Meʻaʻofa Lahi Taha ʻa e ʻOtuá​—Ko e Hā ʻOku Mahuʻinga Aí?

Ko e ngaahi meʻaʻofa ʻe niʻihi ʻoku mahuʻingá koeʻuhi naʻe foaki mai ia kiate kitautolu ʻe ha tokotaha mafai māʻolunga pe ko ha tokotaha ʻoku tau tokaʻi. Ko e ngaahi meʻaʻofa kehé, neongo ʻoku siʻisiʻi hono mahuʻinga fakapaʻangá, kuo fakamahuʻingaʻi ia koeʻuhí ko e ʻomai ia ʻe ha mēmipa ʻo ha fāmili ʻofeina pe ko ha kaumeʻa falalaʻanga. Ko e tuʻunga eni ʻo e meʻaʻofa ʻa Russell kia Jordan, naʻe lave ki ai ʻa e kupu ki muʻá. ʻOku anga-fēfē hono ngāueʻaki eni ki he meʻaʻofa ʻo e huhuʻí?

ʻUluakí, ʻoku pehē ʻe he Tohi Tapú “naʻe fekauʻi mai ʻe he ʻOtuá hono ʻAlo tofu-pē-taha-ne-fakatupú ki he māmaní ke tau maʻu ai ʻa e moʻuí fakafou ʻiate ia.” (1 Sione 4:9) Ko e moʻoni ko iá ʻokú ne ʻai ʻa e meʻaʻofa ko ení ke mahuʻinga moʻoni. ʻOku ʻikai ha taha kuo māʻolunga ange hono mafaí ʻi he ʻOtuá. ʻI he fekauʻaki mo iá, naʻe tohi ʻe ha tokotaha-tohi-saame Hepelū: “Ko ho huafa oou ko Jihova, koe Fugani Maoluga i mamani kotoabe.” (Saame 83:18, PM) ʻOku ʻikai malava ke tau maʻu ha meʻaʻofa mei ha matavai māʻolunga ange.

Uá, ko e ʻOtuá ko ‘ʻetau tamai.’ (ʻAisea 63:16) ʻI he founga fē? Naʻá ne foaki mai ʻa e moʻuí kiate kitautolu. Tānaki atu ki aí, ʻokú ne tokanga mateaki mai kiate kitautolu ʻo hangē ko ha tamai ʻokú ne tokanga līʻoa ki heʻene fānaú. ʻI heʻene lea ki he niʻihi ʻo e kakai ʻi he kuonga muʻá hangē ko ʻIfalemí, naʻe ʻeke ʻe he ʻOtuá: “Ikai ko hoku foha ofeina a Ifalemi? . . . koia oku mamahi hoku fatu koeuhi ko ia; koe mooni teu ofa kiate ia.” (Selemaia 31:20, PM) ʻOku maʻu ʻe he ʻOtuá ʻa e ongoʻi tatau ki he faʻahinga ʻoku lotu ange kiate iá ʻi he ʻaho ní. ʻOku ʻikai ngata pē ʻi heʻene hoko ko e Tokotaha–Fakatupu māfimafi-aoniú ka ʻokú ne toe hoko ko ʻetau Tamai mateaki mo e Kaumeʻa. ʻIkai ʻoku ʻai ʻe he meʻá ni ʻa e meʻaʻofa ʻoku ʻomai meiate iá ke mātuʻaki mahuʻinga ʻaupito?

Ko e meʻaʻofa ʻe niʻihi ʻoku mahuʻingá, koeʻuhi naʻe foaki ia ʻo ʻikai ke fakafatongia pē ka ʻi he ʻofa moʻoni. Ko ha tokotaha-foaki taʻesiokita moʻoni ʻoku ʻikai te ne ʻamanekina ha totongi fakafoki ki heʻene ʻofá.

