Lamalama ki Hoʻo Faiakó

“Lamalama kiate koe mo e meʻa ʻoku ke akoʻaki [hoʻo faiakó, NW]: ke ke nofoʻaki fai ʻa e ongo meʻa ko ia; he ʻi hoʻo fai pehe te ke fakamoʻui koe mo kinautolu foki ʻoku fanongo kiate koe.”​—1 TIMOTE 4:16.

 1, 2. Ko e hā ʻoku fiemaʻu fakavavevave ai ha kau faiako faivelenga ʻi he ʻaho ní?

“MOU ō . . . ʻo ngaohi ʻa e ngāhi kakai kotoa pe ko ʻeku kau ako, ʻi he . . . akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu.” (Mātiu 28:​19, 20) ʻI he vakai ki he tuʻutuʻuni ko eni ʻa Sīsū Kalaisí, ko e kau Kalisitiane kotoa pē ʻoku totonu ke nau feinga ke hoko ko e kau faiako. ʻOku fiemaʻu ha kau faiako faivelenga ke tokoniʻi ʻa e faʻahinga loto-totonú ke nau maʻu ha ʻilo ki he ʻOtuá ki muʻa naʻa fuʻu tōmui. (Loma 13:11) Naʻe naʻinaʻi ʻa e ʻapositolo ko Paulá: “Ke ke malangaʻaki ʻa e folofola, faʻa fai pe ʻi he faingamalie mo e ʻikai ha faingamalie.” (2 Timote 4:2) ʻOku fiemaʻu ki heni ʻa e akoʻi fakatouʻosi ʻi loto mo tuʻa ʻi he fakatahaʻangá. Ko e moʻoni, ko e fekau ke malangá ʻiate ia peé ʻoku kau ki ai ʻa e meʻa lahi ange ia ʻi hono fanongonongo pē ʻa e pōpoaki ʻa e ʻOtuá. ʻOku fiemaʻu ʻa e faiako ola leleí kapau ko e faʻahinga mahuʻingaʻiá ʻoku nau teu ke hoko ko e kau ākonga.

² ʻOku tau moʻui ʻi he “ngaahi taimi faingataʻa.” (2 Timote 3:1) Kuo tākiekina ʻa e kakaí ʻe he ngaahi filōsofia fakaemāmaní mo e ngaahi akonaki loí. Ko e tokolahi ʻoku “fakapoʻuli honau ʻatamai” mo nau “ongonoa.” (Efeso 4:​18, 19) Kuo maʻu ʻe he niʻihi ha ngaahi kafo fakaeongo mamahi. ʻIo, ko e kakaí ʻoku nau mātuʻaki “ongosia mo tukuhāusia, ʻo hange ko ha fanga sipi taʻehanau tauhi.” (Mātiu 9:36) Ka neongo ia, ʻi hono ngāueʻaki ʻa e pōtoʻi faiakó, ʻe lava ke tau tokoniʻi ai ʻa e faʻahinga ʻoku loto-totonú ke fai ʻa e ngaahi liliu ʻoku fiemaʻú.

Kau Faiako ʻi Loto ʻi he Fakatahaʻangá

 3. (a) Ko e hā ʻoku kau atu ki he fekau ko ia ʻa Sīsū ke faiakó? (e) Ko hai ʻokú ne maʻu ʻa e fatongia tefito ke faiako ʻi he loto fakatahaʻangá?

³ Fakafou ʻi he fokotuʻutuʻu ako Tohitapu ʻi ʻapí, ʻoku maʻu ai ʻe he laui miliona ʻa e fakahinohino fakafoʻituitui. Ka ʻi he hili ʻenau papitaisó, ʻoku fiemaʻu ki he faʻahinga foʻoú ha toe tokoni lahi ange ke nau hoko ʻo “aka leva . . . mo pulusi ki he tuʻunga.” (Efeso 3:18 [3:​17, PM]) ʻI heʻetau fakahoko ko ia ʻa e fekau ʻa Sīsū ʻoku hiki ʻi he Mātiu 28:​19, 20, pea tataki ʻa e faʻahinga foʻoú ki he kautaha ʻa Sihová, ʻoku nau maʻu ʻaonga ai mei hono akoʻi ʻi he loto fakatahaʻangá tonu. Fakatatau ki he Efeso 4:​11-13, kuo ʻosi fakanofo ʻa e kau tangata ke ngāue ko e “tauhi mo faiako: koeʻuhi ke ʻosi sāuni ʻa e kakai lotu maʻa e ngaue tokoni, moʻo langa hake ʻa e sino ʻo Kalaisi.” ʻI he taimi ʻe niʻihi, ko ʻenau pōtoʻi faiakó ʻoku kau ki ai ʻa e fiemaʻu ke “fakaʻilohala, valoki, enginaki ʻi he angakātaki ʻaupito.” (2 Timote 4:2) Ko e ngāue ʻa e kau faiakó naʻe mātuʻaki mahuʻinga ia, he ʻi heʻene tohi ki he kau Kolinitoó, ʻoku fakahokohoko ai ʻe Paula ʻa e kau faiakó hili pē ʻa e kau ʻapositoló mo e kau palōfitá.​—1 Kolinito 12:28.

