Ngaahi Tapa ʻa e Maamá​—Lahi mo e Siʻisiʻi (Konga 1)

“Ko e ʻalunga ʻo haʻa faitotonu ʻoku hange ko e maama hengihengi, ʻa e fakautuutu ʻene maama ʻo aʻu ki he hoʻatā malie.”​—PALŌVEPI 4:18.

 1. Ko e hā kuo fakahaaʻi māmālie mai ai ʻa e moʻoní?

ʻOKU fakamoʻoniʻi ai ʻa e poto fakaʻotuá, ʻi he fehoanaki mo e Palōvepi 4:​18, ko hono fakahaaʻi mai ʻo e ngaahi moʻoni fakalaumālié kuo hoko māmālie ia ʻo fakafou mai ʻi he ngaahi tapa ʻa e maamá. ʻI he kupu ki muʻá, naʻa tau sio ai ki he founga naʻe fakahoko ai ʻa e veesí ni ʻi he taimi ʻo e kau ʻaposetoló. Kapau naʻe fakahaaʻi fakaʻangataha kotoa mai pē ʻa e moʻoni Fakatohitapú, naʻe mei hoko ia ʻo fakatou fakatupu popongi mo puputuʻu​—ʻo hangē ko ia ʻoku hoko ʻi haʻate hū mai ki tuʻa mei ha ʻana fakapoʻuli ki he ulo ngingila atu ʻa e laʻaá. ʻIkai ko ia pē, ʻoku fakaivia ʻa e tui ʻa e kau Kalisitiané ʻe he fakahaaʻi māmālie mai ʻo e moʻoní ʻi ha founga hokohoko. ʻOkú ne ʻai ke toe ngingila lahi ange ai pē ʻenau ʻamanakí pea toe hā mahino ange ʻa e ʻalunga ke nau laka aí.

“Tamaioeiki Agatonu mo Boto”

 2. Naʻe fakahā ʻe Sīsū te ne ngāueʻaki ʻa hai ki hono ʻomai ʻo e maama fakalaumālié ki heʻene kau muimuí, pea ko hai kuo meʻangāueʻaki aí?

² ʻI he taimi ʻo e kau ʻaposetoló naʻe fili ai ʻe Sīsū Kalaisi ke ngāueʻaki ha ngaahi founga ʻoku fakaeʻotua pē ke ʻoange ai ki hono kau muimuí ʻa e fuofua ngaahi tapa ʻa e maamá. ʻOku tau maʻu ha fakatātā ʻe ua ʻo e meʻá ni: Ko e Penitekosi ʻo e 33 T.S. pea mo e liliu ʻa Koliniusi ʻi he 36 T.S. ʻI he hili iá, naʻe fili ʻe Kalaisi ke ngāueʻaki ha fakafofonga fakaetangata, ʻo hangē pē ko ia naʻá ne kikiteʻí: “Kohai ae tamaioeiki agatonu mo boto, kuo fakanofo e he ene eiki ke bule ki hono kaugaabi, mo tufaki kiate kinautolu ae mea kai i hono taimi totonu? Oku monuia ae tamaioeiki koia, oka haʻu a ene eiki, o ilo ia oku ne fai behe. Ko eku tala mooni atu kiate kimoutolu, te ne fakanofo ia ke ne buleʻi ene mea kotoabe.” (Mātiu 24:​45-47, PM) Heʻikai lava ke pehē ko e tamaioʻeiki ko ʻení ko ha toko taha pē koeʻuhi he naʻe pau ke ne tokonaki ʻa e meʻakai fakalaumālié talu mei he kamataʻanga ʻo e fakatahaʻanga Kalisitiané ʻi he Penitekosí ʻo aʻu ki he foki mai ʻa e ʻEikí, ko Sīsū Kalaisi, ke ʻeke ha fakamatala mei ai. ʻOku fakahaaʻi ʻe he ngaahi moʻoniʻi meʻa ko e kalasi tamaioʻeiki angatonu mo poto ko ʻení ʻoku lau fakataha ki ai ʻa e kotoa ʻo e kau Kalisitiane paní ʻi he tuʻunga ko ha kulupu ʻi he māmaní ʻi ha faʻahinga taimi pē.

