ʻAho Fakamaaú—Ko ha Taimi ʻo e ʻAmanaki!

KAPAU ko e fakakaukau ʻo kau ki he ʻaho fakamaaú ʻokú ne fakailifiaʻi koe, ko e hā ʻoku ʻikai te ke sivisiviʻi ai pe ko e hā ʻa e lau ʻa e Tohitapú ʻo kau ki ai? Ko e fakatātā, ʻoku moʻoni koā ʻi hono fakahoko ʻe he ʻOtua ʻa e fakamaau ki he kau angahalá, ʻoku laku kinautolu ki he afi ʻo heli?

Ko e ʻuluaki taimi ʻo ha fakamaau fakaʻotua ʻa ia kuo hiki naʻe hoko ia ʻi he kamataʻanga ʻo e hisitōlia fakaetangatá. Naʻe maʻu ʻe ʻĀtama mo ʻIvi ʻa e faingamālie ke moʻui taʻengata ʻi he māmani palataisi. (Sēnesi 1:26-28; 2:7-9, 15-25) Kaekehe, naʻá na faiangahala, pea naʻe fakahoko kiate kinaua ʻa e fakamaau tamaki ʻa e ʻOtuá. Ko hono nunuʻá? Naʻe toʻo ai ʻe he ʻOtuá ʻa e meʻaʻofa ko e moʻui. Ko hono toe fakalea ʻe tahá, naʻá na mate. Naʻe tala ange kiate kinaua ʻe he ʻOtuá: “Te ke kai hoʻo meʻakai ʻi he kakava ʻo ho mata, kaeʻoua ke ke foki ki he kelekele ʻa ia naʻe toʻo koe mei ai: he ko e efu koe, pea ko e efu te ke foki ki ai.”​—Sēnesi 3:16-19.

Ko ha fakamaau fefeka ʻeni, ka naʻe angatonu. Pea ʻoku pau naʻe ʻikai ke kau ki ai ha afi ʻo heli. ʻI he mate ʻa ʻĀtama mo ʻIví, naʻá na foki ki he efu. Naʻe ʻikai te na toe moʻui. ʻOku ʻikai ke ʻi ai ha konga ʻe taha ʻi he Tohitapú ʻo pehē ko ha konga ʻo ʻĀtama pe aʻu ki ha konga ʻo ha tokotaha kehe naʻe hao moʻui atu ʻi he maté ke fakamamahiʻi ia ʻi ha feituʻu kehe ʻo taʻengata. Ka ʻoku tau lau: “He ko e kau moʻui ʻoku nau ʻilo ai pe te nau pekia: ka ko e kau pekia ʻoku ʻikai te nau ʻilo ha momoʻi meʻa.”​—Koheleti 9:5.

Naʻá ke ʻilo ʻoku leaʻaki ʻeni ʻe he Tohitapú? Naʻá ke toe ʻilo, ʻoku ʻikai ʻaupito ke ngāueʻaki ʻe he Tohitapú ʻa e kupuʻi lea ko e “laumālie taʻe faʻa mate”? Ka ʻokú ne pehē: “Koe laumalie oku agahala e mate ia.” (ʻIsikeli 18:4, PM) ʻOku fehoanaki-mālie matematē ʻeni mo e tefitoʻi moʻoni faka-Tohitapu: “Koe totogi oe agahala koe mate.” (Loma 6:23, PM) ʻOku uesia kitautolu kotoa ʻe he tefitoʻi moʻoni ko ʻení. Ko kitautolu hono kotoa ko e hako ʻo e tokotaha angahalaʻia ko ʻĀtama, ko ia ai, ʻoku fai angahala hono kotoa ʻa kitautolu pea maʻu ʻa e totongi ʻo e angahalá, ko e mate. Hangē pē ko e lau ʻa e Tohitapú: “Nae hoko mai ae agahala ki mamani, moe mate mei he agahala, i he tagata be taha; bea nae behe ae hoko oe mate ki he kakai kotoabe, he kuo agahala kotoabe.” (Loma 5:12, PM) Ko e ʻAho Fakamaau ko e konga tefito ia ʻo e fokotuʻutuʻu ʻa e ʻOtuá ke fakahaofi ai kitautolu mei he tuʻunga ko ʻení.

