʻo Paulá, ko e tāpuekina fakafou ʻi he Hako ʻo ʻĒpalahamé naʻe kau ki ai ʻa e hā, pea ko e toko fiha, ʻoku nau toki maʻu ha tāpuaki peheé?

⁸ Naʻe tala ange ʻe Paula ki he kau Kalisitiane Kalētia, ʻo e hā pē ʻātakai: “Kapau ko e konga ʻo Kalaisi ʻakimoutolu, pea ta ko e hako ʻo Epalahame ʻa kimoutolu, ko e ngaahi ʻea ʻo fakatatau ki he Talaʻofa.” (Kaletia 3:29) Ki he kau Kalētia ko iá, ko e tāpuaki fou ʻi he Hako ʻo ʻĒpalahamé naʻe kau ai ʻa ʻenau hoko ko e kau ʻinasi ʻi he fuakava foʻoú pea toe hoko ʻo kaungā-ʻea mo Sīsū, kaungāmeʻa mo Sīsū ʻi he hako ko ia ʻo ʻĒpalahamé. ʻOku ʻikai ke tau ʻilo ʻe kitautolu pe naʻe toko fiha ʻa e tokolahi ʻo ʻIsileli ʻo e kuonga muʻá. Ko e meʻa pē ʻoku tau ʻiló, naʻa nau hoko ʻo “tokolahi . . . ʻo hange ko e ʻoneʻone ʻi he matatahi.” (1 Tuʻi 4:20) Ka, ʻoku tau ʻilo ʻe kitautolu ia ʻa e tokolahi fakakātoa ʻo e ngaahi kaungāmeʻa ʻo Sīsū ʻi he hako fakalaumālié​—ko e toko 144,000. (Fakahā 7:4; 14:1) ʻOku haʻu ʻa e toko 144,000 ko iá mei he “matakali fulipē mo e lea, mo e faʻahinga mo e puleʻanga” ʻo e faʻahinga ʻo e tangatá, pea kau ʻi hono toki fakahoko ki he niʻihi kehé ʻa e ngaahi tāpuaki ʻo e fuakava ʻa ʻĒpalahamé.​—Fakahā 5:9.

Ko ha Kikite Kuo Fakahoko

 9. ʻOku anga-fēfē hono maʻu ʻe he faʻahinga ko ia ʻi he fuakava foʻoú ʻa e lao ʻa Sihová ʻi loto ʻiate kinautolú?

⁹ ʻI hono tomuʻa tala ʻo e fuakava foʻoú, naʻe tohi ʻe Selemaia: “Ko eni ʻa e kovinanite te u fai mo e fale ʻo Isileli hili ʻa e taimi ko é​—ko Sihova eni mei he Taʻehamai​—te u ʻai ki loto ʻeku lao, ʻio, te u tongi ia ki honau loto.” (Selemaia 31:33) Ko ha ʻulungaanga ia ʻo e faʻahinga ʻoku ʻi he fuakava foʻoú ko ʻenau tauhi kia Sihova fakafou ʻi he ʻofá. (Sione 13:35; Hepelu 1:9) Ko e lao ʻa Sihová ʻoku tohi ia ʻi honau lotó, pea ʻoku nau holi tōtōivi ke fai hono finangaló. Ko e moʻoni, naʻe ʻofa lahi ʻa e faʻahinga anga-tonu tāutaha ʻi ʻIsileli ʻo e kuonga muʻá ki he lao ʻa Sihová. (Sāme 119:97) Ka ko e tokolahi naʻe ʻikai. Ka naʻa nau kei hoko pē ko e konga ʻo e puleʻangá. Heʻikai lava ke nofo maʻu ha taha ʻi he fuakava foʻoú kapau ʻoku ʻikai tohi ʻa e lao ʻa e ʻOtuá ʻi hono lotó.

10, 11. Ki he faʻahinga ko ia ʻi he fuakava foʻoú, ʻi he founga fē ʻoku “nofo” ai ʻa Sihova “ko honau ʻOtua,” pea ʻe anga-fēfē ʻenau ʻilo kotoa kiate iá?