 3. Ko hai naʻe kau ʻi he lotolotonga ʻo e ʻuluaki kau mēmipa ʻo e kalasi tamaioʻeikí?

³ Ko hai naʻe kau ʻi he lotolotonga ʻo e ʻuluaki kau mēmipa ʻo e kalasi tamaioʻeiki angatonu mo potó? Ko e taha ko e ʻaposetolo ko Pitá, ʻa ia naʻá ne tokanga ki he fekau ʻa Sīsū: “Fafanga siʻeku fanga sipi.” (Sione 21:17) Ko e muʻaki kau mēmipa kehe ʻo e kalasi tamaioʻeikí naʻe kau ai ʻa Mātiu, ʻa ia naʻá ne tohi ʻa e Kōsipeli ʻoku ui ʻaki hono hingoá, pea mo Paula, Sēmisi, mo Siutasi, ʻa ia naʻa nau tohi ʻa e ngaahi tohi fakamānavaʻí. Ko e ʻaposetolo ko Sioné, ʻa ia naʻá ne hiki ʻa e tohi ʻa Fakahaá, mo ʻene Kōsipelí, pea mo ʻene ngaahi tohí, ko ha mēmipa foki mo ia ʻo e kalasi tamaioʻeiki angatonu mo potó. Ko e kau tangatá ni naʻa nau tohi ʻo fehoanaki mo e fekau ʻa Sīsuú.

 4. Ko hai ʻa e “kaugaabi”?

⁴ Kapau ko e kotoa ʻo e kau paní ʻi honau tuʻunga ko ha kulupú, tatau ai pē pe ko fē ha feituʻu ʻi he māmaní ʻoku nau nofo ai, ko e kau mēmipa kinautolu ʻo e kalasi tamaioʻeikí, ko hai ʻa e “kaugaabi”? Ko kinautolu pē ko ia ko e kau paní ka ʻi ha vakai ki ai mei ha tafaʻaki kehe​—ko ʻenau tuʻu fakatāutahá. ʻIo, ʻi honau tuʻunga fakatāutahá te nau lava pē ke hoko ko e “tamaioeiki” pe te nau hoko ko e “kaugaapi,” ʻo fakatuʻunga pē pe naʻa nau tufa mai ʻa e meʻakai fakalaumālié, pe maʻu ʻinasi mei ai. Ke fakatātaaʻi: Hangē ko ia naʻe hiki ʻi he 2 Pita 3:​15, 16, ʻoku lave ai ʻa e ʻaposetolo ko Pitá ki he ngaahi tohi ʻa Paulá. ʻI hono lau kinautolú, ʻoku ʻi he tuʻunga ʻa Pita ia ko ha tokotaha ʻo e kaungāʻapí ʻoku kai ʻi he meʻakai fakalaumālie naʻe tokonaki mai ʻe Paula ko ha fakafofonga ʻo e kalasi tamaioʻeikí.

 5. (a) Ko e hā naʻe hoko ki he tamaioʻeikí ʻi he lolotonga ʻo e ngaahi senituli hili ʻa e kau ʻaposetoló? (e) Ko e hā ʻa e ngaahi fakalakalaka naʻe hoko ʻi he konga ki mui ʻo e senituli hono 19?

⁵ ʻI he fekauʻaki mo e meʻá ni, ko e tohi ko e God’s Kingdom of a Thousand Years Has Approached naʻe fakahaaʻi ai: “ʻI he fekauʻaki mo e anga ʻo e ʻi ai ʻa e kalasi ‘tamaioeiki agatonu mo boto’ pea mo ʻene ngāue ʻi he ngaahi senituli ʻi he hili ʻa e mate ʻa e kau ʻaposetolo ʻa e ʻEiki ko Sīsū Kalaisí, ʻoku ʻikai te tau maʻu ha fakamatala fakahisitōlia mahino ki ai. ʻOku hā mahino naʻe hanga ʻe he toʻutangata ʻe taha ʻo e kalasi ‘tamaioeiki’ ʻo fafangaʻi ʻa e toʻutangata hono hoko te ne fetongi iá. (2 Tīmote 2:2) Ka ʻi he konga ki mui ʻo e senituli hono taha hivá naʻe ʻi ai ha faʻahinga naʻa nau manavahē ki he ʻOtuá ʻa ia naʻa nau saiʻia ʻi he meʻakai fakalaumālie ʻo e Tohitapu Māʻoniʻoní pea naʻa nau loto ke nau kai mei ai . . . ko e ngaahi kalasi ako Tohitapu . . . naʻe fokotuʻu ia pea naʻe fakalakalaka ʻi hono maʻu ʻa e mahino fekauʻaki mo e ngaahi moʻoni tefito ʻo e Tohitapu Toputapú. Naʻe loto-vēkeveke ʻa e faʻahinga loto-moʻoni mo taʻesiokita ʻi he lotolotonga ʻo e kau ako Tohitapu ko ʻení ke vahevahe atu ʻa e ngaahi konga mātuʻaki mahuʻinga ʻo e meʻakai fakalaumālié ki he niʻihi kehé. Naʻa nau maʻu ʻa e laumālie angatonu ʻo e ‘tamaioeiki’ naʻe pani ke ne ʻoange ki he ngaahi ‘kaugaabi’ ʻa e ‘mea kai’ fakalaumālie naʻe fiemaʻú ‘i hono taimi totonu.’ Naʻa nau ‘boto’ ʻi he ʻiloʻilo ko e taimi totonu mo taaú ia pea mo e ngaahi founga lelei taha ki hono tufaki ʻa e meʻakaí. Naʻa nau feinga ke tufaki ia.”​—Peesi 344-345.a

