Hokohoko Atu ʻi he Tuʻunga ko e Kau Tangataʻifonua ʻo e Puleʻangá!
‘Tōʻongaʻaki ha anga ʻoku taau mo e ongoongo leleí.’—FIL. 1:27.
ʻE FĒFĒ HAʻO TALI?
Ko hai ʻe lava ke hoko ko e kau tangataʻifonua ʻo e Puleʻangá?
Ko e hā ʻoku fiemaʻu ke tau fai fekauʻaki mo e lea, hisitōlia, mo e ngaahi lao ʻo e Puleʻangá?
ʻOku anga-fēfē fakahaaʻi ʻe he kau tangataʻifonua ʻo e Puleʻangá ʻoku nau ʻofa ʻi he ngaahi tuʻunga ʻa e ʻOtuá?
1, 2. Ko e hā naʻe maʻu ai ʻe he akonaki ʻa Paulá ha ʻuhinga makehe ki he fakatahaʻanga ʻi Filipaí?
NAʻE fakalototoʻaʻi ʻe he ʻapositolo ko Paulá ʻa e fakatahaʻanga ʻi Filipaí ke nau ‘tōʻongaʻaki ha anga ʻoku taau mo e ongoongo leleí.’ (Lau ʻa e Filipai 1:27.) Ko e kupuʻi lea faka-Kalisi naʻe ngāueʻaki ʻe Paula ki he foʻi lea ko e “tōʻongaʻaki” ʻe toe liliu nai ia ko ha “hokohoko atu ʻi he tuʻunga ko e kau tangataʻifonua.” Ko e kupuʻi lea ko iá naʻe ʻi ai hono ʻuhinga makehe ki he fakatahaʻanga ʻi Filipaí. He ko e hā? Koeʻuhí ʻoku hā ko Filipaí ko e taha ia ʻo ha kulupu ʻo e ngaahi kolo filifili ʻa ia ko honau kakaí kuo foaki ki ai ha tuʻunga tangataʻifonua Loma. Ko e kau tangataʻifonua Loma ʻi Filipaí pea ʻi he kotoa ʻo e ʻEmipaea Lomá naʻa nau pōlepole ʻi honau tuʻungá pea maʻu ʻa e maluʻi makehe ʻi he malumalu ʻo e lao ʻa Lomá.
2 Ko e ngaahi mēmipa ʻo e fakatahaʻanga ʻi Filipaí naʻa nau maʻu ʻa e ʻuhinga lahi ange ki heʻenau pōlepolé. Naʻe fakamanatu ʻe Paula kia kinautolu ʻi he tuʻunga ko e kau Kalisitiane paní ko honau tangataʻifonuá “ʻoku ʻi he langí.” (Fil. 3:20) Ko e kau tangataʻifonua kinautolu, ʻikai ʻo ha kihiʻi ʻemipaea fakaetangata, ka ʻo e Puleʻanga ʻo e ʻOtuá. ʻI he tuʻunga ko iá, naʻa nau maʻu ai ʻa e maluʻi mo e ngaahi ʻaonga taʻealafakatataua.—ʻEf. 2:19-22.
3. (a) Ko hai ʻokú ne maʻu ʻa e faingamālie ke hoko ko e kau tangataʻifonua ʻo e Puleʻangá? (e) Ko e hā te tau lāulea ki ai ʻi he kupu ko ení?
