ʻOkú Ke Poto Taau ke Fai ʻa e Tauhi?

“Ko homau poto taau feʻungaʻanga ʻoku mei he ʻOtua.”​—2 KOLINITO 3:​5, “NW”.

 1. ʻOku ʻikai ke ʻi ai ha avangamālie ia ʻi he fakatahaʻanga Kalisitiané maʻá e faʻahinga kakai fēfē?

KO E ʻOTUA KO SIHOVÁ mo Sīsū Kalaisi ʻokú na ngāue. Naʻe pehē ʻe Sīsū: “Kuo ngāue ʻa ʻeku Tamai ʻo aʻu ki he taimi ni, pea ʻoku ou ngāue mo au foki.” (Sione 5:17) ʻOku ʻikai ke hōifua ʻa e ʻOtuá ki he kakai ʻoku nau fakafisi ke ngāué; ʻoku pehē pē mo e ʻikai ke ne hōifua kiate kinautolu ʻoku nau fekumi ki ha ngaahi fatongia koeʻuhi ke nau maʻu ai ha mafai ki ha niʻihi kehe. Ko e fakatahaʻanga Kalisitiané ʻoku ʻikai ke ʻi ai ha avangamālie ai maʻá e kau mamió pe ko kinautolu ʻoku loto-feinga siokitá.​—Mātiu 20:​25-27; 2 Tesalonaika 3:10.

 2. Ko e hā ʻoku mātuʻaki lahi ai ʻi he taimí ni ʻa e fiemaʻu ʻo e kau tangata ke nau fua ʻa e fatongia ʻi he fakatahaʻanga Kalisitiané?

² Ko e Kau Fakamoʻoni ʻa Sihová, ‘ʻoku lahi ʻa e ngāue ia ʻa e ʻEiki ʻoku nau maʻu ke fai,’ pea tautefito he taimí ni ʻi he tafe mai ʻa e tokolahi ʻo e kakaí ki he “moʻunga” ʻo e lotu moʻoní. (1 Kolinitō 15:58; ʻAisea 2:​2-4) ʻOku ʻi ai ʻa e fiemaʻu lahi ki ha kau tangata poto taau fakalaumālie ke nau fua ʻa e fatongia ʻi he fakatahaʻangá. ʻI he ʻikai ko e ueʻi kinautolu ʻi he loto-feinga siokitá, ko e kau tangata peheé ʻoku nau hiki hake ʻa Sihova, kae ʻikai ko kinautolu pē. (Palōvepi 8:13) ʻOku nau ʻiloʻi ko e ʻOtuá ʻokú ne tokoniʻi kinautolu ke nau hoko ʻo poto taau ki he ngaahi fatongia ʻi he fakatahaʻangá, ʻo hangē ko ia ʻokú ne ʻai ‘ke poto taau feʻungaʻanga ʻa e kau faifekau ʻo e fuakava foʻoú.’​—2 Kolinitō 3:​4-6, NW.

 3. Ko e hā ʻa e ngaahi fatongia tefito ʻo e kau mātuʻá mo e kau sevānití?

³ ʻI he ʻahó ni ʻo hangē pē ko ia ʻi he lotolotonga ʻo e ʻuluaki kau Kalisitiané, ʻoku fakanofo ʻa e kau tangata ʻaki ʻa e laumālie māʻoniʻoní pea fakafou mai ʻi he fokotuʻutuʻu ʻo e kautaha hāmai ʻa Sihová ke nau ngāue ko e kau mātuʻa mo e kau sevāniti. (Ngāue 20:28; Filipai 1:1; Taitusi 1:5) ʻOku tauhi fakalaumālie ʻe he kau mātuʻá ʻa e tākanga ʻa e ʻOtuá, ʻo nau tokonaki ʻa e tokangaʻi maluʻi. ʻOku tokoniʻi kinautolu ʻe he kau sevānití, ʻa ia ko honau ngaahi fatongiá ʻoku ʻikai ko e fai fakahangatonu ha ngaahi tokangaʻi fakalaumālie. (1 Pita 5:2; fehoanaki mo Ngāue 6:​1-6) Hangē ko e ʻAlo ʻo e ʻOtuá, ʻa ia naʻá ne haʻu ke ne sevāniti pē ʻe ia, ko e faʻahinga ko ia kuo fakanofó ko ʻenau holí ia ke tauhi honau kaungā-tuí. (Maʻake 10:45) Kapau ko ha tangata Kalisitiane koe, ʻokú ke maʻu ʻa e laumālie ko iá?

Ngaahi Tuʻunga Poto Taau ʻOku Fakatou Maʻu

 4. Fakatautefito ʻi fē ʻoku tau ʻilo ai ʻa e fakahokohoko ʻo e ngaahi tuʻunga poto taau kiate kinautolu ʻoku tuku ki ai ʻa e fatongia ʻi he fakatahaʻangá?

