Fakahāhā ʻa e Kaungāongoʻi ʻi Hoʻo Ngāue Fakafaifekaú

 1. Ko e hā ʻa e taha ʻo e ngaahi tafaʻaki fakalotomāfana taha ʻo e ʻulungaanga ʻo Sīsuú? Fakamatalaʻi.

KO E taha ʻo e ngaahi tafaʻaki fakalotomāfana taha ʻo e ʻulungaanga ʻo Sīsuú ko ʻene malava ko ia ke mahinoʻi ʻa e ngaahi pole ʻoku fehangahangai mo kitautolu faʻahinga taʻehaohaoa ʻo e tangatá. ʻI he ʻi māmani ʻa Sīsuú, naʻá ne malava ke “fiefia mo e faʻahinga ʻoku fiefiá” pea “tangi mo e faʻahinga ʻoku tangí.” (Loma 12:15) Ko e fakatātaá, ʻi he foki fiefia mai ʻene kau ākonga ʻe toko 70 hili ʻenau fakakakato ha ngāue fakamalanga lavameʻa, ko Sīsū “naʻá ne fiefia lahi ʻi he laumālie māʻoniʻoní.” (Luke 10:17-21) ʻI he tafaʻaki ʻe tahá, ʻi he sio ʻa Sīsū ki hono uesia ʻe he mate ʻa Lāsalosí ʻa e faʻahinga naʻe ʻofa ʻiate iá, naʻá ne “toʻe ʻi loto ʻiate ia peá ne hoko ʻo mamahi.”​—Sione 11:33.

 2. Ko e hā naʻá ne tokoniʻi ʻa Sīsū ke ne fakahāhā ʻa e kaungāongoʻi ki he kakaí?

² Ko e hā naʻá ne tokoniʻi ʻa e tangata haohaoa ko ení ke mātuʻaki faimeesi mo manavaʻofa ʻi heʻene fakafeangai ki he faʻahinga angahalaʻia ʻo e tangatá? ʻUluakí, naʻe ʻofa ʻa Sīsū ʻi he kakaí. Hangē ko ia naʻe lave ki ai ʻi he kupu ki muʻá, “naʻe tautefito ʻa [ʻene] nēkeneká ʻi he ngaahi foha ʻo e tangatá.” (Pal. 8:31) Ko e ʻofa ko ia ki he kakaí naʻe ueʻi ai ia ke ne hoko ʻo ʻiloʻi lelei ange ʻa e anga ʻo e fakakaukau ʻa e faʻahinga ʻo e tangatá. ʻOku fakamatala ʻa e ʻapositolo ko Sioné: “Naʻá ne ʻiloʻi ʻa e meʻa ʻoku ʻi he tangatá.” (Sione 2:25) Naʻe ongoʻi manavaʻofa ʻa Sīsū ki he niʻihi kehé. Naʻe ongoʻi ʻe he kakaí ʻa ʻene ʻofa ʻiate kinautolú pea nau tali lelei ʻa e pōpoaki ʻo e Puleʻangá. Ko e lahi ange ʻetau fakatupulekina ʻa e manavaʻofa pehē ki he kakaí, ko e ola lelei ange ia ʻetau fakahoko ʻa ʻetau ngāue fakafaifekaú.​—2 Tīm. 4:5.

3-4. (a) Kapau ʻoku tau kaungāongoʻi, ʻe anga-fēfē ʻetau vakai ki heʻetau ngāue fakafaifekaú? (e) Ko e hā te tau lāulea ki ai ʻi he kupu ko ení?

