ʻI he Taimí Ni, ʻo Laka Ange ʻi ha Toe taimi, Nofoʻaki ʻĀʻā!

“ʻOua te tau mohe ʻo hangē ko ia ʻoku fai ʻe he kakai kehé, ka tau nofoʻaki ʻāʻā mo fakakaukau lelei.”—1 TESALONAIKA 5:​6, NW.

 1, 2. (a) Ko e ongo kolo fēfē ʻa Pomupei mo Heakuleniume? (e) Ko e hā ʻa e fakatokanga naʻe tukunoaʻi ʻe he tokolahi ʻo e kakai ʻo Pomupei mo Heakuleniumé, pea ko e hā hono olá?

ʻI HE ʻuluaki senituli ʻo Hotau Kuongá, ko Pomupei mo Heakuleniumé ko e ongo kolo koloaʻia ia ʻo Loma naʻá na tuʻu ʻi he malumalu ʻo Moʻunga Vesuviasí. Ki he kau Loma tuʻumālié, naʻá na hoko ko e ongo feituʻu mālōlō ʻeveʻeva manakoa. Ko hona ngaahi fale faivá naʻe lava ke hao ai ʻa e kau mamata laka hake he afé, pea ʻi Pomupei naʻe ʻi ai ha fuʻu malaʻe vaʻinga fuopotopoto naʻe malava ke hao ai ʻa e meimei kotoa ʻo e koló. Ko e kau keli fakatotolo ʻi Pomupeí kuo nau lau ai ʻa e pā mo e papu ʻe 118, ko e niʻihi naʻe ngāueʻaki ko e ngaahi fale pelepaʻanga pe paʻumutu. Ko e ʻulungaanga taʻetāú mo e ʻofa ki he meʻa fakamatelié naʻe mafolalahia ai, hangē ko ia ʻoku fakamoʻoniʻi ʻe he ngaahi tā valivali he holisí mo e ngaahi toetoenga kehé.

² ʻI ʻAokosi 24, 79 T.S., naʻe kamata ai ke puna ʻa e afi ʻi Moʻunga Vesuviasi. ʻOku tui ʻa e kau fakatotolo moʻunga afí ko e ʻuluaki paá, ʻa ia naʻe fakaʻuha hifo ai ʻa e fōfōʻanga mo e efu ki he ongo koló, naʻe ʻikai te ne mei taʻofi ʻe ia ʻa e kakaí mei haʻanau hola. Ko e moʻoni, ʻoku ngalingali ko e tokolahi naʻe fai pehē. Ka ko e niʻihi, ʻa ia naʻa nau fakafuofuahalaʻi ʻa e fakatuʻutāmakí pe mātuʻaki tukunoaʻi ʻa e ngaahi fakaʻilonga fakatokangá naʻa nau fili ke nofo atu pē. Pea ʻi he tuʻapoó nai, ko ha fuʻu tāfea ʻo e ngaahi kasa, fōfōʻanga mo e maka vela fakaʻulia, naʻa nau ʻuʻulu hifo ki Heakuleniume, ʻo fakafulutāmakiaʻi kotoa ʻa e kau nofo naʻe toe ʻi he koló. Pongipongia ʻi he pongipongi hono hokó, naʻe tāmateʻi ai ʻe ha tāfea meimei tatau ʻa e tokotaha kotoa pē ʻi Pomupei. He ola fakatuʻutāmaki moʻoni ē mei he ʻikai fai ki he ngaahi fakaʻilonga fakatokangá!

Ko e Ngataʻanga ʻo e Fokotuʻutuʻu ʻo e Ngaahi Meʻa Faka-Siú

 3. Ko e hā ʻa e faitatau ʻoku ʻi ai ʻi he fakaʻauha ʻo Selusalemá mo ia ʻo Pomupei mo Heakuleniumé?

³ Ko e ngataʻanga fakalilifu ʻo Pomupei mo Heakuleniumé naʻe lakasi mamaʻo ia ʻe he fakaʻauha fakamamahi ʻo Selusalema ʻi he taʻu ʻe hiva ki muʻa atú, neongo ko e fakamamahi ko iá ko e fakatupunga ʻe he tangatá. ʻOku fakamatalaʻi ko e “taha ʻo e ngaahi ʻākoloʻi fakalilifu taha ʻi he kotoa ʻo e hisitōliá,” ʻoku pehē naʻe taki atu ai ki he mate ʻa e kau Siu laka hake he milioná. Kae kehe, hangē ko e fakatamaki ʻi Pomupei mo Heakuleniumé, ko e fakaʻauha ʻo Selusalemá naʻe ʻikai hoko taʻeʻiai ha fakatokanga.