⁴ ʻOku fakahokohoko ʻe he ʻapositolo ko Paulá ʻa e ngaahi fiemaʻu ko ia kiate kinautolu ʻoku tuku ki ai ʻa e ngaahi fatongia ʻi he fakatahaʻangá ʻo tautautefito ʻi he 1 Tīmote 3:​1-10, 12, 13, NW mo e Taitusi 1:​5-9, NW. ʻI heʻetau lāulea ki he ngaahi tuʻunga poto taau ko ení, ko e niʻihi ʻo e ngaahi meʻá ni ʻoku kau fakatouʻosi ki he kau mātuʻá mo e kau sevānití, ʻoku totonu ke ʻoua te tau sio kiate kinautolu ʻo fakatatau ki he ngaahi tuʻunga fakamāmaní. Ka, ʻoku totonu ke tau sio kiate kinautolu ʻi he fokotuʻutuʻu ʻi he ʻuluaki senitulí pea ʻoku kaungatonu ʻa e fokotuʻutuʻu ko iá ki he kakai ʻa Sihová. ʻOku ʻikai ke fiemaʻu ʻa e tuʻunga haohaoá ki hono aʻusia ʻa e ngaahi tuʻunga ko ení, he ka pehē tā ʻe ʻikai ke ʻi ai ha taha ʻi he faʻahinga ʻo e tangatá ʻe poto taau. (1 Sione 1:8) Ka ʻo kapau ko ha tangata Kalisitiane koe, tatau ai pē pe ʻoku ʻi ai hao ngaahi fatongia he taimí ni ʻi he fakatahaʻangá pe ʻikai, fēfē ke ke toe sio ʻo vakaiʻi ho ngaahi tuʻunga poto taau fakafoʻituituí?

 5. Ko e hā hono ʻuhinga ʻo e pehē, ʻikai fiemaʻu ke valokiʻi?

⁵ ʻIkai fiemaʻu ke valokiʻi; ke ne ongoongolelei mei he kakai ʻo tuaʻā; ʻatā mei hano talatalaakiʻi. (1 Tīmote 3:​2, 7, 8, 10, NW; Taitusi 1:​6, 7, NW) ʻI hono fakanofó pea lolotonga ʻenau fai ʻa e tauhí, ko e kau sevānití mo e kau mātuʻá ʻoku pau ke ʻikai fiemaʻu ke valokiʻi, ʻa ia, ko e ʻataʻatā mei hano tukuakiʻi mo e ʻi ai ha fiemaʻu ke valokiʻi koeʻuhi ko ha talatalaakiʻi moʻoni ʻi ha ʻulungaanga pe akonaki hala. Ko ha tukuakiʻi taʻemoʻoni ʻoku fai ʻe he “fanga tokoua loi” pe ʻe ha niʻihi kehe ʻoku ʻikai te ne ʻai ha tangata ke taau ke valokiʻi. Ke fakataʻeʻaongaʻi ha tangata mei he fai ʻa e tauhi ʻi he fakatahaʻangá, kuo pau ʻoku ʻikai ko e launoa hono tukuakiʻí, pea kuo pau ke fakamoʻoniʻi ia ʻo fetāiaki mo e ngaahi tuʻunga faka-Tohitapú. (2 Kolinitō 11:​26, NW; 1 Tīmote 5:19) Ko ha taha kuo fakanofo ʻi he fakatahaʻanga “ko hono tonu ke ne ongoongolelei mei he kakai ʻo tuaʻā, naʻa tō ia ki he laua, pea mo ha tauhele ʻa e Tevolo.” Kapau naʻe fai ʻe ha tangata ha angahala mamafa ʻi he kuo hilí, ʻe lava pē ke fakanofo ia ʻo kapau kuó ne moʻui mai ʻo ʻikai toe tukuakiʻi peá ne ʻai ha hingoa lelei kiate ia.

 6. Ko e hā ʻa e ʻuhinga ʻo e pehē ko e husepāniti ʻo e uaifi pē ʻe taha?

⁶ Husepāniti ʻo e uaifi pē ʻe taha. (1 Tīmote 3:​2, 12; Taitusi 1:6) ʻOku ʻikai ko e ʻuhinga eni ko e kau tangata pē kuo malí ʻe lava ke hoko ko ha kau sevāniti pe ko e kau mātuʻa. Ka ʻo kapau ʻoku mali, ko e tangatá ke ne maʻu pē ʻa e uaifi moʻui ʻe taha peá ne angatonu kiate ia. (Hepelū 13:4) Ke ʻoua ʻe hangē ko e kau tangata taʻe-Kalisitiane tokolahi ʻi he ʻuluaki senitulí, heʻikai foki ke malava ke ne hoko ko ha taha maʻu ha ngaahi mali tokolahi.a

 7. (a) ʻE fakatuʻunga ʻi he taʻu motuʻá ʻa e poto taau ʻa ha tangata ke hoko ko ha taha ʻo e kau mātuʻá? (e) Ko e hā ʻoku fakakau ki he pehē ʻoku pule lelei ki hono fale ʻoʻoná?