¹⁰ Naʻe toe pehē ʻe Sihova fekauʻaki mo e faʻahinga ʻoku ʻi he fuakava foʻoú: “Te u nofo ko honau ʻOtua, pea te nau nofo ko hoku kakai.” (Selemaia 31:33) ʻI ʻIsileli ʻo e kuonga muʻá, naʻe tokolahi ʻa e faʻahinga naʻa nau lotu ki he ngaahi ʻotua ʻo e ngaahi puleʻangá, ka naʻa nau kei hoko pē ko e kau ʻIsileli. Makatuʻunga ʻi he fuakava foʻoú, naʻe fakatupu ai ʻe Sihova ha puleʻanga fakalaumālie, ko e “Isileli oe Otua,” ke fetongiʻaki ʻa e ʻIsileli fakakakanó. (Kaletia 6:​16, PM; Mātiu 21:43; Loma 9:​6-8) Kae kehe, heʻikai ke kei hoko ha taha ko ha konga ʻo e puleʻanga fakalaumālie foʻoú kapau kuo tuku ʻene lotu kia Sihová pea kiate ia tokotaha pē.

¹¹ Naʻe toe pehē ʻe Sihova: “Te nau ʻilo au kotoa pe, ʻo fai mei he siʻi ki he lahi.” (Selemaia 31:34) ʻI ʻIsileli, naʻe mātuʻaki tukunoaʻi pē ʻe he tokolahi ia ʻa Sihova, ʻo nau pehē tokua: “ʻE ʻikai ʻomi ʻe Sihova ha lelei, pea ʻe ʻikai te ne ʻomi ha kovi.” (Sefanaia 1:12) Heʻikai kei hoko ha taha ko ha konga ʻo e ʻIsileli ʻo e ʻOtuá kapau ʻokú ne tukunoaʻi ʻa Sihova pe uliʻi ʻa e lotu maʻá. (Mātiu 6:24; Kolose 3:5) Ko e kau ʻIsileli fakalaumālié “ko e kakai ʻoku ʻilo ʻa honau ʻOtua.” (Taniela 11:32) ʻOku nau fiefia ‘ke fai ke ʻilo ʻa e ʻOtua moʻonia pe tahá, pea mo Sīsū Kalaisi.’ (Sione 17:3) Ko hono ʻiloʻi ʻo Sīsuú ʻokú ne fakaloloto ange ai ʻenau ʻiloʻi ʻa e ʻOtuá koeʻuhí, ʻi ha founga makehe, ko Sīsū “ko ia ia naʻa ne fakamatala [ʻa e ʻOtuá].”​—Sione 1:18; 14:​9-11.

12, 13. (a) ʻOku makatuʻunga ʻi he hā ʻa hono fakamolemoleʻi ʻe Sihova ʻa e ngaahi angahala ʻa e faʻahinga ko ia ʻi he fuakava foʻoú? (e) ʻI hono fakamolemoleʻi ko ia ʻo e ngaahi angahalá, ʻoku anga-fēfē ʻa e māʻolunga ange ʻa e fuakava foʻoú ʻi he fuakava motuʻá?

¹² Fakaʻosí, naʻe talaʻofa ʻe Sihova: “Te u fakamolemole ʻenau kovi, pea ko ʻenau ngaahi angahala ʻe ʻikai te u toe manatua.” (Selemaia 31:34e) Naʻe fakakau ʻi he Lao ʻa Mōsesé ʻa e ngaahi tuʻutuʻuni ʻe laui ngeau kuo hiki, ʻa ia naʻe fekau ke talangofua ki ai ʻa e kau ʻIsilelí. (Teutalonome 28:​1, 2, 15) Ko kinautolu kotoa pē naʻe maumauʻi ʻa e Laó, naʻa nau foaki ʻa e ngaahi feilaulau ke ʻufiʻufiʻaki ʻenau ngaahi angahalá. (Livitiko 4:​1-7; 16:​1-31) Naʻe hoko ʻo tui ʻa e kau Siu tokolahi ʻe malava pē ke nau hoko ʻo māʻoniʻoni fakafou ʻi heʻenau ngaahi ngāué tonu ʻo fakatatau ki he Laó. Ka, ko e kau Kalisitiané ia, ʻoku nau ʻilo heʻikai ʻaupito lava ke nau maʻu ʻa e māʻoniʻoní ʻaki ʻenau ngaahi ngāué tonu. ʻOku ʻikai lava ke nau kalofi ʻa e angahalá. (Loma 5:12) ʻI he malumalu ʻo e fuakava foʻoú, ko ha tuʻunga māʻoniʻoni ʻi he ʻao ʻo e ʻOtuá ʻe malava pē ia makatuʻunga ʻi he feilaulau ʻa Sīsuú. Kae kehe, ko e tuʻunga peheé ko ha meʻaʻofa ia, ko ha anga-ʻofa maʻataʻatā ia mei he ʻOtuá. (Loma 3:​20, 23, 24) ʻOku kei fiemaʻu mai pē ʻe Sihova ia ʻa e talangofua ʻa ʻene kau sevānití. ʻOku pehē ʻe Paula ko e faʻahinga ko ia ʻoku ʻi he fuakava foʻoú ʻoku nau “ʻi he loto lao ʻa Kalaisi.”​—1 Kolinito 9:21.