Ko e Makatuʻunga ki he ʻAho Fakamaaú

Fakatatau ki he Tohitapú, ki muʻa ʻi he meimei taʻu ʻe 2,000 kuo hilí naʻe fokotuʻu ai ʻe he ʻOtuá ʻa e makatuʻunga ki he meʻa ʻe hoko ʻi he ʻAho Fakamaaú. Naʻe hoko ʻeni ʻi he haʻu ʻa Sīsū ki he māmaní ʻo foaki atu ʻa ʻene moʻui haohaoa fakaetangatá koeʻuhi ko kitautolu. Naʻe fakamatalaʻi ia ʻe Sīsū tonu: “He naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.”​—Sione 3:16.

Kapau ʻoku tau tui kia Sīsū, naʻa mo e taimí ni ʻoku tau maʻu ʻa e ʻaonga mei heʻene feilaulaú ʻi ha founga fakalaumālie. ʻOku fakamolemoleʻi ʻe he ʻOtuá ʻa ʻetau ngaahi angahalá pea ʻokú ne fakaʻatā kitautolu ke tau ʻunuʻunu atu kiate ia. (Sione 14:6; 1 Sione 2:​1, 2) Ka ʻoku tau kei taʻehaohaoa, ko e kau angahalaʻia, pea ʻi he tuʻunga pehe ní, ʻoku tau kei maʻu ai ʻa e puke fakaesino pea faifai atu pē ʻo mate. ʻOku teʻeki ai ke tau maʻu ʻa e moʻui taʻengata ʻa ia naʻe talaʻofa ʻe Sīsuú. ʻE hoko mai ʻeni ko e ola ia ʻo e ʻAho Fakamaaú.

Ko e ʻAho ʻo e Fakamaaú

Naʻe mamata ʻa e ʻapositolo ko Sioné ki ha vīsone ʻo kau ki he ʻAho Fakamaaú, pea naʻá ne fakamatalaʻi ia ʻo pehē: “Bea neu mamata ki he nofoa fakaeieiki oku lahi bea hinehina, mo ia nae nofo ai, aia nae buna mei hono ao ae fonua moe lagi; bea nae ikai ilo ha botu ki ai. Bea neu mamata ki he bekia, ae iki moe lalahi, nae tutuu i he ao oe Otua; bea moe folahi oe gaahi tohi: bea folahi moe tohi e taha, aia koe tohi oe moui: bea nae fakamāuʻi ae bekia mei he gaahi mea nae tohi i he gaahi tohi, o fakatatau ki he e nau gaahi gaue.”​—Fakahā 20:​11, 12, PM.

ʻIo, fakatatau ki he vīsone ʻa Sioné, ko e ʻAho Fakamaaú ʻe angi ia ʻe he ʻOtuá tonu. Ka ʻoku kau ai mo ha tokotaha kehe. Naʻe fakamatala ʻe he ʻapositolo ko Paulá: “Koeuhi kuo ne [ʻOtua] kotofa ae aho, te ne fakamāu maonioni ai a mamani, i he tagata kuo ne fakanofo.” (Ngāue 17:31, PM) Ko hai ʻa e tangata ko iá? Ko Sīsū, ʻa ia naʻá ne pehē ʻe ia tonu: “He oku ikai fakamāu ha toko taha e he Tamai, ka kuo ne tuku ae fakamāu kotoabe ki he Alo.” (Sione 5:22, PM) Ko ia ko Sīsū ʻe hoko ia ʻi he ʻAho Fakamaaú ko e Fakamaau kuo fakanofo ʻe he ʻOtuá.

Ko e ongoongo lelei ʻeni ki he faʻahinga ʻo e tangatá. ʻOku fakahā ʻe he tohi Kōsipelí ʻe fā ko Sīsū ko ha tokotaha kaungā-ongoʻi lahi. ʻOku ʻikai te ne anga-hiki pe anga-fefeka ka ʻokú ne “agavaivai mo agamalu.” (Mātiu 11:29, PM; 14:14; 20:34) ʻOku tau fiefia ke ʻi he malumalu ʻo ha fakamaau pehē.

ʻE Hoko ʻAfē Ia?

