Ko Sihova—ʻA Hotau Nofoʻangá

“ʻEi, ko koe ko homau nofoʻanga ʻi he toʻutangata mo e toʻuta- ngata.”—SAAME 90:1.

KO E HĀ HOʻO TALÍ?

Naʻe anga-fēfē hoko ʻa Sihova ko ha “nofoʻanga” kia ʻĒpalahame, ʻAisake, mo Sēkope?

Ko e hā ʻe lava ke tau ako mei he faʻifaʻitakiʻanga ʻa ʻĒpalahamé?

ʻE lava fēfē ke tau fakahaaʻi ko Sihova ʻa hotau “nofoʻanga”?

1, 2. Kuo anga-fēfē ongoʻi ʻa e kau sevāniti ʻa e ʻOtuá fekauʻaki mo e māmani ko ení? Ko e hā ʻa e ʻapi ʻoku nau maʻú?

ʻOKÚ KE ongoʻi malu mo fiemālie ʻi he māmani fulikivanu ko ení, ʻo hangē ia ʻokú ke ʻi ʻapí? Kapau ʻoku ʻikai, ʻokú ke ongoʻi tatau mo e ongoʻi ʻa e kau sevāniti kehe ʻa Sihová. Talu mei he kuohilí, ko e faʻahinga kotoa kuo nau ʻofa moʻoni kia Sihová naʻa nau ongoʻi ʻo hangē ko e kau sola kinautolu ʻi he māmani ko ení. Ko e fakatātaá, ko e kau lotu faitōnunga ʻa e ʻOtuá ʻa ia naʻa nau hiki mei he feituʻu ki he feituʻu ʻi he fonua ko Kēnaní naʻa nau ongoʻi pehē. ʻOku pehē ʻe he Tohi Tapú naʻa nau “talaki fakahāhā ko e kau sola mo e kau nofo fakataimi kinautolu ʻi he fonuá.”—Hep. 11:13.

² Ko e kau muimui pani ʻo Kalaisí ʻoku nau maʻu honau “tuʻunga tangaʻifonuá” ʻi he langí. ʻOku nau ongoʻi foki hangē ko e ‘kau muli mo e kau nofo fakataimi’ kinautolu ʻi he māmani ko ení. (Fil. 3:20; 1 Pita 2:11) Ko e “fanga sipi kehe” ʻa Kalaisí ʻoku toe ʻikai foki “ko ha konga kinautolu ʻo e māmaní,” hangē pē ko Sīsuú naʻe ʻikai ‘ko ha konga ia ʻo e māmaní.’ (Sione 10:16; 17:16) Kae kehe, ko e kakai ʻa e ʻOtuá ʻoku ʻi ai honau ʻapi. ʻOku ʻikai ko ha ʻapi ia ʻe lava ke tau sio ki ai ʻaki hotau matá, ka ko e ʻapi mātuʻaki malu mo fonu ʻofa taha ia ʻe faifai ange ʻo tau maʻú. Ko e hā ʻa e ʻapi ko ení? Naʻe tohi ʻe Mōsese: “ʻEi, ko koe ko homau nofoʻanga ʻi he toʻutangata mo e toʻutangata.”a (Saame 90:1) Ko Sihová ko ha “nofoʻanga,” pe ko ha ʻapi ia, ki heʻene kau sevāniti mateakí. ʻOkú ke ʻilo ʻa e anga ʻo e hoko ʻa Sihova ko ha ʻapi ki heʻene kau sevāniti ʻi he kuohilí? ʻOku anga-fēfē ʻene hoko ko ha ʻapi ki heʻene kakai he ʻaho ní? Pea ʻe anga-fēfē ʻene hoko ko e ʻapi malu pē ia ʻe taha ki heʻene kau sevāniti ʻi he kahaʻú?