³ Naʻe ʻiloʻi ʻe he ʻapositolo ko Paulá naʻe ʻi ai hono fatongia ke malanga, pea ʻoku tau pehē pē mo kitautolu. (1 Kol. 9:16) Kae kehe, kapau ʻoku tau kaungāongoʻi, te tau vakai ki heʻetau ngāue fakafaifekaú ʻo ʻikai ko ha fatongia pē. Te tau loto ke fakamoʻoniʻi ʻoku tau tokanga ki he kakaí pea vēkeveke ke tokoniʻi kinautolu. ʻOku tau ʻilo “ʻoku ʻi ai ʻa e fiefia lahi ange ʻi he foaki atú ʻi he maʻu maí.” (Ngā. 20:35) Ko e lahi ange ʻetau maʻu ʻa e fakakaukau ko iá fekauʻaki mo ʻetau ngāue fakafaifekaú, ko e lahi ange ia ʻetau fiefiá.

⁴ ʻI he kupu ko ení, te tau ako ki he founga ke fakahāhā ai ʻa e kaungāongoʻi ʻi heʻetau ngāue fakafaifekaú. ʻUluakí, te tau sio ki he founga ʻe lava ke tau ako ai mei he anga ʻo e ongoʻi ʻa Sīsū fekauʻaki mo e kakaí. Pea te tau lāulea leva ki he founga ʻe fā ʻe lava ke tau faʻifaʻitaki ai ki heʻene faʻifaʻitakiʻangá.​—1 Pita 2:21.

5-6. (a) Ko hai naʻe fakahāhā ki ai ʻe Sīsū ʻa e kaungāongoʻí? (e) Ko e hā naʻe ongoʻi fakaʻofaʻia ai ʻa Sīsū ʻi he kakai naʻá ne malanga ki aí ʻo hangē ko ia naʻe tomuʻa tala ʻi he ʻAisea 61:1, 2?

⁵ Fakakaukau ki he fakatātā ʻo e founga naʻe fakahāhā ai ʻe Sīsū ʻa e kaungāongoʻí. ʻI he tuʻunga ʻe taha, naʻe malanga taʻemālōlō ʻa Sīsū mo ʻene kau ākongá. Naʻe teʻeki ai haʻanau “taimi ʻatā ʻo aʻu ki hano maʻu ha meʻatokoni.” Ko ia naʻe ʻave ai ʻe Sīsū ʻa ʻene kau ākongá ki ha “potu lala ke nau nofo fakaekinautolu pē” pea “kiʻi mālōlō.” Kae kehe, naʻe lele muʻomuʻa ha fuʻu kakai tokolahi ki he feituʻu naʻe ʻalu ki ai ʻa Sīsū mo ʻene kau ākongá. ʻI he aʻu ki ai ʻa Sīsū pea sio ki he kakaí, naʻe anga-fēfē ʻene fakafeangaí? “Naʻá ne ongoʻi fakaʻofaʻiab ʻiate kinautolu, he naʻa nau hangē ha fanga sipi taʻeʻiai hanau tauhí. Pea naʻá ne kamata akoʻi kiate kinautolu ʻa e ngaahi meʻa lahi.”​—Mk. 6:30-34.

⁶ Fakatokangaʻi ʻa e ʻuhinga naʻe ongoʻi fakaʻofaʻia ai ʻa Sīsū ʻi he kakaí, ʻa ia ʻoku lava ke tapua mai ai ʻa e kaungāongoʻí. Naʻá ne vakai ki he kakaí “naʻa nau hangē ha fanga sipi taʻeʻiai hanau tauhí.” Mahalo pē naʻe sio ʻa Sīsū ko e niʻihi ʻo kinautolu naʻe masiva pea ngāue ʻi he ngaahi houa lahi ke tokonaki maʻa honau fāmilí. Mahalo ko e niʻihi naʻa nau fāinga mo e mole ha ʻofaʻanga ʻi he maté. Kapau ko ia, ngalingali naʻe lava ke mahinoʻi ʻe Sīsū ʻa honau tuʻungá. Hangē ko ia naʻa tau lāulea ki ai ʻi he kupu ki muʻá, naʻe pau ke fehangahangai tonu ʻa Sīsū mo e niʻihi ʻo e ngaahi palopalema ko ení. Naʻe tokanga ʻa Sīsū ki he niʻihi kehé, pea naʻe ueʻi ai ia ke ne ʻoatu kiate kinautolu ha pōpoaki ʻo e fakafiemālie.​—Lau ʻa e ʻAisea 61:1, 2.

