Ngaahi Meʻamoʻui Laumālié—Anga ʻo ʻEnau Uesia Kitautolú

 1. Ko e hā ʻoku totonu ai ʻetau loto ke ʻilo fekauʻaki mo e kau ʻāngeló?

KO E hoko ʻo ʻiloʻi ha tokotahá ʻoku faʻa kau ki ai ʻa hono ako ʻo ha meʻa fekauʻaki mo hono fāmilí. ʻI he tuʻunga meimei tatau, ko hono ʻiloʻi ʻa Sihova ko e ʻOtuá ʻoku kau ki ai ʻa e hoko ʻo maheni lelei ange mo hono fāmili fakaeʻāngeló. ʻOku ui ʻe he Tohi Tapú ʻa e kau ʻāngeló ko e “ngaahi foha ʻo e ʻOtua.” (Siope 38:7) Ko ia, ko e hā honau tuʻunga ʻi he taumuʻa ʻa e ʻOtuá? Kuo nau fakahoko ha ngafa ʻi he hisitōlia fakaetangatá? ʻOku uesia ʻe he kau ʻāngeló ʻa hoʻo moʻuí? Kapau ko ia, ʻoku anga-fēfē?

 2. Naʻe haʻu mei fē ʻa e kau ʻāngeló, pea ʻoku nau toko fiha?

² ʻOku fakamatala ʻa e Tohi Tapú ʻo tuʻo laui teau ki he kau ʻāngeló. Tau lāulea angé ki he niʻihi ʻo e ngaahi fakamatala ko ení ke ʻilo lahi ange ai fekauʻaki mo e kau ʻāngeló. Naʻe haʻu mei fē ʻa e kau ʻāngeló? ʻOku pehē ʻe he Kolose 1:16: “Naʻe tefito kiate ia [Sīsū Kalaisi] ʻa e ngaohi ʻo e meʻa kotoa pe, ʻa e meʻa ʻi he langi mo e meʻa ʻi mamani.” Ko ia ai, ko e meʻamoʻui laumālie kotoa pē ʻoku ui ko e kau ʻāngeló naʻe fakatupu tāutaha kinautolu ʻe Sihova ko e ʻOtuá fakafou ʻi hono ʻAlo ne ʻuluaki fakatupú. ʻOku toko fiha ʻa e kau ʻāngeló? ʻOku fakahaaʻi ʻe he Tohi Tapú naʻe fakatupu ʻa e kau ʻāngelo ʻe laui teau miliona, pea ʻoku nau mālohi hono kotoa.—Sāme 103:20.a

 3. Ko e hā ʻoku tala mai ʻe he Siope 38:​4-7 ʻo fekauʻaki mo e kau ʻāngeló?

³ Ko e Folofola ʻa e ʻOtuá, ʻa e Tohi Tapú, ʻoku tala mai ai kiate kitautolu ʻi he taimi naʻe tanupou ai ʻa e māmaní, naʻe “kalaga fakafiefia ai ae gaahi foha kotoabe oe Otua.” (Siope 38:​4-7, PM) Ko ia naʻe ʻi ai ʻa e kau ʻāngeló ʻi he taimi lōloa ki muʻa ke fakatupu ʻa e tangatá, naʻa mo e ki muʻa ʻi he fakatupu ʻo e māmaní. ʻOku toe fakahaaʻi ʻe he kupu ko eni ʻo e Tohi Tapú ʻoku maʻu ʻe he kau ʻāngeló ʻa e ngaahi ongoʻi, he ʻoku pehē ai naʻa nau “hiva fiefia fakataha.” Fakatokangaʻi ange ko e “gaahi foha kotoabe oe Otua” naʻa nau fiefia fakataha. ʻI he taimi ko iá, ko e kau ʻāngeló kotoa naʻa nau hoko ko e konga ʻo ha fāmili fāʻūtaha naʻa nau tauhi kia Sihova ko e ʻOtuá.

 4. ʻOku anga-fēfē hono fakahaaʻi ʻe he Tohi Tapú ʻoku mahuʻingaʻia ʻa e kau ʻāngelo faitōnungá ʻi he ngaahi ngāue ʻa e tangatá?