¹³ Ko ia ai, ki he kau Kalisitiané foki ʻoku ʻi ai ha feilaulau ki he angahalá, ka ko e taha ia ʻoku mahuʻinga mamaʻo ange ʻi he ngaahi feilaulau ʻi he malumalu ʻo e fuakava Laó. Naʻe tohi ʻe Paula: “ʻIlonga ha taulaʻeiki [ʻi he malumalu ʻo e fuakava Laó], ʻoku ne tuʻu hokohoko ʻaho pe he fai ʻene ngaue, ʻio, he ʻatu ha tuʻo lahi ʻa e ngaahi feilaulau taau ai pe, ʻa ia ko e ngaahi feilaulau ʻe ʻikai siʻi lava ʻi ha taimi ke ʻave ʻaupito ʻa e angahala. Ka ko [Sīsū], hili ʻene ʻatu koeʻuhi ko e angahala ha foʻi feilaulau tofu pe taha ʻo taʻengata, naʻa ne nofo hifo mei he toʻomataʻu ʻo e ʻOtua.” (Hepelu 10:​11, 12) Koeʻuhi ko e kau Kalisitiane ʻi he fuakava foʻoú ʻoku nau ngāueʻi ʻenau tui ki he feilaulau huhuʻi ʻa Sīsuú, ʻoku fakahā ai ʻe Sihova ʻoku nau māʻoniʻoni, ʻo ʻikai haʻanau angahala, pea ʻoku nau ʻi ha tuʻunga ai ke pani kinautolu ke hoko ko hono ngaahi foha fakalaumālie. (Loma 5:1; 8:​33, 34; Hepelu 10:​14-18) ʻI he taimi ʻoku nau fai angahala ai koeʻuhi ko e taʻehaohaoa fakaetangatá, ʻe lava ke nau kole ki he fakamolemole ʻa Sihová, pea makatuʻunga ʻi he feilaulau ʻa Sīsuú, ʻoku fakamolemoleʻi kinautolu ʻe Sihova. (1 Sione 2:​1, 2) Kae kehe, kapau ʻoku nau fili ki ha ʻalunga angahala fai fakakaukauʻi pē, ʻe mole ai meiate kinautolu honau tuʻunga māʻoniʻoni pea mo e monū ʻo e hoko ko e kau ʻinasi ʻi he fuakava foʻoú.​—Hepelu 2:​2, 3; 6:​4-8; 10:​26-31.