 4. Ko e hā ʻa e fakaʻilonga fakaekikite naʻe ʻoange ʻe Sīsū ke fakatokanga ai ki hono kau muimuí naʻe ofi ʻa e ngataʻanga ʻo e fokotuʻutuʻu ʻo ha ngaahi meʻa, pea mo e founga naʻe muʻaki fakahoko ai ia ʻi he ʻuluaki senitulí?

⁴ Naʻe ʻosi kikiteʻi ʻe Sīsū Kalaisi ʻa e fakaʻauha ʻo e koló, pea naʻá ne tomuʻa tala ʻa e ngaahi meʻa ʻe hoko muʻomuʻa aí​—ko e ngaahi meʻa fakahohaʻa hangē ko e ngaahi taú, ngaahi nounou fakameʻatokoní, ngaahi mofuiké, mo e maumau laó. Ko e kau palōfita loí te nau longomoʻui, ka ko e ongoongo lelei ʻo e Puleʻanga ʻo e ʻOtuá ʻe malangaʻi ia ʻi māmani lahi. (Mātiu 24:​4-7, 11-14) Lolotonga ko e ngaahi lea ʻa Sīsuú ʻoku ʻi ai honau fakahoko lahi ange ʻi he ʻahó ni, naʻe ʻi ai honau fakahoko siʻisiʻi ange ʻi he taimi ko iá. ʻOku lēkooti ʻe he hisitōliá ha honge lahi ʻi Siutea. (Ngāue 11:28) ʻOku līpooti ʻe he faihisitōlia Siu ko Siosifasí ha mofuike ʻi he feituʻu ʻo Selusalemá taimi nounou pē ki muʻa ʻi hono fakaʻauha ʻo e koló. ʻI he fakaofiofi mai ʻa e ngataʻanga ʻo Selusalemá, naʻe ʻi ai ʻa e ngaahi angatuʻu hokohoko, ko e ngaahi tau fakaekinautolu pē ʻi he vahaʻa ʻo e ngaahi faʻahi fakapolitikale Siú, pea mo e tāmate tavale ʻi he ngaahi kolo kehekehe naʻe fio ai ʻa e kakai Siú mo e Senitailé. Kae kehe, ko e ongoongo lelei ʻo e Puleʻangá naʻe malangaʻi ia “ki he meʻa moʻui kotoa pe ʻi he lalo langi.”​—Kolose 1:23.

 5, 6. (a) Ko e hā ʻa e ngaahi lea fakaekikite ʻa Sīsū naʻe fakahoko ʻi he 66 T.S.? (e) Ko e hā naʻe lahi pehē ai ʻa e fakakātoa ʻo e kau maté ʻi he taimi naʻe iku ʻo tō ai ʻa Selusalema ʻi he 70 T.S.?

⁵ Fakaʻosí, ʻi he 66 T.S., naʻe angatuʻu ai ʻa e kau Siú ki Loma. ʻI he taimi naʻe taki ai ʻe Sesitiuse Kaliuse ha kau tau ke ʻākoloʻi ʻa Selusalemá, naʻe manatuʻi ʻe he kau muimui ʻo Sīsuú ʻa e ngaahi lea ʻa Sīsū: “Ka mou ka vakai ki he kapui ʻo Selusalema ʻe he ngaahi matatau, te mou toki ʻilo kuo ofi hono fakaʻauha. Pea ke toki hola ki he moʻunga ʻa kinautolu ʻoku ʻi Siutea; pea ko kinautolu ʻoku ʻi loto kolo ke hiki mei ai; pea ko kinautolu ʻoku ʻi ʻuta ke ʻoua te nau hu ki he kolo.” (Luke 21:​20, 21) Kuo hoko mai ʻa e taimi ke mavahe ai mei Selusalemá​—ka ʻe anga-fēfē? ʻI ha tuʻunga taʻeʻamanekina, naʻe holomui ʻa Kaliuse mo ʻene ngaahi kongakaú, ʻo fakaʻatā ai ʻa e hala ki he kau Kalisitiane ʻi Selusalema mo Siuteá ke nau talangofua ki he ngaahi lea ʻa Sīsuú pea hola ki he ngaahi moʻungá.​—Mātiu 24:​15, 16.

