ʻE Lava ʻe he Koloaʻiá ʻo ʻAi Koe ke Ke Fiefia?

Naʻe ʻiloʻi ʻe Tuʻi Solomone ʻa e mahuʻinga ʻo e paʻangá. Naʻá ne tohi: “ʻOku nau ngaohi meʻakai​—mo e uaine ʻoku ʻomi ke fakafiefiaʻaki ʻa e moʻui—koeʻuhi pe ke nau kata. Seuke ko paʻanga ʻoku ne tali ʻa e ʻeke kotoa pe.” (Koheleti 10:19) Ko e kai mo e kaungāmeʻá ʻe lava ke hoko ko e meʻa fakafiefia tahá ia, ka ke maʻu ʻa e maá mo e uainé, ʻokú ke fiemaʻu ʻa e paʻanga. Koeʻuhi ko e paʻangá ko e founga ia ʻoku maʻu mai ai ʻa e ngaahi meʻa fakamatelié, ʻokú ne “tali ʻa e ʻeke kotoa pe.”

NEONGO naʻe koloaʻia fakaʻulia ʻa Solomone, naʻá ne ʻilo ko e koloá ʻoku ʻi ai honau ngaahi ngātanga. Naʻá ne fakatokangaʻi ʻoku ʻikai iku ki he fiefiá ha founga moʻui tuli ki he meʻa fakamatelié. Naʻá ne tohi: “Ko ia oku manako ki he siliva e ikai ke ne fiemalie i he siliva; be ko ia oku manako ki he koloa i he tubulaki o ene mea.”​—Koheleti (Tagata Malaga) 5:10, PM.

Pehē pē eni ʻoku maʻu ʻe ha tokotaha koloaʻia ʻa e koloa lahi ange. ʻOku pehē ʻe Solomone: “Ka tupu ke lahi ʻete meʻa, ʻoku toko lahi ʻa e faʻahinga ke kai ia.” (Koheleti 5:11) ʻI he tupulekina ʻa e “meʻa,” pe ko e koloa ʻa ha taha, ʻoku fiemaʻu ʻa e kakai tokolahi ange ke tokangaʻi ia. Ko e kau tangata monomono, kau tauhi, kau sevāniti, kau leʻo, mo e niʻihi kehe​—ʻa ia kuo pau kotoa ke totongi ʻa ʻenau ngāué. ʻI he tafaʻaki ʻe tahá, ʻoku fiemaʻu ʻaupito ki he meʻá ni ʻa e paʻanga lahi ange.

ʻOku uesia fakahangatonu ʻa e fiefia ʻa ha tokotaha ʻi he tuʻunga peheé. Ko e faihisitōlia Kalisi ko Xenophon, ʻa ia naʻe moʻui ʻi he senituli hono fā K.M., naʻá ne tohi ha ngaahi fakamatala ʻa ha tangata masiva naʻe hoko ʻo koloaʻia:

“Ko ʻeni, ko e hā ʻoku mou mahalo moʻoni ai . . . ko e lahi ange ʻa e meʻa ʻoku ou maʻú, ko e fiefia ange ia ʻa ʻeku moʻuí? ʻOku ʻikai te mou ʻilo,” naʻá ne hoko atu, “ʻoku ʻikai ʻaupito te ne ʻomai ha kiʻi meʻi fiefia lahi ange ke kai mo inu mo mohe ʻi he taimí ni ʻo hangē ko ia ʻi he taimi naʻá ku masiva aí. Ko e meʻa pē taha ʻoku ou maʻu mei he maʻu ʻo fuʻu hulú ko ʻeku moʻuaʻaki ki hono tokangaʻi ʻa e meʻa lahi ange, vahevahe atu ʻa e meʻa lahi ange ki he niʻihi kehé, mo e faingataʻaʻia ʻi hono tokangaʻi ʻa e meʻa lahi ange ʻi he meʻa ko ia naʻá ku maʻu ki muʻá. ʻI he taimi ní ʻoku hanga mai ʻa e kau ngāue tokolahi kiate au ki ha meʻakai, ko e tokolahi ki ha inu, mo e tokolahi ki ha vala, lolotonga ia ʻoku fiemaʻu ʻe he niʻihi ia ha kau toketā; pea haʻu ʻa e tokotaha kiate au mo ha talanoa ʻo kau ki ha sipi naʻe ʻohofi ʻe he fanga ulofí, pe ko e mate ʻa ha fanga pulu ʻi haʻanau homo ʻi ha lilifa, pe ko e pehē kuo mafola ha mahaki ʻi he lotolotonga ʻo e fanga pulú. Pea ko ia ʻoku hā kiate au . . . ʻoku hangē ia kuo lahi ange ʻa ʻeku faingataʻaʻiá he taimí ni fakafou ʻi hono maʻu ʻo hulú ʻi he meʻa ko ia ki muʻa naʻe hoko mei he maʻu pē ʻa e meʻa siʻisiʻí.”

Ko e toe ʻuhinga ʻe taha ʻoku tuli ai ʻa e kakaí ki he koloa lahi angé ko hono kākaaʻi ko ia kinautolu ʻe he meʻa naʻe ui ʻe Sīsū Kalaisi ko e “fakahekeheke ʻa koloa.” (Mātiu 13:22) ʻOku kākaaʻi kinautolú koeʻuhi ʻi he ngaahi koloa ko ʻeni ʻoku nau mātuʻaki kumi faivelenga ki aí, ʻoku ʻikai ʻaupito ke nau maʻu ai ʻa e fiemālie pe fiefia ko ia naʻa nau ʻamanekina ke maʻú. ʻOku nau fakaʻuhinga ko e meʻa ko ia ʻoku ʻikai lava ke fai ʻi he fakangatangata ʻa e koloá, ʻe fai ia ʻe he lahi ange ʻo e koloá. Ko ia, ʻoku ʻi ai maʻu pē ha feinga ki ha meʻa lahi ange.

ʻOfa ki he Paʻangá ʻOku ʻIkai Iku Ia ki he Fiefiá

Ko e hohaʻa ki heʻene koloá te ne taʻofi nai ha tangata koloaʻia mei he fiefia ʻi ha mālōlō nonga ʻi he poʻulí. ʻOku tohi ʻe Solomone: “ʻOku melie ʻa e mohe ʻa e tangata ngaue, pe ʻoku siʻi ʻene kai pe ʻoku lahi: ka ko e topono fau ʻa e koloaʻia ʻa ia ʻoku ʻikai te ne mamohe ai.”​—Koheleti 5:12.

ʻI he fuʻu hulu ʻa e hohaʻa fekauʻaki mo e ala lava ke mole ʻete koloá, ʻoku kau ki ai ʻa e meʻa lahi ange ia ʻi he ʻikai ke mohé. ʻI hono fakamatalaʻi ʻo e tokotaha nima-maʻú, ʻoku tohi ʻe Solomone: “ʻI hono ʻaho kotoa pe, ʻoku ne kai ʻi he poʻuli pe, pea ʻoku lahi ʻene fakahohaʻa: pea ʻoiau ʻene mamahi mo ʻene ʻiteʻita.” (Koheleti 5:17) ʻI he ʻikai maʻu ʻa e fiefia heʻene koloaʻiá, ʻokú ne kai mo e ‘fakahohaʻa,’ ʻo hangē ia ʻokú ne nanaʻi naʻa mo e paʻanga kuo pau ke fakamole ki he meʻakaí. Ko e vakai fakaefakakaukau ʻikai loko lelei peheé ʻe tānaki atu nai ia ki he ʻikai moʻui lelei. Ko e meʻa leva ʻe hokó, ʻoku tānaki atu ʻa e ʻikai moʻui leleí ki he loto-moʻua ʻa e tokotaha nima-maʻú, koeʻuhi he ʻokú ne taʻofi ia mei hono tānaki ke fokotuʻuna ha koloa lahi ange.

