Sio ki he Faikehekehe ʻi he Kakaí

1, 2. Ko e hā ʻoku lava ke hoko ai ʻo faingataʻa ʻa e moʻuí ki he kau sevāniti ʻa e ʻOtuá he ʻaho ní? (Sio ki he ʻuluaki fakatātā ʻi he kupú ni.)

KO E kau toketā mo e kau neesi tokolahi ʻoku nau ngāue takatakai ʻi he kakai ʻoku nau maʻu ʻa e ngaahi mahaki pipihi. ʻOku nau tokangaʻi ʻenau kau mahakí koeʻuhí ʻoku nau loto ke tokoniʻi kinautolu. Ka ʻoku toe fiemaʻu foki ke nau maluʻi kinautolu koeʻuhí ke ʻoua naʻa nau pihia ʻi he mahaki ʻoku nau feinga ke faitoʻó. ʻI he hoko ko e kau sevāniti ʻa Sihová, ʻoku tau ʻi ha tuʻunga meimei tatau. Ko e tokolahi ʻo kitautolú ʻoku tau nofo mo ngāue fakataha mo e kakai kuo nau pihia ʻi he ngaahi fakakaukau mo e ʻulungaanga ʻa ia ʻoku kehe fakaʻaufuli mei he ngaahi ʻulungaanga ʻo e ʻOtuá. ʻE lava ke hoko eni ʻo faingataʻa kiate kitautolu.

² ʻI he ngaahi ʻaho fakaʻosi ʻo e fokotuʻutuʻu ko ení, ko e kakai ʻoku ʻikai ke nau ʻofa ki he ʻOtuá ʻoku nau tukunoaʻi ʻa ʻene ngaahi tuʻunga ki he tonú mo e halá. Naʻe fakamatalaʻi ʻe he ʻapositolo ko Paulá ʻa honau ngaahi ʻulungaanga ʻikai leleí ʻi heʻene faitohi kia Tīmoté. Naʻe pehē ai ʻe Paula ko e ngaahi ʻulungaanga ʻikai lelei ko ení ʻe hoko ʻo toe failahia ange ʻi heʻetau ofi ki he ngataʻanga ʻo e fokotuʻutuʻu ko ení. (Lau ʻa e 2 Tīmote 3:1-5, 13.) Neongo ʻoku tau ʻiloʻi nai ʻoku palakū ʻa e ngaahi ʻulungaanga kovi ko ení, ʻe kei lava pē ke tākiekina kitautolu ʻe he anga ʻo e fakakaukau, talanoa, mo e tōʻonga ʻa e kakai takatakai ʻiate kitautolú. (Pal. 13:20) ʻI he kupú ni, te tau sio ai ki he faikehekehe ʻa e ngaahi ʻulungaanga ko ení mei he ngaahi ʻulungaanga ʻo e kakai ʻa e ʻOtuá. Te tau toe sio ai ki he meʻa ʻe lava ke tau fai ke maluʻi ai kitautolu mei he pihia ʻi he ngaahi ʻulungaanga koví lolotonga ʻetau tokoniʻi ʻa e kakaí ke nau hoko ʻo ʻiloʻi ʻa Sihová.