⁶ ʻI he taʻu ʻe fā ki mui ai, ʻi he taimi Pāsová nai, naʻe toe foki mai ʻa e ngaahi kongakau Lomá ʻi he malumalu ʻo Seniale Taitusí, ʻa ia naʻá ne fakapapauʻi ke fakangata ʻa e angatuʻu ʻa e kau Siú. Naʻe ʻātakaiʻi ʻe heʻene kau taú ʻa Selusalema pea langa “ha ʻākolo ʻaki ʻa e ʻakau māsilá,” ʻo ʻai ke taʻemalava ha hola. (Luke 19:​43, 44, NW) Neongo ʻa e fakamanamana ʻo e taú, naʻe ʻaukolo mai ʻa e kau Siú mei he feituʻu kotoa pē ʻo e ʻEmipaea Lomá ki Selusalema ki he Pāsová. Ko eni kuo nau fihiatuʻu. Fakatatau kia Siosifasi, ko e kau ʻaʻahi maʻukovia ko ení naʻe faʻuʻaki ia ʻa e tokolahi taha ʻo e kau mate ʻi he ʻākoloʻi ʻe he kau Lomá.a ʻI he iku ʻo tō ʻa Selusalemá, ko e vahe fitu nai ʻe taha ʻo e kau Siu kotoa ʻi he ʻEmipaea Lomá naʻe ʻauhá. Ko e fakaʻauha ʻo Selusalema mo hono temipalé naʻe ʻuhinga iá ko e ngata ia ʻo e tuʻunga faka-Siú mo hono fokotuʻutuʻu fakalotu makatuʻunga ʻi he Lao ʻa Mōsesé.b​—Maake 13:​1, 2. 

 7. Ko e hā naʻe hao ai ʻa e kau Kalisitiane faitōnungá ʻi he fakaʻauha ʻo Selusalemá?

⁷ ʻI he 70 T.S., ko e kau Kalisitiane Siú naʻa nau mei mate pe taki pōpula fakataha mo e tokotaha kehe kotoa ʻi Selusalemá. Kae kehe, fakatatau ki he fakamoʻoni fakahisitōliá, naʻa nau fai kinautolu ki he fakatokanga ko ia ʻa Sīsū naʻe ʻoange ʻi he taʻu ʻe 37 ki muʻa angé. Naʻa nau siʻaki ʻa e koló pea naʻe ʻikai te nau toe foki.

Ngaahi Fakatokanga Fakaʻapositolo Taimi Tonu

 8. Ko e hā ʻa e fiemaʻu naʻe ʻilo ki ai ʻa Pitá, pea ko e hā ʻa e ngaahi lea ʻa Sīsū ngalingali naʻe ʻi heʻene fakakaukaú?

⁸ ʻI he ʻahó ni, ʻoku ʻi ai ʻa e fakaʻauha lahi ange ʻoku maluʻaki mai, ko e taha ia te ne ʻomi ʻa e ngataʻanga ki he fokotuʻutuʻu ʻo e ngaahi meʻa kotoa ko ení. ʻI he taʻu ʻe ono ki muʻa ʻi he fakaʻauha ʻo Selusalemá, naʻe ʻomai ai ʻe he ʻapositolo ko Pitá ha akonaki fakavavevave mo taimi tonu ʻoku ngāueʻaki tautefito ki he kau Kalisitiane ʻo hotau ʻahó: Nofoʻaki tokanga! Naʻe sio ʻa Pita ki he fiemaʻu ko ia ki he kau Kalisitiané ke langaʻi ʻenau “malava fakaefakakaukau leleí” koeʻuhi ke ʻoua te nau tukunoaʻi “ʻa e fekau ʻa hotau ʻEikí,” ʻa Sīsū Kalaisi. (2 Pita 3:​1, 2, NW) ʻI heʻene fakaʻaiʻai ʻa e kau Kalisitiané ke nau tokangá, ngalingali naʻe ʻi he fakakaukau ʻa Pitá ʻa e meʻa naʻá ne fanongo naʻe leaʻaki ʻe Sīsū ki Heʻene kau ʻapositoló ʻi he ngaahi ʻaho siʻi pē ki muʻa ʻi Heʻene pekiá: “Mou tokanga, mou ʻā pē: he ʻoku ʻikai te mou ʻilo pe fakakū hono taimi.”—Maake 13:33.

 9. (a) Ko e hā ʻa e faʻahinga fakakaukau fakatuʻutāmaki ʻe fakatupulekina nai ʻe he niʻihi? (e) Ko e hā ʻoku mātuʻaki fakatuʻutāmaki ai ha faʻahinga fakakaukau lotolotoua?

⁹ ʻI he ʻahó ni, ʻoku ʻeke manuki ʻe he niʻihi: “Komaʻāʻia ʻa e talaʻofa ʻo ʻene hoko mai?” (2 Pita 3:​3, 4) ʻOku hā mahino, ko e niʻihi tāutaha ko iá ʻoku nau ongoʻi ʻe ʻikai moʻoni liliu ʻa e ngaahi meʻá ia ka ʻe hokohoko pehē atu pē ʻo hangē ko ia ko e talu hono fakatupu ʻo e māmaní. Ko e lotolotoua peheé ʻoku fakatuʻutāmaki. Ko e veiveiuá ʻe lava ke ne fakavaivaiʻi ʻetau ongoʻi fakavavevavé, ʻo tākiekina kitautolu ke tau tēkina atu ki he fakatōliʻa-kitá. (Luke 21:34) Tuku kehe ia, hangē ko ia ʻoku tuhuʻi mai ʻe Pitá, ko e kau manuki peheé ʻoku ngalo ʻia kinautolu ʻa e Lōmaki ʻi he ʻaho ʻo Noá, ʻa ia naʻá ne fakaʻauha ha fokotuʻutuʻu ʻi māmani lahi ʻo e ngaahi meʻá. Ko e māmaní naʻe liliu moʻoni ʻi he taimi ko iá!​—Senesi 6:​13, 17; 2 Pita 3:​5, 6. 