 7. ʻE lava fēfē ke tau faʻifaʻitaki ki he faʻifaʻitakiʻanga ʻa Sīsuú?

⁷ Ko e hā ʻoku tau ako mei he faʻifaʻitakiʻanga ʻa Sīsuú? Hangē ko Sīsuú, ʻoku takatakaiʻi kitautolu ʻe he kakai ʻoku nau “hangē ha fanga sipi taʻeʻiai hanau tauhí.” ʻOku nau fekuki mo e ngaahi palopalema lahi. ʻOku tau maʻu ʻa e meʻa ʻoku nau fiemaʻú​—ʻa e pōpoaki ʻo e Puleʻangá. (Fkh. 14:6) Ko ia ʻi he faʻifaʻitaki ki hotau ʻEikí, ʻoku tau malangaʻi ʻa e ongoongo leleí koeʻuhi ʻoku tau “fakaʻofaʻia ʻi he māʻulaló mo e masivá.” (Saame 72:13) ʻOku tau ongoʻi fakaʻofaʻia ʻi he kakaí, pea ʻoku tau loto ke fai ha meʻa ke tokoni kiate kinautolu.

 8. Ko e hā ʻa e founga ʻe taha ʻe lava ke tau fakahāhā ai ʻa e kaungāongoʻí ʻi he ngāue fakafaifekaú? Fakatātaaʻi.

⁸ Ko e hā ʻe lava ke ne tokoniʻi kitautolu ke tau fakahāhā ʻa e kaungāongoʻí ki he faʻahinga ko ia ʻoku tau malanga ki aí? ʻOku fiemaʻu ke tau ʻai kitautolu ki he tuʻunga ʻo e faʻahinga ʻoku tau fetaulaki mo ia ʻi he ngāue fakafaifekaú pea fakafeangai kiate kinautolu ʻo hangē ko e meʻa ʻoku tau loto ke fai mai kiate kitautolú.c (Māt. 7:12) Tau lāulea angé ki he founga tefito ʻe fā ʻe lava ke tau fai pehē ai. Ko e ʻuluakí, fakakaukau ki he fiemaʻu ʻa e tokotaha taki taha. ʻI heʻetau malangaʻi ʻa e ongoongo leleí, ko hotau fatongiá ʻoku meimei tatau ia mo ha toketā. Ko ha toketā lelei ʻokú ne fakakaukau ki he fiemaʻu ʻa e tokotaha mahaki taki taha. ʻOkú ne ʻeke ʻa e ngaahi fehuʻi pea fanongo tokanga ʻi he fakamatala ʻa e tokotaha mahakí ki hono tuʻungá pe ko ʻene ongoʻí. ʻI he ʻikai ʻoange ʻa e ʻuluaki faitoʻo ʻoku lava ke ne fakakaukau ki aí, ʻoku vaheʻi nai ʻe he toketaá ha taimi ke lava ʻo ne sivisiviʻi ʻa e ngaahi fakaʻilonga ʻoku hā mei he tokotaha mahakí peá ne toki ʻoange leva ʻa e faitoʻo totonú. ʻI he tuʻunga meimei tatau, ʻoku ʻikai totonu ke tau ngāueʻaki ʻa e founga tatau ki he tokotaha kotoa ʻoku tau fetaulaki mo ia ʻi he ngāue fakafaifekaú. ʻI hono kehé, ʻoku tau fakakaukau ki he ngaahi tuʻunga pau mo e fakakaukau ʻa e tokotaha taki taha.

