Fakahāhā ʻa e Tokanga ki he Ongoʻi ʻa e Niʻihi Kehé

 1. ʻI he fekauʻaki mo e 1 Pita 3:8, ko e hā ʻoku tau fiefia ai ʻi he feohi mo e kakai ʻoku nau tokanga fekauʻaki mo ʻetau ngaahi ongoʻí mo e leleí?

ʻOKU tau fiefia ʻi he feohi mo e faʻahinga ʻoku nau tokanga fekauʻaki mo ʻetau ngaahi ongoʻí mo e leleí. ʻOku nau feinga ke mahinoʻi hotau tuʻungá, ke ʻiloʻi ʻetau fakakaukaú mo e ongoʻí. ʻOku nau fakatokangaʻi ʻa e meʻa ʻoku tau fiemaʻú pea tokoniʻi kitautolu naʻa mo e ki muʻa ke tau kole ha tokoní. ʻOku tau houngaʻia ʻi he kakai ʻoku nau fakahāhā ʻoku nau “kaungāongoʻi”b maí.​—Lau ʻa e 1 Pita 3:8.

 2. Ko e hā nai ʻoku fiemaʻu ai ke tau ngāue ki hono fakahāhā ʻa e kaungāongoʻí?

² ʻI he tuʻunga ko e kau Kalisitiané, ʻoku fiemaʻu kotoa ke tau fakahāhā ʻa e kaungāongoʻí. Neongo ia, ko hono moʻoní, ʻoku fiemaʻu ke tau fai ha ngāue ki ai. Ko e hā hono ʻuhingá? Ko e ʻuhinga ʻe taha, ʻoku tau taʻehaohaoa. (Loma 3:23) Ko ia kuo pau ke tau tauʻi ʻa e hehema fakanatula ke fakakaukau pē kia kitá. Pehē foki, ʻoku fāinga nai ʻa e niʻihi ʻo kitautolu ke fakahāhā ʻa e kaungāongoʻí koeʻuhi ko e founga hono ʻohake kitautolú pe ko haʻatau hokosia ʻi he kuohilí. Fakaʻosí, ʻe lava ke tākiekina kitautolu ʻe he tōʻonga ʻa e kakai takatakai ʻiate kitautolú. ʻI he ngaahi ʻaho fakaʻosi ko ení, ʻoku ʻikai fakakaukau ʻa e tokolahi ki he ngaahi ongoʻi ʻa e niʻihi kehé. ʻI hono kehé, ʻoku nau “ʻofa kiate kinautolu pē.” (2 Tīm. 3:1, 2) Ko e hā ʻe lava ke ne tokoniʻi kitautolu ke ikuʻi ʻa e ngaahi pole ko eni ke fakahāhā ʻa e tokanga ki he ngaahi ongoʻi ʻa e niʻihi kehé?

 3. (a) ʻE lava fēfē ke tau fakaleleiʻi ʻetau fakahāhā ʻa e kaungāongoʻí? (e) Ko e hā te tau lāulea ki ai ʻi he kupu ko ení?

³ ʻE lava ke tau fakaleleiʻi ʻetau fakahāhā ʻa e kaungāongoʻí ʻaki ʻa e faʻifaʻitaki kia Sihova ko e ʻOtuá mo hono ʻAló, ʻa Sīsū Kalaisi. Ko Sihova ko ha ʻOtua ʻo e ʻofa, pea ʻokú ne fokotuʻu mai ʻa e faʻifaʻitakiʻanga lelei taha ʻi hono fakahāhā ʻa e tokanga ki he niʻihi kehé. (1 Sio. 4:8) Naʻe faʻifaʻitaki haohaoa ʻa Sīsū ki he ʻulungaanga ʻene Tamaí. (Sione 14:9) ʻI heʻene ʻi māmaní, naʻá ne fakahāhā ʻa e founga ʻe lava ai ha tangata ke fakahāhā ʻa e kaungāongoʻí. ʻI he kupu ko ení, te tau ʻuluaki lāulea ki he founga hono fakahāhā ʻe Sihova mo Sīsū ʻa e tokanga ki he ngaahi ongoʻi ʻa e niʻihi kehé. Pea te tau lāulea leva ki he founga ʻe lava ke tau faʻifaʻitaki ai ki heʻena faʻifaʻitakiʻangá.