 4. ʻOku tokoniʻi fēfē kitautolu ʻe he malava ke faiakó ke talangofua ai ki he ekinaki ʻa Paula ʻoku hiki ʻi he Hepelu 10:​24, 25?

⁴ Ko e moʻoni, ʻoku ʻikai ke ngāue ʻa e kau Kalisitiane kotoa pē ko e kau mātuʻa, pe kau ʻovasia. Ka neongo ia, ʻoku fakalototoʻaʻi kotoa ke fefakaʻaiʻaiʻaki “ki he feʻofaʻaki mo e ngaue lelei.” (Hepelu 10:​24, 25) Ko e fai pehē ʻi he ngaahi fakatahá ʻoku kau ki ai ʻa e ngaahi poupou ʻosi teuteu lelei mo fakamātoato ʻa ia ʻe lava ke langa hake ai mo fakalototoʻaʻi ʻa e niʻihi kehé. Ko e kau malanga taukei ʻo e Puleʻangá te nau toe ‘fefakaʻaiʻaiʻaki ki he ngaue leleí’ nai ʻaki ʻenau fevahevaheʻaki ʻenau ʻiló mo ʻenau taukeí mo e faʻahinga foʻoú ʻi he taimi ʻoku nau ngāue fakataha ai mo kinautolu ʻi he malaʻe malangá. ʻI he ngaahi taimi peheé pea ʻi he ngaahi taimi ʻikai anga-mahení ʻe toe ʻoatu ai ʻa e fakahinohino mahuʻinga. Ko e fakatātaá, ʻoku naʻinaʻi ki he kau fefine matuʻotuʻá ke nau hoko ko e “akoʻanga meʻa lelei.”​—Taitusi 2:3.

Fakalotoʻi ke Tui

 5, 6. (a) ʻOku anga-fēfē ʻa e faikehekehe ʻa e lotu faka-Kalisitiane moʻoní mei he lotu loí? (e) ʻOku anga-fēfē hono tokoniʻi ʻe he kau mātuʻá ʻa e faʻahinga foʻoú ke nau fai ha ngaahi fili ʻoku fakapotopotó?

⁵ Ko ia ʻoku tuʻu ai ʻa e lotu faka-Kalisitiané ʻo mātuʻaki faikehekehe mo e ngaahi lotu loí, ʻa ia ko e tokolahi ʻoku nau kumi ke puleʻi ʻa e fakakaukau honau kau mēmipá. ʻI he ʻi māmani ʻa Sīsuú, naʻe kumi ʻa e kau taki lotú ke puleʻi ʻa e meimei tafaʻaki kotoa pē ʻo e moʻui ʻa e kakaí fakafou ʻi he ngaahi talatukufakaholo fakamafasia ko e faʻu ʻe he tangatá. (Luke 11:46) Ko e haʻa faifekau ʻo Puleʻanga-Haʻa-Kalisitiané kuo nau faʻa fai pehē.

⁶ Ka ko e lotu moʻoní ia, ko e “ngāue toputapu” ʻa ia ʻoku tau ʻoatu ʻaki ʻa e “mafai ʻo e fakakaukaú.” (Loma 12:1, NW) Ko e kau sevāniti ʻa Sihová ʻoku “fakalotoʻi ke tui.” (1 Timote 3:​14, fakaʻītali ʻamautolu.) ʻI he taimi ʻe niʻihi, ko e faʻahinga ko ia ʻoku takimuʻá ʻe fiemaʻu nai ke nau akoʻi ha ngaahi fakahinohino mo ha ngaahi founga ki he lele lelei ʻa e fakatahaʻangá. Kae kehe, ʻi he ʻikai kumi ke fai ʻa e ngaahi fili maʻá e kaungā Kalisitiané, ʻoku akoʻi ʻe he kau mātuʻá kinautolu “ke sivi ʻa e lelei mo e kovi.” (Hepelu 5:14) ʻOku fai tefito eni ʻe he kau mātuʻá ʻaki hono fafanga ʻa e fakatahaʻangá “i he gaahi lea oe tui moe akonaki lelei.”​—1 Timote 4:​6, PM.