⁷ Pule lelei ki hono fale ʻoʻoná, kuo anganofo ʻene fānaú. (1 Tīmote 3:​4, 5, 12, NW; Taitusi 1:6, NW) ʻE fakakaukau nai ha niʻihi ko e kau mātuʻá kuo pau ke nau taʻu 30 honau motuʻá, ka ʻoku ʻikai ke fokotuʻu ʻe he Tohitapú ha fakangatangata taʻu motuʻa. Ka kuo pau ke ngāue ʻa e tokotahá ni ko ha tangata motuʻa ange ʻi he tuʻunga fakalaumālie. Ko e kau sevānití mo e kau mātuʻá ʻoku totonu ke nau motuʻa feʻunga ke maʻu fānau. Kapau kuo mali, ʻe ʻikai ke poto taau ʻa e tangatá ʻo kapau ʻoku ngāue ia ʻi he tuʻunga fakaeʻotuá ʻi ha tafaʻaki kehe ka ʻoku fakaaoao ia ʻi ʻapi. Kuo pau ke ne maʻu ʻa e ʻapasia koeʻuhi ko ʻene pule lelei ki hono fale ʻoʻoná ʻo fakatatau ki he ngaahi tefitoʻi moʻoni faka-Tohitapú, pea ko ʻene taumuʻá ʻoku totonu ke ne lavameʻa fakalaumālie mo e mēmipa kotoa ʻo e fāmilí. Hangē ko ia ʻoku angalahiʻakí, ko ha mātuʻa ʻa ia ʻoku hoko ko ha tamai ʻoku totonu ke ne maʻu ʻa e fānau iiki ʻoku talangofua pea ʻoku nau “tui.” ʻOku nau fakalakalaka atu ke fakatapui ki he ʻOtuá pe kuo nau ʻosi papitaiso ko e Kau Fakamoʻoni ʻa Sihova. Ko ha tangata ʻoku ʻikai malava ke ne langa hake ʻa e tuí ʻi heʻene fānaú heʻikai malava nai ke ne langa hake ʻa e tui ʻi he niʻihi kehé.

 8. Ki muʻa ke malava ke hoko ha tangata maʻu fāmili ko ha taha ʻo e kau mātuʻa, ko e hā ʻoku pau ke ne ʻuluaki ako ke faí?

⁸ Ki muʻa ke hoko ha tangata maʻu fāmili ko e taha ʻo e kau mātuʻá ke malava ʻo tokonaki fakalaumālie mo fai ha tokangaʻi ʻi he fakatahaʻangá, kuo pau ke ne ako ki he founga ki hono tataki hono fale ʻoʻoná. “He kabau oku ikai ilo e ha tagata ke bule i hono fale oona, e fefe koa ene tauhi ae jiaji [fakatahaʻanga, NW] oe Otua?” (1 Tīmote 3:5, PM) ʻOku moʻoni, ʻe fakafetauʻi nai ha tangata ʻe hono uaifi taʻetuí. (Mātiu 10:36; Luke 12:52) Pe ʻoku hoko nai ha taha ʻo ʻene fānaú ʻo halaia ʻi ha angahala mamafa, neongo ʻoku fai lelei fakalaumālie ʻa e toengá ia. Kapau kuo fai ʻe he tangatá ʻa e meʻa kotoa pē ʻoku malava ke ʻamanekina meiate iá, pea tautefito ʻo kapau kuó ne lavameʻa fakalaumālie mo e niʻihi kehe ʻi hono falé, ko e talitekeʻi ʻene ngaahi tataki leleí ʻe ha taha ʻo e mēmipa ʻo hono fāmilí heʻikai ke hoko ia ke ne taʻetaau ai mei heʻene hoko ko e sevāniti pe ko ha taha ʻo e kau mātuʻá.

 9. Ko e hā ʻa e tokanga kuo pau ke fai ʻe ha mātuʻa pe ko ha sevāniti ʻo kau ki hono ngāueʻaki ʻa e ngaahi inu ʻolokaholó?

⁹ ʻIkai ko ha taha uatau konā pe nofo ke inu kava lahi. (1 Tīmote 3:​3, 8, NW; Taitusi 1:7, NW) Ko ha sevāniti pe ko ha mātuʻa kuo pau ke ʻoua ʻe fuʻu lahi ʻene inu ʻa e ngaahi inu ʻolokaholó. Ko hono maʻu ia ʻe he ngaahi meʻá ni ʻe lava ke iku ʻo mole ai ʻa e mapuleʻi ʻo e ngaahi fakakaukaú pea mo e ngaahi ongoʻí, ʻo tataki ki ha ngaahi uatau pe fuhu konā. ʻOku totonu ‘ke ʻoua ʻe nofo ki he inu kava lahi’ pe ongoongoa ko ha taha ʻoku angaʻaki pe inu lahi. (Palōvepi 23:​20, 21, 29-35) Hono ʻikai fakamamahi ʻo kapau ʻe fai ha ʻaʻahi ko e tauhi pea melengatāmaki ʻi ha konā! Kapau ʻe inu ha tokoua, ʻoku totonu ke ʻoua te ne fai pehē ʻi heʻene kau ki he ngaahi fakatahá, pe ngāue fakamalangá, pe ko e fai ha ngāue toputapu kehe.​—Livitikō 10:​8-11; ʻIsikeli 44:21.