KO SIHOVÁ—KO HA “NOFOʻANGA” KI HEʻENE KAU SEVĀNITI ʻI HE KUOHILÍ

 3. Ko e hā ʻoku fakahoa ki ai ʻa Sihova ʻi he Saame 90:1, pea ko e hā hono ʻuhingá?

³ ʻOku fakahoa ʻe he Tohi Tapú he taimi ʻe niʻihi ʻa Sihova ki he ngaahi meʻa ʻoku lava ke tau sio ki aí koeʻuhí ke lava ʻo tau mahinoʻi lelei ange hono ʻulungāngá. Ko e fakatātaá, ʻoku fakahoa ʻe he Saame 90:1 ʻa Sihova ki ha “nofoʻanga,” pe ki ha ʻapi. ʻI he taimi ʻoku tau fakakaukau ai ki ha ʻapi, ʻoku tau fakakaukau ki ha feituʻu ʻoku ʻi ai ʻa e ʻofa, nonga, mo e maluʻi. Ko e hā ʻoku fakahoa ai ʻa Sihova ki ha ʻapí? ʻOku pehē ʻe he Tohi Tapú ko Sihová ko e ʻofa. (1 Sio. 4:8) ʻOku toe pehē ai ko iá ko e ʻOtua ʻo e nonga pea ʻokú ne maluʻi ʻene kau sevānití. (Saame 4:8) Ko ha fakatātā, tau lāulea angé ki he founga naʻe hangē ai ʻa Sihova ko ha ʻapi ki heʻene kau sevāniti faitōnunga ko ʻĒpalahame, ʻAisake, mo Sēkopé.

4, 5. Naʻe anga-fēfē hono tāpuakiʻi mo maluʻi ʻe he ʻOtuá ʻa ʻĒpalahamé?

⁴ Kuo pau pē nai naʻe fifili ʻa ʻĒpalahame ki he ʻuhinga naʻe tala ange ai ʻe Sihova kiate ia: “Hiki [koe] mei ho fonua, pea mei ho tupuʻanga, pea mei he fale ʻo hoʻo tamai, ki he fonua te u fakaha kiate koe.” Ka ko e ngaahi lea hono hoko ʻa Sihová kuo pau pē naʻá ne ʻoange kiate ia ʻa e fiemālie lahi: “Te u ngaohi koe ko e puleʻanga lahi, pea te u fakamonuʻia koe, pea te u fakatauʻolunga ho hingoa.” Naʻe tānaki mai ʻe Sihova: “Te u ʻofeina ʻakinautolu te nau ʻofeina koe, pea ko ia te ne tutukuʻi koe te u fakamalaʻia.”—Sēn. 12:1-3.

⁵ Naʻe talaʻofa ʻe Sihova te ne tāpuakiʻi mo maluʻi ʻa ʻĒpalahame mo hono ngaahi hakó, pea ko e meʻa tofu pē ia naʻe hokó. (Sēn. 26:1-6) Ko e fakatātaá, naʻá ne taʻofi ʻa Felo ʻo ʻIsipité mo Tuʻi ʻApimeleki ʻo Kelá mei hono tāmateʻi ʻa ʻĒpalahame pea ʻave hono uaifí, ʻa Sela. Naʻá ne maluʻi ʻa ʻAisake mo Lepeka ʻi ha founga meimei tatau. (Sēn. 12:14-20; 20:1-14; 26:6-11) ʻOku pehē ʻe he Tohi Tapú ko Sihová “naʻe ʻikai te ne tuku ke fai ʻe ha tangata honau fakaehaua; ʻio naʻa ne valoki ‘ani tuʻi koeʻuhi ko kinautolu na. ʻOua ʻe ala ki heʻeku kau pani, pea ʻoua ʻe fai ha kovi ki heʻeku kau palofita ni.’”—Saame 105:14, 15.

