ʻE Ikuna Koā ʻe he Leleí ʻa e Koví?

KI MUʻA ʻi he meimei taʻu ʻe ua afe kuo maliu atú, naʻe fakamaauʻi ai ʻa e moʻui ʻa Sīsū Kalaisí ʻi he mate pe ko e moʻui, ka ko e tangata tonuhia ia. Naʻe faʻufaʻufono ʻa e kau tangata anga-koví ke fakaʻauha ia koeʻuhi naʻá ne leaʻaki ʻa e moʻoní. Naʻe talatalaakiʻi loi ʻo pehē ko e tokotaha naʻe feinga ke fakatupu angatuʻu, pea naʻe ongoongaʻa ʻa e kalanga ʻa e fuʻu kakaí ke tāmateʻi ia. Naʻe tuʻutuʻuni ke tautea mate fakamamahi ʻa Sīsū ʻe ha kōvana Loma ʻa ia naʻá ne fakamahuʻingaʻi ʻa ʻene ngeia fakapolitikalé ʻo lahi ange ʻi he moʻui ʻa ha tufunga. ʻOku ngalingali naʻe ikunaʻi ʻe he kovi.

Kaekehe, ko e pō ki muʻa pea tāmateʻi fakalao ʻa Sīsuú, naʻá ne tala ange ki heʻene kau ākongá: “Kuo u ikuna ʻa mamani ʻe au.” (Sione 16:33) Ko ʻene ʻuhinga ki he hā? ʻI ha tuʻunga siʻisiʻi, naʻe ʻikai pē ke fakalotokonaʻi ia ʻe he kovi ʻi he māmaní pe ʻai ia ke ne totongi ʻa e kovi ʻaki ʻa e kovi. Naʻe ʻikai ke fakaʻefituʻu ia ʻe he māmaní ki ha oʻiʻanga ko e anga-kovi. (Fakafehoanaki mo Loma 12:​2, Phillips.) Naʻa mo e lolotonga ʻene meimei maté, naʻá ne lotu koeʻuhi ko e kau fakahoko tauteá ʻo ne pehē: “ʻAlā Tamai, fakamolemole ʻa kinautolu; he ʻoku ʻikai te nau ʻilo ʻa e meʻa ʻoku nau fai.”​—Luke 23:34.

Naʻe fakahā ʻe Sīsū ʻo aʻu ki heʻene maté, ʻe malava ke ikunaʻi ʻa e koví. Naʻá ne enginaki ki heʻene kau muimuí ke nau fai tau mo e koví. ʻOku lava fēfē ke nau fakahoko ʻeni? ʻI heʻenau tokaʻi ʻa e faleʻi faka-Tohitapu ke ʻoua ʻe “totogi ae kovi aki ae kovi ki ha taha,” pea ke toutou “ikuna ae kovi aki ae lelei,” ʻo hangē ko ia naʻe fai ʻe Sīsuú. (Loma 12:​17, 21, PM) Ka ʻoku ʻaonga moʻoni hono fai ʻa e meʻa ko ʻení?

Ko e Fakafepaki Tuʻu ki he Kovi ʻi Dachau

Naʻe hanga ʻe he fefine Siamane naʻe fakahū-fakapōpulaʻi ʻi Dachau ko Else ʻo ʻoange ha meʻaʻofa mātuʻaki mahuʻinga ki ha taʻahine Lūsia ko hono taʻu 14, ko e meʻaʻofá ko e tui mo e ʻamanaki.

Ko Dachau ko ha ʻapitanga tau fakamamahi naʻe ongoongoa he faikoví ʻa ia naʻe mate ai ʻa e toko laui afe pea naʻe fai ki he toko laui teau kau ai mo e taʻahine Lūsia ko ʻení ʻa e ngaahi ʻahiʻahi fakafaitoʻo fakalilifu. Naʻe hangē ʻa Dachau ko e fakahāhā fakaʻaufuli ia ʻo e koví. Ka neongo iá, naʻa mo e kelekele ngali kakā pehe ní naʻe malava ke tupu ai ha meʻa ʻoku lelei pea aʻu ʻo tupulaki lahi ai.