3 Ko e ekinaki ko ia ʻa Paula ke ‘tōʻongaʻaki ha anga ʻoku taau mo e ongoongo leleí’ ʻoku ngāueʻaki tefito ia ki he faʻahinga te nau pule fakataha mo Kalaisi ʻi hēvaní. (Fil. 3:20) Ka ʻi hono fakalahi atú, ʻoku lava ke ngāueʻaki ia ki he faʻahinga te nau hoko ko e kakai ʻo e Puleʻanga ʻo e ʻOtuá ʻi he māmaní. He ko e hā? Koeʻuhí ko e kau Kalisitiane ʻosi fakatapui kotoa pē ʻoku nau tauhi ki he Tuʻi tatau, ʻa Sihova, pea kuo pau ke nau moʻui ʻo fakatatau ki he ngaahi tuʻunga tatau. (ʻEf. 4:4-6) ʻI he ʻahó ni, ʻoku ngāue mālohi ʻa e kakaí ke taau ke hoko ko e kau tangataʻifonua ʻo ha fonua lakalakaimonū. Huanoa hake ʻa e totonu ke tau fakamahuʻingaʻi ʻa e faingamālie ke hoko ko e kau tangataʻifonua ʻo e Puleʻangá! Ke fakalolotoʻi ʻetau houngaʻia ki he monū ko iá, tau lāulea angé ki he ngaahi faitatau ʻe niʻihi ʻi he vahaʻa ʻo e ngaahi fiemaʻu ki he hoko ko ha tangataʻifonua ʻo ha puleʻanga fakaetangata mo ha tangataʻifonua ʻo e Puleʻanga ʻo e ʻOtuá. Te tau toki lāulea leva ki he ngaahi meʻa ʻe tolu kuo pau ke tau fai kapau ʻoku fiemaʻu ke tau tauhi maʻu ʻa e lāngilangi ʻo e hoko ko e kau tangataʻifonua ʻo e Puleʻangá.
NGAAHI FIEMAʻU KI HE TANGATAʻIFONUÁ
4. Ko e hā ʻa e lea maʻa, pea ʻoku anga-fēfē ʻetau “leaʻaki” iá?
4 Ako ʻa e leá. ʻOku fiemaʻu ʻe he ngaahi puleʻanga fakaetangata ʻe niʻihi ʻa e faʻahinga ʻoku nau kole ki he tangataʻifonuá ke nau lea ʻi he lea tefito ʻa e fonuá. Naʻa mo e hili ʻa e hoko ko e tangataʻifonuá, ʻoku feinga nai ʻa e kakaí ʻi ha ngaahi taʻu ke poto ʻi he lea foʻoú. ʻE vave nai ʻenau ako ʻa e ngaahi lao ʻo e kalamá ka ʻoku fiemaʻu nai ʻa e taimi ke ako ke puʻaki totonu ʻa e ngaahi foʻi leá. ʻOku pehē pē, ʻoku fiemaʻu ʻe he Puleʻanga ʻo e ʻOtuá ʻa hono kau tangataʻifonuá ke nau ako ʻa e meʻa ʻoku ui ʻi he Tohi Tapú ko e “lea maa.” (Lau ʻa e Sēfanaia 3:9, “PM.”) Ko e hā ʻa e lea ko iá? Ko e moʻoni ia fekauʻaki mo e ʻOtuá pea fekauʻaki mo ʻene ngaahi taumuʻa hangē ko ia ʻoku maʻu ʻi he Tohi Tapú. ʻOku tau “leaʻaki” ʻa e lea maʻá ʻi he taimi ʻoku fakatatau ai hotau ʻulungāngá mo e ngaahi lao mo e ngaahi tefitoʻi moʻoni ʻa e ʻOtuá. Ko e kau tangataʻifonua ʻo e Puleʻanga ʻo e ʻOtuá ʻe vave nai ʻenau ako ʻa e ngaahi akonaki Fakatohitapu tefitó pea papitaiso. Kae kehe, naʻa mo e hili ʻenau papitaisó, kuo pau ke nau feinga mālohi ke “leaʻaki” ʻa e lea maʻá ke lelei mo lelei ange. ʻI he founga fē? Ko kitautolu taki taha ʻoku fiemaʻu ke tau ngāue ʻo fakatatau ki he meʻa ʻoku tau ʻilo fekauʻaki mo e ngaahi tefitoʻi moʻoni ʻa e Tohi Tapú.