 6. Ko e hā naʻe tala ange ʻe ʻAisake kia Sēkope ke ne faí? Naʻe ongoʻi fēfē nai ʻa Sēkope?

⁶ Naʻe toe tokangaʻi lelei ʻe Sihova ʻa e mokopuna ʻo ʻĒpalahame ko Sēkopé. ʻI he aʻu mai ki he taimi ke mali ai ʻa Sēkopé, ko ʻene tamai ko ʻAisaké naʻá ne tala ange kiate ia: “ʻOua te ke mali mo ha ʻofefine ʻo ha taha Kenani. Tuʻu, ʻo ʻalu ki Mesopotemia, ki he ʻapi ʻo Petueli ko e tamai ʻa hoʻo faʻe; pea ke kumi ai hao uaifi mei he fanau ʻa Lepani.” (Sēn. 28:1, 2) Naʻe fai tofu pē ʻe Sēkope ʻa e meʻa naʻe tala ange kiate ia ʻe heʻene tamaí. Naʻá ne tuku hono fāmilí ʻi Kēnani pea fononga toko taha pē nai ʻi he kilomita ʻe lauingeau ki he feituʻu ko Hālaní. (Sēn. 28:10) Kuo pau pē naʻá ne fakakaukau: ‘ʻE fuoloa fēfē ʻeku mamaʻó? ʻE fiefia ʻeku faʻētangatá ke sio mai? Te u maʻu ai ha uaifi ʻoku ʻofa kia Sihova?’ Ka naʻe hoko ha meʻa ʻi Lusa, ko e kilomita ia ʻe 100 (maile ʻe 60) mei Peasipa, ʻa ia naʻá ne tokoniʻi ʻa Sēkope ke ʻoua ʻe hohaʻa. Ko e hā ia?

 7. Ko e hā ʻa e fakafiemālie naʻe ʻoange ʻe he ʻOtuá kia Sēkopé?

⁷ ʻI Lusa, naʻe hā ai ʻa Sihova kia Sēkope ʻi ha misi peá ne pehē: “Ko eni ko au te u ʻiate koe, pea te u tauhi koe ʻi ho ngahi founga kotoa pe, pea te u fakafoki koe ki he kelekele ko eni; he ʻe ʻikai te u liʻaki koe, kaeʻoua ke u fai ʻa e ngahi meʻa kuo u lea ai kiate koe.” (Sēn. 28:15) Ko e ngaahi lea anga-ʻofa ko iá kuo pau pē naʻe ʻoange ai kia Sēkope ʻa e fiemālie lahi ʻaupito! Hili iá, kuo pau pē naʻe vēkeveke ʻa Sēkope ke sio ki he anga hono fakahoko moʻoni ʻa e talaʻofa ʻa Sihová. Kapau kuó ke mavahe mei ʻapi, mahalo ke ngāue ʻi ha fonua kehe, kuo pau pē naʻá ke hohaʻa hangē ko Sēkopé. Ka kuó ke ongoʻi moʻoni ʻa e anga hono tokangaʻi koe ʻe Sihova ʻi he ngaahi founga lahi.

8, 9. Naʻe anga-fēfē hoko ʻa Sihova ko ha “nofoʻanga” kia Sēkopé? Ko e hā ʻoku akoʻi mai ʻe he faʻifaʻitakiʻanga ʻa Sēkopé ʻo fekauʻaki mo Sihová?

⁸ ʻI he taimi naʻe aʻu atu ai ʻa Sēkope ki Hālaní, naʻe talitali māfana ia ʻe heʻene faʻētangata ko Lēpaní pea ki mui ai naʻá ne ʻoange kiate ia ʻa Lia mo Lesieli ko hono ongo uaifi. Ka ʻi he hili atu ha taimi, naʻe kamata ke hoko ʻa Lēpani ʻo taʻefaitotonu kia Sēkope pea liliu ʻene totongí ʻo tuʻo hongofulu! (Sēn. 31:41, 42) Ka naʻe kātakiʻi kotoa eni ʻe Sēkope koeʻuhí naʻá ne falala kia Sihova te ne tokangaʻi ia. Ko hono olá, naʻe tāpuakiʻi ʻe Sihova ʻa Sēkope. ʻI he aʻu ki he taimi naʻe tala ange ai kiate ia ʻe he ʻOtuá ke foki ki Kēnaní, naʻe maʻu ʻe Sēkope ʻa e ‘fanga manu, mo ʻene kau kaunanga, mo ʻene kau tamaioʻeiki, mo ʻene fanga kameli, mo ʻene fanga asi tokolahi.’ (Sēn. 30:43) Naʻe houngaʻia loloto ʻa Sēkope ʻia Sihova ʻo ne lotu: “ʻOku ʻikai te u tāu ke maʻu ha taha ʻo hoʻo ngaahi fuʻu meesi ni, mo hoʻo ngaahi fuʻu fakaai, ʻa ia kuo ke fai ki hoʻo tamaioʻeiki ko au; he ko hoku tokotoko pe naʻaku aʻa mo au ʻi Sioatani ni, ka ko eni kuo u hoko ʻo ʻapitanga ua.”—Sēn. 32:10.