Naʻe ongoʻi mātuʻaki fakaʻofaʻia ʻa Else ki he kiʻi taʻahiné ni ʻa ia naʻe fakamālohiʻi foki ia ke ne sio ki he kau leʻo SS ʻi heʻenau tohotohoʻi anga-fakamanu ʻa ʻene faʻeé. Naʻe fehangahangai ʻa e moʻui ʻa Else mo ha tuʻunga fakatuʻutāmaki, ʻi heʻene kumi ki ha ngaahi faingamālie ke ne lea ki he taʻahiné ʻo kau ki he leleí mo e koví pea mo e ʻamanaki faka-Tohitapu ki he toetuʻú. Naʻá ne akoʻi hono kiʻi kaumeʻá ni ke ne fakahā ʻa e ʻofa kae ʻikai ko e fehiʻa. Pea koeʻuhi ko e tokoni ʻa Else, naʻe matuʻuaki ai ʻe he taʻahine Lūsiá ʻa e ngaahi meʻa fakalilifu ʻi Dachau.

Naʻe fai ʻe Else ʻa e tokoni ko ʻeni koeʻuhi naʻá ne loto ke muimui ki he faʻifaʻitakiʻanga taʻesiokita ʻa Kalaisí. ʻI he tuʻunga ko e taha ia ʻo e Kau Fakamoʻoni ʻa Sihová, naʻá ne ʻosi ako ke ʻoua ʻe totongi ʻa e kovi ʻaki ʻa e kovi, pea naʻe ueʻi ia ʻe heʻene tuí ke tokoniʻi ʻa e niʻihi kehé ke nau fai ʻa e meʻa tatau. Neongo naʻe lahi ʻa e mamahi naʻe hoko kiate ia ʻi Dachau, ka naʻá ne ikuna ʻa e founga pule naʻe koví ʻaki ʻa e ʻulungaanga lelei. Pea naʻe ʻikai ko Else pē naʻe fai peheé.

Naʻe fakahā ʻe Paul Johnson ʻi heʻene tohi ko e A History of Christianity, ʻo pehē naʻe “fakafisi [ʻa e Kau Fakamoʻoni ʻa Sihová] ke ngāue fakataha mo e founga-pule faka-Nasí ʻi ha faʻahinga meʻa pē pea naʻa nau fakahāhā mahino ko e founga-pule mātuʻaki kovi ʻataʻatā ia. . . . Naʻe uesia ʻe ha faʻahinga fakatanga pē ʻa e peseti ʻe hiva-fitu ʻo kinautolu.” Naʻe hoko ko ha fekuki taʻeʻaonga ia naʻa nau faí? Naʻe fakahā ʻe he tokotaha saienisi Pōlani ki he nofo fakaetangatá ko Anna Pawelczynska ʻi he tohi ko e Values and Violence in Auschwitz, ʻo fekauʻaki mo e Kau Fakamoʻoní: “Naʻe fuʻu mālohi ʻa e anga ʻo e fakakaukau ʻa e kiʻi kulupu nofo pōpula ko ʻení pea naʻa nau ikuʻi ʻenau faitau mo e pule faka-Nasí.”

Ka, ko e tokolahi taha ʻo kitautolu ʻoku tau fai ʻa e faitau tefito mo e hehema ki he koví ʻoku ʻiate kitautolu pē kae ʻikai mo e tākiekina kovi fakatuʻasinó. Ko e fekuki ia ʻoku hoko ʻi loto ʻiate kitautolu tonu.

Ko Hono Ikunaʻi ʻa e Kovi ʻOku ʻi Loto ʻIate Kitautolú

Naʻe fakamatalaʻi ʻa e faitau ko ʻení ʻe he ʻapositolo ko Paulá ʻo ne pehē: “ʻOku ʻikai te u fai ʻa e lelei ʻoku ou loto ke u faí; ʻoku ou toutou fai ʻa e meʻa ʻoku kovi ʻoku ʻikai te u loto ke u faí.” (Loma 7:​19, The New Testament, naʻe fai ʻe William Barclay) Naʻe ʻilo lelei ʻe Paula, ʻoku ʻikai faingofua maʻu pē ʻa hono fai ʻa e meʻa ʻoku leleí.

Naʻe faitau ha talavou Sēpeni ko ʻEukenioa mo ʻene hehema ki he meʻa ʻoku koví ʻi he taʻu ʻe ua. ʻOkú ne fakamatala mai: “Naʻe fiemaʻu ke u fuʻu anga-fefeka kiate au. Naʻá ku hehema ki he ʻulungaanga taʻetaaú talu mei heʻeku kei siʻí. ʻI he lolotonga hoku taʻu 13 ki he 19, naʻá ku loto-lelei ke kau ki he ngaahi fakafiefia fakaefehokotaki fakasino ha tangata mo ha tangata ʻo fuʻu tōtuʻa, pea te u lea hangatonu, naʻá ku saiʻia ʻi he faʻahinga founga-moʻui peheé.” Ko e hā ʻa e meʻa naʻá ne ueʻi ia ke ne liliú?