Ko e Fuakava Motuʻá pea mo e Foʻoú

14. Ko e kamu fē naʻe fiemaʻu ʻi he malumalu ʻo e fuakava Laó? ʻi he malumalu ʻo e fuakava foʻoú?

¹⁴ Ko e kakai tangata ʻi he fuakava motuʻá naʻe kamu kinautolu ko ha fakaʻilonga naʻa nau ʻi he malumalu ʻo e Laó. (Livitiko 12:​2, 3; Kaletia 5:3) Hili ʻa e kamata ʻa e fakatahaʻanga Kalisitiané, naʻe ongoʻi ʻe he faʻahinga ia ʻe niʻihi ko e kau Kalisitiane ʻikai ko e Siú naʻe totonu ke toe kamu mo kinautolu. Ka ko e kau ʻaposetoló mo e kau mātuʻa ʻi Selusalemá, ʻi hono tataki ʻe he Folofola ʻa e ʻOtuá pea ʻe he laumālie māʻoniʻoní, naʻa nau ʻilo naʻe ʻikai fiemaʻu ʻeni ia. (Ngāue 15:​1, 5, 28, 29) Hili ha ngaahi taʻu siʻi mei ai, naʻe pehē ʻe Paula: “Talaʻehai ko e Siu moʻoni ia ʻoku Siu ʻi tuʻa pe; pea talaʻehai ko e kamu moʻoni ia ʻoku ha pe ʻi tuʻa, ʻi he kakano: kae kehe, ko e Siu moʻoni ia ʻoku Siu ʻi loto, pea ko e kamu moʻoni ʻa e kamu ʻo e loto, ʻa ia ʻoku tuʻunga ʻi ha laumalie ʻo ʻikai ʻi ha tohi.” (Loma 2:​28, 29) Ko e kamu fakakakanó, naʻa mo e fai ki he kau Siu fakakakanó, naʻe ʻikai haʻane toe mahuʻinga fakalaumālie ʻona ʻi he ʻafio mai ʻa Sihová. Ki he faʻahinga ko ia ʻoku ʻi he fuakava foʻoú, ko e lotó, ʻikai ko e kakanó, kuo pau ke kamú. Kātoa ʻa e ngaahi meʻa ʻi heʻenau fakakaukaú, holí, mo e tākiekina ʻo e lotó ʻa ia ʻoku taʻefakahōifua pe taʻemaʻa ʻi he ʻafio mai ʻa Sihová kuo pau ke tuʻusi atu ia.a Ko e tokolahi ʻi he ʻahó ni ko e fakamoʻoni moʻui kinautolu ki he mālohi ko ia ʻo e laumālie māʻoniʻoní ke ne liliuʻi ʻa e sīpinga ʻo e fakakaukaú ʻi he founga ko ʻení.​—1 Kolinito 6:​9-11; Kaletia 5:​22-24; Efeso 4:​22-24.

15. ʻOku anga-fēfē ʻa hono fakahoa ʻa ʻIsileli fakakakano mo e ʻIsileli ʻo e ʻOtuá ʻi he fekauʻaki mo e tuʻunga pule fakatuʻí?

¹⁵ ʻI he fokotuʻutuʻu ʻo e fuakava Laó, ko Sihova naʻe Tuʻi ki ʻIsilelí, pea faai mai e taimí naʻá ne fakahoko mai hono tuʻunga-haú fakafou ʻi he ngaahi tuʻi fakaetangata ʻi Selusalema. (Aisea 33:22) ʻOku toe Tuʻi foki ʻa Sihova ki he ʻIsileli ʻo e ʻOtuá, ʻa e ʻIsileli fakalaumālié, pea kuó ne pule, talu mei he 33 T.S., fakafou ʻia Sīsū Kalaisi, ʻa ia kuó ne maʻu “ʻa e pule . . . ʻi langi pea ki mamani.” (Mātiu 28:18; Efeso 1:​19-23; Kolose 1:​13, 14) ʻI he ʻahó ni, ʻoku ʻiloʻi ʻe he ʻIsileli ʻo e ʻOtuá ʻa Sīsū ko e Tuʻi ʻo e Puleʻanga fakahēvani ʻo e ʻOtuá, ʻa ia naʻe fokotuʻu ʻi he 1914. Ko Sīsuú ko ha Tuʻi mātuʻaki lelei lahi hake ia ʻia Hesekaia, Siosaia, pea mo e ngaahi tuʻi anga-tonu kehe ʻo ʻIsileli ʻo e kuonga muʻá.​—Hepelu 1:​8, 9; Fakahā 11:15.

16. Ko e faʻahinga tuʻunga taulaʻeiki fēfē ʻa e ʻIsileli ʻo e ʻOtuá?

¹⁶ Ko ʻIsilelí naʻe ʻikai ko ha puleʻanga pē, ka naʻá ne toe maʻu mo ha tuʻunga taulaʻeiki pani. ʻI he 33 T.S., naʻe fetongi ai ʻe he ʻIsileli ʻo e ʻOtuá ʻa e ʻIsileli fakakakanó pea hoko ai ko e “sevaniti” ʻa Sihova, ko ʻene “kau fakamoʻoni.” (Aisea 43:10) Ko e ngaahi lea ʻa Sihova ki ʻIsileli ʻoku hiki ʻi he Aisea 43:21 mo e Ekisoto 19:​5, 6 ʻo faai mai, ʻoku ngāueʻaki ia ki he ʻIsileli fakalaumālie ʻo e ʻOtuá. Ko e puleʻanga foʻou fakalaumālie ʻo e ʻOtuá, ʻoku hoko ia he taimí ni ko e “haʻa fili, ko e tuʻunga taulaʻeiki fakatuʻi, ko e kakai tapu, ko e faʻahinga ʻoku maʻane meʻa tonu,” ʻoku fakafatongiaʻaki ki hono ‘ongoongoa atu ʻa e ngaahi lelei ʻo ʻene ʻAfió.’ (1 Pita 2:9) Kātoa ʻa kinautolu ʻi he ʻIsileli ʻo e ʻOtuá, ʻa e kau tangata mo e kau fefine, ʻoku faʻu ia ko ha tuʻunga taulaʻeiki kuo fakatahatahaʻi. (Kaletia 3:​28, 29) ʻI he hoko ko e konga hono ua ʻo e hako ʻo ʻĒpalahamé, ʻoku nau lea ai he taimí ni: “Mou fiefia, ʻa e ngaahi puleanga, fakataha mo hoʻona kakai.” (Teutalonome 32:43) Ko e faʻahinga ko ia ʻo e ʻIsileli fakalaumālié ʻoku kei toe ʻi māmaní ʻoku faʻuʻaki ia ʻa e “tamaioeiki agatonu mo boto.” (Mātiu 24:​45-47, PM) Ko e toki feohi fakataha pē mo kinautolú ʻe lava ai ke fai ʻa e ngaahi ngāue toputapu ʻoku fakahōifua ki he ʻOtuá.