10. Ko e hā ʻa e ngaahi lea naʻe fakalototoʻaʻiʻaki ʻe Pita ʻa e faʻahinga ko ia te nau hoko nai ʻo ʻikai faʻa kātakí?

¹⁰ ʻOku tokoniʻi ʻe Pita ʻene kau lautohí ke nau fakatupulekina ʻa e faʻa kātakí ʻaki hono fakamanatu kia kinautolu ʻa e ʻuhinga ʻoku ʻikai faʻa fai leva ai ʻe he ʻOtuá ha meʻá. ʻUluakí, ʻoku pehē ʻe Pita: “Ko e ʻaho ʻe taha ʻoku tatau ki he ʻEiki pea mo ha taʻu ʻe afe, pea ko e taʻu ʻe afe ʻoku tatau mo e ʻaho ʻe taha.” (2 Pita 3:8) Koeʻuhi ʻoku moʻui ʻa Sihova ʻo taʻengata, ʻe lava ke ne fakakaukauʻi lelei ʻa e ngaahi moʻoniʻi meʻa kotoa pē pea fili ʻa e taimi lelei taha ke fai ai ha meʻá. Pea, ʻoku tuhu leva ʻa Pita ki he holi ko ia ʻa Sihova ʻoku totonu ke fakatomala ʻa e kakai ʻi he feituʻu kotoa pē. Ko e faʻa kātaki ʻa e ʻOtuá ʻoku ʻuhinga iá ko e fakamoʻui ki he tokolahi ʻa ia te nau ʻauha kapau naʻá ne fai fakavave leva ha meʻa. (1 Timote 2:​3, 4; 2 Pita 3:9) Kae kehe, ko e faʻa kātaki ʻa Sihová ʻoku ʻikai ʻuhinga ia ʻe ʻikai te ne teitei fai ʻe ia ha meʻa. “ʻE hoko mai pe ʻa e ʻaho ʻo e ʻEiki ʻo hange ha kaihaʻa,” ko e lea ia ʻa Pitá.​—2 Pita 3:​10, fakaʻītali ʻamautolu.

11. Ko e hā te ne tokoniʻi kitautolu ke nofoʻaki ʻāʻā fakalaumālié, pea ʻe anga-fēfē hanga ʻe he meʻá ni ʻo “fakavaveʻi ange,” hangē ko e laú, ʻa e ʻaho ʻo Sihová?

¹¹ Ko e fakafehoanaki ʻa Pitá ʻoku taau ke fakatokangaʻi. Ko e kau kaihaʻá ʻoku ʻikai faingofua ke maʻu, ka ko ha tangata leʻo ʻoku nofoʻaki ʻāʻā ʻi he poó kakato ʻoku ngalingali te ne ʻiloʻi ange ʻe ia ha kaihaʻa ʻi he tokotaha ko ia ʻoku mohe ʻi he taimi ki he taimi. ʻOku lava fēfē ki ha tokotaha leʻo ke nofoʻaki ʻāʻā? Ko e lue takai holó ʻoku tokoni lahi ange ia ʻi he taʻutuʻutu pē ʻi he poó kakato. ʻOku meimei pehē pē, ko e nofoʻaki longomoʻui fakalaumālié te ne tokoniʻi kitautolu ʻi he tuʻunga ko e kau Kalisitiané ke nofoʻaki ʻāʻā. Ko ia ai, ʻoku naʻinaʻi mai ʻa Pita kia kitautolu ke tau hanganaki femoʻuekina ʻi he “ulugaaga maonioni moe aga faka-Otua.” (2 Pita 3:​11, PM) Ko e ngaahi ngāue peheé te ne tokoniʻi kitautolu ke hokohoko atu ʻi he “hanganaki fakakaukau ki he ʻi ai ʻa e ʻaho ʻo Sihová.” Ko e foʻilea faka-Kalisi ʻoku liliu ko e “hanganaki fakakaukau” ʻe lava ke liliu fakafoʻilea ia ko e “fakavaveʻi ange.” (2 Pita 3:​12, NW; fakamatala ʻi laló) Ko e moʻoni, ʻe ʻikai lava ke tau liliu ʻa e taimi-tēpile ʻa Sihová. ʻE hoko mai hono ʻahó ʻi heʻene houa kuo kotofá. Ka ko e taimi mei he taimí ni ki he taimi ko iá ʻe hā ngali fakalaka vave ange ia kapau ʻoku tau femoʻuekina ʻi heʻene ngāué.​—1 Kolinito 15:58.