 3. Ko e hā ʻa e faʻahinga kakai ʻoku fakamatalaʻi ʻi he 2 Tīmote 3:2-5?

³ Naʻe tohi ʻa Paula ʻo pehē ʻi he ngaahi ʻaho fakaʻosí, ʻe ʻi ai “ʻa e ngaahi taimi fakalilifu ʻa ia ʻe faingataʻa ke fekuki mo ia.” Naʻá ne fokotuʻu leva ha lisi ʻo e ngaahi ʻulungaanga ʻikai lelei ʻe 19 ʻa ia ʻe failahia ʻaupito ʻi hotau taimí. Ko e ngaahi ʻulungāngá ni ʻoku meimei tatau mo ia naʻe lave ki ai ʻa Paula ʻi he Loma 1:29-31, ka ko e lisi ʻi heʻene tohi kia Tīmoté ʻoku ngāueʻaki ai ʻa e ngaahi foʻi lea ʻoku ʻikai ke tau maʻu ʻi ha toe feituʻu ʻi he Ngaahi Konga Tohi Tapu Faka-Kalisi Kalisitiané. Naʻe kamataʻaki ʻe Paula ʻa e ngaahi lea “he ko e tangatá te nau hoko.” ʻI hení, “ko e tangatá” ʻoku ʻuhingá ko e “kakai,” koeʻuhí ʻoku lava ke maʻu fakatouʻosi ʻe he kakai tangatá mo e kakai fefiné ʻa e ngaahi ʻulungaanga kovi. Ka ʻoku ʻikai ke maʻu ʻe he faʻahinga kotoa ʻo e tangatá ʻa e ngaahi ʻulungaanga ʻikai lelei ʻa ē naʻe fakamatala ki ai ʻa Paulá. ʻOku maʻu ʻe he kau Kalisitiané ʻa e ngaahi ʻulungaanga mātuʻaki kehe.​—Lau ʻa e Malakai 3:18.

 4. ʻOkú ke fakakaukau ʻoku ʻuhinga ki he hā ʻa e fakafuofuolahi ʻi he hīkisiá?

⁴ Hili ʻa e pehē ʻe Paula ʻe hoko ʻa e tokolahi ko e kau ʻofa kiate kinautolu pē mo e kau ʻofa ki he paʻangá, naʻá ne toe pehē ko e kakaí te nau loto-mahikihiki, hīkisia, mo fakafuofuolahi ʻi he hīkisiá. Ko e kakai ʻoku nau maʻu ʻa e ngaahi ʻulungaanga ko ení ʻoku nau faʻa fakakaukau ʻoku nau lelei ange ʻi he niʻihi kehé koeʻuhi ko honau fōtunga hā maí, meʻa ʻoku lava ke nau faí, meʻa ʻoku nau maʻú, pe ko honau tuʻunga ʻi he moʻuí. Ko e kakai peheé ʻoku nau fiemaʻu ʻo laka ia ʻi he toe meʻa ke fakaʻapaʻapaʻi kinautolu. Naʻe tohi ha mataotao ʻo fekauʻaki mo ha tokotaha hangē ko iá: “ʻI hono lotó ʻoku ʻi ai ha kiʻi ʻōlita ʻa ia ʻokú ne punou hifo ai kiate ia tonu.” Kuo pehē ʻe he niʻihi ko e hīkisiá ʻoku mātuʻaki palakū he naʻa mo e kakai pōlepolé ʻoku ʻikai te nau saiʻia ʻi heʻenau sio ki he hīkisia ʻa e niʻihi kehé.

 5. Kuo anga-fēfē ʻa e hoko ʻo hīkisia naʻa mo e kau sevāniti faitōnunga ʻa Sihová?

⁵ ʻOku fehiʻa ʻa Sihova ʻi he hīkisiá, ʻa ia ʻoku fakamatalaʻi ʻi he Tohi Tapú ko e “mata fakamāhiki.” (Pal. 6:16, 17) Ko hono moʻoní, ʻoku hanga ʻe he hīkisiá ʻo ʻai ha tokotaha ke ne mamaʻo mei he ʻOtuá. (Saame 10:4) Ko e hīkisiá ko ha ʻulungaanga ia ʻo e Tēvoló. (1 Tīm. 3:6) Ko e foʻi moʻoni fakamamahí he kuo hoko ʻo pihia naʻa mo e niʻihi ʻo e kau sevāniti mateaki ʻa Sihová ʻi he hīkisiá. Ko e fakatātaá, ko Tuʻi ʻŪsaia ʻo Siutá naʻá ne faitōnunga ʻi he ngaahi taʻu lahi. Ka ʻoku pehē ʻe he Tohi Tapú: “ʻI heʻene mālohí pē, naʻá ne hoko ai ʻo loto-hīkisia, ʻo ne ʻomi ai ha kovi kiate ia, pea naʻá ne taʻefaitōnunga kia Sihova ko hono ʻOtuá.” Naʻe ʻalu ʻa ʻŪsaia ki he temipalé ʻo tutu ʻa e ʻinisēnisí, ʻa ia naʻe ʻikai totonu ke ne fai. Ki mui ai, naʻe toe hoko foki ʻa e tuʻi faitōnunga ko Hesekaiá ʻo hīkisia, neongo naʻe ʻi ha taimi nounou.​—2 Kal. 26:16; 32:25, 26.