10. Ko e hā ʻoku ʻikai ke poto taau ai ke hoko ko ha kau mātuʻa pe ko ha kau sevāniti ʻa kinautolu ʻoku ʻofa ki he paʻangá mo mānumanu ki he maʻu ha meʻa ʻi he taʻefaitotonu?

¹⁰ ʻIkai ko ha tokotaha ʻoku ʻofa ki he paʻangá pe mānumanu ki he maʻu ha meʻa ʻi he taʻefaitotonu. (1 Tīmote 3:​3, 8, NW; Taitusi 1:7, NW) Ko e kau ʻofa ki he paʻangá ʻoku nau ʻi ha tuʻunga tuʻutāmaki fakalaumālie, mo e kakai “mānumanu” heʻikai ke nau maʻu ʻa e Puleʻanga ʻo e ʻOtuá. Ko ia, ko e kau tangata peheé ʻoku ʻikai te nau poto taau ke hoko ko e kau mātuʻa pe kau sevāniti. (1 Kolinitō 6:​9, 10; 1 Tīmote 6:​9, 10) Ko e foʻi lea tefito ʻi he lea faka-Kalisí ʻoku haʻu mei ai ʻa e “taʻefaitotonu” ʻoku ʻuhinga tefito ia ko e “fakamā,” pea ko e foʻi lea ʻoku liliu mai ko e “maʻu ha meʻa” ʻokú ne lave ia ki ha faʻahinga pē ʻo e tupú pe faingamālie. (Filipai 1:21; 3:​4-8) Ko e moʻoni, ko ha tangata ko hono angá ʻokú ne fakahā ai te ne lava ke taʻefaitotonu ʻi heʻene feangai mo e “fanga sipi” ʻa e ʻOtuá ʻoku ʻikai poto taau ia ki he fatongia ʻi he fakatahaʻangá. (ʻIsikeli 34:​7-10; Ngāue 20:​33-35; Siutasi 16) Ko e fiemaʻu ko ia ke tokanga ʻi hono fai ha fakaongoongoleleí ʻoku fakaeʻa ia ʻi heʻetau ʻilo ka ʻo ka fakanofo ha tangata, ʻe tuku kiate ia nai ke tauhi ʻa e paʻanga pea fakatauveleʻi ke kaihaʻasi ha konga ʻo e paʻangá.​—Sione 12:​4-6.

11. Ko e hā ʻoku totonu ai ke ʻoua ʻe fakaongoongoleleiʻi ki he ngaahi fatongia ʻi he fakatahaʻangá ha tangata “toki liliu”?

¹¹ ʻIkai ko e toki liliu; fuofua ʻahiʻahiʻi. (1 Tīmote 3:​6, 10, NW) Ko ha taha naʻe toki papitaiso foʻou kuo teʻeki ke ne maʻu ha taimi ke fakamoʻoniʻi te ne tokanga angatonu ki he ngaahi ngāue kuo vaheʻí. ʻE siʻisiʻi nai ʻene kaungāmamahi ki he kau faingataʻaʻiá pe siʻi ʻene poto ʻa ia ʻoku fiemaʻu ke tokoni ki he kaungā-lotú pea aʻu nai ʻo ne sio lalo ki he niʻihi kehé. Ko ia ai, ki muʻa ke fakaongoongoleleiʻi ke ne hoko ko ha sevānití kae tautefito ko ha taha ʻo e kau mātuʻá, ʻoku totonu ki he tangatá ke “fuofua ʻahiʻahiʻi” pea ʻoku totonu ke fakahā ha fakamoʻoni ʻo e tuʻunga fakakaukau lelei mo ha alafalalaʻanga. ʻOku ʻikai ke ʻi ai ha taimi pau ia ʻoku tuku ki ai ki he ʻahiʻahiʻi ko ení, pea ko e tokotaha taki taha ʻe kehe honau tuʻunga tupu fakalaumālié. Ka ʻoku totonu ki he kau mātuʻá ke ʻoua te nau fakavave hono fakaongoongoleleiʻi ha tangata foʻou “telia naʻa ne hoko ʻo fakamafutofuta ʻi he angahiki pea tō ai ki he fakamaau kuo ʻoatu ki he Tevolo.” Ke tuku ki he tangatá ke ne ʻuluaki fakahāhā ʻoku ʻi ai ha anga-fakatōkilalo faka-Kalaisi.​—Filipai 2:​5-8.

Fakahanga ʻa e Tokangá ki he Kau Sevānití

12. Ko e ngaahi fiemaʻu ko ia ʻoku fokotuʻu fakahokohoko ki he kau sevānití ʻe aʻusia pē ia ʻe kinautolu pē?

¹² ʻOku ʻi ai ʻa e ngaahi fiemaʻu ʻoku fakahokohoko ki he kau sevānití. Ka ʻo kapau ʻe ʻikai ke toe aʻusia ʻe he kau mātuʻá ʻa e ngaahi fiemaʻu peheé, heʻikai ke nau poto taau ke fai ʻa e tauhí. ʻI ho tuʻunga ko ha tangata Kalisitiané, ʻokú ke poto taau ʻi he ngaahi tuʻunga ko eni?