Mahalo pē ʻoku fakamanatu atu kiate koe ʻe he meʻá ni ʻa e meʻa naʻe tohi ʻe he ʻapositolo ko Paulá: “Ka ko kinautolu kuo pau honau loto ke koloaʻia, ʻoku nau to ki he ʻahiʻahi, mo e tauhele, mo e ngaahi holi kehekehe, ʻa ia ʻoku fakasesele pea ko e meʻa ʻoku te lavea ai; ko e faʻahinga meʻa ʻoku nau lomekina ʻa e kakai ki he ʻauha mo e malaʻia. He ko e ʻofa ki he paʻanga ko e aka ʻoku tupu mei ai ʻa e ngaahi kovi kotoa pe, pea ko e niʻihi ʻi heʻenau ala ki he meʻa ko ia . . . kuo nau hokohokaʻi ʻaki ʻa kinautolu ʻa e ngaahi mamahi lahi.” (1 Timote 6:​9, 10) ʻI he tuli ki he paʻangá, ʻoku kākā ai ʻa e kakaí, loi, kaihaʻa, fakaʻaluʻalu ʻiate kinautolu pē, pea naʻa mo hono fai ʻo e fakapoó. Ko e nunuʻá ko ha tokotaha kuo hokohokaʻiʻaki ʻa e ngaahi mamahi fakaeongo, fakaesino, mo fakalaumālie koeʻuhi ko e feinga ke kuku mo piki ki he koloá. ʻOku ongo tatau ʻeni mo e hala ki he fiefiá? Halaʻatā!

Fiemālie ʻi he Meʻa ʻOku Tau Maʻú

Naʻe leaʻaki ʻe Solomone ʻa e meʻa lahi ange fekauʻaki mo ha vakai mafamafatatau ki he koloá. Naʻá ne tohi: “Hange ko ʻene hu mai mei he fatu oʻene faʻe, pehe te ne foki telefua, ʻo ʻalu hange ko ʻene haʻu, ʻo ʻikai te ne maʻu ha momoʻi meʻa ʻi heʻene ngaue, ʻa ia te ne lava ke toʻo ʻo ʻalu mo ia. . . . Siini ko e anga oʻeku sio ʻaku: ko eni pe ʻa e lelei, ko eni pe ʻa e fakaʻofoʻofa: ke te kai mo inu, mo ʻilo lelei ʻi he ngaue kehekehe ʻoku te fakafitefitaʻa ai he lalo laʻa, kaeʻoua ke kakato ʻa e ngaahi ʻaho ʻete moʻui, ʻa ia kuo tuku mai ʻe Elohimi: he ko e ʻinasi ia ʻo e tangata.”​—Koheleti 5:​15, 18.

Ko e ngaahi leá ni ʻoku hā ai ʻoku ʻikai ke fakatuʻunga ʻa e fiefiá ʻi he feinga ke fokotuʻu niu ʻa e koloá ki ha taimi ʻa ia ʻe ʻikai te tau moʻui nai ai. ʻOku lelei mamaʻo ange ke fiemālie pea ke fiefia ʻi he ngaahi ola ʻo ʻetau ngāue mālohí. Naʻe fakahaaʻi ʻe he ʻapositolo ko Paulá ha fakakaukau meimei tatau ʻi heʻene tohi fakamānavaʻi kia Tīmoté, ʻi heʻene pehē: “He talaʻehai naʻa tau haʻu mo kitautolu ha meʻa ki mamani, koeʻuhi foki ʻe ʻikai te tau lava ke ʻalu mo kitautolu ha momoʻi meʻa: pea ʻi heʻetau maʻu ʻetau meʻakai mo e kofu, te tau feʻunga pe ʻi he meʻa ko ia.”​—1 Timote 6:​7, 8; fakafehoanaki mo Luke 12:​16-​21.