⁴ Talu mei heʻenau sio tonu ʻi he fakatupu ʻo e ʻuluaki ongo meʻa fakaetangatá, kuo fakahā ai ʻe he ngaahi meʻamoʻui laumālie faitōnungá ʻa e mahuʻingaʻia vēkeveke ʻi he fāmili fakaetangata naʻe tupu ʻo fakaʻaʻau ke tokolahí pea ʻi hono fakahoko ʻo e taumuʻa ʻa e ʻOtuá. (Palovepi 8:​30, 31; 1 Pita 1:​11, 12) Kae kehe, ʻi he faai atu ʻa e taimí, kuo vakai hifo ai ʻa e kau ʻāngeló ko e tokolahi taha ʻo e fāmili fakaetangatá kuo nau tafoki mei he tauhi ki honau Tokotaha-Fakatupu ʻofá. ʻOku ʻikai ha veiveiua naʻe fakalotomamahiʻi ʻe he meʻá ni ʻa e kau ʻāngelo faitōnungá. ʻI he tafaʻaki ʻe tahá, ʻi he taimi pē ʻoku tafoki ai naʻa mo ha toko taha ʻi he tangatá kia Sihová, ʻoku ‘hoko ai ha fiefia ʻi he haʻohaʻonga ʻo e kau angeló.’ (Luke 15:10) Koeʻuhi ʻoku maʻu ʻe he kau ʻāngeló ʻa e tokanga loloto pehē ki he lelei ʻa e faʻahinga ko ia ʻoku tauhi ki he ʻOtuá, ʻoku ʻikai ha ofo ʻi hono toutou ngāueʻaki ʻe Sihova ʻa e kau ʻāngeló ke fakaivimālohiʻi mo maluʻi ʻa ʻene kau sevāniti faitōnunga ʻi māmaní. (Hepelu 1:​7, 14) Vakai angé ki ha ngaahi fakatātā.

 5. Ko e hā ʻa e ngaahi fakatātā ʻo e poupou fakaeʻāngelo ʻoku tau maʻu ʻi he Tohi Tapú?

⁵ Naʻe tokoniʻi ʻe ha ongo ʻāngelo ʻa e tangata māʻoniʻoni ko Loté mo hono ongo ʻofefiné ke nau hao moʻui ʻi he fakaʻauha ʻo e ongo kolo fulikivanu ko Sōtoma mo Komolá ʻaki hono tataki kinautolu ki tuʻa mei he feituʻu ko iá. (Senesi 19:​15, 16) ʻI ha ngaahi senituli ki mui ai, naʻe lī ai ʻa e palōfita ko Tanielá ki ha ʻana ʻo e fanga laioné, ka naʻá ne hao mei hono fakalaveaʻí peá ne pehē: “Kuo fekau ʻe hoku ʻOtua ʻene angelo, pea kuo ne tapuni ʻa e ngutu ʻo e fanga laione.” (Taniela 6:23 [6:22, PM]) ʻI he ʻuluaki senituli T.S., naʻe tukuange ai ʻe ha ʻāngelo ʻa e ʻapositolo ko Pitá mei he pilīsoné. (Ngāue 12:​6-11) ʻIkai ngata aí, naʻe poupouʻi ʻe ha kau ʻāngelo ʻa Sīsū ʻi he kamata ʻo ʻene ngāue fakafaifekau ʻi he māmaní. (Maake 1:13) Pea ʻi he taimi nounou ki muʻa ʻi he pekia ʻa Sīsuú, naʻe hā ai ha ʻāngelo kia Sīsū ʻo “ʻomi haʻane malohi.” (Luke 22:43) Ko ha fakafiemālie ē kuo pau naʻe hoko kia Sīsū ʻi he taimi mahuʻinga ʻaupito ko ia ʻi heʻene moʻuí!

 6. (a) ʻOku anga-fēfē hono maluʻi ʻe he kau ʻāngeló ʻa e kakai ʻa e ʻOtuá he ʻaho ní? (e) Ko e hā ʻa e ngaahi fehuʻi te tau lāulea ki ai he taimi ní?