 9. Ko e hā ʻoku totonu ke ʻoua te tau fakamahalo fekauʻaki mo iá? Fakamatalaʻi.

⁹ ʻI hoʻo fetaulaki mo ha taha ʻi he ngāue fakafaifekaú, ʻoua te ke fakamahalo ʻokú ke ʻilo hono tuʻungá pe ko e meʻa ʻokú ne tui ki aí mo e ʻuhinga ʻoku tui pehē aí. (Pal. 18:13) ʻI hono kehé, fusi hake ʻa e ngaahi fakakaukau ʻa e tokotahá ʻaki ha ngaahi fehuʻi fakapotopoto. (Pal. 20:5) Kapau ʻoku feʻungamālie ʻi ho anga fakafonuá, ʻeke fekauʻaki mo ʻene ngāué, ko hono fāmilí, ko hono puipuituʻá mo ʻene fakakaukaú. ʻI heʻetau ʻeke ʻa e ngaahi fehuʻí, ʻoku tau fakaʻatā ai kinautolu ke nau tala mai ʻa e ʻuhinga ʻoku nau fiemaʻu ai ʻa e ongoongo leleí. ʻI heʻetau ʻiloʻi iá, ʻoku lava ke tau fakahāhā ai ʻa e kaungāongoʻi ki heʻenau ngaahi fiemaʻu tefitó pea ʻoange ʻa e tokoni feʻungamālié, hangē pē ko ia naʻe fai ʻe Sīsuú.​—Fakafehoanaki mo e 1 Kolinitō 9:19-23.

10-11. ʻI he fehoanaki mo e 2 Kolinitō 4:7, 8, ko e hā ʻa e founga hono ua ʻe lava ke tau fakahāhā ai ʻa e kaungāongoʻí? ʻOmai ha fakatātā.

¹⁰ Ko hono uá, feinga ke sioloto atu ki he tuʻunga nai ʻoku ʻi ai ʻenau moʻuí. ʻI he founga ʻe niʻihi, ʻe lava ke tau mahinoʻi honau tuʻungá. He ko ē, ʻoku ʻikai ke tau hao mei he ngaahi palopalema ʻoku fehangahangai mo e kotoa ʻo e faʻahinga ʻo e tangatá. (1 Kol. 10:13) ʻOku tau ʻilo ko e moʻui ko ia ʻi he fokotuʻutuʻu lolotonga ko ʻení ʻe lava ke mātuʻaki faingataʻa. ʻOku tau kātaki pē ʻi he tokoni ʻa Sihová. (Lau ʻa e 2 Kolinitō 4:7, 8.) Kae fakakaukau ki he faʻahinga ʻoku nau fāinga ke moʻui ʻi he māmani ko ení ʻo ʻikai ha kaumeʻa ofi mo Sihova. Hangē ko Sīsuú, ʻoku tau ongoʻi fakaʻofaʻia ʻiate kinautolu, pea ʻoku ueʻi ai kitautolu ke tau ʻoatu ʻa e “ongoongo lelei ʻo e meʻa ʻoku lelei ange.”​—ʻAi. 52:7.

¹¹ Fakakaukau ki he fakatātā ʻo ha tokoua ko Sergey. Ki muʻa ke ako ʻe Sergey ʻa e moʻoní, naʻá ne ongoʻi mā ʻaupito. Naʻá ne fāinga ke lea ki he niʻihi kehé. ʻI he faai atu ʻa e taimí, naʻá ne tali ha ako Tohi Tapu. “ʻI heʻeku ako Tohi Tapú, naʻá ku ako ai ko e kau Kalisitiané ʻoku nau maʻu ha fatongia ke vahevahe atu ʻenau tuí ki he niʻihi kehé,” ko e lea ia ʻa Sergey. “Naʻá ku tui moʻoni heʻikai ʻaupito lava ke u fai pehē.” Neongo ia, naʻá ne fakakaukau ki he faʻahinga ʻoku teʻeki ai ke nau fanongo ki he moʻoní, pea naʻe lava ke ne sioloto atu pē ki he tuʻunga ʻoku ʻi ai ʻenau moʻuí koeʻuhi ko e ʻikai ke nau ʻilo ʻa Sihová. “Ko e meʻa foʻou naʻá ku akó naʻá ne ʻomi kiate au ʻa e fiefia lahi mo e nonga ʻi loto,” ko ʻene leá ia. “Naʻá ku ʻiloʻi ʻoku fiemaʻu foki ʻe he niʻihi kehé ke nau ako ki he ngaahi moʻoni ko ení.” ʻI he tupulaki ʻa e kaungāongoʻi ʻa Sergey, naʻá ne maʻu ai ʻa e loto-toʻa lahi ange ke malanga. ʻOku pehē ʻe Sergey, “Naʻá ku ʻohovale koeʻuhi ko e lea ki he niʻihi kehé fekauʻaki mo e Tohi Tapú naʻá ne fakatupulekina ʻeku loto-maʻú. Naʻe toe ʻai ai ke mālohi ʻeku tui ki he ngaahi tui foʻou ko ení ʻi hoku lotó tonu.”d