Ka, ʻe hoko ʻafē ʻa e ʻAho Fakamaaú? ʻOku pehē ʻe he tohi Fakahā ʻe hoko ia ʻi he taimi ʻe “buna . . . ae fonua moe lagi.” ʻOku fakamanatu mai heni kiate kitautolu ʻa e ngaahi lea ʻa e ʻapositolo ko Pitá: “Ka ko e ngaahi langi mo e fonua ʻo onopōni kuo . . . taʻofi ki he afi, ʻo ka toki hoko ʻa e ʻaho ʻo e fakamāuʻi mo e fakaʻauha ʻo e kakai fakaʻotuamate.” (2 Pita 3:7) ʻE tutu ʻa e foʻi māmaní ia? ʻIkai, ʻoku maʻalaʻala ʻa e poini ko ʻení ʻi he Tohitapú. Ko e foʻi māmaní ʻe ʻikai ʻaupito ke fakaʻauha ia. “Ko e māmani . . . [ʻe] ʻikai ke ueʻi ia ʻo taʻengata.” (Sāme 104:5, KJ) Ko hono potutohi ʻo e ngaahi lea ʻa Pitá ʻoku hā mei ai ko e tuʻu fakaʻotuamate lolotonga ʻo e māmaní ʻe fakaʻauhá. Ko e kakai fakaʻotuamaté, kae ʻikai ko e palanite ko Māmaní, ʻe ʻauhá.​—Sione 12:31; 14:30; 1 Sione 5:19.

Ko e kau tangata fakaʻotuamate ko ʻení ʻe fakaʻauha kinautolu ʻi he meʻa ʻoku ui ʻe he Tohitapú ko e tau ʻo ʻĀmaketone​—ʻa ia, ʻo hangē ko ia kuo faʻa fakahā ʻe he makasini ko ʻení, ʻoku vavé ni ke fakahoko. (Fakahā 16:14, 16) Hili iá, ko Sētane tonu ʻe tuku ia ki he luo taʻe-hano-takelé pea taʻofi mei haʻane kaunoa ki he faʻahinga ʻo e tangatá ʻi he afeʻi taʻu, pea ko e afeʻi taʻu ko ʻení ko e fuoloa tonu pē ia ʻo e ʻAho Fakamaaú. (Fakahā 19:17–20:3) Ko e hā ʻe hoko ki he kakai angatonú ʻi he ʻauha ʻa e kau tangata fakaʻotuamaté ʻi ʻĀmaketoné? Te nau hao moʻui atu ki he ʻAho Fakamaaú. ʻOku tau lau: “E nofo mau i ai [ʻi he māmani] ae haohaoa. Ka e motuhi atu ae agahala mei he mamani.”​—Palōvepi 2:21, 22, PM.

ʻI hono poupouʻi ʻa e meʻa ko ʻení, ʻoku fakamatala ʻe he Tohitapú ʻo fekauʻaki mo e “fuʻu kakai lahi, ʻa ia ʻe ʻikai lava ʻe ha taha hono lau, ko ha kakai mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea” ʻa ia te nau hā ʻi he māmaní ki muʻa ʻi ʻĀmaketone. Ko kinautolu “ʻoku haʻu mei he mamahi lahi”; ʻi hono fakalea ʻe tahá, ʻoku nau hao moʻui atu mei he ngataʻanga ʻo e maama fakaʻotuamate ko ʻení ʻo tatau pē mo e hao ʻa Noa mei he ngataʻanga ʻo e maama ʻi hono ʻahó. (Fakahā 7:​9-17; 2 Pita 2:5) Naʻá ke ʻilo koā naʻa mo e taimí ni ʻoku ʻi ai ʻa e fuʻu kakai lahi fakavahaʻapuleʻanga ko e kau Kalisitiane longomoʻui? ʻOku maʻu ʻa e ʻamanaki ʻe he faʻahinga ko ʻení ke hao moʻui atu mei he fakamamahi lahí pea moʻui taʻengata ʻi he māmaní. Ko ʻenau ʻi aí ni ko e fakamoʻoni pau ia ʻoku panaki mai ʻa e ʻAho Fakamaaú.

Ko Hai ʻe Fakamaauʻí?

Ko e fuʻu kakai lahi ko ʻení ʻe fakamaauʻi ʻi he ʻAho Fakamaaú. Ka ʻe ʻikai ko kinautolu pē. ʻOku hoko atu ʻa e fakamatala ʻa Sioné: “Pea naʻe tuku hake ʻe he tahí ʻa e kakai mate naʻe ʻi aí; pea tuku hake ʻe mate mo heli ʻa e kakai mate naʻe ʻi aí: pea naʻe fakamaau ʻa kinautolu taki taha ʻo fakatatau ki heʻenau ngaahi ngāue.” (Fakahā 20:​13, KJ) Ko ha toe fakamoʻoni ʻeni ʻoku ʻikai ke fakamamahiʻi taʻengata ha kakai ʻi heli. Kapau ʻoku tuku hake ʻe heli ʻa e kau mate ʻi aí, ʻe lava fēfē ke ʻi ai ha tokotaha ai ʻo taʻengata? Ko hono moʻoní, ko e heli ʻo e Tohitapú ko e faʻitoka anga-maheni ia ʻo e faʻahinga ʻo e tangatá, ʻa ia ʻoku nofo ai ʻa e kakai kuo maté ʻo taʻe toe ʻilo ha meʻa ʻo talitali mai ki he toetuʻu. ʻI he ʻAho Fakamaaú, ʻe ʻikai ke toe ʻi ai ha tokotaha mate ʻi heli.​—Koheleti 9:10.