Muʻaki Ngaahi Tapa ʻa e Maamá ʻi Onopooní

 6. Ko e hā ʻa e meʻa ʻoku tuʻu-ki-muʻa ʻi he fekauʻaki mo hono fakahaaʻi māmālie mai ʻo e moʻoní?

⁶ Ko e meʻa ʻe taha ʻoku tuʻu-ki-muʻa ʻi he fekauʻaki mo e faʻahinga naʻe ngāueʻaki ʻe Sihova ke nau ʻomai ʻa e maama fakalaumālie tupulaki māmālie ko ʻení ko e ʻikai te nau tuku ʻa e lāngilangí kiate kinautolu. Ko e fakakaukau ʻa C. T. Russell, ko e ʻuluaki palesiteni ʻo e Sōsaieti Taua Leʻó, naʻe pehē naʻe loto-lelei ʻa e ʻEikí ke ngāueʻaki honau ngaahi talēniti vaivaí. Neongo ʻa e ngaahi hingoa fakatenetene naʻe hehema ʻa hono ngaahi filí ke ngāueʻakí, naʻe feinga mālohi ʻa Tokoua Russell ke ʻiloa naʻe ʻikai ʻaupito te ne fetaulaki mo ha “Kau Russell” pea naʻe ʻikai ke ʻi ai ha meʻa hangē ko e “Tui faka-Russell.” Naʻe ʻalu ʻa e lāngilangí kotoa ki he ʻOtuá.

 7. Ko e hā ʻa e fakamoʻoni naʻe fakahāhā ʻe Tokoua Russell mo hono kaungāngāué ki heʻenau fekauʻaki moʻoni mo e tamaioʻeiki angatonu mo potó?

⁷ ʻI hono fakamāuʻi ʻaki ʻa e ngaahi olá, ʻoku ʻikai ha toe veiveiua naʻe tataki ʻe he laumālie māʻoniʻoni ʻo Sihová ʻa e ngaahi feinga ʻa Tokoua Russell pea mo e faʻahinga naʻe feohi mo iá. Naʻa nau fakahāhā ʻa e fakamoʻoni ki heʻenau fekauʻaki mo e tamaioʻeiki angatonu mo potó. Neongo ko e haʻa faifekau tokolahi ʻo e taimi ko iá naʻa nau taku ʻoku nau tui ko e Tohitapú ko e Folofola fakamānavaʻi ia ʻa e ʻOtuá pea ko Sīsuú ko e ʻAlo ʻo e ʻOtuá, naʻa nau poupou kinautolu ki he ngaahi tokāteline loi faka-Pāpiloné, ʻo hangē ko e Tolu-Tahaʻi-ʻOtuá, ko e taʻefaʻamate ʻa e soulu fakaetangatá, mo e fakamamahiʻi taʻengatá. ʻI he fehoanaki mo e talaʻofa ʻa Sīsuú, ʻoku moʻoni naʻe tupu mei he laumālie māʻoniʻoní ʻa e malava ʻe he ngaahi feinga anga-fakatōkilalo ʻa Tokoua Russell mo hono kaungāmeʻá ke ʻai ʻa e moʻoní ke ulo atu ʻo ʻikai hano tatau ki muʻa. (Sione 16:13) Naʻe fakahāhā ʻe he Kau Ako Tohitapu pani ko iá ha fakamoʻoni ko e konga moʻoni kinautolu ʻo e kalasi tamaioʻeiki angatonu mo potó, ʻa ia ko honau ngafá ko hono tokonaki mai ʻa e meʻakai fakalaumālié ki he ngaahi kaungāʻapi ʻa e ʻEikí. Naʻe hoko ʻa ʻenau ngaahi feingá ko ha tokoni lahi ki hono fakatahatahaʻi ʻo e kau paní.

 8. Ko e hā ʻa e ngaahi moʻoniʻi meʻa tefito ʻo fekauʻaki mo Sihova, ko e Tohitapú, Sīsū Kalaisi, pea mo e laumālie māʻoniʻoní naʻe mahino lelei ki he Kau Ako Tohitapú?