12. ʻE lava fēfē ʻi hotau tuʻunga fakatāutahá ke ngāueʻaongaʻaki ʻa e faʻa kātaki ʻa Sihová?

¹² Ko ia ai, ko ha taha pē ʻokú ne ongoʻi ʻoku tautoloi ʻa e ʻaho ʻo Sihová ʻoku fakalototoʻaʻi atu ke ne fai ki he faleʻi ʻa Pitá ke tatali anga-kātaki ki he taimi kotofa ʻa Sihová. Ko e moʻoni, ʻe lava ke tau ngāue fakapotopotoʻaki ʻa e taimi ʻoku toe ʻi hono kei fakaʻatā ʻe he anga-kātaki ʻa Sihová. Ko e fakatātaá, ʻe lava ke tau hokohoko atu ke fakatupulekina ʻa e ngaahi ʻulungaanga faka-Kalisitiane ʻoku mātuʻaki mahuʻingá pea pehē ki he vahevahe atu ʻa e ongoongo leleí ki he niʻihi tokolahi ange mei he lahi ne mei malavá. Kapau te tau nofoʻaki ʻāʻā, ʻe ʻilo kitautolu ʻe Sihova ʻoku tau “melino tae ha ila, mo taehalaia” ʻi he ngataʻanga ʻo e fokotuʻutuʻu ko eni ʻo e ngaahi meʻá. (2 Pita 3:​14, 15, PM) He tāpuaki moʻoni ē ka hoko maí!

13. Ko e hā ʻa e ngaahi lea ʻa Paula ki he kau Kalisitiane Tesalonaiká ʻoku mātuʻaki feʻungamālie ʻi he ʻaho ní?

¹³ Ko Paula, ʻi heʻene ʻuluaki tohi ki he kau Kalisitiane ʻi Tesalonaiká, naʻá ne toe lea fekauʻaki mo e fiemaʻu ke nofoʻaki ʻāʻaá. Naʻá ne akonaki: “ʻOua te tau mohe ʻo hangē ko ia ʻoku fai ʻe he kakai kehé, ka tau nofoʻaki ʻāʻā mo hanganaki fakakaukau lelei.” (1 Tesalonaika 5:​2, 6, NW) ʻI he ʻahó ni, ʻi he fakaofi mai ko ia ʻa e fakaʻauha ʻo ha fokotuʻutuʻu ʻi māmani kātoa ʻo e ngaahi meʻá, he fiemaʻu moʻoni ē ko e meʻa ko iá! Ko e kau lotu ʻa Sihová ʻoku nau moʻui ʻi ha māmani ʻoku fonu ʻi he taʻemahuʻingaʻia fakalaumālié, pea ʻe lava ʻe he meʻá ni ke ne uesia kinautolu. Ko ia ai, ʻoku akonaki mai ʻa Paula: “Ke fakabotoboto akitautolu oku oe aho, o ai ki he fatafata ae jifa koe tui moe ofa; bea tau tatā aki ae amanaki lelei ki he fakamoui.” (1 Tesalonaika 5:​8, PM) Ko hano ako tuʻumaʻu ʻa e Folofola ʻa e ʻOtuá mo e feohi tuʻumaʻu mo hotau fanga tokouá ʻi he ngaahi fakatahá te ne tokoniʻi ai kitautolu ke tau muimui ki he akonaki ʻa Paulá pea tauhi maʻu ʻetau ongoʻi fakavavevavé.​—Mātiu 16:​1-3.

Laui Miliona ʻOku Nau Hanganaki Leʻo

14. Ko e hā ʻa e ngaahi fika ʻokú ne fakahaaʻi ʻoku muimui ʻa e tokolahi ʻi he ʻahó ni ki he akonaki ko ia ʻa Pita ke nofoʻaki ʻāʻaá?

¹⁴ ʻOku ʻi ai ha tokolahi ʻi he ʻahó ni ʻoku nau fai ki he fakalototoʻa fakamānavaʻi ko ia ke nofoʻaki tokangá? ʻIo. Lolotonga ʻa e taʻu fakangāue 2002, ko ha tumutumu ʻo e kau malanga ʻe toko 6,304,645​—ko ha tupu fakalaka peseti ia ʻe 3.1 ʻi he 2001—naʻá ne ʻomi ʻa e fakamoʻoni ʻo e tokanga fakalaumālie ʻaki hono fakamoleki ʻa e houa ʻe 1,202,381,302 ʻi he talanoa ki he niʻihi kehé ʻo fekauʻaki mo e Puleʻanga ʻo e ʻOtuá. Ki he faʻahingá ni, ko e ngāue peheé naʻe ʻikai ko ha meʻa taʻemahuʻinga ia. Ko ha konga tefito ia ʻo ʻenau moʻuí. Ko e anga ʻo e fakakaukau ʻa e tokolahi ʻo kinautolu ʻoku fakatātāʻaki ia ʻa Eduardo mo Noemi ʻi ʻEli Salavatoá.