Ko hai ʻe toe fokotuʻu mai mei he maté ʻi he ʻAho Fakamaaú? Naʻe pehē ʻe he ʻapositolo ko Paulá: “E ai ha toetuu oe bekia, ae agatonu moe taeagatonu.” (Ngāue 24:15, PM) Ko ia ai, ko e kau sevāniti angatonu ʻa e ʻOtuá, “ae agatonu,” ʻe toetuʻu. Ka ʻe pehē foki mo e faʻahinga taʻefaʻalaua kehe, ʻa e “taeagatonu.” ʻOku hā mahino, ʻe kau ki he toetuʻú ʻa kinautolu kotoa kuo nau mate pea ʻoku nau kei ʻi he faʻitoka​—tukukehe pē ʻa e faʻahinga ʻa ia ko ʻenau ngaahi angahalá naʻe fuʻu mamafa pehē fau pea kuo ʻosi fakamaauʻi kinautolu ʻe he ʻOtuá ʻo mātuʻaki taʻe taau ki he moʻuí.​—Mātiu 12:31.

Ko e Fakamaaú

Ka neongo ia, ko e hā ʻe hoko ki he fuʻu kakai lahi ʻe hao moʻui atú pea mo e faʻahinga ʻe toetuʻú ʻi he ʻAho Fakamaaú? ʻOku pehē ʻe he Tohitapú: “Bea nae fakamāuʻi ae bekia mei he gaahi mea nae tohi i he gaahi tohi, o fakatatau ki he e nau gaahi gaue.” Ko e taimi ia ʻo e sivi fakalautelau. Ko kinautolu hono kotoa ʻoku nau loto-lelei ke ngāue ʻo fakatatau ki he ‘ngaahi meʻa ko ia kuo tohi ʻi he ngaahi tohi’​—ʻoku hā mahino ko e ngaahi fiemaʻu ʻa e ʻOtuá ki he faʻahinga ʻo e tangatá ʻi he taimi ko iá​—ʻe tohi ia ʻi he “tohi oe moui.” (Fakahā 20:12, PM) Te nau kamata ke maʻu ai ʻa e moʻui taʻengatá!

ʻI he taimi ko iá, ʻe toki ʻomai ai ʻa e ngaahi lelei fakamatelie ʻe he pekia fakaefeilaulau ʻa Kalaisí! Ko kinautolu kuo tohi ʻi he tohi ʻo e moʻuí ʻi he taimi ko iá ʻe ʻikai te nau kei hoholo ʻo mahamahaki pea mo mate. Ka, te nau fakaʻau māmālie ki he haohaoa fakaetangata, fakataha mo e moʻui taʻengata naʻe talaʻofa kiate kinautolu ʻoku nau tui kia Sīsuú. Ko ha toki ʻamanaki fakaofo ē! Ka neongo ia, ʻoku hā mahino ko e niʻihi te nau fakafisi ke talangofua ‘ki he ngaahi meʻa ko ia kuo tohi ʻi he ngaahi tohi.’ Ko e hā ʻe hoko kiate kinautolú? ʻE ʻikai te nau maʻu ʻa e moʻui taʻengatá. Ka ʻoku pehē ʻe he Tohitapú: “Bea ko ia kotoabe nae ikai ilo kuo tohi i he tohi oe moui, nae li ia ki he ano oe afi.”​—Fakahā 20:15, PM.