⁸ ʻOku taau ke fakatokangaʻi ʻa e lahi ʻa e leleiʻia ʻa Sihova, ʻo fakafou mai ʻi he laumālie māʻoniʻoní, ʻa e muʻaki Kau Ako Tohitapú ni ʻaki ʻene ʻomai ʻa e ngaahi tapa ʻa e maamá. Ke kamataʻaki, naʻa nau fakapapauʻi ʻoku ʻi ai ʻa e Tokotaha-Fakatupu pea ʻoku ʻi ai hono huafa laulōtaha ko Sihova. (Sāme 83:18; Loma 1:20) Naʻa nau ʻilo ʻoku maʻu ʻe Sihova ʻa e ngaahi ʻulungaanga tefito ʻe fā​—ko e mālohi, fakamaau totonu, poto, mo e ʻofa. (Sēnesi 17:1; Teutalōnome 32:4; Loma 11:33; 1 Sione 4:8) Naʻe fokotuʻu māʻalaʻala ʻe he kau Kalisitiane pani ko ʻení ko e Tohitapú ko e Folofola fakamānavaʻi ʻa e ʻOtuá pea ko e moʻoní ia. (Sione 17:17; 2 Tīmote 3:​16, 17) ʻIkai ngata aí, naʻa nau taukaveʻi ko e ʻAlo ʻo e ʻOtuá, ko Sīsū Kalaisi, naʻe fakatupu ia pea naʻá ne foaki ʻa ʻene moʻuí ko ha huhuʻi maʻá e faʻahinga kotoa ʻo e tangatá. (Mātiu 20:28; Kolose 1:15) Ko e laumālie māʻoniʻoní, ʻoku ʻikai ʻaupito ko ha tokotaha ia hono tolu ʻo ha Tolu-Tahaʻi-ʻOtua, ka naʻe ʻiloʻi ia ko e ivi ngāue ʻo e ʻOtuá.​—Ngāue 2:17.

 9. (a) Ko e hā ʻa e ngaahi moʻoni naʻe mahino lelei ki he Kau Ako Tohitapú ʻo fekauʻaki mo e natula totonu ʻo e tangatá pea mo e ongo ikuʻanga ʻoku ʻi he Tohitapú? (e) Ko e hā ʻa e toe ngaahi moʻoni kehe naʻe mahino lelei ki he kau sevāniti ʻa Sihová?

⁹ Naʻe mahino lelei ki he Kau Ako Tohitapú ʻoku ʻikai ke maʻu ʻe he tangatá ha soulu taʻefaʻamate ka ko ha soulu ia ʻe lava ke mate. Naʻa nau ʻiloʻi “koe totogi oe agahala koe mate,” ʻikai ko e fakamamahiʻi taʻengata, ʻoku ʻikai ha feituʻu hangē ko ha heli ʻoku uloulo. (Loma 5:12; 6:​23, PM; Sēnesi 2:7; ʻIsikeli 18:4) ʻIkai ko ia pē, naʻe mahino lelei kiate kinautolu ko e foʻi fakakaukau ʻo e ʻevolūsoné ʻoku ʻikai ngata pē ʻi heʻene taʻefakatohitapú ka ʻoku ʻikai ʻaupito hano makatuʻunga ʻi he ngaahi moʻoniʻi meʻa. (Sēnesi, vahe 1 mo e 2) Naʻa nau toe ʻiloʻi ʻoku fakahā ʻi he Tohitapú ʻa e ikuʻanga ʻe ua​—ko e taha ki hēvani maʻá e toko 144,000 ko e kau muimui pani mo topuvaʻe taha ʻo Kalaisí pea mo e māmani palataisi maʻá e tokolahi taʻefaʻalaua ko e “fuʻu kakai lahi” ʻo e “fanga sipi kehe.” (Fakahā 7:9; 14:1; Sione 10:16) Naʻe ʻiloʻi ʻe he muʻaki Kau Ako Tohitapu ko iá ʻe tuʻu maʻu ʻa e māmaní ʻo taʻengata pea ʻe ʻikai tutu ia, ʻo hangē ko ia ʻoku akoʻi ʻe he ngaahi lotu lahi. (Koheleti 1:4; Luke 23:43) Naʻa nau toe ʻiloʻi ko e toe foki mai ʻa Kalaisí ʻe taʻehāmai ia pea te ne fakahoko ai ʻa e fakamaau ki he ngaahi puleʻangá pea ʻomai ha māmani palataisi.​—Ngāue 10:42; Loma 8:​19-21; 1 Pita 3:18.