⁶ ʻI he ʻaho ní, ʻoku ʻikai kei hā mai ai ʻa e kau ʻāngeló ki he kakai ʻa e ʻOtuá ʻi he māmaní. Neongo ʻa e taʻehāmai ki he mata fakaetangatá, ko e kau ʻāngelo mālohi ʻa e ʻOtuá ʻoku nau kei maluʻi pē ʻa hono kakaí, tautefito mei ha meʻa pē ʻoku fakatupu maumau fakalaumālie. ʻOku pehē ʻe he Tohi Tapú: “ʻOku ʻapitanga ʻa e angelo ʻa Sihova takatakai ki heʻene kau ʻapasia, ke fai honau fakahaofia.” (Sāme 34:7) Ko e hā ʻoku totonu ai ke fakafiemālie lahi ʻa e ngaahi lea ko iá kiate kitautolú? Koeʻuhi ʻoku ʻi ai ʻa e ngaahi meʻamoʻui laumālie fulikivanu fakatuʻutāmaki ʻoku nau loto ke fakaʻauha kitautolu! Ko hai kinautolu? Ko ʻenau haʻú mei fē? ʻOku anga-fēfē ʻenau feinga ke fakatupu ha maumau kiate kitautolú? Ke ʻiloʻi iá, tau vakai nounou angé ki he meʻa naʻe hoko ʻi he kamata ʻa e hisitōlia ʻo e tangatá.

 7. Ko e hā ʻa e lahi ʻo e lavameʻa ʻa Sētane ʻi hono fakatafokiʻi ʻa e kakaí mei he ʻOtuá?

⁷ Hangē ko ia naʻa tau ako ki ai ʻi he Vahe 3 ʻo e tohí ni, ko e taha ʻo e kau ʻāngeló naʻá ne fakatupu ha holi ke pule ki he niʻihi kehé peá ne tafoki ai mei he ʻOtuá. Ki mui ai, naʻe hoko ʻa e ʻāngeló ni ʻo ʻiloa ko Sētane ko e Tēvoló. (Fakahā 12:9) Lolotonga ʻa e ngaahi senituli ʻe 16 hili ʻene kākaaʻi ʻa ʻIví, naʻe lavameʻa ai ʻa Sētane ʻi hono fakatafokiʻi mei he ʻOtuá ʻa e meimei faʻahinga kotoa ʻo e tangatá tuku kehe pē ha faʻahinga faitōnunga tokosiʻi, hangē ko ʻĒpeli, ʻĪnoke mo Noá.—Hepelu 11:​4, 5, 7.

 8. (a) Naʻe anga-fēfē ʻa e hoko ʻa e kau ʻāngelo ʻe niʻihi ko e kau tēmenioó? (e) Ke hao moʻui ʻi he Lōmaki ʻo e ʻaho ʻo Noá, ko e hā naʻe pau ke fai ʻe he kau tēmenioó?

⁸ ʻI he ʻaho ʻo Noá, naʻe angatuʻu ai ʻa e kau ʻāngelo kehe kia Sihova. Naʻa nau liʻaki honau nofoʻanga ʻi he fāmili fakahēvani ʻo e ʻOtuá, pea nau hifo ki he māmaní ʻo nau ʻai ha sino fakakakano. Ko e hā hono ʻuhingá? ʻOku tau lau ʻi he Senesi 6:2: “Naʻe sio ʻe he ngaahi foha ʻo e ʻOtua ki he ngaahi ʻofefine ʻo e Tangata ʻoku nau hoihoifua; pea nau hanga ʻo mali mo ha niʻihi, ʻa ia pe naʻa nau loto ki ai.” Ka naʻe ʻikai fakaʻatā ʻe Sihova ko e ʻOtuá ke hokohoko atu ʻa e ngaahi tōʻonga ʻa e kau ʻāngeló ni pea mo hono fakameleʻi ʻo e faʻahinga ʻo e tangatá naʻe tupu mei aí. Naʻá ne ʻomai ki he māmaní ha lōmaki fakalūkufua ʻa ia naʻá ne tafiʻi ai ʻa e faʻahinga fulikivanu kotoa ʻo e tangatá pea fakamoʻui pē ʻa ʻene kau sevāniti faitōnungá. (Senesi 7:​17, 23) Ko ia ai, ko e kau ʻāngelo angatuʻú, pe ko e kau tēmenioó, naʻe fakamālohiʻi kinautolu ke nau liʻaki honau sino fakakakanó pea foki ki hēvani ʻi he tuʻunga ko e meʻamoʻui laumālie. Kuo nau ʻai ai kinautolu ki he tafaʻaki ʻa e Tēvoló, ʻa ia naʻá ne hoko ai ko e “Pule ʻo e kau tevolo [pe tēmenioó].”—Mātiu 9:34.