Naʻe pehē ʻe ʻEukenio: “Naʻá ku loto ke ʻai ke fiefia ʻa e ʻOtuá, pea naʻá ku ako mei he Tohitapú ʻoku ʻikai ke fakahōifua kiate ia ʻa e founga ʻo ʻeku moʻuí. Ko ia naʻá ku fakapapauʻi te u liliu, te u muimui ki he ngaahi fakahinohino ʻa e ʻOtuá. Naʻe fiemaʻu ke u faitau mo e ngaahi fakakaukau taʻetaau naʻá ne kei lōmekina ʻa hoku ʻatamaí ʻi he ʻaho kotoa pē. Naʻá ku loto-ʻalovili ke ikuna ʻa e tau ko ʻení, pea naʻá ku lotu taʻetuku ke maʻu ʻa e tokoni mei he ʻOtuá. ʻI he hili ʻa e taʻu ʻe ua naʻe ʻosi atu ʻa e tuʻunga faingataʻa lahi tahá, ka ʻoku ou kei anga-fefeka pē kiate au. Ka naʻe ʻaonga ʻa e fekuki ko ʻení. ʻOku ou maʻu he taimí ni ʻa e ongoʻi ʻoku ʻi ai hoku ʻaonga, ko e nofo mali fiefiá, kaeʻumaʻā hake ai ʻa e vahaʻangatae lelei mo e ʻOtuá. ʻOku ou ʻilo mei he meʻa naʻe hokosia kiate au tonu ʻe malava ke toʻo ʻaupito ʻa e ngaahi fakakaukau ʻoku koví ki muʻa te ke fakahoko kinautolu, ʻo kapau ʻokú ke mātuʻaki feinga ki ai.”

ʻOku ikuna ʻe he leleí ʻa e koví ʻi he taimi kotoa pē ʻoku fakataleʻi ai ha fakakaukau ʻoku kovi, pea ʻi he taimi kotoa pē ʻoku tau fakafisi ai mei hono totongi ʻa e kovi ʻaki ʻa e kovi. Neongo ʻoku mahuʻinga ʻa e ngaahi ikuna peheé, ka ʻoku ʻikai te nau toʻo fakaʻaufuli ʻa e tupuʻanga tefito ʻe ua ʻo e koví. Neongo pē ʻetau feinga lahi ʻaupitó, ʻoku ʻikai te tau malava ke lavaʻi fakaʻaufuli ʻa ʻetau ngaahi vaivaiʻanga tukufakaholó, pea ʻoku kei ngāueʻaki ʻe Sētane ʻa ʻene tākiekina koví ki he kakaí. Ko ia ʻe ʻi ai ha taimi ʻe liliu ai ʻa e tuʻunga ko ʻení?

Ko Hono Fakaʻauha ʻa e Tēvoló

Naʻe hoko ʻa e tauhi angatonu ʻa Sīsū ʻo aʻu ki he maté ko e fakataʻeʻaonga lahi ʻaupito ʻo e palani ʻa Sētané. Naʻe ʻikai lavameʻa ʻa e Tēvoló ʻi heʻene feinga ke maumauʻi ʻa e angatonu ʻa Sīsuú, pea naʻe kamata ai ʻa hono fakaʻilongaʻi ʻa e ngataʻanga ʻo Sētané. Hangē ko e fakamatala ʻa e Tohitapú, naʻe mate ʻa Sīsū koeʻuhi “ko e meʻa ʻi heʻene mate, ke ne fakakaʻanga ʻa e . . . Tevolo.” (Hepelū 2:14) Naʻe fakahā ʻe Sīsū ki heʻene kau ākongá ʻi he hili ʻene toetuʻú: “Kuo tuku kiate au ae malohi kotoabe i he lagi mo mamani.” (Mātiu 28:​18, PM) Pea ʻe ngāueʻaki ʻa e mālohi ko ʻení ke fakataʻeʻaongaʻi ʻa e ngaahi ngāue ʻa Sētané.