10. Ko e hā ʻa e ngaahi moʻoni naʻe ʻiloʻi ʻe he Kau Ako Tohitapú ʻi he fekauʻaki mo e papitaisó, ko ha faikehekehe ʻi he haʻa faifekaú mo e kakai ʻikai ke faifekaú, pea mo e Fakamanatu ʻo e pekia ʻa Kalaisí?

¹⁰ Naʻe ako ʻa e Kau Ako Tohitapú ʻo nau ʻiloʻi ko e papitaiso Fakatohitapú ʻoku ʻikai ko hano luluku ʻo e kau pēpē valevalé ka ʻi he fakatatau ki he fekau ʻa Sīsū ʻi he Mātiu 28:​19, 20, ko hono fakauku ʻo e kau tui ʻa ia naʻe ʻosi akoʻi. Naʻe hoko ʻo nau ʻilo ʻoku ʻikai ha makatuʻunga Fakatohitapu ki ha faikehekehe ʻi he haʻa faifekaú mo e kakai ʻikai ke faifekaú. (Mātiu 23:​8-10) ʻI hono kehe ʻaupitó, ko e kau Kalisitiane kotoa pē ko e kau malanga ʻo e ongoongo leleí. (Ngāue 1:8) Naʻe mahino ki he Kau Ako Tohitapú ko e Fakamanatu ʻo e pekia ʻa Kalaisí ʻoku totonu ke fai tuʻo taha pē ia he taʻu, ʻi Nīsani 14. ʻIkai ko ia pē, naʻa nau ʻilo ko e Mālōlō Pekiá ko ha ʻaho mālōlō fakapangani ia. Tānaki atu ki ai, naʻe tui pau ʻa e kau pani ko iá naʻe poupouʻi ʻe he ʻOtuá ʻa ʻenau ngāué ko ia ai naʻe ʻikai te nau fai ha ngaahi tānaki paʻanga. (Mātiu 10:8) Talu mei he fuofua taimí pē, naʻe mahino kiate kinautolu ko e kau Kalisitiané kuo pau ke nau moʻui ʻo fehoanaki mo e ngaahi tefitoʻi moʻoni ʻi he Tohitapú, ʻa ia ʻoku kau ai ʻa hono fakatupulekina ʻa e fua ʻo e laumālie māʻoniʻoni ʻo e ʻOtuá.​—Kalētia 5:​22, 23.

Fakautuutu ʻa e Ngaahi Tapa ʻa e Maamá

11. Ko e hā ʻa e maama naʻe huhulu ki he ngafa ʻo e Kalisitiané mo e talanoa fakatātā ʻa Sīsū ʻo fekauʻaki mo e fanga sipi mo e fanga kosí?

¹¹ Tautefito talu mei he 1919 mo hono tāpuakiʻi ʻa e kau sevāniti ʻa Sihová ʻaki ʻa e ngaahi tapa ʻa e maama fakautuutu. Ko ha tapa ngingila lahi ē ʻa e maamá naʻe huhulu ʻi he 1922 ʻi he fakatahalahi ʻi Cedar Point ʻi hono hanga ʻe J. F. Rutherford, ko e palesiteni hono ua ʻo e Sōsaieti Taua Leʻó, ʻo fakamamafaʻi mālohi ko e ngafa tefito ʻo e kau sevāniti ʻa Sihová ke “tuʻuaki, tuʻuaki, tuʻuaki, ʻa e Tuʻí mo hono Puleʻangá”! ʻI he taʻu pē hono hokó, naʻe hā ai ʻa e maama ngingila ki he talanoa fakatātā fekauʻaki mo e fanga sipí mo e fanga kosí. Naʻe hā ʻe fakahoko ʻa e kikite ko ʻení ʻi he lolotongá ni ʻi he ʻaho ʻo e ʻEikí, ʻikai ʻi he kahaʻú he lolotonga ʻa e Afeʻi Taʻú ʻo hangē ko ia naʻe fakakaukau ki ai ki muʻá. ʻI he lolotonga ʻa e Afeʻi Taʻú, ʻe ʻikai toe puke ʻa e ngaahi tokoua ʻo Kalaisí, pe fakahū-pōpula kinautolu. Pehē foki, ʻi he ngataʻanga ʻo e Afeʻi Taʻú, ʻe fai ai ʻa e fakamaaú ʻe Sihova ko e ʻOtuá, ʻikai ko Sīsū.​—Mātiu 25:​31-46.