5. Ko e hā ʻoku totonu ai ke tau ako ʻa e meʻa kotoa te tau malava fekauʻaki mo e hisitōlia ʻo e kautaha ʻa Sihová?
5 Ako ʻa e hisitōliá. Ko ha tokotaha ʻoku holi ke hoko ko ha tangataʻifonua ʻo ha puleʻanga fakaetangata kuo pau nai ke ne ako ʻa e meʻa fekauʻaki mo e hisitōlia ʻo e puleʻanga ko iá. ʻOku pehē pē, ko e faʻahinga ʻoku nau holi ke hoko ko e kau tangataʻifonua ʻo e Puleʻangá ʻoku lelei ke nau ako ʻa e meʻa kotoa pē te nau malava fekauʻaki mo e Puleʻanga ʻo e ʻOtuá. Fakakaukau ki he faʻifaʻitakiʻanga naʻe fokotuʻu ʻe he ngaahi foha ʻo Kolá, ʻa ia naʻa nau ngāue ʻi ʻIsileli motuʻa. Naʻa nau fiefia lahi ʻi Selusalema mo hono feituʻu faiʻanga lotú pea ʻi hono fakamatalaʻi ʻa e hisitōlia ʻo e koló. Naʻe ʻikai ko e makamaká mo e simá naʻe maongo lahi taha kia kinautolú ka ko e meʻa naʻe fakafofongaʻi ʻe he koló mo e feituʻu faiʻanga lotu ko iá. Ko Selusalemá ko e “kolo oe Tuʻi lahi,” ʻa Sihova, he ko e senitā ia ʻo e lotu maʻá. Ko e feituʻu ia naʻe akoʻi ai ʻa e Lao ʻa Sihová. Ko e kakai naʻe puleʻi ʻe he Tuʻi ʻo Selusalemá naʻe fakahāhā ki ai ʻe Sihova ʻene ʻaloʻofá. (Lau ʻa e Saame 48:1, 2, 9, 12, 13, “PM.”) Hangē ko kinautolú, ʻokú ke maʻu ha holi ke ako mo fakamatalaʻi ʻa e hisitōlia ʻo e konga fakaemāmani ʻo e kautaha ʻa Sihová? Ko e lahi ange hoʻo ako fekauʻaki mo e kautaha ʻa e ʻOtuá mo e anga ʻo e poupouʻi ʻe Sihova hono kakaí, ko e moʻoni ange ia ʻa e Puleʻanga ʻo e ʻOtuá kiate koé. Ko hoʻo holi ke malangaʻi ʻa e ongoongo lelei ʻo e Puleʻangá ʻe fakanatula pē ʻene tupulekiná.—Sel. 9:24; Luke 4:43.
6. Ko e hā ʻoku ʻuhinga lelei ai ʻa e fiemaʻu ʻe Sihova ke tau ako mo talangofua ki he ngaahi lao mo e ngaahi tefitoʻi moʻoni ʻo e Puleʻangá?
6 ʻIloʻi ʻa e ngaahi laó. ʻOku fiemaʻu ʻe he ngaahi puleʻanga fakaetangatá honau kakaí ke nau ako mo talangofua ki he ngaahi lao ʻo e fonuá. ʻOku hā ngali ʻuhinga lelei leva pē, ʻa e totonu ke ʻamanekina ʻe Sihova kitautolu ke tau ako mo talangofua ki he ngaahi lao mo e ngaahi tefitoʻi moʻoni ʻokú ne puleʻi ʻa e kotoa ʻo e kau tangataʻifonua ʻo e Puleʻangá. (ʻAi. 2:3; Sione 15:10; 1 Sio. 5:3) Ko e ngaahi lao fakaetangatá ʻoku faʻa fehālaaki pea taʻetotonu nai. ʻI hono kehé, “ko e lao ʻa Sihova ʻoku haohaoa.” (Saame 19:7) ʻOku tau fiefia ʻi he lao ʻa e ʻOtuá pea lau ʻene Folofolá ʻi he ʻaho taki taha? (Saame 1:1, 2) Ko e founga ʻe taha ʻe lava ke tau ako ai ʻa e lao ʻa e ʻOtuá ko ʻetau ako tonu ia. Heʻikai ha taha kehe ʻe lava ke ne fai eni maʻatautolu.