 6. Ko e hā naʻe mei lava ke ne ʻai ʻa Tēvita ke ne hoko ʻo hīkisiá? Ka ko e hā naʻá ne hanganaki anga-fakatōkilalo aí?

⁶ ʻOku hoko ʻa e kakai ʻe niʻihi ʻo hīkisia koeʻuhí ko ʻenau matamataleleí, manakoá, talēnitiʻia ʻi he mūsiká, mālohí, pe fakaʻapaʻapaʻi ʻe he niʻihi kehé. Naʻe maʻu kotoa eni ʻe Tēvita, ka naʻá ne hanganaki anga-fakatōkilalo ʻi he kotoa ʻo ʻene moʻuí. Ko e fakatātaá, hili hono tāmateʻi ʻe Tēvita ʻa Kolaiaté, naʻe pehē ʻe Tuʻi Saula ʻe lava ke mali ʻa Tēvita mo hono ʻofefiné. Ka naʻe pehē ʻe Tēvita: “Ko hai au pea ko hai ʻa hoku kāingá, ʻa e fāmili ʻo ʻeku tamaí ʻi ʻIsilelí, ke u hoko ai ko e foha-ʻi-he-fono ki he tuʻí?” (1 Sām. 18:18) Ko e hā naʻá ne tokoniʻi ʻa Tēvita ke ne hanganaki anga-fakatōkilaló? Naʻá ne ʻiloʻi ko ha ngaahi ʻulungaanga, ngaahi malava, mo ha ngaahi monū pē naʻá ne maʻu naʻe hoko ia koeʻuhí ko e anga-fakatōkilalo ʻa e ʻOtuá mo ʻene tokanga kiate iá. (Saame 113:5-8) Naʻe ʻiloʻi ʻe Tēvita ko ha meʻa lelei pē naʻá ne maʻu naʻe haʻu ia meia Sihova.​—Fakafehoanaki mo e 1 Kolinitō 4:7.

 7. Ko e hā te ne tokoniʻi kitautolu ke tau fakahāhā ʻoku tau anga-fakatōkilalo?

⁷ ʻI he hangē ko Tēvitá, ʻoku feinga ʻa e kakai ʻa Sihova ʻi he ʻaho ní ke nau anga-fakatōkilalo. ʻOku maongo ki hotau lotó ʻa hono ʻilo ko Sihova tonu, ʻa ia ko e Fungani Māʻolungá, ʻokú ne anga-fakatōkilalo. (Saame 18:35) ʻOku tau loto ke ngāueʻaki ʻa e ngaahi leá ni: “Mou kofuʻaki kimoutolu ʻa e manavaʻofa kaungāongoʻi loloto, anga-lelei, anga-fakatōkilalo, anga-malū, mo e kātaki.” (Kol. 3:12) ʻOku tau ʻiloʻi foki ko e ʻofá “ʻoku ʻikai te ne hīkisia, ʻoku ʻikai te ne fakafuofuolahi.” (1 Kol. 13:4) ʻI he sio mai ʻa e niʻihi kehé ʻoku tau anga-fakatōkilaló, te nau loto foki ai ke nau ʻiloʻi ʻa Sihova. Hangē pē ko e lava ke tohoakiʻi ha husepāniti taʻetui kia Sihova ʻi he ʻulungaanga lelei ʻa hono uaifi Kalisitiané, ʻoku lava ke tohoakiʻi mai ʻa e kakaí ki he ʻOtuá ʻi he anga-fakatōkilalo ʻa ʻene kau sevānití.​—1 Pita 3:1.