Naʻe foaki ʻe he ʻOtuá hono ʻAló maʻa kitautolu koeʻuhi ko ʻene ʻofa kiate kitautolú. “Ko e meʻa ʻeni naʻe fakahaaʻi ai ʻa e ʻofa ʻa e ʻOtuá ʻi he fekauʻaki mo hotau tuʻungá, koeʻuhi naʻe fekauʻi mai ʻe he ʻOtuá hono ʻAlo tofu-pē-taha-ne-fakatupú,” ko e lau ia ʻa e Tohi Tapú. Ko e hā ʻa e taumuʻá? “Ke tau maʻu ai ʻa e moʻuí fakafou ʻiate ia.” (1 Sione 4:9) Ko ha fatongia ʻo e ʻOtuá ke fakahoko ʻa e meʻá ni? ʻIkai ʻaupito! Ko e “huhuʻi naʻe totongi ʻe Kalaisi Sīsuú” ko e fakahāhā ia ʻo e “ʻofa maʻataʻataá” ʻa e ʻOtuá.—Loma 3:24.

Ko e hā ko ha ngāue ai eni ʻo e “ʻofa maʻataʻataá” ʻa e meʻaʻofa ʻa e ʻOtuá? ʻOku fakamatalaʻi ʻe he Tohi Tapú: “Ko e ʻOtuá naʻá ne fakahaaʻi lelei mai ʻene ʻofa ʻaʻaná kiate kitautolu ʻi he moʻoniʻi meʻa ko ia, lolotonga ʻetau kei hoko ko e kau angahalá, naʻe pekia ʻa Kalaisi maʻatautolu.” (Loma 5:8) Ko e ʻofa taʻesiokita ʻa e ʻOtuá naʻá ne ueʻi ia ke ne ngāue maʻá e vaivaí, faʻahinga masiva ʻi ha tokoní mo e faʻahinga angahalaʻia ʻo e tangatá. Naʻe ʻikai totonu ke tau maʻu ʻa e ʻofa ko iá, pe malava ke totongi fakafoki kiate ia. Ko ʻene meʻaʻofá ko e fakahāhā lahi taha ia ʻo e ʻofá ʻi he hisitōliá.

Ko e ngaahi meʻaʻofa ʻe niʻihi ʻoku mahuʻingá koeʻuhi ʻoku nau fakafofongaʻi ʻa e feilaulau lahi naʻe fai ʻe he tokotaha-foakí. ʻI he taimi ʻoku loto-lelei ai ha tokotaha ke tuku atu ha meʻa ʻoku mahuʻinga ʻaupito kiate ia pea foaki ia kiate kitautolu, ʻoku tau lau ko e koloa moʻoni ʻa e meʻaʻofa ko iá koeʻuhí pē ko e feilaulaú.

Naʻe ‘foaki ʻe he ʻOtuá hono ʻAlo tofu-pē-taha-ne-fakatupú.’ (Sione 3:16) Naʻe ʻikai ha taha kehe ʻe lava ke ne foaki mai kiate kitautolu ka ko e tokotaha naʻá ne ʻofeina lahi tahá. Lolotonga ʻa e fuʻu vahaʻa taimi naʻe fakatupu ai ʻe he ʻOtuá ʻa e ʻunivēsí, naʻe ngāue fakataha ʻa Sīsū mo ia pea naʻá ne hoko “ko hono fiefiaaga.” (Palōveepi 8:30, PM) Ko Sīsuú ko e ‘ʻAlo ʻoku ʻofa ai ʻa e ʻOtuá’ pea ko e “ʻīmisi ʻo e ʻOtua taʻehāmaí.” (Kolose 1:13-15) Kuo ʻikai ʻaupito ke ʻi ai ha fepikitaki vāofi pehē ʻi ha vahaʻa ʻo ha ongo meʻamoʻui ʻatamaiʻia.

Neongo ia, ko e ʻOtuá “naʻe ʻikai te ne teitei mamaeʻi ʻa hono ʻAló tonu.” (Loma 8:32) Naʻe foaki ʻe Sihova ʻa ʻene lelei tahá kiate kitautolu. Kuo teʻeki ha meʻaʻofa ʻe totongi mamafa pehē kiate ia.