12-13. Ko e hā ʻoku fiemaʻu ai ke tau anga-kātaki ki he faʻahinga ʻoku tau akoʻi ʻi he ngāue fakafaifekaú? Fakatātaaʻi.

¹² Ko hono tolú, hoko ʻo anga-kātaki ki he faʻahinga ʻokú ke akoʻí. Manatuʻi, ʻoku teʻeki ai nai ke nau fakakaukau ki he niʻihi ʻo e ngaahi moʻoni Fakatohitapu ʻoku tau ʻiloʻi leleí. Pea ko e niʻihi ʻoku nau tuipau mālohi ʻaupito ki he ngaahi meʻa ʻoku nau lolotonga tui ki aí. ʻOku nau ongoʻi nai ʻoku mahuʻinga ʻaupito ʻenau lotú ʻokú ne ʻai kinautolu ke nau vāofi mo honau fāmilí, anga fakafonuá mo honau koló. ʻE lava fēfē ke tau tokoniʻi kinautolu?

¹³ Fakakaukau ki he fakahoa ko ení: Ko e hā e meʻa ʻoku hoko ʻi he taimi ʻoku fiemaʻu ai ke fetongi ha hala fakakavakava ʻoku motuʻa mo maumau? Ko e anga-mahení, ʻoku langa ʻa e hala fakakavakava foʻoú kae kei ngāueʻaki pē ʻa e hala fakakavakava motuʻá. ʻI he maau pē ʻa e hala fakakavakava foʻoú, ʻe toki holoki leva ʻa e hala fakakavakava motuʻá. ʻI he tuʻunga meimei tatau, ki muʻa ke tau kole ki he kakaí ke nau liʻaki ʻa e ngaahi tui “motuʻa” ʻoku nau mate ʻofa aí, ʻe ʻuluaki fiemaʻu nai ke tau tokoniʻi kinautolu ke nau fakatupulekina ha houngaʻia mālohi ʻi he ngaahi moʻoni “foʻou”​—ʻa e ngaahi akonaki Fakatohitapu ʻa ia ʻi he kamatá naʻe ʻikai ke nau maheni mo ia. Ko e toki taimi pē ia te nau mateuteu ai ke liʻaki ʻenau ngaahi tui ki muʻá. ʻE fiemaʻu nai ʻa e taimi ke tokoniʻi ai ʻa e kakaí ke nau fai ʻa e ngaahi liliu ko iá.​—Loma 12:2.

14-15. ʻE lava fēfē ke tau tokoniʻi ʻa e faʻahinga ʻoku siʻi pe ʻikai ʻaupito haʻanau ʻilo ʻe taha fekauʻaki mo e ʻamanaki ʻo e moʻui taʻengata ʻi ha māmani palataisí? ʻOmai ha fakatātā.