Ko e Puleʻanga ʻo e ʻOtuá​—Ko Hono Fakahoko Fakaʻosí

17. Ko e fanauʻi hā ʻoku hokosia ʻe he faʻahinga ʻoku ʻi he fuakava foʻoú?

¹⁷ Ko e kau ʻIsileli naʻe fāʻeleʻi hili ʻa e 1513 K.M., naʻa nau ʻi he fuakava Laó ʻi honau fanauʻi maí. Ko e faʻahinga ko ia ʻoku ʻomi ʻe Sihova ki he fuakava foʻoú ʻoku nau toe hokosia ha fanauʻi​—ʻi honau tuʻungá, ko ha fanauʻi fakalaumālie. Naʻe tala ʻe Sīsū ʻa e meʻá ni ki he tangata Fālesi ko Nikotīmasí ʻi he taimi naʻá ne pehē ange ai: “Ko au e, ko au e, ʻoku ou tala atu, ʻIlonga ʻa ia ʻe ʻikai fanauʻi foʻou mei ʻolunga, ʻe ʻikai te ne lava ke mamata ki he Puleʻanga ʻo e ʻOtua.” (Sione 3:3) Ko e kau ākonga ʻe toko 120 ʻi he Penitekosi 33 T.S. naʻe hoko ko e fuofua faʻahinga taʻehaohaoa ia ʻo e tangatá ke hokosia ʻa e fanauʻi foʻou ko ʻení. ʻI hono fakahāhaaʻi ʻoku nau anga-tonu ʻi he malumalu ʻo e fuakava foʻoú, naʻa nau maʻu ʻa e laumālie māʻoniʻoní ko ha “meʻa fakaʻamanaki” ʻo honau tofiʻa fakatuʻí. (Efeso 1:14) Naʻe “fanauʻi mei he Laumālie” kinautolu ke nau hoko ko e ngaahi foha ohi ʻo e ʻOtuá, ʻo ʻai ai kinautolu ko e fanga tokoua ʻo Sīsū pea nau hoko ai ʻo “kaungā-ea mo Kalaisi.” (Sione 3:6; Loma 8:​16, 17) Ko ʻenau hoko ʻo “fanauʻi foʻou” naʻe fakaava ai ʻa e hala ki he ngaahi ʻamanaki fakaofo.

18. ʻI he hoko ʻo fanauʻi foʻoú ʻokú ne fakaava ai ʻa e matapā ki he ngaahi ʻamanaki fakaofo fēfē ki he faʻahinga ko ia ʻoku ʻi he fuakava foʻoú?