Lamalama ki Hoʻo Faiakó

 7, 8. (a) ʻOku malava fēfē ʻa e kakai ʻoku fakangatangata ʻenau ngaahi malavá ke ngāue ko ha kau faiakó? (e) Ko e hā ʻokú ne fakahaaʻi ko e feinga fakafoʻituituí ʻoku fiemaʻu ia kae hoko ko ha faiako ola lelei?

⁷ Ka, tau foki muʻa ki hotau fekau tefito ko ia ke faiakó. ʻOku fiemaʻu nai ki ai ha faʻahinga pōtoʻi, ako, pe ngaahi malava pau kae kau ʻi he ngāue ko ení? ʻOku ʻikai fiemaʻu ia. ʻI he tafaʻaki lahi tahá, ko e ngāue faiako ko eni ʻi māmani lahí ʻoku fakahoko ia ʻe he niʻihi tāutaha lāuvale ʻoku fakangatangata pē ʻenau ngaahi malavá. (1 Kolinito 1:​26-29) ʻOku fakamatala ʻe Paula: “Ko e anga oʻemau maʻu ʻa e koloa ko ia [ʻa e ngāue fakafaifekaú], ʻoku faʻo hina kelekele [ngaahi sino taʻehaohaoa], koeʻuhi ke ʻa e ʻOtua ai pe ʻa e makehe atu ʻo e mafai, ʻo ʻikai ko e meʻa meiate kimautolu.” (2 Kolinito 4:7) Ko e lavameʻa kāfakafa kuo aʻusia ʻe he ngāue malangaʻi ʻo e Puleʻangá ʻi he kolopé ko ha fakamoʻoni ia ki he mālohi ʻo e laumālie ʻo Sihová!

⁸ Kae kehe, ʻoku fiemaʻu ʻa e feinga fakatāutaha uouongataha kae hoko ai “ko e tangata ngaue ʻoku ʻikai mā, ko hoʻo tofa totonu ʻa e folofola ʻo e moʻoni.” (2 Timote 2:15) Naʻe naʻinaʻi ʻa Paula kia Tīmote: “Lamalama kiate koe mo e meʻa ʻoku ke akoʻaki [hoʻo faiakó, NW]: ke ke nofoʻaki fai ʻa e ongo meʻa ko ia; he ʻi hoʻo fai pehe te ke fakamoʻui koe mo kinautolu foki ʻoku fanongo kiate koe.” (1 Timote 4:16) ʻOku anga-fēfē leva ʻa e lamalama ʻa ha taha ki heʻene faiakó, tatau ai pē pe ko e ʻi loto pe ʻi tuʻa ʻi he fakatahaʻangá? ʻI he fai peheé ʻoku fiemaʻu ki ai ke lavaʻi ha ngaahi pōtoʻi pau pe ngaahi founga faiako?

 9. Ko e hā ʻoku mahuʻinga ange ia ʻi he ngaahi malava fakaenatulá?

⁹ Naʻe fakahāhā moʻoni ʻe Sīsū ha mahino kehe ange ʻo e ngaahi founga faiakó ʻi heʻene Malanga ʻiloa ko ia ʻi he Moʻungá. ʻI he taimi naʻe ʻosi ai ʻene leá, “naʻe ofo ʻa e fuʻu kakaí ʻi heʻene founga faiakó.” (Mātiu 7:​28, NW) Ko e moʻoni, ʻoku ʻikai ha taha ʻo kitautolu ʻe lava ke faiako lelei ʻo hangē ko Sīsuú. Ka neongo ia, ʻoku ʻikai fiemaʻu ia ke tau hoko ko e kau faiva-lea kae hoko ai ko e kau faiako ola lelei. ʻIkai koā, fakatatau ki he Siope 12:​7, naʻa mo e “fanga manu” mo e “manupuna” ʻoku nau lava ke faiako fakalongolongo pē! Fakataha mo ha ngaahi faʻahinga malava pe pōtoʻi fakaenatula nai ʻoku tau maʻu, ko e meʻa ʻoku mātuʻaki mahuʻingá ko e “anga” ʻoku tau hoko ki aí​—ʻa e ngaahi ʻulungaanga ʻoku tau maʻú mo e ngaahi tōʻonga fakalaumālie kuo tau fakatupulekiná ʻa ia ʻoku malava ke faʻifaʻitaki ki ai ʻa e kau akó.​—2 Pita 3:11; Luke 6:40.