¹⁴ Kapau ʻoku tau anga-kātaki ki he kakai ʻi he ngāue fakafaifekaú, heʻikai te tau ʻamanekina kinautolu ke nau mahinoʻi pe tali ʻa e moʻoni Fakatohitapú ʻi he fuofua taimi pē ʻoku nau fanongo ai ki aí. ʻI hono kehé, ʻoku ueʻi kitautolu ʻe he kaungāongoʻí ke tau tokoniʻi kinautolu ke nau fakaʻuhinga ʻi he Folofolá ʻi ha vahaʻa taimi. Ko e fakatātaá, fakakaukau ki ha founga te tau fakaʻuhinga nai ai mo ha tokotaha fekauʻaki mo e ʻamanaki ʻo e moʻui taʻengata ʻi he māmani palataisí. Ko e tokolahi ʻoku siʻi pe ʻikai ʻaupito haʻanau ʻilo ʻe taha fekauʻaki mo e akonaki ko ení. ʻOku nau tui nai ko e maté ko e ngataʻangá pē ia. Pe ʻoku nau fakakaukau nai ʻoku ʻalu ʻa e kakai lelei kotoa pē ki hēvani. ʻE lava fēfē ke tau tokoniʻi kinautolu?

¹⁵ ʻOku lave ha tokoua ʻe taha ki ha founga naʻá ne pehē ʻoku ola lelei. ʻUluakí, ʻokú ne lau ʻa e Sēnesi 1:28. Hili iá, ʻokú ne ʻeke leva ki he tokotaha ʻapí pe ko fē ʻa e feituʻu naʻe loto ʻa e ʻOtuá ke nofo ai ʻa e faʻahinga ʻo e tangatá pea ko e faʻahinga moʻui fēfē naʻá ne loto ke nau maʻú. Ko e tali ʻa e kakai tokolahi tahá, “ʻI he māmaní, pea ʻi ha tuʻunga lelei.” Hokó, ʻoku lau ʻe he tokouá ʻa e ʻAisea 55:11 pea ʻeke pe kuo liliu ʻa e taumuʻa ʻa e ʻOtuá. Ko e anga-mahení, ʻoku tali ʻikai ʻa e tokotaha-ʻapí. Fakaʻosí, ʻoku lau ʻe he tokouá ʻa e Saame 37:10, 11 pea ʻeke pe ʻe fēfē ʻa e kahaʻu ʻo e faʻahinga ʻo e tangatá. ʻI hono ngāueʻaki ʻa e fakaʻuhinga Fakatohitapu ko ení, kuó ne tokoniʻi ai ʻa e kakai tokolahi ke nau mahinoʻi ʻoku kei fiemaʻu pē ʻe he ʻOtuá ʻa e kakai leleí ke nau moʻui taʻengata ʻi he Palataisí ʻi he māmaní.

16-17. ʻI hono manatuʻi ʻa e Palōveepi 3:27, ko e hā ʻa e ngaahi founga ʻaonga ʻe lava ke tau fakahāhā ai ʻa e kaungāongoʻí? Fakatātaaʻi.

¹⁶ Ko hono fā, kumi ha ngaahi founga ʻaonga ke fakahāhā ai ʻa e tokangá. Ko e fakatātaá, kuo tau ʻaʻahi nai ki ha taha ʻi ha taimi ʻoku hā ngali ʻoku ʻikai faingamālie? ʻE lava ke tau kole fakamolemole ange pea tala ange te tau toki foki atu ʻi ha taimi faingamālie ange. Fēfē kapau ʻoku fiemaʻu ʻe he tokotaha-ʻapí ha tokoni ʻi ha fanga kiʻi ngāue? Pe fēfē kapau ʻoku fiemaʻu tokoni ha tokotaha ʻoku toka mohenga? ʻI he ngaahi tuʻunga peheé, ʻe malava nai ke tau tokoni ki he tokotahá.​—Lau ʻa e Palōveepi 3:27.