 4. ʻOku anga-fēfē hono fakahaaʻi mai ʻe he ʻAisea 63:7-9 ʻoku tokanga mai ʻa Sihova ki he ngaahi ongoʻi ʻa ʻene kau sevānití?

⁴ ʻOku akoʻi ʻe he Tohi Tapú ʻoku tokanga mai ʻa Sihova ki he ngaahi ongoʻi ʻa ʻene kau sevānití. Ko e fakatātaá, fakakaukau ki he anga ʻo e ongoʻi ʻa Sihova fekauʻaki mo e taimi naʻe fehangahangai ai ʻa e kau ʻIsileli ʻo e kuonga muʻá mo e ngaahi ʻahiʻahí. “ʻI he lolotonga ʻa ʻenau mamahí kotoa naʻe fakalotomamahi ia kiate ia,” ko e fakahaaʻi ia ʻe he Folofola ʻa e ʻOtuá. (Lau ʻa e ʻAisea 63:7-9.) Ki mui ai, fakafou ʻi he palōfita ko Sākalaiá, naʻe fakahaaʻi ʻe Sihova ʻi he taimi ʻoku ngaohikovia ai ʻene kakaí, ʻoku hangē ʻoku nau fai fakahangatonu ia kiate iá. Naʻe tala ʻe Sihova ki heʻene kau sevānití: “ʻIlonga ʻa ia te ne ala kiate kimoutolú ʻokú ne ala ki hoku tamaʻimatá.” (Sāk. 2:8) He founga fakaofo ē ko ia ke fakatātaaʻiʻaki ʻa e tokanga ʻa Sihova ki heʻene kakaí!

 5. ʻOmai ha fakatātā ʻo e founga ʻo e ngāue ʻa Sihova ke tokoni ki heʻene kau sevāniti naʻe faingataʻaʻiá.

⁵ ʻOku fai ʻe Sihova ʻa e meʻa lahi ange ʻi he ongoʻi manavaʻofa pē ki heʻene kau sevāniti ʻoku faingataʻaʻiá. ʻOkú ne fai ha ngāue ke tokoniʻi kinautolu. Ko e fakatātaá, ʻi he faingataʻaʻia ʻa e kau ʻIsilelí ko ha kau pōpula ʻi ʻIsipité, naʻe mahinoʻi ʻe Sihova ʻenau mamahí pea ueʻi ia ke ne ʻoatu ha fakanonga. Naʻe pehē ʻe Sihova kia Mōsese: “Kuó u mātā moʻoni ʻa e faingataʻaʻia ʻa hoku kakai . . . , pea kuó u fanongo ki heʻenau tangi . . . ʻOku ou ʻafioʻi lelei ʻa e ngaahi mamahi ʻoku nau fuesiá. Te u ʻalu hifo ke fakahaofi kinautolu mei he nima ʻo e kau ʻIsipité.” (ʻEki. 3:7, 8) Koeʻuhi naʻe ongoʻi manavaʻofa ʻa Sihova ki heʻene kakaí, naʻá ne fakatauʻatāinaʻi kinautolu mei he nofo pōpulá. ʻI he ngaahi senituli ki mui ai, ʻi he Fonua ʻo e Talaʻofá, naʻe fehangahangai ʻa e kau ʻIsilelí mo hano ʻohofi ʻe he filí. Naʻe anga-fēfē fakafeangai ʻa Sihova ki aí? Naʻe “ongoʻi fakaʻofaʻia ʻa Sihova ʻi heʻenau toʻe koeʻuhi ko e faʻahinga naʻa nau lōmekina kinautolú mo e faʻahinga naʻa nau ngaohikoviʻi kinautolú.” Naʻe toe ueʻi ʻe he kaungāongoʻí ʻa Sihova ke ne tokoniʻi ʻene kakaí. Naʻá ne fekauʻi atu ʻa e kau fakamaau ke fakahaofi ʻa e kau ʻIsilelí mei honau ngaahi filí.​—Fkm. 2:16, 18.

 6. ʻOmai ha fakatātā ʻo e founga hono fakahāhā ʻe Sihova ʻa e tokanga ki he ngaahi ongoʻi ʻa ha tokotaha naʻe ʻikai tonu ʻene fakakaukaú.