ʻOKU ʻOFA ʻA E KAU TANGATAʻIFONUA ʻO E PULEʻANGÁ ʻI HE NGAAHI TUʻUNGA ʻA E ʻOTUÁ
7. ʻOku moʻui ʻa e kau tangataʻifonua ʻo e Puleʻangá ʻo fakatatau ki he tuʻunga māʻolunga ange fē?
7 Ke kei hoko ko e kau tangataʻifonua ʻo e Puleʻangá, ʻoku fiemaʻu ke ʻoua te tau ʻilo pē ki he ngaahi tuʻunga ʻa e ʻOtuá kae toe pehē foki ke ʻofa ai. Ko e kau tangataʻifonua tokolahi ʻo e ngaahi puleʻanga fakaetangatá ʻoku nau pehē ʻoku nau loto-tatau mo e ngaahi lao mo e ngaahi tuʻunga ʻo e fonua ʻa ia ʻoku nau nofo aí. Kae kehe, ʻi he taimi ʻoku nau ʻilo ai ha fiemaʻu ʻoku taʻetotonu pea nau ongoʻi ʻoku ʻikai sio mai ha tahá, ʻoku nau maumauʻi leva ʻa e laó. ʻOku faʻa hoko, ko e kakai ko ení ko e “kau fakahōhōʻiaʻi ʻo e tangatá.” (Kol. 3:22) Ko e kau tangataʻifonua ʻo e Puleʻangá ʻoku nau moʻui ʻo fakatatau ki ha tuʻunga māʻolunga ange. ʻOku tau talangofua fiefia ki he ngaahi lao ʻa e ʻOtuá, naʻa mo e taimi ʻoku ʻikai sio mai ai ha tahá. Ko e hā hono ʻuhingá? Koeʻuhí ʻoku tau ʻofa ʻi he Tokotaha-Faʻu-Laó.—ʻAi. 33:22; lau ʻa e Luke 10:27.
8, 9. ʻE lava fēfē ke ke ʻiloʻi pe ʻokú ke ʻofa moʻoni ʻi he ngaahi lao ʻa e ʻOtuá?
8 ʻE anga-fēfē haʻo ʻilo pe ʻokú ke ʻofa moʻoni ʻi he ngaahi lao ʻa e ʻOtuá? Sivisiviʻi ʻa e founga ʻokú ke fakafeangai ai ʻi he taimi ʻokú ke maʻu ai ha akonaki fekauʻaki mo ha meʻa ʻokú ke ongoʻi ko ha fili fakafoʻituitui—ko e fakatātaá, ʻi he meʻa fekauʻaki mo e valá mo e teuteú. Ki muʻa ke hoko ko ha tangataʻifonua ʻo e Puleʻangá, naʻá ke saiʻia ange nai ke vala ʻaiʻainoaʻia pe fakatauele. ʻI he tupulaki hoʻo ʻofa ki he ʻOtuá, naʻá ke ako ai ke ʻai vala ʻi ha founga ʻoku fakalāngilangiʻi ai iá. (1 Tīm. 2:9, 10; 1 Pita 3:3, 4) Te ke ongoʻi nai ʻokú ke ʻai vala fakanānā he taimí ni. Kae fēfē kapau naʻe tala atu ʻe ha mātuʻa kiate koe ko hoʻo fili ʻo e valá ʻoku fakatupu loto-mamahi lahi ia ki ha kau malanga tokolahi ʻi he fakatahaʻangá? ʻE anga-fēfē haʻo tali? Te ke hoko ʻo tuli tonuhia, ʻita pe taʻemangoi? Ko ha lao tefito ʻo e Puleʻanga ʻo e ʻOtuá ko e kotoa ʻo e kau tangataʻifonuá ke faʻifaʻitaki kia Kalaisi. (1 Pita 2:21) Fekauʻaki mo e faʻifaʻitakiʻanga ʻa Sīsuú, naʻe tohi ʻe he ʻapositolo ko Paulá: “Tuku ki he tokotaha taki taha ʻo kitautolu ke ne fakahōhōʻiaʻi hono kaungāʻapí ki ha lelei kiate ia pea ke langa hake ai ia. He naʻa mo e Kalaisí naʻe ʻikai te ne fakahōhōʻiaʻi ʻa ia tonu.” (Loma 15:2, 3) Koeʻuhi ko e melino ʻi he fakatahaʻangá, ʻe loto-lelei ai ha Kalisitiane matuʻotuʻa ke ʻulutukua ʻo ʻikai fakamamahiʻi ʻa e konisēnisi ʻo e niʻihi kehé.—Loma 14:19-21.