Kau Ako ʻo e Folofola ʻa e ʻOtuá

10. Naʻe anga-fēfē hono fokotuʻu ʻe Sīsū ha faʻifaʻitakiʻanga lelei ʻi he tuʻunga ko ha tokotaha ako ia ʻo e Folofola ʻa e ʻOtuá?

¹⁰ Ko ha faiako ola lelei ʻo e ngaahi moʻoni Fakatohitapú kuo pau ke ne hoko ko ha tokotaha ako ʻo e Folofola ʻa e ʻOtuá. (Loma 2:21) Naʻe fokotuʻu ʻe Sīsū Kalaisi ha faʻifaʻitakiʻanga kehe ange ʻi he tuʻunga ko ení. Lolotonga ʻene ngāue fakafaifekaú, naʻe lave pe fakahaaʻi ʻe Sīsū ʻa e ngaahi fakakaukau naʻe tatau mo e ngaahi konga tohi ʻi he meimei vaeua ʻo e ngaahi tohi ʻo e Ngaahi Konga Tohitapu Faka-Hepeluú.a Ko ʻene alāanga mo e Folofola ʻa e ʻOtuá naʻe mahino ia ʻi hono taʻu 12, ʻi he taimi naʻe ʻilo ai ia “ʻoku ne lotolotoi ʻi he kau akonaki, ʻo ne fakafanongo kiate kinautolu mo fakafehuʻi kiate kinautolu.” (Luke 2:46) ʻI heʻene hoko ʻo lahí, naʻe angaʻaki ʻe Sīsū ʻa e ʻalu ki he sinakoké, ʻa ia naʻe lau ai ʻa e Folofola ʻa e ʻOtuá.​—Luke 4:16.

11. Ko e hā ʻa e ngaahi tōʻonga ako lelei ʻoku totonu ke fakatupulekina ʻe ha faiako?

¹¹ Ko ha tokotaha lau faivelenga koe ʻo e Folofola ʻa e ʻOtuá? Ko e keli ki aí ko e founga ia “te ke toki laveʻi [ai] ʻa e ʻapasia kia Sihova, pea maʻu ʻa e ʻiloʻi ʻo e ʻOtua.” (Palovepi 2:​4, 5) Ko ia, fakatupulekina ha ngaahi tōʻonga ako lelei. Feinga ke lau ha konga ʻo e Folofola ʻa e ʻOtuá ʻi he ʻaho kotoa pē. (Sāme 1:2) ʻAi ke ke tōʻongaʻaki ʻa hono lau ʻa e ʻīsiu taki taha ʻo e Taua Leʻo pea mo e Awake! ʻi hono maʻu pē iá. Lamalama ʻi he ngaahi fakataha ʻa e fakatahaʻangá. Ako ke fai ha fekumi tokanga. ʻI he ako ke ‘kumi fakatotolo ki he mea kotoabe,’ ʻe lava ke ke kalofi ai ʻa e ngaahi fakalahi mo e ngaahi hala ʻi he taimi ʻokú ke faiako aí.​—Luke 1:3, PM.

ʻOfa mo e Tokaʻi ʻa e Faʻahinga ʻOku Akoʻí

12. Ko e hā ʻa e fakakaukau ʻa Sīsū fekauʻaki mo ʻene kau ākongá?

¹² Ko e ʻulungaanga mahuʻinga ʻe tahá, ko e fakakaukau totonu fekauʻaki mo e faʻahinga ko ia ʻokú ke fakahinohinoʻí. Naʻe ongoʻi fakaliliʻa ʻa e kau Fālesí ki he faʻahinga ko ia naʻa nau fanongo kia Sīsuú. “Ko lāuvale na taeʻilo ki he Lao, ko e koto malaʻia kinautolu,” ko ʻenau laú ia. (Sione 7:49) Ka naʻe maʻu ʻe Sīsū ia ʻa e ʻofa mo e tokaʻi loloto ʻo ʻene kau ākongá. Naʻá ne pehē: “ʻOku ʻikai te u kei lau kimoutolu ko e kau tamaioʻeiki; he talaʻehai ʻoku ʻilo ʻe he tamaioʻeiki ʻa e meʻa ʻoku fai ʻe heʻene ʻeiki: ka kuo u ui kimoutolu ko hoku ngaahi kaumeʻa; koeʻuhi ʻilonga ha meʻa ne u fanongo mei heʻeku Tamai kuo u fakaʻilo kiate kimoutolu.” (Sione 15:15) ʻOku fakahā ʻe he meʻá ni ʻa e founga ʻoku totonu ke fakahoko ai ʻe he kau ākonga ʻa Sīsuú ʻenau ngāue fakafaiakó.