⁹ Ko e ngaahi fakatātā ko ení ʻoku fakahaaʻi ai ʻa e moʻoni ʻo e ngaahi lea ʻa Mōsesé: “ʻEi, ko koe ko homau nofoʻanga ʻi he toʻutangata mo e toʻutangata”! (Saame 90:1) Kuo ʻikai ke liliu ʻa Sihova. ʻOkú ne kei ʻofa, maluʻi, pea tokanga ki heʻene kau sevāniti mateakí. (Sēm. 1:17) Tau lāulea angé pe naʻe fēfē.

KO SIHOVA —ʻA HOTAU “NOFOʻANGA” HE ʻAHO NÍ

10. Ko e hā ʻoku lava ai ke tau fakapapauʻi ʻoku hokohoko atu ʻa Sihova ʻene hoko ko ha “nofoʻanga” ki heʻene kau sevānití?

¹⁰ Sioloto atu ki he tuʻungá ni: ʻOkú ke ʻi he fakamaauʻangá ʻo hoko ko ha fakamoʻoni talatalaaki ki ha tangata ʻatamaiʻia mo mālohi ʻaupito. Ko ha tokotaha loi lahi mo fakapō ia, pea ʻoku ʻi ai ʻa e kakai mei he kotoa ʻo e māmaní ʻoku ngāue ki ai. ʻE fēfē hoʻo ongoʻí ʻi he taimi naʻá ke mavahe ai mei he fale hopó ʻi he ngataʻanga ʻo e ʻahó? Te ke ongoʻi malu? ʻIkai! Te ke maʻu leva ha ʻuhinga lelei ke kole ai ke maluʻi koe. ʻI ha founga meimei tatau, ʻi he tuʻunga ko e kau sevāniti ʻa Sihová ʻoku tau hoko ko e kau fakamoʻoni talatalaaki ki he fili kovi ʻo Sihová, ʻa Sētane. (Lau ʻa e Fakahā 12:17.) Kuo feinga ʻa Sētane ke taʻofi ʻa e kakai ʻa e ʻOtuá. Ka kuó ne malava ke fai ia? ʻIkai! Ko hono moʻoní, ʻoku tau hokohoko atu ke malanga ki he kakai tokolahi ange ʻi he kotoa ʻo e māmaní. ʻOku malava fēfē eni? ʻOku lava ke ʻi ai pē ʻa e fakamatala ʻe taha: Ko Sihova ko ha “nofoʻanga” kia kitautolu. ʻOkú ne maluʻi mo tāpuakiʻi ʻene kakaí ʻo lahi ange ia ʻi ha toe taimi lolotonga ʻa e ngaahi ʻaho fakaʻosi ko ení. (Lau ʻa e ʻAisea 54:14, 17.) Ka ʻoku lava ʻe Sihova ke hokohoko atu ʻene hoko ko ha “nofoʻanga” kia kitautolu ʻo kapau pē ʻoku ʻikai ke tau fakaʻatā ʻa Sētane ke ne kākaaʻi kitautolu.