9 Fakakaukau ki ha toe kaveinga ʻe ua ʻoku mātuʻaki mahuʻinga: ko ʻetau fakakaukau ki he fehokotaki fakasinó mo e vakai ki he nofo malí. Ko e faʻahinga ʻoku teʻeki ai ke nau hoko ko e kau tangataʻifonua ʻo e Puleʻanga ʻo e ʻOtuá ʻoku nau tali nai ʻa e fakasōtomá, lau ʻa e ʻata fakalieliá ko e meʻa fakaoli ʻikai kovi, pea fakakaukau ko e tonó mo e veté ko ha ongo meʻa fakafoʻituitui ʻataʻatā pē ia. Ko e kau tangataʻifonua ʻo e Puleʻangá kuo nau liʻaki ʻa e ngaahi fakakaukau sio nounou mo siokita peheé. Neongo ko e kau Kalisitiane tokolahi naʻa nau muʻaki maʻu ha tōʻonga moʻui taʻetaau, ʻoku nau vakai he taimí ni ki he fehokotaki fakasinó mo e nofo malí ko e ongo meʻaʻofa mei he ʻOtuá. ʻOku nau koloaʻaki ʻa e ngaahi tuʻunga māʻolunga ʻa Sihová pea ʻoku nau loto-tatau ʻaufuatō ko e faʻahinga ʻoku nau hokohoko atu ke kau ʻi he tōʻonga kovi fakafehokotaki fakasinó ʻoku ʻikai ke nau taau ke hoko ko e kau tangataʻifonua ʻo e Puleʻangá. (1 Kol. 6:9-11) Kae kehe, ʻoku nau toe ʻiloʻi ko e lotó ʻoku kākā. (Sel. 17:9) Ko ia ʻoku nau houngaʻia ʻi hono maʻu ʻa e ngaahi fakatokanga pau ʻokú ne tokoniʻi kinautolu ke tauhi maʻu ʻa e ngaahi tuʻunga fakaeʻulungaanga māʻolungá.
ʻOKU HOUNGAʻIA ʻA E KAU TANGATAʻIFONUA ʻO E PULEʻANGÁ ʻI HE NGAAHI FAKATOKANGÁ
10, 11. Ko e hā ʻa e ngaahi fakatokanga taimi tonu ʻoku ʻomai ʻe he Puleʻanga ʻo e ʻOtuá, pea ʻe anga-fēfē hoʻo ongoʻi fekauʻaki mo e ngaahi fakatokanga peheé?
10 ʻE tokonaki nai ʻe he ngaahi puleʻanga fakaetangatá ʻa e ngaahi fakatokanga ki he moʻuí fekauʻaki mo e meʻakaí mo e faitoʻó. ʻOku hā mahino, ʻoku ʻikai ke kovi ʻa e meʻakai mo e faitoʻo kotoa pē. Ka ʻo kapau ʻoku ʻomai ʻe ha koloa pau ha fakamanamana, ʻe ʻomai nai ʻe he puleʻangá ha ngaahi fakatokanga mafamafatatau ke maluʻi hono kau tangataʻifonuá. Kapau naʻe ʻikai ke fai pehē ʻa e puleʻangá, ʻe halaia ia ʻi he taʻetokanga. ʻOku pehē pē, ʻoku ʻomai ʻe he Puleʻanga ʻo e ʻOtuá ʻa e ngaahi fakatokanga taimi tonu fekauʻaki mo e ngaahi fakatuʻutāmaki pau fakaeʻulungaanga mo fakalaumālie. Hangē ko ení, ko e ʻInitanetí kuo hoko ia ko ha founga ʻaonga ke tokonaki ai ʻa e fetuʻutaki, ako mo e fakafiefia. ʻOku ngāueʻaongaʻaki ʻe he kautaha ʻa e ʻOtuá ʻa e ʻInitanetí pea fakahokoʻaki ʻa e lelei lahi. Kae kehe, ʻoku lahi ʻa e ngaahi saiti ʻi he ʻInitanetí ʻoku fakatuʻutāmaki fakaeʻulungaanga mo fakalaumālie. Ko e ngaahi Uepisaiti ʻoku nau pouaki ʻa e ʻata fakalieliá ʻokú ne ʻomai ʻa e fakamanamana hā mahino ki he moʻui fakalaumālie ʻa e kau tangataʻifonua ʻo e Puleʻangá. ʻI he ngaahi hongofuluʻi taʻu, kuo fakatokanga mai ai ʻa e kalasi tamaioʻeiki anga-tonú fekauʻaki mo e ngaahi saiti peheé. He houngaʻia ē ko kitautolu ʻi he ngaahi fakatokanga ko eni ki he moʻui fakalaumālié!