⁶ ʻOku fakahāhā ʻe Sihova ʻa e tokanga ki he ngaahi ongoʻi ʻene kakaí​—naʻa mo e taimi ʻoku ʻikai faʻa tonu ai ʻenau fakakaukaú. Fakakaukau angé ki he tuʻunga ʻo Sioná. Naʻe fekauʻi ʻe he ʻOtuá ʻa e palōfita ko ení ke ne talaki ha pōpoaki fakaefakamaau ki he kau Ninivé. ʻI heʻenau fakatomalá, naʻe fili ʻa e ʻOtuá ke fakahaofi kinautolu. Kae kehe, naʻe ʻikai fiefia ʻa Siona ʻi he fili ko ení. Naʻá ne “ʻita lahi ʻaupito” koeʻuhi ko ʻene kikite ko eni fekauʻaki mo e fakaʻauhá naʻe ʻikai hoko moʻoni. Ka naʻe anga-kātaki ʻa Sihova kia Siona pea tokoniʻi ia ke fakatonutonu ʻene fakakaukaú. (Siona 3:10–4:11) Faai atu pē, naʻe mahinoʻi ʻe Siona ʻa e poiní, pea naʻe aʻu ʻo ngāueʻaki ia ʻe Sihova ke ne hiki ʻa e fakamatala ko ení koeʻuhi ke tau maʻu ʻaonga mei ai.​—Loma 15:4.c

 7. Ko e hā ʻoku fakapapauʻi mai ʻe he fakafeangai ʻa Sihova ki heʻene kau sevānití?

⁷ Ko e fakafeangai ʻa Sihova ki heʻene kakaí ʻoku fakapapauʻi mai ai kiate kitautolu ʻokú ne kaungāongoʻi mai ki heʻene kau sevānití. ʻOkú ne lāuʻilo ki he mamahi mo e faingataʻaʻia ʻa e tokotaha taki taha ʻo kitautolu. Ko Sihova ʻokú ne “ʻafioʻi moʻoni ʻa e loto ʻo e tangatá.” (2 Kal. 6:30) ʻOkú ne mahinoʻi ʻa e kotoa ʻetau ngaahi fakakaukaú, ko ʻetau ngaahi ongoʻi loloto tahá mo hotau ngaahi ngataʻangá. Pea “ʻe ʻikai te ne tuku ke ʻahiʻahiʻi kimoutolu ʻo fakalaka atu ia ʻi he meʻa ʻoku malava ke mou kātekiná.” (1 Kol. 10:13) He fakafiemālie ē ko e fakapapauʻiʻanga ko iá!

8-10. Ko e hā ʻa e ngaahi tafaʻaki naʻá ne tokoniʻi ʻa Sīsū ke tokanga ki he niʻihi kehé?

⁸ ʻI he hoko ko ha tangata ʻi he māmaní, naʻe tokanga lahi ʻa Sīsū ki he niʻihi kehé. Tau lāulea ki ha tafaʻaki ʻe tolu naʻá ne tokoniʻi ʻa Sīsū ke tokanga ki he niʻihi kehé. ʻUluakí, hangē ko ia naʻe lave ki ai ki muʻá, naʻe tapua haohaoa atu ʻe Sīsū ʻa e ʻulungaanga ʻene Tamai fakahēvaní. Hangē ko ʻene Tamaí, naʻe ʻofa ʻa Sīsū ʻi he kakaí. Neongo naʻá ne fiefia ʻi he meʻa kotoa naʻá ne tokoni kia Sihova ke ngaohí, ko Sīsū “naʻe tautefito ʻa [ʻene] nēkeneká ʻi he ngaahi foha ʻo e tangatá.” (Pal. 8:31) Naʻe ueʻi ʻe he ʻofá ʻa Sīsū ke ne tokanga ki he ngaahi ongoʻi ʻa e niʻihi kehé.

⁹ Ko hono uá, hangē ko Sihová, naʻe lava ke sio ʻa Sīsū ki he lotó. Naʻe lava ke ne ʻilo ʻa e ngaahi fakaueʻiloto mo e ongoʻi ʻa e kakaí. (Māt. 9:4; Sione 13:10, 11) Ko ia ʻi he lāuʻilo ʻa Sīsū naʻe loto-mafesi ʻa e kakaí, ʻi heʻene tokanga kiate kinautolú naʻá ne ʻoatu ʻa e fakafiemālie.​—ʻAi. 61:1, 2; Luke 4:17-21.