 8. (a) ʻOku anga-fēfē ʻa e vakai ʻa e kakai ʻe niʻihi ʻi he ʻahó ni ki he talangataʻa ki he mātuʻá? (e) Ko e hā ʻoku tala ʻe he Tohi Tapú ki he fānaú ke nau faí?

⁸ Naʻe fakamatalaʻi ʻe Paula ʻa e anga ʻo e fefakafeangaiʻaki ʻa e kakaí ʻi he ngaahi ʻaho fakaʻosí. Naʻá ne tohi ʻo pehē ko e fānaú te nau talangataʻa ki he mātuʻá. ʻI he ʻahó ni, ʻoku ʻai ai ʻi he ʻū tohí, faivá, mo e ngaahi polokalama televīsone lahi ke hā ngali lelei pē mo ala tali ʻa e talangataʻa ʻa e fānaú ki heʻenau mātuʻá. Ka ko hono moʻoní ko e talangataʻá ʻoku fakavaivaiʻi ai ʻa e fāmilí, ʻa e faʻunga tefito ʻo e sōsaietí. Kuo ʻiloʻi ʻe he tangatá ʻa e moʻoni ko ení ʻi ha taimi fuoloa. Ko e fakatātaá, ʻi Kalisi ʻo e kuonga muʻá, ko ha tangata naʻá ne tā ʻa ʻene ongo mātuʻá naʻe mole meiate ia ʻene ngaahi totonu ʻi hono feituʻú. ʻI he malumalu ʻo e lao ʻa Lomá, ko ha taha naʻá ne tā ʻa ʻene tamaí naʻe lava ke tauteaʻi tatau pē ia mo ha taha fakapō. ʻOku fekauʻi fakatouʻosi ʻi he Ngaahi Konga Tohi Tapu Faka-Hepeluú mo e Faka-Kalisí ʻa e fānaú ke nau fakaʻapaʻapa ki heʻenau mātuʻá.​—ʻEki. 20:12; ʻEf. 6:1-3.

 9. Ko e hā te ne tokoniʻi ʻa e fānaú ke nau talangofua ki heʻenau mātuʻá?

⁹ Ko e hā ʻe lava ke ne tokoniʻi ʻa e fānaú ke nau talangofua ki heʻenau mātuʻá neongo kapau ko e faʻahinga takatakai ʻiate kinautolú ʻoku ʻikai te nau talangofua? ʻI he fakakaukau ʻa e fānaú ki he ngaahi meʻa lelei kotoa kuo fai maʻanautolu ʻe heʻenau mātuʻá, ʻoku totonu ke nau ongoʻi houngaʻia ai pea loto ke talangofua kiate kinautolu. ʻOku fiemaʻu foki ke mahinoʻi ʻe he toʻutupú ko e ʻOtuá, ʻa e Tamai ʻa kitautolú kotoa, ʻokú ne ʻamanekina mai te nau talangofua ki heʻenau mātuʻá. ʻI he leaʻaki ʻe he toʻutupú ʻa e ngaahi meʻa lelei fekauʻaki mo ʻenau mātuʻá, ʻoku nau tokoniʻi ai honau ngaahi kaungāmeʻá ke nau fakaʻapaʻapaʻi lahi ange ai ʻenau mātuʻa ʻanautolú. Ko e moʻoni, kapau ko e ngaahi mātuʻá ʻoku ʻikai te nau maʻu ʻa e ʻofa fakanatula ki heʻenau fānaú, ʻe lava ke faingataʻa ange ai ke talangofua kiate kinautolu ʻa ʻenau fānaú. Ka ʻi he taimi ʻoku ongoʻi ai ʻe ha tokotaha kei siʻi ʻoku ʻofa moʻoni ʻiate ia ʻa ʻene mātuʻá, ʻe lava ke tokoniʻi ai ia ke ne talangofua kiate kinaua naʻa mo e taimi ʻoku faingataʻa aí. ʻOku pehē ʻe ha tokoua kei talavou ko Austin: “Neongo ʻoku ou faʻa ongoʻi hehema ke feinga ke hao ʻi ha ngaahi meʻa, ʻoku fokotuʻu ʻe heʻeku ongo mātuʻá ʻa e ngaahi tataki fakaʻatuʻi, fakamatalaʻi ʻa e ngaahi ʻuhinga ʻo e tuʻutuʻuní, pea tauhi ke mātuʻaki ʻatā ʻa e fetuʻutakí. Naʻe tokoniʻi au ʻe he meʻá ni ke u talangofua. Naʻe lava ke u sio naʻá na tokanga kiate au, pea naʻe ʻai ʻe he meʻa ko iá ke u loto ke ʻai ke na fiefia.”