11 ʻI he ngaahi taʻu ki muí ni maí, kuo hoko ʻo fuʻu manakoa ha toe saiti ia ʻe taha—ko e saiti ʻe lava ke ʻaonga kapau ʻe ngāueʻaki mātuʻaki tokanga. Ka ko e ngaahi saiti ko ení, ʻa ia ʻoku ʻiloa ko e ngaahi Uepisaiti netiueka sōsialé, ʻoku toe malava ke hoko ia ʻo fakatupu ʻauha. ʻE lava ke nau fakaeʻa atu ha taha ki he ngaahi feohi koví. (1 Kol. 15:33) ʻOku ʻikai leva ha ofo, ʻi hono ʻomai ʻe he kautaha ʻa e ʻOtuá ʻa e ngaahi fakatokanga mafamafatatau fekauʻaki mo hono ngāueʻaki ʻo e ngaahi saiti peheé. Kuó ke lau ʻa e fakamatala fakamuimui taha kotoa kuo pulusi ʻe he tamaioʻeiki anga-tonú fekauʻaki mo hono ngāueʻaki ʻa e ngaahi saiti netiueka sōsialé? He taʻefakapotopoto ē ke ngāueʻaki ʻa e ngaahi saiti peheé taʻelau ʻa e fakamatala ko iá!a ʻE hangē pē ia hano folo ha faitoʻo mālohi taʻelau ʻa e leipolo fakatokanga ʻi he foʻi hiná.
12. Ko e hā ʻoku fakavalevale ai ke tukunoaʻi ʻa e ngaahi fakatokangá?
12 Ko e faʻahinga ʻoku nau tukunoaʻi ʻa e ngaahi fakatokanga ʻoku ʻomai ʻe he tamaioʻeiki anga-tonú te nau fakatupunga moʻoni ʻa e maumau kia kinautolu mo e faʻahinga ʻoku nau ʻofa aí. Kuo hoko ʻa e niʻihi ʻo maʻunimā ʻe he mamata he ʻata fakalieliá pe kuo nau fai ai ʻa e ʻulungaanga taʻetāú ʻo kākaaʻi leva ai kinautolu ʻi he fakakaukau atu ʻoku ʻikai lava ʻa Sihova ʻo sio mai ki he meʻa ʻoku nau faí. He fakavalevale ē ke tui te tau lava ʻo fūfuuʻi ʻetau tōʻongá meia Sihova! (Pal. 15:3; lau ʻa e Hepelū 4:13.) ʻOku fiemaʻu ʻe he ʻOtuá ke tokoniʻi ʻa e faʻahinga peheé pea ueʻi hono kau fakafofonga ʻi māmaní ke nau feinga ke tokoniʻi kinautolu. (Kal. 6:1) Kae kehe, hangē pē ko e lava ke fakataʻeʻaongaʻi ʻe ha ngaahi puleʻanga fakaetangata ʻa e tangataʻifonua ʻa ha taha ʻokú ne fakahoko ha ngaahi tōʻonga ʻe niʻihi, ʻe fakataʻeʻaongaʻi ʻe Sihova ʻa e tangataʻifonua ʻa e faʻahinga ʻoku nau maumauʻi taʻefakatomala ʻene ngaahi tuʻungá.b (1 Kol. 5:11-13) Neongo ia, ʻokú ne faimeesi. Ko e faʻahinga ʻoku nau fakatomala pea liliu honau angaʻitangatá ʻe lava ke nau toe maʻu ha tuʻunga lelei mo Sihova pea nofo ai pē ko e kau tangataʻifonua ʻo e Puleʻangá. (2 Kol. 2:5-8) Ko ha lāngilangi ē ʻoku tau maʻú ke tauhi ki ha Tuʻi anga-ʻofa pehē!