13. Naʻe anga-fēfē ʻa e ongoʻi ʻa Paula ʻo fekauʻaki mo e faʻahinga ko ia naʻá ne akoʻí?

¹³ Ko e fakatātaá, naʻe ʻikai ke tauhi maʻu ʻe Paula ha vahaʻangatae momoko hangē ha pisinisí mo ʻene kau akó. Naʻá ne tala ki he kau Kolinitoó: “Neongo ʻe toko mano hoʻomou kau faiako ʻi he moʻui faka-Kalaisi, ka talaʻehai ʻoku tokolahi hoʻomou ngaahi tamai: pea ko au ia naʻa ku fakatupu kimoutolu ʻi he moʻui faka-Sisu-Kalaisi ʻaki ʻa e Kosipeli.” (1 Kolinito 4:15) ʻI he taimi ʻe niʻihi, naʻe aʻu ʻo fakatōloʻimata ʻa Paula lolotonga ʻene ekinakiʻi ʻa e faʻahinga ko ia naʻá ne akoʻí! (Ngāue 20:31) Naʻá ne toe fakahāhaaʻi foki ʻa e anga-kātaki mo e anga-ʻofa kehe ange. Ko ia, naʻe malava ke ne tala ki he kau Tesalonaiká: “Naʻa mau ʻi homou lotolotonga ʻo angalelei pe; hange tofu pe ha fefine toutama ʻa ia ʻoku ne tauhi siʻene fanau aʻana.”​—1 Tesalonaika 2:7.

14. Ko e hā ʻoku mātuʻaki mahuʻinga ai ʻa e mahuʻingaʻia fakafoʻituitui ʻi heʻetau kau ako Tohitapú? Fakatātaaʻi.

¹⁴ ʻOkú ke faʻifaʻitaki kia Sīsū mo Paula? Ko e ʻofa loto-moʻoni ki heʻetau kau akó ʻe feʻungaʻānoa pē ke ne feau ha ngaahi taʻefeʻunga ʻi he ngaahi malava fakaenatula ʻoku tau maʻú nai. ʻOku ongoʻi ʻe heʻetau kau ako Tohitapú ʻoku tau maʻu ha mahuʻingaʻia loto-moʻoni ʻiate kinautolu fakafoʻituitui? ʻOku tau tuku ha taimi ke fai ke ʻilo ai kinautolu? ʻI he taimi naʻe faingataʻaʻia ai ha fefine Kalisitiane ʻe taha ʻi hono tokoniʻi ha tokotaha ako ke fakalakalaka fakalaumālié, naʻá ne ʻeke anga-ʻofa ange: “ʻOku ʻi ai ha meʻa ʻokú ne fakahohaʻasi koe?” Naʻe kamata leva ke lilingi ange ʻe he fefiné hono lotó, ʻo fakamatalaʻi ange ʻa e ngaahi loto-hohaʻá mo e ngaahi loto-moʻuá. Naʻe iku ʻa e fepōtalanoaʻaki anga-ʻofa ko iá ko ha liliuʻanga ki he fefiné. ʻI he ngaahi tuʻunga peheé, ʻoku feʻungamālie ai ha ngaahi fakakaukau Fakatohitapu mo ha ngaahi lea fakafiemālie mo fakalototoʻa. (Loma 15:4) Ka, ko ha kiʻi fakatokanga: ʻE fakalakalaka vave nai ha tokotaha ako Tohitapu ka ʻe kei fiemaʻu nai ke ne ikuʻi ha ngaahi tōʻonga taʻefakakalisitiane ʻe niʻihi. Ko ia, ʻe ʻikai nai fakapotopoto ke fuʻu vāofi fakasōsiale mo e tokotaha ko iá. ʻOku totonu ke tauhi maʻu ʻa e ngaahi fakangatangata faka-Kalisitiane totonú.​—1 Kolinito 15:33.

15. ʻE anga-fēfē ʻetau fakahāhā ʻa e tokaʻi ki heʻetau kau ako Tohitapú?