10, 11. (a) Ko e hā ʻa e ngaahi ʻulungaanga kovi ʻoku fakahaaʻi ai ʻoku ʻikai ke feʻofaʻaki ʻa e kakaí? (e) ʻOku lahi fēfē ʻa e ʻofa ʻa e kau Kalisitiane moʻoní ki he kakai kehé?

¹⁰ Naʻe toe fakamatalaʻi ʻe Paula ʻa e ngaahi ʻulungaanga kehe ʻoku fakahaaʻi ai ʻoku ʻikai ke feʻofaʻaki ʻa e kakaí. Hili ʻa e pehē “talangataʻa ki he mātuʻá,” ʻokú ne lave ki he taʻehoungaʻia. ʻOku ʻuhinga lelei eni, koeʻuhí ko e kakai taʻehoungaʻiá ʻoku ʻikai te nau fakamahuʻingaʻi ʻa e ngaahi meʻa lelei ʻoku fai ʻe he niʻihi kehé maʻanautolú. Naʻe toe pehē ʻe Paula ko e kakaí te nau taʻemateaki. Te nau lotolotokehe, ʻa ia ʻoku ʻuhingá heʻikai te nau loto ke fakamelino mo e niʻihi kehé. Te nau hoko ko e kau lea taʻetokaʻi mo e kau lavaki, ʻi hono leaʻaki ʻa e ngaahi meʻa fakamamahi mo fakatupu maumau fekauʻaki mo e kakaí pea naʻa mo e ʻOtuá. Pea te nau hoko ko e kau laukovi loi, ko e faʻahinga ʻoku nau tala ha ngaahi loi fakatupu maumau ke maumauʻi ai ʻa e ongoongo ʻo e niʻihi kehé.a​—Sio ki he fakamatala ʻi lalo.

¹¹ Ko e kau sevāniti ʻa Sihová ʻoku nau kehe ʻaupito mei he tokolahi taha ʻo e kakai ʻi he māmaní he ʻoku nau fakahāhā ʻa e ʻofa moʻoni ki he niʻihi kehé. ʻOku moʻoni maʻu pē eni. Ko hono moʻoní, naʻe pehē ʻe Sīsū ko e fekau pē taha ʻi he Lao ʻa Mōsesé naʻe mahuʻinga ange ʻi he fekau ke ʻofa ki he kakai kehé ko e fekau ke ʻofa ki he ʻOtuá. (Māt. 22:38, 39) Naʻe toe pehē ʻe Sīsū ʻe ʻiloʻi ʻa e kau Kalisitiané ʻi he feʻofaʻaki ʻoku nau fakahāhaá. (Lau ʻa e Sione 13:34, 35.) Ko e kau Kalisitiane moʻoní ʻoku nau ʻofa ʻo aʻu ki honau ngaahi filí.​—Māt. 5:43, 44.