¹⁰ Ko hono tolú, naʻe hokosia tonu ʻe Sīsū ʻa e niʻihi ʻo e ngaahi pole naʻe fehangahangai mo e kakaí. Ko e fakatātaá, ngalingali naʻe tupu hake ʻa Sīsū ʻi ha fāmili masiva. ʻI he ngāue fakataha mo ʻene tamai ohí, ʻa Siosifa, naʻe ako ʻe Sīsū ʻa e founga ke fai ai ʻa e ngāue lahi fakasino. (Māt. 13:55; Mk. 6:3) ʻOku hā ngali naʻe mate ʻa Siosifa ʻi ha taimi ki muʻa ʻi he ngata ʻo e ngāue fakafaifekau ʻa Sīsuú. Ko ia kuo pau pē naʻe ongoʻi ʻe Sīsū ʻa e mamahi ʻo e mole ha taha ʻofeina ʻi he maté. Pea naʻe ʻilo ʻe Sīsū ʻa e anga ʻo e ongoʻi ʻo e nofo ʻi ha fāmili ʻoku nau maʻu ʻa e fakakaukau fakalotu kehekehe. (Sione 7:5) Ko e ngaahi tuʻunga ko iá mo e ngaahi tuʻunga kehe naʻá ne tokoniʻi ʻa Sīsū ke ne mahinoʻi ʻa e ngaahi pole mo e ongoʻi ʻa e kakai anga-mahení.

11. Ko fē taimi naʻe tautefito ai ʻene hā mahino ʻa e tokanga ʻa Sīsū? Fakamatalaʻi. (Sio ki he fakatātā ʻi he takafí.)

¹¹ Ko e tokanga ʻa Sīsuú naʻe tautefito ʻene hā mahinó ʻi he taimi naʻá ne fai ai ʻa e ngaahi maná. Naʻe ʻikai ke fai fakafatongia pē ʻe Sīsū ʻa e ngaahi maná. Naʻe ‘ueʻi ia ʻe he fakaʻofaʻia’ ʻi he faʻahinga ko ia naʻe faingataʻaʻiá. (Māt. 20:29-34; Mk. 1:40-42) Ko e fakatātaá, fakakaukau atu ki he anga ʻo e ongoʻi ʻa Sīsuú ʻi heʻene ʻave ha tangata tuli mei he fuʻu kakaí pea fakamoʻui pe ko ʻene fokotuʻu hake ʻa e tama pē taha ʻa ha uitou. (Mk. 7:32-35; Luke 7:12-15) Naʻe kaungāongoʻi ʻa Sīsū mo e kakai ko iá peá ne loto ke tokoniʻi kinautolu.

12. ʻOku anga-fēfē hono fakahaaʻi ʻi he Sione 11:32-35 ʻa e kaungāongoʻi ʻa Sīsū kia Māʻata mo Melé?

¹² Naʻe fakahāhā ʻe Sīsū ʻa e kaungāongoʻi kia Māʻata mo Mele. ʻI heʻene sio ki heʻena mamahi ʻi he mate hona tuongaʻané, ʻa Lāsalosí, “naʻe tangi ʻa Sīsū.” (Lau ʻa e Sione 11:32-35.) Naʻe ʻikai te ne tangi koeʻuhi pē ko e mole ʻa hono kaungāmeʻa ofí. He ko ē, naʻá ne ʻiloʻi naʻe teu ke ne fokotuʻu hake ʻa Lāsalosi. ʻI hono kehé, naʻe tangi ʻa Sīsuú koeʻuhi naʻá ne mahinoʻi pea maongo kiate ia ʻa e mamahi ʻa siʻono ongo kaungāmeʻá.

13. ʻOku anga-fēfē ʻetau loto-toʻa ʻi he ʻilo fekauʻaki mo e kaungāongoʻi ʻa Sīsuú?