¹⁵ Ko e tokaʻi ʻo ʻetau kau akó ʻoku kau ki ai ʻa e ʻikai te tau feinga ke puleʻi ʻenau ngaahi moʻui fakafoʻituituí. (1 Tesalonaika 4:11) Hangē ko ení, te tau ako nai mo ha fefine ʻoku nonofo mo ha tangata. Mahalo kuó na ʻosi maʻu ha fānau. ʻI hono maʻu ha ʻilo totonu ki he ʻOtuá, ʻoku fiemaʻu ʻe he fefiné ke fakatonutonu ʻa e ngaahi meʻá mo Sihova. (Hepelu 13:4) ʻOku totonu nai ke ne mali mo e tangatá pe mavahe meiate ia? Mahalo te tau ongoʻi mālohi ko e mali mo ha tangata ʻoku siʻisiʻi pe halaʻatā haʻane mahuʻingaʻia fakalaumālié te ne fakafaingataʻaʻiaʻi nai ʻa ʻene fakalakalaka ʻi he kahaʻú. ʻI he tafaʻaki ʻe tahá, te tau manavasiʻi nai ki he moʻui ʻa ʻene fānaú mo fakakaukau ʻoku sai ange ke ne mali mo e tangatá. Kae kehe, ʻoku taʻetokaʻi mo taʻeʻofa ke kaunoa ʻi he moʻui ʻa e tokotaha akó mo feinga ke fakamono ʻetau ngaahi fakakaukaú tonu ʻi he ngaahi meʻa peheé. Hili ko iá, ko e fefiné ia ʻa e tokotaha kuo pau ke ne nofo mo e ngaahi ola ʻo e fili ko iá. ʻIkai ʻoku lelei tahá leva, ke akoʻi ha tokotaha ako pehē ke ne ngāueʻaki pē ʻene “ngaahi mafai fakaefakakaukaú” tonu mo fakapapauʻi maʻana ʻa e meʻa ʻoku totonu ke ne faí?​—Hepelu 5:​14, NW.

16. ʻE lava fēfē ke fakahāhā ʻe he kau mātuʻá ʻa e ʻofa mo e tokaʻi ki he tākanga ʻa e ʻOtuá?

¹⁶ ʻOku mahuʻinga tautefito ki he kau mātuʻa ʻo e fakatahaʻangá ke nau fai ʻofa mo tokaʻi ʻa e tākangá. ʻI heʻene tohi kia Filimoné, naʻe pehē ʻe Paula: “Neongo te u lava noa pe ʻia Kalaisi ke tuʻutuʻuni ke ke fai ʻa e meʻa ʻoku totonu ka ʻoku ou fiefai ko e kole pe, ʻo tuʻunga ʻi he ʻofa.” (Filimone 8, 9) ʻI he taimi ʻe niʻihi, ʻe malanga hake nai ha ngaahi tuʻunga fakasiva ʻamanaki ʻi he fakatahaʻangá. ʻE aʻu nai ʻo fiemaʻu ʻa e tuʻumaʻú. Naʻe naʻinaʻi ʻa Paula kia Taitusi ke “valoki masila kinautolu [faʻahinga ʻoku faihalá], koeʻuhi ke moʻui lelei ʻenau lotu.” (Taitusi 1:13) Neongo ia, ko e kau ʻovasiá kuo pau ke nau tokanga ke ʻoua ʻaupito ʻe lea taʻeʻofa ki he fakatahaʻangá. “Ko e tamaioʻeiki ʻa e ʻEiki ʻoku ʻikai tāu ke ne fakakikihi,” ko e tohi ia ʻa Paulá, “kaekehe ke ne angalelei ki he kakai kotoa pe, ke ne poto ʻi he faiako, ke ne makataki ʻa e kovi.”​—2 Timote 2:24; Sāme 141:3.