15. Ko e hā ʻa e meʻa naʻe hokosia mei ʻEli Salavatoa ʻoku fakahaaʻi ai ʻoku hanganaki tokanga fakalaumālie ʻa e tokolahi?

¹⁵ ʻI ha laui taʻu ki muʻa, naʻe tokanga ai ʻa Eduardo mo Noemi ki he ngaahi lea ko ia ʻa Paula: “Kuo kamata liliu ʻa e anga ʻo e maama ko eni.” (1 Kolinito 7:31) Naʻá na fakafaingofuaʻi ʻena moʻuí peá na hū ki he ngāue tāimuʻa taimi-kakató. ʻI he faai mai ʻa e taimí, naʻe tāpuekina ai kinaua ʻi he ngaahi founga lahi pea aʻu ʻo na kau ʻi he ngāue fakasēketí mo e ngāue fakavahé. Neongo ʻena fehangahangai mo e ngaahi palopalema mafatukitukí, ʻoku tuipau ʻa Eduardo mo Noemi kuó na fai ʻa e fili totonú ʻi heʻena feilaulauʻi ʻa e fiemālie fakamatelié koeʻuhi ko e ngāue taimi-kakató. Ko e tokolahi ʻo e kau malanga ʻe toko 29,269​—kau ai ʻa e kau tāimuʻa ʻe toko 2,454—ʻi ʻEli Salavatoá kuo nau fakahāhā ha laumālie feilaulauʻi-kita meimei tatau, ʻa ia ko e taha ia ʻo e ʻuhinga naʻe maʻu ai ʻe he fonua ko iá ha tupu peseti ʻe 2 ʻi he tokolahi ʻo e kau malanga ʻi he taʻu kuo ʻosí.

16. Ko e hā ʻa e faʻahinga fakakaukau naʻe fakahāhā ʻe ha kiʻi talavou ʻi Kōtevuā?

¹⁶ ʻI Kōtevuā, ko e faʻahinga fakakaukau tatau naʻe fakahāhaaʻi ia ʻe ha kiʻi talavou Kalisitiane ʻa ia naʻá ne tohi ki he ʻōfisi vaʻá: “ʻOku ou ngāue ko ha sevāniti fakafaifekau. Ka ʻoku ʻikai lava ke u tala ki he fanga tokouá ke nau tāimuʻa lolotonga ia ʻoku ʻikai ke u fokotuʻu ʻe au ha faʻifaʻitakiʻanga lelei. Ko ia kuó u tukuange ai ha ngāue totongi lelei pea ngāue pē maʻaku he taimí ni, ʻa ia ʻoku tuku ai kia au ha taimi lahi ange ki he ngāue fakafaifekaú.” Ko e kiʻi talavou ko ení naʻe hoko ia ko e taha ʻo e kau tāimuʻa ʻe toko 983 naʻe ngāue ʻi Kōtevuā, ʻa ia naʻe līpooti mei ai ʻa e kau malanga ʻe toko 6,701 ʻi he taʻu kuo ʻosí, ko ha tupu peseti ia ʻe 5.

17. Naʻe anga-fēfē hono fakahāhā ʻe ha kiʻi finemui Fakamoʻoni ʻi Pelisiume naʻe ʻikai te ne manavahē ʻi he tomuʻa fehiʻá?

¹⁷ Ko e taʻemakātakiʻí, tomuʻa fehiʻá, mo e fakafaikehekeheʻí ʻoku hokohoko atu ke ne fakatupunga ʻa e ngaahi palopalema ki he kau malangaʻi ʻo e Puleʻangá ʻe toko 24,961 ʻi Pelisiume. Kae kehe, ko e kau faivelenga kinautolu pea ʻoku ʻikai ke nau manavahē. ʻI he taimi naʻe fanongo ai ha kiʻi finemui Fakamoʻoni taʻu 16 ki hono fakamatalaʻi ʻa e Kau Fakamoʻoni ʻa Sihová ko ha kiʻi lotu mavahe lolotonga ha ʻēfika fakakalasi ʻi he ʻapiakó, naʻá ne kole ke fakangofua ia ke ne ʻoatu ʻa e tafaʻaki ʻe taha ʻo e fakamatalá. ʻI hono ngāueʻaki ʻa e foʻi vitiō Jehovah’s Witnesses​—The Organization Behind the Name pea mo e polosiua Jehovah’s Witnesses​—Who Are They?, naʻá ne malava ai ke fakamatalaʻi ko hai moʻoni ʻa e Kau Fakamoʻoní. Naʻe fakahoungaʻi lahi ʻa e fakamatalá, pea ʻi he uike hono hokó naʻe ʻoange ai ha sivi ki he fānau akó ʻa ia ko hono ngaahi fehuʻí kotoa naʻe fekauʻaki ia mo e lotu faka-Kalisitiane ʻa e Kau Fakamoʻoni ʻa Sihová.