12. Ko e hā ʻa e tapa ʻa e maamá naʻe fekauʻaki mo ʻĀmaketoné?

¹² ʻI he 1926 naʻe fakahaaʻi ai ʻe ha toe tapa ngingila ʻa e maamá ko e tau ʻo ʻĀmaketoné ʻe ʻikai ko ha liukava ia ʻa e kakaí, ʻo hangē ko ia naʻe fakakaukau ki ai ʻa e Kau Ako Tohitapú ʻi he taimi ʻe taha. Ka, ko ha tau ia ʻa ia ʻe fakahāhā mahino ʻaupito ai ʻe Sihova ʻa hono mālohí ke hoko ʻo tui pau ʻa e kakai kotoa pē ko e ʻOtuá ia.​—Fakahā 16:​14-16; 19:​17-21.

Kilisimasí ​—Ko ha ʻAho Mālōlō Fakapangani

13. (a) Ko e hā ʻa e maama naʻe huluʻi ki he ngaahi kātoanga Kilisimasí? (e) Ko e hā naʻe ʻikai ke toe kātoangaʻi ai ʻa e ngaahi ʻaho fāʻeleʻí? (Fakakau ʻa e fakamatala ʻi laló.)

¹³ ʻI he hili pē ha taimi siʻi mei ai, naʻe ʻi ai ha tapa ʻa e maamá naʻá ne ʻai ʻa e Kau Ako Tohitapú ke nau tuku ʻa hono kātoangaʻi ʻa e Kilisimasí. Ki muʻa ʻi he taimi ko iá naʻe kātoangaʻi maʻu pē ʻa e Kilisimasí ʻe he Kau Ako Tohitapú ʻi māmani lahi, pea ko hono kātoangaʻi ia ʻi he ʻuluʻi ʻōfisí ʻi Brooklyn naʻe mātuʻaki kātoangaʻi lahi. Ka naʻe hoko ʻo ʻiloʻi ko hono fakamanatu ko ia ʻo Tīsema 25 ko e meʻa fakapangani moʻoni pea naʻe fili ia ʻe he Puleʻanga-Haʻa-Kalisitiane tafoki mei he moʻoní ke ʻai ke faingofua ange ai ʻa hono fakalotuʻi ʻo e kau panganí. ʻIkai ngata aí, naʻe ʻiloʻi naʻe ʻikai ʻaloʻi ʻa Sīsū ia ʻi he faʻahitaʻu momokó, koeʻuhi ʻi he taimi ʻo hono ʻaloʻí, naʻe ʻi ʻuta ai ʻa e kau tauhi-sipí ʻo tokangaʻi ʻenau fanga sipí​—ko e meʻa ʻe ʻikai te nau fai ʻi he taimi poʻulí ʻi he konga ki mui ʻo Tīsemá. (Luke 2:8) Ka, ʻoku fakahā ʻe he Tohitapú naʻe ʻaloʻi ʻa Sīsū ʻi ʻOkatopa 1 nai. Naʻe toe fakatokangaʻi ʻe he Kau Ako Tohitapú ko e kau tangata poto lau pē ko ia naʻa nau ʻaʻahi kia Sīsū ʻi he hili nai ʻa e taʻu ʻe ua mei hono ʻaloʻí ko e kau maki pangani kinautolu.b

Ko ha Hingoa Foʻou

14. Ko e hā naʻe ʻikai feʻunga ai pē ʻa e hingoa ko e Kau Ako Tohitapú ki he kakai ʻa Sihová?

¹⁴ ʻI he 1931 naʻe fakahaaʻi ai ʻe ha tapa ngingila ʻa e moʻoní ki he Kau Ako Tohitapu ko iá ha hingoa Fakatohitapu feʻungamālie. Naʻe ʻosi mahino ki he kakai ʻa Sihová heʻikai lava ke nau tali ha taha ʻo e ngaahi hingoa fakatenetene naʻe ʻai ange kiate kinautolu ʻe he niʻihi kehé, ʻo hangē ko e pehē ko e Kau Russell, Kau Mafoaēata ʻo e Afeʻi Taʻú, mo e “kau fakaʻikaiʻi ʻo heli.”c Ka naʻe toe kamata ke mahino kiate kinautolu ko e hingoa ko ia naʻa nau ʻosi ʻai kiate kinautolú​—Kau Ako Tohitapu Fakavahaʻapuleʻangá​—naʻe ʻikai te ne fakafofongaʻi feʻungamālie kinautolu. Naʻa nau mahulu mamaʻo hake mei he tuʻunga ko e kau ako Tohitapu pē. ʻIkai ko ia pē, naʻe toe ʻi ai mo e niʻihi kehe tokolahi ʻaupito ko e kau ako kinautolu ʻo e Tohitapú ka naʻe ʻikai ʻaupito haʻanau meimei tatau mo e Kau Ako Tohitapú.