¹⁷ Ko ha tuofefine ʻe taha naʻá ne maʻu ha ola lelei mei haʻane fai ha anga-lelei ʻa ia ʻoku hā ngali ʻikai fuʻu mahuʻinga. ʻI he ueʻi ʻe he kaungāongoʻí, naʻá ne fai ha tohi ki ha fāmili naʻe mole ʻi he maté haʻanau kiʻi tamasiʻi. Naʻe fakakau ʻi he tohí ha fakafiemālie mei he Folofolá. Naʻe fēfē ʻa e fakafeangai ʻa e fāmilí? “Ko ha ʻaho fakalilifu kiate au ʻaneafi,” ko e tohi ia ʻa e faʻē loto-mamahí. “Naʻe tokoni lahi ʻaupito hoʻo tohí kiate kimautolu. ʻOku ou mātuʻaki houngaʻia moʻoni ʻi hoʻo tohí ʻa ia naʻá ne ʻomai ha fakafiemālie lahi ʻaupito kiate kimautolu. Mahalo naʻe aʻu ʻo tuʻo 20 ʻeku lau hoʻo tohí ʻaneafi. ʻOku ou ʻohovale moʻoni ʻi he anga-lelei, tokanga mo e fakatupu langa hake ʻa e tohí. ʻOku mau fakamālō loto-moʻoni atu.” ʻOku ʻikai ha veiveiua, ʻoku lava ke tau hokosia ʻa e ngaahi ola lelei ʻi heʻetau feinga ke mahinoʻi ʻa e tuʻunga ʻoku fekuki mo e kakaí pea fai leva ha meʻa ke tokoni kiate kinautolu.

18. ʻI he fehoanaki mo e 1 Kolinitō 3:6, 7, ko e hā ʻa e vakai mafamafatatau ʻoku tau loto ke tauhi maʻú?

¹⁸ Ko e moʻoni, ʻoku tau loto ke tau tauhi maʻu ha vakai mafamafatatau ki hotau fatongia ʻi he ngāue fakafaifekaú. ʻOku lava ke tau fai ʻetau tafaʻakí ʻi hono tokoniʻi ʻa e niʻihi kehé ke nau ako fekauʻaki mo e ʻOtuá, ka ʻoku ʻikai ke tau fai ʻa e tafaʻaki mahuʻinga tahá. (Lau ʻa e 1 Kolinitō 3:6, 7.) Ko Sihova ʻa e tokotaha ʻokú ne tohoaki mai ʻa e kakaí. (Sione 6:44) Ko e aofangatukú, ko e tokotaha taki taha te ne tali ʻa e ongoongo leleí ʻo makatuʻunga ʻi he tuʻunga hono lotó. (Māt. 13:4-8) Manatuʻi naʻe ʻikai ke tali ʻe he tokolahi taha ʻo e kakaí ʻa e pōpoaki ʻa Sīsuú​—pea ko ia ʻa e Faiako lahi taha kuo faifai ange pea moʻui maí! Ko ia, ko e moʻoni ʻoku totonu ke ʻoua te tau hoko ʻo loto-siʻi kapau ko e tokolahi ʻo e kakai ʻoku tau feinga ke tokoniʻí ʻoku ʻikai te nau tali lelei ʻetau feingá.

19. Ko e hā ʻa e ngaahi ʻaonga ʻoku tau maʻu mei hono fakahāhā ʻa e kaungāongoʻi ʻi heʻetau ngāue fakafaifekaú?

¹⁹ Te tau maʻu ʻa e ngaahi ʻaonga ʻi he taimi ʻoku tau fakahāhā ai ʻa e kaungāongoʻi ʻi heʻetau ngāue fakafaifekaú. Te tau fiefia ange ʻi heʻetau ngāue fakamalangá. Te tau hokosia ʻa e fiefia lahi ange ʻoku haʻu mei he foakí. Pea ʻoku tau ʻai ai ke faingofua ange ki he faʻahinga “hehema totonu ki he moʻui taʻengatá” ke nau tali ʻa e ongoongo leleí. (Ngā. 13:48) Ko ia “lolotonga ko ia ʻetau kei maʻu ʻa e faingamālié, tuku ke tau fai ha ngāue ʻoku leleí ki he tokotaha kotoa.” (Kal. 6:10) Pea te tau maʻu leva ʻa e fiefia ʻi hono ʻave ʻa e lāngilangí ki heʻetau Tamai fakahēvaní.​—Māt. 5:16.