ʻOku fakamatala ʻa e tohi Fakahaá ʻo kau ki he ʻaho naʻe lī hifo ai ʻe Sīsū ʻa Sētane mei he ngaahi langí. ʻOku fakangatangata ʻa e ngaue ʻa e Pule Faikovi ko ʻení fakataha mo ʻene kau tēmenioó ki he feituʻu ʻoku ofi ki he māmaní. ʻOku fai fakatokanga mai ʻa e Tohitapú, ʻe iku ʻeni ki he kovi ʻo fuʻu hulu: “Ka ʻoiaue ʻa e fonua mo e tahi! He kuo hoko hifo ʻa e Tevolo kiate kimoua, ʻoku ne ʻita lahi, ko ʻene ʻilo, ʻoku toesiʻi pe hono taimi.”​—Fakahā 12:​7-9, 12.

ʻOku fakahā ʻe he kikite faka-Tohitapú kuo ʻosi hoko ʻa e meʻa faka-hisitōlia ko ʻení, ʻoku fakafuofua ki he Tau ʻUluaki ʻa Māmaní.b ʻOku mahino leva ʻa e ʻuhinga kuo tupulekina ai ʻo fuʻu ʻilonga ʻa e kovi ko ia kuo tau sio tonu ki ai ʻi hotau kuongá ni. Ka ʻi he kahaʻu vavé ni maí ʻe taʻofi fakaʻaufuli ai ʻa Sētane ke ʻoua te ne toe lava ke tākiekina ha taha.​—Sio ki he Fakahā 20:​1-3.

Ko e hā ʻa e meʻa ʻe fakahoko ʻe he meʻá ni ki he faʻahinga ʻo e tangatá?

“ʻE ʻIkai Te Nau Fai Kovi”

ʻI he tuʻunga ko e Tuʻi ʻo e Puleʻanga ʻo e ʻOtuá, ʻe vavé ni ke ngāueʻaki ʻe Sīsū ʻa hono ‘mālohi ʻi he māmaní’ ke ne faʻufaʻu ha polokalama ko e toe ako foʻou fakalaumālie. “E toki ako ae kakai o mamani ki he maonioni.” (ʻAisea 26:​9, PM) ʻE hā mahino ki he faʻahinga kotoa pē ʻa e ngaahi ʻaongá. ʻOku fakapapauʻi mai ʻe he Tohitapú: “ʻE ʻikai te nau fai ha maumau [“ʻe ʻikai te nau fai kovi,” Green’s Interlinear Hebrew/Greek English Bible], pea ʻe ʻikai te nau fai ha fakaʻauha ʻi he kotoa ʻo hoku moʻunga tapu: he ʻe fonu ʻa mamani ʻi he ʻiloʻi ʻo Sihova, ʻo hange ko e mafola ʻa e vai ʻi he tahi.”​—ʻAisea 11:9.

Naʻa mo e taimí ni ʻe malava ke ikuʻi ʻa ʻetau ngaahi hehema ki he koví. ʻI he taimi ʻa ia ʻe ʻikai ke toe ʻi ai ai ʻa e tākiekina faka-tēmenioó, ʻoku pau ʻe mātuʻaki faingofua ange ke “fakaʻehiʻehi mei he kovi, [kae] fai ʻa e lelei.”​—1 Pita 3:11.

ʻOku tau maʻu ha ʻuhinga lelei ke tui pau ʻe ikuna ʻe he leleí ʻa e koví koeʻuhi ko e ʻOtuá ko e lelei, pea ʻi heʻene tokoni maí ʻe lava ke ikuʻi ʻa e koví ʻe he faʻahinga ʻoku nau loto ke fai ʻa e leleí, ʻo hangē ko ia naʻe fakamoʻoniʻi mai ʻe he faʻifaʻitakiʻanga ʻa Sīsū tonu. (Sāme 119:68) ʻOku lava ke fakatuʻamelie atu ʻa e faʻahinga ʻoku nau loto-lelei ke faitau mo e koví ki he moʻui ʻi he māmani ʻe ʻosi fakamaʻa ʻa ia ʻe pule mai ki ai ʻa e Puleʻanga ʻo e ʻOtuá, ko e founga-pule kuo fakapapauʻi ʻene taumuʻa ke ne toʻo fakaʻaufuli atu ʻa e koví ʻo taʻengatá. ʻOku fakamatala mai ʻa e tokotaha-tohi-sāmé ʻo kau ki he meʻa ʻe iku ki aí ʻo ne pehē: “Kuo fakafetaulaki ae aloofa moe mooni; koe maonioni moe melino kuo na toutou fekita. E tubu hake ae mooni mei he kelekele; bea e jio hifo ae maonioni mei he lagi.”​—Sāme 85:​10, 11, PM.

[Fakamatala ʻi lalo]