13. Ko e hā hono ʻuhinga ke fakamātoató?

¹³ Fakamātoato. (1 Tīmote 3:8, NW) Ko ha tangata kuo poto taau ke fai ʻa e tauhí heʻene hoko ko ha sevāniti ʻoku totonu ke ʻoua te ne fakamaʻamaʻaʻi ʻa e fatongiá. Kuo pau ke ne ʻai ʻene tōʻongá ʻi ha founga lelei ke ne maʻu ai ha ʻapasia. Neongo ʻoku tali ke ʻi ai ha ngaahi taimi ke fai ai ha fakakata, heʻikai ke ne poto taau ʻo kapau ʻokú ne angaʻaki ke fakavaʻivaʻinga.

14. (a) Ko e hā hono ʻuhinga ʻo e ʻikai ngutungutuuá? (e) Ko e maʻu ʻa e konisēnisi maʻá ʻoku ʻuhinga ki he hā?

¹⁴ ʻOku ʻikai ke ngutungutuua; ʻoku maʻu ʻa e konisēnisi maʻa. (1 Tīmote 3:​8, 9, NW) Ko e kau sevānití (mo e kau mātuʻá) kuo pau ke nau lea moʻoni ʻo ʻikai ko e kau faʻa lau pe femamioʻaki. Koeʻuhi ʻoku ʻikai totonu ke nau ngutungutuua, kuo pau ke ʻoua te nau mālualoi ʻo leaʻaki ʻa e meʻa ʻe taha ki he tokotaha ko ení pea leaʻaki ʻa e meʻa kehe ki he tokotaha ko ē. (Palōvepi 3:32; Sēmisi 3:17) Ko e kau tangata ko ení kuo pau foki ke nau hoko ko e kau poupou loto-mateaki ʻo e moʻoni kuo fakahaá, “puke ʻa e fakalilolilo toputapu ʻo e tuí ʻi he konisēnisi maʻa.” ʻI he ʻao ʻo e ʻOtuá, ko e konisēnisi pehē ʻo e tangatá ʻoku totonu ke ne fakamoʻoniʻi ʻokú ne angatonu pea ʻoku ʻikai te ne fai ha faʻahinga meʻa kākā pe fai ha meʻa taʻemaʻa. (Loma 9:1; 2 Kolinitō 1:12; 4:2; 7:1) Heʻikai ke ʻi ai ha taha ʻe poto taau ke tauhi ʻa e fanga sipi ʻa e ʻOtuá kaeʻoua kuó ne piki ki he moʻoní mo e ngaahi tefitoʻi moʻoni fakaeʻotuá.

Fakahanga ʻa e Tokanga ki he Poto Taau ʻa e Kau Mātuʻá

15. Ko e poto angataau kia hai ʻoku siviʻi ʻi he taimi ní, pea ko e ngaahi meʻá ni ʻoku kaungatonu tautefito ki he hā?

¹⁵ ʻOku ʻi ai ʻa e ngaahi tuʻunga poto taau ʻoku kaungatonu tautefito pē ki he kau mātuʻá pea kaunga lahi ia ki heʻenau ngāue ko e kau tauhí mo e kau faiako. ʻI ho tuʻunga ko ha tangata Kalisitiane, ʻokú ke aʻusia ʻa e ngaahi fiemaʻu ko ení?

16. (a) Ko e hā ʻa e meʻa ʻoku fiemaʻu kae anga-mafamafatatau? (e) ʻE lava fēfē ʻe ha mātuʻa ke tauhimaʻu ʻa e mapuleʻi kita?

¹⁶ Anga-mafamafatatau; mapuleʻi kita. (1 Tīmote 3:​2, NW; Taitusi 1:8, NW) ʻOku totonu ki he kau mātuʻa ke anga-fakamaʻumaʻu, ʻoua ʻe hoko ko ha pōpula ki he ngaahi tōʻonga koví. ʻI heʻene fehangahangai mo ha ngaahi ʻahiʻahi, ʻe tokoniʻi ia ʻe he ʻOtuá ke tauhimaʻu ke fakakaukau mafamafatatau ʻo kapau ʻe lotu ʻo hangē ko ia naʻe fai ʻe he tangata-tohi-sāmé: “Kuo tubu o lahi ae gaahi mamahi o hoku loto; ke ke omi au mei he eku gaahi mamahi.” (Sāme 25:​17, PM) ʻOku totonu ki ha ʻovasia ke ne toe lotu ke maʻu ʻa e laumālie ʻo e ʻOtuá pea fakahāhā hono fuá, kau ai ʻa e mapuleʻi kitá. (Luke 11:13; Kalētia 5:​22, 23) Ko hono puleʻi ʻa e ngaahi fakakaukaú, leá, mo e ngaahi ngāué ʻokú ne tokoniʻi ha mātuʻa ke ʻoua ʻe fuʻu hulu ʻi heʻene tokonaki ʻa e tataki fakalaumālie ki he fakatahaʻangá.