FAKAMAHUʻINGAʻI ʻE HE KAU TANGATAʻIFONUA ʻO E PULEʻANGÁ ʻA E AKÓ
13. ʻOku anga-fēfē fakahaaʻi ʻe he kau tangataʻifonua ʻo e Puleʻangá ʻoku nau fakamahuʻingaʻi ʻa e akó?
13 ʻOku ngāue mālohi ʻa e ngaahi puleʻanga fakaetangata lahi ke akoʻi honau kau tangataʻifonuá. ʻOku nau fokotuʻutuʻu ʻa e ngaahi akoʻanga ke pouaki ʻa e malava ke lautohi mo tohí pea akoʻi ʻa e ngaahi pōtoʻi ngāue ʻaonga. ʻOku houngaʻia ʻa e kau tangataʻifonua ʻo e Puleʻangá ʻi he ngaahi akoʻanga fakamāmani ko ení pea ʻoku nau ako tōtōivi ke lautohi, tohi, pea poupouʻi fakapaʻanga kinautolu. ʻOku nau fakamahuʻingaʻi ʻo toe māʻolunga ange ʻa e ako ʻoku nau maʻu ʻi he tuʻunga ko e kau tangataʻifonua ʻo e Puleʻanga ʻo e ʻOtuá. Fakafou ʻi he fakatahaʻanga Kalisitiané, ʻoku pouaki ai ʻe Sihova ʻa e lautohí mo e tohí. ʻOku fakalototoʻaʻi ʻa e ngaahi mātuʻá ke nau lautohi ki heʻenau longaʻi fānaú. ʻI he māhina taki taha, ʻoku pulusi ʻe he tamaioʻeiki anga-tonú ʻa e ngaahi peesi lahi ʻo e ngaahi fakamatala makatuʻunga Fakatohitapu ʻi he Taua Leʻo mo e ʻĀ Hake! Kapau te ke lau ha peesi ʻe ua ʻi he ʻaho taki taha ʻo e māhiná, te ke laka fakataha ai mo e fouʻanga mātuʻaki mahuʻinga ko eni ʻo e ako ki he Puleʻangá.
14. (a) Ko e hā ʻa e ako ʻoku tau maʻú? (e) Ko e hā ʻa e ngaahi fokotuʻu ki he efiafi Lotu Fakafāmilí kuó ke fiefia ke ngāueʻakí?
14 ʻI he uike taki taha, ʻoku maʻu ʻe he kau tangataʻifonua ʻo e Puleʻangá ʻa e ako ʻi heʻenau ngaahi fakataha ʻa e fakatahaʻangá. Ko e fakatātaá, ko e Ako Fakafaifekau Fakateokalatí kuó ne tokoniʻi ʻa e kau akó ʻo laka hake he hongofuluʻi taʻu ʻe ono ke nau hoko ko e kau faiako ola lelei ʻo e Folofola ʻa e ʻOtuá. ʻOkú ke kau ʻi he ako ko ení? ʻI he ngaahi taʻu ki muí ni maí kuo pouaki tefito ai ʻe he tamaioʻeiki anga-tonú ʻa e efiafi Lotu Fakafāmili fakauiké. Ko e fokotuʻutuʻu ko ení ʻokú ne fakaivimālohiʻi ʻa e faʻunga ʻo e fāmilí. Kuo malava ke ke ngāueʻaki ʻa e ngaahi fokotuʻu kuo pulusi ʻi heʻetau ʻū tohí?c