 9. (a) Ko e hā naʻe hoko ki he kau tēmenioó ʻi he taimi naʻa nau foki ai ki hēvaní? (e) Te tau lāulea ki he hā fekauʻaki mo e kau tēmenioó?

⁹ ʻI he foki ki hēvani ʻa e kau ʻāngelo talangataʻá, naʻe vakai kiate kinautolú ko e kau liʻekina, ʻo hangē pē ko honau pule ko Sētané. (2 Pita 2:4) Neongo ʻoku ʻikai te nau malava he taimí ni ke ʻai ʻa e sino fakakakanó, ʻoku nau kei fakahoko pē ha tākiekina kovi ʻaupito ki he tangatá. Ko hono moʻoní, ʻi he tokoni ʻa e kau tēmeniō ko ení, ʻoku hanga ai ʻe Sētane ʻo “kākāʻi ʻa mamani kātoa.” (Fakahā 12:9; 1 Sione 5:19) Anga-fēfē? ʻOku ngāueʻaki tefito ʻe he kau tēmenioó ʻa e ngaahi founga kuo faʻufaʻu ke kākaaʻi ʻaki ʻa e kakaí. (2 Kolinito 2:11) Tau vakai angé ki he niʻihi ʻo e ngaahi foungá ni.

10. Ko e hā ʻa e fakahaʻele faʻahikehe?

¹⁰ Ke kākaaʻi ʻa e kakaí, ʻoku ngāueʻaki ʻe he kau tēmenioó ʻa e fakahaʻele faʻahikehé. Ko e tōʻongafai ʻo e fakahaʻele faʻahikehé ko e fehokotaki ia mo e kau tēmenioó, fakatouʻosi ʻi ha founga fakahangatonu pea fakafou ʻi ha fakafofonga fakaetangata. ʻOku fakahalaiaʻi ʻe he Tohi Tapú ʻa e fakahaʻele faʻahikehé pea fakatokanga mai ke tau fakaʻehiʻehi mei he meʻa kotoa pē ʻoku fekauʻaki mo iá. (Kaletia 5:​19-21) ʻOku fai ʻe he fakahaʻele faʻahikehé ki he kau tēmenioó ʻa e meʻa ʻoku fai ʻe he mounú ki he kau toutaí. ʻOku ngāueʻaki ʻe ha tangata toutai ha mounu kehekehe ke pōʻaki ʻa e ika kalasi kehekehe. ʻI he tuʻunga meimei tatau, ʻoku ngāueʻaki ʻe he ngaahi laumālie fulikivanú ʻa e founga kehekehe ʻo e fakahaʻele faʻahikehé ke ʻomai ai ʻa e faʻahinga kehekehe ʻo e kakaí ki he malumalu ʻo ʻenau tākiekiná.

11. Ko e hā ʻa e tongafisi, pea ko e hā ʻoku totonu ai ke tau fakaʻehiʻehi mei aí?

¹¹ Ko e kalasi ʻe taha ʻo e mounu ʻa ia ʻoku ngāueʻaki ʻe he kau tēmenioó ko e tongafisí. Ko e hā ʻa e tongafisi? Ko ha feinga ke ʻilo fekauʻaki mo e kahaʻú pe fekauʻaki mo ha meʻa taʻeʻiloa. Ko e founga ʻe niʻihi ʻo e tongafisí ko e ʻasitalolosiá, ko e ngāueʻaki ʻo e pele fakatātaá, sio fakamamaʻu ki he pulu kilisitalá, tala ʻa e kahaʻú mei he laine ʻi he ʻaofinimá, mo e kumi ki he ngaahi meʻa fakahā fakamisiteli, pe fakaʻilonga, ʻi he ngaahi misí. Neongo ʻoku tui ʻa e kakai tokolahi ko hono ngāueʻaki ʻa e tongafisí ʻoku ʻikai hano maumau, ʻoku fakahaaʻi ʻe he Tohi Tapú ko e kau vavaló mo e ngaahi laumālie fulikivanú ʻoku nau ngāue fakataha. Hangē ko ení, ʻoku lave ʻa e Ngāue 16:​16-18 ki ha “faʻahikehe [pe tēmeniō] tongafisi” ʻa ia naʻá ne ʻai ha taʻahine ke ne malava ʻo fai ʻa e “kikite.” Ka naʻe mole meiate ia ʻa e malava ko ení ʻi he taimi naʻe tuli ai ki tuʻa meiate ia ʻa e tēmenioó.