17. Ko e hā ʻa e meʻa ʻoku kau ki he anga-fakapotopotó?

¹⁷ Anga-fakapotopoto. (1 Tīmote 3:2) Kuo pau ki ha mātuʻa ke ne anga-fakapotopoto, mo fakaʻutoʻuta lelei. ʻOku totonu ke ʻi ai ʻene ngaahi taumuʻa pea fakakaukauʻi ʻene leá mo e ngaahi ngāue. ʻOku makatuʻunga ʻene fakakaukau anga-fakatōkilaló mo mafamafatataú ʻi he poto fakaeʻotuá mo e ngaahi akonaki fakatupu moʻui lelei mei he Folofola ʻa Sihová, ʻa ia ʻoku totonu ke ne hoko ko e tokotaha ako tōtōivi ai.​—Loma 12:3; Taitusi 2:1.

18. Ko e maaú ʻoku fiemaʻu ke fēfē ʻa e mātuʻá?

¹⁸ Maau (1 Tīmote 3:2, NW) Ko e foʻi lea faka-Kalisi ʻoku liliu mei aí ʻoku ʻuhinga ki he “fokotuʻutuʻu maau” ʻi he 1 Tīmote 2:9, NW. Ko ia ko e mātuʻá ʻoku totonu ke ne maʻu ha founga moʻui fokotuʻutuʻu maau. Ko e fakatātā, ʻoku totonu ke ne tauhi-taimi. Ko e ʻuluaki kau Kalisitiané naʻe ʻikai ko haʻanau taumuʻa tefito ia ke tauhi ha ngaahi lekooti, pea ko ha ʻovasia ʻi he ʻahó ni ʻoku ʻikai ke fiemaʻu ia ke hoko ko ha tauhi tohi pe kalake mataotao. ʻE tokangaʻi nai ʻe he kau sevānití ʻa e ngaahi meʻa ʻoku fiemaʻu ʻi he ngaahi tuʻunga ko iá. Ka ko e foʻi lea faka-Kalisi ʻoku ʻuhinga ki he “maau” ʻokú ne ʻomai ʻa e fakakaukau ko e tōʻonga lelei, pea heʻikai lava ha tangata ke hoko ʻo poto taau ko ha mātuʻa ʻo kapau ʻoku puleʻingataʻa mo maveuveu.​—1 Tesalonaika 5:14; 2 Tesalonaika 3:​6-12; Taitusi 1:10.

19. Koeʻuhi ko ʻene anga-talitali kakaí, ko e hā ʻa e meʻa ʻoku fai ʻe he kau mātuʻá?

¹⁹ Anga-talitali kakai. (1 Tīmote 3:​2, NW; Taitusi 1:8, NW) Ko ha mātuʻa ‘ʻokú ne fai ʻa e anga-talitali kakai.’ (Loma 12:13; Hepelū 13:2) Ko e foʻi lea faka-Kalisi ki he “anga-talitali kakai” ʻoku ʻuhingá ko e “manako ki he kau sola.” Ko ia, ko e mātuʻa ʻoku anga-talitali kakaí ʻokú ne tali lelei ʻa kinautolu kau foʻou ʻi he ngaahi fakataha faka-Kalisitiané, ʻo ne fakahā ʻokú ne mahuʻingaʻia tatau pē ʻiate kinautolu ʻoku masivá mo kinautolu ʻoku maʻu koloa fakamatelié. ʻOkú ne anga-talitali kakai kiate kinautolu ʻoku fefonongaʻaki ʻi he ngāue mahuʻinga faka-Kalisitiané peá ne fakahekeheka atu ʻi heʻenau fonongá “ʻi ha anga ʻoku ngali mo e ʻOtua.” (3 Sione 5-8) Ko hono moʻoní, ko ha mātuʻa ʻokú ne fakahā ʻene anga-talitali kakaí tautefito ki hono kaungā-tuí ʻo fakatatau ki heʻenau fiemaʻú mo e tuʻunga ʻo ʻene malavá.​—Sēmisi 2:​14-17.

20. Ko e hā ʻa e ngaahi founga kuo pau ke maʻu ʻe ha mātuʻa pea poto taau ke faiako?

²⁰ Poto taau ke faiako. (1 Tīmote 3:2, NW) Ko e malava ha mātuʻa ko ha faiako fakalaumālié ʻoku ʻikai ko ha ola ia mei ha poto fakaʻatamai pe ko ha poto fakamāmani. (1 Kolinitō 2:​1-5, 13) ʻOku hoko mai ia koeʻuhi ko ʻene “piki ke maʻu ki he folofola angatonu ʻo kau ki hono poto he faiakó, ke ne malava ai fakatouʻosi ke enginaki ʻi he faiako ʻoku ʻaongá mo valoki ʻa kinautolu ʻoku fakafetauʻileá.” (Taitusi 1:​9, NW; fehoanaki mo Ngāue 20:​18-21, 26, 27.) Kuo pau ke ne malava ke ‘akonekina i he agamalu akinautolu oku agatuu.’ (2 Tīmote 2:​23-26, PM) Neongo kapau ko e mātuʻá ʻoku ʻikai ko e tokotaha malanga fakahāhā lelei taha ia ʻi he fakatahaʻangá, ʻoku totonu ko e tokotaha ako lelei ʻo e Folofola ʻa e ʻOtuá peá ne poto feʻunga ke ne fai ha fakahinohino mo ha akonaki ʻo e kaungā-tuí, ʻa ia ʻoku nau toe hoko ko e kau ako ʻo e Tohitapú. (2 Kolinitō 11:6) Kuo pau ke ne poto taau ke fakahoko ʻa e ngaahi “akonaki fakatupu moʻui lelei” ʻa ia ʻokú ne tokoniʻi ʻa e ngaahi fāmilí mo e tokotaha taki taha ʻoku fetuli ki he moʻui anga-fakaeʻotuá.​—Taitusi 2:​1-10.