11. Ko e hā ha toe lēsoni ʻe lava ke tau ako meia ʻĒpalahame, ʻAisake, mo Sēkope?

¹¹ Tau ako ha lēsoni ʻe taha meia ʻĒpalahame, ʻAisake, mo Sēkope. Neongo naʻa nau nofo ʻi he fonua ko Kēnaní, naʻa nau nofo mavahe mei he kakai ʻo e fonuá pea fehiʻa ʻi he ngaahi meʻa kovi naʻe fai ʻe he kakai ko iá. (Sēn. 27:46) Naʻe ʻikai ke nau fiemaʻu ha lisi lōloa ʻo ha ngaahi lao ke ʻilo ai ʻa e meʻa naʻe totonú pe ko e meʻa naʻe halá. Naʻa nau ʻilo fekauʻaki mo e meʻa ʻoku ʻofa ai ʻa Sihová mo e meʻa ʻokú ne fehiʻa aí. Ko ia naʻa nau fai ʻa e meʻa kotoa naʻa nau malavá ke ʻoua ʻe hoko ko e konga ʻo e māmaní. He faʻifaʻitakiʻanga lelei ē ko kinautolu kia kitautolu! ʻOkú ke feinga mālohi ke faʻifaʻitaki ki he kau sevāniti mateaki ko ia ʻa Sihová? ʻOkú ke fakahāhā ʻoku ʻikai te ke loto ke hoko ko e konga ʻo e māmaní ʻaki hono filifili lelei ho ngaahi kaungāmeʻá mo e fakafiefiá? Ko e meʻa fakamamahí, ko e niʻihi ʻi he fakatahaʻanga Kalisitiané, ʻoku hangē ʻoku nau ongoʻi lata ange ʻi he māmani ʻo Sētané. Kapau ʻokú ke kiʻi ongoʻi pehē, lotu ʻo kole ʻa e tokoni ʻa Sihová. Manatuʻi, ko e māmani eni ia ʻo Sētane, pea ʻokú ne siokita mo ʻikai tokanga mai kia kitautolu.—2 Kol. 4:4; ʻEf. 2:1, 2.

12. (a) ʻOku tokoniʻi fēfē ʻe Sihova ʻene kau sevānití? (e) ʻOkú ke ongoʻi fēfē fekauʻaki mo e tokoni ʻoku ʻomai kia kitautolu ʻe Sihová?

¹² Kapau ʻoku ʻikai ke tau loto ke kākaaʻi kitautolu ʻe Sētane, kuo pau ke tau maʻu ʻaonga mei he tokoni kotoa ʻoku ʻomai ʻe Sihova ki heʻene kau sevānití. Ko e fakatātaá, ʻokú ne ʻomai ʻa e tokoni fakafou ʻi he ngaahi fakataha faka-Kalisitiané, lotu fakafāmilí, mo e kau mātuʻá ʻa ia ʻoku nau ʻomai ʻa e fakafiemālie mo e poupou koeʻuhí ke lava ai ʻo tau kātakiʻi ʻa e ngaahi palopalema ʻi he moʻuí. (ʻEf. 4:8-12) Ko Tokoua George Gangas, ʻa ia ko ha mēmipa ia ʻo e Kulupu Pulé ʻi he taʻu lahi, naʻá ne tohi fekauʻaki mo e anga ʻene ongoʻi ʻi he haʻohaʻonga ʻo e kakai ʻa e ʻOtuá: “ʻI heʻeku ʻi honau haʻohaʻongá ʻoku ou ongoʻi lata ai hangē haku fāmilí.” ʻOkú ke ongoʻi pehē?

13. Ko e hā ʻa e lēsoni mahuʻinga ʻe lava ke tau ako mei he Hepelū 11:13?

¹³ Ko e lēsoni mahuʻinga ʻe taha ʻoku tau ako meia ʻĒpalahame, ʻAisake, mo Sēkopé ʻa ia ʻoku totonu ke ʻoua te tau ilifia ʻi he hoko ʻo kehe mei he kakai takatakai ʻia kitautolú. Hangē ko ia naʻa tau lau ʻi he palakalafi 1, ko e kau tangata faitōnunga ko iá naʻa nau “talaki fakahāhā ko e kau sola mo e kau nofo fakataimi kinautolu ʻi he fonuá.” (Hep. 11:13) ʻOkú ke fakahaaʻi ʻokú ke kehe mei he kakai ʻi he māmaní? ʻE lava ke hoko eni ʻi he taimi ʻe niʻihi ʻo faingataʻa. Ka ʻe lava ke ke fai eni ʻaki ʻa e tokoni mei he ʻOtuá pea mei ho fanga tokoua mo e fanga tuofāfiné. Manatuʻi, ʻoku ʻikai te ke toko taha pē. Ko e faʻahinga kotoa ʻoku loto ke ngāue kia Sihová kuo nau faitau ke fakafepakiʻi ʻa Sētane mo hono māmaní! (ʻEf. 6:12) Ka ʻe lava ke tau ikuna ʻi he faitau ko ení kapau te tau falala kia Sihova pea ʻai ia ko hotau nofoʻanga malu.