¹³ ʻOku tau maʻu ʻaonga lahi mei he ako fekauʻaki mo e kaungāongoʻi ʻa Sīsuú. Ko e moʻoni, ʻoku ʻikai ke tau haohaoa hangē ko iá. Neongo ia, ʻoku tau ʻofa ʻiate ia koeʻuhi ko e anga ʻene fakafeangai ki he niʻihi kehé. (1 Pita 1:8) ʻOku tau loto-toʻa ʻi hono ʻiloʻi ʻokú ne pule ʻi he taimí ni ko ha Tuʻi ʻo e Puleʻanga ʻo e ʻOtuá. ʻOku vavé ni ke ne toʻo kotoa atu ʻa e faingataʻá. Koeʻuhi naʻe moʻui ʻa Sīsū ko ha tangata, ko ia ʻa e tokotaha lelei taha ke tokoni ki he faʻahinga ʻo e tangatá ke fakaleleiʻi ʻa e faingataʻa naʻe fakatupunga ʻe he founga-pule ʻa Sētané. Ko hono moʻoní, ʻoku tau monūʻia ke maʻu ha Pule ʻa ia ʻoku lava ke ne “kaungāongoʻi mai ki heʻetau ngaahi vaivaiʻangá.”​—Hep. 2:17, 18; 4:15, 16.

14. ʻI he vakai ki he ʻEfesō 5:1, 2, ko e hā ʻoku ueʻi kitautolu ke tau faí?

¹⁴ ʻI heʻetau fakakaukau fekauʻaki mo e faʻifaʻitakiʻanga naʻe fokotuʻu mai ʻe Sihova mo Sīsuú, ʻoku ueʻi foki ai mo kitautolu ke tau feinga ke fakahāhā ʻa e kaungāongoʻi lahi ange. (Lau ʻa e ʻEfesō 5:1, 2.) ʻOku ʻikai lava ke tau sio ki he lotó ʻo hangē ko kinauá. Neongo ia, ʻe lava ke tau feinga ke mahinoʻi ʻa e ngaahi ongoʻi mo e fiemaʻu ʻa e niʻihi kehé. (2 Kol. 11:29) ʻI he ʻikai hoko ʻo siokita hangē ko e kakai ʻi he māmaní, ʻoku tau feinga ke “ʻoua ʻe kumi pē ki he lelei ʻa [kitautolú], kae kumi foki ki he lelei ʻa e niʻihi kehé.”​—Fil. 2:4.

15. Ko hai ʻoku tautefito ʻa e fiemaʻu ke nau fakahāhā ʻa e kaungāongoʻí?

¹⁵ Ko e kau mātuʻa ʻi he fakatahaʻangá ʻoku tautefito ʻa e fiemaʻu ke nau fakahāhā ʻa e kaungāongoʻí. ʻOku nau ʻiloʻi kuo pau ke nau fai ha fakamatala fekauʻaki mo e fanga sipi kuo fakafatongiaʻaki ke nau tauhí. (Hep. 13:17) Ke tokoni ki honau kaungātuí, ʻoku fiemaʻu ki he kau mātuʻá ke nau mahinoʻi kinautolu. ʻE lava fēfē ke fakahāhā ʻe he kau mātuʻá ʻa e kaungāongoʻí?

16. Ko e hā ʻoku fai ʻe ha mātuʻa kaungāongoʻi, pea ko e hā ʻoku mahuʻinga aí?

¹⁶ Ko ha mātuʻa kaungāongoʻi ʻokú ne fakamoleki ʻa e taimi mo hono fanga tokoua mo e fanga tuofāfine Kalisitiané. ʻOkú ne ʻeke ʻa e ngaahi fehuʻi pea fanongo tokanga leva mo anga-kātaki. ʻOku mahuʻinga ia ʻo tautefito kapau ko e taha ʻo e siʻi fanga sipi ko ení ʻokú ne loto ke huaʻi atu hono lotó ka ʻokú ne fāinga ke maʻu ʻa e lea totonu ke leaʻakí. (Pal. 20:5) ʻI he foaki loto-lelei atu ʻe ha mātuʻa hono taimí, ʻokú ne fakatupulekina ai ha haʻi mālohi ʻo e falala, kaungāmeʻa mo e ʻofa mo hono fanga tokouá.​—Ngā. 20:37.