21. (a) Ko e hā ʻoku malava ai ke pehē ʻoku ʻikai faʻa tā ha mātuʻa? (e) Ko e hā hono ʻuhinga ʻa e pehē ke ʻunuá? (f) Ko e hā hono ʻuhinga ʻo e ʻikai fiefakakikihí?

²¹ ʻOku ʻikai faʻa tā, ka ʻoku ʻunua, ʻikai fiefakakikihi. (1 Tīmote 3:​3, NW; Taitusi 1:7, NW) ʻI he hoko ko e tokotaha fakamelinó, ko e mātuʻá ʻoku ʻikai te ne tā fakasino ʻa e kakaí pe fakamāʻulaloʻi kinautolu ʻi hano ngāhiʻi mo lea ke fakasiʻisiʻiʻi. (Fehoanaki mo 2 Kolinitō 11:20.) (Ko e poupou ko ia ʻi he konga ki muʻa atú ʻo pehē ʻoku ʻikai “ko ha taha uatau konā” ʻoku fakahā ai ʻokú ne fakaʻehiʻehi mei hono ngāuehalaʻaki ʻa e ʻolokaholó ʻa ia ʻoku faʻa tataki atu ki ha ngaahi faingataʻa.) ʻI heʻene hoko ʻo ʻunuá, ʻo ʻikai anga-māʻolunga mo faingataʻa ke fiemālié, ʻoku ʻikai te ne lau ʻe ia ko e ngaahi meʻa lahi ʻa e fanga kiʻi meʻa iikí. (1 Kolinitō 9:12; Filipai 4:5; 1 Pita 2:18) Koeʻuhi ko e mātuʻá ʻoku ʻikai fiefakakikihi, ʻokú ne fakaʻehiʻehi mei he ngaahi kē pea “ʻikai ʻitangofua.”​—Taitusi 3:2; Sēmisi 1:​19, 20.

22. Ko e hā ʻa e meʻa ʻokú ne fakahā mei he pehē ko ha mātuʻa ʻoku ʻikai ke fai ki hono lotó?

²² Ikai fai ki hono lotó. (Taitusi 1:7, PM) Ko hono ʻuhingá ʻoku “ʻikai fai pe ʻi he lelei ʻaʻana.” (Fehoanaki mo 2 Pita 2:10.) Ko ha mātuʻa kuo pau ke ʻoua te ne fakaaoao ka ʻoku totonu ke ne maʻu ha vakai anga-fakatōkilalo ki heʻene ngaahi malavá. ʻOkú ne anga-fakatōkilalo ʻo vahevahe ʻa e ngaahi fatongiá ki he niʻihi kehé peá ne mahuʻingaʻia ʻi he lahi ha kau akonaki tokoni ʻo ʻikai fakakaukau ʻoku lelei ange ʻene malava ke fai ha ngaahi meʻa ʻi ha toe taha kehe.​—Nōmipa 11:​26-29; Palōvepi 11:14; Loma 12:​3, 16.

23. (a) ʻE fēfē hoʻo fakamatalaʻi ʻa e “tokotaha ʻofa ki he lelei”? (e) Ko e hā hono ʻuhinga ʻo e angatonú?

²³ Tokotaha ʻofa ki he leleí; angatonu. (Taitusi 1:8, NW) Ke poto taau ke hoko ko ha mātuʻa, kuo pau ki he tangatá ke ʻofa ki he leleí pea mo angatonu. Ko e tokotaha ʻofa ki he meʻa ʻoku leleí ʻokú ne ʻofa ki he meʻa ʻoku lelei ʻi he vakai ʻa Sihová, ʻokú ne fai ha ngaahi ngāue angaʻofa mo tokoni pea fakahā ʻa e houngaʻia ki he lelei ʻa e niʻihi kehé. (Luke 6:35; fehoanaki mo Ngāue 9:​36, 39; 1 Tīmote 5:​9, 10.) Ko e ʻuhinga ʻo e angatonú ko e tulitaupau ki he ngaahi lao mo e ngaahi tuʻunga ʻa e ʻOtuá. ʻI he lotolotonga ʻo e ngaahi meʻa kehe, ko e tangata ko iá ʻoku taʻefilifilimānako pea ʻokú ne tauhi angatonu, maʻa, mo angamaau ʻi heʻene fakakaukaú. (Luke 1:6; Filipai 4:​8, 9; Sēmisi 2:​1-9) Koeʻuhi ʻoku kehekehe ʻa e angaleleí mei he anga māʻoniʻoní he ʻokú ne toe laka atu ia mei he meʻa ko ia ʻoku fiemaʻu ʻi he fakamaau totonú, ko e tokotaha ʻofa ki he leleí ʻoku toe lahi ange ʻa e meʻa ʻokú ne fai ki he niʻihi kehé ʻi he meʻa ko ia ʻoku fiemaʻu ʻiate iá.​—Mātiu 20:​4, 13-15; Loma 5:7.