12. Naʻe anga-fēfē hono fakahāhā ʻe Sīsū ʻa e ʻofa ki he niʻihi kehé?

¹² Naʻe fakahaaʻi ʻe Sīsū naʻá ne ʻofa moʻoni ʻi he kakaí. Naʻá ne fai eni ʻaki ʻene fononga mei he kolo ki he kolo ʻo tala ki he kakaí ʻa e ongoongo lelei fekauʻaki mo e Puleʻanga ʻo e ʻOtuá. Naʻá ne fakamoʻui ʻa e kuí, heké, ko e kau kiliá, mo e tulí. Naʻá ne toe fokotuʻu hake ʻa e faʻahinga naʻe maté. (Luke 7:22) Naʻe aʻu ʻo foaki ʻe Sīsū ʻa ʻene moʻuí ke fakahaofi ʻa e faʻahinga ʻo e tangatá, neongo naʻe fehiʻa ʻiate ia ʻa e tokolahi. Naʻe faʻifaʻitaki haohaoa ʻa Sīsū ki he ʻofa ʻa ʻene Tamaí. ʻI he māmaní kotoa, ʻoku faʻifaʻitaki ai ʻa e Kau Fakamoʻoni ʻa Sihová kia Sīsū pea fakahāhā ʻa e ʻofa ki he niʻihi kehé.

13. ʻE lava fēfē ke tokoniʻi kinautolu ʻe he ʻofa ʻoku tau fakahāhā ki he niʻihi kehé ke nau loto ke ʻilo kia Sihova?

¹³ ʻI heʻetau fakahāhā ki he kakaí ʻoku tau ʻofa ʻiate kinautolú, ʻe lava ke ʻai ai ke nau loto ke ʻilo ki heʻetau Tamai fakahēvaní. Ko e fakatātaá, naʻe ʻalu ha tangata ʻi Taileni ki ha fakataha-lahi fakavahe pea naʻe maongo kiate ia ʻa ʻene sio ki he anga hono fakahāhā ʻe he fanga tokouá mo e fanga tuofāfiné ʻa e feʻofaʻakí. Hili ʻene aʻu ki ʻapí, naʻá ne kole ke ako Tohi Tapu tuʻo ua ʻi he uike mo e Kau Fakamoʻoni ʻa Sihová. Pea naʻá ne malanga ki he kotoa ʻo hono kāingá. ʻI ha māhina pē ʻe ono ki mui ai, naʻe fai ai ʻe he tangatá ni ʻene ʻuluaki lau Tohi Tapu ʻi he Fale Fakatahaʻangá. ʻOku tau fakahāhā ʻa e ʻofa ki he niʻihi kehé? ʻEke hifo: ‘ʻOku ou fai ʻa e meʻa kotoa ʻoku ou malavá ke tokoniʻi ʻa e kakai ʻi hoku fāmilí, ʻi heʻeku fakatahaʻangá, pea ʻi heʻeku ngāue fakafaifekaú? ʻOku ou feinga ke vakai ki he niʻihi kehé ʻo hangē ko e vakai ʻa Sihová?’

14, 15. Ko e hā ʻa e ngaahi ʻulungaanga kovi ʻoku fakahāhā ʻe he tokolahi? Kuo anga-fēfē ʻa e liliu ʻe he niʻihi ʻa honau angaʻitangatá?