Ko e Kī ki he Fiefiá

Naʻe maʻu ʻe Solomone ʻo hulu fakatouʻosi ʻa e koloá mo e poto fakaʻotuá. Ka naʻá ne fakafehokotaki ʻa e fiefiá mo e potó, ʻikai ko e paʻangá. Naʻá ne pehē: “Monuʻiaā ka ko e tangata kuo ne ʻilo ʻa poto, mo e tangata kuo ne maʻu mai ʻa e mafai-ke-ʻilo; he ʻoku leleiange ʻa e ʻalu holo hono fakatau ʻi he siliva, pea ko e fua ʻoku te maʻu ai, ʻi he koula moʻonia. ʻOku ne mahuʻinga ange ʻi he makakula koloa; pea neongo pe ko e ha ho manako ʻe ʻikai ala fakatatau ki ai. ʻOku ne toʻo ʻi hono toʻomataʻu ʻa e moʻui fuoloa; pea ʻi hono toʻohema ʻa e koloa mo e ongoongo. Ko hono ngaahi hala ko e koto malie, pea ko e koto melino hono ngaahi afenga kotoa pe. Ko e ʻakau-ʻo e-moʻui ia kiate kinautolu ʻoku puke ia; pea ʻoku monuʻia ʻa kinautolu ʻoku kuku ki ai.”​—Palovepi 3:​13-​18.

Ko e hā ʻoku māʻolunga ange ai ʻa e potó ʻi he ngaahi koloa fakamatelié? Naʻe tohi ʻe Solomone: “Ko e poto ko e maluʻanga, ko e paʻanga ko e maluʻanga: ka ʻoku hulu ʻa e ʻilo, he ʻoku fakahaofi ʻe he poto ʻa e tangata ʻoku maʻu ia.” (Koheleti 7:12) Lolotonga ʻa hono tokonaki ʻe he paʻangá ha tuʻunga ʻo e maluʻangá, ʻo ʻai ke lava ʻe he tokotaha ʻoku ʻaʻaná ke fakatau mai ʻa e meʻa ʻokú ne fiemaʻú, ʻoku lava ʻe he potó ke maluʻi ha taha mei hono ʻahiʻahiʻi ha ngaahi meʻa ʻe fakatuʻutāmaki nai ki heʻene moʻuí. ʻOku ʻikai ngata pē ʻi hano fakahaofi nai ʻe he poto moʻoní ha tokotaha mei ha mate mutukia, ka koeʻuhi ʻoku makatuʻunga ia ʻi he manavahē totonu ki he ʻOtuá, ʻe taki atu ia ki hono maʻu ʻa e moʻui taʻengatá.

Ko e hā ʻe iku ai ʻa e poto fakaʻotuá ki he fiefiá? Koeʻuhi he ko e fiefia moʻoní ʻoku lava ke toki haʻu pē ia meia Sihova ko e ʻOtuá. ʻOku fakamoʻoniʻi ʻi he taukeí ko e fiefia moʻoní ʻe lava ke maʻu ia fakafou pē ʻi he talangofua ki he Fungani Māʻolungá. Ko e fiefia tuʻuloá ʻoku fakatuʻunga ia ʻi he tuʻu fakahōifua ki he ʻOtuá. (Mātiu 5:​3-​10) ʻI hono ngāueʻaki ʻa e meʻa kuo tau ʻilo mei hono ako ʻo e Tohitapú, te tau fakatupulekina ai ʻa e “poto mei ʻolunga.” (Semisi 3:​17) Te ne ʻomai kiate kitautolu ʻa e fiefia ʻe ʻikai ʻaupito lava ke ʻomai ia ʻe he koloá.

[Fakatātā ʻi he peesi 4, 5]

Naʻe ʻiloʻi ʻe Tuʻi Solomone ʻa e meʻa ʻokú ne ʻai ha taha ke fiefiá. ʻOkú ke pehē?