24. Ko e hā ʻa e meʻa ʻoku kau ki he hoko ʻo ʻofa-mateakí?

²⁴ ʻOfa-mateaki. (Taitusi 1:8, NW) Ko ha tangata ʻoku poto taau ke hoko ko ha mātuʻa ʻokú ne tauhimaʻu taʻemaumauʻi ʻa e līʻoa ki he ʻOtuá pea ʻokú ne pikitai ki he lao faka-ʻOtuá, tatau ai pē pe ʻoku fēfē hono ʻahiʻahiʻi ʻene angatonú. ʻOkú ne fai ʻa e meʻa ʻoku ʻamanekina ʻe Sihova meiate iá, pea ʻoku kau ki ai mo e hoko ko e tokotaha malangaʻi angatonu ʻo e Puleʻangá.​—Mātiu 24:14; Luke 1:​74, 75; Ngāue 5:29; 1 Tesalonaika 2:10.

Ko Hono Aʻusia ʻa e Ngaahi Tuʻunga Poto Taaú

25. Ko e ngaahi tuʻunga poto taau kuo fai ʻa e lāulea ki aí ʻoku fiemaʻu ia meia hai, pea ʻe anga-fēfē hono malava ke maʻu ʻa e ngaahi tuʻunga poto taau ko iá?

²⁵ Ko e lahi taha ʻo e ngaahi tuʻunga poto taau kuo tau lāulea ki aí ʻoku kau ai mo e ngaahi meʻa ʻoku fiemaʻu ʻi he tokotaha kotoa pē ʻo e Kau Fakamoʻoni ʻa Sihová pea ʻoku malava ke maʻu ia ʻi he tāpuaki mei he ʻOtuá ʻi he ako, feinga, feohi lelei, mo e lotu ʻa e tokotaha taki taha. ʻE ʻi ai ʻa e faʻahinga ʻe mālohi ange ia ʻi he ngaahi tuʻunga poto taau ʻe niʻihi ʻi ha niʻihi kehe. Ka ke aʻusia ha tuʻunga ʻuhinga lelei, ko e kau sevānití mo e kau mātuʻá kuo pau ke nau aʻusia ʻa e ngaahi fiemaʻu kotoa pē ki honau ngaahi fatongia tefitó.

26. Ko e hā ke fakafaingamālieʻi ai ʻe he kau tangata Kalisitiané ʻa kinautolu ki he fatongia ʻi he fakatahaʻangá?

²⁶ Ko e kotoa ʻo e Kau Fakamoʻoni ʻa Sihová ʻoku totonu ke nau fiemaʻu ke fai ʻa e meʻa kotoa pē ʻe malava ʻi he ngāue ʻa e ʻOtuá. Ko e laumālie ʻeni ʻokú ne ueʻi ʻa e kau tangata Kalisitiané ke nau fakafaingamālieʻi kinautolu ki he fatongia ʻi he fakatahaʻangá. Ko ha tangata fakatapui mo papitaiso koe? Kapau ko ia, kakapa atu peá ke fai ʻa e feinga kotoa pē ke ke hoko ʻo poto taau ke fai ʻa e tauhí!

[Fakamatala ʻi lalo]

ʻE Fēfē Haʻo Tali?

◻ Ko e hā ʻa e ʻuhinga ʻoku ʻi ai ai ha fiemaʻu lahi ʻi he taimí ni ki he kau tangata papitaisó ke nau tali ʻa e fatongia ʻi he fakatahaʻangá?

◻ Ko e hā ʻa e ngaahi tuʻunga poto taau ʻe niʻihi kuo pau ke aʻusia ʻe he kau sevānití?

◻ Ko e hā ʻa e ngaahi fiemaʻu ʻe niʻihi kuo pau ke aʻusia ʻe he kau mātuʻá?

◻ Ko e hā kuo pau ai ki ha mātuʻa ke ne ʻilo ʻa e founga ke ne pule lelei ai ki hono fale ʻoʻoná?

◻ Ko e hā ʻa e meʻa ʻokú ne ueʻi ʻa e kau tangata Kalisitiané ke nau fakafaingamālieʻi kinautolu ki he ngaahi fatongia ʻi he fakatahaʻangá?

[Fakatātā ʻi he peesi 16, 17]

Ko e kau mātuʻá mo e kau sevānití ʻoku totonu ke nau pule lelei ki honau ngaahi falé ʻo fakatatau ki he ngaahi tefitoʻi moʻoni ʻo e Tohitapú