18. Ko e hā ʻa e fakamoʻoni ʻoku ʻi ai naʻe ʻikai ke fakaleluʻi ʻa e kau malanga ʻi ʻĀsenitina mo Mosemipīkí ʻe he ngaahi palopalema fakaʻekonōmiká mei heʻenau tauhi kia Sihová?

¹⁸ Kuo pau ki he tokolahi taha ʻo e kau Kalisitiané ke nau fehangahangai mo e ngaahi palopalema lalahi lolotonga ʻa e ngaahi ʻaho fakaʻosi ko ení. Lolotonga ia, ʻoku nau feinga ke ʻoua naʻa fakaleluʻi kinautolu. Neongo hono ngaahi palopalema fakaʻekonōmika ʻiloá, naʻe līpooti ʻe ʻĀsenitina ha tumutumu foʻou ʻo e Kau Fakamoʻoni ʻe toko 126,709 ʻi he taʻu kuo ʻosí. ʻOku kei mafolalahia pē ʻa e masivá ʻi Mosemipīki. Neongo ia, ko e toko 37,563 naʻe līpooti naʻa nau kau ʻi he ngāue fakamoʻoní, ko ha tupu ia peseti ʻe 4. Ko e moʻuí ʻoku faingataʻa ia ki he tokolahi ʻi ʻAlipēnia, neongo ia ko e fonua ko iá naʻe līpooti ai ha tupu lelei ʻo e peseti ʻe 12, ʻo ne aʻu ai ki ha tumutumu ʻo e kau malanga ʻe toko 2,708. ʻOku hā mahino, ko e laumālie ʻo Sihová ʻoku ʻikai ke taʻofi ia ʻe he ngaahi tuʻunga faingataʻá ʻi he taimi ʻoku fakamuʻomuʻa ai ʻe heʻene kau sevānití ʻa e ngaahi meʻa ʻo e Puleʻangá.​—Mātiu 6:33.

19. (a) Ko e hā ʻokú ne fakamoʻoni mai ʻoku kei ʻi ai ʻa e kakai tokolahi hangē ha sipí ʻoku nau fiekaia ki he moʻoni ʻo e Tohitapú? (e) Ko e hā ʻa e ngaahi fakaikiiki kehe ʻe niʻihi ʻo e līpooti fakataʻú ʻoku fakahāhā ai ko e kau sevāniti ʻa Sihová ʻoku nau nofoʻaki ʻāʻā fakalaumālie? (Sio ki he saati ʻi he peesi 12-15.)

¹⁹ Ko e ʻavalisi fakamāhina ʻo e ngaahi ako Tohitapu ʻe 5,309,289 naʻe līpooti ʻi māmani lahi ʻi he taʻu kuo ʻosí ʻoku hā ai ʻoku kei ʻi ai ʻa e kakai tokolahi hangē ha sipí ʻoku nau fiekaia ki he moʻoni ʻo e Tohitapú. ʻI he tumutumu foʻou ko ia ʻo e toko 15,597,746 naʻa nau maʻu ʻa e Fakamanatú, ko e tokolahi tahá ʻoku teʻeki ai ke nau tauhi longomoʻui kia Sihova. ʻOfa ke nau hokohoko atu ke tupu ʻi he ʻilo mo e ʻofa, fakatouʻosi kia Sihova pea mo e fetokouaʻakí. ʻOku fakafiefia ke sio ki he “fuʻu kakai lahi” ʻo e “fanga sipi kehe” ʻoku nau hokohoko atu ke fua lahi ʻi heʻenau tauhi ki he Tokotaha-Fakatupú “ʻi hono temipale ʻi he ʻaho mo e po” ʻi he feohi mo honau fanga tokoua pani ʻe he laumālié.​—Fakahā 7:​9, 15; Sione 10:16.