¹⁴ ʻI he ngaahi ʻaho fakaʻosí, ʻoku toe fakahāhā ai ʻe he kakaí ʻa e ngaahi ʻulungaanga kovi kehe ʻoku totonu ke tau fakaʻehiʻehi mei ai. Ko e fakatātaá, ko e tokolahi ʻoku ʻikai te nau ʻofa ki he leleí. ʻOku nau fehiʻa ʻi he meʻa ʻoku leleí pea aʻu ʻo fakafepakiʻi ia. Ko e kakai peheé ʻoku ʻikai te nau maʻu ʻa e mapuleʻi-kitá, anga-kakaha. ʻOku taʻefieauna ʻa e niʻihi. ʻOku nau fai taʻefakakaukauʻi ʻa e ngaahi meʻá pea ʻikai ke tokanga ki he nunuʻa ʻe hoko ki he niʻihi kehé ʻi heʻenau ngaahi tōʻongá.

¹⁵ Ko e tokolahi naʻa nau tōʻonga ki muʻa ʻo hangē ha fanga manu fekaí kuo liliu honau angaʻitangatá. Naʻe tomuʻa tala ʻa e liliu fakaofo ko ení ʻi ha kikite ʻi he Tohi Tapú. (Lau ʻa e ʻAisea 11:6, 7.) ʻOku tau lau ai fekauʻaki mo e fanga manu kaivao, hangē ko e fanga ulofí mo e fanga laioné, ʻoku nau nofo melino mo e fanga manu lalatá, hangē ko e fanga lamí, mo e ʻuhikiʻi pulú. Ko e hā te nau melino aí? ʻOku hoko atu ʻa e kikité: “Koeʻuhí ʻe fonu moʻoni ʻa e māmaní ʻi he ʻiloʻi ʻo Sihová.” (ʻAi. 11:9) ʻOku ʻikai lava ke ako ʻa e fanga manú fekauʻaki mo Sihova, ko ia ʻi ha founga fakaefakatātā, ʻoku ʻuhinga ʻa e kikite ko ení ki he ngaahi liliu ʻe fai ʻe he kakaí ʻi honau angaʻitangatá.

16. Kuo anga-fēfē hono tokoniʻi ʻe he Tohi Tapú ʻa e kakaí ke liliu ʻa honau angaʻitangatá?

¹⁶ Ko e tokolahi ʻo hotau fanga tokouá mo e fanga tuofāfiné naʻa nau fekai ki muʻa ʻo hangē ko e fanga ulofí ka ʻoku nau fakamelino he taimí ni. ʻE lava ke ke lau ʻa e niʻihi ʻo ʻenau ngaahi hokosiá ʻi he kupu hokohoko ko e “Liliu ʻe he Tohi Tapú ʻa e Moʻuí,” ʻoku maʻu ʻi he jw.org. Ko e faʻahinga kuo nau hoko ʻo ʻiloʻi pea tauhi kia Sihová ʻoku ʻikai te nau hangē ko e faʻahinga ʻoku nau hā fakangalingali atu ʻoku nau maʻu ʻa e anga-fakaʻotuá ka ʻoku ʻikai ke hā moʻoni ʻa hono mālohí ʻiate kinautolu. Ko e kakai peheé ʻoku nau fakangalingali lotu ki he ʻOtuá, ka ʻoku fakamoʻoniʻi ʻi heʻenau tōʻongá ʻoku ʻikai. Kae kehe, ʻoku ʻi he lotolotonga ʻo e kakai ʻa Sihová ʻa e tokolahi naʻa nau anga-kakaha ki muʻa ka ʻi he taimi ní kuo nau “kofuʻaki ʻa e angaʻitangata foʻou ʻa ia naʻe fakatupu ʻo fakatatau ki he finangalo ʻo e ʻOtuá ʻi he māʻoniʻoni moʻoni mo e mateaki moʻoni.” (ʻEf. 4:23, 24) ʻI he ako ʻa e kakaí fekauʻaki mo e ʻOtuá, ʻoku nau ʻiloʻi ai ʻoku fiemaʻu ke nau muimui ʻi heʻene ngaahi tuʻungá. ʻOku tokoniʻi kinautolu ʻe he meʻá ni ke nau fai ha liliu ʻi he meʻa ʻoku nau tui ki aí, anga ʻo ʻenau fakakaukaú, pea mo e meʻa ʻoku nau faí. ʻOku ʻikai faingofua hono fai ʻa e ngaahi liliu ko ení, ka ʻe tokoniʻi ʻe he laumālie ʻo e ʻOtuá ʻa e faʻahinga ʻoku nau loto ke fakahōifuaʻi iá.