14. Ko e hā ʻa e “kolo” naʻe tatali ki ai ʻa ʻĒpalahamé?

¹⁴ ʻOku totonu ke tau faʻifaʻitaki kia ʻĒpalahame pea hanganaki manatuʻi ʻa e palé. (2 Kol. 4:18) Naʻe tohi ʻe he ʻapositolo ko Paulá ʻo pehē ko ʻĒpalahamé “naʻá ne fakatatali ki he kolo ʻokú ne maʻu ʻa e ngaahi fakavaʻe moʻoní, ʻa ia ko hono tokotaha palaní mo e tokotaha langá ko e ʻOtuá.” (Hep. 11:10) Ko e “kolo” ko iá ko e Puleʻanga ʻo e ʻOtuá. Naʻe pau ke tatali ʻa ʻĒpalahame ki he “kolo” ko iá ke hoko mai. ʻI ha founga, ʻoku ʻikai ke tau ʻilo ia. Ko e Puleʻangá ʻoku pule he taimí ni ʻi hēvani. Pea ʻoku fakahaaʻi mahino ʻe he kikite ʻa e Tohi Tapú ʻe vavé ni ke pule mai ia ki he māmaní kotoa. ʻOku fakahaaʻi ʻe hoʻo founga moʻuí ʻokú ke tui moʻoni ki he Puleʻanga ko iá? ʻOkú ke fakamuʻomuʻa ʻa e Puleʻangá ʻi hoʻo moʻuí pea nofo mavahe mei he māmani ko ení?—Lau ʻa e 2 Pita 3:11, 12.

ʻE HOKOHOKO ATU ʻA SIHOVA KE HOKO KO HOTAU “NOFOʻANGA”

15. Ko e hā ʻe hoko ko e kahaʻu ia ʻo e faʻahinga ʻoku nau falala ki he māmani ko ení?

¹⁵ Ko e ngaahi palopalema ʻi he māmani ko ení ʻe hokohoko atu ia ke kovi ange ki muʻa ʻi he ngataʻangá. (Māt. 24:7, 8) Pea ʻi he lolotonga ʻa e mamahi lahí, ʻe pau ke hoko ʻa e moʻuí ʻo toe faingataʻa moʻoni ange. ʻI he kotoa ʻo e māmaní ʻe ʻi ai ʻa e fakaʻauha mo e puputuʻu, pea ʻe ilifia ʻa e kakaí. (Hap. 3:16, 17) ʻOku pehē ʻe he Tohi Tapú te nau hoko ʻo fuʻu feifeingavale ʻo nau kumi ai ki he maluʻi “ʻi he ngaahi ʻaná pea ʻi he lotolotonga ʻo e ngaahi fuʻu maka ʻo e ngaahi moʻungá.” (Fkh. 6:15-17) Ka ʻe ʻikai ha ʻana pe ko ha fuʻu pisinisi pe kautaha fakapolitikale te ne maluʻi kinautolu.

16. ʻOku totonu ke fēfē ʻetau vakai ki he fakatahaʻangá? Ko e hā hono ʻuhingá?