12. Ko e hā ʻoku fakatuʻutāmaki ai ʻa e feinga ke fetuʻutaki mo e kau maté?

¹² Ko e toe founga ʻe taha ʻoku kākaaʻi ai ʻe he kau tēmenioó ʻa e kakaí ko hono fakalototoʻaʻi kinautolu ke nau kumi ki he kau maté. Ko e kakai ʻoku mamahi ʻi he mate ʻa ha taha ʻofeiná ʻoku faʻa kākaaʻi kinautolu ʻaki ʻa e ngaahi fakakaukau hala ʻo fekauʻaki mo e faʻahinga kuo maté. ʻE ʻomai nai ʻe ha tokotaha fakahaʻele faʻahikehe ha fakamatala makehe, pe lea nai ʻi ha leʻo ʻa ia ʻoku hā ngali ko e leʻo ia ʻo ha tokotaha kuo mate. Ko hono olá, kuo hoko ai ʻa e kakai tokolahi ʻo tuipau ko e kau maté ʻoku nau moʻui moʻoni pea ko e fetuʻutaki kiate kinautolú ʻe tokoniʻi ai ʻa e kau moʻuí ke nau kātekina ʻenau mamahí. Ka ko ha faʻahinga “fakafiemālie” pehē ʻoku loi pē ia pea fakatuʻutāmaki foki. Ko e hā hono ʻuhingá? Koeʻuhi ʻoku lava ʻa e kau tēmenioó ke faʻifaʻitakiʻi ʻa e leʻo ʻo ha taha mate pea ʻoange ki ha tokotaha fakahaʻele faʻahikehe ha fakamatala fekauʻaki mo e tokotaha kuo maté. (1 Samiuela 28:​3-19) ʻIkai ngata aí, hangē ko ia kuo tau ako ki ai ʻi he Vahe 6, kuo ngata ʻa e moʻui ʻa e kau maté. (Sāme 115:17) ʻI heʻene peheé, “koia oku kumi ki he mate” kuo kākaaʻi ia ʻe he ngaahi laumālie fulikivanú pea ʻokú ne ngāue fakafepaki ki he finangalo ʻo e ʻOtuá. (Teutalonome 18:​10, 11, PM; Aisea 8:19) Ko ia ai, tokanga ke siʻaki ʻa e mounu fakatuʻutāmaki ko eni ʻoku ngāueʻaki ʻe he kau tēmenioó.

13. Ko e hā kuo malava ke fai ʻe he tokolahi ʻa ia naʻa nau ilifia ki muʻa ki he kau tēmenioó?

¹³ Ko e ngaahi laumālie fulikivanú ʻoku ʻikai ngata pē ʻi heʻenau kākaaʻi ʻa e kakaí ka ʻoku nau toe fakailifiaʻi foki kinautolu. ʻI he ʻahó ni, ʻoku ʻiloʻi ʻe Sētane mo ʻene kau tēmenioó ʻoku ‘toesiʻi pe honau taimi’ ʻoku toe ki muʻa ʻi hono ʻai ke ʻikai te nau toe ngāué, pea ʻoku nau toe fulikivanu ange ai ʻi he taimí ni ʻi ha toe taimi ki muʻa. (Fakahā 12:​12, 17) Naʻa mo ia, ko e kakai ʻe laui afe ʻa ia naʻa nau moʻui ʻo manavahē fakaʻaho ki muʻa ki he ngaahi laumālie fulikivanu ko iá kuo nau malava ke ʻatā mei ai. Naʻe anga-fēfē ʻenau fai ení? Ko e hā ʻe lava ke fai ʻe ha taha neongo kapau kuó ne ʻosi kau ʻi he fakahaʻele faʻahikehé?

14. ʻI he hangē ko e kau Kalisitiane ʻi ʻEfesō ʻi he ʻuluaki senitulí, ʻe lava fēfē ke tau ʻatā mei he ngaahi laumālie fulikivanú?