15. Ko e hā e taha ʻo e ngaahi monū lahi taha ʻoku tau maʻú?
15 Ko e kau tangataʻifonua ʻo e ngaahi puleʻanga fakaetangatá te nau fakatahatahaʻi fakahāhā ʻa e poupou ki ha faʻahi fakapolitikale, naʻa mo e ʻalu mei he matapā ki he matapā ke fai pehē. ʻI ha tuʻunga lahi ange ʻaupito, ko e kau tangataʻifonua ʻo e Puleʻangá ʻoku nau poupouʻi longomoʻui ʻa e Puleʻanga ʻo e ʻOtuá fakatouʻosi ʻi he halá pea mei he matapā ki he matapā. Ko hono moʻoní, hangē ko ia naʻe lave ki ai ʻi he kupu ako ki muʻá, ko e Taua Leʻo, ʻa ia ʻokú ne fanongonongo ʻa e Puleʻanga ʻo Sihová, ko e makasini tufaki lahi taha ia he taimí ni ʻi he māmaní! Ko e taha ʻo e ngaahi monū lahi taha ʻoku tau maʻú ko hono tala ki he niʻihi kehé ʻa e Puleʻanga ʻo e ʻOtuá. ʻOkú ke kau faivelenga ʻi he ngāue fakamalangá?—Māt. 28:19, 20.
16. ʻE lava fēfē ke ke fakamoʻoniʻi ko ha tangataʻifonua lelei koe ʻo e Puleʻanga ʻo e ʻOtuá?
16 ʻOku vavé ni ke hoko ʻa e Puleʻanga ʻo e ʻOtuá ko e puleʻanga pē ia ʻe pule ki he māmaní. Te ne tokangaʻi ʻa e ngaahi tafaʻaki kotoa pē ʻo e moʻui fakaʻahó, ʻo ʻikai ʻi he fakalaumālié pē kae pehē foki ki he fakasivilé. Te ke hoko ko ha tangataʻifonua lelei ʻo e Puleʻanga ʻo e ʻOtuá ʻi he taimi ko iá? Ko e taimi eni ke fakamoʻoniʻi ai te ke hoko ʻo pehē. ʻI he kotoa ʻo e ngaahi fili ʻokú ke fai ʻi he ʻaho taki taha, fai ʻa e ngaahi meʻa kotoa maʻá e lāngilangi ʻo Sihová pea fakamoʻoniʻi ai ʻokú ke hokohoko atu ʻi he tuʻunga ko ha tangataʻifonua lelei ʻo e Puleʻanga ʻo e ʻOtuá.—1 Kol. 10:31.
[Fakamatala ʻi lalo]
a Ko e fakatātaá, sio ki he Awake! ʻo Siulai 2011, peesi 24-27; ʻAokosi 2011, peesi 10-13; mo Fepueli 2012, peesi 3-9.
b Sio ki he Taua Leʻo ʻo Maʻasi 15, 2012, peesi 30-31.
c Sio ki he Taua Leʻo, ʻAokosi 15, 2011, peesi 6-7 mo e Ko ʻEtau Ngāue Fakafaifekau, Sanuali 2011, peesi 3-6.
[Fakamatala ʻi he peesi 14]
ʻOkú ke tokanga ki he ngaahi fakatokanga makatuʻunga Fakatohitapu fekauʻaki mo e ʻInitanetí?
[Fakatātā ʻi he peesi 12]
Hangē ko e ngaahi foha ʻo Kolá, ʻokú ke maʻu ha fiefia ʻi he lotu moʻoní mo hono hisitōliá?
[Fakatātā ʻi he peesi 15]
Ko hoʻo efiafi Lotu Fakafāmilí ʻe lava ke ne fai ʻa e meʻa lahi ke ʻai koe mo e faʻahinga ʻokú ke ʻofa aí ko e kau tangataʻifonua lelei ʻo e Puleʻangá