17. ʻE lava fēfē ke tau fakaʻehiʻehi mei hono tākiekina ʻe he kakai ʻulungaanga koví?

¹⁷ ʻOku faingofua ange ʻa e sio ki he faikehekehe ʻi he faʻahinga ʻoku tauhi ki he ʻOtuá mo e faʻahinga ʻoku ʻikaí. Kuo pau ke tau tokanga ke ʻoua naʻa tākiekina kitautolu ʻe he ngaahi ʻulungaanga kovi ʻo e faʻahinga ʻoku ʻikai te nau tauhi ki he ʻOtuá. ʻOku tau loto ke muimui ʻi he fakahinohino ʻa Sihova ke tafoki mei he faʻahinga kakai ko ē ʻoku fakamatalaʻi ʻi he 2 Tīmote 3:2-5. Ko e moʻoni, heʻikai lava ke tau fakaʻehiʻehi fakaʻaufuli mei he tokotaha kotoa pē ʻoku ʻulungaanga kovi. ʻOku fiemaʻu nai ke tau ngāue mo kinautolu, ako mo kinautolu, pe nofo mo kinautolu. Ka ʻoku ʻikai fiemaʻu ia ke tau fakakaukau pe fai ʻa e tōʻonga hangē ko kinautolú. Ko e hā ʻe lava ke ne tokoniʻi kitautolú? ʻE lava ke tau fakaivimālohiʻi ʻetau kaumeʻa mo Sihová ʻaki hono ako ʻa e Tohi Tapú pea fili ke hoko ko e ngaahi kaumeʻa ofi ʻo e faʻahinga ʻoku ʻofa kiate iá.

18. ʻE lava fēfē ke tokoniʻi ʻa e niʻihi kehé ʻe he meʻa ʻoku tau leaʻaki mo faí ke nau loto ke ʻiloʻi ʻa Sihova?

¹⁸ ʻOku tau loto foki ke tokoniʻi ʻa e niʻihi kehé ke nau ʻiloʻi ʻa Sihova. Kumi ki ha ngaahi faingamālie ke faifakamoʻoni ai, pea kole kia Sihova ke ne tokoniʻi koe ke ke leaʻaki ʻa e meʻa totonu ʻi he taimi totonu. ʻOku totonu ke tau ʻai ke ʻiloʻi ʻe he niʻihi kehé ko kitautolú ko e Kau Fakamoʻoni ʻa Sihova. ʻE ʻoatu leva ai ʻe hotau ʻulungaanga leleí ʻa e lāngilangi ki he ʻOtuá ʻo ʻikai kiate kitautolu. Kuo akoʻi kitautolu ʻe Sihova “ke tau talitekeʻi ʻa e anga-taʻefakaʻotuá mo e ngaahi holi fakamāmaní pea ke tau moʻui ʻaki ʻa e fakakaukau leleí mo e māʻoniʻoní mo e anga-līʻoa fakaʻotuá ʻi he lotolotonga ʻo e fokotuʻutuʻu lolotonga ko ʻení.” (Tai. 2:11-14) Kapau ʻoku tau faʻifaʻitaki kia Sihova pea fai ʻa e meʻa ʻokú ne fiemaʻu ke tau faí, ʻe sio ki ai ʻa e niʻihi kehé. ʻE aʻu ʻo pehē nai ai ʻe he niʻihi: “ʻOku mau loto ke mau ō mo kimoutolu, he kuo mau fanongo ko e ʻOtuá ʻoku ʻi he kakai ko kimoutolú.”​—Sāk. 8:23.