Ko e ngaahi meʻaʻofa ʻe niʻihi ʻoku mahuʻinga koeʻuhi ʻoku nau fakakakato ha fiemaʻu moʻoni naʻa mo ha fiemaʻu fakavavevave. Ko e fakatātaá, he houngaʻia lahi ē ko koe kapau ʻe totongi loto-lelei ʻe ha taha hao faitoʻo ke fakahaofi ai hoʻo moʻuí ʻa ia naʻe ʻikai lava ke ke totongi! Ko ha meʻaʻofa mahuʻinga lahi moʻoni ia, ʻikai ko ia?

“Hangē tofu pē ʻoku mate kotoa pē ʻia ʻĀtamá, ʻoku pehē pē foki ʻe ʻai ke moʻui kotoa pē ʻi he Kalaisí.” (1 Kolinitō 15:22) ʻI he hoko ko e hako ʻo ʻĀtamá, ʻoku tau “mate” kotoa pē pea ʻikai malava ke hao mei he langa ʻo e mahamahakí mo e huhu ʻa e maté pe ko ʻetau fai ha fakalelei mo e ʻOtuá pea tauʻatāina mei he halaia ʻi hono ʻaó. Pea ʻi he hoko ko e faʻahinga māʻulalo ʻo e tangatá, ʻoku ʻikai lava ke tau ai kitautolu pe ko ha taha pē ke “moʻui.” ʻOku fakahaaʻi ʻe he Tohi Tapú: “Oku ikai aubito faa fai e ha nau toko taha ke huhui hono tokoua, be atu ki he Otua hano totogi: . .  . bea oku tuku ai be ia o taegata.” (Saame 49:7, 8, PM) ʻOku tau fiemaʻu moʻoni ha tokoni koeʻuhi ʻoku ʻikai lava ke tau totongi ʻa e mahuʻinga ʻo e huhuʻí. ʻIkai ngata aí, ko kitautolú ʻoku ʻikai ha tokoni.

ʻI he ʻofa lahi ʻa Sihova, ʻokú ne loto-lelei ke totongi ʻa e faitoʻo fakahaofi moʻui ʻoku tau fiemaʻú, ko ia fakafou ʻia Sīsū “ʻe ʻai ke moʻui kotoa pē.” ʻI he founga fē naʻe fakahoko ai eni ʻi he huhuʻí? “Ko e taʻataʻa ʻo Sīsū ko hono ʻAló ʻokú ne fakamaʻa kitautolu mei he angahalá kotoa.” ʻIo, ko e tui ki he taʻataʻa ʻo Sīsuú ʻoku ʻatā ai ʻa e matapā ki hono fakamolemoleʻi ʻo e angahalá pea ki he moʻui taʻengatá. (1 Sione 1:7; 5:13) Pea ko e hā ʻe fai ʻe he huhuʻí ki hotau ngaahi ʻofaʻanga kuo maté? “Koeʻuhí naʻe hoko mai ʻa e maté ʻo fou mai ʻi ha tangata, ko e toetuʻu ʻa e maté ʻoku toe hoko mai ia ʻo fou mai ʻi ha tangata [Sīsū].”—1 Kolinitō 15:21.a

Kuo ʻikai ke ʻi ai ha meʻaʻofa kuo foaki mai mei ha matavai māʻolunga ange pe ko hano ueʻi ʻe ha ʻofa lahi ange ʻi he feilaulau ʻa Sīsuú. Kuo teʻeki ai ha taha kuó ne foaki ʻo toe lahi ange kiate kitautolu ʻi he foaki naʻe fai ʻe Sihova ko e ʻOtuá. Pea ʻoku ʻikai ha meʻaʻofa ʻokú ne fakakakato ha fiemaʻu moʻoni ʻe toe lahi ange ʻi he feilaulau naʻá ne fakatauʻatāinaʻi kitautolu mei he angahalá mo e maté. ʻIo, ʻoku ʻikai ha meʻaʻofa ʻe lava ke ne toe fakatataua ʻa e taʻealafakamatalaʻi ʻa e mahuʻinga ʻo e huhuʻí.