Ko e afi ʻo heli ʻeni ʻoku lāulea ki ai ʻa e Puleʻanga-Haʻa-Kalisitiané? ʻIkai, he ʻoku tau lau ʻi he veesi ki muʻá ai ʻo pehē: “Pea naʻe lī ʻa e mate mo heli ki he ano afi. Ko eni ʻa e mate ʻangaua.” (Fakahā 20:14, KJ) Kapau ʻoku lī ʻa heli ki he ano afi, tā ʻoku ʻikai ko e afi ʻo helí ʻa e ano ko iá. ʻIkai ko ia pē, ka ko e maté ʻoku ʻikai ko ha meʻa moʻoni ia ʻe malava ke toʻo hake ʻo lī ki ha feituʻu. Ko ia ai, ʻoku pau ko e ano afí ko e fakatātā pē. Ko e fakatātā ʻo e hā? ʻOku pehē ʻe he Tohitapú: “Ko eni ʻa e mate ʻangaua.” ʻI hono lī ʻa e maté mo Hētesi ki he ano afí, ʻokú na “mate,” ʻo ʻikai toe ʻi ai. ʻOku pehē pē mo e faʻahinga angatuʻu ʻo e tangatá te nau iku atu ki aí, te nau mate, pe ʻikai toe ʻi ai. Ka, ko e mate ko ʻení, ko e mate ʻangaua, ʻo ʻikai ke toe ʻi ai ha ʻamanaki ki ha toetuʻu mei he maté.

ʻAho Fakamaaú​—Ko Ha Taimi ʻo e ʻAmanaki

Ko ia ʻi heʻetau fakakaukau atu ki he ʻAho Fakamaaú, ʻoku totonu ke ʻoua te tau manavahē pe fakaliliʻa ki ai. Ko e ʻAho Fakamaaú ko ha taimi ia ʻo e ʻamanaki, ko ha taimi ia ke toe fakafoki ai ki he faʻahinga ʻo e tangatá ʻa e moʻui taʻengata ʻa ia naʻe fakamoleki ʻe ʻĀtamá. Fanongo ki he ngaahi tāpuaki ʻe ʻomai kiate kinautolu ʻe fakamaauʻi ʻoku nau angatonú: “Ko eni, ko e tapanekale ʻo e ʻOtua, ʻoku tuʻu mo e kakai. Pea ʻe nofo hono Sikaina mo kinautolu, pea te nau nofo ko hono kakai; pea ʻe nofo ʻe he ʻEne ʻAfio, ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”​—Fakahā 21:​3, 4.

ʻI he aʻu ki he ngataʻanga ʻo e ʻAho Fakamaaú taʻu ʻe taha afé, ko e faʻahinga angatonu ʻo e tangatá mei he ngaahi feituʻu kotoa pē ʻo e māmaní ʻe fakaiku ʻo nau haohaoa. ʻI he ʻuhinga kakato lahi tahá te nau “moʻui hake,” pea ko e ʻAho Fakamaaú kuó ne aʻusia ai hono taumuʻá. (Fakahā 20:5) Hili iá, ʻoku pehē ʻe he Tohitapú, ʻe tuku kia Sētane ke ne feinga fakaʻosi ki he faʻahinga ʻo e tangatá. (Fakahā 20:3, 7-10) Ko kinautolu te nau talitekeʻi ʻa ʻene feinga fakaʻosi ko ʻení te nau fiefia ʻi hono fakahoko kakato ʻa e talaʻofa ʻa e Tohitapú: “Ko haʻa fai totonu te nau maʻu ʻa e fonua, pea te nau nofo ai ʻo tuputupuʻa.”​—Sāme 37:29.

Ko ha toki tokonaki fakaofo ē ʻa e ʻAho Fakamaaú! Pea ko e meʻa fakaofo ia ʻe lava ke tau teuteu ki ai naʻa mo e taimí ni, ʻaki haʻatau ako ʻa e Tohitapú, ako ki he finangalo ʻo e ʻOtuá, pea mo hono ngāueʻaki ʻa e finangalo fakaʻotua ko ʻení ʻi heʻetau moʻuí! Tā neʻineʻi ke fakahāhā ʻe he tangata-tohi-sāmé ʻa e fiefia ʻi heʻene fakakaukau ki he fakamaau ʻa e ʻOtuá ʻo pehē: “Ke fiefia ʻa e langi, pea tomeʻe ʻa e fonua; ke uʻulu ʻa e tahi mo hono fuʻu fonu na; patapata ʻa e toafa mo hono meʻa kotoa; toki fai ʻe he ʻakau kotoa ʻo e lala ʻenau fuʻu mavava; ʻi he ʻao ʻo Sihova, he ʻoku ne haʻu na; he ʻoku ne haʻu na ke fakamāu ʻa e fonua.”​—Sāme 96:11-13.