15. Ko e hā ʻa e hingoa naʻe ohi mai ʻe he Kau Ako Tohitapú ʻi he 1931, pea ko e hā ʻoku feʻungamālie ai iá?

¹⁵ Naʻe anga-fēfē ʻa e hoko ʻo maʻu ʻe he Kau Ako Tohitapú ha hingoa foʻoú? ʻI he laui taʻu lahi naʻe hanga ai ʻe he Taua Leʻó ʻo ʻai ʻa e huafa ʻo Sihová ʻo ʻiloa. Ko ia ai, naʻe mātuʻaki feʻungamālie ʻaupito ki he Kau Ako Tohitapú ke nau ohi mai ʻa e hingoa ʻoku hā ʻi he ʻAisea 43:10: “Ko kimoutolu ʻa e kau fakamoʻoni aʻaku​—ko Sihova ia mei he Taʻehamai​—mo e sevaniti aʻaku kuo u fili: koeʻuhi ke mou ʻilo au, mo tui mai, ʻo mahino kiate kimoutolu ko au ia; naʻe ʻikai ha ʻotua ʻe faʻu ʻi muʻa ʻiate au, pea hili au ʻe ʻikai.”

Fakatonuhiá pea mo e “Fuʻu Kakai Lahi”

16. Ko e hā naʻe ʻikai lava ai ke kaunga ʻa e ngaahi kikite fekauʻaki mo e fakafokí, ki he kau Siu totonu naʻe toe foki ki Palesitainé, ka ko hai ʻoku kaunga ki aí?

¹⁶ ʻI he voliume hono ua ʻo e Vindication, naʻe pulusi ʻe he Sōsaieti Taua Leʻó ʻi he 1932, naʻe fakahaaʻi ai ʻe ha tapa ʻa e maamá ko e ngaahi kikite fekauʻaki mo e fakafokí ʻa ia naʻe hiki ʻe ʻAisea, Selemaia, ʻIsikeli, mo e kau palōfita kehé naʻe ʻikai ke fekauʻaki ia (ʻo hangē ko ia naʻe fakakaukau ki ai he taimi ʻe taha) mo e kau Siu fakakakanó, ʻa ia naʻa nau toe foki ki Palesitaine ko e kau taʻetui pea mo e ngaahi taumuʻa fakapolitikale. Ka, ko e ngaahi kikite ko ʻeni fekauʻaki mo e fakafokí, ʻa ia naʻe fakahoko siʻisiʻi ʻi he taimi naʻe toe foki ai ʻa e kau Siú mei he nofo pōpula ʻi Pāpiloné ʻi he 537 K.M., naʻe fakahoko lahi ange kinautolu ʻi hono fakahaofi mo fakafoʻou ʻo ʻIsileli fakalaumālié ʻa ia naʻe kamata ʻi he 1919 pea iku ai ki he tuʻumālie ʻi he palataisi fakalaumālie ʻoku fiefia ai ʻa e kau sevāniti moʻoni ʻa Sihová he ʻahó ni.

17, 18. (a) ʻI he faai atu ʻa e taimí, fakafou ʻi ha tapa ʻa e maamá, ko e hā naʻe ʻiloʻi ko e taumuʻa tefito ia ʻa Sihová? (e) Ko e hā ʻa e tapa ʻa e maamá ʻo fekauʻaki mo e Fakahā 7:​9-17 naʻe hoko ʻi he 1935?

¹⁷ ʻI he faai mai ʻa e taimí, naʻe fakahaaʻi ai ʻe he tapa ʻa e maamá ko e taumuʻa tefito ʻa Sihová naʻe ʻikai ko hono fakamoʻui ʻo e faʻahinga ʻo e tangatá ka ko hono fakatonuhiaʻi ʻa hono tuʻunga-haú. Ko e kaveinga mahuʻinga taha ʻo e Tohitapú naʻe eʻa maí, ʻoku ʻikai ko e huhuʻí, ka ko e Puleʻangá, he ko ia te ne fakatonuhiaʻi ʻa e tuʻunga-hau ʻo Sihová. Ko ha tapa lahi ē ʻa e maamá naʻe hoko ʻi he meʻa ko iá! Naʻe ʻikai leva ke tokanga tefito pē ʻa e kau Kalisitiane fakatapuí ki heʻenau ō ki hēvaní.