17. Ko e hā ʻa e hala naʻe fai ʻe Mōsesé, pea ko e hā ʻoku lava ke ako ʻe he kau mātuʻá mei aí?

¹⁷ Ko e kau ʻovasiá kuo pau ke nau hokohoko fakamanatu kiate kinautolu ko ʻenau feangaingá mo e “fanga sipi ʻa e ʻOtua.” (1 Pita 5:2, fakaʻītali ʻamautolu.) Ko Mōsese, neongo naʻá ne anga-vaivai, naʻe mole taimi nounou meiate ia ʻa e fakakaukau ko ení. Ko e kau ʻIsilelí “naʻe fakatubu hono loto, koia naa ne lea aki ae lea taegali e hono lougutu.” (Sāme 106:​33, PM) Naʻe mātuʻaki taʻefakahōifua ki he ʻOtuá ʻa e ngaohikoviʻi ko eni ʻo ʻEne tākangá, neongo naʻe ʻikai taʻetukuakiʻi kinautolu. (Nomipa 20:​2-12) ʻI he fehangahangai mo e ngaahi pole pehē ʻi he ʻaho ní, ʻoku totonu ki he kau mātuʻá ke nau feinga ke faiako mo fakahinohino, ʻaki ʻa e ʻiloʻilo mo e anga-lelei. ʻOku tali lelei taha hotau fanga tokouá ʻi he taimi ʻoku fai ai kiate kinautolu ʻaki ʻa e fakaʻatuʻi mo hangē ha niʻihi tāutaha ʻoku nau fiemaʻu ha tokoní, ʻo ʻikai ko ha faʻahinga ʻoku ʻikai toe ala fakaleleiʻi. ʻOku fiemaʻu ki he kau mātuʻá ke nau tauhi maʻu ha fakakaukau pau ʻo hangē ko ia naʻe maʻu ʻe Paula ʻi he taimi naʻá ne pehē ai: “ʻOku mau falala ʻi he ʻEiki ʻoku mou fai, pea te mou fai, ʻa e ngaahi meʻa ʻoku mau fekau atu.”​—2 Tesalonaika 3:4.

Ongongofua ki Heʻenau Ngaahi Fiemaʻú

18, 19. (a) ʻOku totonu ke fēfē ʻetau tali ki he ngaahi fiemaʻu ko ia ʻa e kau ako Tohitapu ʻoku fakangatangata ʻenau ngaahi malavá? (e) ʻE anga-fēfē nai haʻatau tokoniʻi ʻa e kau ako ko ia ʻoku nau faingataʻaʻia ʻi ha ngaahi meʻa pau?

¹⁸ Ko e faiako ola leleí ʻokú ne loto-lelei ke ngaofengofua ki he ngaahi malava mo e ngaahi ngātanga ʻo ʻene kau akó. (Fakafehoanaki mo Sione 16:12.) ʻI he talanoa fakatātā ʻa Sīsū ki he ngaahi talēnití, naʻe ʻoange ai ʻe he ʻeikí ʻa e ngaahi monū “ʻo fakatatau ki heʻenau mafai taki taha.” (Mātiu 25:15) ʻE lava ke tau muimui ʻi ha sīpinga meimei tatau ʻi he taimi ʻoku tau fai ai ha ngaahi ako Tohitapu. Ko e anga-mahení ia, ʻoku fiemaʻu ke ʻosiki ha tohi makatuʻunga faka-Tohitapu ʻi ha vahaʻa taimi nounou feʻunga. Neongo ia, kuo pau ke ʻiloʻi, ʻoku ʻikai maʻu kotoa ha pōtoʻi lautohi lelei pe malava ke puke vave ʻa e ngaahi fakakaukau foʻoú. Ko ia ai, ʻoku fiemaʻu ʻa e ʻiloʻilo ʻi he taimi ka hiki ai mei he poini ko ē ki hē ʻi he akó kapau ko e tokotaha ʻoku kaunga ki aí ʻoku faingataʻaʻia ke tulituli ki he vave ko iá. Ko e meʻa ʻoku mahuʻinga ange ʻi hono ʻosiki ha fakamatala ʻi ha vave kuo fokotuʻú, ko hono tokoniʻi ʻa e kau akó ke maʻu ʻa e ʻuhinga ʻo e meʻa ʻoku nau akó.​—Mātiu 13:51.

¹⁹ Ko e meʻa tatau ʻe lava ke leaʻaki ki he kau ako Tohitapu ko ia ʻoku nau faingataʻaʻia ʻi he ngaahi meʻa pau, hangē ko e Tolu-Tahaʻi-ʻOtuá pe ngaahi ʻaho mālōlō fakalotú. Lolotonga ʻoku ʻikai faʻa fiemaʻu ia ke toe fakakau mai ha tohi fekumi tefito faka-Tohitapu ʻi heʻetau ngaahi akó, te tau fai pehē nai ʻi he taimi ki he taimi kapau ko e meʻá ni ʻoku mahino ʻe ʻaonga. Ko e fakaʻutoʻuta leleí ʻoku totonu ke ngāueʻaki koeʻuhi ke taʻofi ha fakatuai taʻefiemaʻu ki he fakalakalaka ʻa ha tokotaha ako.