Ko ha Lēsoni Meia Lote

20. Ko e hā ʻoku tau ako mei he faʻifaʻitakiʻanga ʻa Lote mo hono uaifí?

²⁰ Ko e moʻoni, naʻa mo e kau sevāniti faitōnunga ʻa e ʻOtuá ʻe lava ke mole fakataimi ʻenau ongoʻi fakavavevavé. Fakakaukau atu ki he ʻilamutu ʻo ʻĒpalahame ko Loté. Naʻá ne ako mei he ongo ʻāngelo ʻaʻahí naʻe teu ʻa e ʻOtuá ke fakaʻauha ʻa Sōtoma mo Komola. Ko e ongoongo ko iá naʻe ʻikai ʻohovale nai ai ʻa Lote, ʻa ia “kuo ne mafasia ʻi he toʻonga ʻa e kau malaki lao na, ʻa ia naʻa nau moʻui ʻaki ʻa e pauʻu fakalielia.” (2 Pita 2:7) Neongo ia, ʻi he taimi naʻe haʻu ai ʻa e ongo ʻāngeló ke fakafeʻao ia ki tuʻa mei Sōtomá, naʻá ne “fakatuotuai.” Naʻe meimei toho pē ia ʻe he ongo ʻāngeló mo hono fāmilí ki tuʻa mei he koló. Ko hono fakaʻosí, naʻe tukunoaʻi ʻe he uaifi ʻo Loté ʻa e fakatokanga ʻa e ongo ʻāngeló ke ʻoua ʻe sio ki muí. Ko ʻene fakakaukau taʻetokangá naʻe hoko ko e fuʻu mole lahi kiate ia. (Senesi 19:​14-17, 26, PM) “Manatuʻi ʻa e uaifi ʻo Lote,” ko e fakatokanga ia ʻa Sīsuú.​—Luke 17:32.

21. Ko e hā ʻoku mātuʻaki mahuʻinga ai ke nofoʻaki ʻāʻā ʻi he taimí ni ʻi ha toe taimi ki muʻá?

²¹ Ko e fakatamaki ʻi Pomupei mo Heakuleniumé pea mo e ngaahi meʻa naʻe hoko takatakai ʻi he fakaʻauha ʻo Selusalemá, pea pehē ki he fakatātā ʻo e Lōmaki ʻi he ʻAho ʻo Noá pea pehē kia Loté, ʻoku nau fakatātaaʻi kotoa ʻa e mahuʻinga ʻo e fai fakamātoato ki he ngaahi fakatokangá. ʻI he tuʻunga ko e kau sevāniti ʻa Sihová, ʻoku tau fakatokangaʻi ʻa e fakaʻilonga ʻo e taimi ʻo e ngataʻangá. (Mātiu 24:3) Kuo tau fakamavaheʻi kitautolu mei he lotu loí. (Fakahā 18:4) Hangē ko e kau Kalisitiane ʻi he ʻuluaki senitulí, ʻoku fiemaʻu ke tau “hanganaki fakakaukau ki he ʻi ai ʻa e ʻaho ʻo Sihová.” (2 Pita 3:​12, NW) ʻIo, ʻi he taimí ni ʻo laka ange ʻi ha toe taimi ki muʻa, kuo pau ke tau nofoʻaki ʻāʻā! Ko e hā ʻa e ngaahi sitepu ʻe lava ke tau faí, pea ko e hā ʻa e ngaahi ʻulungaanga ʻe lava ke tau fakatupulekina koeʻuhi ke tau nofoʻaki ʻāʻā ai? Ko e kupu hono hokó te tau lāulea ai ki he ngaahi meʻa ko iá.

[Fakamatala ʻi lalo]

E Fēfē Haʻo Tali?

• Ko e hā ʻa e liliu naʻe hoko naʻe malava ai ki he kau Kalisitiane Siú ke hola mei he fakaʻauha ʻo Selusalemá?

• ʻOku anga-fēfē hono hanga ʻe he akonaki ʻi he ngaahi tohi ʻa Pita mo Paulá ʻo tokoniʻi kitautolu ke tau nofoʻaki ʻāʻaá?

• Ko hai ia ʻi he ʻahó ni ʻokú nau ʻomi ʻa e fakamoʻoni ʻoku nau mātuʻaki ʻāʻā?

• Ko e hā ʻa e lēsoni ʻoku tau ako mei he fakamatala kia Lote mo hono uaifí?

[Saaati ʻi he peesi 12-15]

Līpooti Taʻu Fakangāue 2002 ʻa e Kau Fakamoʻoni ʻa Sihová ʻi Māmani Lahi

(Sio ki he voliumé)

[Fakatātā ʻi he peesi 9]

ʻI he 66 T.S., ko e nofoʻanga Kalisitiane ʻi Selusalemá naʻa nau fai ki he fakatokanga ʻa Sīsuú

[Fakatātā ʻi he peesi 10]

Ko e nofoʻaki longomoʻuí ʻokú ne tokoniʻi ʻa e kau Kalisitiané ke nau nofoʻaki ʻāʻā