¹⁸ ʻI he 1935 naʻe fakahaaʻi ai ʻe ha tapa ngingila ʻa e maamá ko e fuʻu kakai lahi ko ia naʻe lave ki ai ʻi he Fakahā 7:​9-17 naʻe ʻikai ko ha kalasi fakahēvani ia hono ua. Naʻe fai ʻa e fakakaukau ia ki ai ʻo pehē ko e faʻahinga ko ia naʻe lave ki ai ʻi he ngaahi veesi ko iá ko ha niʻihi ʻo e kau paní ʻa ia naʻe ʻikai ke nau angatonu kakato pea ko ia ai naʻa nau tuʻu pē ʻi he ʻao ʻo e taloní kae ʻikai ke nofo ʻi he ngaahi taloní ʻo pule ko e ngaahi tuʻi pea mo taulaʻeiki fakataha mo Sīsū Kalaisi. Ka ʻoku ʻikai ha meʻa pehē ko e hoko ʻo angatonu fakakonga pē. Ko ʻete angatonu pē pe taʻeangatonu. Ko ia ai naʻe ʻiloʻi ko e kikite ko ʻení naʻe ʻuhinga ia ki he fuʻu kakai lahi taʻefaʻalaua ʻa ia ʻoku lolotonga fakatahatahaʻi he taimí ni mei he ngaahi puleʻanga kotoa pea ko ʻenau ʻamanakí ki he māmaní. Ko kinautolu ia “ʻa e fanga sipi” ʻo e Mātiu 25:​31-46 mo e “fanga sipi kehe” ʻo e Sione 10:16.

Ko e Kolosí​—ʻOku ʻIkai ko ha Fakaʻilonga Faka-Kalisitiane

19, 20. Ko e hā ʻoku ʻikai lava ai ke pehē ko e kolosí ko ha fakaʻilonga ʻo e lotu faka-Kalisitiane moʻoní?

¹⁹ ʻI he ngaahi taʻu lahi naʻe ʻai ai ʻe he Kau Ako Tohitapú ʻa e kolosí ko ha fakaʻilonga tuʻu-ki-muʻa ia ʻo e lotu faka-Kalisitiané. Naʻe ʻi ai foki honau pine ko ha “kolosi-mo-e-kalauni.” Fakatatau ki he Tohitapu Paaki Foʻoú, naʻe kole ʻa Sīsū ki hono kau muimuí ke nau fua honau “kolosi,” pea naʻe hoko ai ʻo tui ʻa e tokolahi naʻe tutuki ia ʻi ha kolosi. (Mātiu 16:24; 27:32) Naʻe hā foki ʻa e fakaʻilonga ko ʻení ʻi he takafi ʻo e makasini ko e Taua Leʻó ʻi he ngaahi hongofuluʻi taʻu.

²⁰ Ko e tohi ko e Riches, naʻe pulusi ʻe he Sōsaietí ʻi he 1936, naʻá ne fakamahino mai naʻe ʻikai ke pekia ʻa Sīsū Kalaisi ʻi ha kolosi, ka ʻi ha fuʻu pou pe ʻakau naʻe tuʻu hangatonu ki ʻolunga. Fakatatau ki he maʻuʻanga fakamatala ʻe taha, ko e foʻi lea faka-Kalisi (stau·rosʹ) naʻe liliu lea ko e “kolosi” ʻi he King James Version “ʻoku ʻuhinga tefito ia ki ha fuʻu pou pe ʻakau ʻoku tuʻu hangatonu ki ʻolunga. [ʻOku] faikehekehe ia mei he fōtunga fakalotu ko ha fuʻu papa ʻe ua ʻoku fehauaki. . . . Naʻe tupu ʻa e kolosí ia mei Kalitia ʻo e kuonga muʻá, pea naʻe ngāueʻaki ia ko ha fakaʻilonga ʻo e ʻotua ko Tāmusi.” Ko e meʻa ko ia naʻe tutuki ai ʻa Sīsuú ʻoku totonu ke fehiʻa lahi ki ai, ʻo ʻoua ʻaupito ʻe meimei ʻotuaʻaki.

21. Ko e hā ʻe lave ki ai ʻi he kupu hono hoko maí?

²¹ ʻOku toe ʻi ai ʻa e ngaahi fakatātā fakatouʻosi ʻo e ngaahi tapa lahi ʻa e maamá mo ia ʻoku lau ʻoku siʻisiʻí. Ki ha fakamatala ʻo e ngaahi meʻá ni, kātaki ʻo sio ki he kupu hono hoko maí.

[Fakamatala ʻi lalo]

ʻOkú Ke Manatuʻi?

◻ Ko hai “ae tamaioeiki agatonu mo boto,” pea ko hai ʻa e “kaugaabi”?

◻ Ko e hā ʻa e niʻihi ʻo e muʻaki ngaahi tapa ʻa e maamá ʻi onopooní?

◻ Ko e hā naʻe feʻungamālie ai ʻa e hingoa foʻou, ko e Kau Fakamoʻoni ʻa Sihová?

◻ Ko e hā ʻa e ngaahi moʻoni fakaofo naʻe fakahaaʻi ʻi he 1935?