17. Ko e hā ʻa e ʻulungaanga ʻoku fakamahuʻingaʻi lahi taha ʻe he fanga tokouá ʻi he kau mātuʻá? ʻOmai ha fakatātā.

¹⁷ ʻOku pehē ʻe he fanga tokoua mo e fanga tuofāfine tokolahi ko e ʻulungaanga ʻoku nau fakamahuʻingaʻi lahi taha ʻi he kau mātuʻá ko ʻenau tokanga ki he ngaahi ongoʻi ʻa e niʻihi kehé. Ko e hā hono ʻuhingá? “ʻOku faingofua ange ai ke talanoa kiate kinautolu koeʻuhi ʻokú ke ʻilo te nau mahinoʻi koe,” ko e lea ia ʻa Adelaide. ʻOkú ne tānaki mai: “ʻE lava ke ke ʻiloʻi ʻoku nau kaungāongoʻi atu kiate koe ʻi he anga ʻenau tali ʻi hoʻo talanoa kiate kinautolú.” ʻOku manatu ha tokoua ʻi he houngaʻia: “Naʻá ku sio ki he fakatō loʻimata ha mātuʻa ʻi heʻeku talanoa atu hoku tuʻungá. Ko e meʻa ko iá heʻikai ʻaupito ngalo ia ʻiate au.”​—Loma 12:15.

18. ʻE lava fēfē ke tau fakahāhā ʻa e kaungāongoʻi ki he niʻihi kehé?

¹⁸ Ko e moʻoni, ʻoku ʻikai ko e kau mātuʻá pē ʻoku fiemaʻu ke nau fakahāhā ʻa e kaungāongoʻí. Ko kitautolu kotoa ʻe lava ke tau fakatupulekina ʻa e ʻulungaanga ko ení. Anga-fēfē? Feinga ke mahinoʻi ʻa e faingataʻa ʻoku fekuki mo e ngaahi mēmipa ʻo e fāmilí mo e kaungātuí. Fakahaaʻi ʻa e mahuʻingaʻia ʻi he toʻutupu ʻi he fakatahaʻangá pehē foki ki he kau mahamahakí, kau taʻumotuʻá, pea mo e faʻahinga kuo mole hanau ngaahi ʻofaʻanga ʻi he maté. ʻEke ange pe ʻoku nau fēfē. Fanongo tokanga ʻi heʻenau fakamatala ki heʻenau ongoʻí. Tokoniʻi kinautolu ke nau ongoʻi ʻokú ke mahinoʻi moʻoni ʻa e meʻa ʻoku nau fehangahangai mo iá. Fai ha tokoni ʻi ha founga pē te ke malava. ʻI heʻetau fai ení, ʻoku tau fakahāhā ai ʻa e ʻofa moʻoní ʻi he ngāue.​—1 Sio. 3:18.

19. Ko e hā ʻoku fiemaʻu ai ke tau hoko ʻo ngaofengofua ʻi he feinga ke tokoni ki he niʻihi kehé?

¹⁹ ʻOku fiemaʻu ke tau hoko ʻo ngaofengofua ʻi he feinga ke tokoni ki he niʻihi kehé. Ko e hā hono ʻuhingá? Koeʻuhi ʻoku kehekehe ʻa e ngaahi founga ʻoku fakafeangai ai ʻa e kakaí ki he faingataʻá. ʻOku ʻi ai ʻa e niʻihi ʻoku nau vēkeveke ke talanoa, ka ko e niʻihi ʻoku ʻikai ke nau fie talanoa. Ko ia ʻoku tau loto ke fai ha tokoni, ka ʻoku totonu ke tau fakaʻehiʻehi mei hono ʻeke ʻa e ngaahi fehuʻi ʻe fakamaaʻi ai kinautolu. (1 Tes. 4:11) Naʻa mo e taimi ʻoku tala mai ai ʻe he niʻihi ʻenau ongoʻí, heʻikai nai ke tau loto-tatau maʻu pē mo e meʻa ʻoku nau tala maí. Neongo ia, ʻoku fiemaʻu ke tau manatuʻi ko e anga ia ʻo ʻenau ongoʻí. ʻOku fiemaʻu ke tau vave ki he fanongo pea fakatuotuai ki he lea.​—Māt. 7:1; Sēm. 1:19.

20. Ko e hā te tau lāulea ki ai ʻi he kupu hono hokó?

²⁰ ʻOku fiemaʻu ke tau fakahāhā ʻa e kaungāongoʻi ʻi he fakatahaʻangá, ka ʻoku toe fiemaʻu ke tau fakahāhā ʻa e ʻulungaanga fakaʻofoʻofa ko ení ʻi heʻetau ngāue fakafaifekaú. ʻE lava fēfē ke tau fakahāhā ʻa e kaungāongoʻí ʻi he ngaohi ākongá? Te tau lāulea ki ai ʻi he kupu hono hokó.