¹⁴ ʻOku tala mai ʻe he Tohi Tapú kiate kitautolu ʻa e founga fakatouʻosi ke talitekeʻi ʻaki ʻa e ngaahi laumālie fulikivanú mo e founga ke ʻatā ai meiate kinautolú. Vakai angé ki he faʻifaʻitakiʻanga ʻa e kau Kalisitiane ʻi he ʻuluaki senitulí ʻi he kolo ko ʻEfesoó. Naʻe fai ʻe he niʻihi ʻo kinautolu ʻa e fakahaʻele faʻahikehé ki muʻa ke nau hoko ko e kau Kalisitiané. ʻI he taimi naʻa nau fili ai ke ʻatā mei he fakahaʻele faʻahikehé, ko e hā naʻa nau faí? ʻOku pehē ʻe he Tohi Tapú: “Ko e niʻihi ʻi he faʻahinga naʻe ngaue fie mana naʻa nau haʻu mo kinautolu ʻenau ngaahi tohi, ʻo tutu ʻi he ʻao ʻo e kakai.” (Ngāue 19:19) ʻI hono fakaʻauha ʻenau ngaahi tohi fakafaimaná, ko e kau Kalisitiane foʻou ko iá naʻa nau fokotuʻu ai ha faʻifaʻitakiʻanga ki he faʻahinga ʻoku nau fakaʻamu ke talitekeʻi ʻa e ngaahi laumālie fulikivanú he ʻaho ní. Ko e kakai ʻoku nau loto ke tauhi kia Sihová ʻoku fiemaʻu ke nau toʻo ʻosi atu ʻa e meʻa kotoa pē ʻoku felāveʻi mo e fakahaʻele faʻahikehé. ʻOku kau ki ai ʻa e ngaahi tohi, makasini, faiva, fakatātā, mo e ngaahi fasi kuo hiki, ʻa ia ʻoku fakaʻaiʻai ai ʻa hono ngāueʻaki ʻo e fakahaʻele faʻahikehé pea mo ʻai ia ke hā ngali fakamānako mo fakafiefia. ʻOku kau foki ai ʻa e ngaahi meʻa ʻomi monū pe ngaahi meʻa kehe ʻoku tui ke hoko ko e maluʻi mei he koví.—1 Kolinito 10:21.

15. Ke talitekeʻi ʻa e ngaahi kongakau laumālie fulikivanú, ko e hā ʻoku fiemaʻu ke tau faí?

¹⁵ ʻI ha ngaahi taʻu hili hono fakaʻauha ʻe he kau Kalisitiane ʻi ʻEfesoó ʻenau ngaahi tohi faimaná, naʻe tohi ʻa e ʻapositolo ko Paulá kiate kinautolu: “Ko ʻetau milimilisino ni . . . mo e ngaahi kongakau laumalie ʻa e kovi.” (Fakaʻītali ʻamautolu; Efeso 6:12) Kuo ʻikai ke foʻi ʻa e kau tēmenioó. Naʻa nau kei feinga pē ke maʻu ha ʻaonga. Ko ia ai, ko e hā ʻa e toe meʻa naʻe fiemaʻu ke fai ʻe he kau Kalisitiane ko iá? “Kaeʻumaʻā,” ko e lea ia ʻa Paulá, “mou toʻo ʻa e pa ko e tui, ʻa ia te mou lava ʻaki ke tamateʻi ʻa e ngaahi ngahau vela kotoa pe ʻa e Fili [ʻa Sētane].” (Efeso 6:16) Ko e mālohi ange ʻetau pā ʻo e tuí, ko e lahi ange ai pē ia ʻetau talitekeʻi ʻa e ngaahi kongakau laumālie fulikivanú.—Mātiu 17:20.

16. ʻE lava fēfē ke tau ʻai ke mālohi ʻetau tuí?

¹⁶ ʻE lava fēfē leva ke tau ʻai ke mālohi ʻetau tuí? ʻAki hono ako ʻa e Tohi Tapú. Ko e mālohi ʻo ha ʻā ʻoku fakatuʻunga lahi ʻaupito ia ʻi he mālohinga ʻo hono fakavaʻé. ʻI he founga tatau, ko e mālohi ʻo ʻetau tuí ʻoku fakatuʻunga lahi ia ʻi he mālohinga ʻo hono makatuʻungá, ʻa ia ko e ʻilo totonu ʻo e Folofola ʻa e ʻOtuá, ko e Tohi Tapú. Kapau ʻoku tau lau mo ako fakaʻaho ʻa e Tohi Tapú, ʻe hoko ai ʻetau tuí ʻo mālohi. ʻI he hangē ha ʻā mālohí, ko e tui peheé te ne maluʻi kitautolu mei he tākiekina ʻa e ngaahi laumālie fulikivanú.—1 Sione 5:5.