Hoko ʻo Loto-Māfana!

20. Naʻe anga-fēfē hono fokotuʻu ʻe Paula ha faʻifaʻitakiʻanga ʻi hono fakahāhā ʻa e loto-māfaná mo e tuipaú ʻi heʻene faiakó?

²⁰ “ʻI homou laumalie, mou loto mafana,” ko e lea ia ʻa Paulá. (Loma 12:11) ʻIo, tatau ai pē pe ʻoku tau fai ha ako Tohitapu ʻi ʻapi pe ʻoku tau kau ʻi ha konga ʻi he fakataha ʻa e fakatahaʻangá, ʻoku totonu ke tau fai ia ʻaki ʻa e faivelenga mo e loto-māfana. Naʻe tala ʻe Paula ki he kau Tesalonaiká: “Talaʻehai naʻe hoko atu ʻemau Kosipeli ko e ngeʻesi lea pe, ka naʻe ō mo e malohi, pea ō mo e Laumalie Maʻoniʻoni pea mo e loto taʻetalaʻa.” (1 Tesalonaika 1:5) Ko ia, naʻe ʻoatu ʻe Paula mo hono ngaahi kaungāmeʻá “ʻo ʻikai ko e Kosipeli pe ʻa e ʻOtua, ka ko [ʻenau] moʻui foki.”​—1 Tesalonaika 2:8.

21. ʻE lava fēfē ke tau tauhi maʻu ha fakakaukau loto-māfana fekauʻaki mo ʻetau ngaahi vāhenga-ngāue faiakó?

²¹ Ko e loto-māfana moʻoní ʻoku haʻu ia mei he tuipau mālohi ko ʻetau kau ako Tohitapú ʻoku fiemaʻu ke nau fanongo ki he meʻa te tau leaʻakí. ʻOua ʻaupito naʻa tau vakai ki ha faʻahinga vāhenga-ngāue fakafaiako pē ko ha founga tuʻumaʻu. Naʻe lamalama ʻa e sikalaipe ko ʻĒselá ki heʻene faiakó ʻi he tuʻunga ko ení. Naʻá ne “tuku . . . hono loto ke feingaʻi ʻa e lao ʻa Sihova, pea ke fai ki ai, pea ke ako ki Isileli.” (Esela 7:10) ʻOku totonu ke tau fai pehē ʻaki ʻa hono teuteu fakaʻāuliliki mo fakalaulauloto ki he mahuʻinga ʻo e fakamatalá. Tau lotu muʻa kia Sihova ke ne fakafonu kitautolu ʻaki ʻa e tui mo e tuipau. (Luke 17:5) Ko ʻetau loto-māfaná ʻe lava ke tokoni ia ki he kau ako Tohitapú ke nau fakatupulekina ha ʻofa moʻoni ki he moʻoní. Ko e moʻoni, ko ʻetau lamalama ko ia ki heʻetau faiakó ʻe kau nai ki ai ʻa hono ngāueʻaki ʻa e ngaahi founga faiako pau. Ko ʻetau kupu hono hokó ʻe lāulea ki he niʻihi ʻo e ngaahi meʻá ni.

[Fakamatala ʻi lalo]

ʻOkú Ke Manatuʻi?

◻ Ko e hā ʻoku fiemaʻu ai ha kau faiako Kalisitiane pōtoʻi he ʻaho ní?

◻ Ko e hā ʻa e ngaahi tōʻonga ako lelei ʻoku lava ke tau fakatupulekiná?

◻ Ko e hā ʻoku mātuʻaki mahuʻinga ai ʻa e ʻofa mo e tokaʻi ʻo e faʻahinga ʻoku tau akoʻí?

◻ ʻE lava ke tau tali fēfē ki he ngaahi fiemaʻu ʻa ʻetau kau ako Tohitapú?

◻ Ko e hā ʻoku mātuʻaki mahuʻinga ai ʻa e loto-māfana mo e tuipaú ʻi he taimi ʻo hono akoʻi ʻa e niʻihi kehé?

[Fakatātā ʻi he peesi 10]

Ko e kau faiako leleí ko e kau ako tonu kinautolu ʻo e Folofola ʻa e ʻOtuá

[Fakatātā ʻi he peesi 13]

Maʻu ha mahuʻingaʻia fakafoʻituitui ʻi he kau ako Tohitapú