¹⁶ ʻE hanganaki tauhi kitautolu ʻe Sihova ke tau malu lolotonga ʻa e mamahi lahí. Hangē ko e palōfita ko Hapakuké, te tau fiefia ʻi he ʻOtua ʻo e fakamoʻuí. (Hap. 3:18) ʻI he ngaahi founga fē ʻe maluʻi ai kitautolu ʻe Sihova lolotonga ʻa e taimi faingataʻá? Kuo pau ke tau tatali ʻo sio. Ka ʻoku lava ke tau tuipau ko e kakai ʻa Sihová te nau kei fokotuʻutuʻu maau pea maʻu ʻa e ngaahi fakahinohino meiate ia, hangē ko e kau ʻIsileli naʻa nau mavahe mei ʻIsipite lolotonga ʻa e ʻEkisotó. (Lau ʻa e ʻEkisōtosi 13:18; Fkh. 7:9) ʻE anga-fēfē hono ʻomai ʻe Sihova ʻa e ngaahi fakahinohino ko ení? ʻE ngāueʻaki nai ʻe Sihova ʻa e fakatahaʻangá ke ne tala mai ʻa e meʻa ke tau faí. ʻOku lave ʻa e ʻAisea 26:20 ki he “ngaahi loki” ʻa ia te ne ʻomai ʻa e maluʻi ki he kakai ʻa e ʻOtuá. ʻOku lave nai eni ki he ngaahi fakatahaʻanga takatakai ʻi he māmaní. (Lau ʻa e ʻAisea 26:20.) ʻOkú ke fakamahuʻingaʻi ʻa e ngaahi fakataha ʻa e fakatahaʻangá? ʻOkú ke fai maʻu pē ʻa e meʻa ʻoku tala atu ʻe Sihova fakafou ʻi he fakatahaʻangá?—Hep. 13:17.

17. ʻOku anga-fēfē hoko ʻa Sihova ko ha “nofoʻanga” ʻo aʻu ki heʻene kau sevāniti mateaki kuo nau maté?

¹⁷ Ko Sihová ko ha “nofoʻanga” ʻo aʻu ki he kau faitōnunga te nau mate nai ki muʻa ʻi he mamahi lahí. Anga-fēfē? Te ne fokotuʻu hake kinautolu. ʻI ha taimi fuoloa hili ʻa e mate ʻa ʻĒpalahame, ʻAisake, mo Sēkopé, naʻe tala ʻe Sihova kia Mōsese naʻá ne kei hoko pē ko honau ʻOtua. (ʻEki. 3:6) Naʻe toutou lave ʻa Sīsū ki he ngaahi lea ko iá pea tānaki mai: “Ko ha ʻOtua ia, ʻikai ʻo e kau maté, ka ʻo e kau moʻuí, he ʻoku nau moʻui kotoa pē kiate ia.” (Luke 20:38) Ko e toetuʻu ʻa e kau sevāniti mateaki ʻa Sihová ʻe mātuʻaki pau ke hoko, ʻa ia kia Sihová ʻoku hangē ia kuo nau ʻosi moʻuí.—Koh. 7:1.

18. ʻE anga-fēfē hoko ʻa Sihova ko ha “nofoʻanga” ki heʻene kakai ʻi he māmani foʻoú?

¹⁸ ʻI he māmani foʻoú, ʻe hoko ai ʻa Sihova ko ha “nofoʻanga” ki hono kakaí ʻi ha founga makehe. ʻOku pehē ʻi he Fakahā 21:3: “Vakai! Ko e tēniti ʻo e ʻOtuá ʻoku ʻi he faʻahinga ʻo e tangatá, pea te ne nofo mo kinautolu.” ʻE ngāueʻaki ʻe Sihova ʻa Sīsū Kalaisi ke ne pule mai ki he māmaní ʻi he ʻuluaki taʻu ʻe taha afé. ʻI he ngataʻanga ʻo e taʻu ʻe taha afé, ʻe fakakakato ʻe Sīsū ʻa e taumuʻa ʻene Tamaí ki he māmaní, pea te ne fakafoki ʻa e Puleʻangá kia Sihova. (1 Kol. 15:28) ʻE pule fakahangatonu mai leva ʻa Sihova ki he faʻahinga haohaoa ʻo e tangatá. He kahaʻu fakaofo ē ʻoku hanga mai mei muʻa kiate kitautolú! Tau faʻifaʻitaki ki he kau sevāniti faitōnunga ʻo e kuohilí ʻaki hono ʻai ʻa Sihova ko ha “nofoʻanga” he taimí ni.

[Fakamatala ʻi lalo]

[Fakatātā ʻi he peesi 19]

[Fakatātā ʻi he peesi 20]

“ʻE ʻikai te u liʻaki koe”

[Fakatātā ʻi he peesi 22]

ʻOku poupouʻi mo maluʻi ʻe he kau ʻāngelo ʻa e ʻOtuá ʻene kau sevānití