17. Ko e hā ʻa e sitepu ʻoku fiemaʻu koeʻuhi ke talitekeʻi ʻa e ngaahi laumālie fulikivanú?

¹⁷ Ko e hā ʻa e toe sitepu kehe naʻe fiemaʻu ke fou ai ʻa e kau Kalisitiane ko ia ʻi ʻEfesoó? Naʻa nau fiemaʻu ʻa e maluʻi lahi ange koeʻuhi naʻa nau moʻui ʻi ha kolo naʻe tēmeniōʻia. Ko ia naʻe tala ange ai ʻe Paula kiate kinautolu: “ʻI he faingamalie kotoa pe mou fai hoʻomou lotu ʻi he Laumalie ʻaki ʻa e faʻahinga hu kehekehe mo e kole.” (Efeso 6:18) Koeʻuhi ʻoku tau nofo mo kitautolu foki ʻi ha māmani tēmeniōʻia, ko e lotu tōtōivi kia Sihova ki heʻene maluʻí ʻoku fiemaʻu ia ki hono talitekeʻi ʻa e ngaahi laumālie fulikivanú. Ko e moʻoni, ʻoku fiemaʻu ke tau ngāueʻaki ʻa e huafa ʻo Sihová ʻi heʻetau ngaahi lotú. (Palovepi 18:10) Ko ia ai, ʻoku totonu ke tau hanganaki lotu ki he ʻOtuá ke ne ‘fakahaofi kitautolu mei he Filí,’ ʻa Sētane ko e Tēvoló. (Mātiu 6:13) ʻE tali ʻe Sihova ʻa e ngaahi lotu tōtōivi peheé.—Sāme 145:19.

18, 19. (a) Ko e hā ʻoku lava ai ke tau fakapapauʻi ʻa e ikuna ʻi heʻetau tauʻi ʻa e ngaahi meʻamoʻui laumālie fulikivanú? (e) Ko e hā ʻa e fehuʻi ʻe tali ʻi he vahe hokó?

¹⁸ Ko e ngaahi laumālie fulikivanú ʻoku nau fakatuʻutāmaki, ka ʻoku ʻikai fiemaʻu ke tau moʻui ʻo ilifia kiate kinautolu kapau ʻoku tau fakafepakiʻi ʻa e Tēvoló pea ʻunuʻunu ofi ki he ʻOtuá ʻaki hono fai ʻa Hono finangaló. (Semisi 4:​7, 8) Ko e mālohi ʻo e ngaahi laumālie fulikivanú ʻoku fakangatangata. Naʻe tauteaʻi kinautolu ʻi he ʻaho ʻo Noá, pea te nau fehangahangai mo honau fakamaau fakaʻosí ʻi he kahaʻú. (Siutasi 6) Manatuʻi foki ʻoku tau maʻu ʻa e maluʻi ʻa e kau ʻāngelo mālohi ʻa Sihová. (2 Tuʻi 6:​15-17) Ko e kau ʻāngelo ko iá ʻoku nau mahuʻingaʻia lahi ʻi he sio mai ʻoku tau lavameʻa ʻi hono talitekeʻi ʻa e ngaahi laumālie fulikivanú. Ko e kau ʻāngelo māʻoniʻoní ʻoku nau fakalotolahiʻi kitautolu, hangē ko e laú. Ko ia tau nofo ofi kia Sihova mo hono fāmili ʻo e ngaahi meʻamoʻui laumālie faitōnungá. ʻOfa ke tau toe fakaʻehiʻehi mei he faʻahinga kotoa pē ʻo e fakahaʻele faʻahikehé pea ngāueʻaki maʻu pē ʻa e akonaki ʻi he Folofola ʻa e ʻOtuá. (1 Pita 5:​6, 7; 2 Pita 2:9) ʻE lava leva ai ke tau fakapapauʻi ʻa e ikuna ʻi heʻetau tauʻi ʻa e ngaahi meʻamoʻui laumālie fulikivanú.

¹⁹ Ka ko e hā kuo kātakiʻi ai ʻe he ʻOtuá ʻa e ngaahi laumālie koví pea mo e fulikivanu ʻa ia kuo fakatupunga ke faingataʻaʻia lahi fau ai ʻa e kakaí? Ko e fehuʻi ko iá ʻe tali ia ʻi he vahe hokó.