¹⁸ ʻI heʻene fakalaloa ki he fuakava foʻoú, naʻe toe fai ai ʻe Sīsū ha fuakava mo hono kau muimuí, ʻo pehē: “ʻOku ou tuʻutuʻuni ha puleʻanga moʻomoutolu, ʻo hange ko e tuʻutuʻuni ha puleʻanga moʻoku ʻe heʻeku ʻEiki.” (Luke 22:29) Naʻe fakatoka ʻe he fuakava Puleʻanga ko ʻení ʻa e hala ki hono fakahoko ʻo ha vīsone fakaofo, ʻoku hiki ʻi he Taniela 7:​13, 14, 22, 27. Naʻe sio ʻa Taniela “ko ha Taha hange ha hakoʻi tangata” ʻoku foaki ange ki ai ʻa e mafai fakatuʻi ʻe “Talumeimuʻa,” ʻe Sihova ko e ʻOtuá. Naʻe toki sio leva ʻa Taniela, “naʻe maʻu . . . ʻa e puleʻanga ʻe he faʻahinga tapu.” Ko Sīsū ʻa e tokotaha “hange ha hakoʻi tangata,” ʻa ia, naʻá ne maʻu ʻi he 1914, ʻa e Puleʻanga fakahēvaní meia Sihova ko e ʻOtuá. Ko ʻene kau ākonga pani ʻe he laumālié ko e “faʻahinga tapu” ia ʻa ia ʻoku nau kaungā ʻinasi mo ia ʻi he Puleʻanga ko iá. (1 Tesalonaika 2:12) ʻO anga-fēfē?

19, 20. (a) Ki he faʻahinga ko ia ʻi he fuakava foʻoú, ko e hā ʻa e fakahoko fakaʻosi mo lāngilangiʻia ʻe maʻu ʻe he talaʻofa ʻa Sihova kia ʻĒpalahamé? (e) Ko e hā ha toe fehuʻi ʻoku fiemaʻu ke fai ha tokanga ki ai?

¹⁹ Hili ʻenau maté, ko e faʻahinga pani ko ʻení ʻoku nau hangē ko Sīsuú ʻo fokotuʻu hake mei he maté ko e ngaahi meʻamoʻui laumālie taʻefaʻamate ke ngāue fakataha mo ia ko e ngaahi tuʻi mo e kau taulaʻeiki ʻi hēvani. (1 Kolinito 15:​50-53; Fakahā 20:​4, 6) He ʻamanaki lāngilangiʻia moʻoni ia! “Te nau Hau ʻi mamani,” ʻo ʻikai ko e fonua pē ko Kēnaní. (Fakahā 5:10) Te nau “maʻu . . . ʻa e ngaahi matanikolo ʻo honau ngaahi fili”? (Senesi 22:17) ʻIo, pea ʻi ha founga kuo fakapapauʻi, ʻi he taimi te nau sio ai ʻi hono fakaʻauha ʻo e paʻumutu fakalotu fakafilí, ʻa Pāpilone ko e Lahí, pea ʻi he taimi ʻe kau ai ʻa e faʻahinga pani ko ʻeni kuo toetuʻú mo Sīsū ʻi hono puleʻi a e ngaahi puleʻangá “ʻaki ha sepita ukamea” pea mo hono laiki ʻa e ʻulu ʻo Sētané. Te nau hoko ai ʻo kau ʻi hono fakahoko ʻo e konga fakaʻosi ʻo e kikite ʻi he Senesi 3:15.​—Fakahā 2:​26, 27; 17:14; 18:​20, 21; Loma 16:20.

²⁰ Ka neongo ia, te tau ʻeke nai, ʻOku kaunga pē ʻa e fuakava ʻa ʻĒpalahamé mo e fuakava foʻoú ia ki he ngaahi soulu anga-tonu ʻe toko 144,000 ko ʻení? ʻIkai, ʻoku ʻi ai ʻa e faʻahinga kehe ʻa ia ʻoku ʻikai kau fakahangatonu ʻi he ongo fuakava ko ʻení ʻe tāpuekina kinautolu fakafou ai, ʻo hangē ko ia te tau vakai ki ai ʻi he kupu hoko maí.

[Fakamatala ʻi lalo]

ʻOkú Ke Manatuʻi?

◻ Ko fē taimi naʻe fuofua mātā ai kuo ngāue ʻa e fuakava foʻoú?

◻ Ko e hā naʻe fakahoko fakafou ʻi he fuakava motuʻá?

◻ Ko hai ʻa e Hako tefito ʻo ʻĒpalahamé, pea ʻi he fakahokohoko fē naʻe tāpuekina ai ʻa e ngaahi puleʻangá fakafou ʻi he Hako ko iá?

◻ Ki he toko 144,000, ko e hā ʻa e fakahoko fakaʻosi ʻo e fuakava ʻa ʻĒpalahamé mo e fuakava foʻoú?

[Fakatātā ʻi he peesi 15]

ʻOku maʻu ʻe he fakamolemole angahalá ha ola lelei lahi hake ia ki he faʻahinga ʻi he malumalu ʻo e fuakava foʻoú ʻi he faʻahinga ko ia ʻi he fuakava motuʻá